غنماية علي و الشمار

Posted: الخميس,27 مايو, 2010 by عزت in اخرى

هذا الموضوع أرسله لي صديق عزيز و ريتو درب المدونة و أنا متأكد انو حنكون كسبنا صديق متعدد الهوايات فقد عرفته رساما… لكن لمن أرسل لي هذا الموضوع اتصلت عليه و قلت ليهو باين عليك  سوف تكون مهدد حقيقي لنا بكتاباتك الطريفة….

هذه القصة   حقيقية وقعت احداثها قبل اسبوع تقريبا حين كنت في طريقي عائدا من رحلة عمل في مدينة جياد الي الخرطوم وعند عودتي ادركتني صلاة الظهر بسماع الاذان في العربة وبعد ربع ساعة تقريبا اوقفت العربة امام احد المساجد في الطريق الذى اصبح عامرا بالمساجد واغلبها علي الشارع والحمد لله وجدت المصلين  يستعدون للصلاة واخرون منهمكون في قراءة القران والبعض يصلي السنة.. بحمد الله صلينا الظهر وبعد الصلاة توجهت الي عربتي التي كانت تقف امام المسجد وادرت العربة نحوالخلف وتحركت العربة قليلا اي حوالي متر ونصف وسمعت صوت (فرفرة) قوية لحيوان ربما كان كلبا أوماعز تحت العربة فاوقفت محرك العربة على الفور ونزلت مسرعا لتفّقد الحاصل.

ولاحظت ان هناك احد الصبية كان يجلس جوار العربة و ينظر الي الحدث مخلوع — فانطلق مسرعا نحو الحلة خلف المسجد وهو يصيح بصوت عال – (غنماية علي عفصتا العربية…غنماية علي عفصتا العربية…!!) وبينما انا احاول اخراج الغنماية من تحت العربة رفعت راسى فاذا بالحلة باسرها  رجالها ونساءها واطفالها  تقف حول العربة وتجمهر الجميع حول العربة….لا اله الا الله محمدا رسول الله…

وفجأ توقفت شاحنة ضخمة يحاول سائقها ان  – يسأل !!!الحاصل شنو ياجماعة ؟؟؟؟ و بالتالي توقفت بقية العربات في وسط  الطريق العام خلفه وبقية الناس تقف في محاولة معرفة اصل القضية وشمارها و تفاصيلها و منهم من كان راجعا الي عربته بعد ان نزل و عرف الشمار كان يقول انا لله وانا اليه راجعون والذي يسمع هذه القولة يصر ان يوقف عربتة في نصف الطريق لمعرفة الشمار  وأخر من الناس وبعد فشلة في الوصول الي مكان الحادث يرجع قائلا…. نفس العبارة انا لله وانا اليه راجعون …!!

وانا داخل حلقة الشمار وفي مكان الحادث وسط الجمهرة جاء (علي) صاحب الغنماية وأصر علي دية كاملة غير منقوصة طالبا مني ثلثمائة جنيه بالتمام و الكمال علما بأن الغنماية ما زالت حية !!!!!  فهي فعلا تأذت في رجلها ولا تستطيع الوقوف  ولكنها ببكامل قواها العقلية و (لفحت) ليها (قرمة) برسيم احضره احد الخيّرين وجردل ماء صغير وشربت ومازال اخونا (علي) يلح علي التلتمية جنيه واخيرا و بعد التشاور والتحاور اتفقنا معة ان يشيل الغنماية ومبلغ مرضِ من المال حتي لاتغيب الشمس علينا ونحن في الطريق….

خرجت من هذه المحنة الساعة الرابعة ظهرا و حمدا لله أن أدركت العصر بسوبا….. ولكن هذه المرة تعلمت من الدرس أن اوقفت عربتي عكس الاتجاه امام المسجد وبعد الصلاة توجهت الي عربتي و(دنقرت)…. تحت العربة وتاكدت من عدم وجود اي شئ تحت العربة وتوكلت علي الله لمتابعة المشوار الي الخرطوم ….

