أفياني و وارقو في الفاشر

Posted: الأحد,9 مايو, 2010 by عزت in اخرى

قال هاشم صديق أنا لا وارغو ولا إفياني…. لا ود طمبل لا مساوي
إتسجلت بحق طعمية….. شراب مقدود … وكدارة هدية .. وكيس تمباك…..

طبعا يقدح في تسجيل الجماعة الفوق ديل بقروش كثيرة كانت يمكن أن تفك ضائقة سوق المواسير بدلا من الاضافة اليه … فالشاهد ان و ربك يستر صارت المواسير لفظا حكوميا يستشهد به والي القضارف و يدافع عنه والي شمال دارفور و نحن نرقب ازدياد المواسير في البلد حتى صارت أمرا واقعا في كل مرفق…

شان كدا جبت ليكم كلام مفيد عن النصب لا أعرف كاتبه و لكنه شرح تلك الفئات و جعلها متاحة لكم لكي لا تقعوا فريسة لاحدى شرائحها…..

النصب على الناس فن! والاحتيال على الناس فن أيضاً، فالنصاب أو المحتال الذى يضحك عليك بكلامه ومظهره ويقنعك بأنك لو دفعت له ألف جنيه سوف تستردها عشرة آلاف جنيه فى شهور ينصب ويحتال عليك، لكن المصبية أنك تصدقه وتدفع له عن طيب خاطر. فالنصاب والمحتال شخصية تتسم بالذكاء الشديد والحذر ولا يمكن اكتشافها إلا بعد خراب مالطة، وكما حدث مع عشرات النصابين الذين استولوا على ملايين البسطاء بل والأغنياء أيضاً.

طريقتهم في نصب الشباك دائما ما تتسم بالذكاء المفرط الموجه لضرر الناس فمن أجل الحصول على أموال الآخرين أو الامتلاك بالباطل لأشياء ذات قيمة مادية يوظف المحتال كلما تعلمه من مراوغة وتزييف للواقع و المبالغة والتهويل بجاذبية مصطنعة تشد أنظار وأسماع الآخرين بما يضمن استثارة دوافعهم وانفعالاتهم وعواطفهم.

حديثهم معسول ومنطقهم مزيف، لديهم من المهارة المنطقية والمراوغة اللفظية والسفسطة الكلامية ما يجعلهم يلتمسون الحجج والبراهين، ويعللون أحداثا ويحللون أقوالا وسلوكيات هى فى حد ذاتها غير قابلة للمنطق والتفسير العقلى، فهم حواة بارعون يدرسون عواطف الناس واتجاهاتهم وانفعالاتهم بدقة، ويعرفون كيف يصلون إلى أهدافهم مع ضحاياهم من الضعفاء والطامعين فى الكسب المالى والمهووسين بالثراء السريع، كما لايعرفون أدنى حرج فى السكوت عن بعض الحقائق أو إخفاء بعض الوقائع أو شهادة الزور إذا كان هناك مقابل مادى، وفوق كل ذلك هم ضعفاء لم يكتمل نضجهم النفسى بعد، لأنهم ضحايا التربية السيئة والبيئة الفاسدة والتنظيم الاجتماعى المفكك الذى أحالهم فى النهاية إلى شخصيات نرجسية ومضادة للمجتمع.

ومادام سلوك النصب والاحتيال قائما على التفاعل بين شخصين على الأقل أحدهما الضحية، يمثل سلوك الضحية جزءا كبيرا إيجابيا ومكملا ودافعا أساسيا لسلوك النصب والاحتيال على المال. فوقوع الشخص ضحية لا يكون بمحض المصادفة، وإلاّ لتساوى جميع الأفراد فى ذلك، وهو ما يتفق مع ما نشاهده عمليا من وقوع بعض الأفراد أكثر من غيرهم ضحايا للنصابين والمحتالين. فالضحية هو الذى يجب لومه لوقوع فعل الاحتيال والنصب عليه، فهو الذى يخلق ويشكل النصابين المحتالين، وهو أيضا صاحب الدور الحاسم فى هذا السلوك، فسلوك النصب والاحتيال كان يمكن ألا يقع لو أن الضحية لم يأخذ المبادرة فى ارتكاب بعض الأعمال التى من شأنها أن تثير النصابين والمحتالين فالمصيدة لاتطارد الفأر.

