تكريم الأستاذ الفاتح جبرا

Posted: الإثنين,28 يونيو, 2010 by ودالزبير in اخرى

ولأنه من كان سبباً في أن نلتقي ولأنه يعبر عن شعبنا الطيب بكل سلاسه ولأننا أتفقنا أن نكرمه وهو يمشي بيننا نكرمه ليعرف مقدار حبنا وإعتزازنا به وبما قدمه وما سيقدمه … إخترت أن أكتب ذلك هنا حتى نتشاور فيما ينبغي أن يكون هنا في الهواء الطلق وليدلو كلاً بدلوه … كيفيه إخراج حفل يليق بالمحتفى به …. الدعوات .. البرنامج المصاحب … الهدايا .. الميزانيه … مكان الإحتفال …. ناس بره وناس جوه الليله نرد جزء من دين الرجل على رقابنا … أذكر نفسي وأياكم بقرب موعد شهر رمضان الذي تصبح فيهو الحركه صعبه شويه في ظل إرتفاع درجات الحراره ومعروف إننا شعب ماهل … عليه نرجو أن نشرع حالاً في تكوين اللجان وأن لا ينطبق علينا مقوله لو داير تقتل موضوع كون ليهو لجنه عشان تلجنه

Advertisements
تعليقات
  1. علي سنكل كتب:

    ود الزبير سلام . . .
    دائماً تقرأ أفكار الناس وتحس نبط شارع المدوناتيه ، لك الشكر على طرح الموضوع قبل ما الناس تنساهو.
    جبرا دينو علينا كبيييير وكان الواجب نكرمو قبل ناس الجريده ، فالرجل كان السبب في هذه اللمه الطيبه والعشره النبيله وهو الذي عرفنا على بعضنا البعض وألف بين قلوبنا. الواحد لمان يقرأ في المدونه يحس بأنه بتونس مع ناس معرفه ليها سنين و على الرغم من عدم مقابلتنا للعديد من ألإخوه والأبناء والبنات في هذا الموقع المتميز إلا أنكم أصبحتم جزء من حياتنا الاجتماعية والثقافيه و ( المناقراتيه) ، نختلف في الآراء والطرح والفهم والسياسه والهلال و المريخ إلاّ أننا نظل على قلب رجل ( وإمرأة) واحد- عشان قرن شطه ما يزعل.
    نحن من خارج حدود الأمازون معكم ونطالب باستعجال هذا التكريم. طبعاًناس بلاد بره معاكم( بالشيرات ) ، ونرجو أن يكون على مستوى المناسبه وبي هديتو الماخمج لأسرة الفنان جبرا.

    ويلا همتكم ياود الزبير وعزت وأفليقا وسهيل واسترايكر و البشاوي وكل نشطاء المدونه الذين فاتني ذكرهم.

    حسه تلاقي أبكرون يقول والله الناس دي غير الرحلات ما عندها شغله، حسه مالو لو أجرو ليهم صاله وعملو عشاء كاااارب وجابو نانسي عجاج تغني ليهم؟ المه الفاتت ما غنت كتير. كلها حتكلف كم يعني؟ و يعزمو أصحاب جبرا من خارج المدونه.
    والله يا أبكرون مالو؟ برضه رأي !

  2. نيام كتب:

    سنكل ثرو ودالزبير:
    كلنا مدينون لهذا العبقري الذي كان سببا في اجتماع هذا الرهط…الله ما جاب يوم شكرو…اما ما يخص التكريم ياخي دي عايزة لجان ياود الزبير ما بس نجيب نانسي عجاج و الفاتح بجي و الجماعة بجو….ولا شنو يا افليقا…

  3. السعيد من جديييد كتب:

    سنكل ثرو ودالزبير ثرو نيام : ازييييييييييييييييييييكم
    والله فكرة جميلة شديد وياريت تكون حاجة كبيرة والناس كلها تشارك و زى ما قال عمنا سنكل نجيب اصحاب جبرا من خارج المدونة .
    وياريت الموضوع فى النهايو ما يتضأءل لرحلة

