يا عيونى ما قلتى من الريده تبتى ..

Posted: الأربعاء,21 أبريل, 2010 by aflaiga in اخرى

حسن او حسن حنان كما يحلو لنا تسميته فى الحله شاب رقيق جدا حساس ذو مشاعر مرهفه وخاصة تجاه الجنس الاخر حيث ينشط حسن حنان فى متابعة  مشاكل الجنس الاخر وخاصة بنات الحله قبل ان يتمدد تخصصه الى خارج الحى فمن الطبيعى ان تجد حسن حنان فى محل الكريمات وتركيب العطور والبوتيك الخاص به يجلس وحوله مجموعه من الشابات يناقشون اخر التطورات فى دنيا الكريمات او البواريك للناس الخدر وانا زعلانه يا بدر عجوبنى الناس الخدر – او يقوم باسداء النصيحه لهذه او تلك حول علاقتها بهذا او ذاك واليكم بعض مما يدور فى هذه الجلسات الحنانية الراقية بين الصديق حسن حنان وحيرانو :

حسن : تعرفى يا غاليه انتى مشكلتك بتختى كريم الاساس كتير بعد داك تجى تختى الكريم التانى .

غاليه : هى يا حسن لكين اسوى شنو العرس قرب وما بقدر اعرس بى لونى ده !!

حسن : تعرفى انتى كمان يا سوسن  مشكلتك بتصدقى عواطفك – يختى شغلى مخك شوية اى زول قال ليك علاء ده بيلعب بيك انتى ما مصدقه كدى بس خليكى جاده وقولى ليهو اخوى عاوز يقابلك شوفيهو بيسوى شنو ؟

سوسن : والله فكره يا حسن طيب ما تقابلو لى انتا وتشوف منظرو شنو ؟؟

حسن : سجمى منو .. انا ؟؟ هووووى انا شربكة الرجال دي ما بدورا !!! ابرا واستبرا انا !!

حسن : نرجع لموضوعنا انتى يا هنادى شنو يعنى حسابك بتاع تحويل الرصيد كتر وكل مره تقولى لى عمار حيدفع وعمار لا بيدقع لا حاجه او بالاصح ليكى انتى ما بيدفع لانو جا امبارح دفع حساب نسرين كلو – هووى دى ما فتنه لكن النصيحه واجبه وانتى زوله اختى لازم اوريكى الحولك شنو .

هنادى : انا زاتى عمار ده جليتو كدى انت اصبر سهيل حيجى يدفع ليك الحساب كلو ويخت لى قروش تحت الحساب .

حسن : يا نجيضه انتى لحقتى شيخ سهيل ذاتو والله صعبه لقيتك ختريه لكين .. لكن انتى سهيل ده صارى وشو كده البشوفو يقول ما معانا فى الكوكب ده والله انا بخاف منو عديل كده ..

امانى : يا حسونى عليك الله خلى النقه الكتير اعمل لى معلقه لفلى ومعلقتين دوف فى العلبه دى خلينى امشى الليله تخريج سنويه صحبتى .

حسن : مبااالغه هنويه خلاس اتخرجت ياخى دى ليها تسعه سنه بتربت عشان تمسك الاتحاد .

فى تلك الاثناء يقتحم المحل تيم من النظام العام يقوده عمار ( جنابو ) ويقتاد الجميع للقسم ويتم استكتابهم تعهدات بالالتزام بالزى والسلوك الحضارى ويتم اطلاق سراحهم .

اما اخونا حسن فقد غير النظام والمود لمصدر رزق تانى تدور فيه حوارات من شكل اخر :

علياء : يا شيخ حسن عليك الله العباية الفوق دى نزلا لى .

حسن : جدا يا اخت فوزية بس سوقى معاكى محرمك وخشى ورا الكاونتر داك عشان تجربيها . نحن محل ملتزم وبنراعى الشرع فى كل شغلنا .

سميه : يا شيخ حسن عندى مشكله فى الخمارات البشتريها دى عاوزه لى واحد يكون ما بيتزلق من الراس .

