البنات ديل ما عندهم أهل ولا شنو ؟؟

Posted: الإثنين,5 أبريل, 2010 by ودالزبير in اخرى

لمده يومين أو ثلاثه طالعتنا الصحف بخبر تلك الفتاه التي وقفت أمام الكل في مسرح جامعه النيلين في حفل كان مخصص لتكريم الفنان محمود عبدالعزيز وصاحت إنها تحب ( الحوت ) قبل إن تنهار وسط تصفيق وإستحسان الحضور إنهارت الطالبه ودخلت في حاله إغماء ليحملها زملائها للإسعاف وبعد أن أفاقت أجرت لقاء مع الصحيفه التي أوردت الخبر قالت فيها إنها مجنونه بالفنان محمود عبدالعزيزوإنها ستنتظره ليأتي ويزفها كانت صور تلك الفتاه تملأ صور الصحيفه صورها وهي تمسك بالميكرفون ثم صورها وهي في حاله إغماء ويحملها الطلاب ثم صورها وهي تجري الحوار وبعد أن قررت غن أعمل اسكانر للصور وأنشرها هنا إلا إنني تراجعت فيكفي الفضيحه التي أرى إنها قد جلبتها لأهلها ليس هناك من داعي لتوسيع تلك الفضيحه .. هنا أتسأل إين أهل هذه الطالبه الجامعيه التي ترضى على نفسها هذه المهانه وهل تغيرت القيم والعادات والتقاليد .. لاحظت في بعض الصور والتي يحملها فيها بعض الشباب إنهم مبتسمون وسعيدون بهذه الفرصه الذهبيه التي إتيحت لهم بحمل جسم أنثى كامله الدسم …. أسئله تقفذ لذهن المرء اين والد هذه الفتاه وأين أعمامها وأخوالها وباقي قبيلتها …. علي بالطلاق نحن من ناس الزول القالوا ليهو بتك بقت تقعد مع الأولاد في الجامعه والراجل مغترب قام طوالي دق خروج نهائي وشال سكينه ورجع السودان وهو مارق من المطار إتذكر إنو ما عنده بت والأكعب من كده إتذكر إنه لسه ما إتزوج … هييييع

Advertisements
تعليقات
  1. محنك كتب:

    سكينك حمرا يا ودالزبير …. هيييييييييييييع مثلى دى ما عندها اهل وعديمة تربية ومفروض يكون فى قوانين رادعة للمغمى عليهم او متظاهرين بذلك … من شرطة النظام العام عادة دخيله …. والله اقول ليك خلى 2011 تجى وتمشى على خير عشان النمل يدخل مساكنه والنشوف مره عريانه تانى فى الشارع او واحد بهنق يغنى

  2. عزت كتب:

    ود الزبير سلام

    ياخ أعذرها… تكون لا لاقية شغل و لا لاقية عرس….و ناس مشاكل و لا هنا…
    بعدين الحوت بقى عجيب.. يعرف كيف يغرر بالمعجبين

    الريد من قبلك ما كان ريد
    و لا بعدك شفنا الحنية

  3. علي سنكل كتب:

    ود الزبير سلامات:
    يعني شنو بحب الحوت؟ يا أيها الملأ أفتون.

  4. ودالزبير كتب:

    محنك

    والله حاجه عجيبه وغريبه معقوله الزوله دي ما شايفها غنها عملت حاجه غلط

    عزت

    يا معلم قالوا ليك البت طالبه جامعيه بجامعه النيلين هي كده التخلص جامعتها وبعدين تكوس الشغل بالنسبه للعرس بعد فضيحتها دي باقي ليك في زول بيمشي عليها

  5. ودالزبير كتب:

    حبيبنا سنكل

    الحوت هو لقب الفنان محمو عبدالعزيز وبالمره الزول ينزل ليكم ألقاب باقي الفنانين الإمبارطور أحمد الصادق والدكتور حسين الصادق

  6. كدى يا ود الزبير اعمل اسكان للصورة – ورسلا للسبعة – خلينا نفهم الحاصل شنو – دى قصة غريبة والله.

  7. حاج أحمد السلاوى كتب:

    يا جماعة الخير كدى النسال السؤال الأهم من كل شىء .. من هو محمود عبد العزيز الذى صار معبود الجماهير الفارغة الما عندها شغلة ؟ فى الحقيقة الحق مش عليهو هو .. الحق على اللى خلوهو يغنى وأطلقوا عليهو لقب فنان ..إذا كان محمود عبد العزيز فنان فماذا نسمى عمالقتنا الراحلين والأساطين الموجودين احياء ويرزقون وكلكم عارفنهم ؟ ولا زلنا نذكر حادثة أولئك المراهقين الذين سجدوا لهذا المافون فى أحد أندية العاصمة بالخرطوم ..ولا حول ولا قوة إلا بالله العلى العظيم .
    على أى حال هذه الفتاة لا أولياء لها ..وإلا لما فعلت ذلك لو كان لديها ولى أمر يرعاها ويشرف عليها ..إنها تحتاج لعملية تاهيل عقلى حتى تعود إلى رشدها وصوابها ..ومن المؤسف انها طالبة جامعية وكنا نتوقع أن تكون أعقل مما هى عليه ..
    ومع ذلك ندعو الله العلى القدير أن يهديها إلى صراطه المستقيم .