وهناك تقسيمات كثيرة صنف بموجبها ضحايا النصب كالضحية الحريص وذلك المسهل والضحية الداعى والضحية المستفز… و التي قالوا فيها أن الضحية الحريص و بالرغم من وضع كل الاحتياطات يقع في عملية النصب و هنا لا يلقى اللوم عليه لأن لا دور له على الاطلاق لتلك العمليات . الا كان الأمر متصلا بالجشع و الرغبة في الثراء السريع.

أما الضحية المسهل فهو الذى يسهل على الآخرين سلوك النصب والاحتيال على أمواله من خلال إهماله فى اتخاذ الاحتياطيات المعقولة التى كانت كفيلة بكف ومنع هذا السلوك، وعادة ما يتميز هذا النوع من الضحايا بالثقة المفرطة فى الآخرين وعدم تحمل المسئولية وضعف القدرة على التعلم من الخبرات الماضية، هذا إلى جانب الفشل فى الحكم على الأشياء والموضوعات والناس، فإدراكاتهم محدودة وانفعالاتهم قوية وعشوائية فى آن واحد.

أما الضحية الداعى، فهو الذى يضع نفسه طواعية وباختياره، ومن دون ضرورة تحتم ذلك فى مواقف خطيرة تعرضه لسلوك النصب والاحتيال على أمواله. وذلك كأن يندمج مع بعض الأفراد المعروف عنهم سلوك النصب والاحتيال، ويعقد معهم صفقات تجارية مالية، أو بإقراضهم أموالا من دون أن يأخذ عليهم الضمانات الكافية، وعادة ما يتصف الضحية الداعى بطموحات كبيرة وإمكانات محدودة وبسيطة.

وفيما يتصل بالضحية المستفز هو الشخص الذى يتصرف بطريقة مثيرة لمشاعر ورغبات النصابين والمحتالين، فيقررون الاحتيال على أمواله عقابا له وانتقاما منه، وعندما يشتد الصراع بين الفريقين قد يعجز الواحد منا عن تحديد أى منهما هو السبب فى سلوك الاحتيال، وعادة ما تتصف شخصية الضحية المستفز بالثقة بالنفس والشك فى الآخرين، ذلك الشك الذى لم يقو على منحه بعضا من الحذر فى التعامل مع الآخرين، نظرا إلى الثقة المفرطة فى الذات والمبالغة والتهويل فى القدرات الشخصية، خصوصا ما يرتبط منها بالذكاء. فهو فى نظر ذاته أذكى المخلوقات وأكثرها دقة ومهارة، وما عداه من البشر أغبياء وحمقى وينقصهم الفهم والإدراك.

وهناك بعض العوامل التى تتوافر فى سلوك الضحية فتكون عوامل جذب ودوافع لسلوك النصب والاحتيال على أموال الغير، كأن يكون الضحية من صغار السن الذين يفتقرون إلى الخبرة فى التعامل مع الناس، أو أن يكون الضحية من كبار السن الذين تتوافر لديهم ثروات كبيرة، أو أن يكون الضحية من النساء أو المصابين بالأمراض النفسية أو الجسمية، وتلك الفئات لاتملك من القوة ما يمكنها من الوقوف أمام سلوكيات النصابين والمحتالين، فيكونون عرضة لاستلاب أموالهم.

خلو بالكم من العدة…!!

Advertisements
تعليقات
  1. ياسين شمباتى كتب:

    عزت..سلام..
    اولا نبدا بالمواسير لانو عندى غبينة لسه ما اتفشت,,اصلا هو المشير لما مشى جوبا او واو قال ليهم انا راح ابدل ليكم القضيب دا لانو صغير بى قضيب كبير,,وكمان ح نجيب ليكم بيهو المواسير من الخرطوم!!!

    نجى للنصب والاحيتال,,طبعا بقت فى اشكال وانواع,,مثلا جانى واحد فى رفاعة شاب فى اوائل الثلاثينيات وجلابية سكروتة ومحنن فى يديهو وكرعيهو وقال انو عريس وانقطع!! يا مصدق يا مؤمن اديتو الفيها النصيب_مبلغ كبير( وبعدداك لا شفتو لا شافنى!!

    وبجيك كان فى العمر باقى..

