عقد الجلاد تلحق جامعه الرباط!!!

Posted: الإثنين,29 مارس, 2010 by ودالزبير in اخرى

والرابط هنا هو الإنهيار فكما إنهارت تلك العماره المشؤمه نعي إلينا الناعي اليوم خبر إنهيار الفرقه التي أعطتنا ( كل الخير ) الفرقه التي سافرنا بها إلى ( عطبره ) من قمت من بيتنا ومشيت والتي فأجاتنا (بالنهار السعيد) والتي بشرتنا بأنا( لا نحلم بعالم سعيد) الفرقه التي غنت لحاجه آمنه ودعتها للصبر لم تسطتع هي أن تصبر على مشاكلها الفرقه التي عرفتنا على محمد طه القدال والمرحوم مجدي النور وغيرهم العشرات من الشعراء ..

اليوم خرج لنا مؤسسها عثمان النو في الصحف ليقول إنه قد هجرها وقرر أن يسحب الإسم والشعار وعشرين لحن من المجموعه العامله الآن ..
رويدك يا نو وتذكر أغنيتكم كتر الفهم ما بيحوق آخر الزمن يا ناس ودوا الولد للسوق

أخيراً وفي تنافس مالي سقط الفرسان الذين كنا نعول عليهم

لكن مالا يعرفه النو وصحبه إنه لم يعد من حقهم أن يتنازعوا في إرث أصبح للجمهور السوداني فيه نصيب كبير

ألحقوا العقد من الإنفراض أيها الشعب السوداني الفضل ويلا يا أولاد المدارس

Advertisements
تعليقات
  1. طارق أب أحمد كتب:

    لا و لن تنفصل
    وهى ليست أول مره يحدث لهاا مثل هذا الأشتباك و لكنهم جديرون بإيجاد الحلول

    أول مره عرف الشعب السودانى عقد الجلاد عقب أنتفاضة أبريل 85 عندما غنوا روائع القدال و حميد وعصفور لمى ال مع مارسيل خليفه

    فى تلك الأيام و نحن شباب و القلوب ظمئى لمثل هذا الفن الذى يتنقل بك من عشق الوطن الى عشق المحبوبه عبر دنيا من الفن الراقى كما فى الأحلام كانت البدايه و اللقيا و أكيد ما حننهزم نحن جيل الأنتفاضه و عقد الجلاد أحد رموزها

  2. مشاكل كتب:

    سلامز

    كغيري في هذا الجيل لم اسمع الموسيقى السودانية نهاااائيا الا بعد دخولي الجامعة – مع اني قريت في مدارس خاصة و حكومية في الخرطوم دي – لكن الموسيقى الأولى التي سمعتها و اعجبت بها كانت فرقة عقد الجلاد .. فرق كبير بينها و بين بقية الفرق و المطربين … في الأشعار و اللحن و الأصوات و آخر مرة إلتقيت بهم كانت يوم السبت قبل الماضي في زيارة مشتركة لقروب في الفيسبوك مع الفرقة لدار المايقوما و واضح تماما انهم شايلين هم الوطن كغيرهم من الفنانين الوطنيين .. فقد أحيو كثير من الحفلات و كانت لصالح دار المايقوما او جمعيات أخرى

    ربنا يلم شملهم مرة تانية و يرجع النو و يرجع الخير … لأنهم عندنا كل الخير

  3. ودالزبير كتب:

    طارق يا دفعه

    يا حليل زمان وسنين زمان يا حاجه لو تتذكري

    مشاكل
    يا واعي يا راقي يا أخانا الأصغر يا من عرفت أن تفرق بين العام والخاص

    العقد ظل وسيظل هو الفكره التي ألتف حولها الكثيرون فكره أن تكون بني آدم اولاً وثانياً واخيراً

  4. ودالخلا كتب:

    ودالزبير أنت صحي دفعة طارق؟؟
    كدي سمعنا أغنية السيلفر كونفنشن فلاي روبن فلاي…
    قال طارق يادفعة!!!

