أخيراً محل لبيع الشربوت بالخرطوم

Posted: الخميس,29 أبريل, 2010 by ودالزبير in اخرى

شباب

نطلع شويه من جو ساس يسوس فهو مسوس قلنا نوصف ليكم محل إكتشفته قبل يومين بيبيع الشربوت والشربوت لغير الناطقين بها هو ذلك المشروب اللذيذ الذي ننتظره من عيد أضحى لعيد أضحى وهو شراب من البلح المخمر زائد بعض البهارات.. جنزبيل ..قرنجال.. هبهان أو هيل بلغه الخليجيين وقرفه وطريقه عمله سهله جداً تقوم تغلي المويه في النار وبعد ما تغسل البلح ترميه في المويه المغليه دي وبعد داك تضيف ليهو البهارات ديك لكن خلي بالك ما أي زول بيعرف الكميات والمقادير ولازم يكون الزول عنده خبره عشان يقدر يعمل شربوت أصلي .. بعد ما تخت الحاجات دي كلها مع بعض وممكن تضيف ليها شويه خميره لو حبيت تخلي المحلول ده زي تلاته أربع أيام وبعد داك تبدأ تشرب بالهناء والشفاء .
نجي لوصف المحل وهو مطعم شعبي بيبيع الأكلات الشعبيه من قراصه وكسره بالويكه والتقليه وخلافه وإنت جاي من شارع المطار أو شارع مدني كما يسميه البعض وبعد مدارس حلويات سعد يتلقى على يدك اليمين جزاره كبيره إسمها إبن الوهاج ( التقول الزول ده متأثر بمسلسل الجوارح ) المهم قبل الملحمه دي بتلقى مطعم شعبي محاط بأشجار كثيفه ولو ما سألت ماراح تعرف إنه دي مطعم .. عمك إحتمال يكون شغال بنظريه داري على شمعتك تقيد.. تخش بتلقى المعلم سيد المطعم في الكاشير والجميل إنه عنده طلبات شربوت سفري ممكن تشرب قبلك أو تشيل في قزازه وتمشي تتطشم في البيت …. السعر يتناسب مع كل الجيوب الرياضيه

يأخي والله الزول ده ريحني في حناني …. يلا بلا شامبيون بلا فينو بلا لمه

شربتونا ولا فينو الناس

Advertisements
تعليقات
  1. عباس كتب:

    ود الزبير كيف ياخ
    ========
    لازم ساس يسوس
    عشان نستطعم ونستلز بالموضوع
    اسي يعني الجماعة الضربو كرامة الكيزان العملوها بمناسبة كبسهم للانتخابات طوالي يتوكلو علي محل شربوت وينداحوووووووووووووو

  2. Bakrey Gireis كتب:

    How am I longing for a cup of cold Sharboat. I tell you, he is a genius and this how McDonalds and KFC made their names. May be you, I, and him should go into business.
    Thanks,
    Bakrey Gireis

  3. ابكرون كتب:

    ود الزبير ممكن الواحد يشيل في كيس …؟
    وهل عندو ام فتفت ؟

  4. محنك كتب:

    لو شايلو البيت يعبوا فى كرستال شربوت

    آخر الزمن ساكت

  5. ود الزبير
    الشامبيون
    محلات الشربوت
    وبكره ما عارفين البجي جديد شنو
    زي حكاية التحايل علي الربا البنوك اللاربويه خير مثال
    أظنها الحنين للزمن داااكـ

  6. ودالزبير كتب:

    عباس

    قال ليك أسعار الخرفات طارت السماء .. غايتو العنده سمايه الأيام دي إلا يأجلها شويه … الفائزين في الإنتخابات والناجحين في مرحله الأساس … حقو منظمات حقوق الحيوان تدخل لوقف المجازر دي

  7. ودالزبير كتب:

    أبكرون

    يافرده الزول ده عنده أبو فتفت زاتو خليك من أمها بالنسبه لشيل الكيس فما بنصحك بيهو لأنو زي ماعارف الأكياس مضره بصحه الإنسان فأحسن تشيل في كريستال وكده

  8. ودالزبير كتب:

    محنك وعبدالرحمن

    شنو يا شباب ماده كله داخل في التأصيل أها مش أحسن ما نمشي نشرب ليكم عرقي …. شامبيون بالزبادي وشربوت بالسفن آب .. يأخي ده العلم إتطور بشكل

  9. عندنا واحد في الحله راسو ضارب شوية كده .. يوم شاف الجو ربيعي ومنعش مشي لابوهو وقالو .. جيب الف يا حاج خلي نسكر بيهو.. ابوهو قالو عليك الله راسك الصغير ده كباية شاي تقيله ما بتفرطقو ليك .. يلا بلا سكر معاك

    شكرا عمنا ود الزبير علي الدعوه دي وانا لو صاحب المطعم ده بديك تلاته كاسات مجان عشان اعلانك ده..

  10. حاج أحمد السلاوى كتب:

    أخونا شكسبير المكتشف العظيم ..حقو قبل الناس ما تقع فى الشربون دا وتطشم وتصطدم بالمحظور لازم نعرف حكم الشرع فى هذا المشروب الجديد .. هل يجوز إحتسائه ( حلوة إحتسائه دى ) أو تناوله بعد وجبة دسمة( بس بدون أبو فتفت بتاع عمنا أبكرونا)..
    أما ناس أغننا بحلالك أو حرامك طبعن مش مهم عندهم معرفة الفتوى إن كان كدا أو كدا ..مووووش ؟
    وكل شربوت وأنتم طاشمين !!!

  11. طارق أب أحمد كتب:

    منافس خطير لعصاير ناس داؤد و ابراهيم مالك و سيدى بيه

    لكن لو قاصد الخرطوم الخرطوم ممكن يكون دا أول محل
    إنما لو مشيت شندى لىى أهلك الجعليين حتلقا أشهر و أفضل مطاعم السمك و المشروب الملحق للوجبه و هو الشربوت
    بس أوعاك تدقس و يلصقوا ليك دبسه

  12. طارق أب أحمد كتب:

    ممكن واحد يشرح لينا أيه الفرق بين الشربوت و المريسه
    غير أنو الشربوت من البلح و المريسه من الذره
    لى دى حلال ودى حرام
    لى دى شراب هاضم و التابيه ما أكل
    ولا عشان الأولى بتاعة العرب و التانيه أكل الزنوج
    البعرفوا إنو الشربوت فى محل المريسه إسمو عسليه

  13. محنك كتب:

    طارق ابو احمد المريسة دى اشرح لينا بسوها كيف

    اما الشربوت فهو النبيذ المعروف … وقد رخص النبى صلى الله عليه وسلم لوفد بنى عبدالقيس رضى الله عنهم ان ينبذوا لثلاث ايام … ولا نبيذ بعد ثلاث ايام حينما اشتكوا ان بلادهم بارده وانهم يصنعونه من التمر ( وهم اصلا من هجر ) الاحساء حاليا بالمنطقة الشرقية ولهم آثار باقية منها مسجد جواثا وهى قرية بالاحساء … وهى اكبر المناطق انتاجا للتمر قديما حتى قالت العرب مثلا سائرا كمستبضع التمر الى هج يقابله مثل المصريين يبيع الميه فى حارة السقايين … هذا والان اجود التمر من القصيم منطقة بريدة وما جوارها وبها مهرجان التمر وابركه تمر المدينة .

    اما عجو المحس التقيل فدع العراجين ربما لو صاهرت المحس ستذوقه ولا سبيل اليه غير ذلك .

    اما المريسة فلا نعرف كيفية صنعها الا انها مسكرة وكل مسكر حرام صنعه من صنعه وشربه من شربه بغير تفرقة قبلية او دينية

  14. aflaiga كتب:

    ود الزبير : اقعد اتحاوم كده لمن مره تلاقى ليك محل هناى ..
    الفرق بين الشربوت والمريسه فرق تركيز على وزن جمع تكسير . اما الفرق بين العرقى والمريسه فهو مثل شحن البطارية البطيئ والسريع فى التنجر فشحن البطئ بيمسك بطئ وبيفك بطئ وشحن السريع بيمسك سريع ويفك سريع ودوما يستخدم شحن السريع لتدوير العربات الجاهزه البتقوم من نقره وحده اما شحن البطئ فيستخدم عادة لعربات الجاز حيث تحتاج لمعافره فى التدوير لانو الجاز وسخ زى ما عارفين ..
    اما فقهيا فقد جاء احد الاعراب لمدينة العلم سيدنا على وكان سكيرا ويعتقد بحلال السكر فدار الحوار التالى بينه وبين سيدنا على :
    سيدنا على : ما فهمك فى الخمر ؟؟
    الاعرابى : ارايت لو انى شبت ماءا فهل فى ذلك شبهه ؟؟
    سيدنا على : لا ذلك حلال طيب .
    الاعرابى : اذن ارايت لو انى اكلت تمرا فهل فى ذلك حرمه ؟؟
    سيدنا على : لا ذاك حلال طيب ؟
    الاعرابى : ارايت لو انى بللت التمر بالماء وشربت ماءه فهل فى ذلك حرمه ؟؟
    سيدنا على : لا والله حلال طيب .
    الاعرابى : ارايت لو تركت التمر فى الماء حتى تخمر وشربته فهل فى ذلك شبهه ؟؟
    سيدنا على : ارايت لو انى سكبت على راسك ماء فهل يؤذيك ؟؟
    الاعرابى : لا والله .
    سيدنا على : اورايت لوانى اهلت على راسك ترابا فهل يؤذيك ؟؟
    الاعرابى : لا والله .
    سيدنا على : ارايت لو انى خلطت الماء بالتراب وصار طينا والقيته على راسك فهل يؤذيك ؟؟
    الاعرابى : لا والله .
    سيدنا على : ارايت لو انى تركت الخليط حتى يجف فصار طوبا وضربته بك فى راسك فهل يؤذيك ؟؟
    الاعرابى : اى والله انه لمؤذ جدا .
    سيدنا على : فهذا من ذاك واقام عليه الحد ..

    وما اسكر قليله فكثيره مسكر ولا شنو يا ود الخلا ؟؟؟

  15. ودالزبير كتب:

    محنك

    يأخي شكراًعلى المعلومات الثره بخصوص التمر ومناطق الأحساء
    عباس الزكيابي

    بالله مش إعلان مجاني أستحق عليهو عبوه كريستال كبيره

    السلاوي

    الحكم الشرعي ما أظنه يخفي عليك ما أسكر قليله فكثيره حرام والحلال بين والحرام بين وبينهما أمور متشابهات

    طارق

    أها خلاص داير تقلب لينا صراع ولاد بلد وولاد ……

    بتعرف البقنيه والميس ولو ما بتعرفهم أسأل ابكرون

    أفليقا

    يأخي قصه سيدنا علي كرم الله وجهه مبالغه لكن

    بعدين يأفليقا في حوامتنا دي لو لقينا محل ( هناي ) ما راح نجي نوريكم لأن الناس شركاء في خمسه (5)

  16. aflaiga كتب:

    ود الزبير : هو عليك الله سموهو مدينة العمل ليه ما عشان كده ( ما تقولو افليقا شيعى كمان ) !! كرم الله وجهه ورضى عنه وارضاه وعلى اله الابرار الطيبين اهل بيت رسول الله اشرف بيوت العالمين .
    قلت لى الناس شركاء فى خمسه – معقول الناس كلها شركاء فى خمسه وحده بس ؟؟؟ انت اكيد امبارح كنت فى المحل بتاع الشربوت وتقلت العيار شوية ؟؟؟

  17. ابكرون كتب:

    يا ساده عندنا في ارض المحس الشربوت ده شراب النسوان والصبيان لان نسبة الكحول فيه تكاد تكون صفر ….. اما الرجال من 18 سنه لحدي السلاوي ديل عندهم (الدكاي) وهو مرحلة متقدمة من الشربوت يترك ليتخمر طبيعيا دون اضافات خمائر وكده واحيانا يدفن ليتعتق وهو مسكر جدا ومغذي برضو ولا تشربه النساء الا الموالي

  18. ودالزبير كتب:

    ابكرون

    موالي يعني شنو ( وش مسهبل )

  19. aflaiga كتب:

    ابكرون : اوع توريهو الموالى يعنى شنو ؟؟ يقوم يطلع ليك ميثاق روما المنبثق من اتفاقية سيداو المعدله عن قانون هيثرو النسخه المطابقه للماده ما ملكت ايمانكم !! نقول ليهم نحنا كنا ملوك وعندنا بتاع يقولو ليك البتاع مش حرمو الهناى ؟؟
    بالنسبه استثناء الموالين من شرب الدكاى فده فيهو سببين حسب علمى البسيط باضابير المملكه النوبيه الاخيره :
    الاول مادى وهو ان اجسام الموالين حسب قانون التوالى لا تتاثر سلبا بالدكاى فى حدود تفاعلاته العادية .
    القانى معنوى وهو لتوثيق التفاعل بين رجال الشريحه أ ونساء الشريحه ب لا بد من النزول الى منطقه وسطى بين الجنة والنار وبعدها اختارى او لا تختارى وهوى يا ليلا … يا ليلا هوى ولا شنو يا اب احمد ؟؟؟

  20. ودالزبير كتب:

    أصلاً أنا متأكد إنكم يا نوبيون من زمن الموالي جايبين لينا الكلام مع الجماعه ديك … وأنا ما بفسر وإنتو ما بتقصروا…

  21. aflaiga كتب:

    مشهد سغنتوتى : افتتاح الدكاى :
    صحوت ذلك اليوم على حركة غير طبيعية فى المنزل الجميع كانو يتحركون بنشاط وهمه ايقظنى ابى بلكزه قوية ناهرا ( النايم ليها شنو الحقنا فى بيت ناس اابدول حيفتحو دكايم الليله ) لم اتبين معنى الحديث بيد انى فهمت ان هناك امر جلل ومسرح حدوثه هو منزل اابدول – توجهت بكسل للمنزل وشهدت من الخارج جلبه كبرى واصوات تتعالى هنا وهناك بعضها بالرطانه والاخر بعربية غير سليمه خليط بالرطانه – احد الشيوخ ويدعى عوض تبد صاح فى اابدول يلا يا عمك افتح ورينا قبل القراصه تبرد – يقينى ان ترجمة الرطانه لن تكون مصيبه للمعانى التى تقال لكن لا سبيل الى النقل الا عبر الترجمه الحرفيه – بدات القراريص تنهال على المفارش الارضية التى ارتصت فيها مجموعات من الرجال مكونه من اربعه فما فوق القراصه عندهم عباره عن كتله من العجين لا يمكنك لاصابعك ان تلامس نهاية الصحن الا بمشقه اعلى القراريص واسفلها يرقد ملاح كثيف السماكه يسمى بالتركين او الملوحه سمه ما شئت فهو فى النهاية خلاصة لاسماك لن يعطيك احد تاريخ دقيق لزمن اصطيادها او فترة تخميرها او طريقة صنعها لكنها فى النهاية خليط لذيذ يعجب الصناع والاكيله – نعود لفتح الدكاى الذى اهتمو به اكثر من اهتمام احد السلفيه بفتح البارى !! توجه اابدول لاحدى الاركان فى المنزل ومال نحو الارض والتقط شيئا يمكنك تسميته بزير مسخوط او قلة مرضى عليها !! كانت قطرات الندى تبلل الزير من الخارج وتتوازى مع انهمار لعاب المنتظرين للمشروب الذى بادخل القله – سمعت احدهم يتحدث عن ان اابدول دافن دكايو منذ وفاة سكينه التى يمر اليوم ذكرى وفاتها الاول اى عام بالتمام والكمال ولعمرى ان سكينه لم تبق من جسدها اكثر مما تبقى من هذا المشروب بعد النز والندى المنسكب من بين مسامات الزير ولعمرى ان جسد سكينه قد تخمر ربع مره من قدر تخمير هذا المشروب !! بعد قليل كانت الاكواب تتناقل بين الجمع مع عبارات الاطراء والثناء على دكاى اابدول – كما قال ابكرون لم يكن يسمح للاطفال بالتناول الا بقدر ما تختطفه ايادى بعض الشواطين منهم او معتادى الدكاى وغيره من المشروبات عندما يكون هناك حفل صاخب فى الشرق ..
    قد نعود …

  22. محنك كتب:

    نحن محتجين فى التفرقة بين الشربوت الحلال والمريسة الحرام ولون واشكال العباد … تجى تجيب لينا موالى يا ابكرون … ( يهدوا فيه من الطشيش بيت بره ) …

