حكاية عجيبة…

Posted: الأحد,27 يونيو, 2010 by قرن شطة in إجتماعية

أحياناً كثيرة تضيع قضيتك العادلة وتذهب هباءاً منثورا إذا لم تتمكن من عرضها بطريقة مفهومة ومقبولة وبالطبع واضحة...واليوم فى هذا العالم الذى أصبح تخصصى ومعقد التفاصيل تُولى الدول والمؤسسات عرض قضاياها امام العالم أهمية قصوى…فنجد المتكلم او المدافع عن قضية ما – وخاصة امام الاعلام وبصورة اخص امام كاميرات التلفزيونات – نجده راقى ومهندم فى ملبسه ويختار الالفاظ بعناية والجمل – باى لغة كانت – باهتمام فائق ، ويتحرى الدقة أو التعميم –بحسب الحالة- بفن مدروس وحس عالى بالفعل…ويتوخى كذلك كسب تعاطف مستمعيه أو مشاهديه بان يكون طلق المحيا وباسم جميل ولاباس من دعابة أو طرفة عابرة تلين قلوب الاخرين..فانت عزيزى القارى عندما تجعل شخصا ما يبتسم أو يضحك صراحة تكون قد كسبت نصف قلبه وإستعداده المبدئى للتعامل بلطف مع قضيتك وربما تفهمها ومناصرتك فيها…هكذا تسير الامور…

اما نحن فامرنا عجيب وقضيتنا أعجب ، فحينما نتكلم للاخرين (فى العالم الاخر) عن قضايانا العادلة -وبعضها واضحة عدالتها كالشمس- لانحسن مبدئياً إختيار من ينوبنا ويتحدث عنا ، حتى وبصراحة شديدة بعض المناديب اشكالهم لاتسر… ونجد ممثلنا متجهم وتسمى عندنا (صرامة) ويتحدث بصوت عالى وكما تعرفون سادتى وكما يقول المثل الإنجليزى (الرجل المتحضر لايرفع صوته)

وتجىء الاخطاء اللغوية أو فى الحقيقة نطقنا نحن للغة…فى مجمع من الاخوان العرب قلت متباهياً ذات ليلة مشؤمة باننا احسن من يتكلم العربية بين العرب ، ومن اخر الطاولة قال احد الاخوة اللبناين – وكان مسيحى على ما اذكر- بانكم السودانين تقول (ليلة الغدرى) نقصد بها ليلة القدر ..وتهكم قائلاً: بانكم اكثر الليالى قداسة ببساطة قد حولتمها الى مؤامرة…والحقيقة انا مسالة ليلة الغدرى دى كانت فايتة علىَ…صمت كسمك البحر الاحمر وشعرت أن أحدهم صب علىَ دلو ماء باررررد…وفوضت أمرى لله كما قال الغناى.

يقول المسئول او المتحدث –وغالبا مايكون الاثنان معا- فى معرض حديثة (بحيس) يقصد بحيث..ثم يكثر من مسالة (والله يا اخى) هذه العبارة تقال فى سوق الناقة أو السوق المحلى وليس فى جهاز يبث الى نصف الكرة الارضية…وقد أحدهم يقول مراراً وتكراراً للمذيعة التى كانت تتولى المقابلة (والله يا اخى) طيب أصلاً اذا انت مصر على موضوع (والله يا اخى) إنتبه للجندر يا اخى، وكان أحرى به قول (والله يا اختى أو حتى يختى) وحقيقة أنا لا أدرى (الحليفة) دى سببها شنو؟ وغالباً الشخص الذى لايعرف السودانين يتطرق اليه الشك بان (الحالف) بكثرة كذاب!

ثم ننطق كمية من الكلمات مضموم أولها (فى الاصل ولغوياً) مكسورة ، مثل (حِلول) نقصد بها (حُلول) وقٍلوب) بمعنى (قُلوب) (والامرى لله) نفصد الامر لله (دى كمان جابت ليها ياء لينة) والادهى هذه التأتة ،وهى عبارة عن رقص اللسان –لفترة معتبرة- بين الفكين بدون هدف فتخرج منه اصوات كالاتى: ألا ل ألا ل ألال ألا ل…جملة موسيقية غريبة لا اعتقد ان باخ نفسه قد مرت بذهنه..اللسان فى إحتدام فلامنكو خفيف أو فندانقو رهيب ، وقد يتطاير بعض الرذاذ من الفم فى محاولته للخروج من الحالة اللغوية والعصية!

