لاتنجع…..يا الشايل شمسك في جواك…!

Posted: الأربعاء,23 يونيو, 2010 by ابكرون in إجتماعية

سلااااام للجميع بالوطن…والبعاد الذين يجترون انين الغربة وآلامها….
نداء للأعزاء بشار ، سنكل، سلاوي، شمباتي، مخير، صالح،عباس، ودالفتيحاب، ود الباشا،محنك،النزير،حامد، الجميع في اوريا والخليج والامريكتين واستراليا وآسيا من فاتني ذكرهم بعتذر …..اقول ليهم جميعا ولنفسي كفاااايه لا تنجعوا…..حنين النيل والارض والجروووف ينادي (ارجع ارجع يا زول ارجع غير ارضك عاد ما بتلقى بطاح‎)
، فهل من مجيب؟ اهدي مفردات شقوري وأداء الرائع محمد النصري……والعايز يبكي مسموووووح برضو لا تمنعوا الدموووع فهو بكي غير….تحياتي

===================

لاتنجع‎
كلمات الشاعر‎ ‎خالد شقوري غناء محمد النصري

يا الشايل شمسك في جواك خليها‎ ‎تبين للناس تطلع‎
يا النازع فرحة والدة هناك غير حس آهاتك ما‎ ‎بتسمع‎
‎******
يا الناسي اللبقة المفتوحة دي بلاك طوريتك ما بتقرع‎
المنجل‎ ‎في راس التمرة ناسيهو وامك ما بتطلع‎
الكتقة وقعت والحملان في اللوبي بقت تجري‏‎ ‎وترتع‎
والزير الفي بيت الضيفان حرمان لا نزّ ولا نقع‎
‎******
يا السبت‎ ‎عقابك وروحت وحيات عز بلدك لا تنجع‎
الشتلة تقولك لاتنجع الواطة تقولك لا‎ ‎تنجع‎
الحوض الما رفعت سرابو ينادي يقولك لا تنجع‎
الحبل الما تميت وسيرو يهاتي‎ ‎يقولك لا تنجع‎
والنيل الفي واطاتنا ترع بيقولك ازرع ولا تنجع‎
‎******
ماك‎ ‎فاكر يوم داير ترحل وابوك الحاج شايلو عصا‎
لا حيلو وقف طقش الابريق اندفق سال‎ ‎فوق المصلاة‎
قام بارى الحيطة واتوكل ويقوم فد مرة ومية يقع‎
ويقولك يا المبروك‎ ‎ارجع‎
‎******
ارجع ارجع يا زول ارجع غير ارضك عاد ما بتلقى بطاح‎
شن داير‎ ‎في بلدا والناس ما فيهن حاس وما فيها صباح‎
الليل الويل مليان اتراح الويل الليل‎ ‎مليان اتراح‎
بياع بيقول افراح افراح زي البيقول تفاح تفاح‎
‎******
مجلوبة‎ ‎الفرحة ومفروشة من ضحك الناس دايرين ارباح‎
لو كان في ايدن ملك الكون كان لمّو‎ ‎عبير الزهر الفاح‎
كان علمو نفس الزول العاش في سدر الليل داير يرتاح‎
كان‎ ‎حجزوا الغيم في واطاتو وكان آمسكين باعو الارواح‎
‎******
وين تلقى الفرحة‎ ‎وتتهنى في دارا ضيقي ومافي براح‎
جم ناسا من عين العطشان تخطف ومضات البرق‎ ‎اللاح‎
‎******
سايب اهلك ونخلك راحل قول وين ماشي وين آ صاح‎
الشمس النايري‎ ‎ابت تطلع النيل يا زول اصبح رحراح‎
الضل قصر ما غتى رويس ولدا ساكب عرق‎ ‎الكتاح‎
الواطة ابت تديك الخير ولا انت عليك ما هابي رياح‎
‎******
قولي وين‎ ‎ماشي ووين غاشي ولي شن سايب بلد ‏الصلاح‎
النسمة ان جاتك بتجيك ملياني عبير عند‎ ‎الفياح‎
الموية ان داير تلقاها نقاعا واطيب من الراح‎
ان درت نغيم الموج تلقى‎ ‎وان درت كمان الطير صداح‎
‎******
ارجع ارجع يا زول ارجع‎
الضحكة هناك من‎ ‎جوة الجوف الفرحة هناك ما فيها ‏الخوف‎
الشقى ارحم في ضل النيم وبعيد من ناسا‎ ‎واقفة صفوف‎
جم ناس حبان تلقى المكسور مشيول في كتاف واحد ‏مكفوف‎
الجن الاحمر‎ ‎فاقد الحيل في خلوة حاج الخير مكتوف‎
دكان الشيخ فوق الواطة كيمان كيمان ما فيهو‎ ‎رفوف

Advertisements
تعليقات
  1. ودالزبير كتب:

    حبابكم يا أبكرون وبلادك حلوه أرجع ليها نار الغربه ما بترحم … وكفايه الحصل للسودانيين في لبنان.. تحياتي يا جميل

  2. aflaiga كتب:

    ابكرون : والله انا شخصيا ضد العوده الطوعية اما الاجبارية فما عندى مشكله معاها . يعنى لو مرتاح وكريم ومرطب بره مالك ومال الشقا عليك الله ؟؟؟ واوع زول مغترب متفلسف يقول لى القصه دى ما بتحس بيها الا لمن تمرق لانو حاقول ليهو تقايض وندفع لك فرق ؟؟؟

  3. ودالخلا كتب:

    سلام للقبيلة،،
    سديقي أسد الخلا الورور، أجدت وأبدعت وأروع ما في القصيدة ووصفها البديع في وصف حالة فراق الأحبة وخصوصا” فراق الوالد لولده وكيف تكون الحالة العصيبة التي لن يحسها أو يفهمها الا من كابدها ولا ييحس الشوق الا من كابده،،
    أكثر الذي أعجبني الأبيات التي تصف حالة الوالد عندما علم بنية ولده في الرحيل وفي هذا الوصف البديع :
    ماك‎ ‎فاكر يوم داير ترحل وابوك الحاج شايلو عصا‎
    لا حيلو وقف طقش الابريق اندفق سال‎ ‎فوق المصلاة‎
    قام بارى الحيطة واتوكل ويقوم فد مرة ومية يقع‎
    ويقولك يا المبروك‎ ‎ارجع‎،،

  4. نيام كتب:

    ابكرون:
    صدقت وصدق الشاعر يا ابكرون…وبعدين ما عادش فيها و لا عمرا و لا منفعة…ياخ تعالو ان شاء الله بموية وسط اهلكم وسط ناسكم في بيت البكاء في بيت العرس ….العمر كلو غربة ما معقول ما ممكن .. يعني ما نعيش حياتنا…علي كل حال اي زول عمل الحاجات الاساسية يرجع طوالي و ما يعذب كبرو ساكت …كفاية الدغت و السكر و الرطوبة ووجع الضهر….وحليل حليل زمن الجهل يا زمن هل من عودة هل….

