الحكم حكمى ساحصده وحدى …

Posted: السبت,17 أبريل, 2010 by aflaiga in اخرى

بعد انقضاء كل مراحل العملية الانتخابية وفى انتظار النتيجه كان لا بد لنا كمنبر مستنير هدفه الاسهام فى تحقيق الرخاء والتنمية الثقافية لشعبنا  ان يكون لنا وقفه فى هذا الشان لتبصير المواطن بما تبقى له من حقوق وما يجب ان يحافظ عليه من مكتسبات ودعونا نلخص الامر فى هذه الجرعه التوعوية البسيطه :

اولا : امن العملية الديمقراطية :

ولان الامن اساس الحياه كان لا بد ان ننبه شعبنا الى الانتباه الى كل من يحاول ان يسرق من بين ايديه هذ العملية التى شئنا ام ابينا افرزت واقعا رضينا او ابينا سيكون هو مشكل الحياه فى الفتره القادمه وعليه يا جماهير شعبنا الواعى يجب ان نعى الى كل عمل من شانه ان يستهدف امننا وسلامنا الاجتماعى لان المستفيد الاول والاخير من استتباب الامن هو نحن والمتضرر الاول والاخير من انفراط الامن هو نحن كشعب ولا يكون ذلك الا عبر رصد كل ظاهره سالبه او غريبه والابلاغ عنها للجهات المختصه والعمل بايدينا كى لا تتحول لمهدد يعوق تحولنا السلمى وايضا بعدم الاستجابه للاستفزازات ومنع اى طرف من  ان يستغل النتائج لضرب امننا وسلامنا الداخلى .

ثانيا : ترسيخ حقنا فى مراقبة مردود اختيارنا السياسى :

ولا ن القصد الاساسى من الانتخابات كان ان يختار الشعب من يمثله ليطبق البرامج التى توافقت مع الشعب فقام بالتصويت كان لا بد لنا كشعب  ان نضطلع بدورنا الرقابى فى العملية السياسية لرقابة مسار حقوقنا التى بيد النواب او الولاه او رئيس الجمهورية وذلك عبر عدم السماخ باى حال ان تكون العملية الانتخابية السابقه مجرد ديكور ولقطع الطريق امام طرفى المعادلة الفائز والخاسر كى لا يتلاعب باحلامنا التى لاجلها صوتنا وذلك عبر متابعة الحقوق ورصد الانحرافات عن الحريات والزام النواب ببرامجهم التى فازو عبرها وتوظيف المعارضه للرقابة على الحكومه واخذ الخقوق عبر كل مستويات الحكم التنفيذى والتشريعى .

ثالثا : اشاعة السلام الاجتماعى لتجاوز مرحلة تقرير المصير :

ونحن مقبلون على مرحلة هامه قد تجعل السودان اما بلدا موحدا امنا او بلدين جارين يجب علينا ان نفوت الفرصه على كل من يسعى الى ان يؤثر على نتيجة الاستفتاء وفقا لمصالحه الضيقه الدنيئه وذلك عبر اسقاط مصالحنا الحزبية عند الاقتراع واعلاء القيم الوطنيه على قيم الحزب والانتماءات الضيقه .

فى الختام اللهم امن بلادنا وارواحنا وابناءنا وممتلكاتنا واحفظ بلدنا الحبيب ..

ولتكن سوداننا منبرا للتنوير لتحقيق رفاهية شعبنا

Advertisements
تعليقات
  1. monamie كتب:

    والله نتيجة الانتخابات دى لصالح المؤتمر اللاوطني عن طريق الغش والتزوير تشبه لي في طريقة خداع المتسول الذى يدعي انه كسيح وبعد ان يلم الاموال السذج ويخدعهم بعاهته يقوم زى الحصان ويجرى

  2. عباس كتب:

    اللهم امن بلادنا وارواحنا وابناءنا وممتلكاتنا واحفظ بلدنا الحبيب ..

    ولتكن سوداننا منبرا للتنوير لتحقيق رفاهية شعبنا

  3. عباس كتب:

    تفاءل خير تجده
    لكن لكل قاعده شواز
    بنتمني ان يكون السودان امن ورايق وهادي وفي جالة تقدم
    لكن طالما الكيزان هم الفايزين بدورة رئاسية قادمة ولمدة اربعة سنوات
    ماظنيت الامن يحصل ولا الهدوء ولا التقدم
    لانهم ينتهجون منهج اقصاء الاخر
    وقالوها بصريح العبارة
    زول داير حقو يشيل سلاحو
    كيف للانسان ان ياخذ حقة بالحوار الهادف البناء مع الكيزان ؟
    كيف السودان يكون امن وهادي وكل يوم اعداء الكيزان في زيادة
    كيف السودان يتقدم ويكون في طليعة الدول الحضارية والحكومة تفتقر للشفافية
    كيف نكون مواكبين والكيزان شغالين بفهم التمكين والتمكن في دور و مؤمسسات الدولة
    وتوظيف والاعتماد علي من هم موالين لهم دون الاهتمام بمقدراتهم احقا جديرون ؟ دون التفكير في حجم الضرر
    ولسه شغالين بنفس الاسلوب
    =========
    وبرضو بنقول معاك

    اللهم امن بلادنا وارواحنا وابناءنا وممتلكاتنا واحفظ بلدنا الحبيب ..

    ولتكن سوداننا منبرا للتنوير لتحقيق رفاهية شعبنا

  4. ابكرون كتب:

    افليقا:
    هناك نظرية امنية تسمي (الامن المكتسب بالتصعيد) بالقوة يعني وانت ادري (لانحاور الا من حمل السلاح ضدنا) وكان هذا ديدن ما يسمي بالإنقاذ طوال عقدين ونيف الجنوب حمل السلاح وتبعه الغرب وحمل السلاح وتبعهما الشرق كذلك ولسه ……… اذن هؤلاء لا يؤمنوا الا بالمقاوم بالسلاح فكانت الثروة والسلطة للجنوب وللغرب والشرق غصباعن الانقاذ بالرصاص …..ونتيجة لهذه السياسة الرعناء الجنوب علي (وش) انفصال وسيتبعه الغرب والشرق لو استمر هذا النظام بتركيبته العقلية التي تدير الامور بتصرفات اتحاد طلاب جامعة الخرطومو…..امنيين لا علاقة لهم بالتخطيط الاستراتيجي العسكري …. لم نسمع في تاريخ العسكرية القديم والحديث من يستدرج العدو الي (حرب المدن )المأهولة بالسكان واي مدن …! عاصمة البلاد ….! فعن اي امن هم مأمونين.. يا صديقي….؟عليهم اولا حل 50 مليشيا عسكرية بالعاصمة والاقاليم ونزع سلاحها وتجريد الحركات من السلاح ثم ابعاد هذه الوجوه التي لا تعرف سوي الكيد ولا تحب الا الجاه والسلطة والدولار ……
    فلا تتفاءل خيرا في من كان يسود عقدين ولم يتغير ولن تتغير هذه العقول فهم لم ينافسوا في الإنتخابات المضروبة الا انفسهم فلا وزن سياسي لجلاب وكامل وفاطمة وعبد العزيز و نيال وشنو ما عارف ….طالع يا صديقي راي المشير في فترة حكمه القادم وتجده في بوست الانتخابات وفي كل الصحف
    ولي عودة للمودوووووع الذي كنت اتمني ان تؤجله بضع ايام

  5. مشاكل كتب:

    سلامز

    تحية طيبة للجميع
    أفليقا … بارك الله فيك

    فالانتخابات الحالية هي مكسب لجميع طوائف الشعب السوداني .. سواء معارضة أو حكومة .. و يجب على الجميع أن ينظروا الى المستقبل البعيد بدلا عن النظر تحت أقدامهم … و على الأحزاب التقليدية أن يخرجوا من جلباب الفهم الضيق و النظرة السطحية و الخلافات الشخصية غلى آفاق أرحب و نظرة شاملة متكاملة للمستقبل

    فالانتخابات الحالية أعطت المواطن حق ترشيح الوالي .. و هو واحد من أكبر المكاسب في العملية .. و لا يمكن للرئيس أن يعزل الوالي الا بموافقة اغلبية المجلس التشريعي الولائي
    فهنا تظهر أهمية المجالس التشريعية الولائية
    و أرى أن الاحزاب التي قاطعت العملية الانتخابية كاملة ما هي الا احزاب عديمة الفكر و النظرة المستقبيلة .. بحيث كان بالامكان ان تتحالف احزاب المعارضة و ترشح شخصية واحدة متفق عليها في كل ولائية و أن يضايقوا حزب المؤتمر الوطني في المجالس التشريعية الولائية .. و لكن هيهات هيهات
    فالاحزاب التي لم تحسم امر ترشيحها لمنصب الرئيس لهي أحزاب غير محترمة لنفسها و لجماهيرها .. في واحدة من اكبر فضائح التخبط و العشوائية في تاريخ السودان .. فقد أخرجت هذه الاحزاب نفسها من اللعبة السياسية لأربع او خمس سنوات أخرى

    و لكن
    هنا يظهر الدهاء السياسي للشيخ حسن ( الترابي ) الذي وقف أمام كل احزاب المعارضة و قال لا لمقاطعة الانتخابات … لك التحية يا شيخ

  6. حاج أحمد السلاوى كتب:

    الإخوة الأعداء ..صفوة الأخيار الكرام ..سلام ..
    وزى ما قال ليكم ولدنا الدينمو أفليقا اعلاه عن مودوع الإنتخابات والذى لا زلنا نأمل أن تمر بقية أيامه المتبقية على خير وسلام ..خلونا نقعد فى واطات الله الماهلة دى قدر مهلة بلدنا السودان ونجرد حسابات الربح والخسارة بعيداً عن التعصبات ..ولو كل حزب أو هيئة ما عملت كدا تبقا الترابة كالت خشمها .
    المؤتمر اللاوطنى كما يسميه البعض من أصدقائنا المتداخلين معنا قد فاز ونال نصيب السد فى معركة الإنتخابات ( المضروبة ..كما يقول البعض )..وسيقوم بتشكيل حكومته القادمة والتى أعتقد أنها ستكون أسوا من سابقاتها وربما تكون أكثر بطشاً وعنفاً مع من صوتوا لهم ومن لم يصوتوا لهم ويرتكزون فى ذلك فى مقولة ستكون دائمة زى مقولة :يا خلف الله .. ياخ ..ما عذبتنا … وهى أننا الان نحكم بتفويض من الشعب و جئنا للسلطة عن طريق صناديق الإقتراع ( ونسوا ما قدمت ايديهم طوال عقدين من الزمان )..فأين المعارضة البرلمانية الفاعلة التى تستطيع أن تقف فى وجه هذا المد السلطوى المرتقب ..هل هى هذه الأحزاب الهشة البناء التى عايشناها قبل وأثناء مرحلة الإنتخابات والتى كانت تود الوصول إلى السلطة وهى لم تستطع إتخاذ قرار المشاركة أو المقاطعة إلا بعد تردد أفقدها كل شىء إلا من رحم ربك ..إن كانت تود المقاطعة لم وافقت على الإشتراك من البداية فى مهزلة الإنتخابات ؟ وقامت بتسجيل منسوبيها ورعاياها وصرفت ما صرفت من اموال فى دعايتها الإنتخابية . الم يكن من الأفضل لها واكرم لو رفضتها منذ البداية ؟..بصراحة شديدة فقدنا كل امل فى أحزابنا التلقيدية واحملها المسئولية الكاملة فى تمهيد الطريق للمؤتمر فى الوصول للسلطة .. هذه الأحزاب التقليدية التى كنا نامل ان تتحد مع بعضها البعض للوقوف ضد المؤتمر الوطنى وبناء معارضة قوية فاعلة ( لا معارضة من أجل المعرضة فقط فى كل شىء ) أملاً فى التغيير المنشود ..ولكن هيهات ..خاب املنا وضاعت الفرصة نسبة لحساباتهم الخاطئة وعليهم الإنتظار لأربع سنوات عجاف لمحاولة الوصول للسلطة هذا إن لم ينقض عليها نفر من العسكر وتلو علينا البيان الأول مرة اخرى ( نامل ألا نعيش كابوس هذا السيناريو )..ومع الأسف الشديد وأقولها بملء الفم أن هذه الحزاب لم تتعلم الدرس ولم تطور نفسها إلا القليل اليسير الذى لا يتماشى مع متطلبات العصر الحديث لمواكبة إنسان السودان الذى تغير كثيراً واستطيع ان اقول صار لديه من الوعى ما يكفيه لتمييز الغث من السمين ..هذا الإنسان التى بدأ يتمرد على الطائفية والجهوية وبدا يخرج من ثوب سيدى والإمام والراعى …وما إنقسام هذه الأحزاب وتشرزمها إلا دليل قاطع على ذلك ( حزب الأمة خطط لنزول الإنتخابات بعدد 6 مرشحين ..عودوا لقائمة الرموز للتحقق من ذلك .. وقس على ذلك بقية الأحزاب) فكيف لها أن تنافس وتفوز فى مثل هذه اإنتخابات ..الم تذهب السيدة إبنة الإمام الصادقالتى تحتل موقعاً مرموقاً داخل الحزب العائلى إلى دوائرهم فى غرب السودان واسمعوها ما اسمعوها من حديث ..قالوا لها جئتم الان تحدثونا بمثل ما وعدتونا وحدثتونا به قبل عشرون سنة ..
    أحبتى الكرام ..بالرغم من إيمانى وحبى العميق للحرية والديمقراطية وبغضى الشديد للأنظمة الشمولية ( اياً كانت وجهتها ) إلا أنى ارى أن الجو الديمقراطى المعافى من كل عيب لابد له من قاعدة شعبية مستنيرة تعرف واجباتها وتعرف حقوقها التى كفلها لها الدستور .. ولكن فى ظل الأمية ( نسبة الأمية تصل إلى 80% ) الجاثمة على بلادنا الحبيبة تظل الديمقراطية عرجاء ولن تستقيم وتنمو وتزدهر ونستفيد منها فى تنمية إن لم نعمل للقضاء على هذه الأمية .. ومن مضحكات ومبكيات الأمور فى آن واحد هو اننا لم نسمع ( يطرشنا ويعمينا ) أن احداً من المرشحين كان مودوع القضاء على الأمية من أولويات برنامجه الإنتخابى ..أصبح الان فى زمننا الحاضر من لا يحسن التعامل مع جهاز الحاسوب أمياً ..فكيف بمن لا يعرف القراءة ولا الكتابة ؟ أفتونا فى هذا الأمر اثابكم الله .
    أخوتى الكرام .. الحديث ذو شجون.. لكننى اشعر أنى قد اثقلت عليكم..وإن كنت أود الإسترسال ..فقط دعمونى أترك المايكرفون لآخرين وقد اعود إليكم مرة اخرى ..أرجو المعذرة

  7. ابكرون كتب:

    اها وعبقرينو الترابي ده لقي شنو ولا فاز بي شنو ؟؟؟؟؟؟

  8. ودالزبير كتب:

    الإخوة الأعداء ..صفوة الأخيار الكرام ..سلام ..
    وزى ما قال ليكم ولدنا الدينمو أفليقا اعلاه عن مودوع الإنتخابات والذى لا زلنا نأمل أن تمر بقية أيامه المتبقية على خير وسلام ..خلونا نقعد فى واطات الله الماهلة دى قدر مهلة بلدنا السودان ونجرد حسابات الربح والخسارة بعيداً عن التعصبات ..ولو كل حزب أو هيئة ما عملت كدا تبقا الترابة كالت خشمها .
    المؤتمر اللاوطنى كما يسميه البعض من أصدقائنا المتداخلين معنا قد فاز ونال نصيب السد فى معركة الإنتخابات ( المضروبة ..كما يقول البعض )..وسيقوم بتشكيل حكومته القادمة .فأين المعارضة البرلمانية الفاعلة التى تستطيع أن تقف فى وجه هذا المد السلطوى المرتقب ..هل هى هذه الأحزاب الهشة البناء التى عايشناها قبل وأثناء مرحلة الإنتخابات والتى كانت تود الوصول إلى السلطة وهى لم تستطع إتخاذ قرار المشاركة أو المقاطعة إلا بعد تردد أفقدها كل شىء إلا من رحم ربك ..إن كانت تود المقاطعة لم وافقت على الإشتراك من البداية فى مهزلة الإنتخابات ؟ وقامت بتسجيل منسوبيها ورعاياها وصرفت ما صرفت من اموال فى دعايتها الإنتخابية . الم يكن من الأفضل لها واكرم لو رفضتها منذ البداية ؟..بصراحة شديدة فقدنا كل امل فى أحزابنا التلقيدية واحملها المسئولية الكاملة فى تمهيد الطريق للمؤتمر فى الوصول للسلطة .. هذه الأحزاب التقليدية التى كنا نامل ان تتحد مع بعضها البعض للوقوف ضد المؤتمر الوطنى وبناء معارضة قوية فاعلة ( لا معارضة من أجل المعرضة فقط فى كل شىء ) أملاً فى التغيير المنشود ..ولكن هيهات ..خاب املنا وضاعت الفرصة نسبة لحساباتهم الخاطئة وعليهم الإنتظار لأربع سنوات عجاف لمحاولة الوصول للسلطة هذا إن لم ينقض عليها نفر من العسكر وتلو علينا البيان الأول مرة اخرى ( نامل ألا نعيش كابوس هذا السيناريو )..ومع الأسف الشديد وأقولها بملء الفم أن هذه الحزاب لم تتعلم الدرس ولم تطور نفسها إلا القليل اليسير الذى لا يتماشى مع متطلبات العصر الحديث لمواكبة إنسان السودان الذى تغير كثيراً واستطيع ان اقول صار لديه من الوعى ما يكفيه لتمييز الغث من السمين ..هذا الإنسان التى بدأ يتمرد على الطائفية والجهوية وبدا يخرج من ثوب سيدى والإمام والراعى …وما إنقسام هذه الأحزاب وتشرزمها إلا دليل قاطع على ذلك ( حزب الأمة خطط لنزول الإنتخابات بعدد 6 مرشحين ..عودوا لقائمة الرموز للتحقق من ذلك .. وقس على ذلك بقية الأحزاب) فكيف لها أن تنافس وتفوز فى مثل هذه اإنتخابات ..الم تذهب السيدة إبنة الإمام الصادقالتى تحتل موقعاً مرموقاً داخل الحزب العائلى إلى دوائرهم فى غرب السودان واسمعوها ما اسمعوها من حديث ..قالوا لها جئتم الان تحدثونا بمثل ما وعدتونا وحدثتونا به قبل عشرون سنة ..
    أحبتى الكرام ..بالرغم من إيمانى وحبى العميق للحرية والديمقراطية وبغضى الشديد للأنظمة الشمولية ( اياً كانت وجهتها ) إلا أنى ارى أن الجو الديمقراطى المعافى من كل عيب لابد له من قاعدة شعبية مستنيرة تعرف واجباتها وتعرف حقوقها التى كفلها لها الدستور .. ولكن فى ظل الأمية ( نسبة الأمية تصل إلى 80% ) الجاثمة على بلادنا الحبيبة تظل الديمقراطية عرجاء ولن تستقيم وتنمو وتزدهر ونستفيد منها فى تنمية إن لم نعمل للقضاء على هذه الأمية .. ومن مضحكات ومبكيات الأمور فى آن واحد هو اننا لم نسمع ( يطرشنا ويعمينا ) أن احداً من المرشحين كان مودوع القضاء على الأمية من أولويات برنامجه الإنتخابى ..أصبح الان فى زمننا الحاضر من لا يحسن التعامل مع جهاز الحاسوب أمياً ..فكيف بمن لا يعرف القراءة ولا الكتابة ؟ أفتونا فى هذا الأمر اثابكم الله .
    ألسلاوي ما……………………. ريحتنا

  9. aflaiga كتب:

    يا جماعه ركزو معانا نحنا بنتكلم عننا كشعب وواجبنا تجاه الزمن الجاى :
    وبصراحه ما اختلف طرفا المعارضه الا وكانت المصالح الحزبية هى سبب الاتفاق وما اختلفا الا وكانت المصالح ايضا هى السبب فهل نقبل بان نكون نحن كشعب وقود اختلافهم او اتفاقهم اولم يحن الوقت لان يكون شعبنا هو المستفيد من الاتفاق او امن الاختلاف ؟؟
    ابكرون : كل ما ذكرته عن الامن التصعيدى صحيح ولكنى اتحدث عن مرحلة امن قومى لا يباع ولا يشترى وانت خير العارفين بان الامن القومى هو ما يحفظ مكتسبات الشعب ومصالحه بعيدا عن تنافس اطراف الحكم ولن يكون هناك امن قومى بشكله المثالى او الادنى الا اذا ما تصدى الشعب لتوضيح حدود امنه القومى ولم يسمح للطرفين بالتلاعب بمفاهيم امنه وسلامه ورفاهيته ولا ما كده ؟؟؟
    نحن نتحدث يا جماعه عن دورنا كشعب مستنير فى تفويت الفرصه على من يسعى لصوملتنا او عرقنتنا ايا كان هذا الطرف .
    يعنى بصورة استراتيجية واعية يجب علينا كشعب ان نقرا كالاتى :
    * الانقاذ بكل سوءاتها وخيراتها ارست لنا بنية تحتيه لا باس بها .
    * الانقاذ بكل ما ذكرنا اوصلتنا الى حالة من الوعى بحقوقنا وان كانت سالبه نسبة لارتكازها على معرفة الحقوق عبر تضييعها !!! الا انها مرحلة استراتيجيا جيده .
    اذن بعد كده نحنا عاوزين شنو ؟؟
    حريات – رفاهية – كرامه – حقوق
    ولو قرينا صاح الجو الان من افضل الاجواء لنيل هذه المكاسب ..

    يعنى بالعربى كده :
    ليه ما نكون نحنا البنوظف النظام والمعارضه لمصلحتنا بدلا عن توظيفهم هم لنا ؟؟؟
    خليكم شعب مفتح واستغلالى وعملى وشايقى مش زمان قلت ليكم خلونا نبقى شعب شايقى شوية انتو ما شايفين سمسمه موظفه افليقا كيف ؟؟؟؟ ده الامن القومى السمسمى العاوزينو يبقى فى بلدنا نحنا نوظف الحكومه والمعارضه مش العكس ..