أيها الناس موضوع نطلع فى الاعلام العالمى وتحت صورتنا عبارة (خبير) أو (دكتور خبير) ونقعد (نعوس فى العواسة دى) زى ماقال صديقى ودالزبير لامر عويص ومهين حتى ، وفى وسطه تضيع قضايانا العادلة وحقوقنا المشهودة …ماقادرين على اللغة العربية  (نتوكل على الحى الدائم) من الاول ونتكلم بعامية لمعاء تعجب السامعين …. إذا كان كسب الودين فيه صعوبة فلنكسب المحلين على اقله، او أصلاً مانمشى (ونحنا الجابرنا شنو!) …حكاية عجيبة…

 

Advertisements
تعليقات
  1. aflaiga كتب:

    غرن شطه : سلام شفت الغلط من الاول فى الاسم كيف ؟؟؟
    طبعا حقيقة انا شخسيا بعتغد انو الكلام مفترضا انو يكون يعنى زى شنو كده اقول ليك تصدق بالله يا مؤمن ؟ انو اى زول بيستضيفوهو فى التلفاز والاجهزة المرمية ! بيكون عاوز يظهر ليس اكثر عشان كده بيركز انو يلبس اصفر اكتر من تركيزو على الحيقولو هو فى زول حيفهم شيئ ولا بيحضر التلفزيون عشان يفهم شيئ ؟؟ لا المستضيف ولا المضاف ولا المضاف اليه فاهم شيئ !!!
    اغرب حاجه انو يكون مندوب السودان فى مكان ما عندو تفه وما بيسرح شعرو وبيتكلم زى فى سوق الناقه زى ما قلت ..
    جاييك ..

  2. زووووووول كتب:

    افليقا
    والله من عمك شطه اتكلم عن الهندام اتذكرتا ليكا التفه وكمان برضو فى رئيس نادى كبير عامل تفه كريهه الا مرات كتيره بسترها بالعمه . انت المندوب دا مايلبس بلدى ويريحنا من التفه دى . بعدين موش الرئيس يقول للزيدا (كيف دى) بكره لو ما حلقتا ما تجى داخل هنا ولو ما حلقتا حا اعمل ليكا كروس فى راسك . وجاييكم للكلام وناس آآآآآآآآآآآآآآآآآآآآآ لانها حكايه مقرفه تلقا واحد يتكلم وتلتين كلامو آآآآآآآآآآآ

  3. ابو رؤى كتب:

    حكاية الشكل دي يا جماعة ما عندنا عذر فيها .. يعني الشخص الـ يمثلنا حقو يكون قيافة شوية
    لكن مسألة الكلام (بحيس – الأمري لله – والله ياخي ….. الخ) ما عندكم حق تتكلموا فيها . كل العرب بل العالم كله يتكلم بلكنته المحلية .. أحياناً تستمع لواحد ليبي ما تفهم حبة من كلامو .. أو تستمع لواحد يمني تستغرب .. حتى المصريين لولا أننا تعودنا نطقهم الجيم قافاً والقاف ألفاً كنا حنشوفها حاجة غريبة ..