  5. مًخير كتب:

    الرهيف الحريف أبكرون
    ود الزبير وأفليقا
    ود الخلا وشاعرنا نيام
    كميات من الأشواق والمحبة والاحترام
    أهل الدار والزوال سلام
    طوالي محركين لينا جرسلين ودايرين تجهجهونا على جهجهتنا، وعزة رب الوطن وخالق الأهل لو بالعاطفة ما نمرق شبر، نقعد نجكك من غير عطلة ونتكوم مع الشعب الفضل والزارعها الله في الحجر بتقوم، لكن برة وووب وجوة ووبين، لذلك قلنا ندّفى نار برة برة ووقتماتيسر نرجع جوة نبلل شوقنا ونصل رحمنا ونبر أهلنا ونشحن بطاطيرنا ونتأكد إنو لا مناص من برة ونرجع للمهاجر… الخُلاصة العمر جاري والعرجة مصيرها لمراحها وموافق على شرط شاعرنا نيام ((نعمل الحاجات الاساسية ونرجع طوالي)) بس دعواتكم كان تتعمل، والأساسي عندنا بسيط ما كتير، جُُحر لائق وملك فيما سوف يتبقى من الميلون ميل مُربع نتلم فيهو مع العيال قبل ما ندخل ود الأحد… ودي باقي لي ما كثيرة على ربنا …..
    أبكرون يا هباش: إنتو يا ناس الشمالية تقطروا رقة وحنية … وطنابيركم ونيلكم ونخيلكم زايد طينكم بلة.. الحمد لله أهلنا بعدما دفنوا صرتنا معاكم في الداخلة بعطبرة إتخارجوا وغربوا فمنحنا أهل كردفان حبة صبر وحبة شوق بس ما قدر حقكم، ده المصبرنا على مرارة الغربة الأمر منها (كما قال أخونا سنكل فيما مضى) ،،، وبرضو وقت السحاب يتشايل ويعلن بدء الرشاش … بتطير أرواحنا مع السمبر والكلجو إلى ربوع كردفان … ونستدعي من الذاكرة طعم خيرات الدرت من عفوص وعنكوليب وأبونقوي وسبل مشوي ووووووو…

  6. خالد مدني كتب:

    العزيز ابكرون … سلام وحب شديد
    طبعا زي ما عارفين انا قبل سنة ونص تقريبا كنت في محطة ابكرون دي لذلك ابشركم ونفسي بقرب عودته للوطن … طبعا في كلام كتييييير ممكن اقولو وتجارب وافراح واتراح مرافقة لقرار العودة لكن دي كلها تجارب شخصية ما اظنها بتنطبق علي جميع الحالات … هو سؤال واحد يا ابكرون تقعد مع نفسك وتجاوب عليهو من واقع معرفتك بما لا يمكن ان يعرفه غيرك …السؤال هو : البحميك ترجع شنو ؟؟؟

  7. ودالزبير كتب:

    مخير ثرو نيام

    المشلكه في تحديد الحاجات الأساسيه يعني مثلاً ممكن تقول لي إمتلاك بيت وعربيه ومصدر دخل ثابت دي هي الحاجات الأساسيه أها والناس المعتمده عليك في كل حاجه لو جيت قعدت هنا بتقدر علي طلباتهم

  8. خالد مدني كتب:

    البوست ده بدايتو دي بتشبه لي بوستات زمان .

  9. ابكرون كتب:

    ود الزبير /افليقا /ودالخلا / نيام / مخير
    تحياتي وشكرا علي المرور الباهي بيكم….
    ود الزبير فعلا بلادنا حلوه والرجوع ليها امنية وواجب كمان ، العمر ماشي والعيال الحمد لله …الطلوع كان غصبا عنا لكنه برضو الحمد لله …واهلنا ديل مازي اللبنانيين ناس راقيه وحقانيه ومحترمننا وخاتننا في العيون…لكن رغم ذلك الغربه مره
    افليفا : دايما الانسان كاره لما هو فيه ، ورغم كل شئ صدقني الغربة لا تطاق ما عارف القاعدين في ليبيا 25 سنه وما بجوا بستحملوا كيف رغم بكاء الوالدين والاهل في البرامج التلفزيونية
    ود الخلا: ياخ والله هبشته الجرح الغويير الحته بتاعة الوالد دي اسرع مقطع لزرف الدموع وبالغ فيها الشاعر الخطير…الواحد بتفادي سماعها والفنان ابدع فيها وبرضو البيتين بتاعة الوالدة :
    يا الناسي اللبقة المفتوحة دي بلاك طوريتك ما بتقرع‎
    المنجل‎ ‎في راس التمرة ناسيهو وامك ما بتطلع‎
    الكتقة وقعت والحملان في اللوبي بقت تجري‏‎ ‎وترتع‎
    والزير الفي بيت الضيفان حرمان لا نزّ ولا نقع‎
    نيام : والله انتو يا الشوايقة بكايين جنس بكي …اسه في داعي الزول ده يجهجهنا كلنا كده ….والله عندك حق الرجوع بعد ده لازم ….غايتو انا اقتنعت ومسالة وقت ان شاء الله….بس البقنع اخوك الكاشف الفي ابوظبي ده شنو وصاحب البطل …
    مخير : يا حبيب صرتك العند النخيلة دي هي اساس رقتك ووترك الحساس ….سرع تم الما اتعمل والما اتعمل علي الله …والله شنو؟ ده الكلام :
    وبرضو وقت السحاب يتشايل ويعلن بدء الرشاش … بتطير أرواحنا مع السمبر والكلجو إلى ربوع كردفان … ونستدعي من الذاكرة طعم خيرات الدرت من عفوص وعنكوليب وأبونقوي وسبل مشوي ووووووو…

  10. ابكرون كتب:

    خالد مدني بجيك للاجابة علي سؤالك

  11. ودالزبير كتب:

    عفواً

    المشكله وليس المشلكه وهو ملا يخفي على فطنه القارئ

  12. ودالزبير كتب:

    أبكرون

    عارف نحن برضو هنا مرات قعد نحس بالغربه ونحن جوه البلد يعني العبد لله سافر يوم الأحد لربوعنا في الشماليه لتقديم وأجب عزاء وصلت القريه الساعه إتناشر بالليل بعد ما تحركت من الخرطوم الساعه أربعه عصراً تتخيل كل الناس صاحيه ومنتظر القادمين من الخرطوم لواجب العزاء مكثنا باقي الليل وتحركنا في الثانيه ظهراً طوال هذه الساعات كنت أحس بقيمه أن يكون لك أهل وعزوه وقبيله الشعور بقيمه التراب والأرض والأهل هو شعور لا يوصف حقيقه

  13. مًخير كتب:

    أبو الخُلد: بالله تمت السنة ونص كمان، بتذكر كما الأمس كلامك عبر الهاتف، وكلامي ليك خلي خط الرجعة فاتح وووو سبحان الله الوقت بيجري زي الكضب، معنى كدة فعلن الرجعة وجبت، ماهو إنت رجعت ولا إنكسرت القزازة ولا إندفق السمن،،،

    ود الزبير: تعرف البيخوف كلام الغربة الداخلية البتتكلم عنو ده …

    أفليقا: كلامك بيشبه كلام ناس عُزاز بالحيل … نرجع ليهم شايلين شوق الدنيا كوووولو … ولسة ما تميت يومين يشبكوك الجابك شنو ؟؟ أهة قايم متين ؟؟ حجزت ؟؟ شوف لينا طريقة مخارجة معاك ؟؟ دي بلد يجوووها ووووو!!!!