    ابواحمد
    لما المريسة بسووها ناس كده البشربها منو

  23. بشار أحمد بشار (ابن برد) كتب:

    “ولا تشربه النساء الا الموالي”
    ومن هن الموالي أيها القعقاع بن صعصة؟؟ هل تقصد سبايا الروم؟؟

  24. طارق أب أحمد كتب:

    يا حنك دى يشربوها براهم نحنا ناس بلح و سمسم ساى
    بالمناسبه مافى زول جاب سيرة الكانجى مورو ياخى دا كان تشرب منو عبار جلدك ينز زيت سمسم اليوم كلو

  25. طارق أب أحمد كتب:

    Bakrey Gireis
    How am I longing for a cup of cold Sharboat. I tell you, he is a genius and this how McDonalds and KFC made their names. May be you, I, and him should go into business.
    Thanks,
    Bakrey Gireis
    مسكاقرو
    من الأسم واضح إنو بكرى جريس من أسرة جريس الحلفاويه العريقه
    مرهبتين و خليك مواصل

  26. رامي كتب:

    يا خوانا مداخلة بسيطة اظنكم شربتو الشربوت دا واختلط عليكم القول

    الصحيح هو ما كان كثيره مسكر فقليله حرام والله اعلم

  27. حاج أحمد السلاوى كتب:

    أخونا / ولدنا رامى ..سلام
    السؤال الهام وعاوز إجابة شافية من أهل العلم والدراية بأنواع المشروبات المختلفة بداً من شامبيون وإنتهاءاً بالشربوت ..هل الشربوت شراب مُسُكر أم لا ؟ مع إيماننا وتصديقنا التام على الحديث ما كان كثير مسكر فقليله حرام…العارف يرفع إيده !!! وأعتقد ان دهاقنة الكواشف وخصوصاً العسكريين منهم ( مش كلهم ..عشان نطلع من دائرة التعميم..ولكن نسبة كبيرة !) لديهم الكثير ما يمكن قوله فى المودوع ..مش ؟
    -ولدنا رامى .. نسينا نرحب بيك ونتمنى ليك إقامة طيبة فى المنتدى وإن شاء الله تلقا الفى مرادك..أما الأسئلة البتسل الروح حأخليها للمرة الجاية أو للفكى ابكرونا يقوم بالمهمة ..!

  28. DAKEEN كتب:

    المشروبات دي كلها من عندنا وما في دولة بتعرف المسميات دي والبلد ماشة في طريق العولمة والعلمانية ولازم نسجل براءات اختراع للمشاريب.
    السؤال :
    انو لو المشاريب عملنا ليها براءة اختراع وفي شركات عايزة تنتجها تجاري … العائد المادي حايعود لمين؟
    السؤال المهم . معنى الحديث عاصرها ومعتصرها … دا بيدخل فيه حكم بيع براءة الاختراع دون التدخل في عملية الانتاج والاستفادة فقط من حق الاسم .?
    ولو فرضنا انه تم الانتاج التجاري وانتشر الاسم عالميا زي – هانيكان – في اثم على صاحب الفورمولا . ولا حا تتبناه الشركات البتورد حق الاسم لصندوق دعم
    Pay – Every- Pens- Safe- Israel
    ولالوب بلدنا ولا تمر الناس
    في رحلة عمل لمدينة واو في ديسمير 2009 زت من خلالها مدينة اويل وما جاورها استمتعت بها جدا ، على الصعيد النفسي والطيبعة فقط …. ولم تتخلها اي نشاطات اخرى ،،، عرفت ليك قروش موظفي المنظمات والعساكر بتمشي وين فاخوانا الحبش هناك بالهبل مش براهم معاهم ناس يوغندا وكينيا ونيجيريا بارات فيها كل المستوردات والمسجلة عالميا فنادق من قطية الى خمس نجوم وفيها ما لا تحمد عقباه .
    الخدمة كلها اجانب وابناء البلد بس شغالين بيع بنقو وسيكو ومريسة والربنا بكرمه بي قرشين بعمل زيارة للجماعة الاجانب ديل في فنادقم المتواضعة بحترموه ويكرموه وينضفوا جيبه تمام ويفكوه بس يقولوا ليه الشهر الجاي ما تتاخر.