  8. نيام كتب:

    ودالزبير:
    ياخ عايز اقول ليك حاجة بالمناسبة الجري ورا الرزق و الدوامة التي وجدنا فيها انفسنا (طول لي بالك انا جاييك في الكلام ) خلت اولياء الامور و الاهل في حالة استاندباي من الصباح حتي السحور…فلذلك مافي رقابة علي البيوت الزول مرقت من الصباح بيرجع نصايص الليل عشان يدبر لقمة العيش ينزل من الوظيفة يركب الرقشة ينزل من الرقشة يركب حراسة ليلية ..باقي ليك زي البنات ديل عايزة تلبس و تاكل و تتعلم و تتواصل وووو…وتشوف في اخواتها من اخوات ” يحسبن ” لابسين كيف و عايشين كيف …عايزة تعمل زيهن و تلفت الانظار يمكن حسب تفكيرها تجيب مريسة تام زين…
    وهذه الظاهرة بالمناسبة ليست في بلادنا و حسب فقد لاحظت في بعض القنوات العربية تقام منافسات بين فنانين شباب يقلدوا الفرق الغربية و بعضهم يغني كلمات بالانجليزية او الفرنسية و تجد الشباب في حالة انعدام وزن …عادات ليست من مجتمعاتنا المحافظة …وربما هنالك من هو مهتم بهدم هذه العادات للوصول لجيل جديد خالي من الدسم فيجد الظروف مواتية لاهدافه…

  9. علي سنكل كتب:

    الحمد لله الواحد الأحد الذي لم يجعلني وردي هذه الأمة و لا محمد اللمينها و لا عثمان حسينها و لامصطفي سيد أحمدها و إلاّ كان المغسه شقتني.
    قال الحوت .عيال تستاهل الضرب بالصوت في سوق الفاشر.

  10. محنك كتب:

    الاخ ود الزبير

    انا وافقتك وقلت ليك سكينك حمرا زيى
    وبشرت فوق كلامك ومعاها هييييييييييييع وعرضة وضربة كراع

    وقلت ليك ما عندها والى
    وقلت ليك بعد 2011 بالاشارة الى الاستفتاء والانفصال انو حنرجع النظام العام السابق مافى عرى ومافى غنا ذاتو حسب ظنى

    بس بالكناية لانو تقيلة شوية

  11. عزت كتب:

    لست مدافعا عن هذا الجيل و لكن… براحة عليهم

    فلكل شريحة من الشباب اهتمامات و لقد مرينا بتلك المراحل يالسلاوي و لكن تفاوتت استجابة كل من أبناء جيلنا للمغريات حينها…
    لبس الناس الشارلستون و أطلق البعض الشعر الآفرو و قلد البعض البيتلز و جيمس براون الكان بيقع في نهاية كل أغنية و يغطوهو بالملاية لحد ما يفيق شوية.. و شاف الشباب الى وقت قريب سيارات الاسعاف و هي تقف على مرمى من مسرح مايكل جاكسون و هي تخلى الغمرانين و الغمرانات من الطرب و حتى في الدول العربية الآن تكونت روابط المعجبين من الشباب بالفنانين و الفنانات الذين صار لا يردعهم رادع و لا تقف في طريقهم وسيلة عندما يقرروا الارتماء في الفانين و الفنانات و يعملوا الدقاقة لذا وظف الفنانين و الفنانات البودي قاردز لكي يبعدوا المعجبين بالحسنى….

    و شبابنا قاعد بيعاين في الفضائيات و قاعد بيسمع في الفنانين و الفنانات السودانيين و صاروا يقلدون و طبعا استهوتهم تلك المناظر و هم في النهاية بشر يطربون و يتفاعلون و كل يبكي ليلاه….

    هاك بعض الأمثلة لما صار يحدث عندنا
    – لم تعد الأسر في حفلات الزواج و الغناء التعاقد مع (الامبراطور) القال عليهو ود الزبير لأنو لديه معجبين يطاردوه بالعشرات فيهجموا على حفله و يكملوا العشا ذاتو
    – و كذلك الحوت الذي عرف منظمي الحفلات وله الشباب به و صاروا يتعاقدون معه في الحفلات الجماهيرية و يجنون الكثير من ورائه …
    – تغيرت النظرة للفنانين الأصليين و ركن الناس (للتايوان) لقلة تكلفته و الهجيج الشديد الذي يحدثونه في الحفلة فلم يعد هناك اهتمام برصانة الغناء
    – ناس (حاميها) ديك القال عليهم محنك صاروا يتبادلون تلك الأغاني بالبلوتوث
    – و داك صار يخرج كل يومين ثلاثة مطربين من برنامجه العجيب
    – عدد من ستات الشاي رموا العدة و سعو ليهم أورجن و حافلة و غزوا الحفلات بالغث من الغنا

    أعتقد أن المطلوب تنويرا لهم و خلق الوظائف و تسهيل الزواج لكي لا يقعوا في مصيدة الفاقة و يكونوا منتجين و ذواقين أيضا ليميزوا ما بين الغناء و النهيق…و ليقفوا برنامج النجوم دي شوية و لتقلل تلفزيوناتا السودانية من الغنا الفي كل وكت دا و لينتهج حزبنا الحاكم جدية أكثر في نهاية كل لقاء جماهيريا و ليوقف مرشحيه القيدومات القالت عليها (مون)

    و في النهاية طبعا لا تستطيع عمل الكثير ليقيننا بأنه لولا اختلاف الأذواق لبارت السلع….

  12. ابوالمنذر كتب:

    ودالزبير انتو متاكدين انو داخت من حبها للحوت .. كدى كشف للصور كويس ماطرشت دحين
    غايتو جنس محن يكون جايبها محمود معاهو من امبارح واقفه لط وعيونها مكبسه ..
    بعدين اهل شنو انت ما سمعت بالهجين الملا الخرتوم بنات واولاد المايقوما الكان بربوهم فى البيوت اياها بقو من الاعيان وتلقاهم فى كل ميدان يالطيف.. اسر مكونه من ام واخوان واخوات كل واحد من ملف رغم انها عاقر او ما اتزوجت..