حسن : المشكلة يا اخت سمية فى شعرك ما فى الخمار انتى بتستعملى شنو لشعرك ؟؟

سمية : قلت شنو ؟؟؟

حسن : لالا ما قلت شيئ يا عيونى ما قلتى من الريده تبتى …

Advertisements
تعليقات
  1. aflaiga كتب:

    يا جماعه حسن حنان ظاهره فى كل حى او ولاية دعونا نناقشها من حيث الخصم والاضافة لمجتمعنا وهل يجب ان يكون هناك حسن حنان فى منطقة وسطى بين الجنسين ؟؟ شخصيا اعتقد ان حسن حنان يوفر للشابات احساس الصديقه العالمه بخبايا الرجال والصديق العالم بخبايا النساء ولا رايكم شنو دعونا نبركت حسن حنان من كل جنبه بس براجحه عليهو شوية لانو ما عندو تقل على كلام الرجال الناشف ده !!!!

  2. ابكرون كتب:

    ههههههههههههههههه
    بس يا فلقه حسن حمار أقصد خمار ده زي قولة : (كان تابت شنو ما عارف )
    بالله شيخ (سهيل) صاري طوالي….يلحقهم وينجدهم…..هو ليه صاري ؟يا سهيل بالجد انت صاري ليه؟

  3. نيام كتب:

    افليقا:
    ياافلي حسن حنان دا مابدور شبك الرجال عشان كدا لما جاء الانضباط عمل بتاع عبايات …بالمناسبة الفهم الشوفيني في الاسلام المظهري دا رايكم فيهو شنو…كتير من الناس الما منضبطين لما تظهر دقن او ما يعادل ذلك تلقاهو غير كلامو و لغتو و سلوكو …ولا دا براهو و دا براهو…

  4. aflaiga كتب:

    نيام : جيتك بالليل عشان نتسامر برواقه حول اخونا حسن حنان :
    1 – ما هى الظروف التى دعت حسن حنان لان يتحول سلوكه من مصاحبة الشوايب للدامات ؟؟؟
    2 – هل وجد حنان الحنان عند الحنان ولم يجده عند الشوايب ؟؟
    3 – هل هناك مساحه تفاهم مفقوده بين الحنانات والشوايب تتطلب اما نزول الشوايب للحنان او طلوع الحنان للشوايب ؟؟
    بعد داك نجى لى الفهم الشوفينى فى الاسلام المظهرى :
    حين يكون مظهر الاسلام اغلب من جوهره ترتفع الشوفونيه خصما على مبادئ الاسلام والمعنى واضح – حيث يعم جوع الرعية فى ظل شبع الراعى .. وقس على ذلك ..
    بعد داك نجى لى ده براهو وده براهو :
    ولا اقول ليك ده خليهو بكره ..

  5. sobajo كتب:

    بوست موفق ويتناول ظاهرة اجتماعية مهمة
    سؤالي هو :
    اليس حسن حنان هذا نفس الذي وصفته حواء
    في الماضي بأنه تالِتِن الفي الدِلكة مغالِطِن
    او كما قالوا ؟؟

  6. aflaiga كتب:

    سوباجو : حباب مرورك الراقى .
    هو نفسو حسن حنان لكن قبال نظلمو خلونا نشوف شنو الحاصل خلاهو يبقى حسن حنان يمكن معذور ولا شنو ؟؟
    مشهد سغنتوتى :
    نونا : يا حسونى كريمات شنو شوف لينا عريس العريس بجيب الكريمات مش العكس !!
    حسن : عليك الله مالك ومال الهم والله الرجال ديل غير الهم ما بجى شى من وراهم اسالينى انا عندى اخوى راجل والله كرهنى الرجاله ذاتو ..
    اها دى ما ظاهره دايرة نقاش ؟؟؟

  7. البشاوى كتب:

    افليقا
    حسن جربكس اقصد حنان دة مالى البلد وعندهم مجتمع له تقاليدملتزمين بيها بجد يعتى لاتفريط فى قواعد اللعبة وبالمناسبة لهم علاقة لوجستية بالجكسى البيشرب الببسى
    وممكن يغيرو اسلوب حياتهم كلما داعمعم خطر الانضباط – اذكر احدهم مشهور فى عطبرة لاقيناهو فى وقت متأحر من الليل وهو يقود دراجته راجلا لانوطالع الكبرى ومابيقدر على طلوع الكبرى وهو راكب العجلة اتفقنا نهجمو خاصة انو الكبرى مظلم فصرخنا فى وجهه خليك ثابت يازول – اتهخم لحدى العجلة ماوقعت منو فى الارض ونفسو قام واتبهدل – لما عرفنا بنهظر قال الله يلعنكم انتو ماعارفين الرجالة دى بتتور النفس !
    بعدين سهيل دة ماليهو حق يصرصر وشو- اليوم كلو يعمر فى الماكينات – لكن لما تحبو تضحكوهو كلمونى اصلو شفرتو عندى —

  8. افليقا يا خوي
    إنت ذاتكـ زول محن ساااكت
    هسي عليك الله كريم الأساس دي جبتها من وييين
    وبعدين ياخوي الحكايه تبييض يعني بياض والبياض البسوو ليهو أساس دا شفناهو لما كنا شغالين بنايين
    شفت كيف
    وقول لي سهيل دا يصر وشو تاني

  9. أفليقا
    وجود ظاهرة حسن حنان – علي رأيي الشخشي-
    1/فسيولوجيه
    2/مكتسبه

    1/السبب الاول تغيرات وكميات الهرمونات الذكوريه ونسبها في مقابل الهرمونات الانثويه
    2/الإختلاط بالجنس الآخر في مرحلة الطفوله او ما بعدها كأن يكون طفل واحد في العائله أو الاسره في وسط كله بنات وهذا ليس للتعميم إذ ان كثير من أخوان البنات بطلعوا أرجل من الرجاله ذاتها لانه يتحتم عليه حمايه البنات موووش أخو البنات هيييييييييييع -علي قول ود الزبير-

  10. عباس كتب:

    انا في راي الاسباب البتخلي واحد راجل يبقي مايص وخربان
    1- هم سبببين لا تالت لهم
    2- متربي وسط بنوت
    استاذو في المدرسة كان وسخ وماخاف الله فيه ( برضو شوفو لينا حكاية الناس الوسخين ديل )

    والعينة دي بقولو عليها
    ديل رجال من مصنع الاستيم وعرين النساوين ومن مصنع البيبسي وعرين الجكسي

  11. aflaiga كتب:

    شباب : خلونا نفرق بين مايص وخربان وبين سلوك انثوى وبين سلوك غير رجولى ودعونا قبل ذلك نتفق على مواصفات وحدود معينه يمكن عبرها قياس السلوك الرجولى والانثوى وما بينهما ومن ثم يمكننا حينها الاقرار بشان السالب من الموجب وقبل ذلك دعونا نجيب على سؤال هام هل بالضرورة ان يكون ذوى السلوك غير الرجولى حسب المعايير المتفق عليها من الشواذ ؟؟؟ بالطبع لا حسب تقديرى الشخصى للتقييم فكم من ذكر ولا اقول رجل له سلوك وتربيه شبه انثوية لكنه من العفه والنزاهه بمكان بحيث لا يمكن وصفه سوى بالشخص السوى .
    الموضوع معقد جدا جدا ويا ريت نسمع راى العواطفات حول النوعيه دى من الناس .
    فى زمن سابق كان لدينا موظف استقبال من النوع ده متخصص فى الشان النسائى لدرجة بيعرف ايام الاعذار بتاعة العواطفات متين وقد يتطور الاهتمام الى نقاش مشاكل طول فترة العذر !!!
    دعونا ناخذ الراى العلمى – الفقهى – الاجتماعى – العام – عشان نناقش الظاهره الهامه دى التى لا ننكر انها تشكل حيز كبير من مجتمعنا .
    يا ريت ..

  12. ريحتنى فى حنانى يا ولدنا لكن.

