ياخ لو قرّطوا على كدا

Posted: الثلاثاء,13 أبريل, 2010 by عزت in اخرى

ظلت مدينة الخرطوم منذ الأزل تجمع صفوة المجتمع السودانى و المفتحين فالشاهد أن بعض الملل و الطوائف عرف عنهم حبهم للترحال و التجارة و التملك و واحدين منهم محظوظون بحكم أنهم كانوا “يفكو الخط” فلم يجدوا كثير عناء في ايجاد مكانا مع الانجليز و عملوا و اشتغلوا معهم لذا نابتهم بعض المكاسب مثل تملك الأراضي في أحسن بقاع السودان و الخرطوم و لم يضيعوا وقتهم كثيرا زي ناس (ود حبوبة) الذين دفعوا حياتهم في مناهضتهم ولم يتركوا لأحفادهم سوى الذكرى العطرة و البطولات حيث كان غيرهم أشطر مثل ناس الميرغني و المهدي الذين نالوا الكثير في وجود الانجليز و تقف آراضيهم الموزعة في شمال و شرق السودان و الميرغنية و الجزيرة أبا و غيرها من المناطق شاهدا على تفتيحتهم.

كما نالت الطبقة المستنيرة التي تعلمت و ادارت السودان في وجود الانجليز و أسسوا سمعة طيبة و بالطبع مكاسب ثمينة و تقف منازلهم في الخرطوم صفر و الخرطوم واحد و اثنين، زاحمت تلك الطبقة بعض التجار و الموظفين أيضا في الظفر بالقطع السكنية في الأمكنة المميزة و تمتعوا بخدمات الشركات العقارية و البنوك في بناء تلك المنازل و تأجيرها ريث اخلائهم لمنازل الحكومة عند التقاعد.. و استمرت تلك المكاسب حتى زمن قريب و لكن بتواتر قليل حتى ضاقت و استحكمت حلقاتها و ابتدأت الحكومات المتعاقبة باخلاء آخر  سكان المنازل الحكومية و بيعها و افقار مالكيها و من زاملهم من الموظفين فصاروا شريحة مستضعفة الا من رحم ربي و ظهرت الشخصيات الطفيلية , و البلد اتملت نازحين و قوات أممية و شمولية  و الباقي انتو عارفينو…

سبب هذه الرمية الطويلة أنني و بحسبي لم أغادر الخرطوم منذ الستينات و أكاد أعرف كل صغيرة و كبيرة في تاريخ تطور الخرطوم وجدت (باركينج) لسيارتي الساعة واحدة و نص الظهر في اليوم الأول للانتخابات و جربت تاني يوم (فلقيت برضو) و ما زلت فاغرا فمي حيث أن مثل تلك المناظر لا نراها و نستمتع بها الا في العيدين فأين ذهب سكانها….

بسيطة… معناتا يا أهل الخير أن الكثيرين جدا و الذين يملئون شوارع الخرطوم نهارا و ليلا هم ناس أقاليم ساكت… و جروا لي عقابهم عندما تخوفوا من انفلاتات في الأمن ربما يصاحب العملية الانتخابية و خلوا الخرطوم للمؤتمر الوطني لكي يحميها… دا اسمو كلام فما معناتا أن أرتال المغادرين الذين ضاقت بهم البصات و الحافلات السفرية  يوم الخميس و الجمعة و السبت الذي سبق ايام الانتخابات لا يكنون الكثير لمدينة الخرطوم و لا يهمهم ان جاء خليل تاني بقواته و الا طربقوها على راسنا ناس (الحركة) و الا غيرهم….

عموما لا يسعني الا و أن انقل لكم بعضا من كلمات أغنية لا أدري لمن أرسلها لي (شمباتي) من منفاهو في (الحفرة) و تقول ….

