انتى مؤذيااا والله مؤذيااااااا .

Posted: الإثنين,7 يونيو, 2010 by aflaiga in اخرى

فى البداية غاية الاسف للاغنيه الجميله بتاعة انتى مدهشه والله مدهشا . وبعد داك نخش فى الموضوع تووووش . صديقى س سجل لى زيارة قبل ايام وهو فى غاية الالم والاسى وبسؤاله افاد بالاتى :

افليقا انا والله عواطف دى خلاااااس تعبت معاها تعب شديد خلاااس ياخى دى مؤذية بصوره غريبه جدا واوع تقول لى كيف لانو ببساطه حاقول ليك :

اتخيل يا افليقا انك مقفل بيتك ملكك وبيت الحكومه الادتك ليهو وبيت الايجار الكنت مؤجرو وقاعد مع اهل عواطف بس لانو عواطف عاوزه كده ؟؟!!!!

اتخيل يا افليقا انك تجى خاشى من الشغل تعبان تلقى عواطف مافيشه مشت مشوار ولا ما جات من الشغل وتضطر ترجاها لمن تجى عشان تبدا حياتك الطبيعية ؟؟!!

اتخيل يا افليقا انك تكون قاعد فى بيت اهل عواطف وكانك مذيع تلفزيون بكامل اناقتك واحترامك عشان ما تجرح شعور واحد من اهل عواطف ؟؟!!!!

اتخيل يا افليقا انك لمن تكون عاوز ترتاح مع عواطفك العالم كلو بيعرف من الترتيبات الامنيه البتسبق المودووء داك وكده ؟؟!!!!

اتخيل يا افليقا انو بعد ده كلو عواطف قالا ادبا عليك وما مريحاك وما مهتمه بحاجاتك ومعاكساك فى كلامك ؟؟؟!!!!

اتخيل يا افليقا انو ولا اقول ليك والله ما حتتخيل ابدا ؟؟؟

افليقا : والجابرك على ده شنو يا س ياخوى ؟؟؟

س : بريدا والله يا افليقا بريدا وما بقدر اعيش من غيرا تتخيل بعد ده كلو تتخيل ؟؟

افليقا : والله دى ريدة الكلب لى خناقو ذاتا انت يا س مجنون ولا شنو المره دى تكون كاتباك عند فكى ؟؟

س : كاتبانى قاريانى المهم الحل شنو ؟؟؟

افليقا : سوقا وارجع بيتك انت وهم ولا شنو ؟؟

س : ابت ترجع ولو رجعت المشاكل بتقوم وتكرهنى البيت من نخش ومن تصبح لمن تمسى .

افليقا : طيب ياخى ما تعرس فوقا ..

س : طيب يا افليقا ودعتك الله يظهر انو ما عندك حل لى .

افليقا : خلاس تعال اقعد خلينا سيرة العرس طيب نمشى نصالحك عليها كيف ؟؟

س : والله يا افليقا انا ما عندى مانع لكن هى بتقبل ؟؟

افليقا : انت يا  س منجقه ولا شنو ؟؟ البيقبل منو والما بيقبل منو ؟؟ انت يا زول والله كاتبنك كتابة خطيره كمان ..

س : عليك الله يا افليقا كان عندك كلام تانى غير كاتبنك وعرس تانى واخد موقف قوى وقرار حاسم قولو ولو ما عندك خلينى امشى ..

افليقا : يا جماعه انا فهمى كمل ما تقولو لى س ده حاجه ؟؟!!!

Advertisements
تعليقات
  1. ياسين شمباتى كتب:

    ههههههههه..زولك دا فعلا (منجقة) يا افلى!!!
    دا قول ليهو يمشى يبوس يدها ورجلها عشان ترضى عليهو,كدة برتاح وبريحك من الشكية وتوير النفس..
    لكن انت مالك على سيرة البحر دى تاااانى!!؟؟

  2. قرن شطة كتب:

    العزيز افليقا …والله حكاية غريبة بجد …يعنى صاحبك ده يسوى شنو ؟؟ مقفلة معاهو لدرجة محترمة ، وانا لو مابعرفك أقول ده انت ذاتك واقع فى افلام زى دى ، ربنا يتولاك بالعافية ياصديقى ..واى حاجة فى الدنيا عندها حل بس مرات الحلول الجذرية بتبقى صعبة ومرة جدا…وانا صاحب تجربة ..وليس من عاش كمن سمع ….تحياتى وربنا يهون القواسى ياسيد…

