قصاصات

Posted: الأحد,18 أبريل, 2010 by nono in إجتماعية

ليس  أجد غضاضة في الحديث عن الأعمار فالكل يكبر ولكل سن شكله ومعطياته وحلاوته  البعض يرفض أن يكبر ويتضايق حين يعرف أن احد اكتشف عمره ولكن هذه سنه الحياة وعلينا أن نتعايش معها بكل تفاصلها ومتعتها متعه الحياة في تغير السن وتغير الأشياء  الثبات والجمود إذا كان كثير من الناس يري أن الجمال والوسامة في الشباب… فانا أري  إن الجمال الوسامة في كل  الأعمار  .

 

إن كان هذا الأمر يقلق بني جنسي من  حواء أكثر من بني ادم فانا أري إن ألمراء كلما كبرت  تصبح أجمل بكثير من الشابة الصغيرة .بان لا يتعدي العمر الخط الأحمر؟؟؟

لعل المعروف إن الشائع لدينا إن بعض الناس يتشاءم من رؤية رقم معين مثل رقم 13 أو من رؤية احد الطيور كالبومة مثلا .

وقد يتشاءم الفرد من العمل في يوم معين بناء علي اعتقادات قديمة ترسبت في ذهنه من جراء التقاليد….

وقد يكون الفال دليلا ويشيرا علي الخير في أحيانا أخري فقد  نتفاءل إذا رفت احدي العيون مثلا لريه احدي الأشخاص .حكه في اليد لقبض مبلغ من المال وفي القدمين للبس حذاء جديد ؟؟

عندما يسئ إليك  شخص يعني لك الكثير؟؟ ما نصنع هل نفر إلي جزيرة بعيدة ؟ هل ننطوي علي أنفسنا ؟هل نغلق أبوابنا ؟ هل نهرب إلي البحر ؟ هل نعيش في حالة حزر دائم ؟

 شكل  group (إن كيدهن عظيم ) سماسم  وسمسمه والغبشة والزهراء ..اختفاء شبه كامل عن المدونة في الشهور الأخيرة  ..شنو  يابنات  أمي  سمعتوا  وله جابوه  ليكم  مالكم قاطعوا المدونة خالين… الكواشف  الصغار الكبار يسرحوا يمرحوا  آخر انديااااااح……… …(الموووودع كان كده)  إني… أتنفس…. تحت …الماء… إني اغرق… اغرق……اغرق.؟؟!!!

بعد الاتصال معرفه الأسباب الملابسات التي طراءت عليهن:_

 1/سماسم في أجازه سنوية…

2/سمسمه رفعت القزاز بعد العودة من الصين ؟

3/الغبشه مشغولة بالوظيفة الجديدة (قالوا الجديد شديد).

4/الزهراء عامله نايمه قالت المواضيع ما مشجعه…

 نطالب بتغير لونيه المدونة إلي اللون البنفسجي لكن لا أظن ذلك خصوص بعد نتيجة الانتخابات الرئيس( البشير )  الماعاجبوا شنو مابعرف  داااااك كوعوا وله بيعوا ؟؟ تأااااااني نجي للانتخابات مزورة وله مامزوره الأحزاب خذلونا حاتكون ساقيه جحا انتو عارفين كواشفنا ديل لو دخلوهم الحكومة يمكن تأني  مايتكلوا في السياسة…

Advertisements
تعليقات
  1. حكيم كتب:

    سلام عليكم
    انا غايتو قربت ادمع لمن قريت الاسامي الموجودة بين المشاركين
    ايييييك الكلام دا طول شديد خلاس
    يمكن تقول سنتين
    غايتو اكل العيش صعب… ولا كان قنقصنا جنبكم هنا وقشة ما بتحركنا
    سلامي ليك يا بروف يا حريف يا ميسي
    سلامي للجميع دون فرز… مع انو القلب ينبض للبعض اقوى… وينبض للبعض الاخر
    ممكن نقول عدنا

  2. عزت كتب:

    كتر الف خيرك يا نونو على تغيير المانشيت من حكمي براي و الانفصال و المابعرفوا شنو ….

    لكن سماسم و باقي الحرائر عملوها ظاهرة….. و هسة انت كمان جبتي ليهم سيرة العمر…
    و عاوزاهم يجوا….ما ظنيت!!

    فعلا كثيرين ما حراير بس ما بحبو سيرة العمر…..!!