  5. ان فرقة عقد الجلاد تمثل بالنسبة لنا ماضي استرسخ داخلنا بزكريات لايمكننا فصلها وتبقي حقيقة ان تنتهي بهذه الصورة في صراعات مالية لهو امر لاتشبه ماتبشر به مؤسسك كعقد الجلاد وعقد الجلاد لاقت مالاقت من تشريد واستطاعت رغم ذلك الصمود ان مثل عقد الجلاد مؤسسة كنا نتوقع منها الكثير في تغيير الواقع المليء بالتناقضات شمت محمد نور وعثمان النو ابو ذر وانور واميمة وغيرهم كلهم فرسان قلما يجود بهم الزمان لاتحبطوا شعبكم فكفاه احباط انكم الامل والتغيير المنشود
    تحياتي
    ابو كلابيش

  6. حاج أحمد السلاوى كتب:

    آمل ألا ينفرط هذا العقد الفريد وتتناثر حباته بهذه البساطة نتيجة خلافات لا ندرى حتى الآن اسبابها ..ونتمنى أن يتدخل أولو الحكمة لحل المشكلة بين هؤلاء الشباب ..
    كانت مجموعة فريدة تميزت بكل ما هو جديد فى مجال الفن السودانى ..كلماتاً .. الحاناً .. اداءاً ..كان لها حضور مميز لن يتكرر ..
    وكما قال الأخ ابو كلابيش أعلاه كفانا إحباطاً ..
    وخلونا النشوف آخرتا شنو !!

  7. ودالزبير كتب:

    خلونا نتذكر الشباب ديل شويه

  8. ودالزبير كتب:

    مسدار أبو السره لليانكي كلمات محمد طه القدال :ــ

    أخوكم طبعاً في كلمات كتيره في المسدار ده ما فاهمها زاتو ولا لقيت زول يعمل لي شرح المفردات غايتو ده طلب لبشار ولنيام ومن لف لفهم لشرح هذا المسدار وتحليله :

    أُمّاتِي القِبيلْ
    بي حِنّهنْ لجّـنّي
    كَرفة وقَلدة
    كيف شوق اللّبن رَجّني
    حُزناً جاني في مَيْع الصِّبا يلَجِّني
    أطلعْ مِنِّي يا جلدي المِنمِّل جِنيِّ
    واطلعْ مِنِّي يا حُزناً بِقى مكَجِّني

    خَلّني أبدا مُسداري
    وأودي قفايا لي داراً بِقَتْ مِي دَاري
    جِيتَا ..
    وجِلْدِي بينو وبين عضاي الشّحَمَة
    إلا النّار بِقَتْ قِدّامي
    جِلْدِي اللّيلة بينو وبين عَضَايَ المافي
    إلاّ تراني شَوّالْ الكِبِسْ
    نِفّيخْ جَراريب الوَرَمْ هَدّامِي
    في جِلدي الورم قُولَنْلي
    وللاّ صَحِي الورم عَضّامِي
    سفريتك مِي الفي النيّة
    وميها الكانت محريّة
    خابراكْ عِرِّيفْ ..
    ذم العُربانْ واللاّ قِيام الوردية
    مالكْ ؟؟؟
    تَرْيَانْ ومندِّي
    كاسي الكِتّان والهندي
    قولَكْ كِكّيفْ ترجى البيشان
    واللاّ الغُربة البي الزِّنْدي
    برقاً عِبْدِللِّي الوَزْنِ
    يا طاشْ .. يا جاب المُزْنِ
    فَرِّقْ يا الضّيفْ
    فِعْل الغَضْبان ..
    أم فِرفيرات الحُزْنِ
    وشِنْ القَعدة
    يا أبو السُّرة
    في ضُل العمارات أم كمرةً برّة
    ضُقْنا الحَنْضَل اليانكي
    وبَلَعْنا المُرّة
    كِمْلَتْ كوتة التُّمبَاك
    صَقَعْنا الجِّـرّة
    ووكت إتقفّلَتْ شِقّيشْ
    قَبَلْ بي المرّة
    نَرْمي أمُرنا في بلد المعاني الحُـرّة
    الشّمْ خَوّخَتْ
    بَرَدَنْ ليالي الحّـرّة
    والبرّاق بَرَقْ ..
    مِنْ مِنّا جاب القِرّة
    شوف عيني الصِّقير بجناحو كَفَتْ الفِرّة
    تلقاها ام خدود الليلة مَرَقَتْ بَرّة
    مَرَقَتْ بَرّة تغلي مديدة الحِلْبة التَسَمِّن رِدْفَها
    السَمِنْ المبَسْتَرْ يانْكي
    والويقود بعيرات الدُّخان في العين
    وفي الفَشْفَاشْ يسوِّي عمايلو
    شِنْ فايدة مديدة الحلبة والويقود بشيلو اليانكي ؟؟
    يا ابو السُّرة
    قامت من دخاخين العمى تلمِّع وشِيها
    اليانكي مِسْتَنِّيهَا
    كان اليانكي مستنيها في مراية السَجَم في اللّيل
    لقيتها مِتِلْ فريخ الطّير
    مَرَقْ ود عينها من ود عينها
    رجّافة المزمّلْ حُمّى
    جَفَلَتْ مِنّو
    وَقَعَتْ عندي
    صدرها بغلي
    يا ابوالسُّرة
    شُفْتَ اليانكي في ود عينها
    سُقْتَها للبحر
    يمكن يغسِّل عينها من اليانكي
    فُتْنَا الحَجْرة بالكَتّة وغطسنا مسافة
    تبقى قَدُر مسالك الرّيدة
    ما لاقانا من يغبانا في البحر الفَدَرْ تحتاني
    ناس عارفاها
    ناس عارفاكا
    ناس عارفاني
    ناديت القعوي والبُلْطي
    قرقور السّمَك ودّاني لي دابي الخُشَشْ
    نادينا عُمّال الطّمِي
    عُمّال الطّمِي الصّارقيلا
    والقَرْمُوط
    وود الموية
    فُتْنَا عليها
    كانت نايمة
    عَجّال البحر حارساها كانت نايمة
    بين حجرين وضُل ساسوية كانت نايمة
    وعُمّال الطّمِي الصّحونا لّمُو حصى البحر
    قسموهو ياتْ من كان سبع جمراتْ
    دابي الخُشّة قال :
    أدُّوها في الجمرات تلات سبعاتْ
    قُلْنا :
    أدُّوها في الجمرات تلات سبعاتْ

