أها يا الرئيس

Posted: الجمعة,23 أبريل, 2010 by عزت in اخرى

ما عارف الجاب سيرة الرئاسة دي شنو مع سياسات العلوم و التتكنولوجيا فالشاهد أننا و بكامل هيئتنا من مؤتمرين و مسهلين (facilitators) و بنناقش في مسألة سياسات العلوم و التكنولوجيا في كل من الدول الاسلامية المنضوية تحت اللجنة التي تديرها الباكستان و يقوم واحد من المسهلين بتوجيه سؤال للكل (ماذا أنت فاعل لو كنت رئيسا لبلادك لمدة أربعة سنوات) و طلب من الكل تقديم مداخلاتهم في هذا الخصوص و لما كان الدور بعيدا مني شوية سرحت وقتها (ماذا أنا فاعل و أنا رئيسا للسودان لتلك المدة).

تخيلت وقتها شكل الرئيس أولا و لم يتبادر الى ذهني سوى الرئيس الحالي (اصلو الواحد طول ما شاف ليهو رئيس تاني) فتذكرت هيئته يوم كان على بعد مترا واحد مني عندما كنت جالسا و في أمان الله في المسجد منتظرا لعقد قرآن أحد أقربائي في مسجد الحاجة سيدة سنهوري في المنشية، و بحسبي عاشقا لمسالة العقودات تلك، فقد تخيرت مكانا قريبا لمكان العقد فاذا بثلاتاشر واحد لابسين بدل سفاري يجو و يعملوا دائرة و يمرقوني برة الدائرة دي و يجي البشير داخل و ربما تجدوا تلك الصورة في موضوع العقد في ذات المدونة و لكن لا بأس ممكن نجيبا ليكم تاني….

فالشكل طبعا رايق خالس و الجلابية بيييضا و الوجة ناير من أثر التكييف طويل المدى…. فتخيلت تلك الروقة طبعا و أكيد حتكون لايقة علي و أصلوا أنا بعرف أقلوظ العمة كويس فمافي مشكلة… و تخيلت تلك العظمة الكنت جاي بيها من البيت التاني اذ لا ينفع أن يستمر الرئيس بذات العواطف طوالي فلا بد له من تجديد بواحدة سغيرة تمشي معاهو المؤتمرات البرة و تدق الحنك مع الخواجات و نسوان الرؤساء….

ثم تخيلت فراقي لشراية البتيخ و الخرفان و لمن لم يجرب فان شراية هذين الصنفين تخيفني جدا و أول ما يقرب عيد الضحية و أنا أهلوس بالخرفان و “جسهم” و بمنظر العرب يشدوا فيك جاي و جاي و يبدوا ليك من مليون عشان تتعب و توصل السعر لي خمسمائة و تعتقد انك فائزا عليهم بانقاص الخمسين في المية لتكتشف ان خروفك الجبتو لا يساوي خروف عمك (عابدين) الاشتراهو بميتين… و الا تعمل حريف و تدق البطيخة لمن تقول تن تن و تجي في الآخر ببتيخة آرعة فما مشكلة منذ هذا اليوم لن أضطر الى الذهاب لشراء الخرفان و البتيخ و ليستمتع العيال بخرفان الحكومة… “نحن نحكم و الا نشتري خرفان” و الله دا الفضل و العربيتين العاملنهم لي حاجات البيت دي يعملوا شنو ما لازم يجيبوا خرفان و بيض و أسماك حتى في آخر أربعاء من آخر الشهر…. و كيتا عليك يا (عبد الباقي) تاني جرورة و مغالتة في آخر الشهر مافي…. كراسك دا بلو و الا أقول ليك خلي بي جنبة الظروف ما معروفة… و الطيارات دي أسكت خليها و من الليلة جوازي دي مافي جنس عسكري حيقعد يقلب فيهو لمن يديدني التأشيرة…. فرررر على المطار طوالي و لا اجراءات و فك حزام و قليع ساعات معاهم…. و طبعا الواحد حيستمتع بي المشي في شوارع أمازونيا و ما يقيف في جنس اشارة و يكون منتظر العربات يظمبروا ليهو لمن العداد يصل 5 ثواني التقول الدنيا طايرة فأنا أعتقد أن مسالة العداد الفي الاشارات دي علم الناس سلوك كعب خالس خالس… أهو زمان بننتظر النور الأصفر يولع و براحة تسرق الشارع و يكون النور بقى أخضر لكنك الآن بت تحت رحمة كلكسات (الروزا و الأمجاد) المزعجة و التي تظمبر لك حتي قبل الثانية خمسة…. أها تاني تشوفوني وين… و ضحكت…

فقام الفاسيليتيتر شافني بصحك و قام قال (أوكي مستر ازات أف سودان وات وود يو دو)…..