  2. ياسين شمباتى كتب:

    وبمناسبة وارقو وكدة,,مصعب دا مالووووووووووووووووووو !!؟؟؟

  3. aflaiga كتب:

    عزت : على بالطلاق الزول الفوق ده كان لمى فى التحت شكلو ما بفرز ولا بقعد يحدد النوع !! الغريبه بحار اعالى المياه برضو !!! انتو القباطين ديل كلهم كده ؟؟
    زى ما قلت فى ناس الله خلقوها عشان يحتالوها وناس الله خلقا عشان تحتال .

  4. ودالزبير كتب:

    قصيده هاشم صديق كامله بعد إذنك يا دوك

    إسمي خميس ود كوة العاتي
    كان عجلاتي
    وأمي مهيرة وأبوها بشارة
    كان ساعاتي
    أبوي من بارا

    وأمي إتولدت في حلة غميسة
    ما بتنشاف في أي خريطة
    بأي طريقة بأي شطارة
    كان بي عين أو نضارة
    أمي وأبوي صدفة اتلاقو
    في الدنيا الشاسعة والرحمة الواسعة
    في قطر الهم الدرجة الرابعة
    كانوا عوايل في السفر الصدفة
    ملح وملاح ونسة وعرفة
    تسالي وترمس وقهوة بقرفة
    وفي الونسة السمحة في قطر الزحمة
    قلب الوالد حن ورف
    وقلب الوالدة اتخج وخف
    بعد شهرين صبحو اتنين
    زوجين طيبين اتلمو في اسرة
    في بيت (البقعة) وسط (العرضة)

    أبوي فقران لكن بدبارة
    مهر الوالدة كان سحارة
    تلاتة جنيه.. سعفة ووردة
    وفركة وفردة
    تبروقة ومصحف .. وبمبر ومبخر
    تربيزة يتيمة .. نص دسته كبابي
    كفتيرة قديمة .. وكم هبابي
    جابونا تلاتة.. بتين ووليد
    ربونا بكسرة.. كسونا السترة
    شربنا اللبن الصافي الاصلي
    ما اتمطقنا اللبن البدرة
    شبينا كبرنا.. فهمنا نطقنا
    وكسبنا القدرة
    وأنا كنت مقرم .. وود تفتيحة
    والدنيا دي كانت طيبة فسيحة
    سينما (برمبل).. باسطة (بيَن)
    الترماج
    حبوبة عجوبة
    والنفاج
    قصبة سكر وعنكوليب
    نبلة قوية وقلوبية.. شرك الطير
    رحلة عيد لجزيرة توتي .. أو الباقير
    شدر كافوري سواقي الحاج
    جنينة النزهة..
    زنكي اللحمة ..السوق الزحمة
    وقهوة نوري
    والدافوري قيامة عجاج

    أنا كنت حريف والكورة شراب
    أحاور نملة في جحر الضب
    وأبهدل أجندل أشطر باك
    أو هباك
    أفرشو رررب
    روضت الكورة
    بدل مأسورها بقت مأسورتي
    المجنونة بت الكلب
    وأترقيت للتيم الاول
    وكبرت بقيت مفتل شاب
    اتنورت عن الأوطان
    وإتفتحت علي الاحزاب
    العرضة جنوب .. العرضة شمال
    خور ابو عنجة .. بيت المال
    شارع الطابية.. تيم الطاغية
    كار المافيا .. جنينة سيدي
    سور القبة ..ضرايح بحري
    شرايف بري
    رافع الراية
    تيم القعدة والانداية
    ناس شاشاما.. نادي شليل
    الحولية .. دق النوبة
    في حمد النيل
    الشامراب .. نادي الكاب
    ……. والخ .. والخ
    بخا بخ في العجن اللخ

    ولأني حريف وود لعاب
    سكنتني عيون من باب لي باب
    إتسجلت في تيم مغمور
    مرقت سريع لي تيم مشهور
    والبلد أتيام والناس أقسام
    شارع خاص .. شارع عام
    أتيام فارعين .. أتيام أقزام
    أحزاب فارغين .. أحزاب أعلام
    دروب وحروب .. صدام وكلام
    وأنا كنت خميس ود كوة العاتي
    بقيت موضوع تصفيق وشيوع
    مرات محبوب أحس بسلام
    ومرات أتخاف .. تقول بعاتي
    مرات إخلاص لشعار التيم
    مرات معدود في الحال متواطي

