اها ما قلت ليك هناى ما طلع .. هنايه

Posted: الإثنين,24 مايو, 2010 by aflaiga in اخرى

طبعا اول شيئ اى هناى بيكون قرا العنوان بيكون اعتقد انو هو هناى المقصود هنا بالهناية دى  وبيكون طوالى ضرب لى هناية قال ليها انتى كلمتى الهنايين ديل وطبعا هناية بتكون قالت ليهو لالا والله معقول اورى او اكلم زول عن هنايتنا ؟؟!! ويقوم يقول ليها طيب هناى ده بيتكلم عن شنو ؟؟ تقوم تقول ليهو ياخى هناى ده بيتكلم ساكت ولا اقول ليك بيكون قاصد هناى وهناية ما برضو عندهم هناى انت قايل نحنا برانا العندنا هناية ؟؟ ويقوم هناى يتطمن على رقبتو ويضرب لى هناى يقول ليهو اسمع انت هناى ده قاصدك انت ولا شنو ؟؟ يقوم هناى التانى يقول ليهو ليه هو قال شنو ؟؟ كيف قال شنو ما اتكلم عن الهناية البين هناى وهناية !! طيب ليه انت طوالى مشيت لى هنايتى البينى وبين  هناية ما يمكن قاصدك انت وهنايتك المع هناية ؟؟!! لالا ياخى انا ما عندى اى هناية مع هناية ولا مع اى هناى انت قصدك شنو وليه فكرت فى الهناية دى بالطريقه دى ؟؟؟ وعووووووووووووووووك – المهم بعد شوية الشعب كلو اتضح انو هناى وعندو هناية مع هناية ؟؟ اسى كدى اى هناى فيكم عندو هناى مع هناية يبقى شجاع ويقول ااى انتو قاصدنى انا وانا فعلا عندى هناية مع هناية — ومن كان منكم بلا هناية فليرمها بحجر .. دعونا هنا نتناول هذه الكلمه ( هناى ) وكيف تسربت الى قاموسنا السودانى وصارت مكونا اساسايا من مكوناته وبالمره كمان اى هناى يوروينا هنايتو الخايف عليها !!!

Advertisements
تعليقات
  1. aflaiga كتب:

    طبعا يا جماعه حتقولو افليقا ده جن ولا شنو ؟؟
    الجاب السيره يا شباب :
    صديقى س ارتبط عاطفيا مع صديقتنا ن برغم التحذيرات من انو ن دى قديييييييييمه فى شغلة الريده والارتباطات وحسبك فقط ان تدق كليك فوق اسما بيوديك لمليون رابط تانى كلها مرتبطه بالموقع المستضيف – اها صديقى س ده ابوهو عمنا ك راجل حبوب وبهجه جدا جدا وكان زول بتاع ارتباطات تقيله زمان وفى يوم من الايام كان عمنا ك عازم جماعه اصحابو فى مطعم زى سيدى بيه بتاع ناس ود الزبير وفى نفس اللحظه كان صديقى س وصديقتنا ن محتفلين بالفالانتاين فى نفس المطعم – وقوم يا عمنا ك اكحل صديقنا س مطرف واخر حنان وقوم اقبضو متلبس :
    ك : يا ود الجابك هنا شنو ؟؟
    ن : سجمى عمو ك انت حى لسه ؟؟
    ك : سجمى بتنا ن ؟؟ انتى حيه لسه ؟؟
    س : انتو الاتنين حيين احىىى انا ده !!!
    وفى المساء كان صديقى س يحكى لى عن الهناية بتاعتو الطلعت كانت هناية الحاج !!!!
    وقومى يا ن فوتى ..

  2. monamie كتب:

    افليقا
    هههههههههههي والله ضحكتني رغم انني معكننه من الحر العجيب ده!

  3. monamie كتب:

    بس يا افليقا ما وضحتا لينا ن كانت هناية ك عشان كان ثري عندو شركات وكدى ؟ وخلتو ليه وبقت مع ولدو ؟ يعني التفاصيل مهمه وفي حلقات مفقوده !

  4. aflaiga كتب:

    مونامى : انشاء الله دايما مبسوطه .. تعرفى الهنايات لا تاتى هكذا صدفة كما الاشياء فاى هناية يجب ان تتوفر لها مقومات معنيه كى تاتى وكل هناى بالهناية يعرف ولو مسكنا الهنايات بنلقى انو اى هناية لازم يكون عندها طرفين ( هناى – وهنايه ) وفى ظروف معنيه يتحول فيها الهناى لبتاع فحين يكون هناك رضا عن الهنايه تسمى هنايه وحين تفقد الهناية الرضا تسمى بتاعه فدوما نقول بتاعه للحاجه الما محبوبه ونقول هناية للحاجه المحبوبه – عندك مثلا لو فى بت صحبتك وبتحبيها بتقولى ليها يا هنايه – واول ما تزعلى منها يتقولى البتاعه دى الاسما منو ؟؟

  5. aflaiga كتب:

    مونامى : بالنسبه للهنايات فهن دايما خاينات الا من رحم ربى منهن ..
    فى قصتنا الفوق دى اختنا ن طبعا قديييييييييييمه فى الاربتاطات وعاصرت زمن الشاعر ك وبقت نونه معاصره على وزن شاعر معاصر – ولما انفتحت ابواب للشعر الحديث غير المرتبط بقافية معينه من شاكلة ورميت اقدامى هناك وليس لى غير التمنى ومحل الرهيفه تنقد !! اعجبت اختنا نون بنمط الشعر الحديث الذى استصحبها كما هى دون تدقيق فى شهادات الميلاد او اسئلة على شاكلة انتى دفعة كم ؟؟ الكلام ده فى ظل حب اخونا وصديقنا س للمعتق القديم فى دلاله ظرفية لزمان افتقده وحنان اموى مش من العصر الاموى يعنى من الامومه تحت شعار العافيه فى الرضاعه الكافيه ربما !! فالحته دى خلقت ارضية مشتركة بين اختنا نون واخونا س فنمت بينم العلاقه دى متجاوزة لكل الاشكالات والوصفيات الماديه من شاكلة سجل لى شركاتك ما انت العسل ذاتك ..
    ولو عندك اى اسئلة فى النص فى حد ذاته احيلك للاخ عبدوش المختص فى دراسات صراع الحضارات وصاحب اطروحة تعال بالعندك .
    اترك المايك لاخى عبدوش ..

  6. حاج أحمد السلاوى كتب:

    غايتو عليك جنس هنايات !!

  7. aflaiga كتب:

    شباب : البوست ده بصراحه بوست بتاع هترشه يعنى اى زول ما مهترش ما معانا او اى زول ما عاوز يعترش بعيدا عن ساس يسوس ما يجينا بى جاى اتفقنا ؟؟
    هترشه سغنتوتيه :
    عندما ياتى المساء تبدا هنايات الزمن الوردى فى تحسس مكامن الجمال لديهن كمحارب قديم يتحسس سيفه فى غمده ليخرج للملا ويتحدى قائلا من اراد منكم ان تنزف ريالته ويسيل لعابه فليتبعنى وراء ذلك البنش ! فيبدا اسرى الجمال المندلق فى التبارى فى اظهار انجذابهم غير الصوفى لتحديات العصر المغولى فمنهم من ضاع وراء البنش ومنهم من ينتظر وما خلا بنش من خلفه مطالب ..

  8. aflaiga كتب:

    السلاوى : اها انت بالذات اسى لو ولدنا سهيل ولا مشاكل جو حايمين فى بحرى وانت عارف ناس بحرى بيتحبو كيف ؟؟ اها مش بيكونو محتاجين لخارطة طريق عشان ما تقوم تتفاجا بى :
    ن سهيل : سجمى عم السلاوى ؟؟
    السلاوى : سجمى نوووووووووون ؟
    فلازم تدى اولادك خارطة طريق لمسارات كوابل بحرى ومسارات منهولات الشعبيه والصافيه عشان ما واحد من اولادك ديل يقع ليهو فى منهول يكسر كراع حنانو .. ولا شنو يا شباب الوقاية خير من الصدمات والسجم خشمى ..

  9. حاج أحمد السلاوى كتب:

    يا شكسبير ..
    اخوك دا الليلة شرب كام شامبيون ؟ الحكاية طلعت ليهو فى راسو ..حسه شوف جنس الهترشة دى .
    نطالب بمنع مشروب شامبيون ولا يباع لآقل من 18 سنة ..

  10. aflaiga كتب:

    والكلام ده مش للسلاوى بس وكده ده كلام لى كل الاعمام يا عوض دكام : ابكرون يسلم الرايه لى البعدو ويوريهو خطط العدو والقوات الصديقه واذا الواحد انجرحت مشاعرو يسعف نفسو كيف ويتقدم ولا لا واذا اتقبض اسير ريد اى هناية يسوى شنو ؟؟؟
    وبشار برضو يورينا الدومه بتجيب اللومه متين وياتو دومه بتعشش فيها البومه ؟؟ وياتو دومه مختومه وياتو دومه محرومه من العيزومه عشان نعرف كيف الدوم بالردوم ؟؟
    وبرضو سنكل يورينا زمن جدول الحصص بتاع الجصص وترتيب القصص وكيف انو طوال العشرين سنه ما تلخبت الجدول ولا اتعاد من الاول ويا حبيبى لو تقبل بكره بجيك مدبل ؟؟!!
    ونيام برضو يورينا كيف يا حبيبى نحنا اتلاقينا مره جوه مدنى وبره مدنى الف مره ؟؟1
    وود الخلا برضو يورينا كيف يعشق العبد مخلوقا وهو يعشق الخالق والخالق رازق وكيف ان بعض المخلوقات تشغل المخلوق عن عبادة الخالق بل يصبح البعض عبدا للمخلوق !!؟؟
    وسهيل برضو يورينا كيف انو نستعين بالدبل كبين فى مد الرجلين لابعد من اللحاف اللعين ..
    وستريكر ده بنعفيهو لانو الادمن وما بنقدر على فراقو لو حصل ليهو حاجه ..
    وعزت برضو يورينا كيف التلوث بيعمل عميلو بين الهنايه والهناى وكيف بننضفمجارى الريد من الشعاب المرجانيه ؟؟
    وبشاوى الايامات دى لى هنا ( اليد تتجه للحق مباشرة للتوصيف ) !!!
    اها يعنى الدعوه عامه

  11. aflaiga كتب:

    عمو السلاوى : بطل الجرس .. 18 بالقديم ولا الجديد ؟؟ احيى ال 18 وال 19 وال 20 وال 27 والقماير والجخيس والخدير ووسع سكه وطول بالك وخمسه دقايق وخور ابو حليف ذاتو ….