  3. aflaiga كتب:

    شمباتى : قلت لى فعلا منجقه ؟؟ هههههههه الله يجازى محنك …
    المشكله هو كل مره بيمشى يبوس وبرضو بيقطعوها معاهو ويقلو ادبم مع انو بواس ولو باس فى اى حته تانيه بيلقى اكبر تقدير واحترام !!!
    قرن : انت شخصيا ممنوع من التعليق على البوست ده لانو نصيحتك لى س معروفه وحاره وصحبى س ده بيحب يسمع كلام البيضحكو وما بيحب يسمع كلام الببكيهو لانو المبكيهو واحد بس ( عوااااااااطف ) ..

  4. زووووووول كتب:

    افلى
    زولك المنجنيق دا قول ليهو دبل بالسر (بس لازم تقولا بصوت خفيف وفى اضانو ).
    صديقى (ص) مرتو طايعاهو للابو وفوق هذا انجب منها البنت والولد . المهم وما اكتر ليكا صاد دا شغال تجاره وكل يوم فى بلد . تخيل يا افليقا الزوول دا عمل ليهو زوجه منذ اكثر من سنتين بالسر ورزقه الله منها ولدين (من التانيه) . ثم تزوج اخرى قبل شهور وهو ينوى الذهاب الى الهند عديل كدا للزواج من الرابعه .
    انقر يا افليقا زولتك الاولى ما لسع على غباها وقايلا نفسا براها تقول ليا المنجقه .
    جايييييك

  5. زووووووول كتب:

    اتخيل يا افليقا انك مقفل بيتك ملكك وبيت الحكومه الادتك ليهو وبيت الايجار الكنت مؤجرو وقاعد مع اهل عواطف بس لانو عواطف عاوزه كده ؟؟!!!!))
    اهلنا فى غرب السودان عندهم مثل فى الحته دى
    قالوا يا افلقا : البومه قالت انا احسن من تلاته
    واحد من التلاته ديل . ال قاعد مع نسابتاوالاتنين التانين احسن نخليهم .

  6. aflaiga كتب:

    زووول : المشكله زولى ده بيظهر عليهو طوالى خلى لو عرس لو شاف وحده سمحه ساى بيجى يحكى لى عواااطف واديك مشهد :
    س : تتخيلى يا عواااطف والله بنات الزمن ديل بقن كعبات خلاااس !!
    عواطف : كيف يعنى كعبات وضح كلامك ؟؟؟
    س : لالا ما كلهن يعنى مثلا اديك مثال الليله انا راكب المواصلات قعدت جنبى بت سمحه خلاااس ..
    عواطف : شنو ؟؟ بت شنو ؟؟
    س : بت جميله يعنى جمال عادى ما اسمح منك طبعا لكن جميله مع انو الجمال ما جايى معاها !!!
    ( شفتو الجرسلين ده كيف ؟؟ ) !!!!!!
    عواطف : اها لخص المعنى شنو من كلامك ؟؟
    س : المعنى انو اتخيلى بقت تتمسح فينى وتشاغل وتحاول تفتح ليها موضوع ..
    عواطف : وانت المقعدك جنبها شنو لمن هى تعمل ده كلو ؟؟؟
    س : ابدا وحاتك ما قعدت نزلت طواااالى انا كمان بستحمل كلام فارغ زى ده ؟؟
    عواطف : شوف من بكره تانى يا تركب الترحيل يا نمرق سوا نع بعض الصباح فاهم ؟؟
    س : ليه ده كلو والله تانى وحده سمحه تجى جنبى بنزل طوالى انا فاضى كمان ؟؟

    اها جنس ده يسوو ليهو شنو ؟؟؟ تقول لى يعرس بالسر ؟؟ والله ده لو حلم بى وحده ابليسية يقوم مخلوع ؟؟؟

  7. aflaiga كتب:

    زووول : عليك الله الاتنين التالنيين ديل اهم من القاعد مع نسابطا !!وده ما عشان صديقى س بس عشان اى سيناوى يعتبر !!
    زووو ل: انت وقرن شطه ممنوعين من النصيحه الى ان يهدى الله صديقى س من تلقاء نفسو دون الحوجه لاى بومه !!