    وجاييكم وخلونا نركز فى الافكار الممكن عبرها نعمل الحاجه دى …

  10. aflaiga كتب:

    مشاكل : ما عصرت شوية على شيخ حسن ؟؟ مواقفك تحيرنى حقيقة ..
    ابكرون : ومن قال لك ان نفس الوجوه ونفس الاشخاص سيحكمون ؟؟؟
    عزيزى لو قريت قراية متقدمة شوية ستجد ان الانقاذ قد ناءت بحمل المفسدين وانصاف الساسة والمتسلقين ولا يوجد وسيلة للتخلص منهم الا عبر الديمقراطية التى ستسقط البعض منهم ولا يكون له مكان عبر الشعب وستبعد البعض الاخر عبر التنافس الديمقراطى وستبعد البعض الاخير الذى لا يتعايش الا فى الظلام عبر وجود برلمان يحاسب ويكشف ويعلو صوته .
    خليك مفتح يا ابكرون ليس امام الانقاذ الا تغيير الحال القديم دون خسائر فى الحزب . لان عدم التغيير سيغير الانقاذ نفسها ويطيح بها ..
    ودونك التجربة المصرية حيث لجا اخوان مصر الى بناء الحزب من جديد والابتعاد عن العمل التنفيذى مؤقتا وهذا ما ستقوم به الانقاذ حسب قراءتى ..

  11. ابكرون كتب:

    معليش يا افليقا اختلف معاك في حكاية الشعب دي لم تحترم الانقاذ هذا لشعب ولم تحترم مصالحه في انتخابات نزيهة كانت ستكون المخرج من بلاوي الانقاذ الكثيرة …. لم تحترم رغبة الشعب في انتخابات نزيهة لا تديرها الانقاذ كحزب (له وعليه كما للآخرين) انماتديرها حكومة قومية رفضتها ….لماذا نضع الشعب امام الامر الواقع وهو كما تقول انت القنوع بالانقاذ بسوآتها… ليه؟؟؟؟ شعبنا ضحي بعقدين من الزمان ويُطَالب برضو بقبول الواقع رالانقاذي الذي ينتج عن الانتخابات التي باي حال لاتعبر الا عن طموحات من زوروها ورسموا لها لتأتي بهم….
    الانقاذ وهي اسم علي غير مسمي لا تعترف بمعارضة ولا بشعب….كل من يصدق بان فوزهم هذا اتي عن رغبة شعبية فهو واهم وعليه النظر للامور بمنظار الحق والحقيقه والا نكون بنتناقش في امور بيزنطية ساااااكت
    اؤكد لك ان الجو الحالي اسوأ جو لعدم وجود معارضه من داخل البرلمان يعني حكم شمولي كما بدأ فليستمر الي ما شاء الله دون التمشدق بالديمقراطية فهي بريئة منهم وهم لن يصلوا لها لانهم اساسا لا يرغبونها … .والشعب امامه طرقه التي يخبرها لتغيير كل مستبد ظالم…..

  12. ابكرون كتب:

    افليقا ياخ اذا نفس الوجوه الانقاذيه او صف اخر فهم هم راضعين من ثدي السلطة والثروه ولا قبول بهم الا عبر بوابه نظيفه اسمها النزاهة والشفافية اولا

  13. ابكرون كتب:

    اها المراقبين الاوربيين الذين كنتم تطبلوا لهم امس القريب فالوا في مؤتمرهم الصحفي قبل قليل ان الانتخابات كانت بعيدة عن المعايير الدولية ….
    يلا بالله هاجموها وقولوا فيها مالم يقوله مالك في الخمر

  14. aflaiga كتب:

    ابركون : صعبتها يعنى عاوز الانقاذ تجى تصحيك من النوم تقول ليك هاك البلد نحنا اسفين على العشرين سنه ولو شفتنا تانى حايمين بى جاى ادينا طلقه !!!؟؟؟؟
    خليك منطقى شوية وخت نفسك محلهم اكيد ستبحث عن صيغه تفك الاحتقان وتؤسس لحد ادنى من التوافق .
    شوف الغرب وامريكا فهموها ولعبوها صاح كيف ( لا مجال للتعامل مع الانقاذ الا عبر حلين فقط ) :
    * اما تدجينها وتطويعها وهى حاكمه
    * او تفكيكها سلميا عبر عملية ديمقراطية متسلسله ولو طال السفر .
    بعدين يا ابكرون انت مستعجل ؟؟؟
    هم ما مستعجلين ..

    ده كلو كوم ويد الله كوم تانى اولا تتفق معى ان الله واهب الملك لمن يشاء لسه لم يقل كلمته .
    صديقى ص سالته عن الحاصل فى الانتخابات قال لى ببساطه :
    تعرف البيحسم القصه دى صوت منو ؟؟
    صوت الله .. يلا نستنى صوت الله ونشوف حيهب الملك لمنو فنحن لسنا الا اسباب لتداول الحكم ..
    وتحياتى ايها الشفيف المشفق المصادم .. وتاكد ان كلنا يعشق هذا الوطن حرا كريما ابيا بس كل زول بطريقتو ولا شنو يا زعيم ؟؟

  15. ودالزبير كتب:

    من الأشياء الملفته للنظر إن البشير وفي مراكز إقتراع خارجيه كلندن ولاهي وكندا محل ما ترجي مصطفى قاعدها زاتها نال أكبر نسبه تصويت ونحن في إنتظار مراكز الخليج العربي وما أظن المؤتمر الوطني يده لاحقها لمن يزور في بلاد بره ولو دي كمان قدرها عليها فيبقي ده حزب ماساهل كلو كلو من ناحيه قدرته على إختراق حتى مالا يمكن إختراقه……………. وعااااارفك تحت السرير

  16. abbbas كتب:

    ياود الزبير كيفك ونهارك سعيد
    السودانين المقيمين خارج السودان امريكا اوربا الخليج معظمهم فرو من بطش النظام كيف البشير يفوز بنسبه اعلي من 80% ؟
    =============
    aflaiga انت معاي انو البشير ده راكب راس وداير باي اسلوب يثبت للعالم انه ليس بمجرم حرب !

  17. ودالخلا كتب:

    أفليقا يا صديقي العزيز، لقد أفضت في البيان والتبيان، وأفصحت في البلاغة والوضوح، ولقدت أسمعت ما فيه الكفاية، ولكن من يقرأ ومن يسمع!!فكل منهم يغني علي ليلاه وليلاك أخري يا صديقي..
    نحن دايما” بنستمع النصح بعد ضحي الغد..
    لله درك ياأفليقا ياصديقي، والمثل بيقول الجنا خال!!

  18. ابكرون كتب:

    يا ود الزبير : يعني التصويت ده في لندن وامريكا بتم في في البرلمان البريطاني ولا البيت الالبيض ؟ مش في السفارة السودانية الاععضاءها من الغفير للسفير من المؤتمر الوطني ؟
    افليقا : والله تشكر اسمعته ود الخلا نحن اضنينا بهما صمم
    ياخ مافي زول قال ليهم ادوها بارده لي زول ….بس اعملوا انتخابات نزيهة تعملها حكومة من الجميع بس ده الموضوع وبدون عجلة ان شاء الله كانت تكون بعد سنتيم من الآن … .ده حق ولا لا …..اجب عليهيا افليقا … وكذلك البقية الخلف الكواليس والتحت السرير بتاع بتنا نضال يا ود الزبير …..!

  19. ياسين شمباتى كتب:

    افليقا…سلام..

    كتبت :الانقاذ بكل سوءاتها وخيراتها ارست لنا بنية تحتيه لا باس بها ..عليك الله قول 3 من البنى التحتية العملتها !!!!

