حصل كضبنا عليكم

Posted: الأربعاء,7 أبريل, 2010 by عزت in اخرى

انتو يا أخوانا مسئولين من الخير السنة دي مالم الناس ما طرو كذبة أبريل و الا مستكفين من الكضب….

طبعا يا أحباب في الأول من ابريل في كل عام تحصل مواقف كثيرة ‏ ‏معظمها طريفة وبعضها محزن جراء كذب الناس في مثل هذا اليوم. ‏ولعل السؤال الذي يطرح نفسه دائما في كل عام لماذا الكذب في أول ابريل وما اصل ‏ ‏هذه الكذبة المنتشرة في غالبية دول العالم باختلاف ألوانهم ومعتقداتهم وثقافاتهم.

فالشاهد ان أغلبية اراء الباحثين ان “كذبة ابريل”  تقليد أوروبي قائم على المزاح ‏ ‏يقوم فيه بعض الناس في اليوم الأول من ابريل باطلاق الاشاعات او الأكاذيب ويطلق ‏ ‏على من يصدق هذه الاشاعات أو الأكاذيب اسم “ضحية كذبة ابريل”. وبدأت هذه العادة في فرنسا بعد تبني التقويم المعدل الذي وضعه شارل التاسع عام ‏ ‏1564 وكانت فرنسا اول دولة تعمل بهذا التقويم وحتى ذلك التاريخ كان الاحتفال بعيد ‏ ‏رأس السنة يبدأ في يوم 21 مارس وينتهي في الأول من ابريل بعد ان يتبادل الناس ‏ ‏هدايا عيد رأس السنة الجديدة.

وعندما تحول عيد رأس السنة الى الأول من يناير ظل بعض الناس يحتفلون به في ‏ ‏الأول من ابريل كالعادة ومن ثم أطلق عليهم ضحايا ابريل وأصبحت عادة المزاح مع ‏ ‏الأصدقاء وذوي القربى في ذلك اليوم رائجة في فرنسا ومنها انتشرت الى البلدان ‏ ‏الأخرى وانتشرت على نطاق واسع في انجلترا بحلول القرن السابع عشر الميلادي ويطلق ‏ ‏على الضحية في فرنسا اسم السمكة وفي اسكتلندا نكتة ابريل.

عشان كدا أصبح اول ابريل هو اليوم المباح فيه الكذب لدى جميع شعوب العالم ‏ ‏فيما عدا الشعبين الأسباني والألماني والسبب ان هذا اليوم مقدس في أسبانيا دينيا ‏ ‏اما في المانيا فهو يوافق يوم ميلاد “بسمارك ” الزعيم الالماني المعروف.

الطريف في كذبة اول ابريل انها تساوي بين العظماء والصعاليك وبين الاغنياء ‏ ‏والفقراء فقد حدث ان كان كارول ملك رومانيا يزور احد متاحف عاصمة بلاده في اول ‏ ‏ابريل فسبقه رسام مشهور ورسم على ارضية احدى قاعات المتحف ورقة مالية أثرية من ‏ ‏فئة كبيرة فلما رآها أمر احد حراسة بالتقاطها فأومأ الحارس على الأرض يحاول ‏ ‏التقاط الورقة المالية الأثرية ولكن عبثا.

و لكن الكذبة تكون مفزعة اذا لم تكن ذكية و لماحة عندما اشتعلت النيران في مطبخ احدى السيدات الانكليزيات في مدينه لندن فخرجت الى ‏ ‏شرفة المنزل تطلب النجدة ولم يحضر لنجدة السيدة المسكينة احد اذ كان ذلك اليوم ‏ ‏صباح اول ابريل.

و عندما تكون ذكية مثلما خرجت احدى الصحف البريطانية في أول أبريل و علي صفحتها الأولي بأنهم يستخدمون نوعا جديدا من الحبر ذو رائحة جميلة في طباعة صحيفتهم اليوم فرفع الكل الصحيفة الي أنوفهم ذلك اليوم و ضحكوا علي أنفسهم

ولعل السؤال الآخر الذي يطرح نفسه هو لماذا يكذب الناس. ‏ ‏ قال الباحث الانكليزي جون شيمل الذى شغل نفسه بالكذب وبالبحث عن اصوله ودوافعه ‏ ‏ومسبباته “اذا كان الكذب قد اصبح صفة يتميز بها البشر عن سائر المخلوقات ‏ ‏ويستخدمونه في شتى مرافق الحياة واتصالاتهم العامة او الخاصة فان كل الأدلة تثبت ‏ ‏ان المرأة اكثر استخداما للكذب من الرجل”.