  8. حاج أحمد السلاوى كتب:

    ولدنا الدينمو .. ابو الأفاليق ..
    أولن بالتبادى الناس اللى لسه خارج الشبكة ولا ضاقوا ضريرة ولا لبسو حريرة …و كانوا أول المعلقين ديل يبعدوا بعيد وما يدّخلوا فى حاجة هم ما جربوها ولا بيعرفوها.. ونصائحهم الغالية دى يحتفظوا بيها حتى حين … لحد ما الله ييسر ليهم أمرهم ويعيشوا حياة صاحبك المسكين دا .. وبعدين يطبقوا انصائح على روحهم….. إتفقنا ؟؟
    الحاجة التانية صاحبك دا مش منجقة وبس.. دا أبو المناجينق زااااتهم ..معقول يا أبو الأفاليق زول يفقل بيته البناهو .. وبيت الحكومة ( معناها إنو موظف كبير فى الدولة .. لكنه منجنيق )وبيت الإيجار كمان ( هو أصلاً مؤجره عشان شنو ؟ )ويطاوع عواطف ويمشى معاها لبيت نسابته ؟ والمشكلة إنو ما راضى بكل الحلول الممكنة واللى أصلاً ما فى غيره ..كدى بالله رسلو لى أو ادينى رقم تليفونه عشان اوريهو يعمل شنو ..
    غايتو لاكين .. جنس منجقة …دا شنو دا ؟؟؟؟

  9. عباس ركس كتب:

    الحل واحد يا افلي : يتبادلوا الhardware وبس !!!!!!!!

  10. حاج أحمد السلاوى كتب:

    الدينمو .. ابو حمودى ..
    سؤال سغيروووووووونى كدا .. قصص صاحبك “س” دا خيالية ولا من واقع الحياة اليومية ..؟
    غايتو أنا ما قادر أصدق حاجة زى تحصل..

  11. aflaiga كتب:

    ركس : اها وانت كمان اخير قرن والزووول – ديل حلولم صعبة لكن مع الاحتفاظ بالهارد يعنى شغالين فى حتة السوفت وير !! انت ماشى للهارد طوالى مالك اسى هو بدون تغيير هارد معذب لكن بينى وبينك جنس حالة س دى اخير منها الهارد الفيميل !!!
    السلاوى : اسمع نصايحك اصدقك اشوف فى شخصك احلامى وسحر الدنيا فى عيونى !!
    صديقى س ده نموذج لكمية من الناس الما قادر ابوح انا ما ما قادر اصرح يمكن قولى ….

  12. الزهراء كتب:

    تحياتي اخي افليقا
    صحبك س ده فقع مرارتي عديل
    ده مش ماعندو شخصه !ده ماعندو نيه في شخصيه زاتو
    لكن عفيت منها عواطف شكلها كده قطعت رقبة الكديسه من اول يوم وبقت سيدة الموقف بلا منازع

    ابونا السلاوي: لك التحيه- دايره اقول ليك انو امثال س ديل كتار بس متضارين في البدل المنفوشه ومدعين السياده- لكن لو دققت من قريب تلقاهو فايت س بي هناك.
    هو مش كويس انو قاعد معاها في بيتهم؟
    الكلام بو كان في بيت اهلو وعواطفو متحكمه فيهو والله كان موقفو حيكون اصعب

  13. معقول بس كتب:

    يعمل س مجنون وداير ليه عزيمه تقوم عواطف توديه للفكى الكارب بتاعها يقوم س يتفق معاه يحل المربوط ويا دار ما دخلك شر
    تانى حاجه س محنه كتيره حقو يسافر يعمل تغيير يمشى ج افريقيا يحضر كاس العالم ويجيب معاه جمايكيه تانى عواطف بتقرا بيه التشهد
    تالت حاجه يقوم س يخترع ليه مشاوير من مافى كل يوم مشوار ويظبط ويتهندم ومامشكله يحوم بالشوارع ولا بعمل ليه ماستر مسائى وبعد الماستر يغشى ناس امه ويرجع انصاص الليالى تانى عواطف تب مابتتكلم
    كسرة :
    هو س ده مالو لحق الشعب السودانى فى سكاته شكلها الايادى قويه
    اخر شى ارفع يدك بالدعاء ربنا يهديها ويهدها
    بالله فى نسوان مقدرة قدر ده وحكامات والله جنس محن اخونا س مظلوم ظلم الشعب الفضل فى الصحن
    كسرة تانى ::::
    الحل الوحيد س يشيل جاز وبنزين ومويه نار يحرق اهلها بترتاح ويبقوا برااااااااااااااااااااااااااااااااااهم