  13. ابوالمنذر كتب:

    افليقا
    تبحت مواضيع عجيبه بالجدالناس محتاجه تعرف عنها لكن الحياء والخوف منهم ومن لسانهم الصعب وخطورة نظرة المجتمع ليك ان قربت منهم ..
    يبدو ان اغلبهم ضحية نظرة المجتمع السالبه ليهم والنفور منهم مما يجعلهم يميلو للنساء واصلا كما قيل ذيادة الهرمونات الانثويه عندهم يودى الى ظهور المظاهر الانثويه لديهم من رقة الجسم والصوت والحنيه الزياده وغيرها وهو لا يد له فيها انها خلقة الله وبعداك يبدا المجتمع بالنظره السالبه له والنفور منه والحكم عليه انو ما راجل فلا يجد بد من مواصلة مارسمه له المجتع والرجاله تطير ويبقى حاقد عشان يجمع لقبيلته اكبر عدد من البايظين والبايظات ويسهل العلاقات المشبوهه والقعدات .. ويعملو تجمعات مع بعض واغلبهم يهجر موطنه ويجد الماوى مع زملاءه بعيد عن اهله ومجتمعه وبلدا ما بلدك حوم فيها…..
    كسره..
    واحد منهم مشى الحج وجاء يحكى لاصحابو ..الليله يا يمه لمان ربطت ليك الاحرام ده فى وسطى وقدلت فى الحرم .. بس زنداويه .والهروله قطعت نفسى وقافله نخرتى من ريحة الحلب المصننه والزحمه سمحه الا عاد زحمتن فى الله نقول شنو…

  14. aflaiga كتب:

    المرور الكريم حبابكم :
    برضو لسه ما هبشنا الموضوع بشكل تخصصى وين ناس الدين والطب والنفس ؟؟
    يدونا رايم قبل نبدا نناقش النقاش الاجتماعى العام ..

  15. نيام كتب:

    “دعونا ناخذ الراى العلمى – الفقهى – الاجتماعى – العام – عشان نناقش الظاهره الهامه دى التى لا ننكر انها تشكل حيز كبير من مجتمعنا .”…
    الرأي العلمي في نظري و الله اعلم ان هذا النوع كما ذكر الاخوان قد نشأ في بيئة (تسري منزل ) يعني بنوت ورا بنوت و بعدين ضرب التوت فجاب حتحوت اللا بنبلع لا بفوت…نصفه يبدو رجل و نصفه الثاني قولي يا تتي الحاصل بي سببو انتي…او ربما تهرمن جزئيا بهرمونات انثوية فتشكل بعض مشكل نصفه غض تثني و بعضه يترجل…ما علينا…
    كذلك هنالك من هم بالغوا في مصاحبة الجنس اللطيف و اخذوا يرددون كلماته و يقلدون حركاته ظنا و توهما ان ذلك يقربهم منهم و لم يدركوا ان هذا الجنس اللين قد حباه الله بهذه الصفة لنحبها و حببهم في صفاتنا الخشنة ليحبونا…(فالشحنات المختلفة تتجاذب)…
    اما الرأي الفقهي فهو معلوم فقد لعن المتشبه من الرجال بالنساء و كذلك المتشبهة بالرجال…
    ورأي المجتمع في هذا النوع ظاهر من تسميته له (ما شادي حيلو, مكسور , بنوتي,وهلموا جرا…)…عموما قد يكون دا براهو ودا براهو لكن ما تشكر لي الراكوبة في الخريف…

  16. محنك كتب:

    التربية هى الاساس

    من الطفل ( الولد ) وهو صغير يجب ان يعى بانه رجل ويكون جلوسه فى الديوان ويساعد فى اكرام الضيوف غسل لعمك ادى عمك مخده يا ولد جيب الشاى … بعد سن 9 يجب الا يترك فى البيت مع النساء بل اقرب عم او خال يسوقوا معاه السوق جيب الجرايد رش الدكان جيب الفطور مع المراقبة من ناس السوق برضو

    بعد داك يلعب مع الاولاد ولعب الاولاد الكورة والبلى وغيرو ومن بدرى العيد بالجلابية والعمه وعدم التهاون فى الليونة والمياصة وان ادى الى تعنيفه ( تعنيفه دى بالجعلى دقة دقه مظبوطة ) .

