دعوة .. حفل توقيع لبس جماعى

Posted: الإثنين,14 يونيو, 2010 by الفاتح جبرا in اخرى

الأحباء الأعزاء :

التحايا والود :

يسرنى ويشرفنى أن أدعوكم لحضور حفل توقيع كتابى الأول (لبس جماعي) وذلك فى تمام الساعة الواحدة ظهراً من يوم الخميس الموافق 17 يونيو 2010 بقاعة الشارقة جامعة الخرطوم ،هذا وتصدح فى الحفل  نانسى عجاج  بمصاحبة الفرقة الماسية .. حضوركم مهم جداً !

Advertisements
تعليقات
  1. سهيل كتب:

    الف مبروك عمنا جبرا .. و في إنتظار الجديد

  2. طارق أب أحمد كتب:

    ألف مبرووووووك
    شبـــــــــــــــــــــــــــــــــــــــــــــــــــــاب و شابـــــــــــــــــــــــــــــــــــــــــــات
    سغـــــــــــــــــــــــــــــــــــــار و كبـــــــــــــــــــــــــــــــــــــــار

    تعالوا نتفق على لبس جماعى للمناسبه السعيده دى

  3. ودالزبير كتب:

    يأخي معقوله يعزومنا زي الضيوف…. شباب دايرين لمه الليله أو بكره لمزيد من التشاور حول مشاركتنا في هذا الحفل ومبدئياً كده بالله خلوناي أكون لجنه عليا للموضوع ده برئاسه د عزت وعضويه طارق وأفليقا وإسترايكر وسهيل وخالد مدني والغبشه والزهراء والتركي وشخصي الضعيف لبلوره مشاركه أهل القمردينه في هذا الموضوع الجلل

  4. التلب كتب:

    1000000 مبرووووك يا أستاذ
    لولا ظروف البعد الجغرافي الواحد كان ح يكون حضور من الصباح. انشاء الله نكون حضور في حفل توقيع الكتاب الثاني.
    ود الزبير و المجموعة عارفكم ما بتقصروا.

  5. affady كتب:

    الف مبروك مبدعنا جبرا ……. ويا ريت كنا نكون معاكم ….. العن ابو الغربة …… ودي من ضرايب الغربة

  6. حاج أحمد السلاوى كتب:

    اخونا وحبيبنا أبو ناجى ..
    كان بودنا أن نكون معكم حضورياً فى هذه المناسبة الكبيرة ..
    ألف مبروك وعقبال البقية الأخرى من المقالات ..

    – طارق اب احمد .. اقترح ان يكون الحضور بدون هدوم ..

  7. محنك كتب:

    الف مبروك ونحن غيابيا … نعتبر نفسنا حضوريا بوجداننا ومباركتنا لكم ونتمنى لكم التوفيق

  8. ودالزبير كتب:

    جمعني إتصال هاتفي قبل قليل مع أخونا جبرا.. بدأت معاتباً .. لكنه أخبرني بأن صحيفه حكايات قد تولت أمر التنسيق لحفل تدشين الكتاب وعليه نرجو من الجميع الحرص على الحضور المشرف وهسي مناسبه سانحه لنا نحن الذين إجتمعنا في حوش جبرا أن نرد له قليل من دينه في أعناقنا وهي سانحه للنزل فكره كنت قد ناقشتها مع أخونا د عزت المرطب في رحلتنا السابقه وهانذا أطرحها لكم في الهواء الطلق .. أقترح أن نقوم بتكريم هذا الرجل المبدع تكريماً يوضح له إننا نحبه بقدر ما أسعد هذا الشعب وأنتزع إعجابه وشرح مشاكله الإجتماعيه بقلم ساخر .. نكرمه وهو حي يرزق يسير بيننا .. فماهو رأيكم دام فضلكم … والكلام موجه لمدونيين الخرطوم

  9. حاج أحمد السلاوى كتب:

    أخونا شكسبير ..
    نحن معكم ونؤيدكم فى كل خطوة نحو تكريم حبيب الشعب أبو ناجى …ويسعدنا نحن مدونى الخارج أن نساهم معكم فى هذا التكريم ونحن رهن إشارتكم ..وما كان يجب عليك توجيه الكلام لمدونى الداخل فقط ودى نقطة نظام تحسب عليك …دى مشيناها بس تانى ما تعمل كدا ..
    ولكم جميعاً التحية ..

