أتركوها فأنها ….

Posted: الثلاثاء,11 مايو, 2010 by طارق أب أحمد in اخرى

دعوه للمقاطعه
معرفتى بكرة القدم لا تزيد عن معرفتى بالهيروغلوفيه التى أعلم أنها حروف عند رؤية تلك الشخبطه المرتبه , غير أنى أفهم ما تيسر من علوم الحساب و الإقتصاد و المنطق ما قد يفيدنى فى فهم ما وراء ماتش الكره ذو الهرجله الغير مرتبه

قاطعوا الكره السودانيه

المتابع لشأن لكرة القدم السودانيه و حالها الذى لا ينفصل عن بقية (إبتلاءات) البلاد من تردى فى الأخلاق و السياسه و الأقتصاد و الفن وكل مناحى الحياه يلاحظ سرعة تدهور كرتنا بينما كل الدنيا فى تقدم مطرد و لا يخفى على أحد
دعوتى للشعب السودانى (الطيب) ياخى بطل العبط دا وشوف ليك أى حاجه تانيه كوره أوربيه أو أفريقيه ولا خلى الكوره ذاتا ووشجع جون سينا
الفكره أن الكوره فى السودان بيزنس كبير يستفيد منه البعض أيما فائده سواء بالعمولات عن بيع و شراء اللعيبه و بالتسهيلات التى يتحصل عليها أساطين و أناطين الكره من خلال إستغلال إسم النادى لقضاء حوائجهم من رخص و تسهيلات
دخل المباريات الذى لا يقل عن بضعة ملايين الجنيهات كافى لأن يسدد ما دفعه الوالى أو الأرباب أو الكاردينال من قرض فى أول المده , يعنى المسأله ما هى حب وعشق الفريق و ديل بيزنس من بيعرفوا إنو واحد زايد واحد بساوى تلاته و من هنا تأتى دعوتى للمقاطعه
المسأله عرض و طلب و لأن شغف شعبنا السودانى بالكره عظيم ما يرفع نسبة الطلب عليها و عليه يقل العرض (من ناحية الجوده ) لذلك يكون الحل فى مقاطعة الكره لكى يقل الدخل و تكون الكره هى الهدف الأساسى و ليس الماده سواء للاعبين أو الأداريين
كما قاطنا المنتجات الدنماركيه و جرسناهم و كما قاطع سكان عطبره اللحمه و حاربوا الغلاء , قاطعوا دخول الميادين و تخيلوا معى شكل مباراه هلال أو مريخ دوليه بدون مشجع واحد .
يا سلام و بالذات لو كان المعلق الشوال

Advertisements
تعليقات
  1. عزت كتب:

    انا غايتو زمان قاطعتها لكين البيقنع الباقين منو…. ياخ أول امبارح الحرابة قامت و بالرصاص كمان شان خاطر المريخ…!!

    و تشوف الجماعة كبار و لابسين نضيف في كشك الجرايد تقول الواحد فيهم حيشيل الفاينانشيال تايمز و النيوزويك و شوية راي عام و سوداني كدا يقول يجي راسو عديل على (قون) و (سيد البلد) و شنو ما بعرفوا…

    بعدين يا اب أحمد عاين لي اسياد القصب و أكشاك الجرايد و الأولاد البيبيعوا الأعلام ….

    يضيعوا !!

  2. عزت كتب:

    ممكن يا أب أحمد نتم ليك العنوان

    أتركوها انها ماسورة…!!

    أصلو باقي ماسورة دي بقت شايعة على ودنو..!!

