الاخطاء الطبية هل هي خطأ الطبيب فعلا ؟

Posted: الثلاثاء,8 يونيو, 2010 by moshahidah in إجتماعية
الوسوم:, , ,

في حال كنت طبيب سوداني فالجواب لا ..

و اليكم السبب من وجهة نظري الضعيف شويتين ..

تخيل  معي انك داخل راس طبيب/ طبيبة من السودان ..الف فكرة تتخبط الف فكرة تطاردة من همومة الاقتصادية ..التي تبدو مستحيلة و ما جميلة ..لمستقبلة الاكاديمي المظلم ..ما دام لا ينتمي للمؤتمر الوطني “الحزب الحاكم”..

ماذا عن عضلاته ..

اممم ..طبعا كل عضلة تشكي  لاختها و لا اظن بندول الاعلان الشهير سيفيد هذا المسكين الذي تحركت عضلاتة حركات ارتعاشية غير منتظمة مع تعرجات الشارع وهو يركب المواصلات العامة ..و تحركت بشكل عصبي مضطرب وهو يكيفها مع المكان الذي يبيت فيه ليلة النبطشية (المبيت في المستشفي)..عضلات متهالكة ..من قلة التغذية المسكين نسي وجباته من الجري او لم يجد ثمن وجبة مغذية كالتي ينصح بها مرضاه..

طيب ما حال الجهاز العصبي ..ليس افضل بل انه علي العكس مشدود دوما عكس الجاذبية  مقاوما  التمزق من الشد من كل جهة .اهل المريض ..المريض ..ادارة المستشففي ..نقص المعدات ..مشاكلة الخاصة ..الخ .

اذن في المحصلة لدينا كائن بشري في اضعف حالاته ..يسعي لرزقة وفي جزء منه الطفل الذي يجي الخير يحب الناس و يريد ان يكون المداوي و المعالج ..

اذا ما نسي شاشة في معدة مريض هل هو الملام حقا ً ام من وضعه في هكذا ظروف ؟

انها النتيجة المنطقية  فحسب ..

الضغط لا يولد الابداع ..الفقر لا يحي الضمائر ..القلق لا يتماشي مع التركيز و الاتقان ..لذلك طبيبي العزيز اضرب ..لتعود انسانا كاملا متمتعا بكامل قواك العقلية و الجسدية ..

اضرب كي اطمئن انك تستطيع التركيز ..

—————————————————-

مطالبهم مشروعه ..و الوقوف معهم واجب وطني ..

ودمتم سالمين يا ابناء بلادي

http://moshahidah.wordpress.com/

اخوتي العرب ..اقرؤا  اكثر عن الموضوع ..ابحثوا في جوجل ..ما دام الاعلام  لم يلتفت لهم بعد ..

Advertisements
تعليقات
  1. moshahidah كتب:

    لقاء هيئة الإذاعة البريطانية مع ممثل اللجنة الساعة التاسعة مساء اليوم

    http://www.bbc.co.uk/arabic/tvandradio/2009/06/090629_radio_livestreaming.shtml

  2. ابكرون كتب:

    فعلا مشاهدة اخواننا وابناءنا الاطباء لهم قضية عادلة جادة ومطالب حقيقية اعلنوها قبل وقت كافي …الا ان مماطلات وزارة الصحة هي اساس تصعيد القضية وكذلك تخل امن الدولة وبطشه بالاطباء اعطاها بعد سياسي وارهابي اخر…..وما اشبه اليوم بالبارحة وما اشبه 2010 ب 1989 ولك الله يا وطن

  3. عزت كتب:

    مطالبهم مشروعة و نص و خمسة فالطبيب عندنا لازم يكون قاشر تمام و شاكي البنطلون و ملمع الجزمة لكي يقنع المريض …

    عارفا زمان يا مشاهدة كان عندنا صديق طبيب كان راكب البص و نزل جنب المستشفى و مشى سريع و مشى قعد ورا التربيزة في الحوادث…
    جات مرا تتكى و قعدت قدامو….
    فقالت: سجمي انت مش الكنت معانا في البص قبل شوية…… برييييييييييييييييييييييييي ..!!

    فمن أجل طبيب مستقر نفسيا لكي لا يخطئ………
    زيدوا اجورهم و أعطوهم ما يستحقون و هيئوا لهم جو عمل مقنع و بلاش حكاية (عريان و نزهي دي)…

    نحن لسنا ضد التبرع لجيراننا لكين جنس التبرع بتاع أفريقيا الوسطى دا يطرشنا ما سمعنا بيهو الا في السودان ….!!

