ِهملت يا الشعيرية

Posted: الجمعة,11 يونيو, 2010 by عزت in اخرى

يحكى أن أحدهم انتقل الى منطقة نائية بغرض العمل و كان من ضمن زوادته الى هناك أكياسا من الشعيرية التي يحبها كثيرا، فعند وصوله للمنطقة و بإعتبار وظيفته تم منحه منزلاً من قطيتين بدون حوش و سخروا لخدمته ثلاثة من المساجين ـ المضامين كما يطلقون عليهم ـ من سكان المنطقة .. و بعد معاينة سريعة إختار أحدهم أن يكون طباخه الخاص و قام بتسليمه عهدة الغذاءات و أوصاه بأن يكثر له من الشعيرية ..
الطباخ المسكين لم يكن قد رأى في حياته الشعيرية أو حتى سمع بها .. لكن إرضاءاً لمخدمه رأى أن يقوم بتجهيزها له كأول وجبة لتكون عربون علاقة طيبة بينهما .. و لأنه لا يعرف طريقة تجهيزها فقد قام كما يفعل كل الطباخين بتقشير البصل و تقطيعه و من ثم تحميره بالزيت ووضع قليل من الشرموط ثم ملايقته ببعض من الويكة ثم قام بوضع الشعيرية في تلك الحلة و تركها في النار حتى نضج ما بداخلها مع قليل من الإحتراق و مزيد من السبك و التلبك ..
فحينما عاد الضابط مرهقاً من عمله أتجه إلى حيث الحلة الرابضة في صمت .. فقابله طباخه بإبتسامة بلهاء .. فتح الضابط غطاء الحلة .. تراجع خطوتين أو أكثر إلى الوراء… قائلا (ِهملت يا الشعيرية)…

و لكن قد يكون ذلك الطباخ مبتكرا دون أن يدري (فالشيتن) دي أي الشعيرية يمكن أن تحضر بآلاف الطرق كان بي حلو و الا بي مر و لا تخلو أي بلدا ذهبت اليها من الشعيرية و تختلف طريقة تحضيرهم لها فالشاهد انها يمكن أن تكون مع الشوربة و ناس بيختوها مع الدجاج و ناس بيحضروها باللبن و القرفة و واحدين بيعملوها بالكريمة و ناس أسكت خليهم ساكت بيحمروها شوية كدا بالسمنة أو بالزيت و يقوموا يضيفوا ليها السكر و الموية و الهبهان و الزبيب و يخلو (مويتها تحسى و تقديمها لزوجك كان ساخنة كان باردة و تأكدي حيأكل صوابعينو معاها….) و هذه يمكن أن تكون الطريقة المعتمدة في (سوداننا) البلد ما المدونة و يفضلها المدونيين أوبسسسسوري الناس و اعتاد الناس رؤيتها في يوم العيد جنب السكسكانية و الفطير (البكركب) داك لمن تاكلوا و عادة ما يخلوه الناس في الآخر بعدما ينجضدوا اللحمة و الفول و الجبن و العصيدة و غيرها من الأصناف  الشئ الذي لا تضمن معه كثيرا أن الفاطرين في تلك المائدة أن يخلّصوا على الشعيرية….

و ذلك ما استفز أحدهم كان جاي طازة من البلد قائلا لأصدقائه لمن رجع البلد (بالله ناس الخرتوم الشعيرية بفضّلوها) أي لا يحسنوا صحونها عندما تمتلئ بطونهم من غيرها فتبقى في الصحن…) فشاركه صديقه الدهشة … يا خ معقول… بالله الشعيرية دي عندنا تكمل براها) اي انها لا تحتاج لكثير عناء… و من درجة عزّهم للشعيرية فانهم يعتبرونها المفضلة و الغالية و التي يبرون ضيوفهم بها و في ذلك الشان ُذكر بأن أحدهم في القرية كان يشتكي من ولده الشّغال في المدينة بأنه لا يرسل له مصاريفا بانتظام… و قروشوا الكثيرة القاعد يصرفا من شغلوا ما عارفوا بيوديها وين..؟

فبرر له صديقة الذي كان يجالسه… ياخ الخرتوم غالية و تلقاهو مع مصاريف الايجار و المواصلات و الأكل الغالي دا ما بيقدر يوفر..!!

فلم يبلع صاحبنا حكاية الأكل الغالي دا و جعل يعدد.. (افرض ياخ الولد دا بيفطر….) و جعل يفكر في شيتا غالي (شعيرية… و بيتغدى …) (شعيرية.. لمن ما لقى حاجة أغلى منها) و استمر ( و بيتعشى برضو شعيرية… بيودي باقي القروش دي وين)…

و جمعتكم مباركة

Advertisements
تعليقات
  1. ياسين شمباتى كتب:

    د.عزت…سلام وجمعتك احلى ومتقبلة باذن الله..

    طبعا المثل دا ورد لينا بطريقة تانية,حيث انو قالوا الحادثة دى حصلت فى تنوب بالجزيرة,,وذكل فى وجبة عشاء لضيف خرطومى,,فقال قولته المشهورة( غلطانة الشعيرية المشت تنوب)..
    كمان قالوا نفس القرية لما دخلها اول لورى طوب الشفع جارين وراهو ويكوركوا 😦 آآزول..ادنى قرمة) !! والقرمة لغير الناطقين بها هى القضمة او القطعة الصغيرة من الشئ..

