يا عزت كلم لينا عزالدين!!!

Posted: الأحد,18 أبريل, 2010 by ودالزبير in ادبية

وعزت المنادى هنا هو صديقنا الدكتور عزت بقاريتش وعزالدين المراد أن يكلمه لنا هو صديقه عزالدين أحمد المصطفى الفنان إبن عميد الفن السوداني أحمد المصطفى له الرحمه ومناسبه النداء هي صرخه علها تصل لآذان الإبن عزالدين الذي في طريقه ليمحو العميد من ذاكره الشعب السوداني بوقوفه في وجه أي شخص يحاول أن يؤدي تلك الأغاني لدرجه إن الكثير من الجيل الجديد ربما لم يسمع ب (ما أحلى ساعات اللقاء) أو (يا عظيم) أو (أشكي وأبكي) أو( فارق لا تلم )أو( جفيت مابتنا) وربما الأغنيه الوحيده الباقيه في الذاكره هي أغنيه( يا بت النيل) وذلك بفضل مجهود أحمد بركات وهو قريب للأسره كان يردد أغاني العميد أحمد المصطفى قبل أن يتم إيقافه بالمحكمه على ما أظن وبذلك إنقطع صوت العميد من الوصول للجمهور .. منطق الإبن عزالدين هو إنه الوارث الوحيد لهذه الثروه ومن حقه أن يستفيد مالياً من هذا الإرث في منطق غريب وكأن هذا الإرث كان دكان ناصيه أو بيت يفتح على شارعين … إختفت الأغانيات حتى من برامج مثل نجوم الغد أو أغاني وأغاني لتعنت صاحب الميراث في عمليه حرمان جماعي للشعب من حق التمتع بهذه الأغنيات وللأسف فالقانون إلى جانب الأستاذ عزالدين لكن دعونا نأخذ هذه القضيه كمدخل لمناقشه قانون الملكيه الفكريه الذي لا يعرف تفاصيله إلا كامل إدريس والتجاني حاج موسى فاليوم يا ساده يمكن للمؤلف أو الملحن بإعتبارهم أصحاب حق أصيل أن يبيعوا الأغنيات التي شكلت وجداننا لنجاه غرزه زاتها ويمنعوا فنان في قامه ود الأمين أو ابوعركي من ترديد تلك الأغنيات بإعتبارهم أصحاب حقوق مجاوره وأتذكر أنني في حفل قبل شهر من الآن طلبت من الفنان أبو عركي أن يغني لنا ( أضحكي ) فأعتذر بلطف بإن هاشم صديق شاعر الأغنيه قد منعه من أداءها…… هكذا بكل بساطه ولا عزاء للمستمعين …

يمكن اليوم أن تبحث عن ورثه أي شاعر مرحوم أ و ملحن وتشتري منهم الورثه ثم تبيعها في سوق الله وأكبر .. علينا جاي المصير بخمسين مليون…… أيو قرب تعال الشجن الأليم بمائه مليون … جبناها بالطياره وبعناها بالخساره إشتري لحنين وشيل التالت هواده …

وعادي بعد كده ممكن تسمع مونيكا تغني أغنيات عثمان حسين أو زبيده الإنقاذ تردد روائع محمد أحمد عوض وعيييييييييييييييييييييييييييييييييييييييك

الأغرب من كده إنو حتى الشعراء والملحنيين المازالوا على قيد الحياه جارين وراء القروش وأهو عندك بشير عباس ساكي البلابل بالبوليس عشانا مايرددوا أغانيه قال أيه لحدي هسه ماقبض حقو يعني نحن هسه ممكن نصدق إنه بعد أربعين سنه يا بشير عباس وبعد رجلك مابقت والقبر تكون ما إستفدت حاجه من بنات طلسم بعيدن يأخي نحن ذنبنا شنو نتحرم من شارع بيتنا ولون المنقه والحاجات الجميله الشكلت وجدانا ردحاً من الزمان … والقصص والحكاوي كتيره في الحته دي لكن بنجيها وأحده وأحده بعد ما نعرف رأي الناس شنو في الحته دي ونعرف رأي عزت زاتو وهل راح يوصل كلامنا ده ولا راح يعمل نائم .

