أمل : العرس العرس … بدر : الفلس الفلس‏

Posted: الأحد,4 أبريل, 2010 by mashakel in اخرى

في يوم من الأيام دخل خالي إسماعيل على حبوبتي الحاجة و هي ( أم أم أمي و اتوفت في نهايات القرن السابق عن عمر فوق المئة ) في بيتها في الثورة الحارة الأولى و لقاها فارشة البرش و رافعة يدها للسماء و تدعو بدعاء الرسول عليه الصلاة و السلام

اللهم أحيينا مساكين وأمتنا مساكين واحشرنا في زمرة المساكين

لمن سمعها بتقول كدا قال ليها : يا دوووووب عرفت المفقرها علينا شنو .. مالك معانا يا حاجة .. هو نحن ناقصين فقر و مسكنة … عليك الله ادعي : اللهم أحيينا حياة السعداء و أمتنا ميتة الشهداء

نبدأ من وين أسي .. فالوضع في السودان لا يحتاج إلى مقدمات .. ما اهو زي ما قال عبد المنعم مدبولي في مسرحية ريا و سكينة ( كل شيقن إنكشفن و بان ) … يعني كل حاجة واضحة و صريحة .. زي الشمس
فنسبة الفقر في السودان و حسب بعض الجهات الحكومية تزيد عن 37 في المئة من السكان و حسب تقديرات بعض الجهات الدولية 94 في المئة من السكان .. الفرق كبير .. لكن نجيب ليه متوسط يمكن يكون صاح أي حوالي 65 في المئة من سكان السودان يعيشون تحت خط الفقر ( واحد دولار في اليوم ) … ياخي حرام عليكم يا حكام و يا ساسة .. قسمة ثروة و سطلة في شنو و الناس حالها حالها لا يسر عدو ولا صديق .. فنسبة النمو تزيد في السودان بمعدلات قياسية .. ولكن لا توجد تنمية حقيقة .. في وضع يمكن تسميته متباينة سياسية إجتماعية و ليست معادلة غير موزونة
و يمكن رؤيتها بوضوح في ظل وجود بعض الظواهر مثل

ازدياد ظاهرة التسول
انتشار مظاهر الغش والخداع والاحتيال
انتشار أعمال السحر والدجل والشعوذة
تفشي الفساد المالي وخيانة الأمانة بكافة أشكالها
العجز عن إكمال الدراسة ودفع منصرفات التعليم
العجز عن العلاج
العجز عن الزواج والفشل في بناء حياة زوجية أو استدامتها واللجوء إلى الزواج العرفي والممارسة خارج الأطر الشرعية
العجز عن إدخال الخدمات الأساسية بالأحياء الجديدة والطرفية
التردد الدائم على ديوان الزكاة والمنظمات الخيرية طلبا للعون والمساعدة
****************************

فلسان و بس حيلتي العدم

نشفان نشافا بي فهم

لا حق سجائر لا صعوط

و الشيشة عندي بقت حلم

في الجامعة قالو هناك علم

ما ضقنا ليها ولا طعم

البوش و الطعمية ديك

ما ادونا فرصة ناكل لحم

عطالة السواد .. بطالة الرماد

عايز شغل

انشاء الله حتى اكون حكم

لا ود وزير ولا مدير

لا كورة نفعت لا نغم

صناديق الدكان

ضل الشجر

تحت العمود

مسطبة البيت

و البوتي دا إتألم ألم

********************************

قريبي زول ( مسلط ) و (جاري جري الوحوش .. زي باص الجريف … مسخن و مدخن.. يوم يشتغل و يومين يقيف)  يوم طالع من البيت .. قامت والدتو دعت ليه : يا رب ارزقو بالحلال الطيب … انفتح ليك فيها .. قولي ارزقو و خلاص .. حلال حرام خلينا منو .. المهم الترطيبة و بعدين هو الحرام الناس لاقياهو خليك من الحلال … الحرام بقى عايز تبقى ( مؤتمر ) و تعمل ليك دقنة و تدخل البرلمان و حاجات تانية حامياني

********************************

حتى بعد ما يفوز المرشح بالمقعد في البرلمان و يرطب .. تاني الناس ما بتشوفو في الدائرة الا بعد أربع سنين .. ينسى ما كان منه من وعود ( قتل الفقر و لو كان رجلا و الحنك داك ) و لسان حاله يقول  :