  12. aflaiga كتب:

    ذات مساء :
    يحكى صديقى س :
    انه لمحها فى حفل زواج صديقى ك كانت الخصلة تتدلى من جانب وجهها الايسر لا ادرى لماذا تذكرت مباشرة العلامه فى البوريه حذا الحاجب الشمال ربما لاننى اعشق البوريهات ام لانها كانت ترمى تلك الخصله باستفزاز يستفز امثالى من عشاق البوريهات والخصل المجدوعه شمال ؟؟! قبل ذلك اليوم كنا نناكف بعضنا فى الكتابات كان كيمياء فكرها دوما يتفاعل مع فيزياء هترشاتى كانت عميقة الاحاسيس ظننت لبرهه ان ما بيننا يمكن ان يمتد من العلامه حزا الحاجب الشمال الى ان تكون كالقيطان فى شمال ضلعى الايسر مكان القلب منسابة مع كفة البنطلون لا يفصلنا الا تلك الصفاره التى اعلنت ميعاد رحيلها الى مستقبل اخر بعيد عن مرمى نيران عشقى المتهور .

    ويحكى صديقى ص :
    جلست والحزن بعينيها تتامل شارع النيل كنت من عشاق مسطبة الفندق الكبير حين كان كل شيء فى هذه البلد كبيرا تخيلو حتى فندقنا الكبير باعوهو لى الضمان الاجاماعى من يومها عرفت انه لا ضمان لهذه الدنيا المسطبة كما هى يجلس عليها بوليس السياحه اااه من السياحه بل ااه من البوليس .حتى العشق الذى يمارس هناك الان من شاكلة حول لى رصيد ونتلاقى بعد بكره !!! تخيل انا احول رصيد اليله ونتلاقى بعد بكره ليه يعنى ما نتلاقى الليله واحول ليك رصيد بكره ؟؟ قالت لى انت عوير وكان ما حولت لى ؟؟

    يحكى صديقى ع :
    ولا اقول ليكم بعدين ..

  13. خالد مدني كتب:

    يا افليقا بشاوي الايام دي لي هنا ( اليد تتحرك افقيا عند الخط الفاصل بين الجبهة وشعر الراس )

  14. aflaiga كتب:

    وبعديييييييييييييييين :
    يحكى صديقى ع :
    كانت جارتنا بت معطونه بريحة النيل التوب تقراهو بعنوان جيل بيقول يا حليل العفه العزه خليل – شاغلتها يوما وهى تحاضر ابكر الفورواوى عن معنى مدة الصلاحية فى عبوات السادرين – سادرين شنو البتفتشى فى صلاحيتو ما تشوفى الساردين البره نشف من الشره !! ضحكت بطريقه مخيفه خليط بين الدلال والاحترام والسخرية ليست كضحكات اليوم التى يتم بعدها لف الجميع بملايه !!! قالت لى وهى تتجه صوب باب البيت وانت يا مستر ساردين قصتك شنو ؟؟ قلت لها بجراءه عاوز مقابله ممكن ؟؟ التقينا فهى واضحه المعالم خرجت من لقائى معها اننى لن انال منها سوى تعب الدماغ حدثتنى عن هموم الجيل واغتصاب الفكر باسم الدين وحقوق الشباب وكيف ان المراه اصبحت سلعه لم اتفاجا وانا ارى صورها بعد ومن طويل معلقه فى احد الاعمده مرشحه عن الحزب الفلانى لم اكن اعتقد انها بذاكره قوية كتلك التى تذكرتنى بها سالتها متذكرانى يا استاذه ؟؟ ايوه بالحيل مش مستر ساردين ؟؟؟ تزوجنا والان نحن اسره مناضله نصر يوميا ان نوعى جدو ابكر بمراقبة تاريخ الصلاحية فى العلبه لحفظ حقوق المستهلك .. اتمنى الا تصبح ابنتى سميره كامها لانها ببساطه لن تتزوج قبل الاربعين !!!!

  15. aflaiga كتب:

    خالد مدنى : عليك امان الله شعر راس يقيسو بيهو ماف الايامات دى !!! من الشوفه الشعر وقف وما قعد جا هوا شالو !! قول بين الصلعه والجبهه ..

  16. monamie كتب:

    افليقا عندي تعليق لكن خلي لباكر عشان المسلسل التركي بدا ىلا تصبح علي خير وموضوع جديد و يسلم قلمك

  17. ابكرون كتب:

    افليقا : والله خيالاتك الساردينية دي بتصيبنا في مقتل ما تكلما زولة زولك دي قول ليها ابكر بقي يحب التونة بدون صلاحية مده …ما عندك هنا زول من الشرق عشان نحكي ليه و ننوره كيف (يسعي بين العشي وسعدابي) ….ونحكي ليه عن ( الدسم في خيران وروابي تهميم)…..و (التقنين في الإستنشاق والتمسح بالشكوين )
    مون : خليتي السياسة والانتخاصات….قبلتي علي الهنايات والبتاعات بتاعة افليقا ؟

  18. البشاوى كتب:

    السلاوى — شامبيون شنو البيقوم بى افليقا – دة الا شغل روسى عديييل عشان ينعنش بيهو حبة – لكن العليهو على الخلا ماود الخلا – دة مضروب فى الانكل ومصر يلعب مباريات دولية رغم نصائح اطباء الفريق ناس استرايكر قالو ليهو تاخد اجازة من الملاعب وتقضى فترة نقاهة فى مكة والمدينة – لكن قوة الراس ياها بتسوى فى صاحبا الهنايات دى – كان الله فى عونو ورفيقو خالد مدنى — اما ماأشار اليه الرفيقان واشارة اليد الى الحلق دى أكون شبعان لى حلقى من القراريص 6 بوصة وكدة — ولا رايك شنو يافكفك ؟؟؟؟

  19. ودالخلا كتب:

    سلام ياقبيلة،،
    أفليقا أنا كنت عارف أنو الزول بواو واحدة بيرك الفيل، لكن ما كنت قايل الفيـــــــــــــــــــــــــــــــــــــــــــل بيركب الزول زي ده !!!!!!!!!!!

  20. مشاكل كتب:

    سلامز مربع

    عفوا .. للخطأ المطبعي

    http://www.facebook.com/pages/htrshat/112623218779735?ref=sgm

  21. ودالخلا كتب:

    زمان كان في فيلم من روائع السينما العالمية أسمه The Deer Hunter، والآن في مسلسل من روائع سوداننا أسمه Aflaiga rode the Elphant وممنوع علي RWD ومسموح به فقط ل FWD

  22. ابكرون كتب:

    مشاكل : والله باااالغته حمارتنا دي مبشع بيها انترناشيونااااال…حرام عليك الله بسالك منها…

  23. محنك كتب:

    هناى وهناية
    الاخ لاخوه : انت يا ع ولدك أ دا ما تعرس ليه بتى ف دى ما بقت للعرس
    اخوه : يا ع يا اخوى ارجى البصل دا نقلعوا ونعرس للاغلف
    بعد بيع البصل
    اخوه : يا ولد امش الترزى كلمتوا يعمل ليك جلاليب وعراريق وسراويل واشترى ليك طواقى عرسك بعد شهر على بت عمك ع / ف ( دا لو الاعمام كتار
    الولد يا سلام قلتو كدى حاضر

    اخوه : يا فلانة بتك ف عرسها بعد شهر خليها تنوم واخدى مقاساتها نجيب الشيلة دايرها ولد عمها أ
    امها : البت سغيره متين بقت للعرس وناس اخوك ديل ما بعرفو شنو
    زوجها : اس كفا التكفى قدحك
    بعد خمسة عشر يوم
    الاب : يا بت ف تعالى هنا تجيك الطاوية حبالها . ود عمك فلان دايرك عرسك بعد اسبوعين ما تمرقى بره البيت
    وتبدا مراسم العرس
    تقول لى هنايتك وهنايتى / اقعدوا انتو فى هنايتى وهنايتك لامن هناية تعنس وتبور

  24. aflaiga كتب:

    الاكرم ع محنك :
    اوع تكون اتدبست بى المشهد السغنتوتى الفوق ده ؟؟
    هناية منو التعنس وتبور واله هنايه كان عرسوها وطلقوها وتانى عرسوها وطلقوها وبارت ولما استحكمت حلقاتها بارت تانى برضو بنجى نقدم اوراق اعتمادنا مش لو بقت فورث هاند بدل ( سكند هاند ) برضو بنقدم ورقنا ..
    مشاكل : انت بتهترش فى الفيس بووك وقادى ناس العالم اخير انا قادى ناس البيت بس بالله شيل من حق البيت ودى بره لانو الذاد هنا فاض ..
    ود الخلا : دى حنكك بتاع الزوغه من الكلام عن الفرق بين العشق الالهى وعشق المخلوق ؟ انت شايل عربى ولا قادى تخصص ؟؟

  25. اسلم وامسى على كل الهنايات والهنايين !

  26. ودالزبير كتب:

    أبكرون
    (ما عندك هنا زول من الشرق عشان نحكي ليه و ننوره كيف (يسعي بين العشي وسعدابي) ….ونحكي ليه عن ( الدسم في خيران وروابي تهميم)…..و (التقنين في الإستنشاق والتمسح بالشكوين )

    العشي وسعداب مدرستين ثانويتين للبنات قادتني الأقدار والظروف السمحه إن أعمل مره بهما كمراقب إمتحانات ودي كانت فتره من أخصب فترات حياتي وتمنيت أن لا تنتهي الإمتحانات وأذكر مره إنني وبصحبه عضو المدونه أبا المنزر كنا قد شهدنا معرض ثقافي بمدرسه العشي إستمر لخمسه عشره يوماً كنا يومياًنذهب للمعرض ونتجه لنفس الجناح ونقف إمام نفس الطالبه لتشرح لنا يومياً كيفيه إستعمال آله الربابه وعندما نحضر ولا نجدها ونجد من حله محلها لأي ظرف من الظروف ننتظر حتى تأتي لتكرر لنا نفس الكلام … من عجائب القدر إنني وبعد سنوات طوال إلتقيت بها في رحله بالطائره من الخرطوم لبورسودان وبمعيتها ثله من الأطفال والأغرب إنني تعرفت عليها …. يالها من ايم هناي وهنايه

  27. ودالزبير كتب:

    أفليقا

    صديقتنا ( بت السودان ) زميله من موقع مجاور كان لها بوست أكثر من رائع بعنوان ( هناي وهنايه ) عباره عن حكاوي وقصص من عالم الرجال والنساء … كان بوست ممتع وشيق وكنت من ساكني ذلك البوست لكن ولأن الحلو ما يكملش دفعنا بذلك السفر الرائع إلى الخور … حيث إستغله البعض ولا أعفي نفسي هنا في إطلاق نكته خارجه وتلمحيات فجه أسهمت في رحيله إلى ماوراء الشمس وحتى اليوم تجدني أحن لذلك البوست وأندم على عدم تخزين مقاطع منه .. فلنا عزاء في هذا البوست في أن يسير في ذلك الإتجاه الجميل إتجاه (هناي وهنايه)

  28. aflaiga كتب:

    ابكرون : (يسعي بين العشي وسعدابي) ….ونحكي ليه عن ( الدسم في خيران وروابي تهميم)…..و (التقنين في الإستنشاق والتمسح بالشكوين )
    ابكرون انا ماشى الشرق من بكره يلا ورينى خارطة الطريق من الفاو ماكو دنيا حتى قلسه وعواض .
    ود الزبير : انشاء الله يا ود الزبير والله سيرة الهنايات والهنايين بترد الروح .
    مشهد :
    يحكى صديقى ع :
    لاقيتا فى الشغل ضعيفه ومعصعصه وكوزه رابطا راسا وجنها صلاه وانا كنت زول بهجه اشغال دى واضحك مع دى وكلهن زميلات عمل ولمن اجى جنبها كنت بقرق عليها مع الزميلات اقول ليهن ام سلمه المخزومية دى جابوها متين هنا ؟؟ وكانت بتتضايق من تعليقاتى لكن بتحبها بى تحت تحت انا كنت زول لسانى زفر والاسلاميات بيحبن الزول اللسانو زفر بى تحت تحت لكن بى فوق فوق بيكرهنو ربما لانو بيمتع ليهن الجانب العاوزات يسمعنو عن جمالن او انوثتن الما بيلقن تعبيرات كافيه عنها من اخوانن فى التنظيم ( هم فاضين ؟؟ ) . نرجع لموضوعنا كنا بنتناقر طوالى وطوالى كنت بنتقدا على شاكلة ( اسى لو جا هوا تقيل مش بيشيلك ؟؟ انتى ما بتاكلى ولا شنو ؟؟ عليك الله هاك العيشه دى تبرع منى ؟؟ ارسل عصير فى ميزان حسناتى فى مكتبك ؟؟ ) وكانت قدامى بتتضايق من كلامى وبى وراى تقعد تتضحك .. يوم من الايام كنت بفكر فى حالى يا ود انت اسى البت دى مالا ما بت سميحه وحليوه وعاوزه شوية شغل فى الحته بتاعة الانوثه شويه لكن الشاسيه متين وبيقبل تعديل وعلى الاقل تتم باقى دينك الناقص وتكمل نصف دينك .. طلبتها من نفسها مباشر طوالى لا ابوها لا امير تنظيما لا شيخ تلاوتا توووش كده طوالى …
    نواصل …. ولا نقيف ؟؟

  29. monamie كتب:

    افليقا
    اليوم لمن صحيت من النوم لقيت الشغاله شايله اللابتوب بتاعي قمت قلت ليها يابت جيبي الهناي ده فتذكرتك وضحكت ! يعني البوست اثر فيني وبقيت اتكلم بنفس اللغه

    ابكرون: يعني لازم نغير شويه من الموضوع الزى اللبانه ده .

  30. محنك كتب:

    يعنى يا ابكرون خطوة للامام سر

  31. محنك كتب:

    ابدا دا كان خارطة طريق لما كان اخوالنا شباب ونحن اطفال بنجيب الموية ونجلس مع الكبار لانه ما بنعرفهم بقولوا فى شنو لكن كنا اذكياء شوية ، والشباب بقولوا ليهم يلا اكلتوا وشربتو الشاي شوفو ليكم ضل قيلوا فيه نحن وحاج فلان عندنا ونسة كبار.

    لكن نحن قرينا فى الفرع وسكنا الخرطوم وشمعنا فى ابورجيلة ودخلنا افلام القاعة لكن تبنا وبعد التوبة عرسنا وعقلنا والان اولادنا على اعتاب الجامعة … حضرنا زمن الحفلات للصباح ونحن الجيل الكسر البارات وشاهدنا السكارى فى الشوارع والبصات وطبقوا الشريعة ونحن مراهقين ، وامتحنا الشهادة وبمبان الانتفاضة فى العيون والمشى كدارى ، وتم ترحيلى من الكلاكلة للديوم الشرقية عشان مافى مواصلات للامتحان ( كدارى من الديوم الى الاميرية المتوسطة عند الجمارك الحالية ) . وبالعكس مع فرق انت راجع بطقع وتكسر ما تجده .

