برج البصير

Posted: الثلاثاء,30 مارس, 2010 by طارق أب أحمد in سيناريوهات

عقب إكتساحه الأنتخابات العامه قام المشير تمر البصير بدعوه طاقم مكتبه لأجتماع هام و بالجد خطير

يا جماعه أنتو عارفين انو نحنا فزنا بتوفيق من الله سبحانه و تعالى عشان نحنا مع الأسلام و ما بنعرف المداهنه و الكضب و الحمد لله أن قيض لنا هذا الشعب الطيب كى نفعل به ما نشاء و هو قانع بما يظفر به من لقيمات يسدن رمقه وهو حامد و شاكر لفضلنا
هسى الناس بقولو زورنا الإنتخبات عشان كدا نحنا كمان لازم نثبت للعالم كولو إننا ما هينين و عليه أنا فكرت أعمل برج و لأنى رئيس محنك وعندى خبره طويله فى الرئاسه قمت عملت بحث عن( برج) فى الجوجل و طلعت بى نتايج كتيره عندك مثلن برج خليفه و برج العرب والفاتح وواحد جديد فى السعوديه وواحد كدا إسمو (بيتزا) بكون بناهو المهندس بتاع جامعة الرباط كمان أخواننا المصريين عندهم برج طار من بلد أسمها نافوخى
أها المطلوب فى الأجتماع دا الآتى
:- وزير الأراضى يدينا الأرض بس يبعد لى من كافورى
:- وزير التخطيط تكلفة المشروع لكن بحبحا شويه تلك عارف ناسنا
:- عبد المنتقم عليك التمويل و ركز لى على ناس الشاكوش و المرزبه ديل
وزير السخافه و الأعلان تبدا لى حمله قويه زى حقت كنانه و الرهد
و إنت يا كمال الغالى شوف ليك بيزنس تريب لى أمريكا و جيب لينا الخرط بس أعمل حسابك لازم يكون أعلى برج فى العالم و لازم يكون فى جامع فى الطابق الأخير يكون فوقو مئذنه تكون الأعلى على مستوى العالم
واضح إذن نتلاقى بعد شهر نشوف الحصل شنو

و بعد شهر
وزير الأراضى :- طمام يا ريص جهزنا الأرض المناسبه قطعه نمره واحد مربع واحد و قطعه نمره 2 مربع 1 و القطعه نمره 1 مربع 2 الخرطوم وسط
المشير :- يعنى بالعربى كدا ديل وين
الوزير:- ديل ما القصر الجمهورى و وزارة الماليه و الأشغال سابقا و الميدان القدام الماليه يا ريص
المشير :- و تفتكر الشعب و المعارضه حتسكت
الوزير:- كيف ما ينطموا القصر دا رمز للإستعمار و لا بد من أزالتو هسى نحنا لامن قطعنا راس كنيسه القصر و سويناها معرض عربات فى زول سألنا و تانين الناس كرهونا مبنى الماليه مبنى من سنة دو و ما وقع زى باقى مبانينا أها نقوم نرميهو و نرتاح منو أما مبنى الأشغال فدا لابد من ازالتو ياخى الناس الما بتفهم دى كل ما يشوفوا المبنى يقولوا ليك يا حليل زمن الأداره و النظام و العطاءات و ومركزية المشتريات والشنو ما بعرف
البصير:- على بركة الله الله أكبر هى لله نشوف التكلفه
الوزير تمام سعادتك أنا ما إستنيت الكوست من الأمريكان لأنو دورارم نازل و سوقهم واقع عليه أخدت تكلفت برج الخليفه بتاع دبى و ضربتو فى تلاته عشان نكون فى السيف سايد والمبلغ طلع 3 مريار دورار
المشير:- على بركة الله الله أكبر ألله اكبر هى لله هى لله نشوف عبد المنقم حيوفر التمويل كيف ..