  13. مشاكل كتب:

    سلامز

    حقيقة بقينا ما بنستغرب من المناظر دي لأنو البلد اتملت فساد من راسها لي ضفورها .. ما بقت على البتفقد الوعي في حضور فنان زي الحوت .. و الشباب شايف القنوات الفضائية و هي بتبث حفلات المطربين العرب و الأجانب و كيف الهوس بيصل بيهم لي أقصى درجات مع خروج الفنان من القاعة او المسرح

    بعدين نقطة تانية يا ود الزبير و محنك

    لو منتظرين الحال يتصلح في الاخلاق بعد 2011 .. أرجو الحلو سااااي
    ممكن اي واحد يمشي معاي النادي الألماني و يشوف البيحصل فيه .. و من بنات ناس كبار في السودان .. و العربات بالسواقين أو الأهل بتجي تنزلهم لينا قداااااااااااام الباب .. يعني الموضوع ما موضوع حكومة … التربية التربية

  14. سهيل كتب:

    دا كلو كوم و ( السبعه) بتاعين استرايكر ديل كوم براااااااهم .. شوف ياود الزبير .. يا هناي يا حأفجر ليك سيدي بيه يوم الخميس الجاي .. اها كده كيف ؟؟

  15. البشاوى كتب:

    ودالزبير
    بلا حوت بلا سمكة — نحنا معاكم فى السبعة دى ولا نقوم نغنى ليكم ؟

  16. حاج أحمد السلاوى كتب:

    البشاوى ..سلام
    مالك عاوزك تدخل نفسك مع العجايز وانت لسه صغير وما بقيت على الحاجات دى ؟ حسه عليك الله اللى بيلمك شنو مع الفكف ..إنت قدرو ولاّ لحم سدرو ؟
    نحنا كان لقينا طريقة عاوز نتخارج ..تقول لى قال ليك ؟

    – ولدنا وعمك سترايكر .. لحد حسه ما وصلنا شىء ؟
    وخلونا النشوف آخرتا شنو !!

  17. monamie كتب:

    الكلام الكتبته النكره الفوق دي كلام غير أخلاقي وغير موضوعي أظن إنها جاتنا طاشه من موقع المشاهير أو من موقع أسواء منه لا يمكن أن نسمح بكلام يمس أعراض الناس أياً كان إختلافنا معهم

    هذا التعليق الاعلي كاتبهو كاتب المقال منتقدني فيه وانا هنا بقول له لاتنهي عن فعل وتاتي بمثله والموضوع اعلاه هل لا يمس اعراض الناس؟

  18. محنك كتب:

    الاخت مونامى ( صديقى او صديقتى بالفرنسسى ) شكرا للاشارة لذلك ولكن الاخ ود الزبير اشار الى ظاهرة ولم يسمى شخصا وامسك عن نشر الصور حتى لا يتعرف احد عليها وهى عار على ابوها واهلها وعشيرتها وعلينا نحن ان لم نتنبه لهذه الظاهرة فاليوم بعيدة ونخشى ان يدخل الكلام الحوش وحاشا لله فان هؤلاء المدونون على اخلاق فاضلة فى ما بدا لنا ولم نلحظ منهم اى اخلال بالقيم الاجتماعية

    حتى لا تدور رحى حرب بين داحس والغبراء …

  19. حكاية كتب:

    اها يا جماعه الخير
    موضوع جديد ومحن وافكار جديده اتسلفناها من ناس المفسديون
    فتاة تعشق المدعو فلان هى حرة بقى على قول عرمان ——صحى بلد مافيها تمساح يقدل فيها الورل
    تانى شئ والاهم نبدا تحليل فى الموضوع من بدايته ومن المسئول فعليا عن هذه الافعال ونبدا من اشياء اخرى
    تفتكره الجيل الجديد ده اهدافه شنو ؟؟؟يوم واحد سالته رقبتكم مااظن
    سؤال تانى اين الاباء والامهات مشغولين ولا عاملين ما شايفين ولا هم الحياة
    الشارع السودانى فيه لبس فضيحه ولابسنه عز النهار بنات واولاد
    مرات الواحد يخجل يرفع راسه يعاين فى الشارع لانه التجار ماشاء الله منزلين احدث صيحات الموضه وهاكم يا بنات البسه
    الاولد لابسين نظام يعرف بالسيستم معقول يا جماعه الواحد ماشى وملابسه الداخليه الكل شايفه بكافه الالوان والتشكيلات كنت اول فاكره البنطلون داير يقع لمن يوم عرفت انها موضه بالله الابهات وين دى السن البحتاج فيها الابن لابوه والابهات نايمين هاك يا كورة وهاك ياسياسه وكوتشينه الخ
    طريقه الانحراف باديه من المنازل السكانها ما بسالوا ماشين وين وجايين من وين بالتالى الطاليه الوقعت دى هى جزء صغيرونى من ما خفى اعظم وبقى دى خته تحتها عشرين خط احمر
    البركه فى ود عبد الفتاح القفل الحدايق بالسور عشان اللمه المهببه فيها وكمان يطلق على الحدائق حبيبى مفلس
    المشكله يا ود الزبير فى جيل كامل بعينه لانه الخجل راح معقول زمان بت تعمل كده ما اظن معقول زمان ولد يلبس بنطلون محزق ولا واقع مع ركبه ما اظن
    سؤال الاولاد والبنات ديل اهلهم وين ابو على ام
    اولادنا فلذات اكبادنا لازم نبقى ليهم اصدقاء ونكون مراقبنهم بقدر المستطاع ويا دار ما دخلك شر

  20. عباس كتب:

    ليه الزعل وحرق الدم ده ؟
    ايام لابد منها
    فترة ولازم يمر بها الانسان اي كان بت ولا ولد
    زي مابقولو شم الصماح
    فترة وبتعدي انشا الله والزول تاني يرجع لكلام العقل وبعمل الف حساب قبل مايتصرف اي تصرف
    يعني البت دي اكيد عندها ام وابو وخيلان واعمام اخوان واخوات
    لكن يعملو ليها شنو ؟.
    واكيد كل واحد بحاول انو يشوف ولدو وولد اخو وولد اختو وبقية اولاد اهلو احسن ناس
    لكن كل شي بوقتو
    ما من قولة تيت الزول يتولد ملاك ويموت ملاك
    لازم يغلط ولازم الناس تلومو ولازم يجرب كل شي بنفسة
    ولازم يراجع نفسو حتي يبقى انسان واعي ومسئول
    ربنا قال الكلام ده
    اذا مابنغلط وماشين صح وبنسبح نصلي ونعبد الله بس ومافي زول عاصي
    ربنا كان غيرنا وبدلنا بناس تانين
    يغلطو عشان يستغفرو عشان ربنا يغفر لهم
    ياخوانا براحه براحه