  2. ابكرون كتب:

    عزت اهلنا العرب ديل بعملوهابالسكر مع البيض (الاوملت) تلقي طرقة بيض بي فوق واسمها غريب (بلاليط) واكيد جايبنها من شرق اسيا…ماعارف كلمتنا السودانية (بلاليطو وقعن) جايه من الشئ ده …!
    تعرف هنا بغملوها كنافة برضوبدلا عن الكنافة الجاهزة المعروفة البتشبه الشعيرية لكنها الذه

  3. aflaiga كتب:

    عزت : والله عزيت الشعيرية جنس عزه حيث افردت لها بوستا خاصا ولا تنسى انو الشعيرية من اهم حاجات الشيله وفى شيلات كتير رجعوها لانو الشعيرية قصرت .. وفى العقودات والمناسبات حين يكمل الاكل بيتمو الزوادات شعيرية ..

  4. مشاكل كتب:

    سلامز

    شعيرية في .. عرس في
    شعيرية ماف .. عرس ماف

  5. aflaiga كتب:

    مشاكل : يعنى انت اسى مشكلتك فى الشعرية عشان تعرس ؟؟ انا بعرف زول مشكلتو فى الشعرية عشان يطلق !!!

  6. الصادق ود البركة كتب:

    السلام عليكم ورحمة الله وبركاته
    التحية للجميع دون فرز والدوك عزت تحية شعيرية معمولةبالسمن البلدي
    شكراً على البوست الجميل جداً جداً جداً وجزاك الله خيراًبس في كثير من المصطلحات السودانية الصرفةالتي تحتاج لشرج للجيل الجديد (الحناكيش )الذين يدخلون المدونةولا رايك شنو يا حاج أحمد خاصة شايف شمباتي علق وفسر بعض الكلمات ودمتم

  7. عزت كتب:

    ود البركة و المتداخلين سلام

    حقو نخليهم يتعبوا زي ما نحن تعبانين معاهم في مصطلحاتهم الجديدة دي….
    و فعلا الشعيرية بتكمل ساكت عندنا يوم الجمعة….

    يعملوها في دقايق و ياكلوها في ثواني…… التحية لي ناس (نوبو) و للحق شعيريتهم تمام التمام…. و بعدين رمضان قرب حقو الناس تاخد وصفة الشعيرية باللبن ……. (ما تخلص)

    تحياتي

  8. حاج أحمد السلاوى كتب:

    – أخونا ودالبركة ..
    وزى ما قال ليك أبو عصمت خليهم يتعبوا شوية زى ما أتعبونا متل ما عذبونا زى خلف الله ..لا كين نحن بنقدر عليهم وعرفنا 99% من مصطلحاتهم الجديدة …والعاوز درس عصر يجينا بيجاى.
    – ابو عصمت .. بالرغم من إنو الشعيرية باللبن ( الحليب .. فى رواية أخرى ) بتاعة فطور يوم الجمعة جميلة ولذيذة جداً لاكين الواحد بيخاف من السمن بتاعة .. ونحنا هنا طبعن محرومين منها وما فى زول قاعد يسويها .. يا حليل الجمعة فى الخرتوم … والتحية لناس نوبو العندك والجايين يناسبونا كمان .

  9. طارق أب أحمد كتب:

    (( والتحية لناس نوبو العندك والجايين يناسبونا كمان .))
    ((عبر البحر))
    ما كان عامل رايح

  10. عزت كتب:

    بالله …………………..!!
    هو الموددددووووع كدا…. يا بختهم شعيرية ساكت

  11. طارق أب أحمد كتب:

    ((هو الموددددووووع كدا…. يا بختهم شعيرية ساكت))
    عزت
    خلاس بس كتتتم على كدا !!!!!!

  12. الزهراء كتب:

    الشعيريه يادوك ذكرتني حاجات كثيره
    وتستخدم كمصطلح في كثير من الاحيان
    فحارس المرمى الطوااالي مغلوب بيسموهو شعيريه ( حـــــــــــآشاك يا المعــــــــــــــز محجوب).
    أضافه للبنت الغزره الطويلة الشعر بيقولو الشعيريه الماخمج.

    لكن حقيقه هي وجبه ظريفه جدا وكانت توضع كصنف اضافي في الصينيه سوا كان عشاء او فطور لكن مؤخرا بعض اناس صاروا يستخدموها كصنف فريد في العشاء.
    فعندما أتى أحد أقاربنا من الشماليه لصديقه الذي يمكث في الخرطوم وكان الاول قد وصل في وقت متأخر من الليل-فقامت زوجة صديقه ودخلت المطبخ وسوت الشعيريه باللبن الماخمج
    ووضعوها بكل فخر امام ضيفهم العزيز
    ولما شافا رسم ابتسامه عريضه وقالي صحبو( هي لكن يا حاج نو الدايم الشعيريه دي ما بتحمينا العشا)

    وترك الرجل مجقلب في الحله من دكان لي دكان وشايل جك الفول

  13. عزت كتب:

    هاها هااااااا
    عشا تاني…!!

    هسة بالله في واحد قاعد يتعشى… الناس تجي بيوتا مع المغرب و (غدشا) و بس …
    و واحدين

    تتعشى و الا تنام خفيف…!!

  14. حاج أحمد السلاوى كتب:

    غايتو يا الزهرا عليك جنس حكايات .. وطرائف .. إنتى شايقية ولا رباطابية ؟
    مرة عن العوض ومرة عن الشعيرية ..حقو تشتركى مع ناس الهيلاهوب ..
    والله عندك مستقبل كويس فى مجال الفكاهة ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s