لست كاملا … لكين ما ممكن

Posted: الثلاثاء,4 مايو, 2010 by عزت in اخرى

اشتهر الألمان بالدقة و الانضباط في أشياء كثيرة ربما تفوت علينا نحن ناس العالم التالت ديل و لا نستطيع أن نجاريهم فيها غالبا في أول أيامك معاهم انت كنت مبعوثا و الا جابتك الظروف و قريت في جامعاتهم و الا اشتغلت عندهم و يعتزون بلغتهم خالس خالس و لا ينجدونك الا تقول (الروب) ان احتجت لمساعدة في متجر و الا قطر و حتى بعد نجدتك يسألونك لماذا تعرف الانجليزي و لا تعرف الألماني و يبدلجون لك الأفلام في التلفزيون و يخلوا سهير رمزي تردح في الشارع بالألماني و فؤاد المهندس يضحك بالألماني برضو….

فكم من مرة نبهني واحد ما عندو علاقة بالحي الذي كنا نسكن فيه عندما أعمل شورت كت و أقطع لي ميدان نجيلة…. فهو بتبيهه هذا قد أرسل رسالة لآجنبي قطع شك سوف يفكر و يعاين مرتين قبل ما يقطع و الا في الآخر تقوم تنسى العملية و تمشي محل ما الألمان بيمشو… و مرات تستعجب لتصرفهم فقد كان أمامي مرة واحد ألماني عاوز يخش لي حتة كتب على بابها أغلق الباب من فضلك و كان الباب مفتوحا لحظتها… تخيل (أنقر) ما قفل الباب و قام تاني فتحوا و دخلني معاهو و قام قفلوا…. فبكدة اداني درس حتى و لو غيرك غلط يستحسن أن تصلح غلطه في الأول عشان ما تغلط “زيو”….. عموما كانت تجارب ثرة عشتها معهم أبان (قرايتي) معاهم و غيرها كثير من المواقف و التي أكيد أفادتني جدا و لكنها أيضا عكننت علي حياتي و جعلتني الاحظ لكل شئ مهما كان صغيرا…..

هسة عليكم الله البلكونة السغيرة التحت دي يقعدوا فيها كيف

و الا البتاعة التحت دي يستعملوها اثنين كيف

نرجع لي موضوعنا….. قبل فترة كانت هناك واحدة زي ما بقولوا كاسره فيي ضلع و كنت معجبا بها شدييييييييييييييد و يكاد قلبي يقفز من محلو لمن أشوفا و لليوم داك ما جات فرصة و لا قدرت أتكلم معاها… فالشاهد انها كاملة من كل شئ… لون و عيون و قوام و أكبر شوية من عمر الزهور و كنت أعمل في مكان نتلاقى فيه يا في الممر و الا في السلم و الا هي مارقه و أنا داخل و بالعكس…الى أن جاء ذلك اليوم و كنت في الكافتيريا جالسا آكل في الفول و جنبي كباية الموية أصلوا الفول بالصباح ما بتبلع مرات الا بالموية و جاءت مع صاحباتها للفطور و جلسوا في تربيزة أمامي مباشرة و يا للهول (مقبلة) عديل ناحيتي… فبلعت اللقمة التي قربت تخنقني بقليل من الماء و طفقت آكل أكل الحمام… تخيل جات صاحبتهم التانية الظاهر الكانت بتظبط في الفتة و وضعت طشت صغير أمامهم ملئ (بالبوش) لحد هنا كويسين… و كل مرة أحاول أن أغض طرفي لكن ابليس شاطر و ليته لم يفعل ذلك اليوم ففي اللحظة التي رفعت فيها عيني شاهدتها و هي تخرج لسانها كلو كالضفدعة لتقلب اللقمة بتاعة الفول الى الداخل… هالني الموضوع و تركت الفول و قمت جاري… لليلة.

لم يكن الخطيب أكثر حظا مني أيضا اذ يبدو و أنه خلال المعاينات الأولى و الثانية و لحد ما خطب لم يلاحظ سوى الدعة و الجمال و حسن الأخلاق و الذوق و الابتسامات العذبة و لكن يبدو و أن الطبع غلاب فكثير من الخطاب لم يستمروا بعد الزواج لأسباب تظهر لاحقا كأن يطلع الراجل بيسف سعوط و الا بتاع (شربة) و لا ما قاعد يقفل أنبوب معجون الأسنان بعد ما يستعملوا و الا البنية يطلع صوتا عالي و الا أمها (صعبة) و هكذا و لكن (الخطيب بتاعنا هنا) كان ما زال في البر و هو خاطب أستطاع أن يخرج بها و يعزمها في فندق و جابو ا الشاي الماخمج و بمعيته صحن به قطعا من الكيك و الجاتوه… و في غمرة ونستهم و سعادتهم (غمست) الخطيبة الجاتوه في الشاي حركة عادية كلنا بنعملا بس بي كيك ناشف و الا منين و  الا  بسكويتة عل جاتوه يبدو أنو دي ما أدوها ليهو من قبل… ففسخ الخطوبة…!!