أقول ليك بأمانة….. حركتك ما ظريفة …. حركتك جبانة

Advertisements
تعليقات
  1. ودالخلا كتب:

    سلام ياقبيلة
    دوك عزت وسماره الأكارم
    تعرف أمتع وأجمل الأيام هي هاتيك الليالي وربنا يجعل أيامنا كلها أنتخابات، علشان نشوف الناس الطفشت من الخرطوم ديل تاني حا يعملوا شنو؟؟؟
    تعرف بقيت أطلع من البيت ولحدت المكتب مع لفة جانبية زيادة خارج الأطار المشوار ما يكلفني 15 دقيقة في حين أنه في سابق الأيام لا يقل عن الساعة بأي حال من الأحوال مع الضغط النفسي والحاجات التانية، والعجب العُجاب العودة عند الرجوع للبيت عبر النيل الأزرق متعة القيادة
    وأن شاء الله دايما”

  2. ساتينتود كتب:

    د. عزت والحبان

    قلتي لي عمليتهم ما ظريفة وحركتهم جبانة!!

    على الأقل الانتخابات طلع عندها فايدة ليكم، تلقى موقف لعربيتك بكل سهولة والشوارع فااااااااااااضية

    هسي ابكرون لو كان في الخرطوم كان عرف انو الانتخابات عندها فايدة برضو يعني معقول يصرفوا عليها اكتر من300 مليون دولار سااااااااااااي كدة

  3. دكتور عزت
    قلت لي الجماعه فروا ؟!؟
    أها نحن كان راجين ديل يغيروا وضع . . .خلي الجماعه الطيبين شادين سرجهم ومدلدلين رجليهم سااااكت …
    أها الجبن دا كان ما كدي كيفن يكوون؟؟؟

  4. الليلة كنا بنتكلم فى نفس الموضوع
    مشيت لشارع الجمهورية والباركينق على قفا من يشيل – طبعا فى الايام العادية – بنبركنق فى تقاطع سانجيمس – ولا مرات بنقيف فى مجموعة النفيدى ونمشى بعد كده كدر لحد الحتة الماشين ليها.

    اللهم اجعل ايام الخرطوم كلها انتخابات

  5. ود الخلا كتب:

    أطالب وبأسرع مايمكن بأعادة تسجيل وأحصاء لسكان الخرطوم اليومين ديل علشان نعرف خدماتنا وصحتنا وتعليمنا ماشي لمنو؟؟؟؟
    ما ينط ليكم واحد هسي ويقول ليكم نحن الخرطوم البنيناها وعملناها ليكم مدينة، طيب شردتو منها وكت الحارة لي شنوووووووووو؟؟؟؟؟؟؟؟

  6. aflaiga كتب:

    عزت والحبان :
    مفروض نرفع شعار :
    الما وقف معانا فى حارتنا ما يضوق همبريبنا وهوانا واسكريمنا ..
    ونغير الغنية الى :
    ما بنقبل بناس فاتو خلونا فى الانتخابات شردو وفضوها لينا
    ومن هنا اناشد الاخوه فى نقاط التفتيش بعمل لجان تقييم تبين سبب الشرده وسبب الرجعه ويعرضو النتائج على الشعب الصمد فى الخرتوم ولو لقاها مقنعه يسمح بالدخول ولو لا – لا .. ممكن ننظر فى ظروف الجكس والحالات الخاصه ده لو احتجنا ليهم ..
    يعنى يا عزت نعمل لجنه فى الخدود بتاعة الولاية تقيم الدخول حسب الحوجه
    ونرفع شعار خرطمة الوظائف والمساكن والحقوق على وزن السودنه والسعوده
    وممكن نخلى الناس المرقت دى ساكنه فى الحدود ونعمل ليها بيوت مؤقته نظام حزام اخدر ونسميهم خرطوميى 47 على وزن عرب 47 ويدخلو يترزقو من الصباح للمساء ويغادرو بالليل
    بالله رايكم شنو نصوت للقصه دى ؟؟؟
    ولو فى اقتراحات تانية ممكن برضو

  7. حاج أحمد السلاوى كتب:

    أخونا ابو عصمت ..
    – أول حاجة مبروك الباركينق ..
    – تانى حاجة أنت اتاريكا عجوز للدرجة دى ؟ ( أنا كنت عارف لاكين مش للدرجة دى ..مووووش ؟ ).
    – تالتاً حاجة .. يا حليل خرتوم الستينات الإنت عارفا وشفتها دييييييك ..
    بس السؤال المحيرنى ..الناس دى ( الهاجروا وبارحو الخرتوم ..ومشو جوبا ) كانت خايفة من شنو..والنتيجة لسه ما اعلنوها رسمياً ( وهى طبعن معروفة سلفن )؟ غايتو فى عالم جبانات بشكل …أو كما قال عادل إمام !!!
    بالطبع سؤ التخطيط الذى لازم حكومتنا الرشيدة منذ إنقلابها على السلطة الشرعية آنذاك هو السبب الرئيس اللى أدى إلى تراكم هذه الأرتال البشرية الهائلة وخلاها نزحت من مواقعها الأصلية وجات تبحث عن لقمة العيش فى الخرتوم الطراوة …والمشكلة إنهم جوا الخرطوم ولا لقوا لقمة عيش ولا لقوا الطراوة زااااتها ..
    غايتو خلونا النشوف ىخرتا شنو ..يمكن الخرتوم ترجع طراوة تانى بعد الإنتخابات …..يمكن !!!

  8. عباس كتب:

    د . عزت
    ورواد المدونة
    ياخ الخوف من اعتقالات الامن بس ما تحصل جطة ولا مظاهرة جهاز الامن بيمسك من طرف
    علي اساس السحنات
    يبقي احسن اي زول يبعد عن الشر
    ما ظنيت في زول بلاوز ولا يخاف من المظاهرات ولا ادانة ولا شجب الحكومة في حد زاتها
    لكن الخوف من ردة فعل الحكومة وهي بتكون في الوقت داك مرتبكة وماواعية
    زي ما حصل في دخول خليل ابراهيم امدرمان
    الحكومة بقت تمسك من طرف

  9. عزت كتب:

    طراوة وين يا أحباب و انتو عارفين كمان نحن مقبلين على الصيف و درجة حرارتو المرتفعة و التي ستزيد من وقعها علينا المسيرات المتوقعة… غايتو بختهم ناس التلج و كسيره….

    طبعن كل الحكومات السابقة لم تجعل من الأقاليم مكانا جاذبا فالتعليم و الخدمات الأساسية من صحة و توظيف و غيره استاثرت الخرطوم بجزءا كبيرا منها … عشان كدا ستظل كرش الفيل في زيادة و حتدفق بهناك و موعودون بترييف المدينة…. دا كان ما بدأ دلوقت…

    من كان يصدق في سوق شارع 15 العمارات محل ما كانوا بيجو العرائس و ياخدوا زينتهم من كوافير (كليوباترا) و يجي العريس شايل صندوق البنسون الكبير و لابس فول سوت و ياخد عروستو للمصوراتي الجنبو (كاميرا آرتيست) و يتصوروا معاهم الشبائن و ناس الحلة كوووولهم و زغاريد و كدا…..ينقلب بي قدرة قادر الى محل لبيع القراصة و البلدي …. و على مقربة منه جلست واحدة بصينية ليقمات بالليل كمان و الناس الما عندهم شغلة يجو ياكلو و يشربوا الشاي و يتفرجوا في التلفزيون……

    لك الله يا بلدي الجميلة

  10. حاج أحمد السلاوى كتب:

    ابو عصمت ..
    الحمد لله البقا التليفزيون دا فُرجة بس ..
    بس ما قلت لينا التليفزيون ملون ولاً قديم .. اسود وابيض ؟
    بيجيبوا ليهو كهربا من وين ..؟

  11. ياسين شمباتى كتب:

    عزت المرطب..سلامات..
    الخرطوم من زمااان بقت لحم راس,والدلالة على كدة ايام الجمع والعطلات الرسمية والاعياد,,ينعدم فيها نفاخ النار..وفعلا ما عنده وجيع ويوم تقع الواقعة بتقع على فئة قليلة بسيطة مستضعفة..وناس مدنى عندهم مقولة مشهورة عن كوبرى حنتوب ,,يقولوا ليك (نميرى ما عمل فينا خير) ويرمزون الى امتلاء مدنى باهل البطانة والجزيرة من غير طبقة مدنى الراقية..آآه لو يقرطوا على موضوع الانتخابات دا ويعملوهو استفتاء يريحهم ويريحنا..