فوق الحلة دي

انا تاني ما بجي

الوعود كتيره

انا تاني ما بجي

و يغني مع كمال ترباس رائعته صدقني ما بقدر أعيد

صدقني ما بقدر أعيد

قصة ( فلس بالحيل ) مضت

أعذرني ما بقدر أعيد

أيام عذاب دابا انتهت

كيف تاني ارجع من جديد

 

Advertisements
تعليقات
  1. حاج أحمد السلاوى كتب:

    بصراحة كدا يا مشاكل الواحد ما قادر يفهم إنت واقف فى صف منو ؟ إنتمع المؤتمر الوطنى .. ؟ ولاّ مع الحركة الشعبية؟ ولاّ مع عمك نقد ؟ ..
    كدى فهمنا الحاصل شنو ؟ .
    وزى ماقال الولد لأمه لامن دعت ليهو بالرزق الحلال ..ناس كُتااااااار بقوا يدعو ويقولوا اللهم أغننا بحلالك أو حرامك … بدلاً من اللهم أغننا بحلالك عن حرامك…ولا حول ولا قوة إلا بالله العلى العظيم ..
    بس قول لجماعتك ديل الإنت واقف معاهم يسووا الدايرنو كوووولو بس ما يتاجروا بالدين..وما يجيبوا سيرته فى لسانهم ..يخلوا الدين للناس العاوزة تمشى بالشرع والدين ..
    وما تقطع الجوابات ..!!

  2. ودالزبير كتب:

    مشاكلز

    لقد تشابه البقر على الناس يافتي

    خلف الله……………….. ما عذبتنا هسه العرس الفي بوست ده وينو…….. الفلس ولقيناهو لكن عرس زي ده اصلوا ما شفنا ولو قايل ريدتنا زي مهند ونور تبقي عيانها وداير ليك دكتور

  3. زواده كتب:

    سلام لكل المدوناتية
    قصتك دى يامشاكل ذكرتنى قصة جهبز فى المؤتمر اللا وطنى
    رطب ونسى الفريق والحلة والناس
    ولفت السنين
    وجات الانتخابات
    وعاد لنفس النغمة القديمة

    من اجل المواطن ومحاربة (اقصد) ادامة الفقر واطالة البطالة وتنمية و…. وعييييييك

    ناقل الخبر بيقول الجماعة فشو غبينتهم فيهو بالطوب فى الحشد الميمون
    وصاحبنا مرق بالجلالة

  4. البشاوى كتب:

    الولد مشاكل
    يبدو انك دخلت الشبكة بالجد وطلعت مافاهم حاجة زى باقى خلق الله وزى عذبنى وتفنن ( خــلـــف اللـــــه)
    ياعم خليك كدة لحدى اعلان النتيجة والكاتبا الله فى الحجر بتقوم مالك متوََََََر نفسك لحدى ما ناس السلاوى يتجهجهو ومايعرفوك شايت وطنى ولاشعبى ولا شعبية ولاختمية ولاديمقراطى ولا جعلى

  5. محنك كتب:

    الرجل حدثنا عن الفقر بلغة الشباب فلله دره

    البنات عايزات عرس والعريس ضاربو الفلس … والحلال بقى فى آخر ضرس والشبعان حرام ضاحك ضرس ماكل اللحم راتع مرس … وانت الهناك حافر الترس …. لحمك كمل والدم يبس

    كسره
    نفس الشخص النزل قبل عشرين سنة دكتاتورة بردد نفس الكلام رغم انه زمان قال فوزه جيبو … لكن يكوسلها عند غافل

  6. مشاكل كتب:

    سلامز

    مشكورين على الحضور الأنيق يا جماعة

    حبيب ألبي حاج السلاوي ..
    أنا مؤتمر ضفاري .. الغلط بنشوتو بووووز .. و الصاح بيهو بنكوس
    و جماعتي – الانا واقف معاهم في الإنتخابات فقط – انا واقف معاهم بس علشان ما يجينا في الحكم علماني .. ما علشان بحب البشير ولا حزبو ولا سياستو .. على الأقل رافع شعار الدولة الإسلامية في الشمال .. أصلا قنعنا من خيرا في الجنوب

  7. مشاكل كتب:

    ود الزبير
    اولا مبروك الفوز لهلال الملايين و سيد البلد
    و نحن اسياد بلد نقعد نقوم على كيييفنا