  14. طارق أب أحمد كتب:

    أفلى و وفردته سين
    أنا عندى الحل بس خلى بعدين ما ينسا الحلاوه

    قول لى صاحبك دا يشوف ليهو كم فرده كده و كول يوم يطبوا عليهو الساعه تمانيه تسعه يللا هو يقوم يتور نسيبتو سوى العشا للضيوف يوم سمك وم شيه و يا سلام لو فى يوم بتاع كوارع ,,الحاجه حتساهر لى قريب الفجر
    و أخيرا حيجيك الفرج نسيبك حيقول لى بتو لمى راجلك دا و إتخارجى
    بس على شرط ((ما تعشوا ابو النسب معاكم ))

    ولاهى انا ما شايقى

  15. حاج أحمد السلاوى كتب:

    طارق اب احمد .. عفيت منك .. إقتراح رائع وممكن يساهم فى حل معضلة المنجق صاحب افليقا ..

    كسرة سغيرووووووونة .. شهر ستة ما خلاس قرب يخلص ..التاشيرة باقى فيها كم يوم ؟
    راجنك بفارغ الصبر ..خسوساً ود الحفرة..!!

  16. aflaiga كتب:

    اب احمد : وهو قاعدين يعشوهو لمن يجيب ضيف معاهوة ده بيجى خاشى نص الليل خت راسو ويقوم الدغش ينطلق عشان يفتش رزق عواااطف وشفعا . ضيف شنو والله هو كان قال عاوز عيشه زياده مع الفول بتاع بليل الا يدوهو كرت احمر انا ما قلت ليك نسيت انو نسابتو شوايقه !!!
    معقوله بس : معقوله بس ؟؟؟ اب قلبا جامد !!!!موية نار عديل كده ؟؟ ويعيشو هو وعواطف فى ثبات ونبات فى سجن الهدى امدرمان مووووش ؟؟

  17. الصادق ود البركة كتب:

    السلام عليكم ورحمة الله
    الأخوان الكرام جميعاً خصوصاًافليقيا
    الزول ده زيو كتير أصلي بعرف واحد قريب مني مرتو قالبه حالو وحال أهلو وبعد ده ما شايف انها غلطانة في اعمالها دي تخيل كنت في زيارتهم وانا عريس جديد وهم عندهم عربات مش عربية واحدة صاحبنا ما قادر يقول للسواق وصل العريس حتى تقول هي وياليتها ما قالت اصلها قالت للسواق وصل العرسان للشارع عشان يشوفو ليهم تاكسي يوصلهم والشارع على بعد 100 متر
    الدكتور شمباتي مالك بتعلق يوم الاثنين أول واحد في موضوع ليس لك ناقة ولا جمل ودمتم

  18. محنك كتب:

    الزول دا فريد عصرو الما متلو شى

    عليه بالروشتة ، يعظ ثم الضرب غير المبرح ثم الهجر فى المضجع ، ثم يتحول الى ان يقيم فى البيت البريحه ولو لوحده مع اولاده ويخليها لامها ، ويرسل المصاريف نهاية الشهر ( النفقة ) .

    الاطفال عمر كم بالمناسبة

    لو الكبير عنده بنت يخليها تتعلم شغل البيت ويسوق عياله ويخليها .

  19. aflaiga كتب:

    ود البركه : بركه الما قالت للسواق وصل العريس وخلى العروس ليها ..
    محنك : وانا من المتابعين لحياة س صديقى ايه رايك انو وعظ وهو بالمناسبه وعااااااااااااااااظ وبعد داك ضرب وهو بالمناسبه ضريييييييييييييييييييب وبعد دالك هجر وهو بالمناسبه جريييييييييييييييس ما بقدر على الهجر !!! والانكى من كده ما بيقدر يحرما من شفعا ويسوقم معاهو والله س ده مؤدب ادب بنات ولو الله ما جابو راجل كان حيكون احسن زوجه فى العالم !! الاطفال زغب الحواصل يا عمك ….
    انتو ما عندكم غير الدق والهجروالعرس مافى زول يقول الهدنه ولا الجزيه ولا اطعام ستين نسيب !!!!
    ناس خرابين بيوت بشكل !!!