و عشان ما تقولوا ركزت على البنات فقط، ليس حبا في ابراز عيوبهم و لكن قطع شك هناك من العيوب الكثير التي يمكن أن تؤلف بها كتبا عن عيوبنا نحن الرجال و لكن الشطار هم من يستطيعوا عمل الموازنة و التوافق و يمشو لي قدام…… و الا موووووووش

Advertisements
تعليقات
  1. ودالزبير كتب:

    يا مرطب

    ده موضوعين في موضوع وأحد ولا كيف ؟؟؟ ولا يعني الكسره بتاعت ألمانيا ديك كانت لزوم لمدخل لحاجاتنا الغريبه .. عموماً أخوك سمع قصه الجاتوه بالقلبه قبل ده وقالوا إنها فسخت الخطوبه لمن شافت الخطيب بيغمس الزلابيه في الشاي

  2. خالد مدني كتب:

    والللللليله … انا بغمس الزلابية في الشاي وبتمسح بالزيت بتاعها .

  3. ودالزبير كتب:

    خالد

    إنت بعد ده ممكن تخش جوي الكبايه زاتها ولمن تشرب تتكرع ما خلاص سيك سيك معلق فيك !!! كان زمان توريها الكلام ده بعد ده تعمل ليك شنو ؟؟؟ إلا تبدلك مع بتاع العده

  4. حاج أحمد السلاوى كتب:

    ابو عصمت المرطب .
    مالك علينا الليلة عاوز تقلب علينا المواجع وتذكرنا الزمن الجميل داااااااك ..بجيك راجع برواقة وطولة بال !!!

    – ودالمدنى … بتغمس الزلابية فى الشاى وبتشرب الزيت ولاّ كككككيف ؟

  5. خالد مدني كتب:

    ود الزبير … بتاع العده ما اباني شكيتو لي الله .
    يا الحاج سلولو انا بشرب الشاي لكن الزلابية بتكون عملت ليها طبقة زيت عايمه في وش الشاي تكاد تكون اتقل من طبقة الزيت الحايمة في سواحل امريكا الايام دي .
    كسرة : اوع يكون في زول بشرب في شاي وبيقرا كلامي ده .

  6. ودالزبير كتب:

    أنا بشرب في شربوت لكن فيهو طبقه عايمه ماقدرت أعرفها؟؟؟؟

  7. aflaiga كتب:

    د . عزت
    حمد الله على السلامه .. تانى جيت للبتاع والبتاعه ؟؟
    وانت خفت من طول لسانا كطول ولا كعرض ؟؟ لانو بيفرق ولا الطول هنا توريه ؟؟ هو اذا كان طويل فى الفول معناتا طويل فى الطعميه ولا شنو ؟؟؟هههههههه
    تعرف يا دكتور عزت انا اول يوم فى الفندق صاحب الفندق زول فرده اسمو كركبه قام دق لى الباب بعد خمسه دقائق من دخلنا انا وسمسمه وقال لى :
    كركبه : شو يا افليقا اول حاجه انا ظبطت ليك فى التلاجه قزازه معتبره من عوضية واصرت ما تشيل منى قروش قالت لى افليقا ده ما ولدنا حبيبنا لازم نجاملو عشان يرفع راس امبده كلها – اها اوع تكون دسيت منها التمباك اى شيئ ولا الدس دس لو ما عندك كيس هاك الكيس ده من النو امدرمان وبرضو عثمان البياع قال لى ده منى هدية لافليقا عشان يرفع راسنا – وبتلقى ورا التلفزيون سجاره هوا معتبره من عمك درابه وبرضو ابى يشيل منى قال لى افليقا ولدنا وود حلتنا ولازم نقيف معاهو ويرفع راسنا – المهم يا فرده خش طقطق المناظر دى عادى جدا قداما وما تخاف ديل لازم من اولا يوروهم العين الحمرا وترفع راسنا كويس ؟؟
    افليقا : اسى يا كركبه انا بعد اضرب هدية عوضية وهدية عثمان وهدية درابه راسى بقدر ارفعو خلى راسكم ؟؟؟
    هههههه
    غايتو يا عزت عندك جنس محن
    اسى تلقى قريبتى بتقول بركه الطلع لسانا طويل !!!