(عادل أورتشي)

Advertisements
تعليقات
  1. اكرر شكري للاخ عزت ميرغني بقبولي علي هذه الصفحة الجميلة وانني سعيد جدا بان اكون ضمن هذة الكوكبه الرائعة من الكتاب والمفكرين علما بان الاخ عزت ميرغني ايضا يتمتع بهوايات اخري تصفة بالفنان الرائع في وجهة نظري ومنها الكتابة والتصوير واطمع في ان يوفقني الله معكم وشكرا

  2. زووووووول كتب:

    عزت وصديقه عادل سلااااام عليكم
    اولا نسأل الله ان يخلف للاخ عادل خيرا مما اخذه منه (على) وان يلزم قرية غنماية على الصبر الجميلوان يجبر كسر غنمايتهم باسرع وقت .
    بعدين يا اورتشى انت احمد الله تعالى انو ناس على ديل ما دفعوك حق الترمس والبلح !! .
    بعدين ناس البلد دى اصلهم ناس شمارات . تلقى قصتك دى وصلت الخرتوم قبلك وانو فى واحد كاتلو شافع فى طريق مدنى .
    كسره : الجماعه ديل يكونوا مشركين بغنمايته ولا شنوو يا عزت ؟؟!!!!
    انا لله وانا اليه راجعون

  3. زووووووول كتب:

    الاخ اورتشى
    مرحبا بك بين ظهرانينا كاتبا ومعلقا واخا كريما ونتمنى ان يطيب لك المقام بيننا وان نلتقيك كفاحا فى اقرب فرصه.
    ومن الليله حانديك شارة الكابتنيه زى طارق مختار

  4. ابكرون كتب:

    اورتشي : مراااحب بيك الدار ترحب بيك وكان ما آخر شهر كان ضبحنا ليك غنمايه سليمه الا تعال الرحلة مع الدكتور….بالله شفته الناس كيف بقت عندها شغله ومشغلة ….! الخوف كان يجي الاحتياطي المركزي وقيقم واليونميد والشنو ما عارف وتبقي لمه وكان 30 مليون ما حلتك …لكن الذ زول (بواو واحده) الجاء شايل برسيم وجردل مويه …بعد شويه كان صواني شاي المغرب طلعت وبعده العشا وتمشي اقرب مكان مناسبات وتجيب خيمه……يعني ما عارف لو طلعته ليك في زول (اكرر بواو فرد واحده) كان الحصل شنو؟…كان مجلس الولايات دعا البرلمان الجديد لدوره انعقادعاجلة….وجمعيات الرفق بالغنمايات اجتمعت…. واعادوا انتخابات الدائرة بتاعة سوبا شرق وكان التيوس طالبت برقبتك وحكاية……
    انت يا اورتشي نسرين سوركتي بتبقي ليك شنو…..؟

  5. ياسين شمباتى كتب:

    الاخ عادل اورتشى..سلام ومراحب بحجم الروعة الفى قصتك..

    اديك قصة محيرة اكتر منها,,طبعا اخوانا المسيرية فيهم ناس بتاعين حجج وصعبين خالص,,فى صينى كتل ليهو غنماية بى البوكس بتاعو,,مشى معاهو مدير الامن فى الشركة عشان يحل الاشكال,,صاحب الغنماية شبكهم ليك: اريتك كان كتلتنى انا,,اريتك كان كتلت واحد فى الشفع !!دى الشايلانا والمعشيانا والبتقرى الولاد !! المهم صاحبك عمل الغاغة دى عشان التعويض طبعا,,قال الا مية الف,,والخروف الزمن داك بى اربعين الف!! بعد شيلك وختك حتى وافق بالخمسين الفا من الجنيهات!!