  20. aflaiga كتب:

    صديقى ص يا ود البركه زمن الجهل جاب ليهو بنيه تطرى ليهم القعده الناشفه بتاعتم وكان معاهو شله بتاعة شباب مدورين دخان ومشروبات البنية اى شيء دور دورت فيهو مر الدخان نفست مر الشراب جغمت فصديقى ص قال للشباب يا جماعه ما تمشو بعيد شكلو البنيه دى عندها نيه الليله تطقطقنى !!!! هناك نساء مسترجلات بطبيعة التربيه او التنشئه التى ولدو بها اى ان بعضهن يكون الدور الانثوى فى بيته اكبر من الذكورى فتقوم بوراثة الجينات الانثوية المتسلطه ..
    قرن شطه بالله فلسف لينا سيكلوجيا هذا النوع من النسوان مع اضفاء بعض من بريق التجارب ..

  21. سهيل كتب:

    اخخخخ .. صاحبك دا مش مجنقه .. دا فاره عديييييل كده .. هسي الراجل فيهم منو ؟؟؟ هو ولا مرتو؟؟
    و انا مستغرب .. بحبها كيف و هو بخاف منها .. طيب هي لو بتحبو .. ليه بتذلو كده ؟؟؟

    صاحبك دا يا افليقا حلو إنو يبقى راجل.

    ود بركه : عفيت منك .. عذب لي شمباتي دا

  22. حاج أحمد السلاوى كتب:

    ولدنا سهيل ..
    أرعى بقيدك .. إنت لسه فى أول الطريق .. والطريق قدامك لسه طوييييييييييييييييل .. لا تفلت حاجات بعدين تُحسب عليك ..فىى ميزان حسناتك ..شوية .. شوية .. بريس .. بريس … لحد ما تتمكن كويس ..
    – ودالبركة .. لاكين القالت للسواق وصل الجماعة راس الشارع دى .. بالغت عديييييييييييييييل كدا ..وسعيد واقف يعاين بعيونه .. دا كلام … وين المرجلة ؟ ..ووين الشهامة ..؟ ,,ين …. ؟ وووين…والله يا جماعة الخير .. جنس دا لحد حسه ما قابلنى ..وإن شاء الله ما يقابلنى لأنى كنت حأتصرف معاهو بما يقتضى التصرف الرجولى والسودانى ..
    – أخونا .. معقول بس .. دا ما شايف زول رحب بيهو ..ولو من باب الكشكرة سااااكت .. وبصراحة كتاباته جميلة واسلوبه وساخر جميل .. نرحب بيهو بين أهله وأصحابه من جميع الطوائف .. لاكين السؤال البسل الروح داك … خلينااااااهو .. زى زيت صباح الجديد .

  23. aflaiga كتب:

    حاج السلاوى بتاع زيت صباح : اسال ولا سهمك انا مش قلت ليك لحدى السؤال مافى مشكله ؟؟؟
    معقولة بس : مرحب حبابك ورينا موقعك الجغرافى وقروبك العمرى عشان نقدر نحدد نناديك كيف ؟؟
    سهيل : هوووووى يا دا تاكد ان كل ما تقوله قد يستخدم ضدك من حقك ان توكل محامى ومن حقك الا تدلى باى اقوال الا فى حضور محاميك – عم السلاوى لقد تليت عليه حقوقه وفهم واعتد !!!

  24. ابكرون كتب:

    يا فلقه : انت صاحبك ده ساكن الشقله شقلن لن لن لن….؟؟؟؟؟
    نصيحتي ليه يسفرها الصين ين….ين ….ين اتجاه واحد….
    ما نفع يهجرها في المدافع….فع ….فع…. فعلحدي ما تهوهو …هو….هو….هو
    ما نفع يشتري طبنجة ولزر 9 ملي وخزنه 8 طلقات وهي نايمه يدخل الماسورة قي حلقوما ويضغط التتق ضغطه واحده…..

  25. aflaiga كتب:

    ابكرون : والله تعصرو عليهو يفرغ الولزر 8 ملى فى نافوخو هو ويكون شهيد الاذى الجسيم !!
    ابكرون : انت زول عادل فى الحكم مع انو حكمك ناشف !! لكن عليك الله مش بعد مرات فى عواطفات بيستاهلو يتدردقو ليهن فى الواااطه فى ذمممممممممممتك ؟؟ اى نعم برضو فى وحدات بيستاهلن يمسحو بيهن الواطه لكن برضو كده فى وكده فى ..
    بالنسبه للهجر قلنا ليكم س ده جريييييييييييييييس وما بحمل الهجر فوق ثلاث ليال وشعارو فيلتقيان فيعرض ذاك ويقبل هذا واجرسهما الذى ياكل الكلام !!