  10. ابكرون كتب:

    الف مبرووووك اخونا وحبيبنا جبرا وعقبال العرس الجماعي الكتاب التاني وامنياتي بمزيد من العطاء والابداع ..وحقوا لو ناس حوش العمدة عايزين يعملوا تكريم للبروف ان لا يكون مع مناسبة (حكايات)… وتكون منفصلة وفي توقيت آخر ولا شنو يا ناس الحوش ؟؟؟
    …..بالله ناس الشمشرة يوصفوا لينا بت عجاج بعد العرس بقت كيف …وسؤال للبروف (وش منتهي الخباثة) ليه يااااخ بت عجاج بالذات …يااااخ بالغته…. بالله قولوا ليها ابكرون قال ليك تدفنيهو كان ما غنيتي بلدن هولينا اول اغنية….سمح ؟؟؟؟

  11. ودالزبير كتب:

    شباب

    رأيكم شنو في كلام أبكرونا أهو برضو وجهه نظر … نعمل تكريم منفصل عشان ما نشوش على الحفل الأصلي.. ولا كيف … المهم نجي لكن ما تكون يدينا فاضيه … آرائكم بليز

    حاج السلاوي

    التخصيص لناس جوه وبالذات ناس الخرطوم لأنهم قريبين وممكن يساعدوا بالموجود … شايلنكم للتقيله يا حاج

  12. خالد مدني كتب:

    الف الف مبروك حبيبنا جبرا … وربنا يديم علينا الافراح .
    بالنسبة لتكريم ابونا جبرا فنقوم نخلي تكريمنا براهو لكن لازم نقدم حاجة مع ناس حكايات ديل واقترح شيرينق صغير لتورتة كبييييييرة من ما سيدي بيه … زي ديك يا ود الزبير … رايكم شنو ؟؟؟

  13. aflaiga كتب:

    البروف ابو الكل :
    مبروك الكتاب الاول وعقبال الكتاب الاخدر ذاتو ..
    حقيقى كلنا شوق ومنذ عرفناك لان يتم طباعة روائعك لتكون تاريخا للاجيال القادمه فما تكتبه حقيقة تاريخ حقيقى يوثق لهذه الفتره الهامه من تاريخ شعبنا .
    اؤيد بشجه التنسيق مع حكايات بشان مساهمتنا فى الحفل واوصى بتعيين ود الزبير منسقا بيننا وبينهم .
    اما حقنا الخاص بتكريم الاب جبرا فده عاوز ليهو قعاد براهو ولا شنو يا عزت ؟؟
    اكرر ابى جبرا مبروك الكتاب الاول وعقبال الكتاب الاخضر ذاتو ..

  14. التركــــى كتب:

    مبروك علينا كتابنا والعريس مابعزموهو على عرسه …. يلا شباب الهنا والهناك نحتفل بهذا اليوم السعيد حضورا وحسا وعقبال المواليد الأخر …. متعك الله بالصحة والعافية يابروف .. ود الزبير بيناتنا تلفون للتنسيق ان شاء الله

  15. aflaiga كتب:

    بالله يا نيام بمناسبة الكتاب ده ما عاوزه ليها نجره كاربه كده وايك المدخل :
    يا جبرا الكتاب مبروك
    وعقبال الكتب يبروك
    ويبراك العديل والزين
    يعينك الله ما تشوف شين
    كتابك من معاناتنا
    وحبرو دموعنا اهاتنا
    وذاتك نسخه من ذاتنا