    أبكرون: شادين الحيل والباقي على الله وحنعمل بنصيحتك للتسريع بإتمام الما اتعمل، لكن باقي لي جكتنا حتطول حبتين في ظل المُعطيات الراهنة …

  14. ودالخلا كتب:

    سلام للأحبة،،
    أبكرون ومخير وبقية العقد النضيد..
    صدقني يا حلو العيون وخلي الكائن يكون، لمن وصلت للابيات المذكورة ديك عينيّ (رقرقن)، وقربت أستدعي ترباس ، ويااااااخ خلوها لله وتعالوا البلد بلاكم ما بتقي وغيركم ما بتكون، وأصل الحكاية لقمة محل ما تبقي بناكلها وأن شاء الله تكون من حلاله وفضله العظيم وبعدها يتكل الواحد علي الواحد الأحد….
    تحياتي ليكم جميعن،،،
    وأين أخونا شيخ البكمونات بتاع حارة البكايين وابنه الأبكي منو داك…

  15. ابكرون كتب:

    خالداخوي : الاجابة مباشرة ولا شي ولا حتي التردد واللجلجه في اتخاذ القرار…زي ما اتخذت قرار سابق في يوم وليله بترك مغلق وبقالة ببورسودان والهج والنجوع بره ….وخسرت الكثير …بنفس القدر لا شي يمنع والارزاق بيد الله …..وزيك يا خالد اكابس ….ولا اتوقف حتي لو فرش ليمون في السوق المركزي…..!
    ود الخلا البكمون الصغير ده (الليلي) يحلكم منو الله اما الكبير بكاهو كتر معاهو الحاجه ومستانس

  16. ودالخلا كتب:

    وأنا من قبيل أسأل في نفسي واقول الحاج ده زمان مصنقر بي جاي النهار كلو ، الحصل عليهو شنو أتاريهو (الرقم محظور)…

  17. aflaiga كتب:

    الحبياب الحلوين سلامات :
    دعونا نناقش بعقلانية ووضوح دون عواطف لانو العواطف لو اساسية ما كان فى زول خلى البلد اساسا ولا شنو ؟؟؟
    لانو البلد دى يالها البلد ذاتا السبتوها سنة كم ما عارف ونفسها هى العاوزين تجوها سنة كم عارف !!
    يلا خلونا نناقش اسباب العوده ؟؟
    واسباب المرقه ؟؟
    وموانع العوده ؟؟؟
    ومغريات البقاء هناك ؟؟
    ونبدا بى وحده وحده وليكن عنوان سؤالنا الاول ( سبتوها ليه ؟؟؟ )
    وليكن عنوان سؤالنا التانى ( الما عاجبكم فى محل قاعدين شنو ؟؟؟ )
    وليكن عنوان سؤالنا الثالث ( انتو عاوزين شنو بالضبط ؟؟ )
    وليكن عنوان سؤالنا الرابع ( الدايرينو موجود فى البلد دى ولا لا ؟؟؟ )
    وليكن عنوان سرالنا الخامس ( الدايرينو متوفر فى بلدنا دى دون منغصات وهل تستطيع تحمل المنغصات ؟؟؟ )
    وبعد داك ممكن نتكلم عن ( البلد دى وضعها كيف ويتنفع معاكم ولا لا ؟؟ )
    وبعد داك ممكن نعرف هل الجيه مناسبة معاكم ولا لا ؟؟؟
    وبالتاكيد العوده لاوطان لا يوجد احلى منها لكنها مثل العوده نهاية اليوم لعيالك بالسلامه وتحمل خفى حنين وما اظن فى شفع بياكلو يوماتى فى خاطرم حنان ابوهم عشان نكون واضحين اى تسليكة عاوزه تزييت مادى ومعنوى والا البساتم بتاكل القميص والقميص ما ناقص اكل والسلندر اتخربش خلااااااس ..
    وما تسمعو كلام خالد مدنى ده زول مضلل وعلى قول المثل الراجعه من بره كان تابت يتشتغل مروجه للعوده الطوعيه هههههههههه .

  18. ابكرون كتب:

    افليقا سلااام
    ياااخ المغتربين ديل ما المان ديل سودانييين والبلد بلدهم مرت بيهم ظروف طلعوا منها وما شرط ان يكون طلوعهم عشان وضع احسن (لكل وضعه وتختلف الاسباب) وحتي الاغتراب خشم بيوت وفي ناس بتحل الامتحان سريع وتطلع وبتنجح وفي ناس بطيئة في الحل وبتسقط او تنجح وهكذا (دواليب) …. واسه بعد ماانتهي الامتحان او لم ينتهي عايزين يرجعوا ليها لانها بلدهم ولان لمعظمهم او نسبة كبيره انتفت اسباب اغترابهم.
    ما ممكن تطلع العواطف من الموضوع لان الموضوع كلوا ملئ بالعواطف….وعنده علاقة برضو بالعمر والقدرة الخ والاهل والاسرة، شبكه مترابطه…..بعدين خالد مدني او اي مغترب رجع وواصل اكيد حل مسائل كتيره باغترابه وعجل بهاومواصل اموره الحياتيه كبقية خلق الله من ال 40 مليون سوداني…تسلم يا شفيف وما تقرف متأخر وما تغترب بعد كده معليش اولاد صغيره (حلوه صغيره) متخرجين يا دوب وببنوا في عشهم قشه قشه (يعني شمباتي ده متأخر ) ، لكن لابد من العوده للعش كالطيور المهاجرة التي لا تنسي مواقع اعشاشها….

  19. عزت كتب:

    أبكرون سلام

    و ما رأيك في الذي يود أن يشيخ في بلدا تاني…. بعد أن أكمل تأهيل وليداتو و سلحهم بالعلم و يريد أن يهنأ بالعيش في مكان ليس به مجابدات و لا حر شديد و يتمتع بالعناية الصحية المعقولة و توفر أمكنة الرياضة كالمشي مثلا في حتة لا يضمن أن يقع في منهول فاتح و الا يدقشوا حجر دغش مفندر في الطريق يعمل ليهو مضاعفات………

    قول مثلا اسكندرية و الا كولا لامبور و الأخيرة دي طبعا بعيدة و سمحة بلحيل و يستطيع عيالك أن يقرو فيها الى أي مرحلة يريدون…..و بعد ذلك فليتفرقوا زي ما دايرين يشقوا طريقهم بسلاح العلم الفتاك الذي يضمن لهم عملا في أمكنة كثيرة حتى بلدهم أن ودوا… و يجوك و الا تمشي ليهم في الاجازات…!!

    يا ربي بيقدر….؟؟

  20. ودالزبير كتب:

    ياربي بيقدر….؟؟

    بتقدر يا عزت وخليك مع أم تي إن شبكه المحمول الأولى في أفريقيا

  21. aflaiga كتب:

    ابكرون : اجمل مافى بلدى السودان انه يتقبل اى شخص باى شكل واى وضع ..
    يعنى الغرباء بيجو ياخدو يومين تلاته بعديها بيسكسكو ويندمجو فى المجتمع ميه ميه فما بالك باهل البلد — ده شيء معلوم وحتى الطير يجيها جيعان ..
    انا اتحدث عن العيش الكريم وانت تعلم الفرق بين العيش والعيش الكريم ..
    المغترب لو امن بيتو ومصدر دخلو ونقاطتو وقرا شفعو لحدى مراحل كويسه بره وجاب معاهو خميره ما بطاله ما بيكون عندو مشكله لانو حيعيش مع ال20 % الكويسين فى البلد .. اما لو شال هاشمية شنطتو وجا مقلع من هناك واترمى فى نص ال80 % الباقين فيا ويلو وسواد ليلو ..
    الغربه يا ابكرون لا تطاق وانا اجبن الناس منها لانى لم اغادر البلاد الا للتدريب او لكورس او الترفيه ايم زمان وانا طقل مع ابى رحمه الله ..
    اما الغربه فمرقة الواحد فى مامورية بره الخرطوم بتفرق معاهو ونحنا زى ما قلنا ليك عندنا حق هنا ما بنفارقو وعاوزين نحضر الحلقه الاخيره من مسلسل ليالى الحلمية بتاعنا ده وشكلها قربت لانو خلاس البطل عرف الخيانه !!!!
    عزيزى تعال ومعك اخرون لكننا نربا بكم ان تعيشو غير كريمين فى البلد دى ..
    وعاوزينكم تجو كويسين لانو اى زول رجع ومرق تانى بيضل ليهو اكبر عدد من الناس …..