  4. محنك كتب:

    هسى يا اخوانا فى ضابط برطب المواصلات ليه الدكاترة ديل ما يوفرو ليهم ترحيل ويكون بلون خاص ويفتحوا ليه الشارع كمان ومن نائب اخصائى يدوه عربيه بالسلفية ويخصموها منو ، ويدوه بدل لتسييرها . اما الميز فيجب ان يكون احسسن من ميز داخلية جامعة الخرطوم كلية الطب لما قرا فيها وكيل الوزراة ود عبدالقا … او تجتمع بطلاب الطب وتنفض يدها منهم وتقول ليهم يلا عفيناكم لا امتياز ولا تخصص ولا خدمة الزامية . اتخرج والحشاش يملا شبكته

  5. التركــــى كتب:

    الأخوة الأعزاء سلام الله عليكم
    كثير من الأخطاء الطبية مشتركة بين الطبيب وادارته متمثلة فى وزارة الصحة …. الطبيب فى بلدى صار مهزلة فلا الوزارة مهتمة به ولا هو مركز على مهنته نعم ظروف الحياة اجبرته على التوهان كثيرا والسباحة بعيدا عن شاطئ مهنته لكنى لا ارى ذلك سببا لنسيان قطعة قماش او اجراء عملية دون استئصال العضو المعطوب … مانسبة ميزانية وزارة الصحةمن الميزانية العامة بل مانسبة المبالغ المستخدمة من هذه النسبة فى مجال الصحة ؟ لماذا لا تقوم الوزارة بتطوير المجال الصحى الا بعد أن تعكس الصحف رداءته مما يوحى بانها قادرة على ذلك …. أتمنى ألا يكون مايجرى لعبة سياسية المقصود منها التقليل من كفاءة بعض القيادين بالوزارة … هناك مآسى فى مجال الصحة فقد رأيت مغاسل كلى ترقد لأكثر من ستة أشهر لاتعمل لعدم وجود من يجيد استعمالها وهناك حاضنات اطفال اكل عليها الدهر وشرب لكنها لم تستعمل لعدم وجود من يصينها … آلاف الأطباء بدون عمل بينما الأقاليم تئن من ندرة الأطباء العمومين ناهيك عن التخصصات … قد يصب ذلك فى خانة الادارة لكن ماذا عن الأطباء الذين لايطيقون فراق العاصمة حتى الى المدن الكبرى …. ان من اهم اسباب تطوير الريف توفير الصحة والتعليم مع وجود الماء الصالح وكلنا يعلم ذلك ….. أرى أن الخلل مشترك وللوزارة الجزء الأكبر خاصة وهى تستغل انسانية المهنة فى استدراج عطف المواطنين ولولا علمى بان الأطباء قد ضحوا ومااستبقو شيئا لما أيدت مايقومون به حاليا فلينصرهم الله وليحظو بحقهم العادل دون تسييس للقضية

  6. ياسين شمباتى كتب:

    الاخت مشاهدة…سلام..

    (الضغط لا يولد الابداع ..الفقر لا يحي الضمائر ..القلق لا يتماشي مع التركيز و الاتقان)..ايجاز وتصوير للوضع كما هو…وللاسف كل يوم يزداد الوضع سوءا,,بالامس تم اعتقال د.عبدالعزيز على جامع نائب رئيس اللجنة ود.محمود..
    وللاسف الشعب نااااااائم ويمرى باللائمة على الطبيب!!! والغريبة برضو انو لجنة علماء السلطان ابان الاضراب السابق اصدروا فتوى بتحريم الاضراب!!!!

    لا نعفى الاطباء من مسئوليتهم,, لكن بعد توفير بيئة العمل,,ولقد بح حقلنا ونحن نطالب بهذا التحسين حتى تتم المساءلة الحقيقية,,لكن ان يكون الطبيب من سكان ام بدة ويعمل بالمستشفى التركى وياتى بالمواصلات ليجد الحوادث مكتظة ولا يوجد اكسجين والمعمل متوقف والكهربا قاطعة,,دا مش مفروض ينتحر طواااالى!!؟؟
    شكرا كثيرا مشاهدة…واسمحى لى بنقل البوست الى فضاءات اخرى.

  7. aflaiga كتب:

    مشاهده : احىىىىىىىىىى من الاخطاء الطبيه .
    تعرفى انا شخصيا كنت حاتعرض لى اشكال كبير جدا جدا نتاج خطا طبى بدا بالتشخيص ولو استمر الامر كنت حاكون الان (( تيوبلس )) لانو كانو حيشيلو اى حاجه شاكين فيها ما عارف ده دكتور ولا بتاع مباحث جنو شك اول مره شك فى الكلى وملن راقبا واتحرى عنها قام شك فى المصران ولمن عمل ليهو فيش قام شك فى الذايده ولما رصد تحركاتا قام شك فينى انا ذاتى تعرفى فى النهاية طلعت المشكله فيهو هو وانا اصلا كنت شاكى فيهو من الاول …
    جاييك للموضوع ده برواقه لانو انا خسران 2 من اسرتى القريبه بسب الكلام ده بعد قدر الله طبعا ..