    (2)
    الوعي

    من تيم الشوف الضيق ضقت
    إتأملت الحال المايل
    وشفت الناس في خصام وقبايل
    فكيت تسجيلي بايدي وعقلي
    وأتسجلت في تيم الشعب الثوري الغالي
    وأنا أصلي مصحصح وود تفتيحة
    ولاعب فقري
    مرقت سريع من ضيق الحارة
    للميدان الواسع دوغري
    أنا لا وارغو ولا إفياني
    لا ود طمبل لا مساوي
    إتسجلت بحق طعمية
    شراب مقدود ..وكدارة هدية .. وكيس تمباك
    وإتفننت أكون رأس حربة
    وإتجننت عديل في المحور
    وإتقطعت أكون مساك
    إتراقبت كتير بالصف
    وإتكعبلت كتير من خلف
    ولأني خميس ود كوة العاتي
    أقع وأقوم كمان سداري
    تقول عجلاتي

    وقعت كتير لكني وقفت
    حاورت دفرت بعزم الشعب
    وصلت المرمي
    كم سددت …كم سجلت.. كم دافعت
    كم مررت .. كم قومت نفس عراضة
    مع اني مراقب ديمة بلاعب
    لاصق فيني كأنو قرادة
    ومرات ممسوك بي زول عتالي
    جابوهو عشاني خصوص من مالي
    شعارو الغالي لا باص لا بصة
    يتابع يراقب تقول مرسال من جهة مختصة
    لكني طرحتو .. جمعتو .. قسمتو
    جدعتو بعيد في برة الخط
    إتمدد يقنت زي ضكر البط

    ولأنو الكورة والدنيا الصعبة
    بحر ممدود لا حد لا شط
    إتعذبت في درب الواقع
    أكتر وأكتر
    التحكيم الفاشل ياما
    شهر في وشي الكرت الاصفر
    ومرة الاحمر
    وجرايد النقة كانت أخطر
    ألف إشاعة وكم شماعة
    سموم وحراب .. دمار وخراب
    كم سووني بعت وخنت
    أو ساومت وإتقاعست
    بعت قضية قبضت رهاب
    وإتهافت عديل لي والي
    أو دقيت في السر لي باب
    وإتوسلت عيون أرباب
    مع إني خميس ود كوة العاتي
    ود تفتيحة .. مصحصح وفقري
    مرقت عديل من باب الحارة الضيق ضايق
    للميدان الواسع دوغري
    فكيت تسجيلي بإيدي وعقلي
    وإتسجلت في تيم الشعب
    الثوري الغالي

  5. زووووووول كتب:

    عزت المرطب
    انت يا شمباتى امبيلى دا مالووو عيبو ليا بعدين علاء برشه مالو .
    بالمناسبه امبارح لقيت ليكا واحده من الجرايد عنوانا الكبير :
    كرم الله عباس : القضارف اكبر ماسوره.
    وللعلم الرجل اكبر من اكبر ماسوره .

  6. عزت كتب:

    سلام يا أحباب

    فعلا يا ود الزبير قصيدة هاشم صديق دي حكاية…. تسلم

    و مواسير الحكومة أسكتو خلوها ساكت يا شمباتي و الزووووول
    باقي ماسورة القضارف دا قال حيحكما بالشريعة و حيقطع رسين الما بيدفعوا الزكاة و انو اي زول ريحتو طالعة ما حيشتغل معانا…

    الجماعة خفيفي الظل قالوا كرم الله دا كان مزكوم ما الفترة الفاتت دي كلها شغال مع أبين ريحة ديل و لا هشة و لا نشة……

    فعلا أكبر ماسورة

  7. aflaiga كتب:

    عزت : معناتا حتبقى القضارف بالشريعه زى الثوره بالشنقيطى ولا الفول بالجبنه او البيض بالطوه . غايتو يا عزت يا ود امى كان شريعتو بتطلع سوق مواسير علمانيتنا اخير !!!
    انتو الناس ديل مصرين يحرجو رئيسم ولا شنو واحد سوق مواسير والتانى بالرجاله تهليل غايتو انا كان رئيس بمسك الكوشتينه دى وبشكها من جديد وبيكون شعارى :
    كونك فزت ده ماهو كفاية
    وفوزك ذاتو وراهو حكايه
    يا تتلم تقيف بى ورايا
    ولا بصفى دماك محايه
    غايتو ديل كان ياهم ولاتنا الراجينهم مااااسسسسسسسسسسسسسسسسسسسسوووووووووووووووره .