  4. زووووووول كتب:

    ابو رؤى سلااام
    حبابك ما غريب الدار
    كسره : كلامك كدا (ارفع ابهامك لا فوق )

  5. ابكرون كتب:

    سلاااماتكم (دي فيها ايشي…؟)
    فعلا يا ابورؤي لكل شعب من شعوب بني يعرب لهجته التي تراها البقية مضحكة ….لكن عند التحدث بالفصحي الأمر يختلف …هنا (يفرفر ) سيبويه في قبره…و( يتقلب) بن ماجه وبن سيناوبن الأيه علي جنبه التاني في قبره…
    يا ساده انتو ماشين لعبد المحمود بتاع نيويورك ليه ما عندك الكان بلشفي بتاع محادثات الدوحة ابو تفه…يعمل (خبيته ، وشرناحه، ووجع ضلوع مستقيمه)
    كسيرة : ناسنا ديل ما برسلو الخطاب او الكتاب (بطرشووووه)
    ويقولون ل:ارسل الخطاب للمدير
    (طرش كتاب حق مدير)…………..والعجب حبيبي

  6. حاج أحمد السلاوى كتب:

    اخونا قرن شطة ..وبقية صفوة الخيار..سلام
    أعتقد وأظن وأفتكر ولو ما اخاف الكضب ..إنو المودوع دا تطرقنا ليهو فى بوست سابق لا اذكر عنوانه وتحدثنا فيهو كمان عن المظهر العام لأبناء جلدتنا الأعزاء خارج أمازونيا العظمى ..
    من ناحية اللغة .. أجد أن أغلاط المذيعين النحوية أكثر الماً من أغلاط بعذض المسئولين المستضافين فى وسائل الإعلام المسموعة والمرئية ..وكنت أتوقع أن تكون هناك مراجعة مع المذيعين عقب قراءاتهم لنشرات الأخبار من رؤسائهم كما كان يفعل السلف الصالح من الأجيال الإعلامية السابقة ..وتظهر هذه الأغلاط فى كثير من حروف الهجاء المشهورين بها نحن السوادنة ( كما ينادوننا أهل الخليج .. سامحهم الله )ويشاركنا فيها جيراننا الأعزاء فى بعض منها ..فهذا يدل على أن مدربى المذيعين الجدد ليسوا بافضل من المتقدمين للعمل كمذيعين ومذيعات …
    – أخى ابو رؤى ..أولن بالتبادى نرحب بيك وانضمامك للمجموعة الرائعة دى ..وإن شاء الله ما ىخر طلة .. وتعليقى على مداخلتك هى أن المتحدث فى وسائل الإعلام العالمية عليه أن يراعى أن هنالك أجناس قد لا تفهم حديثك الدارجى .. ويجب عليه توخى العبارات التى يسهل فهمها للقاصى والدانى واللغة العربية الفصحى يفهمها الجميع ..وإن كان هناك من الإخوة العرب من يفعلون ذلك ( التحدث بالدارجة ) فلا يعنى هذا أننا بالضرورة ان نغلط مثلهم ..وأذكر فى احد حلقات برنامج الرأى والرأى الاخر للأخ حداد فى قناة الجزيرة أن إستضافو دكتور العجب فأورد عبارة سودانية دارجة وهى ..فلان لخبط الكيمان ( والتى تعادل بالفصحى .. لخبطة الأوراق ) فما كان من المذيع سامى حدا إلا أن أوقفه متسائلاً ما ذا قلت .. ماذا قلت.. إيش يعنى لخبطة الكيمان ؟ .
    أما مندوبنا الدائم فى الأمم المتحدة أسال الله له الهداية والصلاح حتى وإن كان عبقرى زمانه .. فشكله وملبسه نشاز بين مناديب دول العالم …واستغرب أن لم تصدر إليه التوجيهات من رئيسه المباشر أن يتذكر أنه يمثل السودان ولا يمثل نفسه فقط … ولكن كما قيل فاقد الشىء لا يعطيه وليس الرئيس بافضل من المرؤوس ..وكله محصل بعضه … لأن الولاء والبراء صار هى السِمة المطلوبة اكثر من الكفاءة..وكم من كفاءات راحت فى خضم الصالح العام وعدم الولاء …
    وعليه ارى انه من الواجب جلد الذات حتى ينصلح الحال..ولو بعد حين ..علينا أن نبدأ فمشوار الميل يبدا بخطوة .. أو كما قال..
    وخلونا نشوف آخرتا شنو !!