    بعد داك ما بجيه عوجه

    فالتربية هى السبب
    والاسلام اوصى بفصل الجنسين من سن 9 سنوات لو بيتكم كلو بنات لازم ولدك وفى الاجازة خلى يقعد مع اولاد عمه ولو فى البلد يركبوا ولا مؤاخذه الحمير ويمشى البحر يكون تمام هو بعدها لعب ولكن يكتسب منها صفات رجولة وقوة

    وبعدين عزة السودان والخدمة الوطنية

    بعد دا كلو لو طلع ما عديل يبقى ارادة المولى

  17. aflaiga كتب:

    نيام : الشكرا ليك منو اسى انت عاوز مشاكل ساى – نحنا بنناقش يا مان .
    عليك الله الشريحه دى مش مهمه ونحنا متفقين من زمان انو اى شريحه نفرد ليها صفحه بريحه عشان اوضاعا تكون مريحه ؟؟!!!

  18. ابكرون كتب:

    افليقا : عندنا لفظ بيستخدم لي زي ديل بقولوا ليهم الود (المرية)….وده غالبا ما ينشأ وسط اخواته البنات وما عنده اخوان غالبا برضو او وحيد امه (ود امو) ومن هو صغير بهتم باشياء البنات من كحل وملابس داخلية وشق شعر الخ ….وتعتري غالبا صوته ليونه وكسيييير وميوعه وقد يكون (منتاز) في المدرسة ورجولته البيولوجية الا ان الغالبية ينحرف ويكون شاذا جنسيا( مفعول به منصوب) وتستهويه امور البنات وونستهم واحلامهم وتلقاه دايما متلصق فيهم…..وحتي لمن يبلغ ويكبر يكبر معه هذا التطبع الانثوي ويصل مراحل متقدمة من كريم الاساس او كحل العيون الي تضييق الخصر وتكبير الارداف الي التقصع الخ…..وكان في الركابية امدرمان واحد من هذه العينة ….وكان الوحيد البحضر رقيص العروس الخاص وقطع الرحط وشنو ما عارف ما لشيئ الا لان البنات بعتبروه جزء منهن …….وجاييك تاني يا افليقا احكي ليك عن بدعهم وعن صالحة او صلاح ( لب استيك)

  19. التلب كتب:

    سلام للكل
    يا افليقا يا عمك مشتاقين ياخي
    ناس عباس و نيام و ابكرون ديل عصروا علينا شديد خالص نحنا اخوان البنات.
    يا جماعة براحة علينا ما عندنا اخوان و كده..هـا هـا ها …

  20. بشار أحمد بشار (ابن برد) كتب:

    أفليقا : إنت مش قلت عاوز الرأي العلمي؟؟
    أكتشف عالم أمريكي أن بعض ذكور الضفادع في مستنقعات فلوريدا تعاني من نفس مشكلة حسن حنان وأنها تمنتع عن النقيق والمناداة للعلاقات الحميمية شأن الذكور ذات الفحولة وعند تشريحها أكتشف أنها تحمل بيضا كما تفعل الإناث وعزي السبب الى السموم التي يستخدمها مزارعو فلوريدا لقتل الآفات الزراعية وأعملوا حسابكم ما يلخبطوها ليكم مع الحاجات الباردة وبعد داك ما تقولوا لي كريم أساس أو اعدادي ودي بتكون بوينت أوف نو ريترن.
    كسرة :أنتو مناسبة الموضوع ده شنو قالوا ليكم حيعيدوا فرز نتيجة الإنتخابات ولا شنو؟؟ ولا يجوا عايدين بالمدرع والمكسيم يا الله؟؟

  21. بشار أحمد بشار (ابن برد) كتب:

    “وأنها تمنتع عن النقيق والمناداة للعلاقات الحميمية شأن الذكور ذات الفحولة”
    دي من باب الخفر والدلال ويتمنعن وهن الراغبات .

  22. aflaiga كتب:

    جننتو وحيد امو والضفادع وحنان ذاتو اسى دى ما ندوه عديل كده والله تعرفو انا كنت بقول لى بابا جبرا انو الناس ديل لو اتملو ومسكوهم برلمان بلدنا دى تانى العاوز يسرق جالون جاز الا يبقى انتحارى !! ومن هناك كان اصرارنا على ندوة المايقوما وعلى ندوات اخرى فى البال والخاطر للحديث عن المسكوت عنه فى كل حياتنا بشكل علمى وشفاف يشرح المشاكل دون المساس بالشخوص ما لم يتحول الشخوص انفسهم لظاهره !!
    غايتو حسن حنان لو وقع فى يد اعمامك ناس ابكرون ديل كان خت كريم الاساس فى موضع الندى لا موضع السيف المهند !!
    التلب : اسى دى ايام يعلنو فيها الوحدانية للابوين ؟؟!!! انستر لحدى الموضوع ده ما يعدى الايام دى الكل متهم حتى يثبت العكس ولا انت قايل شنو يعنى ؟؟
    مشهد سغنتوتى :
    1 – فى الساونا :
    صديقى حسين كان سائقا لزوجة رجل مهم وكانت تصطحبخ معها لكل مكان وتاتمنه على كل شيئ حتى الساعه والنظاره بتاعتا !! وانتو عارفين انو البيفرط فى نظارتو زى الفرط فى فنلتو الداخليه ولا شنو يا بشاوى ؟؟ المهم فى يوم ساقتو معاها الساونا واصرت انو يدخل معها لحدى المنطقه الخضراء حيث لو تقدم لاحترق وما اخترق !!! وبعد عناد قبل بالدخول معها :
    النسوان فى الصاله : ووااااااااااااااااى سجمى ده منو ؟؟؟ وكل وحده اتضايرت كان ببشكير ولا فرشة منكير ..
    السائيق ليها حسين : هوى ما تنهجمو كده ده حسيييين .
    النسوان : هى ده حسين ( وكسرو فرض الصمت اللاسلكى ) وفكوها مع بعض : هى ده حسييييييييييييين ؟؟ بالغت يا حسين نحنا قلنا الراجل الخشى علينا ده شنو ؟؟؟؟
    2 – فى الكوافير :
    من الاماكن المحببه لاصطحاب حسن ايضا الكوفير وهو كوفير مشهور فى وسط البلد وفى يوم ما وحسين اخونا خاطب اصرت عليه خطيبته انو تمشى الكوفير فدقس وقال ليها :
    حسين : تعرفى كوفير سعدية فى بحرى ده شكلو محترم ارح نوديكى .
    وهند الدخول وبصوت واحد من كل بنات الكوفير :
    البنات : هى حييين ازيك وين طولت مننا ووين المدام ؟؟
    قبل ان يشرح حسين سبب تعرف البنات عليه ومن هى المدام المقصوده كانت دبلتو فى وشو ومعاهو شبه كف على الطاير ( يا خاين يا جبان يا منحط وكمان عندك مدام ؟؟؟؟؟
    كسره : احذر ان تقتاد عواطفك الى مناطق سبق ان اقتدت اليها عواطف اخرى واحرص على تدوين سجل زياراتك الخاص عشان العام ما يتلخبط مع الخاص والشرطة فى خدمة الشعب ونحو انتخابات حره ونزيهه واامنه ومقبوله غصبا عن عين ابو اهلكم …شوف ديل كمان قال ديمقراطية عرفة متين يا نادية انتو نسيتو ولا شنو ؟؟؟

  23. aflaiga كتب:

    اها يا عم بشار حسين ده راجل عديييل وضكر لكن الظروف خلتو يكون طبيعة عملو كده يسوى شنو ؟؟ ولا عثمان صديقنا برضو شغال فى بوتيك وطبيعة عملو بتخليهو يحتك والاحتكاك بيعادى – اوع زول يجى ناطى يقول لى اصحاب افليقا مالم كلهم كده لانو بالتاكيد ما كلهم اسى ابكرون مش صحبى وفى نفس الوقت شيخ سهيل ؟؟؟ وتيب .
    دعونا نوسع المفهوم لنتجاوز الحته بتاعة مفعول به منصوب ونشوف الظروف المساعده على كده ..