    وانا لله وانا اليه راجعون…

  6. nono كتب:

    عادل اورتشي

    نرحب بيك في دارك

    الشمار قتل (_____) مزيد من الشمارااااااات…؟؟؟

    كسره/ اورتشي انت جزورك ايرنيه

  7. ortashi كتب:

    لك الشكر والترحاب ايضا
    كلمة اورتشي هي في الاصل لقب اطلقه النوبيين او الدناقلة و اور تعني ملك وشي تعي المنطقة وفالاصل اسمة المك ادريس ولقب ب اورتشي لانه تزوج بنت ملك الصبح ونحن اما وابا من كبوشيةاي جعليين وشوليقه

  8. طارق أب أحمد كتب:

    عزت و اورتشى
    يوم كده زمان عمكم أب أحمد راجع من المكتب الساعه 3 فقرر يرجع عن طريق أمدرمان قام ضرب غنمايه فى شارع الغابه و وقف ثوانى ما طلع ليها سيد بس وقفتت بى وراهو شاحنة جيش و الضابط صرف تعليمات لواحد من العساكر بأخده إلى قسم الحركه
    و هناك طبعن سين و جيم و رسم للحادث و رجعنا لعمل كروكى للحادث فى موقع الحادث و حملنا الجثه الى المشرحه أقصد المستشفى البيطرى جوار نادى النيل بالقوز و جاء نتيجة الحادث بسبب الضرب على الراس بآله صلبه و اخذت التقرير و رجعت القسم و أفرج عنى بعدها بالضمانه

    رجعت البيت الساعه تمانيه و لحدى اليوم دا لا أم أحمد لا الجيران مصدقين كلامى لامن وصلت البيت و كووولهم فى الشارع بصوت واحد مااالك
    و طبعن ردى ,,,, ضربت لى غنمايه !!!!!
    آى باالتأكيد الزمن داك ما كان فى موبايلات

  9. ياسين شمباتى كتب:

    طارق..
    طيب مالك ما رجعت خلف فى الضابط دا ولا القسم ذاتو؟؟

  10. طارق أب أحمد كتب:

    نونو

    ((كسره/ اورتشي انت جزورك ايرانيه))

    أمك
    الشبكه طشت

  11. طارق أب أحمد كتب:

    شنباتى
    ترجع وين يا عمك وللاى الزمن داك ترفع راسك يختوها ليك من ورا و بكره يجيبوك فى ساحات الفدا و كمان كاتب وصيتك لى أمك

    بعدين ولدنا أبو حميد دا مالو ما فى زول سألوا عن موقعوا الجغرافى هو يعنى الشوايقه ديل إلا يكونو فى الزوووومه بس

  12. ياسين شمباتى كتب:

    طارق..
    والله صدقت,,ونبقى فى زغردى ام الشهيد !! اما ابوحميد فموقعو معرووووووف وهو زول ولوف وبظهر حسب التساهيل والظروف ..ايييييييي

  13. عزت كتب:

    آب حميد منو يا أب أحمد … يعنى ما نونو براها …

    غايو أكان قاصد أورتشي… ح نعرفوا بيكم قريب جدا و يا ريت رحلة الجمعة الجاية تقوم و نمشي الجبل … بدل ما تشتروا سمك… يصطادوا ليكم

    خبير درجة أولى في شئون السمك…

  14. محنك كتب:

    اسرة اورتشى معروفة ، ومنها الشهيد قائد سلاح المدرعات فى احداث هاشم العطا الذى سمى مركز الشباب بالعزوزاب جنوب الخرطوم جوار مصنع الذخيرة القديم ، باسمه ثم تحول الى مركز صحى الشهيد اورتشى ، وابنه خبيرا مصرفيا وماليا وقد استفدنا من علمه فى دبلوم معهد المصارف اثناء الخدمة باحد البنوك فى السودان . بالرغم من ان فارق العمر ليس كبيرا بيننا .