  22. ياسين شمباتى كتب:

    وروروووووووووووووك..ياسين ود عثمان شمباتى ودر تب..
    والله يا ابكرون السويتها رقدت!! انحنا نباصر فيها جاى جاى انت تجى ترميها كب..مقدمة القصيدة دى رسلتها لى اختى وانا صبحان مسافر على الجوال,,والله قربت اخلى السفر,,والدموع الا شطفوها ناس المطافى من قدام البيت!! باقى اخوك حنيييين وبكاااااااااى..

    (يا النازع فرحة والدة هناك غير حس آهاتك ما‎ ‎بتسمع‎)..بس الحمدلله الوالدة كانت متشجعة ومتصبرة وهى واختى اللى وزونى على الغربة عشان شافوا حالتى وبهدلتى هناك,,غير كدة والله ما كان مرقت ولو اخرجونى منها !!!

    بعدين عباس دا لسه صغير وبدرس,خلوهو شوية كدة..وانا ذاتى لسه برلوم وفى وراية (بكرى) فى الاغتراب دا,,شوف الوالد السلاوى وود الفتيحاب ديل…

    وبجى تااااانى..

  23. علي سنكل كتب:

    أبكرون والأعزاء المدوناتيه الكرام سلام وشوق شديد . .

    و الله يا أبكرون فتحت لينا بيت بكا ما أظنو يترفع بالساهل.
    ولمان نجيك بالروقه . .

  24. محنك كتب:

    السودان سمح بلحيل
    والاهل طيبين بلحيل

    علا ما نى جاااي هسع وما طارى الرجعة ابدا خوفا من الدخول فى ال 80 % من قولت تيت كدا يا دوب بنعلم الوليدات وننستر مع الجماعة ونستحمل نحنا شوية عشان نقدم العيال .

    بعد داك الله كريم

    بجى بعد ما تقسمو السودان وكلو زول يقعد فى ركنه واختار لى ركن واغير الجواز الحالى بتاع _ جمهورية السودان ) للوطن البشبهنى وارجع ليه

    77 وزير ولا هسى ست الطعمية بياخدوا منها ضريبة ورسوم محلية و 50 % من اطفال المدارس ما لا قين وجبة الفطور على لسان الكاتبة ( منى سليمان ) وانا عندى 32 فدان فى مشروع زراعى حكومى من سنة 74 الى الان 36 سنة ما انتجت قدر بيت محمى واحد 40 متر × 200 متر

    لما اشيل لى ربع بصل من شمال الخرطوم ب 200 كيلو لما اصل العاصمة بجبو منى قدر تمنه

    عليك الله نرجع ليه الا يعينونى فى 77 او البعد 77 او ال 77 التالته

    الكتاب المدرسى الان ما متوفر حتى الان وفى وزير مركزى ووزير ولائى ومسئول تعليم فى كل محافظة ومحليه رواتبهم ومخصصاتهم تطبع كتب السودان كبه

    عندما فضلنا السياسى الواحد على امة من الناس وضاع معظم الشعب وبقى فقير بدون اعتراف من الدولة المرق بره ما مرق غلطان ولا فاكى الدرب

    والله بكروت التامين الصحى الدفعنا قروشا وبخصموا علينا حقها شهريا ما بعالجونا

    اذا الدكتور ماهيته 500 الف نرجع نسوى شنو

    يا ناس خافوا الله فى عباده
    مابين عاطفة الفنان وخيال الشاعر …… بون شاسع وما بين الواقع

    خلى يكتب شعر فى الطردوهو من المدرسة عشان حق الكهربا وهو جعان فى بطنو
    وعن المات بسبب عدم توفر الدواء
    وعن الطالب من ذوى القلوب الرحيمىة قطع كراعو

    بلدنا ما كعبة بس الخلق كعبت

  25. ابكرون كتب:

    عزت : (يا ربي بيقدر….؟؟ ) بالجد زي ما شكه برضو ود الزبير الزول المبني للمجهول ده زي الشايف فيه ملامح عزت …لا ياااخ شِيخ قبلك الغربه دي عندها (رينج) بتاع عمر
    بين 25 -45 اقصي شي مااكثر بعد كده بهدله ليك ولعيالك
    افليقا : كلامك زين لكن نوعية المستوي المعيشي من الارزاق وانت وقسمتك مهما غملت ما حتتحصل الا علي رزقك بس انت اسعي مش الواحد يرقد غلي جنبته يسب ويسخط لازم يكون في سعي وعدم يأس وحركة…ولو في اغتراب احدهم ما سوي مأوي لعيالو في 10 -15 سنه تاني ما حيعمل واحسن يعيد حساباته
    يسن : انت لسه ما دخلت الزووون وما تأهلت خطط واجتهد واستفيد من الغربة في التخصص ورفع المستوي وكلوا يهون في سبيل التاج…..بس مره مره اتنخج وخت الوالده وحضنها الآمن (تاااارقت)
    سنكل الليله المرقك يمرق بله وانت عارف بله قول ليه ابكرون قال ليك قسما عظما الا يرمي الفوله الفي خشمو قبل ما تتبله ويفتو…..!البيت خلاص قول ليه والبت عرسوها …وعباس (ما انت) خالو مات …ودليل بقي الهنااااي ههههههه استغفر الله
    عارف يا سنكلوني بتعجبني في الشايقية جرستكم دي وبكاكم في اي شي….اي شي ……نيام قال ليك عليك الله خلاص كفاك اشتاق للمة اخوانو………خالد مدني حصلنا

  26. ابكرون كتب:

    محنك لو راجيها تتصلح 22 سنه ما صلحتا وما اظن 22 تاني تصلحا…!ولمن تعمل 40 سنه غربه بهنا تاني الا صحراء ابوهامور بعد عمر طويل (ابوهامور دي يا ساده احمد شرفي هنا) اجاركم الله…!

  27. ياسين شمباتى كتب:

    ابكرون..
    فعلا الشوايقة يتصفوا بالحنين لاى شئ,,وانا فى غير ما موضع ذكرت انو ما كنت عايز اتخرج من المعسكر بتاع الالزامية!! وكان قعدت مع ناس فى بيتهم 3 يوم ساكت بتنخج لما افارقهم!! وتانى شيتا يمرقنى من السعودية دى ماهو ساهل..

    ومشتاق للبلد طولنا..لى ارض الحنان..