  21. عباس كتب:

    بعدين الحوت ده مابنرضي فيهوووووووووووو

    ===========

  22. البشاوى كتب:

    المدون اوالمدونة مونامى لا ادرى من يقصد او تقصد بعبارة( الكلام الفوق الكتبتو النكرة دى ) ويبدو لى انها توجهه لانثى مع العلم أن لاأنثى تداخلت قبل مداخلتها – أرجو أن يعبر الناس عن آرائهم بكل سماحة ومودة – وهنا يكتب الكاتبون متناولين شتى مظاهر الحياة نختلف ونتفق حولها— لكن بحب وإحترام –

  23. مشاكل كتب:

    سلامز

    الأخت مها … الرجاء التفضل و التكرم بالإلتزام بأدب و اخلاق أصحاب المدونة .. هؤلاء الرجال و السيدات الذين لم نعرف عنهم الا كل خير … فقد يتختلفون في الأفكار و الآراء .. لكن الإختلاف لا يفسد للود قضية … فما قيل لك من قبل … فقط انظري الى صورهم في الرحلات .. و ستعرفين من أي المعادن هم

    الأخ ود الزبير

    الرجاء عدم الرد على الأخت مها … لكي لا نخرج من أدب المدونة

    القاعدة القاعدة

  24. حاج أحمد السلاوى كتب:

    أخونا أو ولدنا عباس ..
    أى حوت دا الما بترضى فيهو ؟؟ أوع يكون هذا المدعو محمود عبدالعزيز ؟
    أتمنى إنك تكون تمزح ..ولو على خفيف !!

  25. ودالزبير كتب:

    مشاكلز

    القاعده القاعده
    يا زول مالك داير تجيب لينا الاف بي اي

    هسه كتار هنا راح يقولوا القاعده دي شنو .؟؟ المهم
    البيشاوي

    فلانه دي إقتبست كلام كتبته انا رد عليها في بوست بتاع سياسه وجابتو هنا للدلاله إني بتكلم عن اعراض الناس مع ملاحظه ان كلامها هناك كان عن واقعه زنا او علاقه غير شرعيه بين اخ الرئيس واحدى الفتياتت المهم هي الإقتباس ده عشان توريكم أخلاقي السه غنتو ماعرفتوها

    ومشاكل قال مانرد فشان كده ماراح نرد اونكتفي بشرحنا ليك لانو واضح انو حصل ليك تشويش وسامحونا

  26. abbbas كتب:

    عمنا حاج احمد السلاوي
    الحوت معلم في الغني وصوتو قوي مش زي ناس كده ماتفرز صوتم من صوت الاناتي
    عيب الحوت انو غير جادي بالمرة
    اما السطل والشراب دي حاجة شخصية ترجع ليهو ما لي شغلة بيها
    لكن في الغناء ما بظلمو زول غناي بمعني الكلمة

  27. elturkey كتب:

    الغالى ودالزبير والأخوة الأعزاء سلام : أعتقد انو الموضوع تفاوت أجيال …. بتذكر فى صبانا كان هناك من الفناين البحسبوهم (مايعين أوسكرانين وحيرانين) زيدان ابارهيم وهسع بقولو ليهو الاستاذ وكان فى أبوعبيده حسن ومحمد سلام ونجم الدين الفاضل وحتى مجذوب اونسة وغيرهم وكما ذكر الدكتور عزت مانظلم الشباب كل جيل (بمفارقاته) وأكيد الجيل السابق مابتقبل الجديد خاصة لو كان الفارق كبير واكيد كمان فى شباب بحملو نفس الفكر وماعايزين دخيل على العادات والتقاليد لأسباب تختلف من شخص لآخر …. مع أنى مابعرف لا حوتة ولا الامبراطور لكن سمعت عنهم كتير جدا … والعادات الدخيلة دى مابنقدر بنحاربها لا بالنظام العام ولا بمجالس التأديب … فى ظل العولمة علينا توعية الجيل وأن نترك له حيرة الاختيار والتصرف مع تقبلنا للجديد حتى لا نفقدهم تماما …. مع استناكرى لسجود المعجبين سابقا لا أرى غضاضة فى اغماءة الطالبة الجامعية شيئا ,اعتقد انها قد أغمى عليها فعلا وعلى الأطباء تفسير الظاهرة … لكم الود والأحترام

  28. حاج أحمد السلاوى كتب:

    ولدنا عباس بن فرناس ..سلام
    طبعن إختلاف الرأى لا يفسد للود قضية زى ما بيقولوا .. ومسالة الغنا وجمال الأصوات قضية شخصية وممكن نختلف عليها إلى يوم الدين نسبة لإختلاف الأذواق وتخضع لأسباب كثيرة لا مجال للخوض فيها فى هذه المساحة ..لاكين كمان ما ممكن الزول يكون شخصية عامة وسىء السُمعة فى الوقت اللى كان مفروض يكون قدوة للشباب القاعدين يسمعوهو ومعجبين بخلقته وغناه وأكيد فى نسبة كبير بتقلده فى كل حاجة وما حادثة الشباب السجدوا أمامه على خشبة مسرح النادى الألمانى ببعيدة عن الأذهان وجات سيئة الذكر الطالبة الجامعية وكملت الناقص …وتقول لى الحاجات السيئة دى مسألة شخصية ؟ لامن يشرب ويسطل ويترمد لازم يقعد فى بيته وما يطلع على المسرح قدام الشباب بالهيئة الرثة اللى دايماً الناس شايفنو عليها لأنو إرتضى يكون شخصية عامة ..وأكيد فى مجموعة من زملائه من الفنانين ( البكاسى ) الجدد بيعملوا نفس الشىء ويمكن أكتر كمان لاكين ما بيقابلو جمهورهم بالشكل البيظهر بيهو المدعو محمود عبد العزيز ..والأدهى وأضل كمان إحتضنته القناة المافونة التى تدعى زوراً وبهتاناً أنها تظم سيد الخلق أجمعين وقدمته كمادح للرسول عليه صلوات الله وسلامه وهوغائب عن الوعى ..كيف يستقيم هذا الأمر وكيف نتقبله إن كنا نريد تعظيم نبينا عليه الصلاة والسلام ..
    ووصلنى قبل فترة إيميل يصور هذا المأفون محمود عبد العزيز يقام عليه الحد فى شرب الخمر فى مدينة الفاشر وللأمانة لا أجزم عن مدى صحة الواقعة ولكننى لم أتلق أى نفى لهذا الأمر مما يدل على حدوثه فعلاً .. والحق كل الحق على الجهات الإعلامية التى تسمح بظهور أمثال هذا الحوت على شااشاتها ..
    أعود وأكرر مرة أخرى أن إستحسان الأصوات مسألة نسبية فما احب سماعه ليس مفروضاً أن ينال إعجابك والعكس كذلك ..
    هنيئاً لكم جميعاً بمحمودكم الغير جاد بالمرة .. بس خلوا بالكم من أولادكم وبناتكم
    وخلونا النشوف آخرتا شنو !!

  29. عباس كتب:

    عمنا حاج احمد السلاوي كلامك عين العقل ووقع لي تب
    بس كمان اصابع اليد ما كلها متساوية
    هناك في (الامعة ) يقلد تقليد اعمى
    وهناك من هو واعي لكل ما يحصل من حوله ياخذ المفيد ويترك (الكعب ) من المجتمع
    انا معاك ما مفروض نسلم امرنا ونرضي ان يكون فنان من وسط الشباب يكون محل اعجاب كافة الشباب علي شاكلة محمود لانو زي ماقلته ليك في شباب بقلدو تقليد اعمى
    يبقي اذا جينا نلوم زول نلوم الشباب والفنانين
    مش كل اللوم يكون للفنانين
    عمنا حاج احمد السلاوي تقريبا في زمنكم كنتو بتقولو اكتر وسط منحط هو وسط الفني والسواقين
    اسي حاليا الوسط الفني ارحم من الوسط الجامعي (طلاب + مدرسين ) ديل ازفت منهم مافي
    وفي راي نخاف علي الفنانين من الطلبة الجامعين

  30. نيام كتب:

    ودالزبير:
    صباحك نور ..جزيت خيرا ..فيك من طبع العمد ..ما قلت ليك من قبل دا ..

  31. حاج أحمد السلاوى كتب:

    ولدنا عباس ..
    نعم برضو كلامك صاح …لاكين ما شفنا زول ( بواو وااااحدة …بس ) من الرعيل الأول ظهر على الشاشة البلورية وكان فى وضع غير طبيعى زى صاحبكم دا اللى أصلاً نحنا ماشفنا ليهو ظهور غير الشكل الحفظناهو دا ..نفس الخلقة ..ونفس الشتات الفكرى والتوهان الإشمئناطى..والشرود الذهنى ( وما تسالنى الحالات دى معناها شنو ..أو اسبابها شنو ..)..
    ومع ذلك ندعو له بالهداية ويعود إلى الطريق المستقيم وبعد داك مستعدين نسمع ليهو مغنى أو مديح ..وما ذلك على الله ببعيد ..

  32. ودالزبير كتب:

    التركي ياخوي بالغت كيف يعني لا ترى في فقدانها الوعي حاجه

    طيب كونها تصرح للجريده انها منتظره الحوت يجي يزفها يعني يعرسها برضو عادي زي الزبادي

    عباس والسلاوي

    والله اخوكم بيسمع للزول الفقر ده وفي فتره كنت حافظ اغلب اغانيه ولحدي هسه عندي راي انو من اجمل الاصوات لكني هنا بتكلم عن سلوك بعتبره شاذه من فتاه من المفترض انها طالبه جامعيه

    نيام

    يأخي قال ليك من جاور السعيد يسعد ونحن قاعدين معاكم هنا لاكتر من تلات سنوات معقوله ما نكون استفدنا حاجه

  33. زووووووول كتب:

    ود الزبير سلااام
    قالوا شقى الحال يقع فى القيد .
    اعتقد ان من اغمى عليها عند رؤية الحوت هى من وقعت فى القيد اما المجانين والما عندهن وليان وما عندهن اهل كتار يا معلم . والله امبارح القريبه دى قابلتى واحده لابسا ليها لبسه وارغو زاتو يخجل ما يلبسا .وبصراحه كدا لمان شفتها اتخيلتا نفسى لابس اللبسه دى انا (اللبسه بنطلون ضيق جدا وقصير جدا ) والله يا عمك انا من الخيال دا زاتوو خجلتا . زى قصة زولك الدقا خروج .
    والليله برضو كمان قابلتنى واحده لابسا زى الزفت .وطبعا دى وديك احتمال نسمع بيهم مغمى عليهم امام الحوت او وحيد القرن او الاسد زاتوو .
    كسره : الماعندهم اهل بالكووووووووووووووم يا جماعه .