Advertisements
تعليقات
  1. طارق أب أحمد كتب:

    ود الزبير

    موضوعك شائك شديد

    رغم أننى أول مره أسمع بالمودوووع دا إلا أننى أفق مع موقف عز الدين و أرسل له عبر عزت بأن لا تهاون فى إرث والدك و أنت الوصى عليه فعليك أن تختار من يكون أمينا عليه مثلك تمامن ,,,بعيدا عن الذين هبروا كل شى حتى الفن الذى تبقى لنا يريدون الأستيلاء عليه مجانن

  2. طارق أب أحمد كتب:

    أما عن شاعر أو ملحن أعتقد أن مثل هذه المطالبات مفروض تكون سقطت بالتقادم و حسب علمى أن التسجيل كان يتم فى الإذاعه و هى التى تدفع للشاعر و الملحن و ليس الفنان

    عليه لا أتفق مع عثمان النو أو بشير عباس و غيرهم أن يحجروا أصحاب الأغنيات الأصيلين من أداء أعمالهم

  3. طارق أب أحمد كتب:

    ود الزبير
    معليض أنا جيتك داخل توش بلا أحم و لا دستور

    ما كنت شايف دوك عزت و هو خاشى واسطه بينك و بين لينا عز الين
    إحم إحم

  4. ابكرون كتب:

    انا برضو يا ابو احمد فهمته عنوان البوست في البداية انه عزت يكلم لينا بنت عزالدين ههههههه الاكد لي كمان تعليقك الاخير البقول : ( ما كنت شايف دوك عزت و هو خاشى واسطه بينك و بين لينا عز الين )

  5. aflaiga كتب:

    ببراءة شديده :
    حين يشك اب احمد وابكرون انو ود الزبير عاوز يتوسطو ليهو عند لينا عز الدين يبقى واحد من اتنين يا متعودين انو ود الزبير بتاع لينات يا متعودين انو عزت بتاع واسطات .. ولا شنو يا البشاوى ؟؟؟
    بالنسبه للموضوع اعتقد انو من البر باحمد المصطفى ان يصل فنه للجميع دون احتكار وفى نفس الوقت دون اسفاف وتبخيس لقدر العميد فليكن عز الدين وصيا على ارث الراحل من اجل تعميقه وتوصيله وضمان ديمومته ومن هنا اقترح على الاخ الاكرم عز الدين ان يقيم جلسات استماع يؤمها كبار النقاد والمختصين لاختيار من يروج للعميد مع اعطاء كل ذى حق حقه بشرط ان نكون فى المنبر من اعضاء جلسات الاستماع ولو وكلنا عزت وبعض السميعه الحلوين عننا …

  6. حاج أحمد السلاوى كتب:

    أخونا شكسبير ..وبقية صفوة الأخيار ..سلام .
    أولن ألم يصلك الفرمان الجديد والذى بموجبه تغير إسم عزت بقاريتش إلى عزت فقط … أنا قعدت افكر إيه السبب اللى خلاهو يتخلى عن بقار يتش دى ..واخيراً تذكرت إنو ابو عصمت شغال فى مهمة إنسانية عظيمة وينشىء فى دار تضمه مع اسرته الكريمة فى بحرى ..وطبعن كوووووولنا عارفين تكلفة البناء الباهظة فى دولة أمازونيا العظمى .. التكلفة التى تضاهى مثيلاتها فى دول الإستكبار ..عشان كدا قام حذف قا ريتش وخلاها عزت … حاف …آمل أن اكون موفقاً فى تحليلاتى الغير سياسية دى ..
    نرجع لموضوعك الأساسى بعد التخريمة دى..واقول وبالله التوفيق إنو عزالدين ابن الراحل المقيم احمد المصطفى له الحق فى ذلك من ناحية وليس الحق من ناحية اخرى والمسالة عاوزة شوية موازنة ..ليهو الحق فى منع البكاسى اللى بقت ركشات وملت الساحة الفنية و صارالكل يتكسب من خلال عطاء الاخرين الذى يندرج تحت مصطلح التعدى على الملكية الفكرية ويستوجب إنزال العقاب على مرتكبها.. ودى نسال عنها مرشحنا لرئاسة الجمهورية الدكتور كامل إدريس ..والشِق التانى هو حرمان المستمع الكريم الذواق للفنون بأنواعها من سماع تلك الأغنيات الخالدة بصورة متجددة وكولنا عارفين إنو فى بعض الأغانى عندما تُؤدى باصوات أخرى قد تضيف إليها رونقاً وجمالاً ..وقد اعجبنى أداء الفنان المبدع ذو الصوت القوى محمد الأمين عندما إدى أغنية كردفان مع صاحب الأغنية الأصلى عبد القادر سالم وكذلك اغنية نور العين مع وردى …ولكن هذا لا يعنى إطلاق الأمرعلى عواهنه ويبقا سداح مداح ولكل من هب ودب..
    على أى حال نخلى المودوع لحبيبنا ابو عصمت يمكن يقدر يوصل إلى صيغة توافقية ( على وزن أتفاق أطارى ) مع عزالدين لحفظ الحقوق ..

