نشيد صبيحة الانتخابات ..هدية لناس السودان

Posted: الخميس,8 أبريل, 2010 by moshahidah in إجتماعية, سياسية

جاك يوم الانتخابات يا مواطن ..يا انسان ..يا مسكين …و الصف الطوييييل ..و الازدحام ..

حاجات تشبه بلادك المشهورة بالنظام …ياخ تمام و تعظيم يا حكومة سلام..

خالك و احتمال ابوك كمان ما ماشين يصوتوا..بتراجع نفسك ..اسي ما كنت افضل نايم …و تخلي المشترنهم يصوتوا..

ناس الشجرة هديل  ..كل الاحزاب المشاركة..والشمس ظاهرة 

وفي الطرف كم زول مع السنبلة ..ناس مدنسها فلوس حرام  و ناس لسه طاهره…

باب القلوب المفروض مفتوح للامل و التغيير ما معروف ماشي لمين ..

و ناس من الامة ماجو عندهم اكتئاب و محبطين …

ناس الشعار الاحمر طبعا مقاطعين ..

مراقبين دوليين بنظرو لبلدك شذرا ..و بازدراء ..

ما قادر تقول ليهم ..احنا ما زى ساستنا ..و احنا ناس لطفاء …

لكن معذورين ..الريس هددهم بالطرد .. بقطع الانوف و بالحذاء …

واقف و دورك ما شكلوا قرب ..لكن حتعمل ايه …لسه في حته في قلبك بتقول لازم تنتخب ..و بعدين تندب حظك وتنتحب ..

—————————————–

المهم عزيزى المواطن تذكر هذا النشيد المجيد صبيحة الانتخابات ::

اوعك تختار رمز الشجرة …
                                         كفانا الفينا دمار وتصحر

اوعى تصدق ناس الشجرة ….
                                        بلدنا دى فيها رجالا تبهر

اوعك تكون من ناس الشجرة …
                                        تسرق و تكذب و برضو تكبر

مهما تكون اياك الشجرة …
                                       لا فيها امان و لا صوتك يظهر

——————————————————

مع تحياتي لكل الحيمشي يصوت رغم كل ما حدث وما سيحدث …

البلد دى لسه بخير ..و دى بداية التغيير

http://moshahidah.wordpress.com

Advertisements
تعليقات
  1. aflaiga كتب:

    الاخت مشاهده والله ده توارد خواطر عجيب جدا وليس بغريب لانو انا اعتقد انو الناس الهنا تحابت فتالفت فتوحدت رؤاها ( حلوه دى مش ؟؟ ) تتخيلى انا كاتب بوست صورة بالكربون من بوستك ده وعليه اطالب الادمن بوقف نشره …
    بالنسبة للصوره الطرحتيها اتمنى انو اى زول يفوز يقبل التانى معاهو فى البلد لانو لو الانقاذ معتقده انو بفوزها سيحق الله الحق ويقطع دابر الكافرين ولا بقاء فى الدوله الا للمؤتمرين الوطنيين فما كان فى داعى ابدا للانتخابات وكانو يخلوها شمولية بالدكوه زى ما كانت زمان اما اذا كانت الانقاذ معتقده انو بالانتخابات حتتوسع فى الحكم وتنفرد بالسلطه فبرضو ما كان فى داعى وكان يخلوها حكومة وحده وطنية بالطعمية !!
    يجب ان يقبل الجميع نتيجة الانتخابات لو قامت !! لانو الانتخابات اصلا مفترض تؤدى لنتيجه حتمية وهى توسيع ماعون المشاركة فى السلطه واعطاء المعارضه فرصة للتغيير من داخل البرلمان لما فيه مصلحة الشعب سواء عبر سن قوانين جديده لمصلحته او تعديل قوانين قديمة تتعارض مع مصلحته او الغاء قوانين كانت تهدد مصلحته وده المعنى ممن الديمقراطية التى اعتقد ان طرفى الحكم لا يفقهونها او يتمنون ان تكون خلاف ذلك لانو من الواضح انو الانسحب انسحب لانو لقى انو ما ممكن ينفذ الفى راسو والثبت ثبت لانو عاوز ينفذ الفى راسو .
    ختاما كفانا الله شر الفى راس كل واحد ومتذكرين الراجل القال لى مرتو يا وليه بتفكرى فى نفس البفكر فيهو ؟؟؟ قالت ليهو سجمى يا راجل عاوز تطلقنى ؟؟؟