  34. حاج أحمد السلاوى كتب:

    أخونا ..شكسبير ..
    معليش نحنا خرمنا شوية عن موضوع البوست الأصلى المتعلق بالطالبة الجامعية إياها ( ربنا يهديها ويصلح حالها بعد كدا ..إن شاء الله..ويمكن المودوع دا يكون ونتمنى يفتح ليها باب التوبة ) وبقينا فى تولة المدعو سىء الذكر حودة كما يطلق عليه معجبوه ..كونك تعجب بصوته وأنه من أجمل الأصوات الموجودة فى الساحة دا طبعن موضوع يطول بحثه لأنه قناعة شخصية ومسالة نسبية تتفاوت ولكن أن يظهر دوماً بهذه الصورة المقيتة فى وسائل الإعلام المرئية ونحن نردد أن هذه مسالة شخصية تخصه بمفرده ..لا أوافقكم على هذا الطرح ويجب ألايسمح له بالظهور ما لم يكن فى كامل وعيه وقدراته العقلية ( الغائبة دوما)..لأن أبناءنا وبناتنا عندما يروا شخصاً كهذا تائه وغائب عن الوجود وله معجبون فسوف يعتقدون ألا غضاضة فى ذلك ويبقا شىء عادى مثل حالة التعرى التى بدأت تغزو أذهان الشباب والشابات … ومن شبّ على شىء شاب عليه .. هذا ما احببنا أن نوضحه من جانبنا ..ونسال الله أن يجنبنا الفتن ما ظهر منها وما بطن .. وخلوا بالكم من أبنائكم السٌغار والذين هم فى طور المراهقة ( بالنسبة للكواشف تكون المراهقة التانية ..وربك يستر ).
    – أخونا الزوووووول .. اين أنت يا رجل ؟ مسجل غياب فى الساحة ( الخضراء ) ..وقالوا النظرة الأولى ليك والتانية عليك فما تدقق كتير فى المعاينة ..أحد الظرفاء قال أنا بعاين مرة واحدة ( النظرة الأولى ) بس بخليها طويلة شوية عشان يتجنب النظرة التانية المحسوبة عليهو ..إن شاء الله دى ما تكون نظريتك .. يا ابو الشباب ؟

  35. عباس كتب:

    عم السلاوي كيفك
    شايف ود الزبير اختصرنا وحسمنا
    لكن زي كلامك الموضوع متفرع وممكن نتكلم فيه من عدة زوايا
    ود الزبير البنية لسه شباب والشباب معروف انو طاشي الا من رحم ربك
    ايام وتعدي وتبقى واعيه وعاقلة
    وزي ماقلته ليك في المداخلة الاولى لازم الشباب يتمردو ويتصرفو تصرفات غير مسئولة

  36. زووووووول كتب:

    عباس سلاام
    طيب يا عبس قلنا البنيه شباب وطايشه اهاااا الحوت دا مالوووووووووو؟؟

  37. عزت كتب:

    (اهاااا الحوت دا مالوووووووووو؟؟)


    كيف مالو مش مفروض يجي يزفها يعني يعرسها زي ما قال ود الزبير……….
    بكون ما لاقي خميس فاضي عشان يجي يزفها..!!!

  38. عزت كتب:

    يا عيون بسامة فرايحية
    يا مواني بعيدة و منسية
    و الريد من قبلك ما كان ريد
    و لا بعدك شفنا الحنية

    بالصدفة لقيتك يا غادر
    وغنيتك ألحان و مشاعر
    و غنيتك ألحان و مشاعر
    و رسمتك ألحان في الخاطر
    عنوان للريدة الأبدية

    و الريد من قبلك ما كان ريد
    و لا بعدك شفنا الحنية
    ____________________

    دا جزء من الأغنية يا حاج السلاوي اليوم داك البكت الولاد و خلتم يفقدوا عقلهم و يتصرفوا بشوية جنون … “دقاقة” و بوس و غمران و حاجات تانية حامياني

  39. elturkey كتب:

    ودالزبير : الأغماءة قلت عايزة تفسير طبى بس حسب علمى انو الأنسان لما يمر بلحظات غير طبيعية كالفرح الزائد أو الهلع … وزفتها دى أحلام مراهقة والطالبات الجامعيات حاليا أغلبهن فى طور المراهقة ومن منا لم يحلم بأن تأتى نجلاء فتحى أو شمس البارودى ليزفها !!! من حق كل مراهق أن يحلم ويخطط لمستقبل كيفما يشاء وواجبنا نحن أن نرشده ونقنعه بان مايحلم به ماهو الا خيال ومرحلة ستعدى .

  40. حاج أحمد السلاوى كتب:

    المرطب أبو عزت ..
    دحين الأغنية البكت الولاد والبنات ( وبعض الكواشف) مش من أغانى المدعو النور الجيلانى ..ولاّ أنا غلتان ؟ أكان غلتان قولوا لى غلتان !!
    وطبعن الحوت دا مش حيكون عندو أى خميس فاضى عشان يزفها بس .. دا ما عندو ساعة واااااحدة يصحى فيها من غيبوبته اللانهائية السرمدية ..
    البنية دى عاوزة تأهيل من أول وجديد ..وربنا يهديها ويصلح حالها .
    – أخونا عباس .. نعم هناك طيش فى فترة الشباب لاكين كمان ما يبقا طيشاً اشتر ويوصل الدرجة دى ..وما لازم يتمردوا ويتصرفوا تصرفات غير مسئولة .. وهنا تكمن مسئوية ولى الأمر والأسرة .
    وعلى حسب ما أذكر إننا ناقشنا مرة من المرات ( والمرات كثيرة ) موضوع طرحه ولدنا المشاكس مشاكلز تحدث فيه عن التطور والتقدم ..ونحنا العواجيز ديل قلنا راينا بصراحة تامة وهو إننا لسنا ضد التطور والتغيير اللى هو سنة الحياة ولكن دون تعدى ثوابت مجتمعاتنا السودانية الإسلامية ..فى أشياء لا أجامل فيها ابنائى إطلاقاً ودايماً أتكلم معاهم فى المواضيع دى ..وكلكم راع وكلكم مسئول عن رعيته .
    إتفقنا ؟؟؟

  41. زووووووول كتب:

    ود الزبير
    قلتا ليا القرد كيف ؟؟
    بالله ادوهو الجماعه ديل
    كسره : دواس مع مين يا عمى .
    كسره : القرد بتاع جماعتك ديل بعرف يحدف!! يا ود الزبير اههههههههههههههههههههههههااااى.

