فكري يوم قال ليا

Posted: الأربعاء,19 مايو, 2010 by عزت in اخرى

فكري يوم قال ليا

مين أحلى من فوزية

بت خالتك الفي بحري

بتحبك من بدري

**

حلوه صغيره لطيفه

جميله وروحها خفيفة

ونّاسه كلاما لذيذ

مابترضى بي زعلى

**

لبحرى ماشيت هناك

لقيتا واقفه فى الشباك

قالت لي يا حبيبى يا عمرى

من بدرى مستنياك

**
قلتلها ليها يا ساكنه بحرى

قالت لي يا حبيبى يا عمرى

ابويا وامى قاعدين جوا

يالا اخطبنى و ربى معاك

**

خالتى كانت عارفني

اما ابوها كلمتوا التانى

قال لي مبروك عليك

حافظ عليها زاى نني عينيك

**

قول ليهو ليه ياعمى توصينى

دى بت خالتى وحبت عينى

حبها اصلوا فى قلبى جوا

والله جوا من زمان

**

الشبكة جبت لزوما

و الدخلة حددنا يوما

انشاء الله يا حبان

كلكم تبقو عرسان

_____________________

انتهت أغنية شرحبيل أحمد الفنان ثلاثي الأبعاد؛

الرسام الموهوب و ما شخصية (عمك تنقو و مرتو العازة) ببعيدة من الكواشف فهي أول مجلة للأطفال في العالم العربي، وهو الممثل في المسرحية الغنائية (نبتة حبيبتي) التي شغلت المسرح القومي لفترة و المغني ذو اللونية المتفردة و المنادي بتغطية (القدح) في الأبيات السابقة من الأغنية الجميلة الحلوة والتي سمعتها بالأمس في احدى قنوات الاذاعة….. و لعلنا يمكن أن نجعلها مدخلا لهذا الموضوع و هو زواج الأقارب و ما رؤيتك عزيزي و عزيزتي القارئة و هل من قصص تحكوها لنا…!!

و كان مافي هل من قصص و عبر استفدت منها أيها (الكاشف) من قصص عمك تنقو والعازة و هل في بالك احدى القصص..!!

زي دي

عمك تنقو بقى سواق
يسوق في العالي والدقداق
قال يا جماعة انا فنان
اسوق من كوستي لبورتسودان
ركب اللوري عد وفات
من امدرمان بطريق شمبات
يظهر عمنا كان مبسوط
خلى سواقتو وسف صعوط
خلى اللوري يلف ويدور
وسط عربات وقفن طابور
سايق ماشي بدون ترخيص
مافي خلاص من البوليس

Advertisements
تعليقات
  1. عزت كتب:

    غايتو أنا ما عرفت انزل الأغنيةكان دايرين تسمعوها
    الا نطلب مساعدة من ود الزبير و الا الأدمن
    تحياتي

  2. لو فى النت ادينى اللينك بتاعا ولو عندك فى الجهاز – رسلا لى اتاش فى الايميل .

  3. ابكرون كتب:

    اسه يا عزت يا عزت الذكرك بت خالتك الفي بحري شنو …؟ اكيد خيط قديم …..انت الامم المتحدة ما بتقرأ الكلام ده ؟ ده مشروع عفاره جاهز ……المديده الحاره …..بت خالتي الباااره ..قال شرحبيل قال…
    ناس بحري فعلا ناس حلوين وظريفين وطيبين وشنو ما عاااارف …غايتو نحن ناس امدر من زمان بنقول …..يا بنات بحري قالوا بتحبن …نحن من مكي يلا حبونا…..!
    ————–
    عمك تنقو ببيع طرابيش
    الجوز قرشين وكمان بقشيش
    قال لازم امشي حديقة النزهه والحيوان
    وارجع جيبي يكون ملياااان
    شيتا كف ختف طرابيشو
    عمك حرد مستني قروشو
    ——-
    يا حليلنا طبعا السلاوي ما حاضر تنقو ويكون دفعة بطوط وميكي وسمير

  4. خالد مدني كتب:

    ميكي وسوبر ميكي وميكي جيب وسمير ويوم من الايام في حياة عصام وتان تان وسوبر مان وطبعا الصبيان والمغامرين الخمسة والشياطين ال13 … لكن مجلة صباح السودانية كانت الاجمل والامتع … وطبعا فنجاط كان المفضل عندي .
    ويا عزت زواج الاقارب – ولا اعمم طبعا – ما حبابو تب مع اني من عائلة شنكل ابو الشناكل .