عبد المنتقم :- قياسا على ما تمكنا من جمعه و صرفه لتمويل حملتنا الأنتخابيه يعد هذ المشروع حلاوه قطن لأننا أثناء الحمله الأنتخابيه أضررنا للدفع لشراء الأصواط ياخى نحنا أشترينا حتى أصوات الفنانين عشان يغنوا وأصواط العنج شان نهز و كنا بنشترى من الطياره لحدت اللستك الضارب عشان ما يحررقوا لينا فى الشوارع و الدفعناهوا لشركات الإعلان و القنوات الفضائيه حررررم يبنى بلد خليك من برج أما عن التمويل فبعد ما فزنا عديييل كدا تانى الزارعنا غير الله اللجى يقلعنا و القروش بنقلعا من الناس رجاله و حمرة عين
المشير:- على بركة الله الله أكبر ألله اكبر هى لله هى لله نشوف ناس حسن طحنيه
رئيسنا المفدى و قائدنا أالهمام لك التجله و الإحترام و دائما تجدونا جاهزين تمام.
جهزنا ليك كل الشعارات و الإسم المقترح يكون
برج أبريل و دا الشهر اللى سعادتكم فوزتوا فيهو و كدا نحرق أبريل الأصلى و لو الناس أحتفلوا بى ابريل الزمان يكونوا بحتفلو بيكا أما المقترح التانى برج البصير على أسم سعادتك
يقدم عرض بالبروجكتر يشمل عدد من الأعمال الهابطه التى تمجد إنجازات الثوره من الفنان الوطنى قمقم ((بالمناسبه قمقم فنان شعبى و لكن لأن كلمة شعبى صارت توتر المشير عدلت إلى وطنى ,,لذا لزم التنويه))
المشير:- عظيم عظيم انا شايف إنو البصير دا اسم عندو دلاله خاصتن أنو أنحنا ناس رساليين لكن فكرة أبريل دى خلينا نحتفظ بيها لى جامعة حوش بانقا (*) عشان الناس ما تكتر الكلام
أها يا الغالى عملتوا لينا شنو
كمال الغالى الذى لا يعرف له منصب تنفيذى محدد غير ما يشاع عن أنه مدير أموال الرئيس رد قائلا :-
Yes Sir I got my associates there & the mission is done
جبنا كل الخرط و التفاصيل لأطول برج فى الدنيا و هو بتكون من برج رئيسى ألف طابق واربعه أبراج داعمه بجواره يعتمد على تكنلوجيا الشكبزورات لإمتصاص الهزات من زلازل أو سونامييات و كمان ما نسينا نجيب معانا مهندس أقصد مدرب من البرازيل الغشيناها فى طريقنا و تنفيذا لتعليمات سعادتك كل برج من الأبراج الخمسه فيهو قبه و أربعه مآذن يعنى 5 قبب و 20 مئذنه و بى كده حيكون أكبر مسجد فى العالم من حيث عدد المآذن و أعلى مسجد فى العالم فى الطابق الألف
المشير:- الله الله أكبر ألله اكبر هى لله هى لله على بركة الله خلاس أبدو الشغل

و بعد عام صدر قرار من الرئيس المرتاح ببدأ الأفراح و تعيين ود عبد الفتاح مديرا لمراسم الأقتتاح
و مثل ديك العده لم يبدد مدير المراسم المده فأتى برفاقه فى القعده
يا كهربائى بما أن لك خبره مع العمود الطويل أذهب الى مجرى النيل و إحضر لنا النخيل
و يا بستانى أنت خبير فى الألوان و فن البستان إذهب إلى هندوستان و هات لنا من الطعام ألوان
و أنت أيها الرياضى لعلمك بالجرى و الحصين تذهب الى الصين و عليك بجونى المشاى و الحصان الأحمر و المارتين
وهكذا دواليك الليزر أتى به النجار لخبرته فى دق المسمار و قائد اركسترا أتى به عمار لخبرته فى قيادة الدفار

الأفتتاح
هذا متروك لخيال سيادتكم إلا أن نهايته كانت عندما جاطت الأمور و سقطت أشجار النخيل و أقفلت السبيل و ضربت أنوار الزينه و هى باليزر متينه وإشتعلت النيران و القمقم يشدو النار ولعت واى واى منو البطفيها و الكل يبحث عن مخرج وسط شعارات نحن فداك يا البصير
تصايح بعض القوم أن خارجوا البصير خارجوا البصير و لكن لا مخرج سوى مهبط الطائرات فى اعلى البرج فحملوه و هرعوا به نحو السلالم حيث لا تعمل المصاعد و فى نهاية المطاف وصلوا به إلى قمة البرج و هو مجموعه من المآذن تتوسطها قبه

(*) حوش بانقا إسم جديد لضيعة عزيز كفورى شرق بحرى

Advertisements
تعليقات
  1. مشاكل كتب:

    سلامز

    أنا شايف انو المفروض يكون البرج في نص البحر … و البصير يقوم يتخارج بي سفينة … و السفينة لا تبالي بالرياح …… كاااااااااك

  2. علي سنكل كتب:

    أب أحمد سلام:
    مدير مراسم الإفتتاح دا في أول أيام دولة المشروع الحضاري لقيتو جاري. أيوه جاري في نص سوق الخضار في الخرطوم ، جارين معاهو ضباط إداريين. ليه جارين ما عرفت للحين.

    إنت بقيت تمشي لي جبرا في البيت ؟ يكون لاقاك كابوس هناك و أداك حاجه ملفوفه في ورقه؟
    مبااالغه، بقيتو كلكم كدا! !