  8. aflaiga كتب:

    عزت بالنسبه للبتاعه التحت والراى بشان استعمالا فان احسن التوصيفات للاستعمال هو ان يتم عمل درب خارجى لتلافى تداخل الاختصاصات ولتقصير الظل الادارى ومنع الترهل الوظيفى !!!
    اما بالنسبه للبلكونه التحت الفوق فاعتقد انو دى عباره عن نقاع للبلكونه الفوق زى نقاع الزير عشان لمن تتملى يدفقوها وما تكب فى البدرون !!!
    لكن احتمال برضو يا عزت البتاعه التانيه دى فاملى يعنى للاستعمال الاسرى !! نظام تربيزه 4 كراسى للاسره وكل عام وانتم بخير …
    الله يجازى محن مواضيعك

  9. البشاوى كتب:

    دوك عزت
    سلام ياترطيبة دايما تنكت مواضيع تخلى السلاوى يتحسس مسدسه – اما مقالب الخطوبة التى لاتكتشف الا بعد العرس دى دايرة ليها قعدة بى شاى وزلابية بمناسبة العودة من باكستان اعملا سريع عشان انا ماشى اجيب ام المؤمنين والمؤمنين – موقف فى اول يوم زواج — نزلت فى الفندق وكان وقت صلاة العشاء فتوضيت وبدأت الصلاة خارج الغرفة وحدى فإذا واحد أخونا مصرى لحقنى يصلى معاى فكنت أقرأ سورة ( الزلزلة) وبعد الصلاة قال لى ايه ياعم انت داخل شهر عسل ولا جاى تعمل تفجيرات فى فندقنا ؟مش تشوف لك سورة مافيهاش الكلام الصعب دة –
    حقيقى موضوع يفتح نفاج الذكريات – فلينداح الكواشف ويقدموا لينا عجائب ايام الخطوبة وغرائب مابعدالزواج
    ولعمرى ان جبرا+ السلاوى + ابكرون +نيام+سنكل+كاتب الموضوع +افليقا – عندهم الكثير المثير الخطر والمضحك لحد البكاء – ولنا عودة —-

  10. حاج أحمد السلاوى كتب:

    أخونا بشبش ..
    يا خ إنت بتاع مشاكل ..وعاوز تجيب لينا الهوا الصعب مالك .. حسه الجاب سيرة ايام الخطوبة و غرائب ما بعد الزواج هنا شنو ؟ ما تخليها مستورة ..ولاّ ست النفر !!!
    أول موقف طريف ومحرج فى نفس الوقت حصل لى بعد الزواج مباشرة وكنت حاجز للسفر لقضاء شهر العسل مع اخى المقيم فى ألمانيا … إنتهت مراسم الزواج من أم المؤمنين وبعد قضينا يومين فى الفندق( للراحة والإستجمام ) جاء شقيقى الأصغر لتوصيلنا إلى المطار صباحاً وهناك كانت المفاجأة فقد إكتشفت أن الحجز هو صباح اليوم التالى وليس نفس اليوم الذى نحن فيه ..واسقط فى يدى .. طيب وإيش الحل ؟ معقول نرجع الفندق تااااانى ؟فتوكلنا على الحى الدايم حملنا أغراضنا وذهبت العروس إلى بيت اهلها ( ما بعيدين …كانوا جيراننا .. الحيطة بالحيطة) وذهبت أنا إلى بيتنا وسط ضحكات الأهل من أهل العروس واهلى والتعليقات اللاذعة ..وكل زول رجع إلى قواعده سالماً وبات عند أهله … حتى صباح اليوم التالى ..ودى كانت البداية !!
    بشبش .. كفاية ولاّ أزيدك من جنس هيك حكاوى ومواقف ..؟
    وقالوا على شقى ومجنون …

  11. سهيل كتب:

    حمدلله على السلامه عزت .. وسلام للحلوين جميع ..

    د.عزت : إنت باقي ممكون خلاسس .. وكل ما تسافر بره و تجي .. تتمكن زياده

    افليقا : شكلك كده رفعت حاجه تانيه غير راس امبده .. قال درابه قال

    اخونا البشاوي : يا حليلك ( اسد الله البيضرع – سابقآ).. خلاص امر التحرك صدر ..

    جدي سلولو: إنت كنت بتهبب في شنو لما ما تعرف سفرك بكره ولا بعدو ؟؟ غايتو جنس غايتو .. طاشي شبكه بمزاجو ..

  12. عزت كتب:

    الأحباب سلام
    و مروركم أثلج صدرنا مثلما تلجت الواطة ذلك اليوم …..

    لكم من محطاتي و عندما تزوجت:

    أخبرت الألمان بعد مضي ستة شهور بأنني قد تزوجت و سوف تحضر هنا في درسدن، فقاموا بتهيئة غرفتي و زودها بسرير اضافي و لكنهم عبروا عن دهشتهم كيف يكون لك زوجة هناك في السودان و انت جيت عذابي … طبعا أخد مني التفسير وقتا لعدم معرفتهم بأن في بلادنا يمكن أن ترسل لك زوجة لم تشارك في الوقوف معها أمام المأذون كما يفعلون في الكنيسة مع قسيسها و نسمي تلك الحالة (بالتطريد) طريقة تتحاشى الكثير من البنات اعتمادها فكلهم يحلمون بالعريس الذي يقابلها في الكوافير، و يتصور معاها في الاستديو و يدفع تكلفة تسريحتها و لكم واحدة من وصيفاتها و يتعرق في داخل غرفة التصوير الملتهبة بحرارة اللمبات الكاشفة و حرارة الموقف و يركب في السيارة بقربها و ينزل معها وسط بيت اللعبة مبشرا و مسلما على الجميع ثم مبشرا من فوق كتف اصدقائه عندما يصرون برفعه في اكتافهم.