    اضافة : الحركة الجبانة خليها,,شفت حركة ساتنتود بتاعت الهوا والحاجات العجيبة ديك!!؟؟

  12. ياسين شمباتى كتب:

    بعدين يا جماعة الناس مرقوا من الخرطوم زهدا فى الانتخابات ولانهم فى شوق لى اهلهم..وزى ما قال عباس انو الامن غير مستتب وممكن يحصل انفلات,,يعنى القصة ما خوف..
    بعدين دا منو دا العمل خدمات تعليم وصحة فى الخرطوم!!!؟؟؟ وداير يعرفها ماشة وين كمان!!! وعجبى يا ناس..

  13. طارق أب أحمد كتب:

    ((من كان يصدق في سوق شارع 15 العمارات محل ما كانوا بيجو العرائس و ياخدوا زينتهم من كوافير (كليوباترا) و يجي العريس شايل صندوق البنسون الكبير و لابس فول سوت و ياخد عروستو للمصوراتي الجنبو (كاميرا آرتيست) و يتصوروا معاهم الشبائن و ناس الحلة كوووولهم و زغاريد و كدا))

    عزت
    يا سلااااااام إنت اليوم داك كنت معاى

  14. ابكرون كتب:

    يا حليلا الحتوووووم زمن الغار وسانجيمس وكوباكوبانا واتني والجي ام اتش (دي محلات شاورما يا شباب) وعابدين عوض وصحاري وبابا كوستا وزكي ,,,,,,تلقي باركينق في اي وقت وممكن تدخل بعربيتك ذاتا والناس حلوين وقلوبا بيضا وكل في حاله…..
    عزت /طارق :انتو ليه الصور الثابته لحدي اسه من مكملات العرس حاجه غريبه ! مش ممكن يتصوروا بكاميرا ديقتال او بالجوال حتي صور احلي وكتيره ومتحركة كمان…شي عجيب
    ——————————–
    استرايكر : الاقتباس عملته لينا فيهو شنو ؟؟؟
    الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟الاقتباس عملته لينا فيهو شنو ؟؟؟

  15. (((والجي ام اتش (دي محلات شاورما يا شباب))))
    أبكرون
    هها ههههههاي
    شاورما بالغاز وللا بالفحم يا عمك
    آآآآآآآي نحن صغار لاكين المقابر
    محلات الشاورما دي مووش زي محلات الشورما ديييك الهناكا ديييك R.A.H

  16. ود الخلا كتب:

    سلام ياقبيلة،،
    الناس مرقوا من الخرطوم زهدا” في الأنتخابات وخوفا” من الأنفلات الأمني ولأنو الأمن غير مستتب!!!!!!!!
    أعجب أن يتحدث الناس بلسان الأماني والتمنيات السوداء وأعجب أن يفرح الناس لحدوث الأنفلات الأمني والأنهيار، وأعجب لشماتة الشامتين وفرحهم لما سيحدث في أحلامهم وخيالاتهم ويتوعدون الناس بالشر المستطير وعظائم الأمور، وتسير الأمور عكس ما يشتهي السفن، ويندبون حظهم وصوبون سهامهم الطائشة لقضايا انصرافية، باءت كل المحاولات بالفشل ولم يتبقي الا حبر المفوضية كقضية تزوير تغير من نتيجة الأنتخابات التي حسمها الشعب الواعي بشبابه ونسائه وأنحسرت الطائفية وأنزوت في ركن قصي….
    ولأولئك المتعجبين ستُعجَبون، ووتَعجَبون (بضم التاء في الأولي وفتحها في الثانية)!!!!

