المعايير الدولية‏

Posted: الأحد,25 أبريل, 2010 by mashakel in إجتماعية, اخرى

يشغل الكثيرون أنفسهم هذه الأيام بالإنتخابات و دوشتها و كلامها الفارغ و خاصة المعارضة في موضوع مطابقة الانتخابات للمعايير الدولية .. و بنظرة سريعة للشارع السوداني نجد أن الجكس السوداني مثله مثل الإنتخابات السودانية …. لا يرقى للمعايير الدولية … و حقيقة ما عارف المراقبين الدوليين ديل بيعملوا في شنو … مش موضوع الجكس دا أهم من الانتخابات ؟؟؟ اسي لو سألوا أي شاب مين اهم .. تمشي تصوت ولا قعدة صفا مع الطبي النضيف ؟؟؟ أكيييييد الطبي النضيف ح يكتسح الموضوع زي اكتساح بيشو للانتخابات … اها المراقبين ديل بعملوا في شنو ؟؟؟

فالمقارنة بين الجكس السوداني و الانتخابات السودانية مقارنة لها اصل ثابت و مبررة بشكل كبير و ناخد بعض الأمثلة

الشفافية

فمعظم الجكس السوداني أصبح شفافا .. زي صندوق الإنتخابات
بنظرة واحدة تستطيع ان ترى ما بداخلها من حب وحنان و حاجات تانية حامياني .. و لو أمعنت النظر تستطيع أن تكشف المستور و المستخبي و تفرز الأصوات عديييييل كدا .. طبعا قاصد الصندوق
و جكسا في خط الستة

السرية

فالبنت السودانية تتميز بكتمها للأسرار .. لكن لمدة ساعة واحدة
ما بيتبلى في خشمهم حاجة… و لو عايز إشاعة تطلع ما ( إلك ) الا طريقة واحدة .. تكلم عليك موظفة بنك ولا دلالية في الحلة … زيهم و زي مفوضية الانتخابات
و في الحتة دي بالزات
انا ما بفسر و انت ما تقصر

التسجيل

المفوضية القومية للانتخابات أظهرت تقديسها للتسجيل و المسجلين .. و ماف اي زول صوت في الانتخابات الا كان مسجل من زمااااااااان .. وجه الشبه هنا وين طيب
سجل لي عرباتك انا
سجل لي الريدة
سجل لي دهب امك
و انت البلا يخمك
تقديس عجيب للتسجيل … و لكن كل زول بي همو

تصويب الخطأ

يوم انت أغلط و خلي محفظة القروش ( الجزلان ) في الدولاب
على طول تلقى اختك ولا زوجتك صححت ليك الغلط دا … كييييف .. تنشف ليك ريق الجزلان .. بس علشان انت ما تغلط تاني .. يعني تأديب و تهذيب .. ما اكتر
و المقارنة هنا تظهر لو انت مشيت و صوت لي زول تاني غير ( …… ) طواااالي تلقى ناس المفوضية صلحوا ليك الغلط بتاعك . اللي انت أكيييد ما قاصد تعملوا … بس تاني ما تغلط الغلطة دي .. مفهوم يا عبد الله دينق

  

 

 

العراء

و المقصود بالعراء هنا هو المكان الخالي
و في بعض القرى في السودان كانت مكاتب التصويت في ( السهلة ) ساااااي … زي طالب الجامعة و هو بيحنك في التلفون .. تلقاهو سارح و جاب آخر الشارع و دخل البيت و طلع السطوح او مشى مكان فاضي كدا … لو في طريقة يطلع يتكلم في القمر كان طلع .. و تلقى أمو ولا أبوهو حارسنو آخر الليل عشان يقفلو الباب … يا خلف الله .. عذبتنا

الربح

فالطبي النضيف دائما فائز … حتى ماف أي مقارنة بينو و بين المنافسين .. تسعة و تسعين في المية من الشباب عايز الطبي النضيف … ولا على كيفهم زاتو .. و ياااا حليل الكداريك .. تمشي تقع ليها في حوض من الكريمات يجيب ليها سرطانات … تلقى الوش بمممممممبي و الإيدين سوداااااء
الوش من المنشية و الإيدين من العباسية

التضليل

تلقى البنت ضاربة ليك وشها خرطمية لون .. لو لميت ليك في زميلتن ليك كدا في حفلة كدا ولا مناسبة .. اكييد ما ح تعرفها الا بعد ما تجيب الفوتوشوب و تشتغل فيه و تزيل كل الألوان و الأشكال الفي وشها
و الفنان العظيم ود الرحيمة – شبيه حمادة بت – بغني و بقول
حلبية بت النوبة
كريماتها في جيوبها

لو في زول شاف ليه شنطة طالبة جامعية ح يلقى فيها شنو غير ماكس فاكتر و الفاونديشن و البدرة و الما تعرف شنو داك
واحد اتشاكل ليه مع بت في الحافلة قال ليها

و الله اديك كف .. كل كريم يطلع رف

و التضليل في الانتخابات … ممنوع الاقتراب و التصوير

طيب الفيلم بتاع ناس الشرق صوروهو كييييف ؟؟؟ اكييييد مسرحية سيئة الإخراج
نيهااااااااع هاااااااااااااع هاااااااااااع

نحن … الله لينا

 

 

 

 

Advertisements
تعليقات
  1. nono كتب:

    مشاكوس ..

    سلامز

    شكلك غاوى مشاكل ,غاوى مشاكل؟

    جنبه يرقدعليها الجكس ده ماخلينها …

    شنوو مابراحه علي القربوووز ده؟؟

    كسره\

    انت ركزعلي الطبي ؟؟

    غايتو

    جنس

    غايتووووو

  2. aflaiga كتب:

    نونو : عليك الله صحى حماده ياتو فيهم ؟؟؟

  3. حاج أحمد السلاوى كتب:

    ولدنا الدينمو ..أفليقا ..
    أوع يكون حمادة دا هو نفسه حسن حنان بتاعك زاتو ..!!

  4. البشاوى كتب:

    ياناس مشاكل العلاقة الواضحة بين الجكس والانتخابات اللى ماكتبتها هى – الغمـــــــــــوض –

  5. حكاية كتب:

    انت مع ده كله فى اى رف
    انت معاهم ولا عليهم
    حدد لينا الوجهه عشان نقدر نحدد بالضبط انت مع منو
    يوم معانا ويوم مع الجيران ويوم مسويهم لينا حيران واتباع ويوم متعاقدين مع الشيطان
    بقى حكاية اتعاقدوا مع ابليس دى ياريت يا ولدنا مشكلجى تفسرها لينا
    مبروك الفوز لى عمك فى الانتخابات وعقبال عندك يدوك كرسى من كرسى الجماعه
    بس ما تكون لعبه كراسى ووجوه
    دمتم اعزاء للوطن ولا عزاء للمنسحبين

  6. زووووووول كتب:

    مشاكل
    غايتو يا عمك جبت الهواء منقرونوا ولميت البتاعات فى البتاع .
    لكن بينى وبينك كدا قول كه . انت ماخد بتاع على راسك ولا شنووو ؟ غايتو انت واخوك سهيل الله يكون فى عونكم (اسى الجاب سهيل شنوووو؟؟
    طيب نرجع لموضوعنا
    ناس المفوضيه (يعنى الديك زاتو ) مقتنع بى وجه الشبه انت ما شفت خلف الله ماكل قروش ست الشاى وبعد داك دايره تدينو ويا حمص عزبتنا واى جكسويه تحرص على حقها .

    كسره : ما هو وجه الشبه بين السميه والحمصيه والفوليه والعرائس زاتو .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s