    نواصل

  13. حاج أحمد السلاوى كتب:

    أبو عصمت …يعنى لا ضقت الضريرة ولا سويت الحريرة …غايتو فاتتك حاجات كتيرة..معليش الجابات أكتر من الرايحات ..
    أنا اعتقد إنو طقوس الزواج السودانى جميلة .. القديمة منها طبعن ولا تتعارض مع الشرع الحنيف ( عشان ما تفهمونا غلط ) طبعن فى حاجات كدا وحاجات كدا ( اصبع فوق )وأجمل اللحظات هى حنة العريس وحولك أمكو خالاتك وعماتك واخواتك وبقية الأهل واصحابك وإنت قاعد ملك وهات يا غنا والعديل والزين ويا عديلة الله … أنا شخصياً إستمتعت بالحتة دى خالس وما أنساها ابداً .ز
    ونقول للشباب ديل .. إن شاء الله الماضاقوا يضوقوا ( بدون تأويل .. العرس طبعن )والعاوز يدبل من الكواشف برضو ما فى مانع ..مثنى وثلاث ورباع ..!!
    نرجع بيك للبوست يا أبو عصمت …وسيرة وانفتحت زى ما بيقولوا أخواننا اللبنانيين .. الألمان ديل شعب راقى فعلاً ويختلفوا فى حاجات كتيييرة عن بقية شعوب القارة الأوربية ..عندهم كمية هائلة من الصدق فى تعاملهم اليومى وكما قال الدكتور طه حسين عن الفرنسيين ..ناس يطبقون تعاليم الإسلام ولا يدرون أن هذه هى تعاليم إسلامية يجب إتباعها ..إحترام الإنسان لأخيه الإنسان .. إحترام الوقت .. الصدق .. الأمانة ..حب العمل وإتقانه..وأذكر أن أحدهم قال لى الناس تشتغل عشان تعيش لاكين نحنا نعيش عشان نشتغل..ما فيش لف ولا دوران ..غايتو لو الأوربيين ديل أسلموا نحنا يبقا حقنا راح .. مش حنلم لا دنيا ولا آخرة ..ونسأل الله حسن الخاتمة بعد كدا !!أوروبا اليوم خِربت لأنو دخلوها الأعراب والمسلمين من كل حدب وصوب وعاثوا فيها فساداً وخصوصاً انصاف المسلمين الذين أساءوا إلى الإسلام والمسلمين بتصرفاتهم التى ليس لها من الدين نصيب ..فكل من حفظ ثلاث أحاديث صار مفتياً فى أمور المسلمين ..أما كان الأجدر بهم توعية إخوانهم المسلمين فى أوطانهم ثم بعد ذلك الخروج إلى العالم الخارجى ؟
    طبعن كان لدى كمية هائلة من الصور التذكارية فى بلاد الفوهرر هتلر ولكن تمت مصادرتها بواسطة أم المؤمنين عواطفنا ولا أدرى فى أى كرتونة هى الآن ..ولو أتيحت لنا فرصة الحصول عليها للإطلاع عليها .. يا ريت !!!بس وين من الحرس الجمهورى دا العامل عليها كردون سلاح ؟

  14. DAKEEN كتب:

    ما فهمنا حاجة :
    الالمان – والبلكونة ديل ما بعرفهم – والداهية التانية دي ما عرفتها غايتو شفت حاجة بتشبها في الشفخانة زمان لما نشيل دفتر العيادة والحكيم يكتب لينا متصنعين وناخد علقة من الناظر ،،، ونكتب بيت الشعر او القسيدة الف مرة عشان غلطنا في التسميع ولا الكلمة الفين مرة عشان غلطنا في الاملاء وبصراحة يا اخوانا من مما فارقت القراية مش الدراسة – القراية يعني قراية الجرايد والكتب والمجلات وخشيت في الداهي الاسموا الكمبيوتر بدات ذاكرتي تضعف ونسيت التهجي بتاع بعض الكلمات والله يستر ما ننسي كيف نكتب اسمنا ولا نقول لي زول اقراأ لينا الواو الضكر دي …

  15. aflaiga كتب:

    السلاوى : الله يضوقك معانا . ما يضوقنا معاك لانو انت حتضوق اللى عمرك ما ضقتو زى روتانا سينما .
    بالنسبه للصور الفى الكرتونه
    بكلم ليك امونه
    يمكن يوم تفكها فى رفقه مامونه
    بالنسبه للصور فممكن تعمل برنامج النفط مقابل الغذاء يعنى ترسل كرتونه بتاعة اى حاجه بتهم عواطف وتستلم الكرتونه الجوه قلبى مدفونه يا ناس !!
    او ممكن تستعين بطرف تالت يستلم الكرتونه بتعهد انو يتم عرض المحتويات لاغراض التدريب فقط واخذ العبره وتكتب فى الكرتونه بى بره :
    خذو عبرتكم من جدكم السلاوى
    اما خلاف كده فنهى كهى محبتكى ويبقى ليك بى طقشة طياره
    بالللااهى يفكو ليك الصور عشان تتذكر الاصل ؟؟؟
    دى تلقاها عند زول ما اندو هديده !!

  16. عزت كتب:

    و لا يهمك يا دكين الداهية دي اسكت خليها ساكت……. لكين لا الداهية لا البلكونة موجودين في ألمانيا…. ناس ألمانيا يبرو من جنس دا … دا شغل بتاع فار ايست و الا أفريكا ما عارف لكن الجاب الدواهي ديل ملاحظة الانسان للحال المايل…و ما كل الناس على درجة واحدة من ملاحظة الأشياء….

    مش بالله يالسلاوي…. فاتتنا علة نشوفها عند أولادنا انشاء الله

  17. aflaiga كتب:

    دكين : انصحك نصيحة خالد مدنى لكل عضو جديد ( اقرا الارشيف عشان تقدر تخش فى الفورمه ) مقالات د . عزت تحتاج لزول قديم وعتيق فى المدونه عشان يستطعم الشهد الذى بداخلها وهى دوما كبسولات خفيفه ظريفه لطيفه تتجول بك من عالم لاخر تحمل بين السطور ما لا يمكن قراءته الا لزول شاكل ناس قصه وصاحين ليهم ورحب بود الخلا وشاغل ابكرون واستمتع بدرر بشار وحكمة سنكل وتخاريف افليقا وحنكة محنك ورونق مخير ورقة اب احمد وووووووو عيييك يا زول دى دنيا تانيه فراجع الارشيف ختعرف طوالى انت بتقرا لى منو من الناس .. ومرحب بيك تانى وتالت وعاشر .

  18. عزت كتب:

    نواصل ما انقطع من حديث

    ففي يوم عقد القرآن بالخرطوم ولدت حرارة اللقاء بين أهلينا صقيعا عندنا في درسدن نزل ذلك اليوم الجليد على مدينتنا و أحالها الى عجوز أشيب الشعر و حولنا الى مراقبين من وراء الزجاج لذلك المظهر الرهيب و لأول مرة يتحول ميدان الكرة المجاور لعمارتنا الي فريزر مضبوط علي نمرة 9 بنى الثلج في كل أنحاءه و تصلبت أوانى الثلج فيه لتحتاج الى سكينة لاقتلاع قالبا منها فهل يا تري يحتاج اصحاب تلك السيارات في موقف العمارة الي سكيننا مماثلا لاقتلاع سياراتهم صباح اليوم التالي … كان الألمان سعيدين سعادة لاتوصف ذلك اليوم بذلك الثلج فقد أتى متأخرا و طال انتظارهم له كثيرا و قد عبروا عن خيبة أملهم عندما مر عيد الكريسماس دون جليد و ها قد أتى اليوم و كانهم يشاركوني في فرحي بذلك اليوم …

    طبخت لبعض زملائي في الكورس و عزمتهم ذلك اليوم و تناولوا الكثير المثير الخطر و فرحوا فرحا شديدا فقل ما يجود الناس بمثل هذه الدعوات و التكرم بالمطائب .. فعالمهم غير عالمنا كل شئ محسوب و لا مجال لعمل دون ترتيب … سهرنا ذلك اليوم و سمعنا الموسيقى و رقصنا فالكل سعيد … الألمان بجليدهم و الأفارقة بالملح من الشرب و الأكل و انا بيومي أيشر فقد صرت عريسا مع وقف التنفيذ.

    عند اتصالي بالمنزل بالتلفون أخطروني بأن عروسي في طريقها اليك حسبها كم ساعة طيران كدا و عبر “الماليف” خطوط الطيران المجرية سوف تكون معاك… حسبتها كويس و أن ماشي على المطار اتصل بي قريبي من السفارة السودانية بأن الطائرة موعدها 12 كيف هذا و الموعد ظهرا لا مشكلة فسوف أذهب الي برلين الغربية و اقضى بها عددا من الساعات و بالمرة أشترى مسجلا … فكيف للعروس أن تأتي و لا تجد مسجلا أها كان جابت معاها شريط نسوي شنو.