أها يا أخوانا و أنا حأحول ليكم السؤال و بالله دايرين لينا برنامج محدد و ما تقوموا تخترعوا ليكم طريقة بموجبها تغيروا الدستور و الا مصيبة زمان عشان تقعدوا تاني خمستاشر سنة…..  لا لا أربعة بس فماذا انتم فاعلون…!!

Advertisements
تعليقات
  1. طارق أب أحمد كتب:

    عزت
    حمدلا على سلامه
    if I were

    اولن كنت أسأل الناس ماذا كنت فاعلن لو كنت مكانى
    فسرت الماء بالماء

    خلاس هاك دى

    حأعمل تغيير حضارى , ألغى تلفزيون السودان

  2. طارق أب أحمد كتب:

    و أحافظ على البيئه , اعتقل يوسف عبد الفتاح

  3. طارق أب أحمد كتب:

    ببساطه شديد

    أشوف الناس الحاكمننا ديل عملوا شنو ؟؟
    و أعمل عكسوا !!!!!!!!

  4. ياسين شمباتى كتب:

    عزت..سلام..
    والله زولك دا ما مسهل,دا صعب شديد!!
    غايتو انا اول شئ اعملو الغى كل المستشاريات والمساعدين واعين مستشار واااااحد واعين مجلس شورى تخصصى..بعدداك اكيييد كل شئ ح يمشى كويس..

    طارق..سلام..
    عليك الله يوسف دا ما كان احسن واحد فيهم بعد سليمان محمد سليمان؟؟ كان هايج كدة وطايح ليك فى المخابز والصوانى التقول عندو عزومة عرس!! الحمدلله بس..

  5. حاج أحمد السلاوى كتب:

    يا جماعة الخير الكرسى دا صعب خلاس ..أنا مرة كنت حلمان إنى بقيت رئيسكم ( يعنى رئيس السودان ) وحصلت مشاكل كتييييييرة واحدة منهم جانى موريس أوكامبو وقال لى لازم تمشى المحكمة الجنائية ..طبعن قمت من النوم مخلوع واقول بسم اللهالرحمن الرحيم لسه سنة ما تميناها تقولوا لى عاوزنك فى المحكمة الجنائية ؟ دا شنو دا ؟طواااالى قمت قدمت إستقالتى برا رئاسة برا دوشة راس وفلقة دماغ !!!
    لاكين بعد دا لو سالونى السؤال دا حأقول ليهم : أول حاجة أعملها هى أجيب كل الوزراء الحاليين ديل اقدمهم للمحاكمة والعدالة الناجزة وأولهم عبدالباسط سبدرات لأنو هو الكان مسئول عن القضاء ..وبعد داك الحكاية حتجر ونجيبهم واحد واحد !!
    أب احمد قلت لى تشوف القبالك عملوا شنو وتعمل عكسو ؟إنت لا تنفع رئيس لأنو الحاكمنك ديل أى حاجة عملوها كانت صاح بمقاييس ولدنا مشاكل وجاموس الخلا ..
    وخلونا النشوف آخرتا شنو !!