  3. محنك كتب:

    دى فيروسات الجمعة الاخيرة
    بس انا علقت وتعليقى سحبوه قبل كده ليه
    واذكر

    كلن
    برج عاجى

  4. عزت كتب:

    و أنا ذاتي علقت قبل كدا يا محنك…. لكن يبدو المؤلف سحب البضاعة لأنو نسى حاجة و قام مشى لي كابوس و رجع الموضوع تاني…

    تحية يا أب أحمد برج و لا في الاحلام….

    بس ياخ مش النهاية سعيدة شوية…..
    غايتو أنا أتخيل انو استلموه فوق !!

  5. طارق أب أحمد كتب:

    مشاكل
    غريبه القصر و الماليه و الأشغال بفتحوا على البحر طيب الناس الحيوانين ديل بدل ما يطلعوا راس البرج ما كان يركبو اليخت النوهائى ما إستادو منو دا

    سنكل
    والله و ما طالبنى حليفه أنا لقيتو جارى و وراهو مساجين قبل حوالى شهرين و كانوا بكتلو فى النخل جنب السكه حديد شرق الجامعه بس بقى سمين و عامل ليهو دقن

    محنك
    الموضوع نزل أمس فبل أن يكتمل عليه طلبت من سترايكرسحبه لإكمال الموضوع و تعديل الأخطاء

  6. محنك كتب:

    اب احمد
    تمام اليوم بقى كارب …. ناقص فكى ابكرون

    قلت لى اتول برج فى الدنيا

  7. ودالزبير كتب:

    أقترح بنقل الموضوع لصفحه الإنتخابات في موقع الدعايه المضاده لحزبنا المنتصر بإذن الله

    وتاني كااااااااااااااااااااااااااااااااااااااااكا

  8. حاج أحمد السلاوى كتب:

    غايتو .. يا اب أحمد ..أكييييد حسن كابوس كان فى زيارة خاطفة فى شارع الإنقاذ ..
    بس بعد دا كوووووولو .. ما تبقا المسألة كانت حلم ليلة صيف ..
    غايتو ..لاكين .. جنس … برج !!!

  9. mahoia كتب:

    والله يا ابو احمد حلات قصه قلبت فيها الهوبه عددددديل انا زاتي سرحتا معاهم والله تنفع فيلم ولكن من بطولة عادل امام لانه ح اجيد دور تمر البصير. احييك ابو احمد

  10. من عبدالرحمن ود أحمد إلي طارق أب أحمد
    أم بعد
    إذا وصلكم مكتوبي هذا فاعلم أن البرج لحق أمات طه
    قلت عمك خلاس فااااااز !!!؟

  11. mon amie كتب:

    ياربي البرج ده اكون اتحسد من الجماعه السقطوا!

  12. محنك كتب:

    المقاول لصديقه

    سايف البرج داك الكلف 3 مليارات

    صديقه
    ما شايفه

    كلو هنا ( واشار الى جيبه )

    احتمال وارد مش

  13. محنك كتب:

    يا اب اجمد ما ناقصهم افكار لغسل الاموال

  14. طارق أب أحمد كتب:

    الأحباب

    بدأِن حيوا معى mahoia مهويه التى حضرت أفتتاح البرج و كتبت لها السلامه و جاتنا زياره
    أما أقنراحك بتاع فلم بطولة عادل إمام ممكن أناقشو بعد ما أشوف جورج كلونى يقول شنو فى موضوعو بتاع ذا بليزنج تاور
    لكنى أتخيلت عادل إمام و هو بقول خرياريه بمريار دورار

  15. التركــــى كتب:

    يااب أحمد لكن مابالغت ياخ أنا سرحت لمن اتخليت مقر الأمم المتحدة ومحمكة لاهاى أجرو ابراجنا وسير سير يا(نصير) … تسلم يارائع

  16. طارق أب أحمد كتب:

    عزت
    ما النهايه لازم بكون سعيده عشان ناس كاااااك ما يزعلوا

    ود الزبير

    ود البصير كبف كبف ما عارف حيفوز أما باقى حزبو (يا ها دى ظاتا ال كاااااااااااااك)

    السلاوى
    ناس حسن كابوس فى مصر يقولو للواد بتاع الغرزه أعملنا برجين من الهباب اللى بتهببو دا

  17. طارق أب أحمد كتب:

    مونامو
    الجماعه السقطوا ديل ما الشعب اسودانى و دا كان عينو حاره كان رمى برجهم العاجى قبل عشين سنه

    عبد الرحمن ود احمد
    البرج كان لحق أمات طه ما مشكله المهم أنك تكون بخير
    بعدين عمك دا ما فاز خلاس هو أنت ما عارف ياخى لو الشعب السودانى كلو ما صوت عمك حيفوز بى 99,99 أنتا شكلو نسيت الملايكه الحاربت معانا قبال أولادنا ما ماتو ف…س