  16. مًخير كتب:

    حبيب الملايين
    قشاش دموع المقهورين
    ضحاك المكروبين
    منفس هموم المضغوطين
    فاضح بلاوي المفسدين
    سمو الشيخ الدكتور الفاتح بن يوسف آل جبرا
    طبعن المشيخة لرهط الساخرين والدكتوراة الفخرية من جامعة قلوبنا. ونقول مبرووك لينا نحن أهل الراس طبعن ناس ناجي أهل الجلد والراس ونحن أهل الرأس وبس، وزي ما قلنا في حفل توقيع الكتاب الأول نحن أخوال وأعمام بنات وأولاد الأفكار التي أحتضناها في أذهاننا “نص المكنة” قبل أن تنزل في دفتي الكتاب، بهذا يعتورنا الإطمئنان ويعتمل في دواخلنا منتهى الزهو والرضاأن الأفكار المميزة لحبيبنا الأستاذ نالت ما تستحقه من إهتمام يليق بها وبكاتبها.

    كسرة جبرية:
    نؤيد بشدة تحديد موعد تكريم للرائع أبوناجي من قبل أهل الدانقا حصرياً تأكيداً لمكانته المميزة لدينا فهو حبل الوصل بيننا وجامعنا ومدرستنا ودارنا في أمازونيا على أن يراعى فيه مشاركة وحضور دانقوست الخارج .

  17. ألفاتح جبرا كتب:

    الأحباء الأعزاء :
    والله الواحد ما عارف يقول شنو تجاه مشاعركم الجياشة الفياضة دى .. أكبر هدية وأكبر تكريم ليا إنكم تكونو معاى فى المناسبة دى .. والناس البره طبعن وبلا شك قلوبهم ح تكون معانا .. شكرن ليكم كوووولكم .

  18. عباس ركس كتب:

    مبرووووووك حبيبنا ابو ناجي ومبروك لينا الكتاب الاول , واول الغيث قطرة .
    التوثيق يا ابو عصمت يسعدنا .

  19. aflaiga كتب:

    ما دام نيام طار جنا الوزين ما كان فر نوم العين :نقوم ننجر ليكم برانا :
    الكتاب فى اسمو ساخر
    و حتمى مليان بالمناظر

    اسمو قالو لبس جماعى
    وشكلو نقدا اجتماعى
    نقد كاتبو يراعو واعى
    نقد لى كل شين وناعى

    ناعى لموات البنادر
    البنادر المات وعيها
    وفيها كمين الف شاطر

    والكتاب الكاتبو جبرا
    كاتبو بى توثيق وخبره
    كاتبو للعارف وبيقرا
    كاتبو ما بعرف يغتى
    وفى الحقوق ما عندو ستره

    شان حقوق احمد ونادر
    شان يورى الغيو سادر
    انو حتما شمس بكره
    حتمى حتعم البيادر

  20. الزهراء كتب:

    ملايين التبريكات لابونا جبرا وعقبال تتحقق كل طموحاتك وامنياتك ان شاء الله
    ودا شرف كبير لينا ونحنا معاك قلبا وقالبا

    والتهاني لكل المدونين والمدونات وعقبال تدشين كتبكم انتو كمان

  21. عزت كتب:

    مش بالله العرس عرسنا و نحن كووووولنا أسيادو
    مبرووووك
    و عقبال العرس الجماعي زي ما قال ابكرون….. بس ما كتاب !!
    حاضرين باذن الله… توثيق و مضيفة كمان

    فعلا بتاعنا داير ليهو قعدة …!! تبدأ باذن الله عقب التوقيع…

    كسرة:
    الكتاب بي كم با جبرا…!!!؟

  22. ودالزبير كتب:

    أفليقا

    بعد إذنك طبعاً أخوك قاعد يشيل ابياتك دي ويحوم بيها في الأسافير ومرات بننسى نكتب حقوق المؤلف فاعف لينا

  23. aflaiga كتب:

    نواصل :
    حفل بكره جايه نانسى
    وابكر من اسى حاسى
    داير يسمع غنيه واحده
    غنية مليانه مااسى
    هيلو هيلنا بلد ونانسى
    وبكره يبكو الشافو نانسى
    وابكر من اسى حاسى
    اااه يا نانسى وقت تغنى
    ما غناكى اصيل وفكره
    ما غناكى شتل وبذره
    لى وطن صار قلبو قاسى

    والكتاب جواه عبره
    سامى ساخر بيحكى فكره
    بكره لو قمنا بضلالنا
    حيبقى اشنى واشنى ذكرى
    وبكره لو قمنا بنضالنا
    حيبقى احلى وسيره عطره

    جبرا اكتب شان عيالنا
    نحنا فات قطر احتمالنا
    وما بريح اصلو بالنا
    الاشفعنا البيقرو
    وانت ياخى كشفت حالنا
    حالنا حال شين بالمره حالنا

    جبرا اكتب عن سعينا
    وراء المكارم من وعينا
    وكيف بتغتال المحاكم
    اى حلما بادى فينا
    مره باسم الشريعه
    ومره من غير اى ذريعه

  24. مشاكل كتب:

    سلامز اس مليون

    ألف ألف ألف مبروك لينا و لينا يا حبيب الكل جبرا

    و إن شاء الله نكون معاك في الحفل .. بس المدير دا نعمل ليه شنو ؟؟؟

  25. aflaiga كتب:

    ود الزبير : زمان قلنا ليك حقنا حقك شنو يعنى ؟؟

  26. نيام كتب:

    الكاتب الساخر .. الطبيب المعالج ..الحكيم المداوي ..الفنان الرائع ، صاحب الخيال الواسع و العبقرية المتوقدة و القلم المبضع اهنئك و اهنئ نفسي بمعرفتك…احجز لي نسختي …سأكون أول القادمين إن شاء الله..لك احترامي..

  27. حاج أحمد السلاوى كتب:

    الإخوة صفوة الأخيار ..
    والله يا جماعة الخير.. رجعت قريت الدعوة مرة تانية لقيت فيها إنو الفنانة الصاعدة بت عجاج حتشرف الإحتفال وتصدح بالغناء بمصاحبة الفرقة الماسية ..قعدت اسأل روحى بينى وبين نفسى .. دا إحتفال توقيع الكتاب ولا صُبحية ؟
    ولا شنو .. يا ابو عصمت ؟

  28. ياسين شمباتى كتب:

    البروف الحبيب جبرا..
    مبارك تدشين الكتاب الاول وربنا يجعله مقدمة للمزيد من الافراح والنجاحات ولمة الحبان..

    ناس جوة مبروك عليكم الحضرة وربنا يحضرنا عرس سهيل!!!!

    ابوى السلاوى..
    جنس حركات عليك انت !!!

  29. ودالزبير كتب:

    حاج السلاوي
    إحتفال توقيع الكتاب ولا صُبحية ؟
    ولا شنو .. يا ابو عصمت ؟

    غايتو ده حقد منك سااااكت نحن من الليله ماشين الحلاق للساونا ولو في طريقه تلحقنا بريحه ماربرت مان تكون ماقصرت يعني تطلع المطار تشوف ليك أي سوداني نازل تديهو الريحه وتقول ليهو ده دواء بتاع قلب لزول عايزه بالليل ده وأنا بقابله في المطار أها كده بنكون إتزبطنا للحفله ….غايتو ناس بره فايتاكم جنس حاجات ليكم الله وعيشه السوق

  30. ابكرون كتب:

    افليقا :
    إهي إهي إهي
    استغفر الله

  31. aflaiga كتب:

    ابكرون : استغفر الله كلنا نحب فنها وكلنا لها …
    البت دى جايه من عالم يتغلغل فيه الرائعون فى نغاشيش احاسيس البكايين غايتو بكره الله يصبرنا ..