  6. طارق أب أحمد كتب:

    شمباتى

    يا خى يوسف دا بس عندو عداء تاريخى مع النحيل
    أتقول إنو النخل كان شاهد على نصبة المدينه الرياضيه
    ما خلا نخله إلا قلعا و غزاها فى الخرطوم عشان تحنى هامتها و تكون (موئظه )

  7. نيام كتب:

    د.عزت:
    كيفك يا ترطيبة ..اعمل حساب الملات و ما تمشي المولات ..البلد ديك مفرقعة شديد..
    غايتو لا اراد الله لو عملوني الرئيس بقعد قبلي هناك او افرتك ماليزيا…معقول انوم و اصحا علي صورة اوكامبوووو…
    والله فعلا يا ابو العز شراية البتيخ و الخرفان محيرة..الليلة الجمعة جبت لي بتيخة كبيرة قلت اهو الاولاد يجمّعوا و يجتمعوا فوقها و قايل نفسي حريف …جيت لقيتها ليك موية بس اتفاقية مياه النيل…صحي يا عزت في بتيخ مضروب…تطير عيشتنا البلد دي مافيها حاجة لسه مامضروبة….

  8. ياسين شمباتى كتب:

    طارق..
    الظريفة قالوا عندو حاويات قدام بيتو,,كل فترة يجى يلقى مكتوب فيها بالبوهية (المدينة الرياضية)..عليك الله دا اسمو كلام!! اسه صوانيهو كلها كسروها ليهو,وخلوا خشمو ملح ملح,,لكن ياربى غرتو دى سببها شنو!!؟؟

    نيام..
    بمناسبة اتفاقية المياه دى,,قالوا دول المنبع بتطالب بى حقها فى الموية,,وما تنسى انو بعد الانفصال حيكون فى شكة جديدة وتوزيعة جديدة برضك,,غايتو جنس محن..

  9. حاج أحمد السلاوى كتب:

    نيام نيام ..
    يبدو إنو الكواشف ديل كووووولهم فاشلين فى شراء البتيخ وأنا أول واحد وافشل زول يشترى بتيخ .. فأنا عارف إنو حظى دايمن فى أى حاجة أسود إلا فى البتيخ فهو دايمن أبيض …أى بتيخة إشتريتها تطلع قرعة ( أرعة ) ولامن تطلع حمرا تكون مسيخة ..ش فت المحن دى كيف ؟ وبعد دا كولو ما خلصانين من عواطف لأنو يوم يصادف ( ودى بتحصل مرة كل عشرة سنوات ) و يكون حظى كويس وأبقا حريف أعزل بتيخة جامدة و تطلع حلاة وحمار ( بفتح الحاء والميم .. يا جماعة ) عواطف تقول لى البتيخ الفى السوق كوووولو كدا. .. يعنى نحنا لا نلقاها من البتيخ ولا من عواطف .. تطير عيشتنا !!

  10. عزت كتب:

    سلامات يا أحباب
    فعلا سؤال صعب موووووش… بالذات رئيس للسودان
    نخلي باقي الجماعة يجو بكرة يمكن يكون عندهم حلول…..!!

    قالوا عمك (حسني) داير يعلم ولدو عشان يكون رئيس فقام قال ليهو تعال يا بني… خد الكرتونة دي بتاعت السواسيو الصغار دول و أنا عاوزك يا بني تفكهم في الجنينة و تجمعهم في ربع ساعة و انا راح أطلع و آخد لي حمام و لما آجي راقج ألآئيك مرجعهم في الكرتونة من تاني…. شفت ازاي

    ايه دا يا بني لمن لقاهو مش آدر…
    المهم نادو الجماعة كووولهم و جمعوا السواسيو……

    بص يا بني… راح خج الكرتونة شديد
    السواسيو طلعت دايخة تترنح و استطاع الولد ارجاعم في دقائق
    بس دول زي الشعب المصري انت ترجهم كل مرة…. و ما حتلائي مشكلة…!!

    حكم……..

    أها ينفع ترجوا الشعب السوداني و الا ما حيترج ليكم..!!؟

  11. عزت كتب:

    عارف يا ياسين قالوا الغرة دي محل ما المدرس ما كان بيضربوا بالمسطرة أصلوا كان حكاية…. ما بيفهمش خالس خالس..!!