    البوست دا ياخ ريحة العرس فيه جايبة آخر الشارع .. بس بكون همك اليوم دا كلو هيثم مصطفى يريح الشعب السوداني دا و يدينا ثرو حبة كل ست دقايق … يا لطيييف

    زوادة … مرحب بيك في التوبيك …. نورتينا و شرفتينا .. لكن معظم جهابذة السياسة بيعملو كدا يعني الموضوع ما حكر على ( المؤتمر الوطني ) … و لو ما كان الكلام دا حقيقي .. كان شفنا تنمية في كل بلاد السودان قبل الإنقاذ ما تجي … ولا مووو هيييييك

    حبيبنا البشاوي … الحمد لله ربنا أدانا طول النفس و البروووووود .. نحمدو و نشكر فضلو

    محنك … بالله اجتماع مغلق سريييييع كدا مع ود الزبير يا ( عميق ) .

  8. عباس كتب:

    قسما وعظما راجل ضكران راضع من صدر امه ومتربي بالحلال ما يبقي كوز ( شعبي + وطني )
    الجبهجية ديل اي زول رسمي بخاف الله في عملة ومصلحة العباد ما خلوه طوالي رشو الشارع
    اي زول وقت يشوف الغلط ويقول ده غلط برضو مسكو الدرب وقالو ليهو اهلك قبال تهلك
    عليكم الله ديل ماولاد حرام ؟
    الله لا كسببم ولا غذى فيهم بركة

  9. نيام كتب:

    مشاكلز:
    لقينا فلس و مالقينا عرس.. و لا لقينا دولة الاسلام الموعودة عشان نديها صوتنا..دولة الاسلام ياها حبوبتك دي الله يرحمها..الانسان بمجرد ان يتملكه الطمع و الجري وراء رقد الحياة الدنيا فقد فارق دولة الاسلام زي ناسك ديل…قالو يا مشاكلز في واحد من ناس الخرتوم ديل ولدو زعل و ساب البيت و سافر ..فسمع بيهو مشا جهة الصعيد ..مشا يكوسو في سنار قالو ليهو الولد جا هنا و قال ماشي الصعيد مشا المزموم قالو ليهو فعلا الولد جا هنا و قال ماشي الصعيد مشا ليهو في الدمازين قالو ليهو فعلا الولد جا هنا و قال ماشي الصعيد ..الرجل زهج رجع الخرتوم مرتو قالت ليهو ياراجل مالقيت ولدك قال ليها ولا لقيت ولدي و لا لقيت الصعيد..هسع نحنا لا لقينا الاسلام حق حبوبتك الثابت و لا لقينا اسلام دولة الثوابت…

  10. حاج أحمد السلاوى كتب:

    أخونا نيام .. نيام ..
    أحد الظرفاء قال عنده الفلس لاكين ما لاقى خميس فاضى يعرس فيهو ..
    دا يقولوا عليهو شنو ؟

  11. نيام كتب:

    السلاوي:
    هذا فيه قولان فاذا كان مغتربا فيمهل حتي يرد الله غربته (زي شمباتي يعني ) ..اما اذا كان لا يجد خميسا لانه في خمائسه يعمه فيعرسوا ليهو يوم الاربعاء اخر الشهر ولو بصندوق (ختة)…

  12. عباس ركس كتب:

    سلام للجميع :
    اخونا عباس – ابصم بالعشرة على كلامك الفوق دا .
    قال ( الدولة الاسلامية !!! ) – ما لينا اكتر من 20 سنة لا شفنا دولة ولا شفنا اسلام ( الا اسلام صالح ) .

  13. حاج أحمد السلاوى كتب:

    أخونا عباس بن ركس ..
    يعنى الأخ عباس دا ..مش هو عباس ركس اللى هو إنت ؟ أنا غايتو تشابه على البقر وكنت فاكر غير الشىء الحاصل .. لاكين برضو معليش ونرحب بأخونا عباس الجديد ( اخو عباس بن ركس ).. اربكتونا بتشابه الأسماء ..وعاشت الأسماء ..
    وبعد دا كووووولو بنسال السؤال والطلب البسل الروح ( حسب رواية الكاشف القاعد هنااااك فى الدوحة ..يصبر لى بس .. أنا كان ما جحضمته )بنسال اخونا عباس عن موقعه الجغرافى لمزيد من التواصل والتواصل مع مدونى الداخل والخارج .
    – عباس ركس .. أسلام صالح مراسل الجزيرة سابقاً اللى قاموا الجماعة الطيبين ديل وجلدوه وضربوه ضرب غرائب الإبل ؟ غايتو لحد حسه عشنا وشفنا نوعين من الإسلام ..إسلام ………..وإسلام ………. دا غير إسلام صالح !!!
    واللى يعيش .. يا ما يشوف !!!
    وبرضو خلونا النشوف آىخرتا شنو !!