  3. aflaiga كتب:

    اب احمد : انت كرهت الكوره معناتا الكوره بقت ما سمحه لانو اعتدنا انك تحب الحاجات السمحه بس يا راقى .
    تعرف يا اب احمد انا كنت زعلان من ابوى لحدى قريب ده لانو حمانى الكوره وافليقا كان زول لعيب درجه اولى فى نجوم امبده وود حريف لكن الحمد لله انو الحاج دق جرس فى القصه دى وبطلناها لعبا ومشاهدة . تعرف اخوك كان مالى البيت شعارات ورسومات لى ناس تنقا وكندوه ووليد طاشين وشمس الدين والحاج كان زعلان من المواسير ديل لحدى ما جات الانتخابات وبحمد الله علقنا صور الشجره فى كل مكان لمن حمودى قال لى ( يعنى عملت شنو ما نفس راى ابوك مواسير فى مواسير ) ههههههههههههه الود ده التقول متربى فى تشيكوسلوفاكيا ؟؟!!!

  4. aflaiga كتب:

    ملحوظة /: اذا كان الحاج شايف ناس تنقا وكندوره وطارق وبريمه واب عنجه مواسير كان حيقول شنو عن حقيننا الاسى ديل ؟؟؟؟
    الحمد لله الذى لم يجعله يشهد هذا الزمن لانو كان حيخلى حمودى يلعب اسكواتش ّ!!!

  5. ودالزبير كتب:

    طارق

    غايتو إعتزلنا دخول الإستادات لحدي ما الحال ينصلح واًصلاً الزول بيشجع ليهو كم فريق في كم دوله يعني مثلاً عندك العبد لله مضروب في إسبانيا جيث طار الدوري من فريقي المفضل ريال مدريد لصالح الإنفصاليين في برشلونه لكنني عوضت في إنجلترا حيث فاز البلوز بالدوري كما فاز فريق الألماني بايرن ميونيخ بالدوري مقابل خسارتي في إيطاليا حيث إبتعد اليوفنتوس عن منصات التتويج لصالح الإنتر أما فرنسياً فالواحد بيلقي نفسه مع ناس مرسليا من زمن ناس عبيدي بيليه … عربياً الوضع بالنسبه لي أكثر من جيد حيث فاز الأهلي في مصر بالدوري والهلال في السعوديه برضو فاز بالدوري لنجد إن محصلتي هذا العام لا بأس بها وسط النكبات المحليه في الإسماعيليه وكادوقلي

  6. aflaiga كتب:

    ود الزبير : انت شغال بى قول الشاعر :
    نقل فؤادك حيث شئت من الهوى عشان ما يجيك سكرى فى الجوى
    نقل فؤادك حيث شئت من الهوى عشان ما تلقى مصرانك التوى
    مفتح لكن !!

  7. ودالزبير كتب:

    أفليقا

    أخوك كره المره التلفزيون زاتو كل يوم كوره كوره كوره ومرات يا زول بحضر ليك كوره معاده من كأس العالم1982 ولا دوري أبطال أوروبالمن زين الدين زيدان جاب قونه الرهيب داك في بايرن ليفركوزن

  8. aflaiga كتب:

    ود الزبير : اوع بتكون بتساهر مع الكوره لحدى قريب الصباح وبعد داك تنوم من الارهاق لانو ده البكره النسوان فى الكوره عرفتو شنو التحكيم طبعا ..

  9. ودالزبير كتب:

    أفليقا

    الخبير البيشاوي أخباره شنو بالمناسبه دي ؟؟؟؟؟؟؟؟؟ هههههههههههههه

  10. حاج أحمد السلاوى كتب:

    أخونا أب أحمد .. وبقية صفوة الأخيار ..سلام
    أذكر قبل سنة أو اكثر كان فى بوست حار بين أخونا شكسبير وأخونا الزووووووول وما بينهم كان هناك ولدنا مشاكل والموضوع كان عن كورة بين الفريقين السودايين العظيمين الكبيرين ذوى الشانين وذوى القطبين المرطبين المعروفين لدى الكثيرين من اهلنا الطيبين .أظنكم وأكييييد عرفتوهم..موش ؟
    كتبت فى ذاك اوقت وقلت إنو اللى بيحصل عندنا كروياً يسمى عبث صبيانى من أناس كبار وفى رأيى المتواضع إنو كل من يشجع الكرة السودانية فى العشرة سنوات الأخيرة الماضية شخص فاضى وما عندو شغلة وعاوز يضيع وقته وفلوسه فى الفارغة ..القايمين بالشغلة دى كوووولها ناس شغالين من أجل مصالحهم الخاصة التجارية وغير التجارية ..ماذا إستفدنا من اللاعبين الأجانب ؟ ملايين إندفعت بدون فائدة وعمولات دخلت الجيوب.. هل غار لاعبونا الوطنيين من هؤلاء اللاعبين الأجانب.. وحسوا مستواهم الكروى ؟ لم يحدث شىء ابداً..أموال سائبة فى أيدى أناس عابثين وشعبنا المسكين الغلبان ما عارف يلقاها من مين .. مين تجار الكورة ولا من المؤتمر الوطنى !!
    ولو قُدِر لى ( ودا ما أظنو يحصل ..طبعن )أن أكون مسئولاً عن القطاع الرياضى فى أمازونيا ساقوم وبالله التوفيق بالإجراءات التالية :
    -1-تسريح جميع هؤلاء اللاعبين والإداريين الموجودين على الساحة الرياضية والكروية حالياً ..وإلغاء الأندية الرياضية الحالية.. وكفاية فضايح ومآسى ( نحنا ناقصين بلاوى ؟ ) .
    2- إلقاء القبض وإجراء محاكمة علنية ( عدالة ناجزة ) لكل من عمل فى القطاع الرياضى خلال العشر سنوات الماضية ..لاعبين .. مدربين .. إداريين .
    3- إلغاء ما يسمى بالصحافة الرياضية العبثية وتسريح هؤلاء الصحفيين .. بل تقديمهم للمحاكمة
    4- تكوين لجنة متابعة عليا ( برئاستى طبعن..)من الحادبين على الرياضة فى السودان لتسيير القطاع الرياضى فى الفترة القادمة ..أعضاء اللجنة يجب أن يكونوا من قدامى اللاعبين المميزين ويمنع أى عضو خارج القطاع الرياضى .
    5- إلغاء كافة المشاركات الخارجية الكروية ..إلى حين …( طبعن لازم الإستئذان من بلاتر وزبانيته لتفادى العقوبات والغرامات نتيجة عدم المشاركة ).
    6- العمل على تجميع أكبر عدد من الناشئين الموهوبين ( وما أكثرهم ) ( ما بين 12 سنة إلى 15 سنة ) المنتشرين فى الحوارى ولم يجدوا فرصة للتدريب الصحيح ..
    7- إستجلاب مدرب عالمى متخصص فى تدريب الناشئين والتعاقد معه لتدريب وتعليم هؤلاء الناشئين اصول الكرة الصحيحة.. لتخريج لاعبين خلال ثلاث سنوات مؤهلين للمنافسة فى المحافل الدولية .
    وبلا هيصة وبلا لمة وبرطعة فى الفاضى ..يا تكون عندنا كورة صاح ..ولاّ بلاش !!
    الموافق لما جاء أعلاه ويؤيد .. يرفع إيده اليمين ..فوق ..!
    قال فيصل العجب .. قال!!!
    وقالوا على شقى ومجنون ..و ما عارفين إنو الوالى وصلاح إدريس هم أسباب جنونى ..