    تحياتى للجميع

  4. طارق أب أحمد كتب:

    ثرو1 ثرو2 ثرو 3ثرو4

    أيه رأيكم نعمل رحله

    ((أب أحمد متقمص شخصيه شايقيه ))

  5. ابكرون كتب:

    اب احمد والله يا مصطفي شوارع ….! خليها رحلة الي مركز القمر بتاعة اتش جي ويلز هههههههههههه….بعدين اعمل حسابك من الشوايقه…..
    نحن مع رأي سنكلوني وناس بره رئيسنا سنكلوني للتنسيق مع زنكلوني بتااااع جوه …..ده جبرا…..
    كسره بي مويه : كان جبتوا بت عجاج بحصل زعل….

  6. ودالزبير كتب:

    شباب

    الكل من دون فرز

    الموضوع أكبر من أن نختصره في رحله فالرحله للترفيه عننا جميعاً والمغزي والمقصود هنا أن نرد الدين لأهله … رأي المتواضع يقول أن نكون لجنيتن واحده ماليه ودي ممكن يتولاها إسترايكر ( لأنه ممكن يضرب بره ملح ) ولجنه للبرنامج ودي برئاسه عزت المرطب وباقي الناس نتقسم على اللجنتين المكان ممكن نأجر صاله بسعر معقول أو ممكن في أي مسرح أو قاعه زي بتاعت الشارق أو بتاعت ناس الخدمه الإلزاميه أو غيرهم .. ممكن نشرك معانا ناس قروب الفيس بوك بتاع أستاذ الفاتح وبقيه المعجبين بالأستاذ من مواقع آخرى البرنامج ده أسهل حاجه كلمتنا ثم فاصل لنناسي لو قاعده في البلد أو ممكن نستعين بالفنان أبوبكر سيد احمد أو أي فنان بيشبه كتابات الأستاذ وأظنكم فاهمين قصدي لحظات التكريم هي أهم مافي البرنامج ودي نفكر في حاجات مبتكره نحاول نطلع من حته القماش والدرع وكده شخصياً هسه ما عندي فكره في رأسي لكن بالتشاور معاكم ممكن نصل لنتيجه مرضيه ..

    السرعه مهمه في الموضوع ده مع الإبتعاد عن الكلفته…. دمتم ودام فضلكم

  7. ياسين شمباتى كتب:

    ود الزبير..سلام..
    يلا سرعة سرعة كونوا اللجنة وانحنا معاكم تب,,وللبروف التحية والاحترام ولاسرته الكريمة..

    ابكرون..سلام..
    والله ياهو مصطفى شوارع..هههههههههه,,طيب ما نعمل لينا لمة خليجية قوية كدة؟؟ فكروا فى الموضوع دا..

    السعيد من بتاع ذاتو..سلام..
    انت كويس!!؟؟؟؟؟؟؟؟؟؟

  8. زووووووول كتب:

    ودالزبير وبقية الجماعه
    السعيد من جديد سلاااام عليكم
    فكره جميله جدا جدا معاكم للباطوس والجاغوس زاتو. بس معترض على نانسى عجاج .جيبو لينا نانسى عجرم ولا اليسا وفى حالة العدم ممكن باسكال مشعلانى ولا بريتنى سبيرز زاتوووو ويا ود الزبير وخالد مدنى زحوا بعيد وخليكم مع اللجان والجان المنبثقه. ولا شنو يا ابكرون .