واضاف ان السبب فى ذلك “يرجع الى عاملين اولهما عامل نفسي عاطفي فالمرأة أكثر ‏ ‏عاطفية من الرجل ولان الكذب حالة نفسية ترتبط بالجانب العاطفي أكثر من ارتباطها ‏ ‏بالجانب العقلاني فالنتيجة الطبيعية ان تكون المرأة اكثر كذبا من الرجل”.

هسة نحنا كنا دايرين الباحث الانجليزي دا و الا مستر لبتون بتاع قرن شطة يورونا لماذا انتشر الكذب في بعض المناطق خاصة تلك التي تقع دولة أمازونيا فيها و لماذا صار طول العام و صار مرتبطا بالحكام…!!!

Advertisements
تعليقات
  1. عباس كتب:

    هسة نحنا كنا دايرين الباحث الانجليزي دا و الا مستر لبتون بتاع قرن شطة يورونا لماذا انتشر الكذب في بعض المناطق خاصة تلك التي تقع دولة أمازونيا فيها و لماذا صار طول العام و صار مرتبطا بالحكام…!!!
    ======================================

    باقي ليك البشير مابقطع نخرتو ولا اضانو ولا مصيبة زمان من الباحث القلتو دة ؟
    ===============

  2. حاج أحمد السلاوى كتب:

    ابو عصمت ..
    الناس كووووولها منتظرين الكذبة الكبيرة ..
    إنت نسيت ولاّ شنو ؟

  3. aflaiga كتب:

    عزت : اوع يكون فى كضب فى كلامك ونكون صدقناهو برضو ؟؟؟ تحياتى يا موثق يا بحيييييييييت .
    لم يعد ابريل شهرا للنفاق او الكذب
    بل صار عامى كله عام الكذب
    كذب مباح ثم اخر مستحب
    والكل يكذب ثم يكذب ثم يكذب
    وما زال الرجل يكذب ويتحرى الكذب حتى يكتب كذابا ..ولا شنو ؟؟
    مشكلتنا اننا ادمننا تصديق الكذب
    بل واحيانا نصدق كذبنا على بعضنا وعلى انفسنا
    فانا اعلم احيانا انك تكذب لكنى اصدقك كى تصدقنى حين اكذب
    لم نعد نتحمل صدق بعضنا بقدر عشقنا لكذب بعضنا على بعض
    ايييييييييييييييييه غايتو الله يهون ..
    المهم يا دوك ابريل جا وجاب كضبو معا !!
    فيا ترى ايها هو الكذب فوز المشير ام انسحاب الاخير
    واين نحن كشعب فى العير ام فى النفير ؟؟؟
    كل هذه الاسئلة وغيرها تحتاج لاجابة صادقه لا تخضع لمعايير ابريل الكضاب ..
    وكل ما يمكننا قوله :
    اخسى عليك يا ابريل يا كضاب اختشى ؟؟؟

  4. aflaiga كتب:

    يحكى ان امير المؤمنين كان له عداوة مع احد اليهود وثار مبيت فلما حكم امير المؤمنين بلدة اليهودى التقاه اليهودى فى الشارع العام ودار الحوار التالى :
    اليهودى : يا امير المؤمنين اعلم انك تبغضنى ولكن هل ينقص ذلك من عدلك تجاهى من شيئ ؟؟
    امير المؤمنين : والله انى لابغضك لكن ذلك لا يمنعنى من اعطاءك حقك وبسط العدل والحق تجاهك .
    اليهودى : انما هذا ما اردته فقط وانما تاسى على الحب النساء !!!!!!!!!
    يا ربى امير المؤمنين لو فاز حيعدل فى الناس الحيبغضم ولا حينفيهم من المدينه الى شعاب مكه ؟؟؟؟ وهل نحتاج لامير مؤمنين غير الذى يعدل فى الجميع ؟؟؟؟
    ام انها كذبة ابريل وخلف كل قيصر يموت قيصر جديد ولا نحلم بعالم سعيد ؟؟؟