  28. خالد مدني كتب:

    ابكرون يا اخوي ركاب سرجين مالو ؟؟؟ الغربة زي ما قلت لازم تقرأ طربيزتها من اول ولو حسيت انها ما حتديك وورقك كعب العب لي دكها … ولو ادتك ما تسرح لانو طربيزة الغربة مدورة … لو ادتك لملم فيشاتك ومواركك وابقي مارق .
    ويا ابكرون انت عارف دورة حياة البعوضة – انا – كنت في وضع طيب في الغربة وعدت بمحض ارادتي الحرة المستقلة وعدت بدون اي ضمانات وبعد جيت هنا اتجهجهت واتشلهت … لكن هل في مغترب في سنتو الاولي في الغربة ما اتجهجه ؟؟ وبعدها والحمد لله الامور استقرت ونعل مافي عوجة … واهو كل يوم جديد يوم جديد … بالله في الغربة اليوم الجديد … جديد ؟؟؟

  29. الغبشة كتب:

    سايب اهلك ونخلك راحل قول وين ماشي وين آ صاح‎
    الشمس النايري‎ ‎ابت تطلع النيل يا زول اصبح رحراح‎
    الضل قصر ما غتى رويس ولدا ساكب عرق‎ ‎الكتاح‎
    الواطة ابت تديك الخير ولا انت عليك ما هابي رياح‎

    سؤال وجيييييييييييييييييييييييه

  30. ياسين شمباتى كتب:

    الغبشة..سلام..
    انتى رايك شنو؟؟؟

  31. nono كتب:

    الرأي؟؟

    رأيكم ؟؟؟؟؟؟

    والشووووورة شورتكم ؟؟؟

  32. خالد مدني كتب:

    كتب افليقا:-
    ابكرون : والله انا شخصيا ضد العوده الطوعية اما الاجبارية فما عندى مشكله معاها . يعنى لو مرتاح وكريم ومرطب بره مالك ومال الشقا عليك الله ؟؟؟ واوع زول مغترب متفلسف يقول لى القصه دى ما بتحس بيها الا لمن تمرق لانو حاقول ليهو تقايض وندفع لك فرق ؟؟؟
    الحبيب افليقا معاك متفلسف سابق بقول ليك القصة دي ما بتحس بيها الا لمن تمرق وبقول ليك الغربة مرة ومؤلمة وبقايض وبدفع فرق كمان … بعدين الغربة غدارة وقدر ما بتديك – ده لو ادتك – بتاخد منك وانظر حولك : من من اصدقاءك ودفعتك اغترب وصار وضعه اليوم احسن منك ؟؟؟ انا شخشيا لما اقارن وضعي مع عمر وحاتم وعلي وحسن وحموري لا اجد ان الغربة قد جعلتني ماديا في وضع افضل منهم بل هم حذوي النعل بالنعل ولهم فضل الاستمرارية .
    بعدين يا افليقا ما قلت نوبه وبكايين وطيب … ما حصل بكيت مع :
    غريب ..
    وحيد في غربتو
    حيران ..
    يكفكف دمعتو
    حزنان..
    يغالب لوعتو
    ويتمنى
    بس لي أوبتو
    طال بيه الحنين
    فاض بيه الشجن
    واقف يردد ..
    من زمن

    بالله ياالطير المهاجر للوطن
    زمن الخريف
    تطير باسراع
    ماتضيع زمن
    أوعك تقيف
    وتواصل
    الليلة
    للصباح
    تحت المطر
    وسط الرياح
    وكان تعب منك جناح
    في السرعة زيد
    في بلادنا ترتاح
    ضل الدليب أريح سكن

    فوت بلاد وسيب بلاد
    وإن جيت بلاد
    وتلقى فيها النيل
    بيلمع في الظلام
    زي سيف مجوهر
    بالنجوم من غير نظام
    تنزل هناك وتحيي
    ياطير باحترام
    وتقول سلام
    وتعيد سلام
    على ..
    نيل بلادنا
    وشباب بلادنا
    ونخيل بلادنا
    بالله يا طير
    قبل ما تشرب
    تمر على بيت صغير
    من بابه ومن شباكه
    بلمع الف نور
    وتلقى الحبيبة بتشتغل
    منديل حرير
    لحبيب بعيد
    تقيف لديها
    وتبوس إيديها
    وانقل إليها
    وفاي ليها
    وحبي الأكيد
    وللا يا افليقا انت قايلو كلام ساكت وخيال شاعر ولوحة رسام وبكيييييت وقشيت دموعك وقلت والله بالغ لكن … ابدا ما بالغ ودي الغربة وده حال الناس المغتربين … ووالله لو ما خايف علي ناس سنكل وبشار كان نزلت ليك هنا : الدنيا ليل غربة ومطر خليتم ليك يصبحو في الخرطوم .
    اخواني في الغربة : سنكل وبشار وابكرون ومخير الله ومحنك واخرون لا تعرفونهم ويعرفون انفسهم : عودوا فالعمر واحد ولكن هناك الف طريقة لعيشه .
    كسرة : خواطر مغترب تايب .

  33. ابكرون كتب:

    شكرا لمرور بنياتناالغبشة ونونو
    خالد : والله ريحتني مش لانك جيت في التراك بتاعي ….! لانه دي الحقيقة من زول ضايقو(والضاقو ضاق الويله)…والمسألة قراءة ومن ثم تقدير موقف والخروج باستنتاجات وحلول….لكن اغتراب عشوائي سبهللي بدون هدف محدد وقيد زمني فرم سااااااكت في العمر وهرووووب في الآخر بكون ممزوج بجبن ماليه داعي

  34. مشاكل كتب:

    سلامز

    يا غريب عن ديارك مصيرك تعود

  35. ابكرون كتب:

    التلب
    مشاكل
    فعلا لبلاده هو
    الغريب حتما لدياره يعوووود
    بس منو البقول البغلة في الابريق
    ومنو البقنع الديك

  36. حاج أحمد السلاوى كتب:

    السادة صفوة الأخيار .. كبار وسغار ..
    كتبت تعليق مطول عن المودوع ..لاكين بقدرة قادر راح وطشّ عند الإرسال..زعلت شديد وقفلت الجهاز ..
    ولحد ما استجمع قواى من جديد .. اقول ليكم :
    الغربة سترة حال ..
    العرجا لمراحها …
    لابد من أمازونيا وإن طال السفر ..إقتباس من قول إخواننا العرب العاربة أهل اليمن ..لابد من صنعاء وإن طال السفر .
    الغربة تجربة شخصية بحتة ..
    – لماذا هاجرنا من البداية ..إقتصاديااً ام سياسياً ؟
    – لماذا كانت الغربة قسرية فى البداية وصارت العودة طوعية فى النهاية ؟
    – هل زالت اسباب الهجرة والإغتراب أساساً لكى نطالب المهاجرين بالعودة الطوعية ؟
    -هل هنالك فرق بين الغربة فى منطقة دول الخليج والغربة فى دول العالم المتحضر كما يسمون انفسهم ؟.
    -هل حقق المغتربون طموحاتهم من تأمين مأوى وتعليم الذرية الصالحة ؟
    -كيف يكون الوضع فى أمازونيا لو عاد مغتربو الخليج فقط .. ناهيك عن مغتربى الدول الأخرى .. –
    – هل هنالك مجال لإستيعاب كل هؤلاء البشر أم نوسع دائرة النصب والإحتيال والكسر واسواق المواسير والشيكات الطائرة ؟
    والكثير الكثير من الأسئلة والإستفسارات المطروحة وتحتاج إلى إجابة ..علنا نعود إليها بعد هنيهة قصيرة ..
    ويبقى القرار الصعب .. عودة طوعية .. أم إنتظار العودة القسرية كما كانت الهجرة قسرية ؟
    – ما هو دور عواطف فى العودة الطوعية أو القسرية الجاذبة ؟
    – ويا ابكرونا .. فتحت سيرة ما اظنها تتقفل بأخوى وأخوك ..زى ما قال ليك أخونا الكاشف سنكل …وإنت حزمت امرك ولا شنو ؟
    ولنا عودة للمودوع ..