  26. طارق أب أحمد كتب:

    سين
    البنوت يقابضن فى الرجال فى الشارع
    تلقى البت زى لهطة الإشطه و عايزه ليها حاجه عندها شنب و ريحتها سجاير
    و جاى تقول لى سين جريس وهو عندو مطارين فاضيات

  27. طارق أب أحمد كتب:

    سين
    ما دام كل النصايح ما نفعت
    إتكل على أى حاجه و أشتغل رقاصه

  28. ودالخلا كتب:

    سلام ياقبيلة،،
    صديقي أسليقا، أقصد سين.. آآخ، أقصد أفليقا، أنت صاحبك (سين )دا مصاب بمرض الشيزوفرانيا البيغادي وما بيعادي ؟؟
    وبعدين السؤال السغيييروووني المحيرني يا سديقي ما هي علاقة صديقك ده بي (ناس لا لا..)
    يا ناس لالا ناس لالا ناس لالا.. خلو الالا والالا في حالا .. خلو الماخطر زول علي بالا وبكرة الدنيا جايا لا جايالا..
    وكلام أسد الخلا الورور ده ما ترميهو واطة…
    أقعد سوي لي صاحبي (سين) وسديقي( صاد) لمن تلقي الالا.. ولالا وخم وصر..

  29. سهيل كتب:

    جدو سلاوي و افليقا : باين عليكم إنتو ذااااتكم طلعتو ( سينات) جمع س !!! قلنا ليكم صديقكم س دا حلو إنو يبقى ( راااااااجل) .. والراجل لما يكون اسير جسد عواطفو دون عقلها .. يبقى صاحبك دا عندو مشكله تانيه يمشي يحلها بعيد عننا .. هنا نحن بنتداول مواضيع .. ناس شاده حيلها و بس .

  30. بعد كلام ولدنا الجسور ده – اقترح انو نسقف على كده – لانو ده الزيت بتاع الكلام الفووووووووووووق ده كلووووووووووووووووووووو.
    يخضر كيبوردك يا عريس.

  31. حاج أحمد السلاوى كتب:

    حفيدنا سهيل ..
    أأفو عليك .. بعد العمر دا كوووولو نطلع سينات ( جمع “س”)… كضبن كاضب.. جيلنا دا ما بطلعوا منو سينات تب ..أمشى فتش على السينات وين برا ..وبعيد ..

  32. سهيل كتب:

    جدو حبيبنا و تاج راسنا .. طيب مالك من قبيل ماخد شمال و ساند “س” صاحب افليقا دا .. نحن عارفين جيلكم دا كاااارب و شادي حيلو و ما فيهو كلام .. مش زي ناس اليومين ديل .. غايتو جنس غايتو ..

  33. قرن شطة كتب:

    صاحبى افليقا …سلام والله انت قصصك غريبة او بالاحرى قصص صاحبك …انت عارف فى ناس كثيرين مكتلوين وصابرين ، صاحبك وصيهو بالصبر او يمشى الهند ….دمت

  34. معقول بس كتب:

    ياجماعه الخير معليش
    لقيت الباب فاتح ودخلت توووش معاكم فى غداكم الدار عامره باهلها واكلكم طيب واهو اكلنا مع س شويتين
    اصلى بريد المواضيع المتل دى البدخلوا فيها الاجاويد الواحد يربط عمته ويشيل عصايته
    وفى النهايه يا ولدنا س لو جيتنى بمرقك بعروس من بنياتى بس اشر
    وديمه على مابظلم لى راجل لو مرته مظلومه برضو بنصره تب وبعرس ليه دحين مثنى وثلاث ورباع دى ساكت بس نقولها قولة خشم لازم التطبيق
    ويا ولدنا افلوقا لازم تفلق طوالى بواحده تانيه قصدى لصاحبك الممكون ده
    الحقارة ما سمحه لو مسحة بيك السراميك امسح بيها البورسلين شوف كان تهبشك تانى
    لمن جيت داخل داركم العامرة قالوا لى فى فكى مكرب اسمه ابكرون برضو استعين بيه يمكن عنده حجبات زى حقت شاى ليبتون تموصها وتجيب ليك حقك مطرز
    سالتونى من جيلى دحين انا ضايع مابعرف لروحى جيل معين مشتت بين الرؤساء والكبر ما سمح انا من جيل البشير صدقونى —-
    والعمر الاعمار بيد الله والسؤال ده خلوه لحلقه جايه
    اما انا من الخرطوم وبعرف ميدان جاكسون والمحطه الوسطى وزحمه الشارع ورفيقى الحر الخلى الدنيا تلمع متل المرايه اريته حر اليابانى لكن ده حر السودانى
    ————————————————–
    غايتو س يجى يسجل عندى فى معهدى بتاع كيف تجعل من نفسك رجل يهرش حوا بالطوة
    الداير يمد راسه