  8. DAKEEN كتب:

    تحياتي للشيب والشباب وما شاء الله وبمناسبة وفك التسجيلات وين نجوم اتحاد مدني ….
    والترع الكبيرة المتفرعة لمواسير .
    اعلان :
    تعلن كلية تقنية المواسير عن فتح باب التسجيل للعام الدارسي الجديد وكل من لديه حسن المظهر وطلاقة اللسان والابداع في الاقناع و وحسن الايقاع وتحليل الفئة المستهدفة لتحقيق اهداف الكلية التقدم وارفاق المستندات الاتية :
    – شهادة خلو طرف من الامانة والشرف
    – شهادة فيش وتشبيه تثبت ان ضلوعة في النشاط
    – شهادة الموسرة المتوسطة نجاح
    – خطاب تزكية من ماسورة معروفة.
    وكل من تتوفر فيه الشريط عاليه عليه الاسراع بالتسجيل في احد فروعنا الاتية :
    الرئاسة بشارع المطار
    فروعنا في الولايات والمحافظات والمحليات
    ملحوظة : ابناء ______________ لا يحتاجون المستند رقم 4

  9. aflaiga كتب:

    دكين : شروطك دى ما قاسيه شويه
    بس تقول القوى الامين وخلاس ..

  10. ياسين شمباتى كتب:

    زووووووول..سلام..
    والله براك بتجيب لى نفسك الهوا,,برضو فى سؤال محيرنى,,علاقة المريخ شنو باطفال الحجارة!!؟؟ من زمننا الصغار وكاس سيكافا القلعتوهو داك ما خليتوا حركاتكم دى!!

    اما كرم الله فقول ليهو ما ناسين شكلتكم انت ود.عبدالرحمن الخضر السافر ليها شيخ على وما قدر يحلها !! قال مواسير قال!!

  11. ابكرون كتب:

    اظن يا افليقا هاشم بحكي قصتو مع الحزب الشيوعي باشارات واضحة للثورية والميدان مش ولا انا خلتاااان
    جاااايك الكوره مسخنة

  12. طارق أب أحمد كتب:

    أدم إسماعيل صاحب السوق
    بس شوف المواسير ديل فعلن مواسير و يستاهلوا قرد معاها

  13. عباس كتب:

    لسة في نخوة ومروءة عشان كدة الواحد بدفع الفيها النصيب وقت يجيهو زول مقروض يا يسين
    وهم استغلو الحكاية وشغالين كضب و استنكاح والواحد يجيك مهضلم وكاتل ضلو وحيلو لمن تحن عليه وتشفق ومن غير تردد او تخت في بالك انو محتال طوالي بتمرق الفيها النصيب
    وبرضو الواحد مابتوب

  14. ياسين شمباتى كتب:

    عباس..سلام يا حبيب..
    شكلك مقروووووص قبل دا,,وبالجد ديل هم الكتلوا المروءة والنخوة,,ودونك قصة الرجل الذى احتال على الاعرابى واخذ جمله,,فما كان من الاعرابى الا ان صاح فيه ثائلا: ( رجاءا لا تخبراحدا بما صنعت كيلا تموت المروءة فى الناس)..ولعنة الله على المواسير وراعيها وحاميها..

    واظهر بهناك يا ولدنا..

  15. ودالزبير كتب:

    قبل إنتشار هذا المصطلح ( ماسوره ) بشكل وأسع كما هو الآن كتبت في قريه مجاوره هذا البوست وذلك بتاريخ 3 مارس 2009

    إنتشر مصطلح ( الماسوره ) في الآونه الأخيره

    أنتشار النار في الهشيم

    وهو وصف لشخص مقلب أو شخص لا يجيد عمل الشئ

    فيقال أن الشخص

    زول ماسوره سااااكت

    والمصطلح منتشر على صفحات الصحف الرياضيه

    وكلا المعسكرين يستخدمه لوصف لاعبي الطرف الآخر

    ليس هذا وحسب لكن المصطلح وصل للبيوت

    وأصبحت الفتيات يستخدمنه لوصف الجكس المخستك

    فعندما تسأل أحداهن الآخر عن فلان

    الموضوع وصل معاهو لوين

    فترد الآخر : طلع زول ماسوره ساااكت

    الغريب أن المصطلح يأتي من نكته موغله في البزاءه

    ومن المؤكد أن كثير من من يستخدم هذا المصطلح

    لا يعرف ولا يعلم من أين جاء هذا المصطلح

    هو مصطلح ظهر وسيختفي كما ظهرت مصطلحات

    في فترات زمنيه سابقه

    لكن لأول مره يظهر مصطلح تكون خلفيته بمثل هذا الفحش

    والنكته التي جاء المصطلح تقول:

    أن أسد ولبوه كانو قاعدين تحت الشجره في الغابه

    فجاء قرد وضرب الأسد كف ومشى

    إستغربت اللبوه سكوت الأسد على الحقاره دي

    وبعد يومين حصل نفس المشهد

    فجرت اللبوه ورا القرد…………………

    ………………………

    ………………………..

    …………………….

    أها بقيه النكته تقوم تساعد نفسك بالبحث في السيد قوقل

    لأنو كتابتها هنا تعني

    ذهاب البوست وسيد البوست زاته للخور

  16. عزت كتب:

    غايتو سيد البوست جاب الحكاية فوق فوق … لكين باقي لي الخور محمدك يا ود الزبير و الأ اقول ليك طالما ناس الحكومة ذاتم بقوا يستعملوها بغض النظر عن اللبوة و القرد أكيد ما حيعملو لينا حاجة…

    و خلى دي ياخ ديل مشو لحد اطلاق النكات اللهيا …. (كدي زح كدا يا عبد الرحيم)

  17. ودالزبير كتب:

    أها زح كده يا عبدالرحيم العبد لله كتب بيها بوست في 2008 أظن برضو في القريه المجاوره الاونلاين لمن الوزير ابو رياله قالها في التلفزيون ومافي زول إشتغل بالموضوع الشغله .. هسه موضوع الماسوره دي نكته بذيئه جداً جداً وما ممكن الناس كلها تقول ليها في كلام على أعلى مستويات الحكم وهي ما عارفها مصدره

  18. aflaiga كتب:

    عزت : مشهد ما سغنتوتى :
    قام السيد الرئيس بزيارة غير معلنه لشمال دارفور وتحديدا للفاشر بمعية الوالى المقيم فى الخرطوم لاسباب صحية !! وقام بجمع كل المواطنين فى صالة كبيره وبدا الحديث :
    الريس : يا اهل الفاشر انتو حبايبنا وعزاز علينا وعشان نكون واضحين يا انتو انتخبتونى معناتا عاوزنى يا ما انتخبتونى وفى تزوير حصل ؟؟
    الشعب : انتخبناك وتانى بننتخبوك لو اترشحت .
    الريس : طيب ما دام انتو راضين بى ريس اسمعو كلامى كويس – كبر ده انتو انتخبتوهو ولا فاز تزوير ؟؟؟
    الشعب : والله انتخبناهو لكن تانى لو اترشح ما بننتخبو !!
    الريس : طيب يا جماعه ما بنتنخبوهو ليه ؟؟ لانو سكت عن ضياع حقوقكم ولا لانو شارك فى ضياع حقوقكم ؟؟
    الشعب : الاتنين يا ريس والساكت عن الحق شيطان اخرس ..
    الريس : طيب يا جماعه انتو رايكم شنو يتوقف عن العمل ويتحول للتحقيق لحدى ما تظهر براءته او ادانتو ولا تنسو القصه ونبدا من جديد ؟؟؟
    الشعب : لا عفا الله عما سلف العدل العدل الردع الردع .
    الريس : طيب يا كبر عشان ما تقول ديل ناس مغرضين ولا عندهم مصالح ديل شعبك الانتخبك وكلامم واضح عندك راى فى القصه دى ؟؟
    كبر : الراى رايك والشوره وشورة الشعب انا واقف من العمل لمن ينتهى التحقيق
    الريس : طيب عاوزين منو والى عليكم لحدى ما ينتهى التحقيق
    الشعب : عاوزين كبر عاااوزين كبر عااوزين كبر .
    ويصعد المغنى للمسرح ويبدا فى غناء اغنية عزاز علينا الشالو نوم عينينا .
    افليقا : عزاز علينا الشالو نوم عينينا فراقم جمر وحاشاا بيدينا .
    سمسمه : يا راجل انت بتهضرب ولا شنو قوم وربنى دى منو العزيزه عليك لمن بتحلم بيها دى اصلو ما بخليك المره دى الا تورينى .
    افليقا : يا مره الزول اصلو ما ينوم مالك ؟؟
    سمسمه : منو العزاز عليك ديل البتغنى بيها وانت نايم ؟؟
    افليقا : ده ما كبر يعنى حيكون منو ؟؟؟