  2. مشاكل كتب:

    سلامز

    طبعا من حقك تكتبي العايزاهو و من حقنا نرد عليك بالعايزنو

    في دعاية للمؤتمر الوطني في شوارع الخرطوم بتقول

    لا تهدر حقك .. ضع صوتك حيث تفوز

    هههههههه .. عجايب غايتو

    طبعا بما اني مؤتمر ضفاري .. اشوت بالبووز و في الأنكل طوالي .. دي داعية مستفزة و المفروض الكتبها يأخد كرت احمر .. لانها بتأذي مشاعر الخصوم و ( تقنعهم ) من خيرا فيها

    اما انا بقول

    أوعك تصوت لغير الشجرة
    عشان ما يجينا جفاف و تصحر
    اوعك تصوت لغير الشجرة
    عشان ما تضيع صوتك و تهدر

    الباقي في توبيك الإنتخابات

  3. حاج أحمد السلاوى كتب:

    مشاهدة …
    حمدن لله على السلامة ..
    أحد رجالات الإنقاذ وكنا نحسبه من العقلاء ولكنه خيب ظننا للمرة التانية ..
    المرة الأولى كانت فى الرياض بالمملكة العربية السعودية حين ادلى بتصريح خائب وقام بعض الإخوة السعوديين بالرد عليه حينها ..والمرة التانية قبل يومين حين قال من لا يصوت للإنقاذ فلا يمشى فى شوارعنا ..ولا كبارينا ..ولا يراجع مستشفياتنا ..و …………….و …….. .
    دا يردوا عليهو يقولوا ليهو شنو ؟ مثل هذا الجاهل يستحق الرجم وسط السوق العربى ..موقف الحافلات سابقاً نظير تصريحاته الغير مسئولة .
    ولديهم الكثير من هذا النوع ..
    ونرجع نقول ربنا يجيب العواقب سليمة ..

  4. aflaiga كتب:

    عم السلاوى : هو ربنا اللى هو ربنا اللهى هو الخلق الصنع الكبارى ما قال زول بيعصينى ما يمشى فى ارضى ولا يشرب من انهارى !!! بالله شوف ..
    اول شيئ مشتاقين واسفين للانقطاع لاسباب سمسمية فولية شعيرية حمصية .. وانت خير العارفين فانت سيد الطريقه الراقده سلطة فى السجاده العواطفية !!!
    قلت لى قال تركبو كبارينا وتكسرو كبابينا
    تاكلو بركتنا وتقطعو شجرتنا
    ياخى ده منطق معوج ده مش يتدق فى السوق العربى ده يتعلق فى كبريهو الصنعو
    انت اب عاج مش عمل كوبرى كوستى وكوبرى القوات المسلحه اهنداك عندو مساحه قدرها 3 فى 2 مسوره بسيخ وهو بين يدى من خلق الصنع الكبارى ..
    مالكم كيف تحكمون يا جماعه راجعو كلامى الفوق ده :
    لو الانقاذ معتقده انو بفوزها سيحق الله الحق ويقطع دابر الكافرين ولا بقاء فى الدوله الا للمؤتمرين الوطنيين فما كان فى داعى ابدا للانتخابات وكانو يخلوها شمولية بالدكوه زى ما كانت زمان اما اذا كانت الانقاذ معتقده انو بالانتخابات حتتوسع فى الحكم وتنفرد بالسلطه فبرضو ما كان فى داعى وكان يخلوها حكومة وحده وطنية بالطعمية !!

  5. عزت كتب:

    هسة تأكدت انها بقت شمولية بالدكوة
    يعني ناس تابيتا تاني يشموها قدحة
    و المؤتمر حيأكل براهو
    و قالوا البياكل براهو بيخنق

    معذرة فالتعليق أعلاه طالع من مطبخ السياسة… و الغدا قرب

  6. elturkey كتب:

    هو بالله لسه فى انتخابات قائمة ؟؟؟ طيب والمتنافسين منو مع منو ؟ …. قلناها قبل كده ورددها نافع ياخوانا فايزين فايزين وهسع اتأكدت قاعدين قاعدين … والله انا مازعلان الا من المصاريف الصرفوها على الانتخابات دى مش كان طورت شئ من خدماتنا الأساسية … تتصورو جا السواق هسع من السوق وفى كتفه ديباجة قال الناس قاعدين يوزعو شالات وحاجات تانية كمان .. ربنا يستر