    مَسَكْنَا دَرِبْنَا
    عُمّال الطّمِي الصّحوها
    خابرين الدّروبْ
    مَرَقوبنا فوق مُشْرَعْ مسارب الضّيْ
    لقينا الدُّنيا تترجّانَا
    قُوقَا القِمْري
    خَوّى صِقيرْ
    وعَوّى حِديْ
    وعُمّال الطّمِي الصّحونَا
    لَمُّو على البعرفو الصّيْ
    حَصَى القيزان
    دوابي الدّارْقَة
    والسِّحْليّة
    والنّاسْ التِّحِتْ
    النّاسْ التِّحِتْ خابرين عَمايْل اليَانْكي
    مَرّة معونة لي اللّغّاف
    ومَرّة دَوانْكِي
    شِنْ معناهو جيبها إن كان ملوهو بوانكي
    صوتها مكتِّمو القَرَبين سيوف وسَوانْكِي

    قولَنْ لي الأَخْلو ديارو
    دمّكْ فَرْهَدْ في نارو
    غَوّرْ في الأرض
    طارو صَقْرين
    ولاد الأرض ما طارو
    لحمي غَطّى بِنْ عَمِّي
    شو صار حالو يا إمِّي
    منديل العِرْضْ في بيت الدِّينْ
    دمِّي ما يخلِّي دمِّي
    إمنّا من دير ياسينْ
    صِرْنا في جِزْر التّين
    عَمْ نسقى بعضْ
    حُبّ الزّيتونْ بدّو يرجع للطينْ

    صابرا تحت الدورية
    صابرا فوق الدورية
    صابرا فوق الدورية
    يا حال الضِّدْ
    لحم الطِّفلين نابت غُصنْ الحريّة
    جِذْري مو في شاتيلا
    ما قال حالي يا ويلا
    حِنّا في الأرضْ
    أرضِ فلسطين
    يا إمِّي هيلا هيلا
    يا إمِّي هيلا هيلا
    يا أُمِّى هيلا هيلا
    هيلا
    هيلا
    هيلا