  35. حاج أحمد السلاوى كتب:

    أخونا .. معقول بس ..
    وأنا اقول ليك دا اصلو ما معقول ..وغايتو من كلامك الفوق دا أنا أعتبرك من دورنا .. جيل الكواشف ..والإصطلاح دا حتسمعه كتير فى المنتدى كان الله مدّ فى اليام وقعدت معانا وشاركتنا الحلوة والمرة ..وما دام عرفت ميدان جاكسون والمحطة الوسطى فنحنا صنفناك خلاس وحددنا قروبك ..
    بس خليك قريب ..
    أما ولدنا “س” الله يكون فى عونه لأنه مكسر شديييد فى عواطف وما قادر يتوب ويرجع يستغفر ربه .
    على اى الحالات نرحب بيك مرة تانية فى منتدانا الجميل برواده من كل الأطياف ..
    وأكيد اكيد حنتقابل … كما غنى الكابلى !!!

  36. زووووووول كتب:

    افليقا
    الحل بسيط يا عمك
    يسكن فى بيت نصابتو وما يفك بيت الايجار ويبقى عشره فى مفاتيح بيتو الملك لانو احتمال تجيهو سفره هوائيه وكدا بعدين يديها الماهيه ويجى يتسول حق الصعوط (السافى ليها شنو ؟ والله حقو عواطفو تسف وتسجر وتركب الفيل زاتو ويبقا الفاعل فى محل مفعول به مجرور من اضانو )
    صديقى دال متزوج واحده ببيتها وساكن مع اهل المرا والمرا مقندله للابو وما دايرا منو اى حاجه !!!. المشكله انو صديقى شحاد وقليل ادب . تخيل يا افليقا مع النعمه دى كان بدى عواطفو فى التنك زاتو ولمان التنك كتر عليها اضطرت انو تجدع ليهو شنطتو بتاعة الحديد فى الشارع ولامن جاء دقا الباب
    ــ مين فى الباب
    انا دال
    ــ يدلدلوك فى جهنم ! بالله غووور مننا ما دايرين وشيك دا وشنطتك الكريهه دى جدعناها ليك برا
    كسره : نحن خايفين على صديقك سين من زى دا يا افليقا ودا البومه زاتو ما بترضاهوو

  37. ودالزبير كتب:

    أها بقيتو على شنو ؟؟؟؟؟؟؟؟؟؟؟؟؟

    يطلقها ولا يعرس فيها ولا ينتحر ويرتاح

  38. التركــــى كتب:

    السمار الكرام والغالى افليقا سلام الله عليكم
    ياافلى انت س دا الوليه دى ماسكه عليه شئ ؟ شغله دا ماجرسة وبكى ساااااى …. غايتو الحل فى المرجلة… يكون عاجبه الحال وعامل رياد ومكسر …. ربنا يعينه

  39. طارق أب أحمد كتب:

    معقول بس
    أتمنى أن يطيب لك المقام بيننا و الفميه و تلاته مرحبتين

  40. DAKEEN كتب:

    يا اخواننا الحل بسيط ،،،، وين المعارضة والمعسكر الشرقي ،،، اخوات سين ووالدة سين واهله ،،، ولا مقطوع من شجرة ،،، وتم اختياره بعناية ،،،،
    س اخر ،،، حكي مشكلته لي اصحابه ،،، وديل مقرمين وساكنين في حظيرة افيال ،،، ركبوه فيل وقالو ليه امش الليلة مشكلتك اتحلت ،،، اول ،، تبادي فتح الباب بالشلوت ،، وإتناول ليك المرة بي كف صنن اضانها ،،،، قال العشاء ،، جابت ليه صحين فول ،،، قال ليها جيبي الحاجات في التلاجة دي كلها قدامي هنا ،،، وفعلا بدا في الاكل زي الفيل لمن اترع ،،، و ومسح بطنه ووربت عليها مرتين وقال للمره : من الليلة وليي قدام حا تشوفي افيال ………..