  32. aflaiga كتب:

    ود الزبير : نانسى تخاطب العقول والقلوب ولا علاقة لها باللبس لو لابس لى جبرا معليش وكل لما هاجر له ومن كانت هجرته فى نانسى فهجرته لما هاجر اليه انا غايتو جاى احضر كتاب نانسى الحيغنى فيهو جبرا والفرقه الماسيه بتاعة ابكرون !!!

  33. حاج أحمد السلاوى كتب:

    ولدنا الدينمو .. من حسه بدينا نلخبط فى الكلام .. وقبال الصبحية .. تبداأ ؟
    غايتو .. لاكين .. جنس كبكبة !! العواطفات ماشين الإحتفال ؟ وى شغل عزابة ساااااااااااااااااااكت ؟

  34. حاج أحمد السلاوى كتب:

    ولا شغل عزابة ساكت ؟

  35. ابكرون كتب:

    افليقا دور علي صاحبك ابكر في لقطة التلفزيون الداخلي الدوحة 2008 غايتو جني مرض (بس انفلونزا دموع)
    ———————————–

  36. حاج أحمد السلاوى كتب:

    أبكروووووونا ..
    شايف البنية دى كاسرة فيك ضلعة ..
    أعمل حسابك يا رجل تظهر ليك فى التليفزيون وتنسى نفسكويطلع منك تعليق كدا ولاّكدا.. وتكون عواطفك جنبك ..ويحصل ما لا يحمد عقباه ..
    لاكين بينى وبينك ..مافيها خشخشة.. كل حاجة مية المية ..ولا شنو .. يا سهيل ؟ أخ نسيت سهيل خلاس دخل النادى وما بيقدر يدلى باية أقوال حتى إشعار آخر..

  37. aflaiga كتب:

    ابكرون : انت جادى يعنى عاوزنى وانا بحضر فى ناسنى اقوم افتش ابكرون وين ؟؟ ابكرون شنو البفتشو وانا بسمع نانسى ما يقعد محل يقعد انشاء الله يمسك الاورغ ويعزف ذاتو !!!
    بالله عليك ملاحظ كمية العواطف المنسابه من النوبيين قدر كيف ؟؟؟ امسك اى نوبى تلقاهو يا مبدع يا بكاى ابداع ..لله دركم من قوم ..معليش يا جماعه دى ما عنصرية بس تعبير شفاف عن الحالخ الابداعية النوبيه ..

  38. ابكرون كتب:

    سلولو : ياخ حرام عليك ونحن فضل فينا ضلعه عشااان تتكسر ما زمان كسرناهم (كستليته) بالبيض…بعدين بنية شنو ياخ دي قدر بناتي حراااام عليك (وش منتهي الرمحي)…غايتو جنس فقاره عليك

  39. نيام كتب:

    افليقا:
    ” امسك اى نوبى تلقاهو يا مبدع يا بكاى ابداع ..لله دركم من قوم ..معليش يا جماعه دى ما عنصرية بس تعبير شفاف عن الحالة الابداعية النوبيه ..” او تلقاهو مبدع و بكاي معا زي افليقا…
    ابكرون:
    “بعدين بنية شنو ياخ دي قدر بناتي حراااام عليك” …ومالو الغرب مالو..(السادات)

  40. aflaiga كتب:

    نيام : اول شيء وين النجره المحترمه بتاعة الكتاب ؟؟؟ ما تاكلنا حنك ساى سايب افليقا يبرى فى الناس نجر غير مؤسس !!
    قلت لى ولا يكون 2 فى 1 زى افليقا ؟؟!!! افليقا 6 فى 1 مش 2 فى واحد زى خلاطة توشيبا ال 6 فى 1 .
    يا جبرا بشكيلك نيام
    نقص اللى قادر عالتمام
    طالبينو بيتين من كلام
    شان يفتتح لينا الكتاب
    طنش عمل نايم عديييييييييييل ..