  14. ياسين شمباتى كتب:

    الحبيب مشاكل..سلام.
    صدقت اذ اخطات (قسمة الثروة والسطلة)…فعلا البعملوا فيهو دا شغل مساطيل اولاد ستين نيلة..
    اما عن العجز فهناك ما هو اخطر وافدح عجز,,دا خليهو بهناااك..
    وقريبك بص الجريف طلع تفيتحة وحريف..داير المأكلة واللواكة..شغلو نظيف..
    لكن وين امل وبدر ؟؟ما ظهروا كلو كلو,,ياربى ودوهم وين؟؟
    شمباتى يصيح : العرس العرس..وامه تنهره : انا ما بدور المزارعية_قصة الزراعة دى ما تسألونى منها جات كيف_

  15. ياسين شمباتى كتب:

    محنك..
    روعة والله..

    عباس..
    الليلة قايم عليك ولا شنو؟؟ حسبى الله عليهم..وبرضو انا تشابه على الاسم..

    نيام الحبيب..
    الكاشف اخوكم دا ما عذبتوهو تب!! قول لى الكوبرى وانتهى,,تانى الحجة فوق كم؟؟تحياتى لمدنى الخضراء…

  16. مشاكل كتب:

    سلامز

    الحبيب عباس … ما محتاجة حليفة يا راجل .. لانك ما بتعرف الناس دي ماكله من وين و راضعة من وين .. كتااااار الاتربو بالحلال و بقو كيزان كان تبع شيخ حسن او شيخ علي .. شفت كيف

    عمنا نيام نيام … لو عايزين دولة الاسلام … ربو الجيل الجديد على الاسلام و كلو بيتصلح إنشا الله

    شمباتي … لو عايز تبقى زي قريبي دا .. ببقيك .. لكن ابقى قدرها و ما تتجرس في نص الشكلة

    أما عن حكاية امل و بدر … العمق العمق يا حبيبي .. بالمليمتر يا دكترة .. بس اديها صنة و خليك مع ود الزبير في الإجتماع المغلق

  17. ياسين شمباتى كتب:

    مشاكل..
    لا لا,,نبرا من جنس دا..وراجييييك يا كبير..

  18. نيام كتب:

    شمباتي:
    والله بعد الكوبري ما خلو ليك شئ بعد دا علا تقول ما ماشي…
    مشاكلز:
    “عمنا نيام نيام … لو عايزين دولة الاسلام … ربو الجيل الجديد على الاسلام و كلو بيتصلح إنشا الله ”
    كلامك مظبوط بس كلم خلف الله يدينا فرصة نربي…ياخ دي مباراة ما فيها هاف تايم…نفسنا قام…

  19. عباس كتب:

    يامشاكل الجواب يكفيك عنوانه
    اذا الكيزان تصرفاتهم مسئولة وعندهم مصلحة السودان فوق كل حاجة وناس صادقين
    ومابعرفو العيب يبقي اكيد ما ولاد حلال
    وفي معنى الحديث لا يزال الرجل يكذب و يتحري الكذب حتي يكتب عند الله كذابا

  20. البقاري كتب:

    يا بروبز
    اقول ليك شنو واحد عندو خمسة اخوان اصغرهم 22 سنة ولا واحد فيهم اشتغل ولا واحد عرس. 2 خرجيين شغاليين طلب ليهم 5 سنة متخرجين لا بقو مع الجماعة ولا ………….
    وابوهم نزل المعاش.المصيبة في البنات اخواتهم المطلقات باولادهم معاهم في البيت
    واحسب كم اسرة سودانية تعاني الامرين.
    ما مشكلة موت الجماعة عيد خلي العرس رايك شنو في الطلاق. كدا اكتب لينا حاجة
    على سبيل السخرية(ساخر سبيل).

  21. الاسم /محمدعوض الترس السن 35 صاحب شركة مقولات و مرشح لمجلس الشعب مركز ابوحمص -البحيرة -مصر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s