    هيلا وهيلا يا ابو السُّرة كُجْ العين
    تخبر الشّينة من الزّينْ
    تَفُرْز الطّاري من السّاري
    يا ابو السُّرة كُجْ العينْ
    ومدُّو صباعك السّبابي
    قول لي الغَافي هويْ يا زول
    هوي يا غافي يا زول هويْ
    أرخي الغُردة للعَنّافي
    شِدْ القمري بالحوبابي
    في مسدارنا
    شِلْنا نهارنا
    في إيدينا من ساسو البحر عقدينْ
    مَسَكْنا دَرِبْنا
    عُمّال الطّمي الصّحونا
    خابرين الدِّروب مرقوبنا في مُشْرع مَسَارب الضّيْ
    لقينا الدُّنيا تترجّانا
    قوقا القِمري
    خَوّى صقيْر
    وعَوّى حِدَيْ
    وكُنّا جماعة
    دابّات الأرض والسّايمة
    عَوّامة البحر والطّيرْ
    وحتى الغيمة قصّاصة الأَتَرْ
    فوق راسنا شايفة الدّربْ
    ضِنيب اليَانْكي
    قال القمري لي الضُّليلة :
    خَلِّكْ صاحية زوغ اليانكي لا يودِّرنا
    قال الدّابي :
    إن يغباها ما بيغباني
    ولمّا الشّمْ مودِّعة غاربة
    وَصّتْ جملة الصّقّار عيونهنْ كَارْبة :
    أبقو أَلِفْ
    بَفوت لي المِتْلَكُم ناهضينْ
    وفوق ديناب عريباً غادي
    قال السِّحْلي لا نغشاهم
    ديل عُربانْ توابع اليانكي
    قال الجمع لا نغشاهم
    ديل عربان توابع اليانكي
    خَلُّوها العريب الغايبة
    والسّراقْ طبيقو معاهو
    تيجاناً عروشها الخروعْ ..
    الهَشْ ..
    العَويشْ
    الناّر تَعَلِّبْ فوق عُقَال العَرْشْ
    ولا خَسّانا بي هادي العروش الهـُرْبة
    يا ابو السُّرة .. لا عَقّالْ
    مَسَكنا دربنا
    والشمس البتوقد فوقنا
    ولمّ لميمنا
    لمّ لميمنا والشّمش البتوقد فوقنا
    شدّ شديدنا لا التِّمثال مَشيّلْ روقنا
    عَالَم حُرْ يدوعِلْ فوقنا
    لي يوم سوقنا
    نبزُق فيهو .. في ود عينو جَرْ واسوقنا
    يا شمسي طِلِّي .. طِلِّي
    شاوري عَ بيتي دِليِّ
    كَيّال الكيل .. ختياري ماتْ
    ظِلِّي عَمْ يحرس ظِلِّي
    عَادِلْ عَ خَييّ ميلي
    خَييّ ما يحمل شَيلي
    ما خَفّ الشّيلْ
    ثاني المرّات ناطِرْ رصّاصِي سيلي
    عيني في الفيل ما ظِلّه
    كِلْنا ندريه ما نضِلّه
    يا ويل الويلْ
    نرمي الجمرات عَدِّ المستشْهِدْ كِلّه

  9. حسن عبدالوهاب كتب:

    عقد الجلاد من المجموعات المميزة فى السودان والتى لم يأتي غيرها حتى الأن لكي ينافسها وهي تضم خير الأصوات الغنائية و تضم الفهم والذوق.
    أتمنى أن تتلاشي هذه الخلافات

  10. ودالزبير كتب:

    أخي حسن عبدالوهاب

    فعلاً كلامك في محله وكلنا نتمنى أن تتلاشي هذه الخلافات أشكر لك مرورك من هنا وأتمنى أن يطيب لك المقام بيننا وهذه هديه مني لك

  11. الحبر كتب:

    كلامك صاح يا ود الزبير انو الفرقه مابقت حاجه خاصه بقت ملك للجمهور

  12. siddig ahmed كتب:

    التحية لجمور عقد الجلاد اولا لانهم السبب الاول في عطاها وتقدم المسيرة وتطور الفكرة التي لاتموت

  13. بواسطه ابوعاقله كتب:

    عقدالجلاد ماضي مزدهر وجاضر عابرمشاكل كثيره .

  14. بواسطه تاشي من جديد كتب:

    اخبارالعقد الفريد مالها مقطوعه والله مشتاقين لي حفلاتم العجيبه لااسكت الله لكم حسا ايها العقد الفريد -(مين غيركم يعطي لهذا الشعب معني ان يعيش وينتصر)

  15. ودالزبير كتب:

    أخوانا صديق وأبو عاقله وتاشي من جديد

    مرحب بيكم بهنا والبيت بيتكم … أدخلوا لجوه

  16. عمار جدة كتب:

    والله يا ود الزبير لو فرقة عقد الجلاد دي وقفت…… دي حاتكون ماسأة بمعني الكلمة لانو نحن خلاص بقينا مدمنين لغنا الفرقة و هي الوحيدة القادرة انها تنضف مسامعنا من الغناء الغث والهابط المالي الجو وبقي في كل مكان الايام دي و هم اصبحو قدوة و مثل لي فنانين و فرق غنائية و كورال اي جامعة بيستمد من معين عقد الجلاد يعني فعلا بقو رمز للشعب و ملك للشعب فما بالهين انهم يتشتتو ويقيفو .طيب ما تكلمو ليهم ناس الوحدة الجاذبةديل يشوفو ليهم حل قبل ما ينقسمو.

  17. والله والله والله يااخوناعقدالجلاد جرت في دمنا الواحد كان ما اتصبح بيها ما اقدر اقوم من السريرعقدالجلاد دي كان اتفرتقت (الواحد بكتل ليو زول)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s