  41. عبدوش كتب:

    سلام ياناس سودان الخير سلام…
    مبروك جبرا مبروك للجميع وننانسي حلال عليكم.!!
    نجيكم بعد شوية…

  42. حاج أحمد السلاوى كتب:

    حفيدنا عبدوووووووووووووووووووووووش …
    حمدللاك بالسلامة .. طولت الغيبة ..
    جايينا بعد شوية … جايى المدونة .. ولا جايى حفل التوقيع ؟

  43. الغبشة كتب:

    مبروووووووووووووووووووووووووووك

    من امس اعزى خالد مدنى نهرنى وقالى ازمى المكتب

    يا كواشف يا شباب ياعواطفنا يا اى زول حنسوه لى

    ماتنسونا من التوثيق

    ومع راى ابكرون وودالزبير فى الراى

    والى لقاااااااااااااااااااءءءءءءءءءءءءء

  44. aflaiga كتب:

    نيام : يا نباش .. البت دى مش نوبيه ولا انا غلتان يا ابكرون ؟؟

  45. ألفاتح جبرا كتب:

    الأحباب الأعزاء … شكرن ليكم كوووولكم على هذا الشعور الجميل ودى ياها المحريه فيكم … يلا بكرة الخميس عاوز اشوفكم كووولكم بى غادى … سلاااام

  46. DAKEEN كتب:

    مبروووووووووووووووك علينا اللبس ،، عقبال وجبات ،،، وسكن ،،، وصحة ،،، وتعليم ،،، وتطعيم ضد انفلونزا الاضنين.

  47. ودالزبير كتب:

    أها

    إستحميتو ولا لسه …. عندنا تعبير سوقي كدهلمن نقول الموضوع ده مستحمي يعني موضوع مخستك وماسوره …. شفتو تفسير الماء بعد الجهد بالماء ده كيف

    أرح الساعه واحده قربت

  48. aflaiga كتب:

    ود الزبير : انت مستعجل مالك مستحمى من الصباح ؟؟؟ انا حاستحم فى القاعه واخش لانو الخرطوم دى اقل حاجه بتتوسخ وعاوزين نمشو نضيفون .
    سهيل : شارقه نفر والسفر .
    بشاوى : انا عارفك ما بتحب اى نانسى لكن لازم تجى .
    طارق : ابكرون قال ليك ما تنسى الكاميرا وركز ليهو على الكتاب تحديدا .
    عزت : بالله خلى طارق يصور لى ابكرون وانت وثق للجميع .
    ود الخلا وزول : احضرو الفاصل الاول وخلو لينا التانى – مع انو خايفكم تحضرو التانى وتخلو لينا الاول .

  49. ودالخلا كتب:

    سلام ياقبيلة
    مبرووك وتهانينا للبروف،
    كان الود مشاركتكم ولكن ما باليد حيلة!!
    أعذرونا والجايات اكتر من الرايحات

  50. الغبشة كتب:

    مافى زول رجع يحكى لينا
    اها خالد مدنى حضر
    معزووووووووووووووووووووووووره

  51. ابكرون كتب:

    يا حليلك يا غبوش الفصاحة الزماااان ديك والترمس المسيييييخ داك كلو ود مدني طيروا ليك في راسك ؟ والله لكن (سعب ) اريتك مدير ناس تانين ضاربين تسيب سااااااكت…..لكن برضو حرام عليك بتنا دي ما تعصر عليها قدر ده ….الله …..!
    يا ناس الحفلة ما قلتوا ليها ابكر عايز يسمع …الحمااااام يتشابى ؟

  52. أخي الفاتح وصلتني الدعوة ولظروف العمل والاعمال لم اتمكن من الحضور
    الف مبروك علي هذا الابداع والابداع وانت بطبيعتك مبدع وذو ملكة نادرة في هذا الكون يادفعة والف مبروك علي هذة الخطوة الناجحة واتمني لك التوفيق والنجاح المثمر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s