    وقرينا الجامعة ايام الديمقراطية 86 وشفنا العجب وحضرنا اركان نقاشات عرمان وموت الشهيد بلل والشهيد الاقرع . والخلط كان حلال لكن الجيل نضيف ومتربى . وقفنا لمبة فى مسالة القوائم ايام بكرى عديل فتفاجانا بمرافيد القوائم دكاترة عدييييل بدون ذكر اسماء

    ومافى لعب

    بس الان بنسمع حاجات والله يكضب الشينة

  32. محنك كتب:

    اما الهنايات كانت كتيره لحد ما قريت كتب لسيقموند فرويد بتقول فى فرق بين الاعجاب والحب ، واظن حب المراهقة عبارة عن اعجاب او اثبات ذات واعلان نضوج فعرفت انو دا كلو كووووم …. والحالة الجديدة ما بعد الزواج كوووم

  33. محنك كتب:

    بس فى موضوع الهناى الاول دا

    بالجد صحيح ، والهناى الاول غالبا ما بتزوجه لكن بترك بصمات واضحة فيك ، ولمان تلقاه اليومين ديل بشتكى ليك من انو العيال كبرت ولو مسافر بعيد مرات بجيك فى الخاطر ، بعدين الهنايات ديل مهمات شديد لكن ما اظن الواحد بعد دا يرضى يكون عنده علاقة مع الهناى القديم عكس راى افليقا

  34. خالد مدني كتب:

    قبل كم سنه جارنا س اخوهو جا من مأمورية كده وجاب معاهو قرد … ختاهو في شجرة في نص الحوش بتاعهم وبقي مسئولية جارنا س لانو قاعد في البيت … في يوم القرد شاف بت جيرانا ع – طبعا علي طريقة افليقا – اعجبه فيها خمارها وجلبابها الذي لا كجلبابات الباقيات … لبد لها اعلي الشجرة ذات اصيل ولما دخلت الحوش نط فيها بكل ذلك الزخم من الحاجات … وعلي صوت الكواريك اندفع جارنا س ليحميها من القرد فاستكانت في احضانه … رأيتهم بالامس وهو يهش علي طفلين بينما هي تحمل التالتة .

  35. aflaiga كتب:

    خالد مدنى : اها والقرد بعد عرس ليهم مشى وين ؟؟عليك الله وصف لينا محلو عندى شجره عاوز اختو فيها عسى ولعل !!!
    محنك : يعنى زغت من الكماشه بحركاتك بتاعة الهباشه وضربت التشتاشه ولفيت مع الشماشه ؟؟
    مونامى : اها شفتى اسى لو كان لقيتى اللابتوب ما عندها كان قلتى ليها جيبى لى اللابتوب ده مش الهناى ده !!
    مشهد تانى :
    كان ابوها احول العين اليمنى وكانت تسير بيمناه دوما كى تؤشر بيدها للحبيب الذى يجلس على ميمنة الوالد فى الشارع ابوها عمل العملية فى النملية وبقى يشوف ميه ميه وصاحبنا ما ناقش النظرية واتقبض بالثابته :
    هو : يا حاج ده شنو ؟؟
    ابوها : ده شنو ؟؟ وييييين ما فتحنا !! انت ما قالو ليك ؟؟
    للاسف لم يستطع ابوها ان يستعيد اللقطات الفائته فقط لقطة القبض بالثابته ….

  36. aflaiga كتب:

    حكى صديقى و :
    لم استطع تمييز الاسباب التى ادت لمنعها من اللعب معى فكل ما علمته منها ان والدتها قد امرتها بعدم اللعب معى مره اخرى لانها كبرت ام لاننى انا كبرت لم اتبين السبب الحقيقى – لكنى بدات الاحظ عليها تمنعا كلما سنحت الفرصه للقاء حتى تلك اليد التى كانت تلتقى بيدى فى لعب الطين او بناء البيوت بيوت صارت تنتفض بمجرد الملامسه – لم تعد تنط الحبل امامى حقيقة شككت فى الحبل لاول مره حتى تبينت ان الحبل بريء وانها هى من كبرت على نط الحبل او تكبرت اشياءها عليه . كنا نذاكر سويا ونحن نجلس ملتصقين كاى طفلين صرنا نذاكر وكل شخص مواجه للاخر فى الجلوس لا ادرى لماذا فى البداية اعتقدت ان المذاكره بهذه الطريقه تناسب الاستيعاب فى هذا العمر لكننى ادركت لاحقا اننا بدات بيننا الفواصل التى تنتهى الا بزواجها منى او زواجى من غيرها قلت اخدا من قاصرا عرستها ونحن فى الثانوى ونططنا حبلنا فى الحوش وبنينا بيتنا قشه قشه وصرنا نذاكر للاولاد سويا …

  37. aflaiga كتب:

    خالد مدنى : عليك الله كان ما حكيت لينا قصة القرد ده من الاول ودى كانت اول علاقه يباركا ولا من زمان متعوداااااا اصلو القرود ديل عندهم حكايات غريبه جدا مع النسوان ..

  38. لمى هلول كتب:

    اعزائى الافاضل وحضرات الغاليين بساخر سبيل
    بدون فرز اصوات مشتاقون لكم عديل
    ظروف هندسية وغيرها ….
    لكن يظل الحنين والشوق لهذا الصرح ليس له حدود
    وما تحكر فى القلب ما يقلعه اى ……
    ومن الغريب اننى اعتقد بان هنالك من رائحة دلتنى على هنايات خاصة الهناية التى تحدثت عن الشرق
    بالتحددي وياللهول وياللروعة عن اعرق مدرستين فى ذلك الزمان مبرج ايفل وبيزا المائل ….لا ا عرف لا اريد ان انحنى منحنى البائسين والمدمنين على تردييد واقع واحد وابتدئى اقول ان سياسية التعليم تحت النخبة التى نحنا بصدددها قد غيرت معالم سعدابى مدرستى التى درست بها ومثلت فى مسارحها ولعبنا الرياضة فى حوشها ….والعشى التى تعلمنا فيها الرسم فى حصص مخصصة ليوم واحد فى الاسبوع لعدم توفر مدرس لكل المدارس ولعدم رغبة النواعم الكثيرات بالاهتمام بهذا المنشط فى الشهادة السودانية القديمة …حيث كنا نحن بائسات بجنون اذا نجلس لامتحان الفنون مع امتحانات المواد الاخرى الصعبة ….
    يالسعدابى والعشى وزمانها الذى انتهى الى غير رجعة …ذلك البريق الفريد
    وتلك المعارض الجميلة المنسقة وتلك الوشيشات الصبوحة الجميلة بسحنة شرقاوية بورتسودانية بالتحديد …
    اخ ثم اخ ثم اخ متتاليات

    ولا لابد من اجترار الزكرى
    تحياتى لموضوع الهنايات لانه اجج الزكريات ثم زكر بورتسودان مدينتى التى اهواها …
    اختكم لمى هلول الشرقاوية

  39. ابكرون كتب:

    سلاااام تاني وتالت :
    هلووووول : والله لو عارف سيرة الشرق وسعدابي بتنكتك من بياتك الصيفي كان نزلت بيها بوست ….نحن قلنا خلاص (بت الارتيقا) فارقت كوكبنا ساخر سبيل بلا رجعة زي ناس (ديانور) وساره ..وهندوية وهنايه ديك وهناي داك ….
    فعلا بورسودان كانت نوارتا وحلاوتا في العشي وسعدابي ولو عايز احكي يا افليقا واسعي بينهما حاظل لافي في مدارهما الي ما شاء الله….وزي ما قالت لمي ما نسمع بمعرض ولا مسرح ولا نشاط ثقافي الا تلقانا مكسرين ومتكسرين جوه الحيشان الاتنين ….ولو كانوا بدخلونا نشوف الرياضه بتاعة ناس لمي كان نكون مزروعين بهناك لي اسه وكان (رمينا باورتنا-هلب السفينة – ) بهناك الا تقلعو ريحا صرصرا عاتيه….مره يا افليقا زارونا وقلنا نفسحن في البحر حتي فنار سنجنيب …. كان لينا مراد السفينه تتعطل بسنجنيب …لعلمك عندنا 8 من بكايننا تزوجوا من هاتين المكمنين للرقة والجمال الشرقي….

  40. خالد مدني كتب:

    افليقا : قصة القرد دي خليها عندي واحدة تانية بطلها كلب الجيران .

  41. ياسين شمباتى كتب:

    الاخوة الكرام..
    ننتهز المساحة ونسالكم الدعاء للوالد السلاوى الذى لزم المستشفى منذ مساء الامس نتيجة لوعكة صحية بسيطة,,لكن عايزين يعملوا ليهو عمرة كاااااملة ونفضة تمام..وهو فى اتم الصحة والعافية…

  42. monamie كتب:

    الحاج سلاوي سلاااااااااامتك ونحن كلنا كرامتك. وربنا اشفيهو واديهو العافيه

  43. ابكرون كتب:

    سلولو حبي الف لا باس عليك ان شاء الله عدوينك
    كنت علي اتصال به قبل قليل والحمد لله طمني علي صحته …ربنا يديك العافية وتقوم بالسلامة…وبرضو يا يسن ادينا اخباره

  44. محنك كتب:

    الله يشيفيك ويعافيك ويرجعك للاحباب هنا وللاولاد سالم

  45. خالد مدني كتب:

    عمنا الحاج السلولو في الفريق ياهو الركيزة بس الظاهر قالت طق الف الف حمدا لله علي السلامة وربنا يديك الصحة والعافية .
    كسره : سواق شاحنة طالعه يادوب من العمرة ولساتك جديدة وكلفت الجلابي ما كلفت … طلع بيها يومين وضرب للجلابي قال ليهو الشاحنة فيها لستك ضرب … الجلابي بي خلعه شديدة قال ليهو : ضرب كيف يعني ؟؟؟ السواق رد ليهو بسرعة : ضرب تــــــــــــــــــــــــــــــــــــــــــــــــــل .

  46. عبدوش كتب:

    مساء الخير …
    يا هناي حمدلله على سلامةالهناية عليك الله اعمل حسابك من هنايتك عشان ما يجي هناي سيرق منك هنايتك تاني …(عرفتو هناي ده منو؟؟؟؟)
    خالد مدني: والله نكتتك كده هههههههههههه
    ونجيكم تاني…

  47. عبدوش كتب:

    جدي السلاوي: سلامتك انشاالله اجر وعافية يا حبيب الكل..
    شمباتي: ياغالي والله مشتاقين ليك كتير .. وانت ما بوصوك على الجدالسلاوي انشالله ربنا يخرجكم بالسلامة وعمرتكم ما تضرب ليكم لستك جواني ولا براني يادوك…

  48. DAKEEN كتب:

    اجر وعافية يا هناي وانشاء بالسلامة وبعد العمرة ياهناي جس الحاج دا ممكن بتجيه افكار هناية جديدة عشان يخلي الهنهنة والخرخرة ،،،،
    وتبقى عليه قصة الهناية الكتبوا ليها في الروشتة هناي ولما هناي فارقها قالت ما دايره دكتور بس اصرفوا ليها الرشتة القديمة ذاتها ،،،،

  49. ياسين شمباتى كتب:

    الحمدلله جاى اسه من عند الوالد وهو بخير ويبلغكم تحاياه..