  18. طارق أب أحمد كتب:

    مونامو
    الجماعه السقطوا ديل ما الشعب اسودانى و دا لو كان عينو حاره كان رمى برجهم العاجى قبل عشرين سنه

    التركى
    إتخيلت لو كان فعلن فى مهبط فوق البرج و الطياره واقفه راجيه البصير بس كانت هليكوبتر بيضاء تابعه لى ال UN

  19. أب أحمد
    قلت أب شدره فااااز …..
    ياخي ما تخلينا نحلم بعالم سعيد شويه
    يعني لازم كل مره تخدر ورق الكيفيه
    والملائكه ديل مش ياهم الصوتو لينا في انتخابات الجامعه سنة داااااك وبرضو بتقول لي كااااك …وكاك دي صياح الفراريج وديل ممكن ننادي ديك نادوس

    كســـــ ـــــــــــــــــره
    الما عارف ديك نادوس خلي يلاقيني بالضفه الغربيه

  20. بشار أحمد بشار (ابن برد) كتب:

    “و أنت أيها الرياضى لعلمك بالجرى و الحصين تذهب الى الصين و عليك بجونى المشاى و الحصان الأحمر و المارتين”
    أب أحمد : جوني المشاي؟؟ ديل بتاعين لهطي وتدبيل نسوان وباسطة وبس .وهي لله ولا للسلطة لا للجاه!!!!!
    تصحيح : الحصان لونو أبيض وليس أحمر

  21. نيام كتب:

    اب احمد:
    قلت لي عزيز كافوري بقا اسمو منو…عثمان عمر الشريف لمان كان وزير اسكان و صدق بقطعة ارض في عزيز كافوري (حقو الوزاري ) لمواطن سوداني كتسوية لمظلمة حكم عليه بخمسة سنوات قضاها في سجن الابيض بجريمة الفساد…يا ربي (حوش بانقا) فيه كم قطعة..

  22. طارق أب أحمد كتب:

    بشار
    الناس البتاعين اللهطى ديل ما هم ال بى الليل بضبحوا
    يبدو أنو حصل خلط بين الليبل الأحمر و الحصان الأبيض

    عبد الرحمن
    راجين حكاية ديك نادوس من الصباح فى الضفه الغربيه

    نيام
    صديقى س أشتكى لى بأنه لا يملك 40% مقدم سلفية شراء عقار علما بأنها كانت 10% العام الماضى ,,فأجبته بأن هذا هو المقصود فلا يجوز أن يمتلك كل من هب و دب عقار هذه منطقه مقفوله لهذه العصابه فقط

  23. ياسين شمباتى كتب:

    اب احمد..سلام.
    البصير!! عليك الله ريس زى دا بجيب بصارة من وين؟؟الا تكون بصارة حلة المصرييين..كااااااااك..
    لكن عجبتنى النهاية القمقمية والمهبط واحتمالات الرفع من هناك الى حيث لا مال ولا بنون,,ويا اوكامبو جاك نفر..
    اما عن ديك نادوس فكل المؤتمرجية ديك نادوس!! وهز يا وز…

  24. حكاية كتب:

    هههههههههههههههههههههههههههههههههههههههههههههههههههههههههههههههههههه
    التحية ليك والله بارع طارق اب احمد
    لكن سؤال البرج ده ممكن ناجر فيه لسوداتل وزين واريبا لو فى طريقه يعنى يختوهم معاهم
    سؤال تانى البرج ده فيه شقق للبيع ولا كلها اتباعت قبل ما تطلع على وش الواطه
    بعدين لو منك بعمل مقابر جماعيه مع الجامع طوالى وصلاة جنازة عشان توفر وقت للنزول من الطابق الالف
    تانى حاجه مفروض كان يعملوا حوض سباحه جنب الجامع عشان الناس تسبح فى رحاب العلو والتامل وتغرق تريحنا طوالى
    تامن حاجه البرج ده عنده مانعه صواعق ولا ساكت ولا نسوها زى باقى الحاجات
    انت عارف شكله العسانسير برضو نسسسسسسسسسسسسسوه اصله مبنى مكلف شديد
    خامس حاجه مفروض تكون فى حته لاى زول داير يلزوه من فوق للارض عشان يصل بسرعه للارض عشان يلحق طابور المدرسة
    كسرة:
    اعمل لينا عدد تانى للموضع ضحكتنى شديد خاصه
    الوزير تمام سعادتك أنا ما إستنيت الكوست من الأمريكان لأنو دورارم نازل و سوقهم واقع عليه أخدت تكلفت برج الخليفه بتاع دبى و ضربتو فى تلاته عشان نكون فى السيف سايد والمبلغ طلع 3 مريار دورار
    هههههههههههههههههههههههههههههههههههههههههههههههههههههههههههههههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s