    كسره اليوم داك طبعا انا نمت بدون اصلى العشاء … عشان كده …

  19. ودالزبير كتب:

    بالأمس قدمت النيل الأزرق حلقه عن سوق المواسير كان اليف بالتلفون الوالي كبر ومن داخل الإستديو عدد من الصحفيين منهم يوسف عبد المنان من آخر لحظه والصادق الرزيقي من الإنتباهه وخالد التجاني من صحيفه إيلاف وكان هناك خبير إقتصادي .. غايتو كبر ده بيبالغ عديل الزول أول حاجه قال إنه داير يقتص من الناس الشوهت سمعته والمضحك قال إن المتهمين الإتنين رشحتهم القواعد للمجلس التشريعي ( القواعد من النساء ) المهم لمن سألهوا حق الناس راح يرجع كيف قال إن النيابه شغاله وهو ما عنده دخل باليبحصل بعد كده اللذيذه المقدم قال ليهو يا سعادتك إنتو شغالين بطريقه المال تلته ولا كتلتو رفض يرد عليهو

    غايتو حلقه مبالغه فيها

  20. ودالبحر كتب:

    كلامكم زي العسل والله ان مغترب ومفلس ومكركّر لكن الكلام المكتوب دة ريحني شديد ؟ يالله تاكون مغبون

  21. عزت كتب:

    ود البحر سلام
    ماهو انتا كويس و قاعد تكركر (تشيش) من الشيشة
    ربنا يرد غربتك سالم و غانم
    و خليك قريب

  22. ابكرون كتب:

    الوالي الماسورة ده انتهت مهلة الاسبوع لا استقال لا اقيل …..خسارة ضاعت علينا انا وصديقي سنكل وابواحمد كنا عايزين نبقي مؤتمر وطني مان الواحد عمل ليه سوق طباشير ولا دبابير ….فابشروا بطول سلامة وعافاكم الله من هذا الجزام يا ابكرونا ويا سنكلا ويا اباحمدا………

  23. التركــــى كتب:

    ياخوانا أنا الشايفو دا ما حده الوالى بس راس السوط بصل الخرطوم طولما المأكله عريقة كلما اتورطت الحزب أكتر عشان كدة ياابكرون ماتنتظر محاسبة أو استقالة الوالى وبعد شويتين ح يقول ليكم خلوها مستورة …. ياربى يكون تمويل الانتخابات مر عبر المواسير ؟

  24. ياسين شمباتى كتب:

    ود الزبير..
    كمان قال انو ما مسئول من السوق مسئولية شخصية!! طيب لو كنت مسئول مسئولية شخصية ما كان زمانك فى السجن,,قال مسئوليتو عامة عشان كدة ما بستقيل!!! وقال دا (حلم الجيعان)..وصحى المال تلتو ولا كتلتو..
    وعاشت الشجرة والسودان فى موسرة مموسقة مخشوشنة..

  25. البشاوى كتب:

    عزت — الله يحميك من النصابين والمحتالين – والمتموسرين بالفاشر وكل انحاء البلد — حقيقى اللى اختشو ماتو – لو كان فى عدل وامان واحد حرامى ومحتال على الناس بعلم الحاكم يقيف فى لقاء مكشوف ويصبر الدائنين بالمكرفون ومعاهو حرس ( الحدود ) ويقسط المديونية ويعمل لجان لحل المشكلة دة بالغ واستبلغ –وين القوة والامانة – ووين شرع الله – ووين الامن الاقتصادى -ووين العدل وسبدرات ؟؟؟ والله لو كنت واحد من الدائنين كنت ارتكبت فيهو جناية القتل العمد — يعنى الحكاية مافضل ليهم الا يجيبوهو فى قناة الجزيرة فى برنامج الاتجاه المعاكس – خوازيق البلد زادت – ومواسير البلد زادت والمصيبة انها مواسير صرف صحى نتنة وريحتا تزكم الانوف — والحرامية طلقاء فى الهواء المرطب المكندش بقروش الحرام- والترابى يعتقل – هل ياترى كان ليهو دور فى سوق المواسير ؟ ولا عشان هوماسورة ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s