    و احدة كانت قاعدة بتملأ في استمارة مهمة فيها سنين الجامعة، الثانوي و الأولية و عدد السنين بتاعت الخبرة …. و هي عمالة تطرح و تكتب…. اضطرت تقطع الاستمارة و تخلي المودوووع لمن لقت انها دخلت الأولية و عمرها سنة واحدة…..!!

  3. ود الخلا كتب:

    سلام ياقبيلة،،
    نونو يا ست ستات القبيلة وتسعاتها كمان فيك الخير والبركة، وطالما كنتي كذلك صدقيني لن تُضامي أبدا”..
    حكيم القبيلة (حكيم) حمدا” لله علي سلامتك بالعودة الطوعية، وطبعا” بكون نقشتك مووووش؟؟؟
    ما حا جيب سيرة لي زول بواو واحدة، بس منتظرينك،

  4. مشاكل كتب:

    سلامز

    مرحب بيك يا أخونا حكيم مرة تانية في قائمة الحبان … معاك مشاكل الما بسوي مشاكل

  5. ود الخلا كتب:

    تصدق يا مشاكل حكيم ده سألني منك أنت شخسيا”، وكان كلمتك يوما” ما وقلت ليك في زول بيسأل عليك وصدوهو حراسك، مع أنو من ناسك!!!
    صديقي العزيز نيام حجبوك من عيني ليه ياتري؟؟ وحسدوك في حبي ليه ياتري؟؟

  6. مشاكل كتب:

    سلامز

    يسأل منو الخير يا حبيبنا … اديهو الايميل خليه يصل للباب

  7. حاج أحمد السلاوى كتب:

    بنتنا نونو ..
    حمدن لله على سلامة الظهور الإسفيرى بعد غيبة طال أمدها ..وإن شاء الله ما آخر طلة ..
    غايتو رفعتى روحنا المعنوية حبتين أنا واخوانى الكواشف ديل ..
    ناس خلف الله والله عذبونا جنس عذاب ..اصلو ما معقول ..
    يبدو إنو الأخ حكيم دا من المحاربين القدامى فى المدونة ..ولاّ انا غلطان ؟ .نتشرف كثيراً بمعرفتك أخ حكيم ..نحنا جينا بعدكم بمسافة ..كنت متابع الحرابة الكانت قاجة قبال كام يوم دى ؟..
    أخونا سنكل .. يا الطال غيابك سنة وزيادة .. إظهر وبان وعليك الأمان .. الإنتحابات .. اقصد الإنتخابات خلاس خِلست ..وفى إنتظار الأفراح والليالى الملاح .. غايتو بختك .. يا حسن طحنية ..
    طبعن الما صوتوا للمؤتمر اللاوطنى .. حيفتشوا ليهم شوارع تانية يمشوا فيها ..ومستشفيات تانية يتعالجوا فيها ..وكبارى تانية يقطعوا بيها البحر ..وبرضو بنقول .. ليك يوم .. يا مفترى .
    وكل إستفتاء وأنتم بخير ..مش ياهو حيكون البوست الجايى .. يا مشاكل ؟

  8. مشاكل كتب:

    و الله يا حاج السلاوي … من اسي … كل سنة و السودان بخير

  9. aflaiga كتب:

    نونو : قصقصى بالراحه سمعتى بنكتة القصاصات :
    واحد بخيل جاء شايل ربع متر للترزى قال ليهو اعمل لى جلابية وعراقى الترزى ضحك قال ليهو والله قصص البخيل قال ليهو بس القصص البتفضل دى اعمل لى منها طاقية !!!
    اما اذا دارمحور سؤالكم عن سمسمه ( طبعا نحنا حاجه وحده روح وحده فى جسدين ) فهى بخير وحترجع لبكم قريب ..
    اها ده كلو خليهو انتى كنتى وين غاتسه فى ياتو بطاطسه ؟؟؟

  10. محنك كتب:

    الاعمار بيد الله الرجال عندهم الشجر الكبار فيهو الصمغ والماعندو كبير يشوف ليه كبير وكده

    والنسوان مشكلة الكبر عندهن ولانه مدونتنا دى بقى عندها عمر وعجزت يمشن يفتشن مدونات جديدة عشان يبدن من 20 سنة بس

    افليقا حبيبنا جالك كلامى انو المدام مشت الصين بعثة عن الانتخابات وجات قبل الانتخابات وهاك يا شغل وبعد الانتخابات اكيد ا تبان … تحياتى للاولاد لكن كلامى دا ما نصدقوا ممكن قربنا نبقا ابوصمغ وكده

    وفى نكته عن اعمار النساء للدكتور عبدالله الطيب لقدام نرويها ليكم … ولنا عوده

  11. aflaiga كتب:

    محنك : والله ما كنت عارف يا محنك وعرفت بس بعد النتائج بدت تطلع وبقت تقول لى مافى تزوير دى اخطاء فنية بسيطه لمن الملاح اتحرق والجلابية اتشالت بالمكوه والانسولين باظ فى التلاجه وكتاب الحب فى زمن الكوليرا بتاعى ما لقيتو فى محلو لكن الحمد لله لقيت الكوليرا وبفتش فى الحب !!! اتاريك كنت ناقش وانا الماسمعت كلامك !! عليك الله لو عارف اى حاجه تانى عن سمسمه ورينا عشان ما نتفاجا فى مرحلة الفرز ونعمل عنف ما بعد النتائج وقع ليك ولا اعيدو ليك ؟؟؟

  12. بشار أحمد بشار (ابن برد) كتب:

    نونو:تلبية لرغبتك ياست الحرائر ولأني ما قادر أنسي سيرة البحر فقد آثرت التعليق في بوست أفليقا الحكم حكمي براي !!!!

  13. الزهراء كتب:

    نونو الغاليه
    ليك سلام بعدد امتار الكره الارضيه اليابس منها والما يابس
    شفتي كيف؟
    بوست عجيييب لكن من كل بستان زهره

    بالنسبه لموضوع الاختفاء ده فهذا امر اعتدنا عليه فكل فتره بنلقى مجموعه انشغلت واختفت فتظهر من جديد وتزيدنا ابداعا
    ونتمنى الناس تكون مرابطه وتتغلب على المشاغل لانو المدونه تعتبر دوحه وارفه للكل

  14. nono كتب:

    شباب شكرا علي المرور
    الكواشف لكم التحيه ربنا يديكم الصحه العافيه طوووووله العمر
    افليقا يا وزير الدفاع ؟؟؟
    الزهراء يابت القبيله لكي كل الود
    نتمي تعود ايام المناوشات الجميله الجميع في بستر واحد؟؟

  15. البشاوى كتب:

    النونو-
    ركزى شوية فى زول كاشف وفى كويشف – ودى لينانحنا

  16. محنك كتب:

    افليقا حبيبنا
    يا سلام على كلامك الحلو يغير المود لانه اليومين دى الانتخابات عاملة جمود وشد وجذب تعليقك ذكرنى ايام المدونة زمان

  17. ودالخلا كتب:

    محنك ياصديقي،،
    أيام زمان ما بيرجعن وباكر بيرجعني الشجن وأتهني بي طول الزمن يا نسمة….
    يا نسمة قبال تجي رشي المحنّة في كل دار وكل البيسأل طمني..
    يا نسمة….
    تعرف قلت ليك كده وأنا أمامي قصة حب قديمة وقصاصات مرة وأليمة، وكل ما أسأل عليهم يجيني رد الجواب قاسي وجافي، وكلامك لأفليقا أثار فيني كوامن الشجن وأعادني لأيام مضت لن أنسي ذكراها، ومضت مرحا” قضيناها..
    تحياتي لك ولحكيم ولكل من هيجته الذكري!!!

  18. طارق أب أحمد كتب:

    فانا أري إن الجمال الوسامة في كل الأعمار (نحن) .
    فانا أري إن ألمراء كلما كبرت تصبح أجمل بكثير من الشابة الصغيرة (إنتو) .
    بعض الناس يتشاءم من رؤية رقم معين مثل رقم (نحن)
    وقد يكون الفال دليلا ويشيرا علي الخير (إنتو)
    عندما يسئ إليك شخص يعني لك الكثير؟؟ (نحن)
    شكل (إنتو) group (إن كيدهن عظيم ) ..اختفاء شبه كامل (إنتو)
    نطالب بتغير لونيه المدونة إلي اللون البنفسجي (نحن)
    خذلونا حاتكون ساقيه جحا (إنتو)
    انتو عارفين كواشفنا ديل لو دخلوهم الحكومة يمكن تأني مايتكلوا في السياسة (نحن)

    • طارق أب أحمد كتب:

      بعد إعمال المعطيات لإيجاد نتيجه منطقيه تجد أن
      كواشفنا السمحين ركبوا ساقيةجحا ((التونسيه قديما و الحكومه السودانيه مؤخرا )) و و الدنيا كان لونا بمبى و حرايرنا بعد كملن السماحه شالو الفال و مشربش الشاى اشرب كازوزه

      دى ياها نونو ذاتا
      مبروك نونو عوده قويه
      ولاى المدونه كانت فاقداك

  19. يا سلام عليك يا نونو .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s