    في عصر ذلك اليوم و أنا راجع من برلين توقفت لدى شركة سفر و سألتهم متى تحضر الطائرة فاشاروا بانه جاءت من أربع ساعات فالمقصود 12 ظهرا و ليس ليلا .. يا لحظك المايل ما العمل .. فتشت على تلفون السفارة الملجأ الأول للسؤال فلما كانت الساعة قد تجاوزت الخامسة مساء اعطاني حارس السفارة تلفون نائب السفير الذي يسكن بفندق فاتصلت عليه فحولني لقريبي الذي أنقذ الموقف و عرفت منه أن العروس معهم في المنزل …

    نواصل في مرة قادمة …أنا سامع صوت بكا قالوا جارتنا حبوبة ناس فلانة ماتت و عن اذنكم نقوم نلف العمة باقي الدافنة محمدانا

  19. aflaiga كتب:

    معقوله يا عزت من اول يوم تخلف وعدك ؟؟ نحنا الحمد له اول يوم صدقنا وعدنا لكن بعد داك الخلفان بدا ولى الليلى وحاتك ما انتهى !!
    عرست وانت طالب يا عزت ؟؟ معقوله بس غايتو ناس زمان ديل بيسوو حاجات غريبه والله اسى انت طالب ما بتقدر تاكد انك ود ابوك خلى تجيب زول تانى جديد !!!

  20. عباس كتب:

    شنو عملتو الموضوع عرس ونسيتو اللقيمات
    العرس ماضقناهو لكن اللقيمات دي كل يوم مدخلانا في بشتنة وشناة طبع وتانيب من الاساتذة والسبب
    انو الواحد من صباح ابو فاطنة بدل يتجه علي باب المدرسة كنا بنشيلا موزة (تغير الاتجاه )علي الحاجات الببيعو اللقيمات والفطاير تضرب كم لقيمااتية وفطيراية الوش اغبش والشلاليف يلمعن من زيت اللقيمات
    مع انو الواحد كان بياكل اللقيمات في البيت لكن كنت علي قناعة بتاعة الشارع ابدا مازي بتاعة البيت

  21. DAKEEN كتب:

    الفورمة شكلها صعبة جدا، وامتحانات القياس سرية والمصطلحات دايرة زول قريب من المجال وشكل البرنامج مقفول ، عايزه لها مفوضية و وتسجيل وترشيح وانتخاب واقتراع وتصويت وحملة اعلامية وفرز وتدقيق وبعد داك النتيجة معروفة نحن برا الفورمة ، وشكرا على الضيافة وبارك الله في من زار وخف .

  22. ياسين شمباتى كتب:

    عزت الحبيب…سلامات..
    غايتو جنس محن!!! يعنى اسه نركز ليكم مع الالمان والنظام ولا عدم القدرة على التمام ولا العرس بتاعك ولا جارتكم الماتت؟ ما تكون لفحت بطاقة العقد معاك !!

    ابوى السلاوى..سلامات..
    حمدالله بالسلامة..ومالك ما بتدى اخوانك ووليداتك خبر عشان يقوموا بالواجب!!؟؟؟

  23. حاج أحمد السلاوى كتب:

    ولدنا شمباتى ..
    واجب شنو كمان ؟ هى سوت ليها واجب كمان ..الواجب دا بنقوم بيهو برااااانا لا بنستعين بصديق ولا جمهور ..ياهو الفضل !!!
    إنت اقعد سوى الدرب ساساقة بين الحفرة والمطار دا مسافر ودا راجع من السفر وحبوبتى جات وخالتى ماشة ..لحد ما القطر يفوتك ..
    فى حد يا ناس يخلى عربية هيونداى آكسنت جديدة واقفة قدام البيت ويركب تاكسى …. ؟ .
    – ابو عصمت ..أظن أم المؤمنين عواطفك ليوم الليلة زعلانة منك ..حد ينسى ميعاد عروسه ؟..غايتو جنس غايتو ..
    – ولدنا الحفيد سهيل .. شوف ابو عصمت نسى مواعيد عروسه الجاية ( طرد ) من الخرطوم تقوم إنت تقول لى انا كنت بهبب فى شنو لامن ما عرفت مواعيد سفرى حق شهر العسل ؟ ما إنتو الشباب ديل الشى دا ما ضقتوهو ( العرس … طبعن ) عشان تعرفو الزول أبو واو وااااحدة بيكون ضارب لخمة كيف ..وإن شاء الله تضوقوهو بعد دا وتحصل ليكم مواقف طريفة وتجو تحكوها لينا ..زى حكاوى أعمامكم وجدودكم الكواشف ديل ..فى زول لابد هناااااك فى الدوحة الوارفة وعامل رايح زى الما مرت بيهو مواقف زى حقاتنا دى ..
    نواصل بعد الفاصل …ونحكى ليكم عن مواقفنا الطريفة والمحرجة مع الألمان و أطفال الألمان بسبب لون بشرتنا الجميل دا ..أكيد مرت بيك حالات زى يا ابوعصمت ..مش ؟؟
    – أخونا الدينمو أبو الأفاليق .. غايتو الكرتونة دى إلا نعمل عليها غارة جوية فى ليلة حالكة السواد لأستخلاصها من أم المؤمنين …لأنو لامن أتذكر الصور دى تمسكنى مغسة شديييدة خلاس واكيد فى حاجات راسخة فى الذاكرة وما محتاجة عشان ارجع للصور تانى ..
    – أخونا ود دكين .. نزيدك ترحيباً على ترحيب الإخوة صفوة الأخيار أخوانك الشباب واعمامك الكواشف ( مع إنو لسه ما عرفنا قروبك ..ولا موقعك الجغرافى ) .. لاكين من سطورك وحروفك وكلماتك الفوق دى حسيت إنك من جيل قديم معتق ويحتمل ( اقول يحتمل ) من قروب طريقة 4-4-4 سنوات دراسة ..ولاّ انا غلتان ؟مرة تانية اهلن بيك وحبابك عشرة .. وإن شاء الله ما آخر طلة !!
    وخلونا النشوف آخرتا شنو !!