  41. aflaiga كتب:

    على بالايمان انتو برلمانكم ده احسن من المجلس الوطنى ذاتو بتشرحو القصص بطريقه ميه ميه وتدو الحلول اللى هى ..
    بالامس قابلت صديقى س ونقلت له خلاصة ملخص زبده ما تم تداوله من اراء كالاتى :
    افليقا : والله يا س الناس ديل ريم ميه ميه وملخصو كذا او كذا او كذا ..
    س : يعنى يا افليقا مافى خيارات ؟؟
    افليقا : ابدا مافى اى خيارات وقالو انت منجقه كمان !!
    س : انا منجقه ؟؟ طييييييب انا بوريهم انا منجقه ولا ما منجقه اصحابك ديل بس ادينى فرصه انقل لى عواطف اراء الناس ديل واشوف رايا شنو ؟؟؟؟؟
    افليقا : تشوف راى منو ؟؟؟؟؟؟؟؟؟؟
    س : راى عواااااااطف ما سمعت ؟؟
    افليقا : والله يا س انت مش منجقه ؟؟ انت هناى عدييييييييييييل كده .

    فى ختام هذا البوست الذى اتحفتمونا فيه بروائع تعليقاتكم
    الشكر موصول للاخ س ولعواطف ولكل من علق فى هذا البوست
    ونقول لاخونا س واصل فى البتسوى فيهو فمرمى الله ما بترفع ونقول لاختنا عواطف مبروووك عليك زوجتك س ….
    وخلونا نشوف واحد تانى من اصحاب افليقا فى بوست قادم …

  42. حاج أحمد السلاوى كتب:

    الدينمو .. افليقا ..
    شنو .. يا خوى .. إنت اصحابك كوووولهم من النوع دا ..ولا شنو ؟
    يعنى خلاس قنعت من خيراً فيها وسقفت على كدا ؟
    لاكين صاحبك “س “مش منجقة ..دا هناى عديييييييييييييييييييييييييييييييييييل كدا ..
    وغايتو … جنس … غايتو !!

  43. aflaiga كتب:

    ابوى السلاوى ابدا والله شفت س ده بس هو المعذبنا لكن الباقين من النوع البيغسلو ليهم كرعينم فى الطشت اول ما يخشو البيت …
    اها عشانك البوست الجاى عن صديقى ك وده حيكون بالصوره والصوت ..

  44. سهيل كتب:

    كاف ؟؟؟ الله يكفينا شر خلفه ..

    سلولو : هنايه عديييييييل كده

  45. ياسين شمباتى كتب:

    الصادق ود البركة..سلام..
    غايتو جنس قبض!!!! ظروف البلد الهناك جبرتنا نظهر كل يومين,اما عن الموضوع فخلينا نعيش الدور ساااكت..

  46. سهيل كتب:

    خلاص يا شمباتي … سقفنا

  47. ياسين شمباتى كتب:

    سهيل..مبروك عليكم السقف,,ان شاءالله مسلح بس؟؟

  48. aflaiga كتب:

    شباب : امبارح وانا ماشى جنب وكالة سفر فى شارع الجمهورية لقيت صديقى س ومعاهو اموره سغنتوته والحنه فى يدينم بيحجزو ماشين يقضو شهر العسل فى القاهره .
    افليقا : يا س ده شنو ده ؟؟ ما عامل فيها موحد ومكسر وبكاى ؟؟
    س : اول شي اعرفك بالمدام – وتانى شيئ والله يا افليقا كلامكم سخن معاى شديد قمت طوالى دقيت سدرى وعرست – وقبل اعرس وريت عواطف انو انا ما مابيها لكن بقسم القصه بينا وبين العواطف الجديده – واحده للحقوق ووحده للواجبات !!!
    افليقا : واها بعد تجى حتفتح بيتك بتاع الحكومه ولا الملك ولا الايجار ؟؟؟
    س : لالا والله ابو العروس مصر انو نسكن معاهم فى البيت !!!!!!!!!!!!
    افليقا : والله يا س مرمى الله ما بترفع جد جد …. انت منجقه ولا شنو ؟؟
    س : ابدا والله بس اتعودت وكده !!!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s