  24. البشاوى كتب:

    افليقا
    شايفك وسعت المودووووع وكدة إنت بعد الانتخابات ناقلنك النظام العام ولا شنو ؟ حسة عليك الله نحنا قدرنا نفهم موضوع البنات البيلبسو زى الاولاد عشان نفدر نناقش موضوع الاولاد الزى البنات ؟ هى الحكاية جاطت كدة ليه ياالسلاوى ماتتدخل وتحكى لينا عن الغبار البركانى الفكاهو افليقا حوارك دة– قول ليهو ركز على العواطفات اما ناس قريعتى راحت ديل ماأدونا ليهم فى المقرر—

  25. التلـــــب

    الإختلاط بالجنس الآخر في مرحلة الطفوله او ما بعدها كأن يكون طفل واحد في العائله أو الاسره في وسط كله بنات وهذا ليس للتعميم إذ ان كثير من أخوان البنات بطلعوا أرجل من الرجاله ذاتها لانه يتحتم عليه حمايه البنات موووش أخو البنات هيييييييييييع -علي قول ود الزبير-

    أنا غايتو برا قلت الكلام دا لاني عااارف
    افليقا معليش للهرجله ياخ مرقنا برا المودوووع

  26. التلب كتب:

    شكرا يا عبد الرحمن ياخي رفعتا روحنا المعنوية شوية بعد هجمة ناس ابكرون العنيفة على اخوان البنات …..
    جمعة مباركة للجميع

  27. نيام كتب:

    التلب:
    جمعة مباركة……….
    هيييييييييييع !!..حرم انت البنات هن الاخواتك…موش زي ناس حسن افليقا دا…كفاية اسمك التللللللب …هازول ها الاصل معروف و سمحات الحروف ….هييييييييييييع!!!!!خليني من ناس افليقا ديل …هسع عليك الله بيني و بينك كريم الاساس دا شن عرفو بيهو…

  28. aflaiga كتب:

    نيام : مالك قلبت البشاوى قال ليك حاجه ولا شنو ؟؟ حرم افليقا وحيد امو واخو بنات لكن رجالتو فايته بى غادى ذاتو واسال البشاوى ؟؟

  29. ياسين شمباتى كتب:

    افليقا..
    يسالوا البشاوى ولا يسألوا المخدة!!؟ نيام دا خليهو باقى ماكل ليهو موز مغلط عليهو..

  30. ابكرون كتب:

    التلب يا اخو البنات تسلم يااااخ ابشر ياخ الكلام كان عن اشباه الرجال وما بالرجال…..الهجمة كانت لشواذ وليس تعميما …..العفو يا امير يا تلب…..

  31. البشاوى كتب:

    افليقا
    البشاوى قالوا ليك زول قوالة ؟ ماتهضرب ماقلنا حاجة لاى زول –
    شمباتى
    انت رجعت البلد ولا شنو؟

  32. ابكرون كتب:

    البيشاوي :
    والله جنس قوالة هي وصلتنا هنا مع الكتاحة الضاربه الخليج ….ومازال التهديد ال بالميل قائما…..!

  33. aflaiga كتب:

    ابكرون : البياته بطلناها رسلو ليهو ميلات تسمن وتغنى عن جوع كان بينفعو ..

  34. ألفاتح جبرا كتب:

    قلتا ليا (سهيل) مالو؟

  35. aflaiga كتب:

    عم جبرا حبابك : سهيل صارى طوالى وطفش البلى بى صرتو وشغال عشان يتقى شر الغنيه البتقول :
    يا يمه يا والده
    ما تبقى لى عارضه
    طفشتى ود الناس
    بى كلامك الحار ده

  36. ودالزبير كتب:

    أفليقا

    كده مادام في طريقنا لفتح الملفات الشائكه ما نشوف كمان علاقه الفن بالناس النص كم ديل وليها النكت في الذاكره السودانيه مركزه على علي إبراهيم اللحو وخليل إسماعيل والجابري وزيدان ووممكن نعرج لمجتمع الكوره وهو أكثر المجمتعات المتواجد بها أمثال حسن حنان ولو حاولوا أن يظهروا بغير ذلك المظهر ويمكن أن أستعرض لك عشرات الأسماء من لاعبين ومدربين وإداريين وصحفيين تلاحقهم الإتهامات الشبه مؤكده بشذوذهم مالذي يجري في تلك المجتمعات ولماذا يغض المجتمع الطرف عنهم وهل من الطبيعي أن يكون حماده بت فنان لمناسبات تقام في أفراح الأسر والموضوع عادي زي الزبادي .. كل هذا وأكثر في الحلقه القادمه من الإتجاه المشاتر فقط كونوا معانا لنطرق ما يخشى الآخرون التطرق له

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s