  37. محنك كتب:

    نعيش الغربة فى بلدنا …. ابدا …. اخير نعيشها ونقول نحن بره البلد

    والموضوع فى النهاية رزق بجيك …. واقدام مرفوعة …. ولقمة وقسمة

    وبلدنا سمحة لكن البشر بقى وحش عديل كل من لقى فرصة نهشك ،،،، والما لاقى فرصة انتحال شخصية وتليب ونهب بضراعو عديل

    لو انصلح بس حال الزراعة ونحن بننبح منذ عشرات السنين لانصلح حال الشعب السودانى والبلد

    مدخلات الانتاج الزراعى مجمركة وعليها ضريبة قيمة مضافة ، ولما يستثمر الوزير واتباعه فى مجال ويحتكروه يعفى لهم

    كدى واحد يحاول يدخل راسه فى الدواجن كان ما يطيرو ليه

    البلد دى شكوها زمان وطلعوا منها الراسمالية القديمة ( من كان ثروته داخل البلد ) ومن كان جزء كبير من ثروته بالخارج حتى لو كان خلفيته معارضه هادنوه

    واحد راسمالى قالو ليه تنزل مؤتمر وطنى اعتذر بانه طوال عمرهم اهلهم ما مارسو السياسة وما عايز يدخل لانه ابوه محلفه

    لكن بدعمكم
    قال ليه ….. تدعمنا بقروشنا

    الناس الزمان قلوبهم فيها رحمة حتى السياسيين دكتاتورييين لكن جزء كبير من اهتمامهم للمواطن

    يلا غنو معانا للمآسى والبلاوى عشان نعرف بلدنا على حقيقتها
    وامشى الان امام السفارات الفاتحة فيز واقنع لى واحد عاطل خمسة سنة وجاتو فرصة يغترب

  38. ابكرون كتب:

    سلولو/ محنك : فعلا قسريه في البداية لكن بمرور السنين الطوال حتي لو لم تتحقق الاهداف كلها …قدر الاتحقق تصبح طوعية …وهنا انا لا اتكلم عن اوضاع السودان السياسية او المعيشية …..فقط عامل العمر والصحة والاسرة بما يشمل العيال الكبرت والوالدين الخ…..هنا العودة برضو حتصبح قسرية …الكلام هنا عمومي طبعا لكل ظروفه….بعدين يا سلولو العواطفات بختلفن في البتنظر للكلام الفوق ده وبجي في هواهاوواعيه شدييييد ….وفي العايزه راحات بره ولا يهمها تتحرق ولا تنشف ولا تجن حتي ….وفي منهن من توفي ازواجهن في المغترب وبرضو قاعدات هنا بدعوي السودان لا يطااااق….بعدين ياخ ده قرارك انت اولا ثم انت ثم انت ثم لا شخص غيرك

  39. حاج أحمد السلاوى كتب:

    اخونا الكاشف أبكرونا ..
    أتفق معاك فى كل ما ذهبت إليه ولكن تبقى المسالة متوقفة على ظروف كل شخص وزى ما ذكرت أنا سابقاً أن ما ينطبق على شخص قد لا يناسب آخرين وهذه حقيقة لا يختلف عليهاإثنان ..فأنا شخصياً موقن تماماً إنه لابد لى أن أعود عاجلاً أم آجلاً ولكن لدى إلتزامات من الصعب أن أوفيها وانا داخل أمازونيا خصوصاً بعد ان وصلنا أرذل العمر ولم يعد بإمكاننا العمل فى السودان كموظف لدى الاخرين أو أن تبدا عمل حر من جديد( ما فى وقت ) …وأنا ولله الحمد والشكر فى وضع جيديتيح لى هنا.. أن مد الله فى الآجال تحقيق ما تبقى من خطط .. وفى سبيل العودة الطوعية الجاذبة عادت الذرية الصالحة بصحبة أم المؤمنين منذ ما يقارب الثمان سنوات إلى أمازونيا وتأقلموا على الوضع داخلياً.. وفى هذالسياق لابد لى أن أشكر عواطفنا التى أيدت فكرة العودة الطوعية آنذاك مع الأنجال وقامت بالواجب وأكثر فكانت لهم بمثابة الأب والأم( كسير تلج شديد.. مش؟)إلى أن أكمل إثنان منهم دراساتهم الجامعية بنجاح والباقون سائرون على الدرب إن شاء الله … وأعرف آخرون تابى عواطفاتهم العودة الطوعية كانت أم قسرية …. حمانا الله من أمثال هؤلاء العواطفات .
    والنقطة الهامة بالنسبة لنا نحن مغتربى السعودية .. وجدة خصوصاً هى قربنا من السودان جغرافياً ففى خلال ساعة ونصف تكون فى وسط الخرتوم وكثير من أخواننا يقضون العطلة الأسبوعية بين أهليهم وذويهم..
    لا أريد أن أتطرق للأمور الإقتصادية والسياسية لأنها واضحة ومعروفة للجميع وأتركها للوقت .. مع أمل أن ينصلح الحال.
    وعليه .. أنا شخصياً لست فى عجلة من أمرى وأتركها للظروف إستناداً على ما ذكرت أعلاه .. والرزق محل ما تكون بيجيك وزى ما بيقولوا فى المقولة إياها.. كل شىء فى وقته حلو … يا … حلو..
    ولنا عودة إن شاء الله .

  40. حكاية كتب:

    ربنا يرد غربتكم يا ابكرون انت والمعاك
    لكن لو جينا للحق ولقينا طريقه كان زمان طلعنا روحنا لحته بعيده
    77—777-7
    ياربى رقم 7 مالو شايلين بيه فاتحه وخاتين جنب ال 7 سبعه اختها
    حرام عليهم كل والى بحاشيه وعنده وزراء والزير عنده اتباع وكل تربيزه بطقاطيقها
    نقول الرووووب ولا نقول شنو
    البشوف البلد وحزنها بعرف ما ال اليه الحال
    ربنا يرحم شعبنا والما صلى فى النور ما صلى
    يا ابكرون خليك محلك مالك ومال الهم والجرى ورا لقمه العيش
    مش عايش عيشه زين مالك ومال الهم ووجع القلب
    انا لو بره بقول ليهم ادفنونى قبلى الحساب هنا برضو بفرق لانه الجنيك عقابهم بصيبك
    الجاتك فى مالك سامحتك
    ربنا ما يسامحهم
    مشغولين عشان جارين ورا لقمه العيش وقالوا عيشه هنيه تكفى ميه لكن بقت ما بتكفى الواحد تكفى الميه

  41. محنك كتب:

    قلت لى رباهم تسعة من سرائط الشرطة وعاشهم بامهم هسى ما قادرين يعيشوه …. السبب لانهم ما سياسيين ناس معايش زوووووووووووووووووووووووووول المعيشة ضايع فى السودان . زمان صنعة فى اليد امان من الفقر وكلهم ربوهم صنايعية ومزارعيه وعساكر ميرى ورعاة . هسى ديل ما زالوا سودا الناس بس للاسف ما قادرين يعيشوا فقر ومسغبة وذل جبايات

    ايها الولاة تذكروا ان هناك حساب ولم يعينوك عشان نفسك واهلك وبيتك وخشم بيتك انت عينوك عشان تخدم

    ما تصدق ايها المسئول كلامى الفات دا لانه لو عايزنك تخدم المواطن كان عينو بحد اقصى عشرين وزير بدون وزراء دولة الا فى الوزارات الكبيرة يعنى شنو وزير دولة بالبيئة

  42. بشار أحمد بشار (ابن برد) كتب:

    سلام للجميع
    أبكرون : لاكين (كوفتني) أصبر وما تستعجل هم براهم حيقولوا ليك عن اذنك وبارك الله في من زار وخفّ لأنو في عملية احلال من جنسيات وعناصر أخرى وكل الناس راجعين في المغيرب واليرجوا الراجيهم في بلد المليون ميل مربع البقت زي ( قد الإبرة ).