  17. طارق أب أحمد كتب:

    بس منو البصدق أنو كان فى باركنج اندر جراوند تحت أتينيه تقاطع شارع الجمهوريه القصر

    صديفى الخلوى
    الناس مرقت من الخرطوم بالتأكيد و بأمارة ما بقيت تصل المكتب فى ربع ساعه بس كمان أكيد الناس ما خايفه لأنو ناسك ديل نمور من ورق ,,, لكن لأنو النتيجه معلنه من قبل واحد و عشرين سنه فالناس ريحت باله و قرروا ينجموا الكام يوم ديل مع أهلهم
    و مبروك عليك باقى الشى الحيفضل من البلد

  18. ود الخلا كتب:

    صديقي أب احمد
    الناس المرقت خايفين من الوهم المعشعش في عقولهم، وبأفتراضات واهمة وآماني مستحيلة لن تحدث بأذن الله، ونتمني ذلك أن شاء الله..
    وأؤكد لك ان البلد ستظل باقية بأكملها أن شاء الله ولن تنقص شبر واحد، ولا أريد تكرار الكلام عن الأنتخابات ومالم يحدث فيها، والآن الأنفصال وما لن يحدث فيه بعون الله وبهمة المخلصين من الوطنيين الحادبين علي مصلحة البلاد، أما أولئك الذين يقولون به فأقول لهم هو وهم في العقول ليس الا، كوهم الحديث عن ما يمكن حدوثه في الأنتخابت ولم يحدث ونتمني أن لا يحدث أن شاء الله بقية الأيام…
    وتفاءلوا خيرا” تجدوه..
    الناس دي مالا بقت جارية علي الكعب والشين؟؟؟؟

  19. ود الخلا كتب:

    أقرّطنا علي كدا يا سادة!!
    والسلام علي من أتبع الهدي

  20. ودالزبير كتب:

    ودالخلا

    يأخي مالك بتعرض بره الدايره

    الناس هنا إتبرمجت على موجه وأحده وهي إنو البلد ماشه لكارثه واي كلام فيهو ريحه أو مجرد تطمين للناس مافي زول بيسمع ليهو …. لازم تخش نكنب عن التزوير والفساد وإن الوضع هسه كارثه إنسانيه وإنسحاب عرمان هو بطوله وإنسحاب الصادق المهدي هو ضريه موجعه للنظام والناس ضاق بيها وبقت تأكل أوراق الشجر ولازم تكتب إن كارتر بقي مؤتمر وطنى أما غريشن فقد تم شرؤه بمبلغ وقدره ماذا وإلا فانت مستفيد ومطبل …… أصيح البعض لا يري إلا نصف الكوب الفارغ وأصبح البعض يتمنى أن تدمر البلد نكايه في الإنقتاذيين ….

    المهم كما يقول إسحاق أحمد فضل الله إن البعض أصبح يتمنى أن لا تكون هناك بلد فقط ليثبت إنه على حق….

    بالجنبه

    اي زول ينزل لينا شهاده البحث بتاعت بيتهم عشان نعرف المواطن من الما مواطن

  21. aflaiga كتب:

    ود الزبير :
    حدد مالك قديم ولا مؤجر قديم ؟؟؟

  22. استرايكر : الاقتباس عملته لينا فيهو شنو ؟؟؟

    مفترض انو يكون اتحلا خلاص – شوية زمن بس وح اقوم باعطائكم الطريقة المثلى للاقتباس

  23. ياسين شمباتى كتب:

    ابكرون..
    والله سان جيمس دا بعرفها كوييييس ما كانت محل شاورما !!

    ودالخلا..
    ما قلت الانتخابات باجلوها !!؟؟ والحبر شايفو عااااجبك..والله انطبق عليكم المثل بتاع (شكارتها….) حتى التزوير شايفنو سمح..
    اما بالنسبة للناس البتسال عن شهادات البحث والله دا كلام كويس,,عشان نعرف النازحين برضو..وعجبى مما يدور…

  24. طارق أب أحمد كتب:

    ود الخلا المهم إجازة بكره عملتوا لينا فيها شنو

  25. ودالخلا كتب:

    صديقي اب أحمد اجازة بكرة كان لحدي هسي ما جاتك بنديك نص اليوم يعني من الساعة 12 وكدة، علشان دولاب العمل ما يتأثر أكتر من كده!!!!

  26. الغبشة كتب:

    السلاااااااااااااااااااام علييييييييييييييييييييكم

    مشتاقيييييييييييييييييييييييييييييييييييييييييين

    وبنرجع ليكم تانى

    والى لقاااااااااااااااااااااءءءءءءء

  27. ياسين شمباتى كتب:

    الغبشة…سلام عليكم..
    حمدالله على السلامة وبركة بالطلة..وشختيى لينا بالواااااااضح كدة..
    فى انتظارك..