  9. ودالزبير كتب:

    شباب

    نرجع لموضوعنا الجادي

    إجتماع بكره أو بعد بكره على الأكثر كيف معاكم … الموافق على حضور الإجتماع يجي يكتب لينا هنا أو يتصل والتلفون عندكم .. مكان الإجتماع وزمانه يحدد بعد ما نعرف عدد الحضور … أرح نرمي قدام

  10. ابكرون كتب:

    ود الزبير بوظتها بارح نرمي لقدام دي راعي (كشينا) للالفاظ
    الما عسكريه دي قول مثلا ارحكاكم ولا شنو يا زووووووول

  11. ودالزبير كتب:

    أبكرون

    يسألني الله وأنا بكتبها إتوقعت تعليقك ده أو قريب منه أو تعليق من بشار بنفس المعنى … يأخي الزول بقي لمن يتكيف من نفسه زاتو بفضل خبراته السيابريه وتصدق بعد ما كتبت أرح نرمي قدام وراء مؤمن مسحت الجزء التاني وخليت الأول عشان تبدو عفويه .. ههههههههههههههههههه

    ابو الزفت زاتو …

  12. ابوالجوخ كتب:

    معاكم للطيش و عليكم بى بهايمونبت الفنانة الاثيوبية …. و خلونا من نانسى عجرم و مشعلانى كفاية الشفناه من اللبنانيين و لا شنو يازول ؟؟؟

  13. ودالزبير كتب:

    شباب

    مالكم ركزتوا على الفنانات وخليتو أصل الموضوع .. المهم الضايع ليهو حفله بنعمل ليهو حاجه منفصله وجبجبها للطيش لكن في تكريم هرمنا ده فأعتقد إن غناء لطفي براهو كفايه

    نرجع لموضوعنا أها قلتو شنو على الإجتماع ؟؟

  14. قرن شطة كتب:

    الاخوة الكرام ….ده كلام ممتاز ونحن معكم قلبا وقالبا قولوا لينا وتلقونا ، فالعزيز جبرة يستحق واكثر…

  15. ودالزبير كتب:

    وصلنا وين ؟؟؟؟

  16. حاج أحمد السلاوى كتب:

    محطة البلابل ……

  17. طارق أب أحمد كتب:

    قرار بعمل جمعون الساعه العاشره يوم الجمعه
    الاجنده
    مكان و تاريخ حفل التكريم
    شكل الحفل
    المدعوين
    الاعلام و دعوة محبى البروف عبر المنتديات والصحف ألخ
    أدماج تسويق لبس جماعى مع التكريم
    التمويل أكيد بعد حساب تكلفة اعلاه

    أخيرا لو فاطر ما تخاطر

  18. السعيد من جديييد كتب:

    معاكم للطيييييييييييش يا ود الزبير
    نداء عاجل ود الخلاو بشاوى وسهيل وين الشباب
    الزوووووووووووووووووووووول وعليكم السلام ياخ
    وينك يازول

  19. ابكرون كتب:

    السعيد من تاني : وانا السعيد بذكرهم وانا الذي وُهَب العمر……كيف يا حبيبنا الذي رحل وما ترك خبر
    نتلاقي في التكريم

  20. ودالزبير كتب:

    ابكرون

    إنت قاعد في أمازونيا يا راجل ولا ده شغل سايبر ساااكت

  21. طارق أب أحمد كتب:

    وصلنا وين ؟؟؟؟

  22. حاج أحمد السلاوى كتب:

    الكلاكلة اللفة .. يا طارق .. حد نازل ؟

  23. عزت كتب:

    انت يا حاج السلاوي ماسكا من الكبري…. بس رحلتك ما كانت في محطة البلابل… الوداها الكلاكلة اللفة شنو؟

    عموما الجمعون قالوا في شمبات…. و حاضرين باذن الله

  24. علي سنكل كتب:

    ود الزبير :

    وصلنا وين؟
    ما تخلي المودوووووووع . . . ينوم.