    بعدين ننرجع لى حتة الملك بيد الله,ونعم بالله,,دا ما ذاااااتو الكلام القالو سبدرات لما سالوهو عن سر استوزاره الطويل فهو منذ العام 1992 لم يغادر حقيبة الوزارة,,طبعا المذيع ابتسم ممتعضا,,لانو لو فتح خشمو حيكون زنديق ومعترض على الارادة الربانية…دا اسمو امهاااااااال,,وكل ما زادوا فى طغيانهم وغيهم دعوات المظلومين ح تزيد وباذن الله يلاقيهم هنا قبال قدام..

  20. حاج أحمد السلاوى كتب:

    يا جماعة الخير ..
    الكلام الممجوج بتاع نحنا سوينا ونحنا عملنا ونحنا بنينا دا حقو الناس دى ( ناس الإنغاظ ) تانى ما تقولو لأنو هم اصلو جاءوا عشان يسووا شنو ؟ مش عشان ينقذوا البلد كما يدعون ؟ طيب المِنة على الشعب السودانى الفضل لزومها شنو ؟ و دلوقت ضيعوا اجرهم بالمن والأذى …

  21. aflaiga كتب:

    ابكرون : اجيط من الاخر :
    من كان يظن انه هناك سودان بلا كيزان فهو واهم
    يجب ان نعترف بان هؤلاء القوم اصبحوا جزء من تركيبة البلد ولو اختلفنا حول نوع التركيبه فتركيبة العطر لا تشبه تركيبة السم وما تراه سما يراه الغير مسكا ..
    انا لم امدح الانقاذ ولست بمادح اى منهم وسبق ان قلت رايى الذى رفضه ود الخلا ( … ام ديل لمن يجو ديك ) ..
    لكن يا ابكرون دايرين نفض السيرة دى بدون وجود ضحايا وماسى ومظاليم جدد .
    القعاد واطه والتوافق على حد ادنى هو الحل لو ما عاوزين يسووهو نحنا كشعب نجبرم على سواتو عندها فقط سيضحى كل منهم بمفسديه وطباليه وارزقيته فالطوفان عندما ياتى يتفاداه الناس بكل عزيز لديهم والانقاذ ليست مستفيده من الفساد والظلم كما تظن اخى ابكرون ..
    نسال الله ان يهدى شعبنا لياخذ حقه ولو لمره

  22. بشار أحمد بشار (ابن برد) كتب:

    أفليقا : كلامك كبير جدا لاكين إنت سمعت بالمثل البقول (إبخروا فيها وهي ت……ي )؟؟؟

  23. حكاية كتب:

    هههههههههههههههههههههههههههههههههههههههههههههههههههههههههههههههههههه

  24. aflaiga كتب:

    عم بشار : والله يا عم بشار لا كبير لا حاجه موضوع بسيط جدا جدا بس عاوز شوية ( انتباهه ) !! فى زمن الغفله ..
    بعدين يا عمنا قول بت…. وبيدخنو فيها — شنو يعنى ؟؟
    ذيد الطلح والشاف واكتم الشمله والبطانيه خلى الروايح كلها تفوح فى النهايه حيطلع الريح الطيب وبعدين الشماها …….ها ..ولا شنو يا عمنا ؟؟
    حكاية : هههههههههههههه واى شيئ لكن برضو ممكن بس حاولو كشعب تعملو حاجه

  25. مشاكل كتب:

    سلامز

    رأيي من البداية .. يجب التمسك بحق الشعب في الإنتخاب .. و بالتأكيد سيأتي الله بقوم نحبهم و يحبونا و يحكموا شرع الله .. و لو طال السفر

    على الشعب السوداني أن يفكر في المرحلة القادمة .. أي بعد عشر سنوات – ما اظن في واحد من الجماعة الطيبين ح يكون حيي – وضع البلد ح يكون كيف ؟؟

    يجب قيام أحزاب جديدة و بمفاهيم جديدة يقودها الشباب الواعي المستنير خارج عباءة التقليدية او الفكر المتحجر .. للوصول للسلطة بطرق سلمية ديمقراطية .. مستندين لقواعد يهمها مستقبل السودان

  26. aflaiga كتب:

    مشاكل : تعرف ابوى الله يرحمو قال لى نفس كلامك ده انو بعد عشره سنه يمكن تتغير الوجوه وتحكمونا انتو الشباب واهو الحمد لله نفس الوجوه موجوده والشباب محكوم كمد !!!
    تعرف يا صديقى ميشو عشان نغير الوجوه القديمه يا نغير الرؤوس القاعده فيها الوجوه يا نغير الامخاخ الفى الرؤوس وقول لى كيف :
    اسى لو اعمامك عرفوك عاوز تعرس وحده هم رافضينها وفشلت كل المساعى لاقناعم ممكن تختهم قدام الامر الواقع وحينها لن يكون امام اى منهم الا انو يلبس عمتو وشالو ويشيل عصايتو ويجو يقعدو فى الصيوان نظام ولدنا نحن الاخترنا ليهو !!!!
    يعنى نستجيب لنفسياتم ونرحم عزيز قوم سيذل ونديهم حق البرستيج الابوى العاوز خياار ياكل والعاوز لحمه ومالو واللى عاوز يروح السعودية يروووح ولقرد العاوز يطلع شجرتو يطلع والشايف النجوم فى السما يطلع ليها والعاوز يتدفا بالشمس يقرب منها وانشاء الله ما تحرقو ويلا قومى يا الديمقراطية موتى …
    تعرف يا ميشو :
    صديقى س عرف الديمقراطية فى السودان بانها الكوندوم الواقى لاغتصاب الشعوب ….!!!! مع الاعتذار للتشبيه والواقى الاشرف من ديمقراطيتنا …

  27. عباس كتب:

    يعفن وينشم
    اربعة سنة ما كتيرة
    نشوف التعليم حا يستعدل
    نشوف العلاج حايتوطن
    نشوف القضاء حايستقل
    نشوف العدل حايسود
    نشوف جيوش الامم المتحدة حاتخلي السودان وتغادر
    نشوف سمعة السودان حاترجع لسابق عهدها

  28. عباس كتب:

    ده كل الدايرنو والله

  29. aflaiga كتب:

    المفوضية الاوروبيه : انتخابات السودان لا ترقى للمعايير العالميه
    مركز كارتر : نفس الشيئ !!!
    الاتنين : لكنها تمهد للديمقراطية …
    اها كده كيف ؟؟
    بس تمهد دى النحنا عاوزينها كشعب عشان نخلي الجايه وفق المعايير الدولية يلا شدو حيلكم ..

  30. ودالخلا كتب:

    صديقي العزيز أفليقا، ليعلم الجميع أن هناك حرب فاصلة يجب خوضها، المعركة الأولي من أجل الإصلاح والشوري ومحاربة الفساد، ودي هي معركة الشعب الأولي مع الحكومة الجديدة والمعركة الثانية ندافع فيها عن القراءة الصحيحة والمتحضرة للإسلام، وانتزاع الحقوق فى الحرية والعدالة ودي معركة الأحزاب المستنيرة أو المعارضة الواعية وبغير خوضنا لهذه المعارك فسنكون كمن يحرث في البحر وسنعود لمربع صفر، ويكون أبوزيد ما عمل أي حاجة!!!
    في دول العالم المتحضر هنالك ثوابت لا يختلف عليها أثنان ولا تتناطح فيها غنم، وهذه الثوابت وأن جاز لي التعبير وصحت معانيه فهي التي أوجزتها في هذه الحرب أو هاتيك المعارك الجهادية النبيلة!!