  28. حاج أحمد السلاوى كتب:

    والله يا شمباتى ومشاكل وابكرون ..
    طفشتو بناتنا الحرائر من المدونة بسبب مواضيعكم اللسياسية الناشفة دى ..
    أما آن لهذه افنتخابات ان تنتهى ..؟ كنا فاكرنها تخلص اليوم ويخلصونا ….ما اصلها هى تحصيل حاصل وكلنا عارفين المودوع دا …
    اليوم كمان طلع لينا مشاكل بموضوع الوحدة الجاذبة والإنفصال الطارد ..بس ما عرفنا هو مع منو فيهم ..والشايفو انا ( مع إنى معمّش وما بشوف كويس ..لاكين قدر البشوفو ) إنو مشكلة اخواننا الجنوبيين مش حتنفكا مننا أكان إنفصلوا أو قعدوا معانا متحدين ..ودا موضوع شرحه يطول ..وما فى واحد حيقدر يقنعنى إنو المشكلة حتنحلا لو إنفصلوا ..والموية تكضب الغطاس ..
    وبكرة حنشوف آخرتا شنو !!! …. اخيراً .

  29. ياسين شمباتى كتب:

    غايتو يا حاج شدة ما مستعجل ومتسربع لما جغمست الحروف كلها !! غايتو جنس غايتو!! ارمى كلها فوقى انا,,اصلا انا حيطتك القصيرة..هئ هئ هئ هئ..كدى النكمل شغلتى دى واجيك بالدرب بعد دا..

  30. طارق أب أحمد كتب:

    شمباتى
    أمنتك تقول لى السلاوى (( أول مره الليله شقنا آخرة بكره شنو))

    لسه فى جده غير
    بس عندكم فى زحمه

  31. ياسين شمباتى كتب:

    طارق..

    ههههههههه..يا بعيد المرامى قريب الملامح انت…يصل تب..وفى انتظارك على احر من الجمر..اما الزحمة فهى افظع وافظع.

    استرايكر..

    انت ياخوى انا ما قلت ليك مية مرة عندى معضلة فى الموقع دا !؟ ولا ناس يجيبوا ليهم الاقتباس ومديدة الحلبة وانحنا يحرشوا لينا الشجرة والكلبة!! عجايب..

  32. طارق أب أحمد كتب:

    ود الخلا

    أمس سألتك عن الإجازه و كنت أثق تمامن أن اليوم عطله بل عملنا ترتيباتنا فى العمل على تقسيم المهام حالة اعلنت العطله و أصدقك القول بأننا توقعنا أن تعلن العطنه ليلا حتى لا يسافر من بقى من الشعب الخرتومى الفضل

    ما سقته أعلاه هو فقط للبرهان على كيفية إدارة هؤلاء البشر للبلد و كأنهم رعاة لشياه معدومة الفهم بل و حتى قرارتهم البليده و العشوائيه لا تراعى ذرة تخطيط و أعتبار لما قد يحدث

    لو تابعت القنوات الفضائيه مساء أمس لرايت كل المراكز الأنتخابيه خاويه على عروشها فلم العطله و التعطل

  33. البشاوى كتب:

    اب احمد
    من لم يغمز اصبعه فى حبرنا دة الليشوف ليهو مكان آمن يدس فيهو صباعو المجرم دة والا قطعناهو ليهو من لغاليغو

  34. ودالزبير كتب:

    افليقا

    (اما بالنسبة للناس البتسال عن شهادات البحث والله دا كلام كويس,,عشان نعرف النازحين برضو..وعجبى مما يدور…)

    العبد لله المالك للعقار رقم 15 ( مربع ج \ 7 غرب الديوم ) الخرطوم والخالي من الموانع والمسجل بموجب شهاده البحث رقم ……. الصادره من تسجيلات أراضي الكلالكه.