  8. aflaiga كتب:

    الماساة الاولى :
    المريض س دخل المستشفى لاجراء عملية بروستاتا وخرج منها بخطا طبى نتاجه ( تم قطع الجزء الخاص بالتحكم فى الاخراج وصار المريض يخرج نوعى الاخراج فى ان واحد دون تحكم ) والمريض مصاب بالسكرى فتسبب ذلك فى التهاب فى الدم وصارو يجرون له الغيارات للجرح ثلاث مرات يوميا فينخفض الضغط يتم انقاص الغيارات يرتفع تسمم الدم والجرح حتى فارق الحياه بعد اسبوع من العملية التى لم يكن فى حوجه ماسه لها فى الاساس ودخل المستشفى برجليه وخرج محمولا على نقاله ومنها للمقابر ….. المريض س هو والدى عليه الرحمه ..
    المريضه ص طبيبه مشهوره من اشطر طبيبات بلادى برغم حداثة تخرجها التى لم تكمل العام فيها كانت تتدرب بمستشفى حكومى كبير واصيبت بملاريا واسهال حاد وتم اعطاءها جرعات تعويض من محلول وريدى فاسد وخلال نصف ساعه اصيبت بتسمم فى الدم وفارقت الحياه … المريضه ص شقيقتى عليها الرحمه ..
    المريض و دخل للمستشفى بسببارتفاع فى سكر الدم وكان سيخرج تيوبلس بلا كلى او مصران او مراره او حلاوه ذاتو والحمد لله نفذ بجلده من المجزرة .. المريض ز هو شخصى الضعيف ..
    الاثار الجانبية للحوادث الثلاث :
    – كفرنا بالطب وصارت الصيدلية الشعبية اهم من المويه والاكل فى البيت ..

  9. ودالخلا كتب:

    سلام ياقبيلة،،
    زمان زمن الدنيا بخيرها كان الأطباء رُسل طمأنينة وملائكة رحمة، كان الطبيب ينظر للمريض بأهتمام وتعمق ويفحصه بتأني وشفقة تحس أنك بين ملك رحيم، وأما الآن فالطبيب أصبح مقاول يتعامل مع المريض بالمقطوعية وكم تساوي هذه المقطوعية ، ينظر الطبيب لجيب المريض ويفحص حالته المادية قبل تشخيصه للحالة المرضية وعلي حسب الحالة الأقتصادية للمريض وما يحمله جزلانه أو محفظته من نقود وكم يساوي هذا المريض لأكمال العمارة أو شراء المزرعة يتم التعامل معه…
    للأخطاء الطبية قصص تروي وحكايات مثيرة تتناقلها الركبان كقصص أغرب من الخيال، وتمت الناقصة في المستوصفات الخاصة بأن يتم حجز المريض لحين السداد وأغرب القصص حجز الموتي في بعض المستوصفات الخاصة الأستثمارية لحين سداد فاتورة علاج مضي صاحبها يشكي ظلم الأنسان لأخيه الأنسان عند الملك الديان.
    أخطاء طبية منكرة، ومعاملات قاسية ورعاية طبية متدنية.. أحشفا” وسوء كيلة !!!
    ….

  10. معقول بس كتب:

    الحصل ده بولد الابداع الطبى والابداع الانقاذى
    فن فى الطب وفن فى الماهيه …………
    الطبيب شاطر فى فن الاخطاء الطبيه بدون خجل
    والحكومه شاطره فى فن الابداع فى علم الماهية واللخمة الشعبيه
    تانى مافى زول يخش طب يطبطب متل الاطباء الفصلوهم حليل اماتهم الزغردن ليهم واهو اليوم شالوهم وكشوهم وجلدوهم
    الحال يغنى عن السؤال الطبيب الضايع وسط زحام الحكومه المشغوله بحاجات اهم
    هم الدكاتره ديل ما بحسوا ولا ما شايفين الحكومه جاريه وتعبانه ناس مابتقدر وماعندها ذوق
    كسرة :
    هناك هجره الى ارض الواق واق لانه مرتبك يا ديك وتور 500 ج والحكومه شايفاها كتيرة عليكم وقالوا دايرين يدوكم 950 ج سودانى ياكافى البلا جنيه ينطح جنيه قالعينها قلع ليكم تقعدوا تعملوا حركات وتقولو هيا للاضراب
    اخى الدكتور اتكل على الله بلاد الله واسعه وكبيرة ابقوا اطباء اشعاب واعشاب الله يسهل ليكم
    الداير علاج يكسح للاردن ولا بلد فرعون ولا يموت هنا ميته حميده وسعيده وشاكر حكومته ومبسوط واهو الشريف مبسوط منى ورافع ضغطى ومسكتنى

  11. moshahidah كتب:

    سلام ..