  31. مشاكل كتب:

    سلامز

    بعد كلام أفليقا و ود الخلا

    قومو الى عملكم يرحمكم الله … ايوا كدا يا وديييييييييع

  32. ابكرون كتب:

    يا اصدقاء : تاكدوا لن يرضي سياسي واحد بسياسة الامر الواقع التي فرضها المؤتمر واعوانه زورا وبهتانا وتزويرا لارادة امة باكملها ….ما لم تمهده 21 سنة من البلطجة السياسية لن تمهده اربعة اعوام للديمقراطية التي لا يعرفها المؤتمر واعوانه ….قال ديمقراطية قال …
    وللاحزاب المعاضة كامل الحق والحرية بالنضال ضد الزور والظلم وتستمر ساقية عدم الاستقرار مدوره ( ويتحمل وزرها المؤتمر ) لان كل الاحزاب الكبيرة (وكلها اكبر من المؤتمر تاريخا وحجما ومؤيدين مش مويدين الأوراق التي تملأ بها الصناديق ليلا ) وهي الإتحادي والامة والشعبي والحركة والشيوعي والبقية فاين المفر من هذا الطوفان…….. ولن يهنأ الجداد بنومو ولا فوزو الفشنك وتذكروا يا اصدقاء المقولة …..ستبدي لك الايام ما كنت جاهلا……الخ

  33. ودالزبير كتب:

    أبكرون سلام

    تغيرت التركيبه السكانيه والثقافيه في السودان تغيراً كبيراً في السنوات الأخيره والأحزاب التي تحسبها كبيره من حيث عدد المؤيدين لم تعد كذلك فالشعب الآن لم يعد يري في آل المهدي قداسه ولا في آل الميرغني أما الحزب الشيوعي فهو وخلال الديمقراطيه السابقه وقبل تفكك الإتحاد السوفيتي كان قد أحرز ثلاث مقاعد فمابلك بوضعه الآن حيث أصبحت كلمه شيوعي كافيه ليهرب البني آدم هروب الصحيح من الأجرب وأذكرك بجلطه نقد في منبر سونا حين سؤال ممن الصلاه حزب المؤتمر الشعبي يعتمد على المنشقين من الوطني على غالبيه من أبناء دارفور … يكفي ضعف لهذه الأحزاب ما نراه اليوم من إنشقاقات داخلها فالأمه حتى اليوم لا يزال منشق ولو تركنا الإحزاب الصغيره المنشقه عنه ماذا سنقول عن إنشقاق مبارك الفاضل والإتحادي الأصل كل يوم له رأي … مايدفعنا دفعاً للتمسك بهؤلاء السيئين إن البديل أسوء والأخبار تتداعي بمطالبه آل المهدي بتعويضات تصل ل 12 مليار جنيه والأخبار تتحدث عنتولي أبناء الصادق للمناصب القياديه بالحزب ….

    إتذكرمقوله قديمه في أول أيام الإنقاذ على لسان أحد قادتها : إذا كان نميري ومعاهو شويه عساكر ( اللفظ القالو شين وتم إستبداله ) حكموا البلد ستاشر سنه .. نحن الصاحيين ديل ممكن نحكمها كم ؟؟!!

  34. ودالزبير كتب:

    انت يا دفع الله

    ما تبتَ وفهمت

    لسة دايش

    في المنابر

    بين (خليفة)

    وبين (إمام)

    وبين عساكر.
    يأخي هاشم صديق ده لخص لينا الحكايه كلها في الأبيات دي ( أيقونه بتاعت يدين بتصفق )

  35. ابكرون كتب:

    ود الزبير ما تجيبا كلها عشان الناس الماعارفين في شنو في بطن القصيدة يعرفوا….ولا كيف؟
    ما اظنها بتملأ النت…..
    ==========================
    دفع الله الديمقراطي

    الاستاذ هاشم صديق
    ابريل 2010
    —————

    بيان رقم
    (1)

    عشرين سنة

    وإنت يا دفع الله

    في قعر السفينة

    حزنك المقهور

    مكرَّب

    راسك المدووش

    مكهرب

    يوماتي قوتك

    (بوش) (سخينة )

    حلمك الوارف

    تقاصر

    يَحَبَا في وحل المدينة

    ما نمت يوم

    نوم العوافي

    ديمه صدرك نار

    مولع

    ما بترُش لهبو

    المطافي

    كلو أملاً

    تغْشا ضلو

    تلقا طاير

    فات مهاجر

    ركَّ في أقصى المنافي

    وكُلْ بياناً

    قالوا رادي

    كان بشايرْ

    صار قواسي.

    إنت يا دفع الله

    ما تبتَ وفهمت

    لسة دايش

    في المنابر

    بين (خليفة)

    وبين (إمام)

    وبين عساكر.

    إنت يا دفع الله

    مذكور في الخطابة

    وفي الدفاتر

    والكتابة

    وفي الفِعال

    منكور ومافي.

    عشرين سنة

    وإنت يا دفع الله

    هملان في الحواري

    حتى ضهرك صار

    بيان

    كتبوهو بي سوط

    الطواري

    وأخلت (الاشباح)

    بيوتا

    لي عذابك

    ولي هوان

    ناس الضهاري.

    إنت يا دفع الله

    صابر

    ولا حاير؟!

    إنت منكور

    ولا ناكر؟!

    انت كسبان

    ولا خاسر؟

    أصحا يا دفع الله

    دافر

    قبل ما تدور الدواير.

    بيان رقم (2)

    (إدارة الأزمة

    بين (لاهاي)

    وبين السلطة

    والسودان)

    …….

    وكيف (الأزمة)

    يا فراجة

    يا هتيفة

    يا رجراجة

    بين الأمة

    والسلطان؟

    مساكين نحنا

    اسم الشعب

    موجودين

    ومنسيِّين

    ساعة الأزمة

    نصبح (في)

    وبعد الأزمة

    نصبح كان.

    مساكين نحنا

    اسم الشعب

    ساعة العصرة

    جابونا

    بعد العصرة

    خلونا

    يوم الغزوة

    مرقونا

    بعد الغزوة

    عصرونا..

    يوم الطامة

    -فوق للعادة-

    قالوا

    كرامة الأوطان

    ……..

    كرامة شنو؟

    سيادة منو؟

    ونحنا الشعب

    مقهورين

    ومنسيين

    لا قوت يوم

    ولا سُترة

    جديد دُلقان

    تسوقونا

    وتمرقونا

    وكت تلقوها

    جات في تولا

    ساعة الزنقة

    والطوفان

    وبعد الريح

    تعدي تفوت

    ما تدونا

    حتى القوت

    وكان طنطنا

    أو كركبنا

    أو فرفرنا

    أو ظاهرنا

    ترمونا

    بعلب بمبان.

    سيادة شنو؟

    كرامة منو؟

    وإنتو السادة

    فوق للعادة

    ونحنا متين

    كتبتونا

    تحت عنوان

    اسم إنسان؟!