    طبعاً ياأفيلقا شمباتي ما بيخاطبني مباشره بالإسم لسبب يعرفه وحده لكن ما مشكله قلنا الإنتخابات راح تنتهي والبشير وحزبه لأنهم الأفضل تنظيماً سوف يفوزون وقلنانخلي الشغله الفارغه دي ونمشي على الكوره والغناء والأخبار المنوعه وما جبنا سيره زول في مداخلتنا لودالخلا لكن البعض يعمل معنا بنظريه القطيع الذي يجب أن يكون فقط رجع صدى لأفكاره ومشاكله مع الإنقاذ … لوعشنا تاني أربع سنوات خلونا نواصل الجدل حول فوز الوطني بالإنتخابات القادمه والراح تكون المنافسه فيها بين البشير والفنان طه سليمان الأعلن ترشيحه في الإنتخابات القادمه .. الكويس الوقت داك راح نكون برانا بدون جنوب وياسر عرمان وباقان وبقيه أهل السودان الجديد راح نكون نحن بس ناس السودان القديم

  35. طارق أب أحمد كتب:

    أم أحمد بلى الفول
    على شرف الأحتفال بالعام التانى على المدونه يشرفى أن تكونوا ضيوف أم أحمد مساء غد الجمعه بمعية ضيف الشرف فول السليم بقيادة الموسيقار الإوركسترالى أم أحمد

    أرجو أن تتزين دارى المتواضعه شمبات الأراضى أمام ويتا بحضوركم الأنيق \
    كلكم من الشدره لحدوت الماسوره
    مواضيع للمناقشه
    المنظمه و المدونه
    ما فى مشكله ما أصلها زى الملح و الشطه ممكن شوية أنتخابات

  36. ودالزبير كتب:

    اب أحمد

    يأخي إنشاء الله عامرين ولاميين وتاميين

    ياريت كنا نقدر نكون معاكم لكن بكره والله عندنا رحله عائليه لجبل أولياء ( ماوريتونا الدرب وكده ) والزول بيجي راجع سلطه عشان كده أعفو لينا وربنا يتيم المعروف

  37. ياسين شمباتى كتب:

    ود الزبير..
    السبب وااااضح,,اولا انت ما ذكرت اسماء وانا كذلك ما حبيبت اجيب اسماء..لكن لو فى سبب تانى قولو!!!

  38. طارق أب أحمد كتب:

    أولاد الزبير و الخلا و مشاكل مافى ليكم أى طريقة زوغه كمان عششان نثبت إننا ناس راقيين و أختلاف التعليق لا يفسد للكى بورد قضيه

  39. عزت كتب:

    تسلموا الايادي يا أب و أم أحمد و انشاء الله عامرين فعلا طولنا ما اتلاقينا خاستا ناس سهيل الدورة دي نسوا غدا المنظمة الشهري…..
    حاضرين باذن الله…

    انت كويس يا أب أحمد انت كنت عارف الاجازة هل تصدق أنا لبست كالمعتاد و أنا في الطريق شايف حاجة غريبة …الناس مافي قلت يا زول يكون مسلسل الهروب الكبير لسة شغال و لدحدت ما وقفت قدام البوابة بتاعت المكتب… و طبعن لقيتا قافلة….

    ما عاف ليكم يا ناس الدولة..!!

  40. ودالخلا كتب:

    أخي الصديق أب أحمد،
    في حاجات كتيرة ما راضين عنها وأخطاء كثيرة تحتاج للمراجعات، وأهو دي فرصة طيبة لو فاز المؤتمر بالأنتخابات ستكون هنالك فرصة مواتية للتصحيح وأعادة الأمور لنصابها، لأنه بيني وبينك كده كانت للمجاملات والترضيات والموازنات القدح المُعلا في أدارة شئون الدولة بتلك الطريقة فيما مضي، وأوعدك وعد من لا يملك لمن يستحق أكثر مما هو متاح مثلك كده يا صديقي، بأن يكون هنالك تغيير حقيقي وطفرة غير مسبوقة تنقل البلاد الي مرافئ العزة والرفاهية، وحا تشوف بأم عينك ما سيكون بدءً من تشكيل الحكومة الجديدة والتي ستكون مفاجأة للجميع لما تحتويه من وجوه وخبرات جديدة ومتنوعة وستشمل كافة ألوان الطيف والسياسة والقبيلة السودانية وستنبسط غاية الأنبساط،،،
    أما انت يا ود الزبير ومن هم معك من أمثال ابو المنذر ومشاكل ومحنك وود الخلا ده العامل ليكم فيها أبو العريف ده، فليكم يوم براهو ، يا أخي أنتو وقتين ماعايزين تبقوا أبواق دعاية لما يردده اليسار وما ديرين تقروا بسوء حكومتكم الفاشلة دي ماتسكتوا ساكت وتنطموا خلو الناس تبرطع وتنفخ في الفارغة والمقدودة والأسطوانات الممجوجة دي…
    ود الزبير يا صديقي لو أنت ما مع الناس التانين فعلي الأقل خليك بعيد من الأنقاذ لأنها ضد اليسار والعلمانية والشيوعية المندرسة!!!!