    كلامكم نفسي اعلق عليه بس ..كتير علي ..الكسل الكسل ..
    المهم ..افلقا ..لا حول ولا قوة الا بالله ..ما عارفه اقول ليك شنو ..

    انا بقول كدا ما عشان اهيج علي الدكاترة لكن عشان شفت العكس و اظن في كتير منكم شاف العكس..

    لما كنت في السعودية ..الطبيب مرتبوا كبير جدا ..قاعد في مستشفي واحد ..و مركز معاك ..
    بتجي بشوف ملفك للمراجعة لكن هو اصلا حافظوا ..

    و زى ما انت يا افلقا شهدت ماساتين انا شهدت ما يشبه المعجزتين ..في السعودية

    حادث حركة كبير جدا..كسور مضاعفة في ارجل طفل في 2 ابتدائي ..
    كم الاخصائين الحولوا ..كم الاهتمام و الدقة ..الدكتور مرتاح البال ليه ما يركز .. الحمد لله هذا الطفل الان شاب يمشي و يلعب الكرة ان اراد ماشاء الله ..بعد ما كان في العناية المشددة و فكر في قطع قدمه

    و امراة لديها وريدين ولا شريانين لا اذكر في الدماغ في حاله تداخل ويكاد احدهما ان يفجر الاخر ..عملية ضخمة جدا ..و الحمد لله الان ذكريات ..

    كويس الاضربوا ..الله ينصرهم .عشان نطمن لصحتنا احنا كمان

  12. DAKEEN كتب:

    سلام للجميع ،،،،
    طبعا الاخطاء مسعولية الدكتور ،،،،
    هو ما كيشة وبليد ،،، ومؤمن برسالته ومستحمل عشانا ،،، وعنده ذمة ،،،، ضيع خمس سنوات من عمره في الكلية وسنتين في الامتياز وكم سنة في التخصص والالزامية عشان يجي الشغل المستشفى يلقى عيادته زي سوق السمك بعد ينظف الغبارمن مكتبه يلقي السماعة مقطوعة يمشي يجيب شريط كهرباء ولا لصقة جروح يصلحها يهبش ميزان الضغط يلقاه عنده ضغط والكرسي ناقص كراع قاعد فيه بحرفنه واللمبة الوحيدة في السقف تطفي وتولع دا اذا في كهربا واذا مافي تكون ريحته عشان يقدر يركز عاوز كباية شاي لمن ست الشاي تجي تقول ليه الحساب يا دكتور يقول ليها اول الشهر لمن يجي اول الشهر يسلم الي 450 ج لست الشاي وبتاع البوفيه ويستلف من بتاع البقالة حق المواصلات ،،،، وبعد كدة مستكترينها عليه ،،،
    لكن التفتيحة ناس الدول البترولية والغنية يلقوه جاهز ،،،، يقدر يشتغل بي ابسط الامكانيات ويبدع ،،، مكتب نضيف ،،، ممرضة تهتم بالعيادة واجهزة العيادة وملفات المرضى هو ما عليه الا المراجعة والتوقيع ،، راتب عشرات الاضعاف وسكن مؤثث وعوووك ونشرات دورية ومؤتمرات طبية وعووووك وزارة الصحة تفصل الاطباء المضربين ؟؟؟؟؟؟؟؟؟؟؟؟؟
    ده دي ما موزة مقشرة ،،،،، يلا يا دول البترول والدولار علينا جاي اطباء مؤهلين على حسابهم،،، اثنين بي الف والثالث هدية ،،،،
     سمعت والعهدة على الراوي / ان توقف الاطباء السوادانيين عن العمل في احدى الدول الاوربية انشلت وزارة صحة تلك الدولة ……….
    ياربي الدولة دي الجابرها شنو على الاعتماد على الطبيب السوداني ،،، ناس وزارتنا ديل ما حسبوها ولا حسبوها صاح ،،، توفير مرتبات المفصولين لصالح مين ؟؟؟؟؟
    المواطن ،،،، شوف ليك محاية ولا قرض ،،،،، ولّ تعال مستوصف او مستشفى ينهبون.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s