    وهم مبدعون وارحب به هنا بين المبدعين الكبار وشهادة دكتور عزت عندنا تعنى شهادة دراسات عليا فى الابداع فمرحبا به

  15. محنك كتب:

    طبعا الغنماية دى اكيد عندها خبره واول ما يقول الامام استووا ياتى بها صاحبها ويدسها خلف السيارات ، واول من تتحرك السيارة بمقدا سم تصيح وتولول يا ناس الحلة واجرى ولد كلم على وياتيك بالاخبار من لم تزود ثم تقول وهى تعرج بالرغم من سلامتها وعدم اصابتها ثم تدفع المعلوم … المره الجاية كان طلعت فوق غنماية تمها وادفع حقها .

  16. ودالزبير كتب:

    مرحباً بالأخ أورتشي بيننا ونتمنى أن يطيب له المقام

    أبكرون
    (انت يا اورتشي نسرين سوركتي بتبقي ليك شنو…..؟)

    عادل أورتشي سوركتي ونسرين سوركتي أورتشي … خلاص عرفتها تبقي بت عمه لزم هههههههههههههههههههههه

  17. ابوالمنذر كتب:

    اهلا اورتشى عبرعزت بيه
    مقام طيب باذن الله وسط الطيبين
    ما هو كل محليه بى كشكته (جمع كشك) وحلة على بى غنمايتها جبايات وشمارات …!!

  18. ortashi كتب:

    خليكم من غنماية علي. البحر نشف وكبري توتي بعد ثلاثة سنوات حيكون تحتو مواقف عربات ونسألكم الدعاء

  19. خالد مدني كتب:

    اورتشي الف مرحب بيك والله … وبما انو حاج السلاوي بصحه حبتين فحدد قروبك : كواشف ، تحت الكواشف ، سي ، سي بلص الخ . وذلك لنتمكن من تقريبك – دي جاية من قروب .
    بعدين داير تسوقنا من حلة غنماية علي لتحت الكبري محل البحر نشف طوالي كده … انت ما عرفنا حكاكين ؟ والليلة غنمايتك دي كم ما مشت وعملولا الكرامة كبري واحد مانا ماشين . تدقشو غنمنا وشنو كده ما عارف ؟؟

  20. حاج أحمد السلاوى كتب:

    ولدنا خالد ودالمدنى ..وبقية صفوة الأخيار ..
    شكرن ليك لقيامك بالمهمة الأساسية مع أخونا القادم الجديد (أورتشى ) عبر بوابة المرطب أبو عصمت ..
    وأطمئنكم إنى الان بخير ودى كانت رب ضارة نافعة إنو الواحد يعيد جدولة حياته بعد الهرجلة اللى كنت فيها والشغل عمره مش خيخلص ابداً فلابد من الإنتباه وإعطاء النفس والجسم حقه الصحيح ..وزى قول إخواننا أولاد بمبا …دا العمر مش بعزأة ( بعزقة ) ..
    وبدورى ارحب بالأخ أورتشى ,اتمنى ليهو إقامة طيبة ..وعليه إجابة متطلبات اخونا ودالمدنى ..

  21. البشاوى كتب:

    اول تبادى حبابك اورتشى ولك الود والتحية ليك ولى الجابك زاتو–
    تانى شئ ياأورتشى نتمنى ليك تجنيس عديل مش اقامة طيبة وبس –
    ثالثا — سلولو الف سلامة ليك – ايه الوعكات العجيبة دى – حاولت الاتصال على كل الارقام المسجلة عندى ولم افلح – انت قافل التلفونات مالك – عواطف هناك ولا شنو ؟
    اما موضوع غنماية اب أحمد الفى شارع الغابة دة انا لايمكن اصدق ابدا انو صدم غنماية ( الشارع واااااسع) دى غايتو ياطارق الا تجيبا مصورة فيديو عديل عشان نصدق ولا شنو يافكفك

  22. طارق أب أحمد كتب:

    البيشاوى
    هى القصه أصلا ما بتتصدق و فيها تفاصيل كتيره و غالبا ما يكون بتاع الحركه متخيل إنو دا كمين ليهو فحبكها شديد
    تصدق أنو فى طريق العوده من البطرى للحركه عرجت على زميل فى العمل لآجراءات الضمانه
    صدق إنو رفضوا ضمانتو لعدم تطابق دائرة الإختصاص (فى غنمايه ) عموما فى الأخر قبلوها بعد أيداع تمن الغنمايه مضاعف 70ج الزمن داك و أكيد مافيش حد سأل و البوليس ضرب التدقيس