  41. عباس كتب:

    ياهو علوق الشد زاتو
    21 سنه الانقاذ ماعملة حاجة تخش بيها بيوت السودانين
    اي بيت سوادني يكره الانقاذ بسبب انه قبضو واحد من افراد الاسره في كشة من كشاة الحدمة الالزامية
    او واحد من افراد الاسرة موظف وراتبة يتاخر ويتراكم شهورا عددا
    او واحد من افراد الاسره معارض والكيزان ورهو النجوم عز الضهر
    او واحد من افراد الاسره سايق رقشة ولا حافلة مواصلاة وناس الحركة يدفعوه حق ايصالات ليست بوجه حق
    او واحد من افراد الاسره فاتح دكان يجوه ناس الضرايب وناس الوساخه وناس المحلية وناس العوايد
    او الاسره قاعده في بيتها كافيه خيرها شرها يجيها واحد يقول ليهم حق العتب وعندكم كم قرفه وعندكم كم لمبة وكم مروحه
    21 سنه ماعملو حاجه تخلينا نقول للبشير ياحليلك
    دايرين يعملو شنو في اربع سنين حاتكون عجاف عليهم بسبب اوكامبو وتقرير مصير جنوب السودان
    وزي مابقولو زمان الحرب ارهقتنا وماعملنا تنمية بسبب الحرب حايعملو اوكامبو شماعتم
    بالمناسبة اوكامبو ده لسه ماعملو ليه دمغة ؟ اسوة بدمغة الشهيد والجريح ؟

  42. ياسين شمباتى كتب:

    عباس..
    هو علوق الشدة دا ما دام فى ناس بتاكلوا ما يجيبوهو تانى ليييه!!؟؟ ما عن دمغة اوكامبو فاكيييد تحت الدراسة..ياخ قالوا ليك الاسعار زادت بصورة واضحة,,عايزين يرجعوا خسارة القروش الصرفوها فى الانتخابات دى..حسبى الله عليهم..

  43. طارق أب أحمد كتب:

    عباس
    ما فى بيت ما فيهو شهيد سواء فى الحرب الجهاديه او قتل فى معسكرات الخدمه أو قتل لأنه قال كلمة حق أو أو

  44. البشاوى كتب:

    يعيش فول السليم

  45. حاج أحمد السلاوى كتب:

    نلاقيكم بكرة إن شاء الله أثناء وبعد تناول فول السليم..
    – طارق .. حقنا ونصينا من فول السليم يوصل كاملاً لحد باب البيت بالصافية.
    ويا حليل خلف الله .. الما أكل معاكم فول السليم..
    وعشت يا فول السليم خارج وداخل القدرة ( بكسر القاف وتسكين الدال ) .
    وبالهناء والشفاء ..وما تنسونامن صالح الأفوال!!

  46. monamie كتب:

    االسلام عليكم الانتخابات انتهت بكل تزويراتها واخطاءها والنتيجه بدات في الظهور لكن بسمع الان في جميع قنوات تلفزيون جمهورية المؤتمراللاوطني بان الالتهابات تمت بصوره (نزىهه وشفافه وحررررره)فهل يعقل هذا الكلام وماذا كانت كل الوقائع التي حدثت في كثير من مراكز الاقتلاع عفوا الاقتراع ؟ هل ما حدث كان هزار ام وهم! يا سبحان الله !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s