  43. علي سنكل كتب:

    العزيز أبكرون وسماره الكرام . . .
    جذبني هذا الموضوع للكتابه بعد غياب بسبب الإغتراب النفسي.
    لمان الزول يبعد عن البلدو يطول يتحول إغترابه إلى حالة من المعاناة النفسيه ( سميتو إغتراب نفسي ، ودي فلسفه مني ساكت ما أظن ناس دكتور قرن شطه يمرروهالي ). الغربه تتحول إلى هاجس من التفكير اليومي فيما أنت فيه ، وهل صاح واللا ما صاح تخلي أمك الولدتك الما بتقدر تطلع التمره تجيب المنجل ؟ !

    يا الناسي اللبقة المفتوحة دي بلاك طوريتك ما بتقرع‎
    المنجل‎ ‎في راس التمرة ناسيهو وامك ما بتطلع‎
    و تعاين للموضوع من الطرف الآخر و تسأل نفسك :
    يا ربي كان رجعت بقدر أساعد هذه الأم كما أساعد من هنا؟ وفي الغالب تجد أنك تساعد من هنا بصورة أفضل. طيب ما حتندم ندم شديد إذا ما فارقت هذه الأم لا قدر الله الفانيه وإنت قاعد هنا !
    أنا أخذت الأم رمزاً للوطن والأهل والجيران والحله.
    ثم لا تجد الإجابه الشافيه أو كل يوم تصل لنتيجة مختلفة عن الأمس ، يعني يوم تعاين لتلفزيون السودان تقول أرجع بكره، ما هدي الدنيا في خير. واليوم التاني يلاقيك واحد راجع من الإجازه ويتطاير الشرر من عيونه تقول لا والله النصبر شويه..
    وتحياتي وأشواقي لكم جميعاً

  44. ودالزبير كتب:

    خالد مدني
    ( خواطر مغترب تايب )

    دي حكمه العدد

  45. اواصر كتب:

    الزوار الكرام السلام عليكم محليين ومغتربين
    اخوانا المغتربين العمر واحد تعالوا نعيش سوا ،،،،نعانى سوا نفرح سوا ونزعل سوا نجوع يوم ونشبع يوم ،،، الاخوات دايرنكم جنبهم والامهات والابهات دا وقت ترفعوهم في المرض والكبر وتبقوا السند والعكاز ،،، ايوه صاح بلدنا صعبة والعيشة دايرة المجابدة لكن مع بعض بتكون هينة بدل الجوه يعانى والبرة يعاني اخير نتلم ونساند بعض في المرة والحلوة وانشاءالله نسمع منكم قريب زى صديق احمد لمن قال :
    يسوقني الشوق
    واجيكم ماني زاير اريت رزقاً يغرب سيدو طاير
    أضوق طعم الحياة الطولت فاقدو
    واحس فرح الصغير الضم والدو
    كبيرنا على صغيرنا ألاقى أقالدو
    وأجى البيت زى عريس جايبنو ساير

  46. DAKEEN كتب:

    * يقول الإمام الشافعي في فوائد السفر :
    o تغرب عن الأوطان في طلب العلى — وسافر ففي الأسفار خمس فوائـد
    o تفريـج هـم، واكتسـاب معيشـةٍ، — وعلـمٍ، وآدابٍ، وصحبـة مـاجـد
    * ويقول أيضا ..
    o فالعنبر الخام روث فـي مواطنـه — وفي التغرب محمولُ على العنـق
    o والكحل نوع من الأحجار تنظـره — في أرضه وهو مرمي على الطرق
    o لما تغرب حـاز الفضـل أجمعـه — فصار يحمل بين الجفـن والحـدق
    * ويقول أيضا ( والعهدة على موقع إسلام أون لاين ! )
    o سافر تجـد عوضـاً عمـن تفارقـه — وانصَبْ فإن لذيذ العيش في النصـب
    o إني رأيـت وقـوف المـاء يفسـده — إن ساح طاب وإن لم يجر لم يطـب
    o والأسدُ لولا فراق الأرض ما افترست — والسهم لولا فراق القوس لم يصـب
    o والشمس لو وقفت في الفلك دائمـة ً — لملها الناس من عجـم ومـن عـرب
    o والتبر كالترب ملقـي فـي أماكنـه — والعود في أرضه نوع من الحطـب
    o فـإن تغـرب هـذا عـز مطلـبـه — وإن تغـرب ذلـك عـز كالـذهـب

  47. ابكرون كتب:

    حكاية : آميييييين يا حكايةان شاء الله…..بكره تمرقي يا حكاية لكن ما تطولي قسمي العمر بين هناك وهنا….وان شاء الله تغتربي وزيرة رقم 78 في بلادك وتكسري لينا السبعات دي
    محنك : برضو سلفا ركب الموجه وعمل 35 وزير مش النفط حقو والدولارات برضو ليه كلها تروح مرتبات لموندكرو ههههههه
    بشااار: ياخ سنكل ده ما تقطع قلبو ساكت ، ان شاء الله قبل ما يقولوا لينا نقول ليهم باي باي لندن…..وحمد الله غ السلامة من البيات الشتوي الكنت فيه بركه سنكلوني المرقك من جحر الضب……قال خال عباس السيد….
    سنكل : بشار ده ما تسمع اشاعاتو دي جهز الملعب ومافاضل الا بلاتر ويصفر قوووووووووون ويخليك براااك يا خله انا النوم من عيني قل…..
    اواصر : بركه الشفناك طيبه ….وكلامك عين العقل…والدنيا مغربت اخير نتلم وصديق وحاتك قال الملخص للحكاية كلها
    دكين : ياخ ناس الامام الشافعي قال كلام صاح لكن الموضوع يكون محدد بزمن وبعمر ومربوط باسره الخ ولا كيف
    ود الزبير : ود مدني ده كلو حكم لسه ما فتاهو …..ولا يفتى ومالك في المدينة………

  48. ابكرون كتب:

    سنكل : عليك الله اسه جد لوقالوا ليك انك ناسي المنجل في راس النخله وامك ما بتطلع ….مش بتركب اول طايره وتجي تركع تحت اقداما وتبوسهم وتعتذر ليها……؟
    الكتقة——– يا شباب حسب علمي الراكوبة

  49. قرن شطة كتب:

    الاخ ابكرون – ياخى خلينا هو نحنا هسع لاقين النجوع ولاهو بقا ساهل_ ياراجل نحنا ناس حفظة قران مشو إسرائيل – وانا شخصيا بعد جيت من غربة طويلة – طبعا مغشوش – الان ياسيدى بقيت زى قصة الزول الركب الاسد ، ولاهو الفيل – لايهم ياعزيزى – كايس النجوع باى طريقة ما لاقى ليهو درب – طبعا نحنا بكثرة الغربة بقينا (خبراء اجانب) فى حكاية النجوع دى…ودايرين نجوعا فيهو فايدة أو بس ساكت (نجما) من الوعث النحنا فيهو وربنا يتوب علينا ساكت…على كل جميلة الاغنية وبالمناسبة انا ذاتى شايقى …كلام جميل لكين تنقصو الرسالة!!!

  50. قرن شطة كتب:

    الخ د.سنكل – يا اخوى خلى الفلسفة وكلام اغتراب نفسى ومعاناة وهاجس وامور معوقة – انتو مرتاحين تحمدو ربكم وضاربين المركزى (التكييف) زى ما قال واحد صاحبى – والله تجو هنا تجنو عديل ، اسمع كلامى انا زولك ومابدور اذيتك ، فهمت يادكتور ياابوالكيمياء نحن هنا اكثر واحد فينا كويس (اصبح ضالعا متعثرا) كان ماجنا ولاجاتو حاجة اسو ،اعقل ياراجل …تحياتى للجميع

  51. محنك كتب:

    والله يا دكتور قرن ……….. طمنتنى تب …..