  23. عزت كتب:

    البيشاوي حبابك ألف و شكرا لثقتكم فينا…. و انت ما عارف ما (عواطف) ليها مدة بي هناك…
    و بعدين موضوع الغنماية دا ذاتو احنا ذاتو ما صدقنا شديد عل تقول شنو…. المؤمن صديق…

    زمان كان عندي عربية عاجباني (أوبل صفراء فاقعة اللون كتبت عنها بوست مرة) و قامت اختي السغيرة ركبتا بعد الغداء و قامت خشت بيها في شجرة و لما كان التأمين لازموا تقرير بوليس و كدا عملت روحي سايق لأنها (بدون) رخصة… بيسأل فيني البوليس انت الجابك على الشجرة دي شنو..؟
    – قلت ليهو أصلو كان في (غنماية) اتعارضت لي فبدل ما أعوقا … عوقت الشجرة
    – غنماية أريتا بالموت اليلفحا بدل ما تعوق عربيتك و تعوق الشجرة..!!

    تيقنت انو العسكري دا بتاع بيئة أحسن مني…. اصلو الغنماية غير خراب البيئة ما بتعمل شئ..!!

    غنم

    هسة عليك الله ديل غنم و الا قرود !!

  24. ودالخلا كتب:

    سلام ياقبيلة،،
    الأخوة أورتشي ودكتور عزت وبقية الأخوان والأصدقاء الكرام..
    أما بعد،،،
    (اصلو الغنماية غير خراب البيئة ما بتعمل شئ..!!) كلمات أطلقها الدكتور عزت آلمتني كثيرا” بظلمها للأغنام.
    ما أصلو حكاية غنماية (علي) وما تبعها من أقاويل وهمهمات أندرجت تحت القول الشعبي (شمارات)، خرجت من أطار القصة والطرفة لموقع الهجوم المكثف علي الأغنام وخرابها للحياة والبيئة، مع أن البيئة والحياة عموما” قد أفسدها الأنسان وقام بالتخريب والدمارفيها ، وما تفعله الأغنام هو في أطار تنمية البيئة واعمارها، وهذا الكلام يسير ويصب عكس ما يتناقله البيئيون والعلماء الذين يتحدثون عن البيئة وخرابها وقد يستغرب الكثيرون منهم هذا الحديث فلا تعجبوا أخوتي الكرام!
    فهناك حديث يطول ويتشعب عن أفضل أنواع الأطعمة والتي تحتوي علي منتجات الأغنام، فقد ثبت بالدليل العلمي القاطع أن ألبان الأغنام (الماعز تحديدا”)، هي الأنسب لكل مواليد الكائنات الحية التي تتعاطي اللبن عند مولدها وهو الأكثر مناسبة وموائمة لبني الأنسان، كما أن لحومها من أطيب وأرقي أنواع البروتينات التي يمكن تعاطيها دون أضرار، وانها من أكثر الحيوانات تكيفا” مع البيئة وأنها تستطيع العيش تحت أحلك الطروف البيئية قسوة، لتمد الأنسان بما يحتاجه تحت قلة المتوفر من الطعام، وعندما هجر الناس الأغنام وظنوا بأنها عدو للبيئة، عماهم القحط والجدب ونُزعت عنهم البركة بسبب هذه الأقاويل التي لا تستند علي واقع ولا يدعمها دليل ، بل هي عكس ما جاءت به السُنة المطهرة بأن وجود الشاة بالبيت مدعاة للبركة وزيادة في الخير والنماء والأحاديث النبوية الشريفة المتواترة في هذا الخصوص كثيرة، كذلك القصة المشهورة في السيرة النبوية العطرة عن الهجرة النبوية ومرور الركب الكريم بخيمة الصحابية الجليلة (أم معبد)، وكيف أن الرسول الكريم عليه صلوات الله وسلامه عليه أستأذن أم معبد في حلب شاة عجفاء أقعدها الأجهاد من أن تسرح وترعي مع الغنم، وكيف تفجرت البركة واللبن الوفير من ضرعها بعد أن مس عليه الرسول الكريم وسمي الله العظيم وحلبها وشرب الركب حتي ارتووا وشربت أم معبد ومن ثم حلبها وملأ لها الأناء وذهبوا، والقصة موجودة في كتب السيرة لمن أراد الأستزادة والأفاضة..
    ما يهمنا ذكره هنا هو ان الغنم تحل معها البركة أين ما حلت وذهبت، وأن هي غابت عن الوجود فسيكون حينذاك أمر جلل وخطب عظيم يتعلق بمعاش الناس وحياتهم قد حل بهم وبأن الخراب الحقيقي للبيئة وللمعمورة قد دنا بسبب القضاء علي هذا الكائن الوحيد الذي تبقي علي هذه البسيطة وموصوف بالبركة مع الخيل….
    هذا والله أعلم…