  7. قرن شطة كتب:

    الاخوة الاشاوس وخاصة حاج السلاوى الذى تكلم بكلام حسن وفيه اشفاق على صورتنا فى الخارج…وانا من البداية قصدت ان نثير هذه المواضيع عسى ولعل – عسى ولعل شنو ماعارف؟؟
    الاخ افليقا- تحياتى انا بقصد الذين يمثلون البلد خارجها، اما هنا داخليا فيبدو لى انه قد إختلط الحابل بالنابل ، هذا والجدير بالذكر ان هناك قسماً كبيراً من السودانين تركوا مشاهدة القنوات السودانيةوهذه حقيقة.
    الاخ زووول_ اهو انت شايف الحاصل وحقيقة نحنا اذا ماعالجنا المواضيع باسلوب السخرية والهزل مابتيلع ليييييننننا تهائى يازووووول ياظريف
    ابورؤى-نحنا نطمح ان نكون احسن من غيرنا شكلاً وموضوعاًولكن…..تحياتى
    الاخ ابكرون – انت مالك داير تدخلنا فى جخانيين ما بنقدر عليها ونحملها – ليك اطيب التحايا ياظريف.

  8. قرن شطة كتب:

    حاج السلاوى -مساك خير- ضحكتنى حكاية نسال الله الهداية والصلاح لى مندوبنا……والله دى بالغت (فوكها)

  9. ودالزبير كتب:

    حبيبنا قرن شطه

    يأخي موضوع العواسه ده ما تعديهو لينا……………

    زوووووووووووول
    كده خليك من رأيسنا أب سفه وتعال لي بجاي شنو من يوم هوبه مهند مافي زول سمع منك خبر وكفاره ليكم في إستقاله الطفل المعجزه الشافكم تاني شايلين كورتكم وبتشحدوا ما كضب..

    نرجع لموضوع البوست
    وخلوني أعوس ليكم شويه ما تقول رمضان قرب وحلاه عواسه الحلومر
    كنت قد ذكرت كثيراً إن كل العرب لديهم مشاكل في بعض الحروف فالسعوديون لديهم مشكله كبرى في حرف الطاء حيث ينطقونه ظاء فيقولون الظابط بدلاً عن الضابط والمصريين لا ينطقون الجيم ونحن لدينا مشكلتين في الثاء والغين ….. بالنسبه للتأتأه والتلجج فأظن ده ناتج من رهبتنا من وسائل الإعلام ومخزون الدونيه المتجزره في دواخلنا فعند مخاطبتك لحشد أو وقوفك أما كاميرا تجد أن دقات قلبك تتسارع وبدأت تصبب عرقاً وتضيع الكلمات منك وهذا ينطبق على المسعولين الذين هم في نهايه الأمر مجرد مواطنيين قادهم حظهم الطيب أو قل حظنا العاسر على أن يصبحوا مسعولين

  10. زووووووول كتب:

    ود الزبير سلااام
    ابدا والله الغيبه ما عندها علاقه بى هوبة مهند . بس شوية جرى وطيران كمان .
    بعد استقالة الطفل المعجزه يا معلم نقوم نسجل مويا وجمعه بتاعين اهلى شندى اقصد بتاعين فداسى ويجو كتابنا يتحدثوا عن اكتساح التسجيلات واحتمال تكون الخرقا ولاده زى ما حاصل معاكم ممتازيا .
    طيب نرجع للدكتور قرن :
    بعدين يا عمك المفروض الدوله تختار لتمثيلها زوول وجيه وقيافه وكمان علامه يعنى العلامات الشينين تخليهم للمنافسات الداخليه . وبرضو من الكياسه كل ناس تختار ليهم الزول البشبهم يعنى لناس افريقيا تخلى ناس الحركه الشعبيه يمثلوك ويمثلوا بيك !! ولناس اوربا تشوف زول عيونو خدر وللعرب تشوف زوول حلبى ولاثيوبيا والصومال واريتريا تقيف فى الشارع وتعزل من طرف لانو بشبهونا شديد .
    كسره : اصلا ذكر الهوبا بخلينا نهضرب ونخرمج يا ود الزبير

  11. aflaiga كتب:

    تعرف يا قرن : من الصباح بب رب قمت صحيت – جاك جاك جيك لبست – تنقش مرقت – تنقش تنقش مشيت المحطه – تلبت تلبت فى حافله – جاك واك جاك واك وصلت الخرطوم – زيطك خشيت المكتب – كف نجف لم فينى زول عارض سيييك انبرمت منو – جووتك خشيت المكتب – واك راك جاك طقطقت شغلى – لب لب فطرنا – جركجاك الساعه 3 جات – جوووتك انبرمت من المكتب – ركبت الترحيل نقنقنقن دقيت الحنك مع الزملاء لمن جيييتك وصلنا البيت ……….
    اها ده ممكن تسميهو موسيقى تصويرية ولا مؤثرات ولا بروبيسشن ولا شنو ؟؟؟

  12. aflaiga كتب:

    والله يا ود الزبير فى ناس كلاميين جنس كلام الواحد يبدا بالكلام من ورقه ويبعد كم سنه تسكو بورقه عشان توثق كلامو ما تقدر !!!! بعدين عشرين سنه كفاية انو تخلى ابو الهول يخطب فينا !!
    شايفك منور مظاهره السفاره فى العماره بس ما شايف داليا ولا نزلتها وجيت ؟؟

  13. ودالزبير كتب:

    أفليقا

    داليا البحيري أكتب الإسم كامل يا فرده مايقوم الفرد ديل مخهم يمشي بعيد ..ز يازول اليوم داك هرشني ليك السفير اللبناني جنس هرشه …. لو الزول عصر عليهو شويه كان جاب لينا هيفاء تغني

  14. نيام كتب:

    قرن شطة :
    العجيب الأريب …فعلا (والله ياخي ) حكاية عجيبة …نحن شعب مؤمن بمبدأ الحلف علي من أنكر…وبما أنه كلما نحدث احدنا ينكر علينا الآخر ذلك أصبحنا بقدرة قادر شعب حلاف …تحلف للمره في البيت تحلف للحكومة في الجبايات تحلف في شهادة تقدير العمر و تحلف كمان لمان تحكي نكتة …النكتة العادية دي …آي النكتة …تخيل زول يحكي نكتة يقوم يحلف ليك…وبعدين تحلف للانثي بضمير المخاطب الذكر وذلك لتجويد الحلف…البسمعك يقول دا افليقا و لا شنو!!!
    بعدين كل بداية إجابة تقول احسب انهو يعني معناتا ما متاكد و دا البجيب الحليفة…وبعدين اهم من دا و دا فهم السؤال يا اخوانا فهم السؤال نصف الاجابة …زول يسأل عن مشكلة دارفور فيتكلم عن الوحدة الجاذبة …ياربي دا زول و لا مسجل…
    اما موضوع التأتأة و اللالاءة و الللات التلاتة فهذا مرده الي ان المتحدث دائما يحاول ان يوهم المتلقي بانه يحمل كما هائلا من المعلومات التي تتزاحم علي فكره الثر هكذا و هو يحاول ان يختصرها حتي لا يثقل علينا…ولكنا نعلم انه افرغ من فؤاد ام موسي…
    اما قضايانا العادلة فانها تتضخم لاننا نحشرها وسط قضايا دولية ساخنة فيعتبرها الاخر امتدادا للارهاب في افغانستان و القاعدة في اليمن و الصحوات في العراق..
    اما ما سقته فيما يخص التخصص فنحن لا نملك رجلا واحدا جاء من حيث يجئ التخصص فنحن نعلم سلفا انه قبل الرمي تملاء الكنائن و نعلم سلفا ان الكنائن افرغ من الخزائن و مع هذا فنحن لا نحمل احدا مسؤليتنا فنحن المسؤولين عن هذا التوهان فايدينا وكأت و فانا نفخ…

  15. علي سنكل كتب:

    الدكتور قرن شطه . . .
    سلام وشوق شديد ليك ولسمارك الكرام
    لي كم يوم أحاول أدخل عليك ما لاقي لي فرقه من سبل كسب العيش في الخارج.
    عدم القدره على الكلام والتعبير الصحيح ناتج من كبت وسؤ تربيه في الصغر ، وللأسف الشديد المسعولين عندنا جلهم لا نعرف من أين جاءوا؟ شوف مسعولين زمان معروفين أصل وفصل الأستاذ محمد أحمد محجوب ، الزعيم إسماعيل الأزهري ، مبارك زروق ، بابكر عوض الله ، المفتي . . . ثقافه ومعرفه ولباقه وأدب.
    هل تستطيع مقارنتهم بمسعولين اليوم؟ اليوم يتولى المسؤولية من كان أكثر عنفاً وشراسه عندما كان طالباً. من كان بضؤب زملاء الدراسه ليقتل بإسم الدين. فمن أين لهم اللباقة والكياسه يا قرن شطه.
    حتى أعضاء حزبهم الخلوقين المثقفين الرايقين ذي الدكتور حسن مكي و سيد الخطيب مثلاً لا تجد له أثراً وسط الراكضين وراء الكراسي ممن قضى طفولته في مسغبة ويادابو بدأيتعشى قبل ما ينوم.

  16. طارق أب أحمد كتب:

    سنكل
    (( انا عارف ليك ياخ ما طيارات جات من السما و ضربتنا ))
    وزير الداخليه للبى بى سى ليلة قصف مصنع الشفاء

    ((حصل يوم كضبت عليكم , نحنا كديسه ما بنسلما ))
    واحد كده للدنيا كووولها

  17. قرن شطة كتب:

    الاخ العزيز ود الزبير -ياسيد انا عاجبنى التعبير لانو محلى ومعبر جداً فلاتقلق ياصاحبى وشرحك لموضوع التأتأة مابطال ولكن انظر كيف افتى نيام فى الموضوع!
    شوف يازووووول خلينى من حكاية ياعمك دى..جنى وجن الكبر! ومع ذلك كلامك صاح ، صاح وواضح لدرجة غريبة والاغرب لماذا لم يرى مسعولينا القصة دى؟ يبدو ان حكاية الحابل بالنابل قد استفحلت..
    السيد افليقا- عللى الطلاق قريت كلامك وما نقشت حاجة او قول – ماقنشت ايو جاحة يارفدة ، طرانه عديل ..

  18. قرن شطة كتب:

    عزيزى نيام – موضوع الحليفةيبدو لانو نحنا اصلا كذابين ، نقول للشخص عندما تلقاه: والله سالين منكم! لانو كضب
    اما الاجمل فى كتابتك تفسير التأتأة بخلو الراس وإرادة إيهام الافراد بانك ممتلىء بالمعلومات ووتزاحم فى راسك لتخرج!!! ضحكت شديد وانا اللى مدة ماضحكت….اساليب الإحتيال حيرتنى انا القارى علم الإجراموما قايل نفسى بتحير بعد ده!!!
    عزيزى د.سنكل – التحايا – عشان كده كتب او ربما تساءل المرحوم الطيب صالح فى مقالة بعنوان: من اين اتى هولاء؟ من رام الله ياربى او من جبل الزيتون…المهم انهم ياتون…ناس زمان من المحجوب ومبارك زروق ديل كانوا لوردات ، علم ومعرفة تحير ..لكين نحن شعب إبتدأ يتدهور ونصعد الى الهاوية ، وصدقنى القصة دى عندها نهاية لانو الاشياء كلها عندها نهايات …نسال الله السلامة

  19. قرن شطة كتب:

    الاخ اب احمد : اظرف حاجة الوزير المسعول صرح بعد ضرب مصنع الشفا بنه انضرب بى طيارة اكيد..بس هو مستغرب انو جات من وين وقطعت شنو كده ماعارف واغرقنا فى تفاصيل فنية المعنى انو باشمهندس فى موضوع الطيارات ده…
    اما قصة حصل يااخوانا كضبت عليكم دى اعفينا منها…حرم ماتقول شى وزى مابقولو الجماعة نسقف على كده فى هذه الناحية..مالك ياخى علينا!! تحياتى

  20. زووووووول كتب:

    سنكل سلااااام
    ما فى شك بانو محمد احمد محجوب هو افصح من انجبته الحكومات السودانيه لكن لا ننسى عبد الباسط سبدرات الاديب والوزير والمحامى افصح وزراء الانقاذ على الاطلاق واكثرهم معرفة وثقافة وقد خسرته الوزاره مؤخرا .
    كذلك لا ننسى البروفسير احمد مجذوب احمد والى نهر النيل السابق الذى خسرته الولاية ايضا هو من افصح ولاة الانقاذ ومكانه الطبيعى الامم المتحده ووزارة الخارجيه رغما عن دراسته للاقتصاد لكن مين يقرأ ومين يفهم يا سنكلونى .