  52. ابكرون كتب:

    الاخ شطة : تحياتي عارف الغربة الاولي دي بتكون مختلفة فالاولي انت فيها كطائر الفينيق حر طليق مغرد تنهل من كل علم وجد ولعب وميتادور راقص وانيق يحمل الراية الحمراء …اما الغربة الثانية فانت عبد مغلول بالاصفاد لكفيلك الحكومي او الشخصي ومكلبش بقيد الاسرة (وام المؤمنين وعيالهازي ما بقول سلولو) ولسان حالك اه من قيدكم ادمي معصمي وطائر الفينيق اصبح كالنورس المعطون بتسرب نفطي لا حول ولا قوة له….وتدمع لمن تتذكر الاغتراب الاول…..ولو ركبته ابو الافيال احسن من ركوب الطائرة لتعمل زي ارقوق الساقيه حتي يهن القلب ….وهكذا دواليب
    ياخ سنكل ده : خليه عليك الله نيام مشتاق ليهو كتير ولو اكل معادلات كيماويه ساااكت بعيش هناك …لكن محنك ده لسه دربو اخضر وعايز ليهو سبوبه……
    غانا مريحانا لحدي اسه سلام

  53. خالد مدني كتب:

    ابكرون وسمارو … نرجع تاني لمربع واحد وهو انو الموضوع وطريقة تناولو بتختلف من زول لزول … وحتما ما يرضيني لا يرضيك وكل واحد تفكيرو واحاسيسو براها … القصة ميزان الدهب لكن ما يوضع علي الكفتين مسئولية شخصية .
    بالنسبة لي في كفة الحر والغبار والغلاء الفاحش الذي اعيا الطبيب المداويا يعني قروشك – لو في – ما بتكفيك ما بتكفيك وزحمة الشوارع السواقين الرزيلين والمشاة الارزل منهم والشوارع الكعبة والناس الاكعب من ناسها ومشاكل العلاج والمستشفيات وعووووووك … بالمقابل هناك الوطن .
    كسرة : يا ود الزبير حفلة زي ديك بتديك قوة احتمال لكم سنة ؟؟

  54. حاج أحمد السلاوى كتب:

    ولدنا خالد ودالمدنى .. وبقية صفوة الأخيار الكرام ..مغتربين خارجياً وداخلياً ..
    قلت شنو … بالمقابل هناك الوطن ؟…الوطن بالناس الفيهو .. الأهل ..الأقارب .. الأصدقاء من زملاء الطفولة لزملاء دراسة إلخ .. غير كدا يبقا كلام إنشاء كنا بنكتبه فى المدرسة عن حب الوطن ..والوطنية ولابد من دفع ضريبة الوطن ..المسالة اخذ وعطاء يا جماعة ..وواله العظيم ما قصرنا فى حق الوطن لاكين لامن يبقا الوطن والبلد طارد لأهله وبنيه ..تبقا ارض الله واسعة فتهاجروا فيها..
    وزى ما قال بعض الإخوة أعلاه من الأفضل لى أن أكون مغترب خارجياً من أن أكون مغترب داخلياً وأن يظلمك الغريب خير من أن يظلمك أخوك اقريب ..ظلم أولى القربى أشد ألماً ..
    والمسألة كما نحن متفقون عليها حسابات شخصية .. أما صابت وإما خابت ..وكل شاة معلقة من عصيباتها ..ولنسأل أنفسنا السؤال التالى ..كم عدد السودانيين العاملين ومهاجرين ومغتربين خارج السودان ؟لماذا هاجروا اصلاً ؟ ..
    ومن المضحكات المبكيات أنحكوماتنا المتعاقبىة على سدة الحكم لم يكن بينها رجل رشيد لكى يبحث ويحاول سبر اسباب الغربة والهجرةى بهذه الأعداد الغفيرة .. بل قاموا بإنشاء إدارة لهؤلاء المغتربين دون خجل بدلاً من العمل على عودتهم..هؤلاء المغتربين الذين صاروا البقرة الحلوب فى يوم من الأيام تعتمد الدولة على مدخراتهم وتحويلاتهم فى ميزانيتها ..عطاء من جانب واحد فقط ..أتجاه واحد ..دون عائد أو مقابل لهذا العطاء الممدود ..وعلى سبيل المثال بدات ادفع من الأتاوات منذ العام 1981 ( فى عهد مايو الزاهر ) التى تغير إسمها مراراً من ضريبة إلى مساهمة إلزامية ( كيف تكون مساهمة ..وإلزامية فى نفس الوقت ؟ )إضافة إلى التحويل الإلزامى وإنتهاءاً بالزكاة المفروضة على الراتب الشهرى.. ( وكلنا نعرف مشروعية نصاب الزكاة وأين تصرف ..ربما كان هنالك بند فى كتاب فقه الضرورة..للزكاة لا نعلمه ) فماهو المقابل لكل ذلك … الإجابة معروفة للجميع ولا تحتاج درس عصر ..لا شىء..لا تامين إجتماعى ..لا تامين وظيفى .. لا تامين صحى ..دفعنا دماء قلوبنا لكى نعلم ابناءنا داخل الوطن لأننا مغتربون والفلوس تاتينا طواعية ملقاة فى الشارع دون تعب أو كلل..ولا زلنا نحب الوطن ونتوق للرجوع إليه لنموت وندفن فيه ( العمار بيد الله ..ولكن لكل أجل كتاب..ولا تدرى نفس بأى ارض تموت) ولكن هل تكفى الأمانى فقط للعيش الكريم ؟ لا اظن ذلك ..

  55. ابكرون كتب:

    خالد يا مدني: اصبته كبد الحقيقة، بس اضيف لكفة الوطن عواملك الخاصة من عمر وقرف وعيال وقيد زمني والظروف السياسية للبلد دي تجابدها اين ما كنا في الكفه أ او الكفة ب…..
    بالله انت يا حاج من 81 الله يديك العافية….. انا غايتو كان جنيت وحياتك… زي ما قلنا لكل سبوبتو لكن يبقي ان لا بد ان يكون لكل شي آخر فحياتك مع عيالك واهلك الاقربين لابد ان تديهم ونفسك حقها وحقهم ومنزلك الذي شقيت وراءه لابد ان تعيش به وتعمره بوجودك بدلا من عام الي عام كهجرة الطيور الي اعشاشها صيفا …!وفي النهاية انا وانت وهو وهي لسنا افضل من 40 مليون يقبضون علي الجمر وان كان جمرنا غير جمرهم للفرصة التي اتيحت لنا قسرا او طوعا

  56. خالد مدني كتب:

    كتب حاج السلاوي :
    ولدنا خالد ودالمدنى .. وبقية صفوة الأخيار الكرام ..مغتربين خارجياً وداخلياً ..
    قلت شنو … بالمقابل هناك الوطن ؟…الوطن بالناس الفيهو .. الأهل ..الأقارب .. الأصدقاء من زملاء الطفولة لزملاء دراسة إلخ .
    وانا بقول ليهو : وتييييييب !!

  57. aflaiga كتب:

    حبايبنا المغتربين الحلوين :
    والله مشتاقين ليكم وعاوزينكم معانا علا ما عاوزين نشوفكم مشلهتين ومجارطين واحوالكم مختلفه .
    غايتو البضمن يجى يتحمل التلتله المعنوية والماديه حبابو .
    انت بالذات يا ابكرون ما اظنك بتحمل المعنويه لو اتحملت المادية الا كان نسمع بيك عضو مجلس ادارة الهيئة الخيرية لدعم القوات المسلحه !!!!!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s