  5. ودالزبير كتب:

    عزت المرطب

    هاك ( فوزيه ) لشرحبيل لكن طعمتها ليك بعبير صالح

  6. DAKEEN كتب:

    ود عمي وانا وانا مادايرا
    تمسكوا الحمة الملاريا
    اشيل عمودي واجي زايرا
    ود خالي انا ما بدي …. ولا العكس انا ما مذكر
    في تلك الفترة وكنا يفعا في الصف الثالث الابتدائي بعدان بدأنا استيعاب الكلمات المكتوبة وزاد ولعنا بالقراءة كانت مجلة الصبيان وخصوصا عمك تنقوا ما يصاحبها من الوان ورسومات تعبر عن الحالة المزاجية له .
    كان الوالد رحمة الله عليه يعمل في احد المصالح الحكومية ولا نراه الا يومي الخميس والجمعة لعدم توافر المواصلات حيث تبعد حوالي 55 كيلومترا من قريتنا . وفي يوم الخمس منذ الساعة الواحدة نحن في انتظاره في الزلط حيث ياتي محملا بما لذ وطاب من طيبات الخرطوم وزنك الخضار ،،،، وكانت هديتنا في اول كل شهر مجلة الصبيان، وتدب الخناقات والمشاكل بيننا من يقراءها اولا ،،، كنا اربعة في المرحلة الابتدائية ثم يحكم الوالد – الاكبر اولا وانا اصغرهم وكنت مستسلما لقرار الوالد حيث لا مرد لكلمته .
    وبعد انتهاء القراءة يوم الخميس طبعا وتبادلها مع الجيران والاقارب يوم الجمعة وياتي يوم السبت تكون قد تعفرت بالزيوت والطبيخ وما جاورها مما يعلق بالايدي اثناء القراءة تكون من نصيبي حيث اخذها معي الى المدرسة خلسة من اعين المعلمين فشنطة المدرسة المصنوعة من الدمورية مقدسة لا يدخلها الا الكتاب المدرسي او الكراسات .
    وفي فسحة القطور تكون بين ايدي زملائي ويتم تبادلها خارج الفصل وما تزال تركض من يد الى يد الى ان يصدر العدد الجديد منها، وحينها تكون قد اسلمت الروح عد الغلاف اللماع الزاهي الالوان وما حفظناه من نوادر عمك تنقو .
    وفي تلك الفترة نشط حبنا للقراءة فكان الاخ الاكبر من المولعين بالقراءة ومحبا لها غرس فينا هذه الهواية ، لم تخلو من بعض الكتب التي كان تتداول في تلك الايام وبعد تطور لدينا حب القراءة وانتقلنا الى المغامرين الخمس والشياطين ال 13 حتى وصلنا الى الرويات البوليسية وفي مرحلة لاحقة روايات احسان عبد القدوس وزمرته من الكتاب الذين اثروا المكتبات العربية.
    كانت المكتبة تحتل ركنا قصيا من الدار حيث لايمكن الوصول اليها الا باذن مكتوب وتعهد باعادة الكتاب في الموعد المحدد ومع انتشار تبادل الكتب وضياعها احيانا .
    في المدرسة الثانوية والمكتبة شبه مقفولة كان استاذ اللغة الانجليزية المحنك هو الوحيد الذي يستعين بها وهو من حبب فينا القصص باللغة الانجليزية التي ساعدت كثيرا في تحسين مستوانا في اللغة الانجليزية . الذي لا زلنا نراه ضعيفا مقارنة بمن سبقونا في نفس المدرسة .

  7. طارق أب أحمد كتب:

    دوك
    الفنان الراثع شرحبيل غير أنه رسام و ممثل و مغنى فهو أيضا شاعر و عازف و ملحن

    لا أنسى يوم غنى بمعيةالفنان الأمريكى هارى بلافونتى أغنيه الشهيره وونا جو هوم قاعة فأجادها بشكل أذهل صاحبها الصداقه نداء السودان 86

    بس لكن هو ليه عرس تانى فوق قريبتو

  8. زووووووول كتب:

    عزت بيقوريتش سلااام
    زواج الاقارب وغطاء القداحه كان فرضا حتى وقت قريب جدا حتى ان بعضهم كان يرغم على ابنة عمه ارغاما يدعوه الى البكاء فى يوم الحنه زاتووو.
    وواحدين يعمل ليكا فيها الشريف مبسوط منى
    يا ولد انا داير اديك بت عمك نفيسه دى
    ـ لكن يا حاج الزوول بعرس اختو (لا بالله ).
    ثم جاءت الديمقراطيه (ما عارف الكم ) واصبح الاباء لا يتدخلون فى اختيارات ابنائهم وتقلصت القداحه حتى ابنة العم التى يتم زواجها يكون عن قناعه وحب وكدا .
    كسره : غايتو يا عمك بنت العم بتركز معاك شديد لو اكلتا تراب تاكلو معاك والخمسه فوق الاتنين . لكن الغريبه ممكن تكلم ليكا امها ولا عمتها ولا اختها وبعد داك عينك ما تشوف الا النور (اجى ناس فلا ن نسيبى عليهم جنس بهدله … الخ ) .وما التوفيق الا من عند الله .
    عمك تنقو افندى حريف
    قال الليله غدانا رغيف
    راح طوالى على الطابونه
    شايل الكيس وكمان بصطونه
    فوق الصف حصلت شكله
    قميصو اتشرط وعدم الفتله
    رجع البيت بروح منكسره
    وقال للعازه اخير الكسره

  9. عزت كتب:

    شكرا يا أحباب على المداخلات الثرة

    لا أخفي عليكم سرا ان قلت لكم اني معرس من برة العيلة و سعدت أيما سعادة بذلك الزواج لأنه جدد الدماء في العيلة و كبرت العائلة بس كمان كترت المناسبات… ما بقت من جيهتين

    بينما يرى الكثيرين أن زواج الأقارب (ربما) بسبب المخاطر التي تنجم عنه من تشوه للأجنة، لكننا و الحمد لله لقد أصبحنا في القرن الواحد والعشرين واستطعنا إلى حد ما تجاوز العادات والتقاليد التي تلزم ابن العم من الزواج من ابنة عمه.

    لكن ما ضر لو كان العم معرس من قبيلة و أبوك معرس من قبيلة ثانية أعتقد أن فرضية التشوهات التي قالوا عليها ربما لا تحدث هنا و ربما تحدث من أي زواج آخر فالقضية ما ثابتة، و لعل الناس كانوا يتهربون من بنت العم لان زمان كان معظم الأهل يسكنون في حيشان واحدة و يختلطون كثيرا فتكون بت العم زي الأخت… لكن تفرقت السبل بالناس و صار لكل بيت منفصل و مرات بت عمك كان لاقتك في الشارع جايز ما تعرفا….

    و بعدين الدم بيحن و يمكن تكون أفضل لك من غيرها

    ثم تانين أعتقد أن الزواج من بني القربى أصبح ملحاً اليوم، أي لا بد من إلزام ابن العم أو ابن الخال بالزواج من الأقارب بسبب معاناة الكثير من قلة الزواج، فالشاب لم يعد قادراً على تلبية رغبات الفتاة الغريبة التي تريد المال والحب والجاه وكذلك الفتاة أصبحت تعاني من العنوسة بسبب عدم إقدام الناس على الزواج بها لأنها فقيرة أو بسيطة.. الخ.

    فبرأيي إن زواج الأقارب صار أمر ملحا في أيامنا هذه وليس له أضرار فالتطور التكنولوجي والطبي خفف من أضرار زواج الأقارب،

    و أخيرا كل شيء بيد الله و البنية الح تعلق قلبك……………………

  10. عزت كتب:

    نجي لي شرحبيل الفنان و الملحن و المؤلف و الرسام و كلو ربنا يديه العافية كمان و كمان … و ما يعرس كان عرس يا أب أحمد يقوم يجيب ليهو فنانين سغار كمان… فالشاهد أن أولاده من زوجته الأولى التي كانت تعزف معه الجيتار كلهم طلعوا فنانين و بتاعين سيرك و رسم و حاجات من دي….

    و فعلا مجلة الصبيان دي كانت حاجة تمام و كل قصصها عبر و مواقف طريفة و استطاعت أن تملأ ذلك الفراغ بجدارة في ذلك الزمن و تربعت كأحسن مجلة للاطفال و قتها لا يستعمل فيها كمبيوتر و لا يحزنون فهي جهد خالص لشرحبيل و زملائه في تلك الفترة….