  5. ابكرون كتب:

    عزت : سلامااااتك
    ياخ كل ما يحدث في السودان من اول ابريل الي 13 منه اكبر كذبة في التأريخ هههههههههههههههههههه عايز كذبة اكبر من كده …خلينا من مستر لبتون وبروك بوند وشاي الشجرتين…..يااااخ ده قال ما كان في تعليم مجانافي السودان ههههههههههههههههه….
    بالله شوف ابريل الفات كانه أمس كنا ضربنا المثل بالحركة (البايخة) العملا (المهندس مصطفي شوارع )في اصحابو ببورتسودان وكانت كذبة ابريل……!

  6. نيام كتب:

    افليقا:
    “ام انها كذبة ابريل وخلف كل قيصر يموت قيصر جديد ولا نحلم بعالم سعيد ”
    لينا زمن نفتش ليك و جيتنا الليلة كايسنا
    امريكا روسيا قد دنا عذابها
    وانا جاييكم

  7. طارق أب أحمد كتب:

    ((وبدأت هذه العادة في فرنسا بعد تبني التقويم المعدل الذي وضعه شارل التاسع عام ‏ ‏1564 وكانت فرنسا اول دولة تعمل بهذا التقويم وحتى ذلك التاريخ كان الاحتفال بعيد ‏ ‏رأس السنة يبدأ في يوم 21 مارس وينتهي في الأول من ابريل بعد ان يتبادل الناس ‏ ‏هدايا عيد رأس السنة الجديدة.))

    يعنى يا دوك الرؤساء ديل (متعوده دايمن) من قبل 460 سنه

  8. نيام كتب:

    “ترامي الي مسامعه شهرة خلاوي الغبش بالقرب من بربر ،فهاجر اليها و تتلمذ علي شيخها محمد الخير عبدالله فنهل من علوم التوحيد” هذا اقتباس من كتاب التاريخ للصف الثاني الثانوي …والمقصود ان محمد احمد المهدي قد هاجر ليتعلم في خلاوي الغبش في بربر….”قال لناس بربر نحن دخلنا ليكم الدين” انحنا يا اخوانا كضبنا عليكم…نحنا من سمك ابريل يا دكتور …تقول لي الحوت…

  9. عباس كتب:

    قالو ليك الناس دايره تعرف اقوى حكومة عربية حاكمه بلده حكم قوي
    عشان يعرفو الحاجه دي قامو جابو حكومة صدام حسين وقالو ليهم دايرنكم تجيبو لينا الاسد من الغابة
    يازول صدام حسين ساق ليك معاهو جماعتو ودخل الغابة يوم واحد وجاب الاسد معاهو – الناس عرفة صدام ده ما هين
    جابو الحكومة المصرية وقالو ليهم جيبو لينا الاسد مبارك ساق جماعتو ودخل الغابة اخد ليهو يومين وجاب الاسد الناس قالو عنو كويس برضو وقوي
    وجابو الحكومة السورية ……………… الخ
    وجابو الحكومة السعودية …………………الخ
    …………………………………………
    ………………………………………..
    ……………………………………………
    المهم اخر حكومة اخدت في الغابة قريب الاسبوع حتن جابو الاسد
    وبعديها جابو حكومة السودان وقالو ليهم تجيبو لينا الاسد البشير قال ليهم اصلو عوجه مافي الاسد يكون معاكم بباقي يومكم ده
    البشير ساق جماعتو ودخلو الغابة زولك اخد اليوم الاول واليوم التاني التالت وعيك عمل اسبوع ومافي منو خبر تم الاسبوعين ما مرق لا هو لا الاسد
    الناس قالو يخشو يشوف الحاصل شنو علي حكومة السودان دي اتاخرت كده مالا
    الشي الكان في الحسابات ولا متوقعنو
    لقو حكومة السودان في طرف الغابة ولا خشة نص الغابة زاتو
    ماسكة قرد وتكفت فيه وتقول ليه قول انا اسد

  10. ياسين شمباتى كتب:

    عزت الحبيب..سلامات..
    الحمدلله السنة دى الناس اتشغلت بالانتخابات ونست الموضوع دا,,لكن فى جماعة من اصحابنا سامحهم الله طلعوا اشاعة على الفيسبوك انو زميلا لينا حصل ليهو حادث ورقدوهو مستشفى!! لكنها كانت بايخة جدا ومؤلمة خالص..