  25. عزت كتب:

    العزيز ود الخلا سلام
    مؤكد ان أي كائن حي وجوده مهم في حياتنا و غياب أحد الأفراد تتداعى له سائر المخلوقات فحتما كلامك مية المية…. لكين في زمننا هذا و بيوتنا الانت شايفا دي لم يعد ممكنا أن تربى الأغنام ليس كرها فيها و لكن لتكلفتها الغالية و قلة انتاجها…!!
    ليك علي يا باشمهندس في البيت البستاني نربي لينا مجموعة…. لكين مسعول من الخير… غنيماتنك انشاء الله قاعدين يحلبن كويس..؟؟؟

  26. ودالخلا كتب:

    صديقي دوك عزت سيّد القبيلة سلام،،
    كلامك يريح البال ويهدي المحتار، وفي أغنام سعانين قبرصية تحلب ثمانية ليترات (ماشاء الله)، وتأكل أكل عادي جدا” وهي محسنة ويتم توزيعها عبر وزارة الزراعة بالولاية، وبمناسبة البيت البستاني دي أنشاء الله تقعدوا فيهو بالعافية وربنا يديكم خيرو، ولا بد من تدعيمه بمجموعة مبروكة من الغنيمات وجاء في الحديث النبوي الشريف (الشاة بركة والشاتان بركتان)، ونحن كايسين للبركة دي محل ما تقبل بنسكها وانشاء الله نلم فيها،،،
    كسرة/
    سألتني من الخير وفعلا” غنيماتي خير وبركة، وأذكر ونحن صغارا” زغب الحواصل تربينا بلبن الغنم ، فقد كان أبي (عليه وعلي والدتي رحمة الله)، يسعي الغنم في مسكننا ذلك الصغير الذي منحه لنا الفريق عبود طيّب الله ثراه وأسكنه الفردوس الأعلي بقدر ما قدم لوطنه ومواطنيه، فقد كنا نتشارك السكن الصغير كأسرة ممتدة ويضم حوشنا الصغير زريبة أغنام بها عدد مقدر من الغنم وبداخل الزريبة (كر) لصغارها، والحوش يتسع للجميع، واليوم يا صديقي نفس الحوش موجود والأسرة قد تقلصت بفعل سنن الحياة الماضية ، والأغنام قد مضت مع أصحابها المباركين والذين مضوا الي ربهم وذهبت معهم البركة، وتبقي الحوش بالطبع كما هو لم ينقص شبر، ولكنه يا صديقي أصبح أضيق مما كنا نلهو ونلعب فيه وننوم ونشارك فيه أغنامنا ونحن صغارا”، ألم أقل لك انها بركة مضت في تلك الأيام مع أصحابها الكرام الأفاضل، وبخصوص غنيماتي فلا زلت أحافظ عليهن برغم المعارضة الشديدة من القوات الخاصة، وأضطررت للأحتفاظ بهذه الثروة بشندي لحين أيجاد صيغة توافقية لأحضارهن للصافية!!!