  24. عزت كتب:

    (فى زول لابد هناااااك فى الدوحة الوارفة وعامل رايح زى الما مرت بيهو مواقف زى حقاتنا دى..)
    أفو يا حاج السلاوي كمان الكمندانات بيغلطو…!!
    قالوا واحد كمندان كبير بيفتش طابور الصباح على صهوة حصان و معاهو الضباط الأصغر منو وراهو في حصين برضو… قام حصانو جفل و عمك وقع….. الباقين كوووولهم وقعو…….!!

    دكين بالانجليزي … الفورمة لا صعبة و لا حاجتين و ما مشاغلتنا لك الا من واجب الضيافة و خليك قريب زي ما بقول أخوك شمباتي و حقو تورينا و تستجيب لي انتر فيو عمك السلاوي (والا أخوك السلاوي برضو) شان تبقي في الفورمة و نحن لا ناس انتخابات و لا حاجة

    كسرة:
    واحد مرق من غرفة الانتخابات بعد ما صوت و جاهم راجع بعد ساعة بعد ما عرف انو صوت غلط
    – ياخ انا جيت قبيل و صوت للشمس ما أنو كنت عاوز اصوت للشجرة…. لازم ترجعوني جوه عشان أصلح الغلط دا
    – احنا عرفنا انك صوتا غلط، عشان كدا صلحناها ليك…… تاني ما تعمل كدا…..!!
    قال مسئول الانتخابات…!!

  25. DAKEEN كتب:

    اولا الكسرة دي انا كنت قايلها بكسر الكاف ومعاها طماطم وزيت سمسم ولمارجعت للارشيف عرفتها حقة ناس قدام من زمن حسن عطية والكاشف
    ناس 4-4-4 ديل ما بنلحقهم ولا بنفكر لانه جينا لقيناها 6-3-3 يعني من ناس الوسط .
    وكان جيتو للموقع الجغرافي ، حاليا ما موجود في الخريطة لانه حطب القطن شبه انعدم وفي ايدنا شوال في ايدنا ايصال والمنجل فارقناه بعد لقينا الحصاد بمشي للدمغات. ومشينا لي ناس ابو عقال النسونا ريحة الكسرة والكسرة .
    اما الكواشف فديل اعمامنا وانصاف الكواشف ديل حلقة وصل ولازم نستكشف الكواشف عشان نقنع الكاشفات .
    بعدينا قصة الكرتونة والطرد لسة ما جربناها لما نخش الفورمة تمام ونستلم شهادة البحث ممكن نستفيد من تجاربكم .
    وكان صوتنا للشمس ولا للقمر اهي كلها في السماء بعيدة عن ارض الواقع وبعيده عن خلف الله لانه محتاج كتالوجات عشان يفك الشفرات ويتواصل معاها وبارك الله في الكواشف عندهم كل القواميس بس حقوا شوية كدا يسهلوا اللغة عشان الناس متلي يقدروا يخشوا الفورمة .وبدل ما يصلحوا ليهو ترشيحه يصلح ليهم حيطة المركز الانتخابي

  26. حاج أحمد السلاوى كتب:

    أخونا ود دكين ( إيه رايك .. فى التعديل دا ؟ ..
    المعلومة وصلت ..بس موقعك الجغرافى دا باين لى كدا زى خارج الكرة الأرضية..