  11. التركــــى كتب:

    الغالى أب أحمد …. ياخ انا الكورة السودانية دى والله طلقتها من زمن ناس النقر وحمورى خليك من ناس العجب وسيدا مرورا بناس شيخ ادريس ومصطفى عبده … بس أعتقد اننا لو سعينا لترميم الأعطاب افضل مما نجهلها تماما لأننا لابد أن نرجع لها يوما وعندها أخاف أن تكون الفجوة قد اتسعت بيننا وبين من نتزيلهم ….. بقولو الكلام ساهل صعب التنفيذ ودا صحيح بس لازم نبدأ من مكان ما … عندى صديق عزيز عليا بلعب حاليا فى قطر ناس الهلال والمريخ كل اجازة عاملين ليهو أرضى السنة قبل الفاتت قلت ليهو ياخ كفاية غربة وتعال منها تلعب للفريق القومى وبين أهلك تتصورو رده كان( ياخ انا هناك بلعب كورة أجى هنا أسوى شنو ؟) والجملة عميقة جدا ومابتحتاج لتفسير … طيب السؤال : ليه نحن مانستفيد من لاعبين المغتربين فى فريقنا القومى ؟ أعتقد أن جزء من الأجابة هو ضعف امكانية الأتحاد

  12. زووووووول كتب:

    طارق اب احمدسلاااام
    جميع المتداخلين سلاااام
    اولا لا بد من التذكيربان كرة القدم متعتها انها مدوره !!! وهى دائره ما بين النصر والهزيمه وطبيعى جدا ان يخسر فريقك المفضل رايح جاى زاتووو .!!!
    اما البكاء على لعيبة زمان فهو من باب الحنين الى الماضى ليس الا لان هيثم مصطفى افضل عشرات المرات من ناس كندوره وتنقا ومصطفى النقر والعجب لا يمكن مقارنته بناس دحدوح وعوض الله انور وبدر الدين بخيت . والجيل الحالى زاع صيته واحترمه العالم بل واصبح افضل اللاعبين يتمنون الانضمام للدورى السودانى (الحضرى مثلا ).
    بل استطاع الشاب المستفيد طبعا ) واعنى الوالى من استقدام قائد الصفاقسى التونسى الحائز على لقب الكونفدراليه لعامين على التوالى الى الدورى السودانى كما استقدم اليجا تانا الماسوره وقائد المنتخب الزامبى واستقدم اوتوفستر المدرب المعروف على مستوى العالم .وليس بعيدا ان نشاهد رونالدينيو او كارلوس بيويل فى صفوف الزعيم .
    كسره : لا اتابع الدوريات الاوربيه كثيرا لكننى اعشق البارسا فى اسبانيا واكره الريال واعشق الميلان فى ايطاليا ثم اليوفى لكننى اشجع انترميلان اليوم بسبب مورينهو . وفى المانيا اعشق الاحمر بايرن ميونخ اما فى اقوى الدوريات فقد كنت ومازلت مانشستراويا .(يونايتد وسيتى ثم ارسنال ولا علاقة لى بالبلوز . فى مصر اعشق زمالك حسام حسن وشيكابلا . وفى السعوديه اتعاطف مع النصر واتحاد جده .
    كسره للحاج السلاوى :
    قال فيصل عجب قال !!
    اسى ما كنا كويسين يا عمك

  13. حاج أحمد السلاوى كتب:

    يا ايها الزوووووول الشفيف ..سلام
    هل تريد أن تقنعنى بأننا فى السودان نلعب كورة ؟
    يا خ العالم اليوم أصبح فى متناول يدك تصل حيثما تشاء فى ثوانى معدودات وبالتالى فنحن نشاهد مباريات كرة القدم فى شتى أنحاء العالم حتى الدول المحيطة بنا.. لاكين زى كورتنا دى يعمينا ما شفناها ..كورة شينة شناة شديدة … لاعبين لا يملكون من مهارات كرة القدم ألا القليل والقليل جداً..اجسامهم فى حجم العصافير علماً أنهم صاروا مليونيرات ففلماذا لا يهتمون بأنفسهم وتقوية اجسامهم..
    الدول التى بدأت مؤخراً فى مجال كرة القدم مثل ليبيا والأردن صارت لها مكانة كروية أحسن مننا .كورتنا فى السودان مضيعة للوقت والمال لا أكثر ولا اقل .. فإما أن يعاد النظر فى إعادة هيكلتها وتصحيح مسارها وإما يتم ألغاءها كلية وفضوها سيرة ..
    هل تقنعنى بإن فيصل العجب لاعب دولى ؟أين هو من الدولية وهو يبرطع داخل الملعب كالجمل الهائج ..
    أنظر إلى الكرة المصرية وانظر إلى اللاعبين وهم يتبادلون الكرة ترى الفرق بيننا وبينهم ..ويوم هزمنا الأهلى المصرى فى الخرطوم باللاعبين الأجانب قامت الدنيا ولم تقعد وظننا اننا قد بلغنا كاس العالم ..
    عزيزى الزووووول ..نحن لا زلنا بعيدين كل البعد عن المستوى المأمول لكى ننافس فى مجال كرة القدم وكل الدول الأفريقية التى جاءت بعدنا أنظر إلى لاعبيها فى المحافل الأوربية يصولون ويجولون ولا عبونا يجولون فى الكرة المحلية ..
    قال فيصل العجب قال !!

  14. ياسين شمباتى كتب:

    طارق..سلام..
    اوافق عزت بشدة على تغيير العنوان الى (دعوها فانها ماسورة)!! والله فضيحة لمن بهناك,,يعنى 3 فرق اتنين منهم يعتبروا عملاقين ودوليين يطلعوا شمار فى موية بلاعة فى بيت عزابة!! الحمدلله بس..

    الوالد السلاوى..سلام..
    طيب لو بتعرف فى الكورة كان عملت شنو!!؟؟

  15. حاج أحمد السلاوى كتب:

    ولدنا شمباتى ..
    إنت ما حضرت وكتين عمك كان بيلعب كورة ..نص عمرك ضايع ..
    بس ما بتدى حريف.. سكّينا الكورة دى لامن فترنا ..شى لعب وشى تشجيع لاكين ما حضرنا زمن ناس فيصل عجب سيدو البيلعبوا بالفلوس لعب ..ما كنا بقينا مغتربين وطاشين نزازى برة برة ليوم الليلة ..ماقلت ليك ما بتدى حريف ؟
    أما كورتنا الشينة دى ما بكضب عليك لا قاعد اشوفها ولا بتابعها ولا بضيع وقتى فيها لأنها ما بتستحق يشوفوها ..
    الزووووول قال ما بعيد نشوف ناس رونالدو ورونالدينو وميسى يجوا يلعبوا فى السودان ..يجو يلعبوا مع فيصل العجب والمدعو طمبج ؟ يا جماعة الخير.. الله ما شافوهو بالعين لاكين عرفوهو بالعقل .
    لاكين بعد دا بنقول ربنا يصلح الحال ويجيب ناس قلبهم على الكورة ويبعد عننا التجار ديل …
    آميييييييييييييييييييييييييييييييييييييييييييييييييييييين .. يا رب العالمين !

  16. طارق أب أحمد كتب:

    سورى يا شباب سافرت الأبيض كادوقلى و قريب جاى ببوست صور من جبال النوبه
    دعوها فإنها ماسوره
    عزت
    ناس القصب و اللأعلام يبيعوا طوب قدام الأستادات

    أفليقا رحمة الله على الوالد الذى خاف عليك من الكره رغم أنه شاهد على عصر كابتن على قاقارين و أمين زكى

  17. طارق أب أحمد كتب:

    السلاوى
    يعنى قلبتها رياضه جماهيريه , طيب برضو معاك
    أنت عارف إنو اللاعب بكون عندو لاند كروزر أو كامرى عادى جدا

  18. البشاوى كتب:

    كورة ماسورة ===============
    ودالزبير؛– البوست عن الكورة – جايب سيرتى قايلنى الخبير اتوفيستر ولا ريكاردو – انا رجعت من الغزوة الناجحة للديار المصرية سالما غانما بفضل المرشد الكبير افليقا-

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s