  25. طارق أب أحمد كتب:

    أكد حضوره
    البشاوى ود المهدى عزت أفليقا عبدوش سهيل سترايكر ود الزبير ود الخلا

  26. ودالزبير كتب:

    جمعه مباركه للجميع

    شويه ونتوجه لمزل العزيز طارق اب احمد برفقه الصديق خالد مدني ومن هناك بإذن الله سوف نضعكم في الصوره محدتاجين دعواتكم

  27. السعيد من جديييد كتب:

    ابكرون : والله مشتاقين واسف شديد على الانقطاع غير المبرر بس بالجد كنت فى دوامة سفرية لمن راسى لفالكن عدنا وفى خبر عرس قريب ان شاء الله
    وزى ما بقولو البركة فى الشوفة
    ود الزبير : معليش ما عرفت بى مواعيدكم بتاعة الليلة دى مع انى قاعد فى البيت من الصباح اهش فى الضبان ووصفكم دا فى شارعى لكن البتقولوهو نحن معاكم
    تحياتى للحضور

  28. ودالزبير كتب:

    شباب

    تم بحمد الله إجتماع ناح بمنزل أخونا الأكرم طارق أب أحمد وسط حفاوه غير مستغربه من أهل تلك الدار التي ما طرقناها إلا وكانت أم أحمد تلبي النداء فلها ولكل العائله خالص شكرنا ….قائمه الحضور ضمت الساده د عزت ودالخلا البيشاوي خالد مدني عبدوش سهيل وشخصي الضعيف بعد نقاش مثمر تقرر أن ننقل الحوار للإميل …. يعني الموضوع بقي مشفر هم ناس الجزيره أحسن مننا في شنو ؟؟؟ ممكن نقول كلام آخير هنا في إننا إتفقنا على أن يكون التكريم في شهر رمضان الكريم لمزيد من التسبيك وعشان نندي فرصه لناس بره للحضور في الإجازات

  29. حاج أحمد السلاوى كتب:

    أخونا شكسبير ..وبقية صفوة الأخيار الكرام .. أهل القبيلة الما خمج .
    نشكر ليكم تكبدكم المشاق وعقد الإجتماع إياه ..
    وما دام باب الإقتراحات والتفاكرات لا يزال مفتوح عندنا طلب سغيروووونى نرجو إنو يلاقى عندكم قبول ( بفتح القاف والباء .. ليس ضمهما .. للعلم والتنبيه ) أن يكون التكريم لحبيب الشعب جبرا مع قبائل العيد السعيد ..ما دام تقرر إنو التكريم يكون فى هذا الشهر العظيم لكى يكون العيد عيدين ويمكن يكونوا تلاتة بحضور العديد من الطيور المهاجرة لفضاء العيد بين الأهل والأصحاب ..
    مجرد إقتراح من إندينا .. للتداول فقط لا غير ..ونرضى بحكم الأغلبية .. مش بلد ديمقراطى بدون تزوير ؟…
    وكل عام والجميع بألف خير ..

  30. ودالزبير كتب:

    شباب
    حاج السلاوي

    لا زالت لجنتكم تعمل في صمت …. حتي يري هذا العمل النور … فضلنا أن ننتهي من بعض التفاصيل حتى نرفع لكم عمل مكتمل الأركان ….. بإذن الله قريباً سوف تجدون التصور الكامل لهذا الحدث .. بالأمس تلقيت إتصال من الأخ طارق من قروب معجبي أستاذ الفاتح بالفيس بوك وهم يعلنون رغبتهم بالمشاركه ورددت عليه ن الأستاذ ملك الشعب وهم موضع الترحيب منا وسنخطرهم بكل الخطوات حال إكتمال التجهيزات …. ودعوتهم للكتابه هنا أيضاً …

  31. حاج أحمد السلاوى كتب:

    أخونا شكسبير السودانى ..
    يا ها المحرية فيكم ..وما يتقصروا .. يقصر الملح..
    وحتى تكتمل الصورة لكم التحية..ونحنا من إيدكم دى لإيدكم دى..
    ودمتم ..