  27. مُخير كتب:

    الحلوين سلام وشوق
    شايف تجليات وإندلاقات في قمة الروعة”، أهة دي دانقتنا البنعرفها والجينا مرات وما لقيناها واليلة جاتنا مستعيدة ألقهاالعتيق، قطيعة تقطع الكيزان والإنتخابات وكل المُعكننات.
    بالله عليك يا أبو عصمت واصل من أبو سبعة ده، نحن يا دكتور راجين سيزون تو من الـ”برزون بريك” بتاعك ده، طبعن إنت إتخارجت حينذاك من برزون العزوبية وماأحسنه من توقيت وما أطيب الزمان وما أروع المكان، ولو لم يكن كما تصورنا لما كان عصمت والجُُب وإخوته الإحدى عشر ههههههههههههه عشان كدة سلمت أمرك لربنا والحريرة والضريرة إن شاء الله تشوفها وتعيشها مع الوليدات فليس كل ما يتمنى المرء يدركه…. مش ناس الزوووووول أنصار الدبل كبين.
    تعرف يا دوك الحال من بعضو نحن أملنا نصف الدين في المهجر لكن يعجبوك بني وطني تموا لينا الناقصة بدءً من قيدومتها وحنتها مروراً بجرتقها وحريرتها وضريرتها لكن الناقص كان حضور الوالدة والأخوان ودي عوضناها فيما بعد في عرس الأخوان. وحمداً لله على السلامة

  28. ياسين شمباتى كتب:

    الوالد السلاوى..
    اقول ؟؟؟؟؟؟؟؟؟؟؟؟؟؟

    الامير مخير..
    بركة بالرجعة وما تقطع كدة تانى..

    دكين..
    مرحب مرحب بالمهجّرين فى الارض…

  29. DAKEEN كتب:

    حاج السلاوي // دي كثيرة علينا وانشاء الله وربنا يقدرنا نبقى قدرها … نحن يا دوب في اولى ابتدائي ، الموقع الجغرافي ياتو بالتسعال منو نحن على باب الله – (فلوترس ) – بس الحال المايل ما بعجبنا – وكان للجغرافيا ساقط فيها وسهم الشمال من الجنوب ما واقع لي .
    يا شمباتي نحن مهجرين بس ممكن نكون اقرب من بعض القاعدين في ضلها ما عارفينها شجرة لالوب ولا دليب لمن تقع بطيخة في راسهم ممكن يلفوها شجرة قرع.

  30. ياسين شمباتى كتب:

    دكين..
    ايواااااا دا الكلام الصاح..الموقع الجغرافى البسال من ابوى السلاوى دا يعنى مكان الاقامة بس,,وليس الموقع اياه..وشكلك قريب مننا فى الخليج..بعد اذنك ممكن ناخد ايميلك من الادمنستريتر لمزيد من التواصل والتعارف..

  31. DAKEEN كتب:

    شمباتي خذ الايميل والسيرة الذاتية والبروفايل كامل انا شايله في ضهري . و الاذن مفتوح للجميع ز قريب منك بس في الشرقية وتحديدا الجبيل و الدمام
    عمنا السلاوي: ما قلت ليك انت عايزين مترجمين عشان يفكوا الشفرات شوف انت قاصد شنو وانا مشيت وين .

  32. ياسين شمباتى كتب:

    دكين..
    والله ما بعيد..انا فى مكة والوالد فى جدة..اما عن الشفرات فحبة حبة الريد نتمو..ومرحب بلا عدد..

    الاخ استرايكر..
    ارجو تزويدى بايميل الاخ دكين.

  33. حاج أحمد السلاوى كتب:

    ولدنا دكين ..
    المصريين أولاد بمبا ..بيقولوا حية حبة يا ملوانى ..
    إنت بس خليك قريب جنب أخوانك الشباب ديل واعمامك الكواشف ..وربنا يديم المحبة بين الجميع ..
    إتفقنا .. ؟؟

  34. ياسين شمباتى كتب:

    التركى..وينك يا حبيب؟؟؟افقدوا الراجل يا ناس هناك..

  35. دكتور عـــــــــــــــــــــــزت
    التطريد ولا التشريد
    دكين بالانجليزي نورت أهلكـ مرحب خرتميه مره ذاتوووو

  36. محنك كتب:

    مرحب بالاخ دكين نيابة عن المدونين بالخارج عندنا انا وابكرون بالدوحة قريب من الشرقية وشمباتى والسلاوى وآخرون بالمملكة وهلا بيك وانا برضو 6/3/3 جيل الوسط او كبار الوسط

  37. التركــــى كتب:

    الدكتور ترطيبة والأحبة الكرام سسسسسسسسسسلام
    ياخوانا كــدى النسألكم فيكم زول قطع (رحط) غايتو نحن لا حنة ولا ضريرة تقول شنو دبلنا لكن برضو ماضقناهو ياحاج ( على قولك من غير تأويل) ….
    شكرا أخى العزيز شمباتى على السؤال والشكر موصول لكل السائلين عنى سواء داخل او خارج القطر وياعمنا السلاوى الف شكر ليك وان شاء الله نردها ليك فى الأفراح …. دكين الف مرحب بيك وصدقنى المجموعة دى مابتحتاج لمعجم بقدرما تحتاج لرفقة السارة وأكيد أكيد ح نتقابل … بس دكين بتاع تركيا ولا واحد جديد ورقة ؟ لكم الحب والتقدير

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s