    عبدوش..
    والله الشوق اكتر,,لكن بقيت لااااااااابد..

    دكين..
    مشكور كتير على القصة البوظت بيها اعصابى بس!! الحقنى بالباقى سرييع والا بجيب ليك الهيئة..

  50. ودالزبير كتب:

    شباب

    شنو لحاصل حبيبنا السلاوي مالوا … سحروه ولا أدوه عين.. أجر وكفاره يا مان

  51. ياسين شمباتى كتب:

    ود الزبير..
    بسيطة الحمدلله,,شكلو الجماعة عصروا عليهو قام قال احسن يمشى المستشفى!! لكن ح يطلع بعد شوية وهو عال العال…

    استرايكر..
    نطالب بصفحة نحمدل فيها السلامة ولزوم المرض وكدة,,الصفحات كترن تب…

  52. طارق أب أحمد كتب:

    السلاوى
    حمدا لله على السلامه و كفاره
    يا شمباتى
    لامن يطلع من المستشفى و يرتاح أدينا رنه

  53. يا شمباتى شكلو عمنا ما اخد من ولدنا البشاوى ( رد الله غربته) التكتيكات المتبعة عند الهجوم – لذا حصل ما حصل – ولو كان اتصل بولدنا افليقا – كان رسل ليهو الكتيب بتاع التشغيل وماكان حصل الحصل – ولو بس رن لشيخنا الواصل – كان رسل ليهو طرد فيهو المعلوم وبرضو ماكان حصل الحصل .
    بالاشارة لكل الحقائق فان عمنا غلطان غلطان – فى زول بخرم باليمين فى قانون الحركة الجديد ؟؟؟؟

  54. ياسين شمباتى كتب:

    استرايكر..
    هههههههههههههااااى,,طيب نعمل شنو بعد حصل الحصل؟؟؟ والله عمك مظلوم,,هو ما عمل الحصل,,لكن الحصل حصل غصبا عنو,,الزومة متضايقى يا ناس…

    طارق…
    الحمدلله الوالد وصل البيت بالسلامة ويارب ما يشوف شر..

  55. حاج أحمد السلاوى كتب:

    الإخوة الأعزاء والأخوات صفوة الأخيار ..
    لكم جميعن وبدون فرز كل الشكر لسؤالكم عن شخصنا الصعيف اللى صار طريح الفراش والمستشفى نتيجة إهمال من جانبنا للصحة العامة.زبس بالكم ما يمشى بعيد ويطوف بيكم الخيال فى مسارح خارجية وتهيؤات لا مجال لها فى عالم الواقع .. وخلونى أسترد أنفاسى شوية عشان أرد على ناس أرى من الفضل يشوفوا ليهم بلد تانى (غير الفوارة )يهاجروا إليه.. وما عاوز أفسد عليكم حلاوة البوست الرائع الجميل دا بالكلام الكتير .. بس أطمئنكم أنى الان بخير والحمد لله وغادرت السرير الأبيض ( واتمنى إنو ما فى زول يضوق رقاده ….. بدون تأويل ) وعدنا إلى قواعدنا سالمين والحمد لله إنو أم المؤمنين كانت إلى جوارنا هذه ألأيام رغم تصريحات الحاقدين والموتورين ..وفاقدى الحنان العواطفى .
    شكرن لكل من إتصل هاتفياً… شكرن لكل من أرسل رسالة وشكرن لكل ابدى تعاطفاًغريزياً من على البعدمع شخصنا الضعيف ..
    وإن شاء الله ما نجيكم أو نكاتبكم أو نتعاطف معاكم فى شينة.

  56. طارق أب أحمد كتب:

    السلاوى
    حمدا لله على السلامه
    و الحمد لله إنو الهناى طلع ما هنايه

  57. ابكرون كتب:

    ( حمدلا ع السا) وبركه المرقت طيب
    لكن والله بتاع الفوارة ما ليه حق …ههههههههه كامل تضمنايا سلولو ….لكن ما شفته لي زول طالع من العمره بهاجم الهجوم ده كلو ….! حنحول الكلام للميل بتاع الضفاف الغربية …عشاااان نتمطي ونلقي راحتنا….يلا حولوا بيغادي والداير تصلوا الايميلات (يختبر ويعمل نمره كامله عد)

  58. ياسين شمباتى كتب:

    الوالد السلاوى..
    الف حمدالله على سلامة كيبوردك,,وما تخلى العزال( د.عزت) ومن عام على عومه يفسدوا الود البينا..والنصيحة الحااارة انا مرقتها لكن ما بالصورة الوصلتك دى طبعا !!! اما عن البلد التانية فشكلى ح ارجع القفيف…ههههههههههه..

    ابكرون..
    واحد سعادتك..عشان حكاية العواطف الكانت جنبو نشوف تفاصيلها شنو !!!

  59. قرن شطة كتب:

    العزيز افليقا كان عندنا زميلنا فى العمل يستعمل كلمة هناى بكثرة ويوم سمعتو داير يقول لواحد ادينى كيس الصعوط وقال له ( ياهناى جيب الهناى)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s