  32. ودالزبير كتب:

    لا تزال لجنتكم تعمل في صمت ليري هذا التكريم النور ومبدئياً تم الإتفاق على الأسبوع الأول من شهر رمضان كمواعيد للحفل الكبير الذي ستحتضنه صاله مجموعه دال الفخيمه

    مزيد من التفاصيل في الأيام المقبله

  33. التركــــى كتب:

    ودالزبير أحي اللجنة فى شخصك النشط وأتمنى أن يسير كل شئ على مايرام وفى أنتظار تعليماتكم لمد يد العون والتحرك ان وجب الأمر … مع التقدير

  34. حاج أحمد السلاوى كتب:

    أخونا شكسبير ..
    قابلنا الأخ اب احمد فى جدة ووافانا بالعديد من الخطوات التى تمت فى برنامج التكريم المرتقب ..شكراً ليكم جميعن ..ولكن يبدو إننا ما لنا فى الطيب نصيب بعدم تمكننا من الحضور فى الموعد الذى تم تحديده ..ولكننا سنكون معكم بقلوبنا وأحاسيسنا ..وفى إنتظار توجيهاتكم للمشاركة فى التكريم .

  35. ودالزبير كتب:

    عمنا السلاوي وأخونا التركي

    كل شئ تحت السيطره ويالتركي لازم تجي إجتماعنا الجاي وأظنه يوم بكره مناسب بعد الساعه أربعه عندي في المكتب المهم راح أدور هسه تلفونات عشان نتفق على اللقاء

  36. ودالزبير كتب:

    شباب

    إجتماع مساء يوم السبت 17 \7 عند الثامنه مساء بمقهى إستار بالعمارات شارع 41

    الأجنده تحديد فقرات الحفل والميزانيه لرفع التصور النهائي للإخوه في منتدى دال الثقافي

    نرجو من الجميع الحرص على الحضور والدعوه موجهه للجميع وليست قاصره على أعضاء اللجنه المصغره …. توجد مواصلات بعد الإجتماع

  37. ابكرون كتب:

    دال تستأجر مزارع الضباط المتقاعدين بقيمة (صحن فول) في اليوم
    الأثنين,18 يناير, 2010 بواسطة ابكرون
    ——————————————
    يا جماعة خلواالاجتماع في المزااارع .. يا ود الزبير يااااخ ما عذبتناااااااااااااااا

  38. ودالزبير كتب:

    أبكرون

    الجاتك في مزرعتك سامحتك يا فرده

    المهم أخوانا سهيل وطارق طبعاً شغالين مع الجماعه ديل وهمامن سهل هذا الأمر … إحتسب يا رجل إحتسب

  39. علي سنكل كتب:

    أبكرون
    أضم صوتي لصوت ود الزبير في مسألة الإحتساب وكده.

    لكن يا ود الزبير ما فهمت النص التالي:

    ” الأجنده تحديد فقرات الحفل والميزانيه لرفع التصور النهائي للإخوه في منتدى دال الثقافي”.
    ما دخل ” دال الثقافي” في تفاصيل حفل تقيمه مجموعة ساخر سبيل؟ واللا الحفل دا عاملينو هم لتكريم جبرا؟
    أفتكر من الأفضل أن يكون التكريم بإسم مجموعة ساخر سبيل براها.
    واللا شنو؟

  40. عزت كتب:

    العزيز سنكل
    سلام
    طبعا هو من الأفضل أن لا يشارك أي شخص التاني في عمله و لكن جبرا ملك للشعب و ينفس عن الشعب فما المانع أن يتشارك الجميع في تكريمه مع تخصيصا لمجموعتنا في البرنامج و الهدايا أما الميزانية فهي بيننا و لا دخل لدال فيها… فما دال الثقافي الا منبرا تقام في قاعتهم الفعاليات فهم يقومون باتاحة القاعة و توزيع جزء من رقاع الدعوة لناس المنتدى… أما البرنامج و الموضوع فهو للجهة و هنا (مجموعة ساخر سبيل و جمعية زاد المسير بحسبها ال success story من هذا التجمع…

    كسرة:
    قالو واحد كان مشارك ليهو واحد في بيزنس و قام الشريك طلع عينو بالديون و المشاكل ففض الشراكة و قام مسح اسم شريكه من اسم العمل
    فصارت اللافتة (فلان و حدة لا شريك له)

  41. حاج أحمد السلاوى كتب:

    أبو عصمت ..
    بتجيب لى روحك الهوا .. ما يسمعوك الجماعة .. يقوموا يهدروا دمك ..