    و استطاع شرحبيل أن ينفذ الى العالم العربي و كمان ناس (منير) سرقو الليل الهادئ بتاعتو و عاملين بيها جو و للفنان مريدين و معجبين فما عبير صالح كما ذكر ود الزبير ببعيدة فشغلها نضيف و صوتها حلو و الولد المعاها برضو……

    التحية للفناتن شرحبيل و التحية ليكم يا مدونات و يا مدونين……

  11. حاج أحمد السلاوى كتب:

    أخونا المرطب ابو عصمت ..
    دحين باقى ليك أخونا دكين مش حقو نرفعو إلى درجة ومجموعة الكواشف ..الزول دا حضر زمن مجلة الصبيان .. شنو رايك ؟ .
    مجلة الصبيان دى ذكرتنى طرفة قديمة ..يقال إنو قديماً و فى احدى مدارس بنات المرحلة المتوسطة ( ىنذاك ) قالت المعلمة للطالبات نحن قررنا إنو نجيب مجلات للإطلاع .فاى أنواع المجلات تحبو نجيبها ليكم ؟
    فكان الرد وبإجماع كل الطالبات وبصوت واحد وعالى …الصبيان .. الصبيان .

  12. حاج أحمد السلاوى كتب:

    تصحيح .. ( آنذاك) .

  13. عزت كتب:

    هو أريتا لو الصبيان براها ياخ دا قال
    (فشنطة المدرسة المصنوعة من الدمورية)
    يعني دا من زمن الخرتاية … لا لا دا كاشف سيوبر
    مبروك علينا

  14. DAKEEN كتب:

    الاعمام السلاوي والدكتور
    يعني دا من زمن الخرتاية … لا لا دا كاشف سيوبر…
    __________________________

    الكواشف ما بنلحقهم وشرف لينا نكون مع الكواشف بس كواشف مودرن ،،، الكلام دا ما بعيد
    ويا حاج السلاوي كلام الصبيان دا بجيب كلام لانه حبوبة قالت : حليل الصبيان البكسروا العناقريب .
    وشنطة الدمورية دي ما بعيدة يعني لازمتنا من سنة 80 حتى 86. واحسبوا الباقي.
    بعدين الخرتاية دي كان عندها مهمة ثاني غير المدرسة بعد ما نجي من المدرسة طبعا بربطوها للغتم عشان ما يرضعن ،،، طبعا في حالة عدم الصرار. كلامي يكون خارم بارم لكن اهل العوض الكواشف بفهموه .
    وقصة فوزية دي بنسل فيها السكاكين ،،،، والعكاكيز وما بنرضى بناتنا يديهون للغربا بس اختلف الوضع الان….وصار كل اهل السودان اولاد عم . والدول المجاورة والشقيقة والصديقة .
    بس قصة فوزية دي حكاية وحكايات وشرحبيل موهو الزول الهين ولا لين البنتكلم عنه نحن اهل العوض بالذات خلونا في عرضتنا وصقريتنا و بطاننا وشبالاتنا التي اندثرت وسط التطور السريع الذي شهدته مجريات التزاوج والتلاقح والوعي بمخاطر الجينات والوراثة . برغم ذلك فوزية هي الاصل فهي بنت الخال والعم واختك وخالة وعمة اولادك وحساب العلاقات والشربكة في الحسابات فامي بنت خالة ابوي والذي بدوره ابن عمتها بنت خالة ابوها ولما نصل في الاخر تلقى امك عمتك وخالتك وابوك زاتو خالك وعمك وما تعرف تحسبها ولا بي بنظرية رياضية ولا برنامج شجرة العائلة الفي الكمبيوتر ما يحلها .
    طلعنا من المودوع بتاع الخرتابة والكواشف والكاشف صاحبي وكشف العرس وكشف البكاء. وكاشف الكشف الفي الحفلات. والكشافة البحرية والجوية والبرية زاتو .

  15. الغبشة كتب:

    ابكرون قلت لى بنات بحرى كانوا بقولوا شنو؟ ولا انت كنت بتقول شنو؟

    على العموم سمعنابحرى ياسر الهوى ولا كانوا قاصدين الهواء ولا الهوا ؟؟؟؟؟؟؟؟؟؟؟؟
    عمو السلاوى هناك جائزه قيمه لو عرفت انواع الهواء ى وا التلاته

    والى لقاااااااااااااءءءءءءء
    نحن طبعن من زمن كونان وكده ولا شنو ياهبدوز وشمباتى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s