  7. ودالزبير كتب:

    طارق وأبكرون

    صباح الخير

    هو بالله عزالدين عنده بت إسمه لينا …. أها نرجع لموضوعونا ورأي طارق البيقول إنه من الرأي البيقول يجب إعطاء أغنيات العميد لمن يستطيع أن يحافظ عليها لكن المفارقه إن السيد عزالدين رافض تماماً فكره أن يتغني بها غيره وحتى الصوت الوحيد الذي تقبله الناس ( أحمد بركات) وهو من أقارب العميد تم إيقافه .
    أفليقا

    عليك الله هو فضل فيها لينات يأخي نحن البقين لينيين( ما شيوعيين ) سمح

    عارف يا عبده فكره جلسات الإستماع دي بتكون لأعمال جديده المطلوب فيها رأي الناس لكن في حالتنا دي وأعمال العميد المطلوب قرار شجاع من المالك ( إنشاء الله يبيعه بالخساره لزول بيقدر يوصلها للناس )

    حبيبنا السلاوي

    شفت ناس طارق ديل السياسه أثرت فيهم كيف ( بعيدا عن الذين هبروا كل شى حتى الفن الذى تبقى لنا يريدون الأستيلاء عليه مجانا) قرب طارق يقول لينا إنه ناس المؤتمر الوطني قد سرقوا الغناء برضو غايتو المابدورك في الضلمه بيحدر ليك

  8. عزت كتب:

    الاعزاء سلام

    قريت الموضوع دا على خفيف بالمساء كدا و أنا طالع ففي السكة فضلت افكر يا ربي حأكلم (لينا) كيف…
    قمت شديت تلفون لي عزالدين و لقيتو وسط برنامج غايتو كان الصوت عالي شوية بي غادي… فقلت ليهو (مالك قاطع الموية و النور من الناس)….
    ضحك…. و استمريت قلت ليهو بخصوص الأغاني بتاعت العميد و ترديدها…
    و تحدثنا شوية لأنو الصوت كان عالي ناحيتو…. على أمل الحديث اليوم صباحا و لما كان أنا هسة ماشي على المطار في رحلة للباكستان (اسلام أباد) و لم أستطع الاتصال به الآن لكن ما فهمته و أنا معه في الخط أن هذه الأغاني تظل موثقة باسم أحمد المصطفى، وهذا نتاج لابداع قضى فيه أحمد المصطفى سنين عدداً وهو يهبه وقته وصحته، فلا يمكن التنازل عن أغنية لتعرف باسم مغنٍ آخر…..

    غايتو بأحاولوا تاني لمن أجي يا ود الزبير …….

    لكييييييييييييييييييييييييييييييييييين عجبني لي ناس نجوم الغد و أدعياء الفن..!!

    الى القاء…….