    يا دفع الله

    ده الإعلام

    ودي الأقلام

    وديل ناس شوفو

    ناس كضباي

    ناس بعنا

    وناس كتبونا

    في كشف الحوافز

    ساي

    وناس الراي

    مليون راي

    وناس وشين

    وش للحش

    ووش للغش

    ما ولّع

    شرف شاعر

    ولا أبدع

    ضمير غناي

    الخواجة

    وكت الحاجة

    والحجاج

    يوم نحتاج

    ويغور الشعب

    يقع في البير

    وكت قايلنو

    نام وعوير

    ويعيشوا السادة

    فوق للعادة

    من رتبة

    خليفة

    إمام

    ولي رتبة

    عقيد

    ومشير

    بيان رقم (3)

    ويا دفع الله1

    تتذكر؟

    ولناكل مما نزرع

    ولنلبس مما نصنع

    ونحنا

    زحفنا

    وكل العالم ما بوقفنا

    والكضب إتماص

    يا دفع الله

    وجات المِحنَة

    استوردنا

    حديد ياباني

    استحسنا

    قمح نصراني

    اتسحسحنا

    لبان نرويجي

    اتمسحنا

    كريم دنماركي

    اتقاسمنا

    نبق إيراني

    إستوردنا

    بخور إسباني

    واستصحبنا

    طلح براني

    استحسنا

    كلب أمريكي

    واستفضلنا

    كديس بريطاني

    استوردنا

    خروف إيرلندي

    استعجلنا

    سماد يوناني

    استلهمنا

    خطب من مالطا

    واستصحبنا

    ضميركوزاني

    استوردنا

    تلج من كندا

    وإتديَّنا

    مدمس غاني

    استنفرنا

    سلاح من بورما

    وإتداولنا

    كلبْش انساني

    إتعاقدنا

    مدرب هندي

    واستصحبنا

    شُراب أوغندي

    واستفضلنا

    كفر صومالي.

    استحسنا

    قُلل صينية

    إستوزرنا

    فلل بوذية

    إستوردنا

    بِنَس روسية

    استعجلنا

    ودَك ألماني

    ……………..

    آآآه يااااني

    إستوردنا

    قُطن سوداني

    فلنأكل مما نسمع

    ولنطرح مما نجمع

    ولنخمش مما نلبع

    ولنسمن مما نبلع

    أنحنا ولاد

    الجوع والمِحْنة

    أنحنا الفقرا

    وسرقوا قمحنا

    خريفنا الرازَّة

    وأحلامنا حرازة

    مخاصمة سمحنا.

    بيان رقم (4)

    الشمس قرصت 2

    جلد حلتنا

    في ساعة البكور

    وإنت يا مسكين

    تجابد من دغش

    بي حسرة

    لي حق الفطور

    مسكين يا مصفد

    هملان يا مرمد

    يوماتي عليك

    محموم فلِّيل

    يوماتي عليك

    مغبون بالحيل

    وسرسار الليل

    تَف

    تَف

    تَف

    تَف

    ماسوة تنقط

    من عينيك

    أوصالك شاكية

    هواجسك صاحية

    تهد الحيل

    عينيك يا زول

    زي شباك

    ضلفاتو قزاز

    تزلق في المطرة

    بزفرة حسرة

    لسور الشارع

    وبال الخيل.

    آآآه يا مصفَّد

    غربال الراس

    الليل وسواس

    الغيظ خنَّاس

    الدنيا شراع

    الوحشة ضراع

    مفتول مجداف

    ممكون في سيل.

    حاكمت خطاك

    جادلت شقاك

    لقيت اخترت

    تشوف بعيونك

    وما بسواك.

    دقيت طبلين

    في الصنّة الهاملة

    صداهن رجّ

    الريح الخاملة

    رشاشن صب

    جحيم في عضاك.

    عضيت في توب

    الصبر الضيق

    حلبت رضاك

    في جوه أزاك.

    وصوك من قمت

    تريد الرمضا

    عشان تتعلم

    كيف تتألم

    تصحصح وتصحا

    بدون ما تصرخ

    وترجا العون

    تدق الصنّة

    وتبلع أنَّة

    تناجي الصاخَّة

    تكون مجنون.

    وتزازي تجابد

    ليل.. وبكور

    كم ريس نضمو

    وساقو المركب

    غرقت وشربت

    طين الخور

    كم فالح طالح

    جاكا يهرول

    في غباشْ حدادي

    في ليل مدادي

    وقَطَع النور.

    بيان رقم (5)

    عشرين سنة

    من قالو

    أبشر يا بلد

    حسع خلاص

    دَغْشك شرق

    عشرين سنة

    صاجك مرمد

    يا ولد

    ووشيهو

    ما صابح طرق.

    ………………..

    حكم السواد

    الاصلو ما فات الورق

    بيان رقم (6)

    ديمقراطي

    وعديل مظلوم

    وما خاتي

    صريف الحِلة

    يا دفع الله

    صار واطي

    وراسك عالي

    لاكا شمولي

    لا بعتَ

    ولا بتتعدَّ متواطي.

    ديمقراطي

    مراكبك في الحلم

    حُرة

    وزادك في السفر

    صُرة

    وجرحك في الأفق

    شاطي.

    يا دفع الله

    إتحمل

    تُف من خشمك

    الحنضل3

    هداك برقاً

    شرق أجمل

    لا في جريدة

    لا في سِيرة

    لا رادي

    لا وادي

    ولا غزلوهو

    في معمل.

    داك برقاً

    طلع من سالبك

    الموجب

    ومن ضحكة بكاك

    تَبْتَب

    وفي صنَّة

    سكون غُبنك

    وقف تاتا

    وعديل كركب

    ومن جبل الحُزن

    حجّاك

    وساق دمعك

    بحر ساساق

    دفر بي عِشقو

    للمركب.

    وكان الدنيا

    كل ما تضيق

    تلاقي صديق

    تلاقي طريق

    صَعَب أسهل.

    لو ما كنت سوداني

    ولو ما جرحك

    سرح حدادي

    مدادي

    من شرقك

    ولي غربك

    ومن عقلك

    ولي قلبك

    شنو الخلى

    الوطن بي حالو

    مليون ميل

    تشيلو عديل

    ويتمهل

    في ضيق صدرك.

    يا دفع الله

    لو ما كنت

    من وجعك

    شرب شوفك

    وما قبَّل

    على الأسهل

    شنو الخلى

    العيون تحمل

    عذاب الرؤيا

    للأجمل؟.

    لو ما كنت

    ناي سواي

    وما حدَّاث

    وسر ضحَّاك

    وما بكَّاي

    شنو النحتك

    من الأهوال

    في أحسن حال

    بقيت سوداني

    بالإزميل

    وبالتبريح

    وبالتجريح

    وما باللفة

    والأسهل؟!

    شنو الخلاكا

    يا حفيان

    من أمدرمان

    شنو البقاكا

    يا هلكان

    من السودان

    شنو السواكا

    نار وعصار

    ودار وعمار

    وانت جريح

    كمان أعزل؟.

    إلا حُجاكا ما بكْمل

    تجي الكنداكا

    تمشي وراكا

    تلقى الساتر

    الناصر

    طويل أمهل

    وما أهمل.

    تعاين والعصار

    حاسر

    يلوِّح ليكا

    يوم با كر

    تتُف من خشمك

    الحنضل

    تشوف برقاً

    سطع أجمل.

    ديمقراطي

    ديمقراطي

    ما شمولي

    ومتواطي

    ولو ما كنت سوداني

    ولو ما جرحك

    الصابر

    سرح حدادي

    مدادي

    شنو الخلى الوطن

    بي حالو

    مليون ميل

    تشيلو عديل

    ويتمهل

    في ضيق صدرك.

    يا دفع الله

    زول الله

    تُف من خشمك

    الحنضل.

  36. ابكرون كتب:

    آآآه يااااني

    إستوردنا

    قُطن سوداني

    فلنأكل مما نسمع

    ولنطرح مما نجمع

    ولنخمش مما نلبع

    ولنسمن مما نبلع

    أنحنا ولاد

    الجوع والمِحْنة

    أنحنا الفقرا

    وسرقوا قمحنا

    خريفنا الرازَّة

    وأحلامنا حرازة

    مخاصمة سمحنا.