    —- في المستشفى المركزي في مدينة واو 60 % من الحالات ايدز اكرمكم الله —-.

  29. التركــــى كتب:

    ياخوانا شنو غبنا اسبوعين جينا لقيناكم ماخليت قطرة شربوت حايمة …. بس ياود الزبير الشربوت الببيت يومين تلاتة بودوهو وين ؟ … لو كلمتنى قبل الأعلان دا كان عرفتو ليك هسع يكون الجماعة يكون ماقادرين يلحقو الطلبات وقلت ليا فى سفرى كمان … ووالله مشتاقوووووووووون للجميع

  30. ودالزبير كتب:

    التركي

    حباب الطله وجزاك الله خير رجعتني تاني لموضوع الشربوت الفاتني أرحب فيهو بالأقلام الجديده رامي وBakrey Gireis والحمد لله السلاوي وأب أحمد قاموا بالواجي وزياده كمان …
    دكين قلت لي الجماعه هناك شغالين طشم صاح .. حباب الإنفصال

  31. حاج أحمد السلاوى كتب:

    حكى لى أحد الأصدقاء الذين عملوا فى جنوب السودان بالتدريس فىى الزمان الفائت وفى بداية عمله هناك لاحظ أن مجموعة من تلاميذه الصغار كانوا يأتون صباحاً إلى المدرسة وهم مولعين علآخرمن المريسة ..ما شايفين قدامهم ..فقال لأكثرهم طشمة لازم ولى امرك ( ابوك ) يجى معاك المدرسة ..وفى صباح اليوم التالى أتى والد التلميذ الصغير وكا مولع زى ولده ..فقال له الأستاذ ولد دا كل يوم جايى المدرسة سكران طينة ..أيه الحكاية ؟ لازم تادبه وتشوفه بيمشى يسكر وين وتخلى بالك منه .. هنا رد عليه وللى الأمر .. يعنى إنت عاوز الولد يروح المدرسة من غير فطور ؟؟
    تقول لى شربوت ؟؟

  32. aflaiga كتب:

    ود الزبير : فى بدايات الاختلاف حول وضعية العاصمه القوميه من حيث الشريعه او العلمانيه احد الظرفاء اقترح بان تكون مدينة توتى مخصصه كمدينه علمانيه باعتبارها جزيره ولو الله رايد للشريبه عقاب حيغرقم فى البحر ولو ما رايد ليهم عقاب حيستمتعو بالطشمه على الشاطئ وعلى الاقل الزول ممكن يسكر فى توتى ويقطع البحر بالفلوكه ويقعد يغسل وشو من موية النيل لمن يصل بتكون فكت شويه !!!! شفت كيف ؟؟
    اما الجنوب فالبارات فيه على قفا من يشيل وفى زيارتى الاخيره مشيت كافتيريا لاحباش وقربت اغلط فى العبوه الحديديه انا قايلو بيبسى دايت طلع دايت لمن فايت حدو !! لمن قمت من التربيزه مهجوم الحبشيه قالت لى مالك اتفاجات ولا شنو ؟؟ قلت ليها ابدا والله بس زمان كنا بنشوف القصص دى بتدس فى كم الجلابيه ولا تتسرج فى القاش مع البنطلون لكن عينى عينك كده حقيقى اتفاجات !! اعتقد انه لو حدث انفصال لا قدر الله فستكون هناك زيارات بالكوم لمواطنى الشمال لدولة الجنوب الشقيق بغرض السياحه وبدل التهريب يجى من ارتريا حيجى من الجنوب وكلها كم كيلو يعنى تقصير للظل الادارى وكده !!
    اللهم لا تجعل وحدتنا على حساب ديننا وامننا ولا تجعل انفصالنا على حساب اخواننا الذين لا يملكون امرهم ونحبهم ويحبوننا يا قادر يا مقتدر …
    ابكرون عليك الله قول امين

  33. ortashi كتب:

    ياود الزبير
    الشربوت دي كلمة الاولي شر والتانيه بوت هنا الجاب العربي مع الاجليزي شنو و خليك من الفتوي معروفة ما فتوة السارق معروفة سمعت ليك بي زول وبلدنا سرق خمسين مليون دولار دخلوه السجن ما قالو خليناه لي الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s