  12. aflaiga كتب:

    عزت المرطب سلامات : انشاء الله تمشى وتجينا بالسلامه ..
    اهم شيئ الزول السالك كان بيسال سؤال استنكار ولا تعجيز ولا استمتاع باحلام شعبنا لانو بيفرق !!
    انا شخصيا لو سالونى حتسوى شنو :
    بقول انو احاول استكمل النهضه واحقق الصحوه ووطن حرديمقراطى ووطن اشتراكى واعيد الخلافه ودولة السلف وكده بكون كتلت الدش فى يد اى معارضه – ولو غلبنى بلمهم كلهم واديهم جاز .. ونعيش فى ثبات ونبات ونخلف صبيان وبنات ..
    لكن يا عزت اول شيئ ورينا الرئيس ده بيصرف كم وحقوقو كم وامتيازاتو كم وبيعمل كم جوه جوه وبره بره وبالجنبه عشان نعرف بتستاهل ولا لا

  13. عزت كتب:

    ده اسمو كلام دا الرئيييييس يا افليقا…. يشيل الدايرو
    ما سمعت لمن أم الرئيس اختاروها الأم المثالية…. ما بتذكر قالت ليهم … أنا حابني طابقين لي مستشفى الأمل…
    الحاقدين قالو من وين….
    ظرفاء المدينة قالوا بسيطة … تقول ليهو يا ولدي بكرة جيب معاك مليونين دولار عشان نديهم للجماعة ديل…!!

  14. aflaiga كتب:

    ي عزت انا قصدت بس اعرف عشان الواحد يقيم المخاطر بتستاهل ولا لا – لكن بينى وبينى لو الواحد ضمن رضا ربنا ولا عدم غضبو بتستاهل القصه دى واهم شيئ ان تامن مكر الله ولا شنو يا ود الخلا ؟؟ كدى ورينا برنامجك الخاص للقصه دى شنو ؟
    تعرف يا عزت عندى صحبى شرطى مرور اتناقشت معاهو فى قصة المال الحرام المره مره بيخش عليهو دون قصد !! فقال لى تعرف يا افليقا انا عامل لى تصبينتين وحده للحلال ووحده للحرام المره لمن تقول عاوزه قروش ليها وللشفع بديها من حقت الحلال ولمن تقول عاوزه قروش لى اهلا بديها من التانى اهو برضو قلنا يمكن النار تاكل الربا !!!!!

  15. ابكرون كتب:

    عزت : ان شاء الله ظبطته البرزنتيشن….سيدي الرئيس
    قلته لي اخلوك من دائرة التأمين في العقد …. ياخ انا حضرت في الاجازة عقد في مسجد السيد علي ببحري….ولاحظت غرفة زجاجية داخل المسجد وحركة غير عادية ودخل (سيد ناس تانين ما سيدي) وجلس في الغرفة الزجاجية وافراد امنه اخلوا المصلين اللاصقين علي طول الغرفةالزجاجية من الخارج تخيل…..!غايتو ناس مواهيم بشكل زي ناسك بتوع مسجد السيدة…..
    بالله يا سيدي الرئيس عزت خلي في اوليات برنامجكم تدريس الاستحياء والخجل وزرع هذه الشيمة في الناس الما بتخجلش خالص دي ..! وما تنسي سيدي الرئيس مبدأ القناعة خاصة في السف واللغف …..يعني تحسس الناس البتلغف 21 سنه ديل انهم شبعوا وكفاهم…….وان الشعب بحس وبقرف وبطرش كمان…..

  16. اواصر كتب:

    الأخ/عزت والزوار الكرام
    السلام عليكم ورحمة الله
    غايتو انا شايفة الناس الفوق دي كلها ما ادوك النصيحة حاسدينك ولاشنو ؟؟؟ غايتو قلت ارسم ليك خارطة طريق ساااااااااااااااااهلة لموضوع الرئاسة دا وتوزيع المناصب اها نبدأ بالسلطات الاربعة :-
    أولاً السلطة القضائية :- دي سااااااهلة فأنت الخصم والحكم .
    ثانياً السلطة التشريعية :- ديل مجموعة من اعمامك الكبار المعاشين ذوي النظارات السميكة عشان يشرعوا بفهم عشرة خمسطاشر سنة وراء اصلو الزمن داك متطلباتو ما كانت كتيرة.
    ثالثاً السلطة التنفيذية :- دي عايزة شوية تعب لازم توزع المناصب والوزارات بفهم ومافي داعي توجع راسك بالوزارت الكتيرة والمسميات العجيبة ديك مثلاً:
    وزارة التربية والتعليم : سااااااهلة هو ذاتو الاتعلموا عملوا شنو!! ما قاعدين عطالة في ضل النيم عشان كدا انت توفر علي الاهالي شوية القريشات بتاعت القراية ومن بدري بدري العيال يبقوا عطالة وكمان يلقوا ليهم ضل يقعدوا فيهو قبال الضللة تخلص ! عشان دا كلو بشوف الوزارة دي ماليها لازمة.
    وزارة التجارة :- دي هييييييييييينة اكتر زول ممكن يكون مناسب للمنصب دا هو الزول بتاع الدكان المعذبك كل نهاية الشهر علي الاقل تضمن سكوتو وبرضو يكون موالي ومؤيد ليك .
    وزارة الزراعة :- اصلو المزراعين ديل ماقاعدين يزرعوا من زمان وعارفين شغلهم كويس والقمح راقد والفول راقد والبلح راقد يعني مافي اي مشكلة عشان كدا بشوف الوزارة دي ماليها لازمة.
    وزارة اصحاح البيئة :- اها شفتا اكتر زول مناسب هو الزول القاعد يجي يدق الباب عز النهار ويقول داير حق النفايات اها دا اكتر زول حيكون ناحج في شغلو عشان بكون عارف كل مناطق الاوساخ وكل الشوارع ويعمل نايم، وبالمرة تضمن قيلولة من دون ازعاج لناس البيت .
    وزارة الخارجية :- دا اضمن زول يكون هو ولدك !! ايوة لانو الوحيد الممكن يكون امين وحيوريك كل الدول ذات المناطق السياحية الجميلة والفنادق الفخمة والاكل الدسم يعني ما يدس عليك ،عشان بعد داك انت ممكن تحدد تمشي وين وما تمشي وين.
    وزارة المالية :- دي ما اظنها حتقلبك دي حاجة ساهلة كتير، اصلوا القروش دي مش عشان الزول يبني ويسافر ويترفه ولا عشان حاجة تانية .
    وزارة الاقتصاد:- دي حتكون من نصيب حرمكم المصون لانها بلاشك ادري بموضوع الاقتصاد ومباصرة الشهر وكدا ، وعلي الاساس دا حتكسب قاعدة نسوية كبيرة جدا جدا.
    وزارة الاستثمار :- دي بتجيب الكلام يعني اي مستثمر يجي داير يعمل حاجة يعمل ! يردم جزء من النيل مالو اصلو النيل ذاتو ماقاعد لهو زمن بدون فايدة ساي مرة لامي طلبة الجامعة تحت الشجر وهاك قطيع في النجيلة ولا ستات الشاي في كل محل ،عشان لو قلت لاي مستثمر لا تجي المعارضة وهى طبعا عندها حبايب برا وجايين يطوروا البلد تقول الريس ماداير الخير للبلد وقولة لا لا مابنحملا.
    وزارة الصحة :- دي غلبتني بخليها ليك تتعب فيها شوية.
    رابعاً:- السلطة الرابعة دي غايتو انت محظوظ فيها شديد لانو البروف جبرا قااااااااعد وهو ماغريب عارفك بتمش وين وتقعد وين يعني وهاك ياشكر ومديح تقيل .
    اما المهم شديد انو اي زول يجي يقول داير ينفصل طوالي تقول ليهو حبابك عشرة داير من وين ؟ وتديهو اها سلفا حيجي ادهو الجنوب طوالي ، وكمان خليل حيجي ادهو الغرب ، حتي ناس الشرق اديهم طوالي ، اها بعد دا حيجي مبارك ويقول ليك ياخي اديتونا حلايب الفاضية وخلا ساي انا داير الشمالية طوالي اديهو اصلا الشمالية دي زي عدمها وكمان السد فيهو مشاكل ديون ويوم توربين وقف ويوم اشتغل ، يلا بلا وجع راس.
    شفتا الحكم دا ساهل كيف لا داير حيرة ولا حك راس ، اها بعد دا مابتقدر تحكم الخرطوم؟؟؟؟؟ بس اوعي تجيب ليك مستشارين اصحابك زي ابكرون وبقية الجماعة يقوموا يحسدوك علي الخرطوم دي ، ونبقي في اغرب حاجة حسادك اجاويدك. وبالطريقة دي مبروك عليك ثلاتين سنة مش اربعة .