  21. زووووووول كتب:

    اب احمد
    سمع اضانك ولا داير تنكت فى قصة الطيارات دى ؟؟

  22. ودالزبير كتب:

    زوووووووول
    الله يجازي محنك … كان تطعمها شويه وتقول منصور خالد خطيب مفوه خصوصاً بالإنجلزيه وتعرج على الرويبضه برضو … مالك رميتها … دل … كده … عالم بطاله

  23. زووووووول كتب:

    ايوا يا ود الزبير منصور خالد فصيح جدا بس شكلو ما سياحى هههههههههههههههههههههههه

  24. طارق أب أحمد كتب:

    زووووول

    سمع اضانى مباشرتن من البى بى سى الساعه تماتيه و حاجه
    الغريب إنها حكايه مشهوره و هى أسوأمن كده إنت كنت وين الزمن داك ؟؟؟ ما تقول لى فى الجنوب !!!!!حتكون ضيعت وكتك ساى

    بللاى ضيفوا ((وكتك ساى)) دى لملزمه المصطلحات السودانيه

  25. sobajo كتب:

    الاخ قرن شطة
    اشكر لك تطرقك لهذا الموضوع الحسّاس
    فالمظهر الجيّد واختيار العبارات المناسبة
    والتمهل في الكلام هي من اساسيات الظهور
    في الفضائيات محلية كانت ام عالمية وهذا
    ما يفتقده هؤلاء الذين يتكلمون باسم السودان
    اما ما يضايقني فهو طريقة الجلوس فقد لاحظت
    ان جُل المستضافين يجلسون بطريقة غير سوية
    وتعبر عن الكسل والتراخي !!
    فن الاتكيت مادة يجب ان تدرس وتكون اجبارية
    في كل المراحل الدراسية .
    اليس كذلك ؟؟

  26. محنك كتب:

    سوباجو تمام

    يجب ان يدرس الاتكيت بمراحله كلها … لكن نحن من الامن والجيش للوزارة طوالى الاتكيت دا يلقوه وين

  27. عمار جدة كتب:

    الاخ :قرن شطة: والله فعلا في الخارج السودانيين احيانا بي لغتنا الدارجه و كلامنا الغير منمق و العامي بيخلق مشكلة
    معانا واحد سوداني في الكلية غايتو لمن يكون في اجتماع انا محل اخش ما بعرف ..الاجتماع فيهو اساتزة من الاردن و سوريا و مصر و اليمن و السعودية فالزول دا مع انو شخص خرطومي و متعلم ما عندو ادب الاجتماعات يعني بيتدخل في نص كلام الناس التانيين و يعقب علي كلام اي زول و طبعا بالصوت السوداني التخين داك و العبارات العامية الدبشه عينة ناس شنو و براهو و اوريك وكدي دقيقة و كدا و بعدين علي العليهو كلامو سريع و بيتكلم قبل ما يفكر هو حايقول شنو ويضرب امثال و حكم و ايات قرانية مافي محلها الصحيح و تنظير شديد و تطويل في امور لا تحتمل التطويل و بقي محل سخرية و تندر من بقية الزملاء وفعلا كان مثال سيئ للسودانيين و طبعا انا شغال ليهو مترجم لي كلامو الغير مفهوم و لمن اتكلمت معاهو برا الاجتماع عن اسلوبو الغير حضاري دا قال لي لازم تكون مؤثر في الاجتماعات و عندك راي بارز وقلت ليهو بي قلبي والله رايك بارز شديد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s