  27. حاج أحمد السلاوى كتب:

    أخونا الكاشف الصغير .. ودالخلا .. الما بيقودو زمام ..
    إنت محتاج لإتفاق أطارى وليس صيغة توافقية عشان تجيب الغنيمات من شندى ..
    بس من المعلوم والثابت على أرض الواقع إنو الإتفاقات الإطارية دايماً…مخستكة ..ضاربة ..مطرشقة..إلى غير ذلك من الصفات ..
    أصلو .. ناس عواطف ديل عندهم بعض مرات عصبية زايدة شوية .. أو كما قال أخونا جبرا .

  28. التلب كتب:

    سلام للكل و سلام خاص للأخ ود الخلا و الله يخلي ليك غنيماتك لكن صدقني حكاية أنك تجيبهم الصافية دي حكاية قاسية خالص خالص لأنو قوات التحالف لن تسمح بذلك.
    تعرف العوجة يا ود الخلا جماعتك بتاعين شندي ديل ذاتهم يقوموا يتخارجوا ليك من غنمك عشان كده أحسن توديهم تورابورا .

  29. عزت كتب:

    مووووش بالله
    غايتو غنيماتو ديل اكيد حيطولوا في شندي

    عارف يا ود الخلا و الحاج أول ما جينا سكنا في المقرن قبل خمس سنين كدا … الأولاد اتعلقوا ليهم (بجرو) صغير كدا لونو أسود و سدرو أبيض كدا زي اللابس فول سوت و بصراحة عجبني و قمت عملت ليهم قفص جميل كدا و ابتدينا نعلف في الكلب شي جداد و شي صير و عملنا اتفاقية اطارية على أن يقوم باطعام و تنظيف ما يخلفه الكلب بواسطتنا….و (عواطف) تنقنق…. وكبر الجرو و صار كلبا مهيبا و عواطف تنقنق…. عض ليهو واحد في الحلة … و برضو تنقنق… و جننا نحن كلنا… قمنا نقنقنا نحن و اطررنا أن ناخد بكلام (عواطف) التي دعمته بآيات و أحاديث و أقوال مأثورة بعدم جواز تربية الكلب في البيت … و قمنا تخلصنا منو

    استغل الولد الصغير ذلك القفص و جاب (سواسيو) صغار حلوين كدا و ما قصرت أنا و قعدنا نعلف في السواسيو شي عليقة و شي باقي الخدار و هكذا حتى شبو كلهم و طلعوا ديوك …..و هاك يا كواريك ليل نهار يكورك واحد يكوركو معاهو العشرة ديوك الباقين و قعدنا أنا و عواطف الدورة دي ننقنق……فاشتريت راحتنا و راحة ناس الحلة في الآخر بأن دفعت ثمنهم مضاعفا للولد و تبرع بهم للأولاد في الحلة …

    قال اطارية قال

  30. طارق أب أحمد كتب:

    ود الخلا و فردته عزت

    كدى أفتوا لينا أو أقلوا نورونا عن مسألة طير الزينه بتاعت العيال دى

    موش برضوربنا سبحانه و تعالى خلانا نحنا البشر سبب لأطعامهم
    و ممكن كمان يكون ربنا بيرزقنا برزقهم

  31. عزت كتب:

    غايتو طيور الزينة دي ما أدوها لينا و لكن جايز و الله أعلم أمكن يحاكموكم في اعتقالهم دون توجيه اتهامات لهم….!!

  32. اورتشي كتب:

    معقول غنماية علي جابت كل هذا الحوار الرائع
    اخونا ود الخلا اكيد المره الجاية حنكتب عن حيوان اخر قديجررنا لحديث أجمل
    ود الخلا اهنيك بالمعلومات الرائعة التى تخللت حديثكم والدكتور عزت الف شكروحديثك ممتع يحمل كثيرا من المنطق والواقعية ولكم جميعا الشكر والتقدير

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s