  17. البشاوى كتب:

    د\عزت
    لو كنت رئيسالهذا البلد والله انوم نوم العوافى – كفاية ابقى رئيس التعب لزومو شنو؟ ماهو رئيسنا تعبان ولافى كل يوم لكن ماعامل لينا حاجة – هى الكبارى دى وشوارع الظلط عاوزة رئيس كل الموضوع مقاول حرامى ومسؤول مرتشى وكل مشاريع التنمية تتنفذ- بس اخلى كلام ابكرون دة بعيد بلا حياء بلا ادب – ماقلة الادب فى والرئيس قاعد

  18. ابوالمنذر كتب:

    د/ عزت
    والله رئيس ما بطاله بس عيبها مافيها ترقيه وبعدين دايره ليها وسط هزاز ونغمه حنينه عاطفيه اصلو الشعب الامازونى ده حنين وعاطفى جدا وناس المشاريع بريحكوك ويورطوك (مشروع السودان الجديد ومشروع الصحوه ومشروع التاصيل والمشروع الحضارى و….)
    ولو عملونى رئيس بصدر قرار بتعيين الشعب كلو مستشارين ووزراء يعنى محمداحمد وزير دوله بقهوة الدبلوماسى ما اصلو كل زول عندو راى وجريده ومنتدى وموبايلين ,ورئيس الحى وحامى حقوق المهمشين ورايو قاطع وليه ما يكون رئيس والفاضى منو لتوالدالحركات المتمرده والتفاوض اللانهائى كل سته فى حته وكل جركانه فى مكانه وكل فوله وليها كياله يعنى تكيل فى الشرق تنبت فولات فى الغرب وتبقى لا كيال ولا ميال تتمنى اليخارجك وتبقى زبال(عفوا مستشار بوزارة الزباله الشعبيه)
    نجمع الوزارات والسفارات وحقول البترول والمشاريع الزراعيه وشركات التعدين والمناطق السياحيه ونقسمه على اربعين مليون وكل زول ياكل نارو

  19. عباس ركس كتب:

    سلامات يا امم :
    والله يا ابكرون انت متفائل بشكل ( قلت لي يكلم الجماعة يقول ليهم انتو شبعتو وكفاية لحدي هنا !!!) .
    حصل شفت ليك جراد قال انا شبعت وطار وخلى الخدار بي وراه ؟؟؟؟ – ما شغال طوالي يأكل ويفضي لما يشوف آخرتا شنو . شفت كيف يا سلاوي !!
    بيني بينك الخدار ما بتفات !!!!!

  20. حاج أحمد السلاوى كتب:

    يا جماعة الخير إنتو الشى الماجربتوهو ما بتقدروا تحكموا عليهو ( وما تفهمونا غلط ..بس )..
    الكرسى دا سعب خالس ولذيذ فى نفس الوقت ( يعنى فيلمين فى بروجرام واحد …إنتو ما شفتو المناظر بتاعتو …يا الكواشف ؟ ) والبضوقوا تانى ما بيخليهو لى زول تانى تب ..الصولجان والهيلمانة وناس قاعدة وناس قايمة ووفود جاية ووفود ماشة ..والريس جا ( ما قال بيجى مالو ..ما جا )والريس مشى..والريس قال سووا كدا وسووا كدا وأدوا فلان ..وما تدو فلان …دا عالم تانى .. ياناس !!
    ما شايفين الجلاكين القداااااام لسه ساكينّها وجارين وراها كيف ؟
    تقول لى قال ليك …. يا نيام ؟

  21. aflaiga كتب:

    عباس ركس : والله حبابك عديل كده وينك يا مان ؟؟
    حقيقى الخدار ما بتفات خاصة لو كان الغفير بتاع الجنينه نايم !! ولا شنو ؟ تحياتى وسلامة العوده ..