  9. ودالزبير كتب:

    عزت المرطب

    نسقت مع مخير ولا مسافر سااااكت بدون تنسيق وبروتكولات .. المهم يا زول تمشي وتجي بالسلامه ونحن قصدنا بموضوع عزالدين أن نشير للمشكله الأكبر وهي تحكم فئه قليله بأشياء تمثل وجدان الشعب كله وهل المعادله دي صحيحه أو مختله وكيف يمكن أن نوفق بين حقوق الناس دي الماديه وبين حقنا في التمتع بهكذا أرث

  10. ُمخير كتب:

    العزيز ود الزبير
    الحبان في كل مكان
    سلام
    أولن: حسب معلوماتي المتواضعة أن بعد مُضي خمسون عاماً على تسجيل عمل ما يكون مُشاع للكل، وإلى ذلك الحين من حق أصحاب الحقوق الأصيلة أن يعطوا أو يمنعوا من أرادوا حق التغني بأعمالهم، لأنو فعلن القصة بقت هايصة وشحارير ما طلعوا من البيضة بقوا راكبين الحديد الشديد ومتجدعين بينما عمالقة أبدعوا وجار عليهم الزمان فلم يجدوا ما يسد الرمق أو من يقّيّم عطائهم ويتعطف عليهم بجائزة تقديرية يرافقها صك مصرفي أو أقله كلمة طيبة ناهيك عن حقوق مادية. إذن المسألة تبقى متروكة لتقدير المالك الأصلي أو ورثته الشرعيين.
    ثانين: تسجيلات الأعمال القديمة متوفرة بكثرة في النت وفي غيرها لمن أراد سماعها من خشوم أسيادها، يعني ممكن تحصل على “أضحكي” بعدة طبعات طالما سيد الشيء عندو راي، والمبدع المقتدر يجي بحقوا ويوري جديدو ولا أنا غلطان ؟؟

    كشرة برة المودوع:
    حبيبنا أبو عصمت حبابك ويا ريت لو أديتنا خبر عشان نكون في طليعة المستقبلين، غير أنني وللأسف وبعد سويعات قليلة في طريقي إلى شمال إفريقيا، يعني الرقم عندك وخلينا نسمع صوتك لو وصلت قبل ما نغادر.

  11. عزت كتب:

    سلامات من مطار الدوحة الموخمج…. (أريتو مطار السرور) و قبل شوية كنت بسلم على أبكرون بالهاتف، و الا و يبدو أنني سوف لن أكون محظوظا حيث سيغادر العزيز مخير عندما نحط ببلدهم، لكن عزاءنا أن البلد محروسة و تمشي و تجي بالسلامة…

  12. ابكرون كتب:

    عارف يا عزت حيكسروه عملوا جنبو مطار عالمي خطير(3 كلم للشرق مع حافة البحر ) افتح قوقل ايرث واتفرج …اتنفذ خلال عام…ونحن لي اسه ما لاقين لينا جهة نلطع فيها دين لتنفيذ مطار امدرمان علي حساب الاجيال القادمة…..!

  13. طارق أب أحمد كتب:

    ((((((شفت ناس طارق ديل السياسه أثرت فيهم كيف ( بعيدا عن الذين هبروا كل شى حتى الفن الذى تبقى لنا يريدون الأستيلاء عليه مجانا) قرب طارق يقول لينا إنه ناس المؤتمر الوطني قد سرقوا الغناء برضو غايتو المابدورك في الضلمه بيحدر ليك)))))
    ود الزبير
    كدى القن خلى
    أمانه فى ظمتك تاس المؤتمر الوطنى ديل ما كانوا عايزين يسرقوا الهلال بتاع الكوره الواحد دا و لا من فشلوا سرقوا المريخ

  14. ودالزبير كتب:

    في صحيفه فنون الصادره اليوم يكتب رئيس تحريرها هيثم كابو في عاموده ضد التيار مقال بعنوان (إغتيال عميد الفن السوداني بسكين إبنه الميته ) ويتناول كل حرف كتبناه هنا حول منع عزالدين لأغاني والده

  15. بت امدر كتب:

    تحياتي

    صادفت عز الدين في مرة قبل سنوات ودار بيننا نقاش عن توريث الفن ..وهل بالضرورة أن يصلح الإبن ليكون امثل من يواصل ويوصل الرسالة وصارحته بأن صوته (…….ودار بيننا حديث ..إمتد حتى أعلنت شهرذادي أن الصباح لاح…ولم تكن هنالك فايدة…لا في المصباح ..ولا في) النقاش والصياح.

    سالمين

  16. وحدة بلادي راسخة مثل الجبل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s