    هههههههههههههههههههههههههههههههههههههههههههههههههههههههههه كلام

  37. بشار أحمد بشار (ابن برد) كتب:

    حلفا الجديدة:الصحافة: ابلغ وكيل مرشح مستقل بحلفا الجديدة»الصحافة» بأن عدد الاصوات التي نالها مرشح المؤتمر الوطني بأحد المراكز فاق عدد الناخبين،وقدم شكوى بذلك عبر اورنيك«7».
    وقال نميري علي حسين، ان مدير المركز أقر بذلك من خلال الاورنيك،مبيناً ان عدد الذين صوتوا في مركز الهداية في الدائرة الجنوبية «12» بحلفا الجديدة بلغ 936 ناخباً، بينما اعلن من خلال الفرز ان مرشح المؤتمر الوطني وحده نال 944 صوتاً بخلاف ماناله باقي المرشحين والتالف من البطاقات.
    الصحافة
    التزوير برضو عاوز شطارة

  38. حاج أحمد السلاوى كتب:

    بشار ..دى الجماعة دقسوا فيها ..
    أهو دا الشغل …!!

  39. aflaiga كتب:

    تعرف يا عم بشار ذكرتنى واحد كضاب وبوبار بيتفشخر على واحد صحبو قام :
    الصاحب : والله نحنا عندنا فحيص فى الحله الملاريا دى بينقشا ليك فى ثانية بس .
    الفشخار : شنو يعنى ما عادى !! واله نحنا عندنا صاحبنا فحيص بينقش الملاريا فى كسر من الثانية والدم من عندو كمان !!!!!
    تعرف المرشح بتاع حلفا ده بيكون فاز فى اقل وقت والمرشحين من عندو كمان ..!!!

  40. عباس كتب:

    انت ياود الزبير لسه بي فهم انو الشيوعي كافر ؟

  41. بشار أحمد بشار (ابن برد) كتب:

    سلولو فيا أفليقا : أحد الخبثاء علق قائلا دي الكرامات ظهرت والملائكة صوتوا مع الجماعة .

  42. ابكرون كتب:

    بشار سلامااااتك :
    تتذكر ايام الوهم والهوس بتاع عزت السودان ناس كجر علي موسي (شقيق اشبادين) لمن جا من الجنوب وعامل محاضرة بقول : القرود كانت بتنزل من الاشجار وتزيل ليهم الالغام هههههههه والسحابة بتتظللهم…واحد من اهلو الهدندوه ساله ساخرا ….والفيل كيف ؟؟؟؟؟؟

  43. بشار أحمد بشار (ابن برد) كتب:

    أبكرون : الفيل…؟؟؟ الفيل راكبو لابلاس ده عالم الرياضيات البطلع لينا بالعشرة في عمليات الجمع التي لا يخطيء فيها أولاد الروضة وفي ال 40 مليون المستقردين ومطربشين ديل وزي ما قال عابدين سعيد لعمك صابر ؛كلنا ياعم صابر بنسرق لاكين ما بطريقتك دي.

  44. aflaiga كتب:

    ابكرون فيا بشار : لالالالالا ما بنقبل انو الذكريات الجميله دى تحندكونا بيها كده بالشفره يا تورونا منو لبلاس ومنو صابر ومناسبة الغنية شنو وسبب النزول شنو يا بننزل منكم فى المحطة الجايه ومن هنا اقترح على ستريكر فتح بوست اسبوعى للاعمام الرائعين المعتقين ديل يورونا نحنا وناس مشاكل المفتكرين انو تاريخ السودان بدا من 89 انو التاريخ بدا من 1505 منو بيثنى الاقتراح ده ؟؟؟

  45. نيام كتب:

    ابكرون فيا بشار فيافيا افلي:
    كلما يحكي واحد عن تلك الايام تحضرني نكتة المرحوم عوض دكام لما قال جاكين بيهم بي بحر ابيض معاهو وكيل وزارة و سفير و هو فعطشوا عطش شديد قالو لولد واقف قدام بيتهم جيب لينا موية…
    جاب ليهم الموية و هم بشربو سالهم الولد ياعمي انتو شنو؟؟؟
    قال ليهو انا وكيل وزارة الخارجية؟
    وانت ياعم ؟قال ليهو سفير السودان وين كده ما عارف؟
    وانت يا عم ؟ (لعوض دكام )؟ قال ليهو طبيب اسنان
    الود عاين ليهم كده و قال ليهم لكن يا عم بتقمبلوها جنس قمبلة (المسكين ما حضر زمن القنابل الجد جد)
    الله يرحمك يا دكام…

  46. نيام كتب:

    في تلك الايام السود…كان الجيش في التلفزيون 24 ساعة اشي دبابات و اشي مدرعات و اشي لاندكروزز في الخيران طالع نازل…اتصلت واحدة من كندا في برنامج مع المغتربين ..
    – الو
    – اهلا
    – معاك س من كندا
    – اهلا يا سين
    – قلت ليك يا هناية اسمعيني
    – سامعاك تحبي تهدي لمنو يعني و اغنيتك شنو؟
    – لا يا هناية اسمعي انتي البلد فيها شنو؟
    – كيف يعني فيها شنو؟
    – لا يعني شنو التلفزيون كلو كاكي و مدرعات في شنو يعني؟
    – انتي ما عارفه يعني في شنو ؟
    – لا ما عارفة و الله اول مرة افتحوا
    – اجي؟؟؟؟؟؟

  47. ودالزبير كتب:

    عباس

    يعني الحكايه إتغيرت وبقى ممكن الواحد يكون شيوعي ومسلم ومؤمن وموحد كمان وبيقيم الصلاه … كده اخدنا قدر عقلي وأشرح لي كيف لا تتعارض النظريه الماركسيه مع مبادي الأيمان واقصد هنا اي ايمان ليس بالدين الإسلامي بل الأيمان بأي دين وعلى ماذا تقوم النظريه الماركسيه زاتها نفسها وكلام كتير عن ان الحياه ماده … لو الكلام ده إتغير ورونا يمكن نحن زاتو نبقي شيوعيين والعياذ بالله

  48. بشار أحمد بشار (ابن برد) كتب:

    ولدنا أفليقا :لابلاس ده عالم رياضيات فرنساوي وصاحب نظرية Laplace transform وهي مبنية على مباديء التكامل وتستخدم في حل مسائل الرياضيات والفيزياء.
    أبكرون : أحكي لأولادنا ديل قصة عابدين سعيد لمن رسل صابر لعشرة كيلو فليتو وصابر جاب خمسة وبغالط انهم عشرة.

  49. عباس كتب:

    في شيوعية فكر
    وفي شيويية عقيدة

    اما الشيوعية الطلعة لبقية العالم
    الدول الافريقية والبلدان العربية الغالبية العظمة (فكر) يعني شالو الفكره
    ناس كتار شيوعين بصلو وبصومو وبعرفو الدين كويس
    ديل خلاص بقو كفار ؟

  50. نيام كتب:

    بشار ثرو ابكرون:
    والله تزوير الفليتو دا احر من تزوير الانتخابات …ابكرون دايرين فلتو …دايرين فلتو ….
    دا كلو يا بشار عشان انضوي تحت مظلة “أحكي لأولادنا”…متعك الله بالصحة و العافية…

  51. ابكرون كتب:

    ههههههههههه
    والله يا نيام بولغته
    نحن ياااخ ما بنرضي انت كبيرنا وتاج راسنا….. وفي الحدقات….بعدين بشار ده بقي يفلت دي ما بتتحكي الا تحت ضل شجرة في ام بارونا ولا ام سنط….ليك علي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s