  22. ودالزبير كتب:

    عزت

    عارف الزول بيحسد الريس في الحلاق القاعد يجيهو لحدي البيت وما بيمشي الصالون ويقعد ينتظر دوره وبرضو بيحسده في إنو ما قاعد يمشي يقيف في صف الكهرباء في الرياض بعد الساعه تسعه لأنو المحل الوحيد الفاتح في العاصمه الوقت داك والناس كلها ببتذكر الكهرباء في وقت واحد والحيله الوحيده والمتمثله في إنو تنزل المره تشتري الناس نقشتها وبقى صف النسوان أطول من صف الرجال

  23. مشاكل كتب:

    سلامز

    سوعاااال سغيروووووني كدا لي ود الزبير

    انت مالك و مال الحلاق ؟؟؟؟؟؟؟؟؟

  24. ودالزبير كتب:

    مشاكلز

    اخوك اكتر زول بيمشي الحلاقه إنت قايل صلعتنا دي هينه ولا لينه بعدن انت من زمن الحلاقه البيحلق الشعر بس ياخي في حاجه اسمها صنفره وش وحاجه اسمها ساونا وش وحاجه اسمها دلك ومساج وحاجات تانيه حمياني ومال انت قايل الأتراك الكتار ديل فتحو صوالين عندنا ليها

  25. ألفاتح جبرا كتب:

    مسعول من الخير يا دكتور .. فى الصورة إنتا المدينا ضهرو اليمين وإلا الشمال ؟

  26. ألفاتح جبرا كتب:

    ما تقول ليا إنتا الكنتا قاعد تصور ذاااتك ؟ والله قلبك قوى بى شكل !

  27. عزت كتب:

    سلام يا الفاتح
    انا كنت قاعد قدام في أمان الله جو الجماعة ديل احتلوا المحلة… و أصلو أخوك هاوي تصوير قمت بالفرقة بين الاثنين السمان القاعدين ديل التقطت الصورة الاولى، قام واحد من أبين بدل سفاري ديل قال خلاص ما تصور قلت ليهو ياخ دا رئيسنا… قام ابتسم و خلاني صورت واحدة تاني..!!

    غايتو يا أخوانا من اليوم داك و أنا بأفكر لو بقيت رئيس

    أخت الشخص المناسب في المكان المناسب
    و بعد داك هو عشان مناسب افتكر حيمشي كويس بعد داك
    و طبعن دا بعد ما نشيل الحقوق المغتصبة
    ثم نقوم ندي الجماعة المناسبين ديل شوية حرية في الابتكار و الخطط و قروش عشان ينفذوا بس لازم محاسبة و متابعة و تحفيز و عقاب

    بس المشكلة الناس المناسبين ديل يتعرفوا عليهم كيف…!!

    نعمل عطاءات و الا كيف…!!

    ياخي حاجة تحير……………………….. !!

  28. حاج أحمد السلاوى كتب:

    بوعصمت ..
    أعمل ِكرِتلة ..( باقى ليك الشباب ديل بيعرفوا الكرتلة دى شنو ؟ ).
    سال سغيرووووونى كدا ( زى كل مرة ) يعنى الجماعة أبان بدل سفرى ديل ما عاوزنك تصور الرئيس عشان شنو ؟ الغريب شنو يعنى فى الموضوع ؟
    غايتو جنس غايتو وعليهم جنس كبكبة حولين الرئيس !!

  29. الصادق ود البركة كتب:

    السلام عليكم ورحمة الله وبركاته
    غايتو لو بقيت رئيس أعمل التالي:
    1ـ أعين الصادق المهدي رئيس وزراء وأديهو سنة لو ما مشى بما يرضي الله وخلى كترت الكلام أصدر قرار دولي بمنعه من تولي مناصب عامة ( طبعاً ما حا يقدر ونكون تخلصنا من وادح من الجلاكين للأبد )
    2ـ أعين محمد إبراهيم نقد وزير خارجية عشان يتعود على العيش في النور طبعاً ما حايقدر ويشماه القرار السابق ويحال للمعاش ونرتاح من الجلاكين ونواصل

  30. رفيق صلاح عبد الكريم كتب:

    ويا اللة خبر شنوة دة زغاوة بيقولو محس ونوبة بيقول اولاد عم المحس وانا ما عارف اقول شنوة بيكفى انى اقول سكوداوى لو قلنا محس حنقبوا اولاد عم الزعاوة يا خوفى بكرة ينطوة الدينكا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s