    وجددناك يا اكتوبر فى ابريل..ياربى بيحصل؟؟؟

  11. عزت كتب:

    سلام يا أحباب
    انشاء الله يا شمباتي من بقك لي باب السما
    انتو عارفين و تاني حاجة قاموا الناس نسوها
    الانتفاضة ………………………. هل من عودة تاني

  12. عزت كتب:

    عارف يا عبس و أنا من قبيل و بقرأ في مداخلتك قلت يا ربي حيختما بطرفة الزول الدخلوهو عشان يكتل الأسد و يعرس البت…

    الحمد لله جات سليمة

  13. عزت كتب:

    كمان بقى في نوع تاني من الكذب بقى يعتمده البيعرفو يستعملوا الكمبيوتر و الفوتوشوب و يفبركوا الحاجات بغرض استمالة البسطاء… كالشيطان الذي ظهر في دخان سقوط البرجين في 11 سبتمبر و اسم الجلالة في الطماطماية و الأشجار وغيرها من الكذبات…

    كذبة الأشجار

    فقد قالوا أن الصورة لحديقة بالمانيا وقد كونت جذوع الاشجار على الجانبين شهادة التوحيد مع الادعاء ان المانيا قد اغلقت الحديقة و لكن الحقيقة أن الصورة هي لوحة لفنان مصري وقد تم حذف توقيعه من عليها

    كذبة

    أحبابنا: أكمل الله الدين ببعثة النبي صلى الله عليه وسلم ولايحتاج لمثل هذه القصص والاوهام ليقتنع به الناس

  14. الكناني كتب:

    د. عزت
    بارك الله فيك وانت تقول ( أحبابنا: أكمل الله الدين ببعثة النبي صلى الله عليه وسلم ولايحتاج لمثل هذه القصص والاوهام ليقتنع به الناس )

  15. زووووووول كتب:

    عزت سلااام
    أحبابنا: أكمل الله الدين ببعثة النبي صلى الله عليه وسلم ولايحتاج لمثل هذه القصص والاوهام ليقتنع به الناس.
    كم انت رائع يا دكتور .
    فكثير من الصحافيين يتعمدون جر الزبائن لصحفهم عن طريق الكذب .وبعضهم يهتم بصور الطماطم والبتيخ !! ويدعى ان عليها شهادة التوحيد واخرين مثل الدار يهتمون بالتيوس التى تدر لبنا فيأتى مانشيتهم : تيس فى العزوزاب يدر لبنا .
    وبعض الصحف الاجتماعيه خصوصا تنشر جرائم حدثت قبل نصف قرن ثم تصورها للقارئ بانها مباشروبالصورة والصوط !! كمان .
    بعدين شوف يا عزت من اسوأ مراحل الانقاذ مرحلتها الاولى التى كان الترابى امرا وناهيا فيها فكان يعقد قران الشهداء على حور الجنه فتصدق امهات الشهداء حتى يزغردن . وكذلك لو تذكر . قالوا الشدر كبر جينا………. والقرود التى تعمل كاسحات الغام .
    ارجو الا يفهم حديثى خارج سياقه فانا مقدر جدا ومعجب حد الثماله بشباب الجهاد وشهداء معركة الاسلام ضد النصرانيه فى بداية تسعينيات القرن الماضى واكن تقديرا كبيرا لكل من خرج من بيته ومن خرج من مدرج الدراسه ومن ترك كرسى الوظيفة الوثير من اجل اعلاء كلمة الله تعالى وارجو ان يتقبلهم الله جميعا فى رحمته وان يحشرنا واياهم فى زمرة الشهداء والمجاهدين فى اعلى درجات الجنه .