  7. aflaiga كتب:

    يا جماعة الخير بالله دقيقة :
    البشير ده لو فاز وما اظن انو ما حيفوز !! عاوز يحكم منو ؟؟
    الناس الادوهو ولا الناس الما ادوهو ولا الناس الادوهو وهم بيحبوهو ولا الناس الادوهو وما بحبوهو ولا الناس الما ادوهو وهم بيحبوهو ولا الناس الما ادوهو وهو ما بيحبوهووووووووو ؟؟؟؟
    غايتو انا بتذكر انو درسنا انو عليه الصلاة والسلام حكم الناس بمختلف انواعها واعتقاداتها فيه الصادق منهم والمنافق المسلم منهم والكافر واليهودى وقد اثبت التاريخ ان اعظم الازمان التى وجد فيها كل هؤلاء حقوقهم كانت حين كان عليه الصلاة والسلام يحكم دولة المدينه فاين دولة المدينه من دولة السودان ؟؟؟

  8. حكاية كتب:

    مساء الخير
    حاج السلاوى ده المنو المخه مركب بالقلبه وقال الكلام ده
    ان شاء الله القروش الانصرفت دى كانت بتاعت جده وارث بن دينار
    عشنا ويا ماحنشوف
    افليقا وينك منقطع من مؤتمر المدونه ومسجل غياب الله يعين
    افليقا اول مره اشوف لى لعبه فيها تنافس حر والمتنافسين ينسحبوا اول دخلوا ليييييييييييه هههههههه مش ده البضحك والبجنن عبد القادر
    تعبونا ساى معاهم بالله ماشى فى الشارع راكب المواصلات محل ما ماشى مباريك رمز الشدرة
    شدرة العشر
    اخبار:::::::::::::
    فى اجازه الايام الجايه عشان نخش فى سبات لحين انتهاء هذه المعمعه
    يا جماعه سؤال هلمجرا مالو انسحب فجاتن لقى روحه مقصر ولا شنو
    بالله على كل الجدود والاعمام الانسحاب وترك الساحه خاليه لرمز البرتقال

  9. حاج أحمد السلاوى كتب:

    بنتنا حكاية .. القال الكلام دا ..كان وزير خارجية فى يوم من الأيام ..وصرح ذات يوم ( والتصريحات كثيرة) فى الرياض بالمملكة العربية السعودية ..أن السودانيين كانوا شحاتين قبل قدوم ثورة الإنغاظ…أقصد الإنقاذ ..
    أنا غايتو أكتر حاجة مزعلانى بعد الإنتخابات دى تخلص إنو ما حنشوف خلف الله تانى ..ولا حنشوف حفلات الزار ..وما حيكون فى أى برنامج الناس تتونس بيهو.
    وغايتو ..جنس .غايتو !!

  10. البشاوى كتب:

    غايتو الانتخابات دى كانو يتعاملو معاها زى ماتش الكورة لوفى فريق اتأخر عن الحضور لزمن معلوم يعتبر الفريق الحاضر فائز بنص قانون الفيفا- حسة المشير حاضر والباقين غايبين والغريبة لسة مصر يتعب روحو زى ماقال عزت كل يوم فى بلد ويتكلم وينقز هو المنافسو منو ؟
    والحكاية زى روتاناسينما فاصل ونواصل — نفس الشخوص تعود مع انتهاء الفاصل ويواصلو الفيلم بس روح جديدة وفهم جديد — وهو انو قبل الفاصل الفات دة نحنااستلمنا السلطة بطريقة غير شرعيةوعملنا فيكم العملناهو بمبدأ الشرعية الثورية والان جيناكم ياحبايبنابطريقةديمقراطية وعبر ارادة الجماهير اللى حلفت علينا لازم نواصل لانو مافى غيرنا – وعينكم بعد الشرعية الديمقراطية دى ماحتشوف النور — واحد يقدر يتكلم ؟ دة إختيار الشعب –
    فى مصر المؤمَنة يتم عمل إستفتاء على رئاسة مبارك ولما يتم إعلان النتيجة بفوز الريس بنسبة 99% الريس بيخاطب اولاد بمبة ؛ أناعارف ال 99% دول اولادى الحلوين وال1% دول برضو أولادى بس مابيسمعوش الكلام-

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s