  42. الكناني كتب:

    المدونون الكرام سلام
    الاخ الكريم ود الزبير
    لك التحية ونسأل عن ماذا جري لك هل نقص الماء المالح بعد العودة الي الديار اثر في ردودك وقوة تحملك والتحلي بما كنت تنادي به ؟ اين انت مما كان معهود بك من رحابة الفكر وسماحة الكلمة اين تلك المدونة الفاضلة التي كنت تدعوا لها وتعمل عليها ؟
    اخي الكريم عهدنا بك ان تسوق كل الردود الي حوار هادي وتبعد بنا عن المهاترة وتترفع عنها. عد كما كنت ( وبقيهم ثمانية )
    الاخت monamie
    السلام عليكم دعيني انقل ما كتبت ( الادب والاحترام مش جايي انت ولاغيرك انبهني عليهم لاني الحمدلله من اسره محترمه والحمدلله وانت ما المفترض ولا بسمح لك بتقليل ادبي واحترامي فانا فوق الادب والاحترام والتهذيب ) افتكر انك وضحتي موقفك ولا تحتاجي لإثباب ارجو منك ان تتحلي بما قلت وتمسكي به وابعدينا عن المهاترة مشكورة
    ولكم الود

  43. مشاكل كتب:

    سلامز

    العزيز الكناني .. تحية طيبة

    لقد أبنت و أوضحت .. جزاك الله خيرا

    ود الزبير .. الرجاء عدم الإنسياق الى المهاترة .. فنجد انفسنا كبقية المدونات و المواقع و انت أعلم بها مني

    أبكرون .. يا حبيب الكل … إن شاء الله .. عترة و بنرجع تاني زي ما كنا .. محترمين و مأدبين و متفاهمين و مختلفين و لكن اختلاف تنوع

    ابو الأفالق … ما محتاجة لي عين علشان ما يدونا عين .. نحن مية المية كدا .. شدة و بتزول

  44. مشاكل كتب:

    سبحانك اللهم و بحمدك لا إله إلا أنت نستغفرك و نتوب إليك

  45. Admin كتب:

    مون امى وود الزبير –
    تابعت منذ فترة بداية الخلاف بينكم الاثنين وتطوره – وللاسف الشديد اعتقدت بان الموضوع سوف يتم حسمه من جانبكم وبنفسكم فى حينه – لكن للاسف الشديد – استمر الخلاف بل وبدا الموضوع يتطور الى الاساءات الشخصية وبالفاظ لايعرفها هذا المنتدى والموقع.

    عليه يعتبر هذا التنويه بمثابة الفرصة الاخيرة لكما بعدم تكرار ما حصل والا سوف يتم ايقاف العضوية على الفور وايقاف خاصية النشر التلقائى وانتظار موافقة المدير على كل مقال او حتى تعليق .

  46. monamie كتب:

    اخي استرايكر هل تطلبون مني تقبل الاهانه والتجريح والشتم واسكت من المفترض ان اكون اختا لكم وانتم عندكم اخوات وبنات فهل تقبلون ان يتم سبهم من البسوا والما بسوا ؟ ارجو ان لا تعاتبونى علي ردى لان البادى بالشتم هو وليس شخصي .

  47. اواصر كتب:

    الزوار الكرام السلام عليكم
    وجمعة مباركة وتقبل الله منا ومنكم الصلاة والدعاء
    الأخ/ودالزبير
    لك العذر الظاهر قريت البوست بتاعك متأخر شوية (مشاغل الحياة).
    جميعنا يتفق فى انه تصرف مرفوض بشكل كامل سواء كانت معجبةً بشخصة أو فنه فالتطرف شئ بغيض لاتقبله النفس السوية حتي لو كان مصدره عاطفي فهو لايبرر هذا التصرف الغير مسئول ،والاسلام هو الدين الكامل الذي لاتجد فيه تطرف النصاري للعبادة (الرهبان والقساوسة)ولا افكار اليهود المتعصبة ،وانواع التطرف هي الفكري والديني والعاطفي واشدها علي عقل الانسان وتصرفاته العاطفي .
    معليش علي المقدمة ، لكن دعنا آخي نأخذ الموضوع من جوانب شتي ، تصرف هذه البنت او غيرها من الكثيرين نجده مصاحب لبعض للشخصيات المشهورة فى مجالات عديدة وهو ليس بقاصر علي الفانين فقط (ولو انو في الحته دي كتير شوية) بل تعداه حتي الي الشخصيات السياسية والدينية ولعل التطرف في الاعجاب بهذه الشخصيات هو مردود مافعلوه من اشياء لمست فى الناس مواضع حساسة ،فالزعيم السياسي المحبوب الذى يخاطب عقول شعبه ويثير فيهم الحماسة تجد له متطرفين في حبه ومدافعين عنه وخيرمثال لذلك الزعيم جمال عبد الناصر وحاله الحزن والهيستريا الشديدة التي صاحبت وفاتة والتي دفعت البعض منهم للانتحار، وايضاً الزعيم الهندي الكبير غاندي وحب شعبه الكبيرله والامثله كثيرة في التاريخ . والحديث هنا لا للمقارنة .
    ونجد التطرف الديني ايضاً فيه الكثير من الخطورة علي صاحبة فتدفعة لتصرفات غريبة ليست من الدين في شئ وايضاً مايفعلة بعض المريدين والحيران لشيوخهم والتبجيل الشديد هو نوع من انواع التطرف .
    ونأتي هنا للتطرف العاطفي ،اي عاطفة لا يستطيع الانسان ان يجعلها متوازنة بداخله فهي متطرفة لوكانت حباً او كرهاً، والتطرف العاطفي لأملك له تفسير علمي لكن بعض العلماء صنفه علي انه نوع من العقد (اوديب والكترا) ،والاعجاب الزائد بشخص ما فهو تطرف ولعل اكثره مايصاحب الفنانين والفنانات وحالات الهيستريا والغماءات التي تصاحب الحفلات او الصراخ لمجرد رؤيتهم وحالات الانتحار التي تصاحب وفاتهم كما حدث عند موت الفنان عبد الحليم حافظ وبوب مارلي ،او التقليد كفريق البيتلز وحالات الاغماء عند وفاة الفنان مصطفي سيد احمد والكلام ليس للمقارنة ،اذن فاللإعجاب الشديد بالفنانين تاريخ طويل . لكن مايحدث لهذه البنت ولغيرها من الجيل الحالي الذي ينظر الجميع اليه بالإشفاق والرثاء لحاله والمناظر الغريبة للشعر والملابس والالفاظ فهو مايستحق ان يقف الجميع لينظروا هل هو جيلٌٌ جاني علي المبادئ والتربية السليمة من مجني عليه ؟ بلاشك غياب الغدوة الحسنة لهؤلاء الصبية له آثر كبير علي تصرفاتهم،فالنبدأ من البيت غياب الاب او انشغاله بتوفير لقمة العيش والدوامة التي لا تنتهي سبب كبير .
    والمدرسة ثانياً زمان كانت تسمي وزارة التربية والتعليم الآن لاأجد لها اي اسم وما نقص من البيت تتمة المعلمة او المعلم كان الطالب سابقاً يربط مثله الاعلي بالمعلم المفضل لديه او مهنته التي يحلم عندما يكبر ان يكون استاذ (زي استاذ فلان او ست فلانه)، واليوم للآسف لم يصبح الاستاذ هو القدوة ولاالمدرسة هي دار التربية يعني (الاستاذ من يخت الطبشيرة يجري يلحق مدرسة تانية يدرس فيها) او الدروس الخصوصية والمدارس الخاصة التي ذهبت بهيبة المعلم (يعني الطالب عينو قوية بقرا بقروشي) قاتل الله الانقاذ التي جعلت الناس مشغولين بلقمة العيش اكتر من اولاهم (الام شغالة والاب شغال وبرضو ماقادرين يتمو الشهر) وبين حجري رحي ضاعوا الاولاد فتجدهم تائهين ضالين قدوتهم الفنان الفلاني واللاعب الفلاني وآخرهم ما حدث مع وفاة لاعب المريخ .
    اخي ودالزبير
    يخيل الي ان الموضوع اكبربكتير من وقوع فتاة علي مسرح امام الناس، ولو ما ابالغ ممكن جدا يكون تصرف البت دي عجب شباب كتار جدا من المتفرجين علي اساس انها قدرت تعبر عن رأيها .
    آللهم يامقلب القلوب ثبت قلوبنا علي دينك واقدامنا علي صراطتك وقلوبنا علي شكرك ولساننا علي ذكرك

  48. ودالزبير كتب:

    عندي قرد وعجل وكتاكيت ضايعه في زول شافها ؟؟؟

    قالت ليك ياادمن من البسوا والمابسوا غايتو أنا بعد نفسي من البسوا كده نشوف المابسوا ده منو !!

    إسترايكر رجع تعليقاتي والرسائل العنده شيلها شيلها

    يأخي والله تعليقاتي ديك كانت عجباني عجب شديد بعدين بطريقتك دي حليت تعليق زوووووول أشتر أشتر كان تشيلوا معاك هاهاهاهاهاهاهاهاهاها

  49. ودالزبير كتب:

    الأخت أواصر

    أشكر لك تداخلك الذي فتح دروب جديده للنقاش حول التربيه وطرق التعليم وإنحراف الشباب ولقد أوضحت أمور كثيره قد تكون غابت عننا ونحن نتناول هذه الظاهره الغريبه

    لك الشكر أجذله ولا تحرمينا من سديد رأيك وجمعه مباركه

  50. ismaeil كتب:

    السلام عليكم ورحمة الله أود الإنضمام إلي منتداكم العامر

  51. ortashi كتب:

    قاسة الدنيا سمحة جمال وخيال
    تسوق الزول في وجل وتتبدل الاحوال
    ويوم تتواراي قريبه وفي الحقيقه خيال
    ما اتبدلت الايام ولكن ابدلت اجيال
    زمان الزول اربي فوق اهلو لا عم ولا خال
    زمان الزولا اصد الغار علي البهجمو ديار
    زمان قدح الملاح احرم بدون الجار
    انقلبت موازين والبشوفو كلو حزين
    انقلبت موازين وبقي الفرحان جوه حزين
    انقلبت موازين والرمال راقده فوالطين
    اوصيكم علي البلد لاتغيبوا عنها سنين

  52. ودالزبير كتب:

    أورتشي يأخي شكراً على الكلمات المعبره دي وشكراً تاني عشان نبهتني أمر من هنا لأرى إسم العزيز إسماعيل لأرحب به وأتمنى أن يطيب له المقام بيننارغم ترحيبنا المتأخر جداً جداً

  53. اورتشي كتب:

    شكرا يا ود الزبير وانا شايف مشاركتك هادفه وفعالة ارجو لك التوفيق
    الموضوع فعلا غريب علي مجتمعنا
    ورسالة قصيرة الي صاحبة القصة التي اغمي عليها من جراء الحوت
    تمر الايام و كما هو معروف ان الرجل السوداني غيور جدا وقد يجتر ماضي المراة السيئة مما يصعب عليها مواجهة الحياة وقد يكون الحدث مصيبة بعد الزواج ودمار لحياة الاسرة والمجتمع

  54. aflaiga كتب:

    اورتشى يعنى قصدك بعدين الزول الحيعرس البت الغمرت قدام الحوت يقوم يلقاها محوووته ؟؟ ولا مسمووووكه ولا مصيووووره ويقوم يفتش الالبوم يلقى الغمره القدام الحوت يقوم يديها بالبوت ؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s