  42. ودالزبير كتب:

    الحبيب سنكل

    سلام

    رفع فقرات الحفل لمنتدى دال الثقافي فقط لأن الحفل يقام في قاعتهم وحقيقه هم لم يفرطوا علينا شئ … اليوم قمت بالإتصال بالفنان عمر خليل وهو كما سترون مقلد بارع لمصطفى سيد أحمد ولو وأفق الأعضاء على المبلغ الذي طلبه والذي ساذكره في إجتماع يوم السبت سيكون هو مغني الحفل الرئيسي

  43. علي سنكل كتب:

    إزيك يا د. عزت المرطب
    ما في مانع وأنتم في الداخل ترون الشاشة أفضل من ناس الخارج.

    صاحبناعادل من بلاد المهجر نوى تكملة نصف الدين ، وحدد التاريخ وأثناء ما بشتري في الشيله والذي منه، كان في حالة إتصال دائم مع أهله وأخواته بالذات عشان ما يطبظ في الشيله وكده.
    يوم فجأة قالو ليهو أمك عايزاك في موضوع. رد خير أدوني ليها، وبعد يا ولدي يتم ليك ويوفقك كسرتها ليهو:
    وكت أصلويا ولدي مسوي دا كولو ما نعرس لأخوك الصادق معاك ، مسكين و ما عندو شئ وما بقدر على مصاريف العرس.
    عادل فكر وقدر وقال ليها ومالو نعرس مع بعض يا أمي. وبقت شيلتين بدل واحده وسد مالين بدل واحد.

    الرجل عرس وجا راجع مشينا نبارك ليهو ، شغل لينا الشريط الذي لم يظهر فيه هو وعرسه إلا لماماً، الشريط كولو الصادق مهجج مع عروسو وأصحابو.
    قلنا ليهو عرسك دا مالو غريب كدا؟ فقال والله العرس طلع بتاع الصادق أخوي وأنا طلعت مردوف ساااكت.

    كسره:
    أها يا عزت خايفين على حفلتنا من ذي دا، وبس.

  44. علي سنكل كتب:

    العزيز ود الزبير سدد الله الخطى ، ونحن جاهزين مويه ونور ورهن إشارتكم.
    يكون جميل لو شوفتو ليكم مصور فيديو محترف ، عشلن ما يفوتنا شئ ، تنقلوها لينا صوره وصوت.

    ما بقول ليكم مشكورين ما إنتو أصلكم كدا.

  45. ودالزبير كتب:

    سنكل

    كويس نبهتنا لحته المصور دي لو طارق ما جاء من السعوديه لحدي موعيد حفل التكريم فسنستعين بمصور محترف ولو حضر أب أحمد فهو من ناس الشئ زاتو وحفله توزيع كتاب لبس جماعي تشهد على ذلك ..
    تسلم يا ملك

  46. ودالزبير كتب:

    تذكير بإجتماع اليوم الساعه الثامنه مساء بمقهي ستارز بالعمارات شارع 41 عند الثامنه مساء والعزيز عزت ماقصر رسل صباح اليوم SMS للتنبيه والتذكير .

  47. طارق أب أحمد كتب:

    ود الزبير :

    وصلنا وين؟
    ما تخلي المودوووووووع . . . ينوم.

  48. ودالزبير كتب:

    يا طارق

    يشهد الله أخوك مزنوق مع ناس الضرايب زنقه كلب في حله هوسا وبراك شايف إختفاءنا من كل المواقع والإسكاي بي زاتو … لكن الخير والبركه فيك وفي الشباب … كده نخلص من زبانيه النظام ديل …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s