  16. زووووووول كتب:

    الكنانى
    وافق شن طبقه كما يقولون . وقد مست عبارة الدكتور اوتارا متشابهه لك التحيه ولا تحرمنا من طلتك البهيه

  17. الكناني كتب:

    زوووووول
    حقيقة كان لابد ان تمس هذه العبارة الرائعة اوتارك واوتارنا كلها
    لك التحية وصدقت لكن باقي ليك بعد الترابي حصل شنو جديد ما ياهو الحال نفس الحال

  18. ابوالمنذر كتب:

    عزت ..
    كذبة ابريل حره ونزيهه
    صدقينى وحياة غرامنا ما كذبت عليك فى حبى( والكرسى ده لله)

  19. aflaiga كتب:

    شوف بالله زول وكنانى اول مره يكتشفو انو وافق شن طبقه وهو طيب اصلا اللماكم شنو غير شن وطبقه ؟؟ بالله شوف ديل انتو ما قادرين تصدقو يا ناس المدونه انكم ناس عسوليين اتلميتو ببركة راجل عسولى قدر يخاطب العسل الجواكم ولماكم فى خلية نحل وحده ؟؟؟ بالله شوف الناس الحلوين بالله ؟؟؟ قال شنو وافق شن طبقه ؟؟ ما لازم وانتو قايلين شنو يعنى جبرا ساهل ولا ساهل ولا انتو ساهلين ؟؟ ادام الله ودكم وتحابكم فى الله قولو امين ديل شنو الناس السمحين ديل ..

  20. aflaiga كتب:

    مشهد سغنتوتى :
    سمسمه : شوف يا افليقا ما اى نعم الدنيا ابريل واى حاجه لكن والله ده براهو وده براهو حقيقة انا والشفع بنكن ليك كل احترام وتقدير واجلال .
    افليقا : والله يا سمسومه اتخيلى عشان ابريل الكضاب ده انا ما قلن ليك نفس الكلام عشان ما تقومى تفتكرى فى علاقة بين ابريل والحنان الكتير ورقة التعبير !!
    سمسمه : انا غايتو وريتك انو المودوء ما اندو الاخه بابريل – حاجه كده من جوه الجوه والله .
    افليقا : غايتو ربنا يجيب العواقب سليمه عاوزه حاجه من بره ؟؟ انا مارق ..
    سمسمه : سلامتك وتجينا راجع غانم سالم ..
    افليقا : يلا باى ..
    سمسمه : بس لو اتذكرت وانت جاى – لو اتذكرت يعنى – بس جيب معاك شوال سكر وباغة زيت وكرتونة صابون – وباكتتين دقيق سيقا وما عاوزه اطول عليك بس كده كفاية لانو الدنيا انتخابات وكده والظروف ما معروفه يعنى – ده لو اتذكرت ..كويس ؟؟
    افليقا : اتذكرت ؟؟ هو بعد اللسته دى اسمى بتذكرو ؟؟ وقلتى لى المودوء ما اندو الاخه بابريل هو ابريل ده نتغشى فيهو مرتين ولا شنو ؟؟؟
    سمسمه : افليقا انت زعلت ولا شنو ؟؟؟

  21. زووووووول كتب:

    افليقا سلااام
    حباب طبقه وحباب شن زاتووو.
    شنوو يا عمك سالى ضنبك بهناك كدا.
    ولو عارفين البات ديل !! والكضب بجيبوك لينا كان خلينا عزت كضب من زمان .ماتنقطع وصوتك للقوى الامين والله اكبر

  22. aflaiga كتب:

    زووول : سؤال بسيط :
    ما ممكن يكون الله اكبر واى حاجه بدون ادى قويكم الامين عليكم ؟؟؟
    سؤال تانى ابسط :
    هو فى الدنيا دى غير الكضب والجكس البخلى الناس تتكلم شنو ؟؟؟

  23. زووووووول كتب:

    افليقا
    خلى الحاجات كلها وجيب الباخه الت الزيت

  24. aflaiga كتب:

    زوول : سؤال تالت سغنتوتى كده :
    انت قلت ( ولو عارفين البات ديل !! والكضب بجيبوك لينا كان خلينا عزت كضب من زمان )
    القصه دى ما ملاحظ انها ناقصه بند من البندين يعنى بالانجليزى ل if clause وال main clause ما متوازن فى احدى الافين :
    لو عارفين الكضب بيجيبك كان خلينا عزت يكضب من زمان —1
    ولو عارفين البنات بيجيبوك كان شنووووووووو —— 2
    اوع تقول لى كان جبنا ليك بنات من زمان لانو ود الخلا حينفض يدو منك ويعلن فيك الجهاز وتكونو فكيتو الارتباط التوأمى المقدس لانو ود الخلا اى شيء ولا البنات مش يا بشاوى وسهيل ؟؟

  25. aflaiga كتب:

    زووول : سجمى اسى من الحاجات الطلبتا سمسمه ديل كلهن ما لقيت الا الزيت ؟؟؟
    يا نيام الناس ديل ناوين يجلدونا ولا شنو عاوزيننا نتمسح ؟؟!!!

  26. زووووووول كتب:

    افليقا
    بعد اذن الدكتور
    بس نحن خايفين عليك من الهجيره قلنا تجى تقعد فى ضل البتاعه لكن لو بقيت زول شمش وشماشى عديل شوف ليكا حاجه لا ظليله ولا تغنى من اللهب . شوف ليكا شاكوش ولا عصايه ولا جبه مرقعه ولا نجمه ومثلث حتى .
    ((هو فى الدنيا دى غير الكضب والجكس البخلى الناس تتكلم شنو ؟؟؟)) فى دى صدقت تبببب يا ابو الافلاق .
    كسره : انتو وين طارق اب احمد ووين سهيل ولا بقو زى ناس شمباتى شبكتهم تخش يوم الاربع بس .
    مرحبتين حباب ابو المنذر وجيت البنات جابوك لينا .
    جنس خرمجه .

  27. زووووووول كتب:

    افليقا
    لو عارفين البنات بجيبوك لينا كان كلمنا الحوووت!! يديك واحده من المعجبات الما عندهم اهل وكان كلمنا ود الزبير ينزل فيك بوست .
    كدا الافات اتوازنت بس الله يستر من التفجيرات .

  28. aflaiga كتب:

    زووول : يعنى الواحد لمن هناى يفتش باقى حوته ؟؟!!! هو فى حوت بيخلى حاجه ياخى ده بياكل السمك السغار ظاتو لو كان تمساح كان ممكن نقول ننضف ليهو سنونو مما علق بها من بقايا لحم !!!
    اسى عزت يجى ناطى يقول ليك اقعدو انتو فى قلت لى ما قلت ليك لمن شنو ما بعرفو داك ..

  29. عزت كتب:

    يا سلام يا أفليقا و نحن لاقين …. يا حليل زمن قلت لي و قلت ليك….
    بالله كلم ديك كمان عشان يجوك…

  30. elturkey كتب:

    سلام يادكتور وسماره الكرام … يكون ياخوانا عشان الناس سمعت كضب لمن اعتادت عليه وبقت مابعمل ليهو شنة ورنة لمن كذبة ابريل بقت عندهم قطرة فى بحر .
    أفليقا : (يا ربى امير المؤمنين لو فاز حيعدل فى الناس الحيبغضم ولا حينفيهم من المدينه الى شعاب مكه ؟؟؟؟ ) تعرف يومتا لقيت مجموعة من نسوان الحى بيسألو فى زوجتى عن صحة مااذا كانت رواتب رجالهم ستمنع عنهم فى حالة تصويتهم لغير الشجرة ؟؟؟؟ تصور انو فهمو الناس البسطاء أن رجالهم ح يحيلوهم الصالح العام او منع عنهم الرواتب على أقل تقدير … وتقول لى عدل .. لكم الود والأشواق

  31. البشاوى كتب:

    دوك عزت
    زى ماقالو سنتنا كلهابقت ابريل–
    افليقا — انت ماتخلى الكضب وتتم (دة برا ودة برا )ولا شنو ياعزت ؟ افليقا دة مولود فى ابريل ولاشنو؟ بعدين كلامك البيجيب الهوا دة لزومو شنو بشاوى وسهيل ولا داير تسكتنا من دة برا ودة برا — وأمشى جيب الرسلوك ليهو بدل ماقاعد تتفاصح والطيارة تفوتك –
    ابكرون — راجع ايميلك –

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s