الحديث السياسى….

Posted: الأربعاء,7 يوليو, 2010 by ياسين شمباتى in اخرى

شاءت ارادة الله ان اكون مشاهدا لحلقة برنامج (مراجعات) الذى يعده ويقدمه الاستاذ /الطاهر التوم,,والذى يبث مساء الاثنين,, ولقد شاهدت هذه الحلقة عندما بثت للمرة الاولى قبيل الانتخابات ومساء اول امس عندما تمت اعادتها,,لاصاب بتقرحات معوية ومعدية وتضيق فى الشعب الهوائية,,واحيانا اصاب بنوبة بكاء تعقبها نوبات ضحك هستيرى !!

فالرجل المستضاف هو اللواء ركن / يونس محمود,,ولا اعتقد ان من يعرف الانقاذ يجهل هذا الرجل وبرنامجه الفج الممج السمج (الحديث السياسى) الذى صاحب انطلاقة ثورة الانقاذ ولم يتوقف الا فى العام ستة وتسعين وتسعمائة والف للميلاد..الشهادة لله ان الرجل مفوّه وملم بالعربية الفصحى,,لكن يأبى الله الا ان يهرف بما يعرف ولا يعرف ويتشدق ويتمشدق بالحروف ومخارجها,,ولقد اصر الرجل على ان لا فرق بين البندقية والكلمة !! فكلاهما يرمى ويرمى به حسب زعمه..ولكن ما اثار حفيظتى ودفعنى الى كتابة هذا البوست انه تحدث عن كرامات وبركات تنزلت على الانقاذيين !! ومنها حديثه السياسى هذا !! ولقد استشهد بان العقيد _آنذاك_ صلاح الدين كرار وهو رجل عسكرى صرف قد تنزلت عليه بركات اقتصادية فصار يتحدث بلسان الاقتصاديين !! وان فلانا صار يتحدث بلغة السياسيين وذاك صار دبلوماسيا رفيعا !! وطبعا كلهم عسكريون اقحاح..ولم يتبق له الا ان يقول انهم هدية السماء لاهل السودان..

حتى ان مقدم البرنامج نفسه اندهش من هذه الخزعبلات,,وعندما صار يكررها قال له :دا وحى ولا شنو!!؟ ما معقولة كل مرة تحيلنى لى غيبيات,,ارجوك خلينى امشى فى الواطة..والغريبة ان الرجل انكر ان حديثه تعرض الى دولة بعينها او سماها صراحة !! وكأننا كنا نياما حينها,,فمن منا ينسى اساءاته المتكررة يوميا عن مصر والسعودية وامريكا ؟؟ اساءات غير مبررة وعودانية فقط..واساءاته هذه قد اثرت سلبا على علاقات السودان الخارجية كما صرح وزير الخارجية آنذاك بروفيسور /سليمان ابوصالح,,ولكنه انكر هذه الثأثيرات ايضا,,وفاجأه مقدم البرنامج انه فى بحث اجراه عميد كلية اعلام اسمه الاستاذ/ ياسر عوض الكريم اوضح ان 63% ممن شملهم البحث يرون ان الحديث السياسى قد اثر سلبا على علاقات السودان الدبلوماسية..

والعجيب فى الامر انه اعترف بان البرنامج كان لا يراجع من اى جهة فى الدولة ولا حتى مدير الاذاعة ولا رئيس مجلس قيادة الثورة,,وهو الرائد آنذاك!! والاطرف انه انكر ايضا ان يكون قد تعرض لمضايقات من اى دولة,,ومقدم البرنامج يبتسم فى خبث ودهاء !! وانا ايضا ابتسم فى خبث ودهاء ومكر …

ونلتقى……..

Advertisements
تعليقات
  1. نيام كتب:

    د.شمباتي:
    لك التحايا و التجلة و الاحترام…اتابع كتاباتك الاخيرة و كانها خارجة من وادي الجحيم …و ملاحظاتك التي تنم عن عقل راجح و قلب شفيف ..ولكني يا صديقي انصحك بعدم الاندهاش و الاستغراش او دعني امنعك ذلك فان مآلاته خطيرة و عمقها قصي فاقل ما تجود به هو امراض (الفجأتن ) من وجع القلب و وجع الضمير…
    فالانقاذيون قوم اشتهروا بالالهام و الايهام معا …ويبدو انه في ذلك الزمان قد تنزلت ملائكة كثر حتي ما عادت تتنزل بعد ذلك ابدا بعد ان حاربت معهم ثم انكروا عليها ذلك…ثم الهمت منهم من الهمت في شتي ضروب العلم جميعا و فنون الخيال ايضا…
    فمن منهم بلا اعجاز …و لا ادري ان كانوا يقصدون من منهم بلا عجز…فطيلة السنين الماضية يدعون بانا موعودون و انا بلد واعد حتي تسربل الجوع منا كل الفجج…,jواغرقت البلاد في اللجج .. ثم اخذوا ينكرون علينا الجوع بحجج و لجج واهية و الغريب ان اهلها ما عادوا يدافعون عنها او ينكرون الاخفاق بل كل من وجد عظمة من بقايا الموائد صار احرص علي عظمته منهم…
    وسيل الاكاذيب و رخيص الكلام ما عاد يسد الرمق ..والذين امتهنوا الكلام حينا من الدهر اين هم؟ فلا ضيف البرنامج المعني و لا ذلك الملهم الدولاري عاد لهم مكان بل الغريب في الامر انهم اعجزوا حتي عجزوا عن العودة الي الديار و سخر منهم القاصي و الداني …(امريكا روسيا قد دنا عذابها ) اما نحن فقد حان الان …
    اما الفتي الدولاري ذو الخبرة في الاقتصاد فاخبره بالله يا طائر القطي بان دولاره قد بلغ شأنا و أي شأن …وانا من شدة علوه و ارتقائه الي عنان السموات ما عدنا نحفل بعليائه الي اين ارتقي…ولكنا دفعنا ثمنا غاليا لالهامهم و ثمنا اكثر لاعجازهم…وقديما قيل شر البلية ما اضحكك…

  2. حاج أحمد السلاوى كتب:

    ولدنا شمباتى ..
    اين هم الآن الذين ذكرتهم من رجال الإنقاذ الأوائل ومن لم تذكرهم ..لقد ذهبوا أدراج الرياح ..وكما قيل فالثورة كالقطة تاكل بنيها ..أين ….واين …واين ؟
    الولاء والبرا من أهم مقومات البقاء فى رحاب الإنقاذ ..وما أحاديث شيخهم الذى علمهم السحر بخافية على أحد ..
    أما الرائد يونس الذى كذب أهله .. فهو لا يدرى ماذا كان يردد كالببغاء فهو كغيره من جهلاء الإنقاذ الذىن جادت بهم السماء على شعب السودان..فإن كان يعى ما يقول فهى مصيبة ..وإن لم يكن يعى ما يقول آنذاك فالمصيبة أدهى واعظم..هذا الرجل الذى كان يؤل الايات القرانية حسب هواه وحسب ما يمليه عليه ضحالة فكره الضيق.. ويحسب أنه كان يحسن صنعاً لمصلحة السودان.تباً له ولأمثاله من أنصاف المتعلمين ..
    ولكن فى النهاية لا يصح إلا الصحيح .. وأن الله يمهل ولا يهمل ..ولكل أجل كتاب .
    قاتل اله المتاجرين بإسم الدين المتسربلين به من أجل مصالحهم الخاصة ..ولبئس ما يصنعون .

  3. ياسين شمباتى كتب:

    الحبيب نيام..سلامات..
    ومرحبا بك وانت عائد بقوة الى اهلك واحبابك فى المدونة..والله ان الاستغراب والاندهاش صارا من علامات الانقاذيين,,فلا حياء يمنعهم ولا خوف من الله يردعهم,,وحقيقة هذا الرجل ممن امنوا العقوبة فاساءوا الادب,,واى اساءة واى وقاحة,,بكل جرأة يتكلك عن الالهام والايحاء الربانى.
    والغريب انه عندما سئل عن ابعاده انكر انه ابعد بل انه رأى وارتأت القيادة السياسية معه ان لاحوجة للحديث السياسى!! بالله عليك كيف يستقيم هذا الامر ونحن محاصرون اقتصادسا وعسكريا وسياسيا ؟؟وشبح الانفصال يتراءى لنا واوكامبو بالمرصاد وانتخابات مرت وجرت المصائب..متى يريد ان يتكلم هذا الدعى وهو الذى ملأ الارض ضجيجا حين قدومهم؟؟ ولا ادرى باى ذنب ابتدر امريكا وروسيا بالسباب؟؟ ثم تصافت النفوس وصارت روسيا حليفة وامريكا راعية السلام!! تبا للسياسة عندما تحط من قدر الرجال,,وتبا لرجل لا يرعوى عن الكذب امام التأريخ..
    لكنها شيمة من جاء بليل,,فماذا يرجى منه؟؟

    شكرا كثيرا للمرور وخليك قريب يا حبيب..تحياتى واشتياقتى لارض المحنة..

  4. ياسين شمباتى كتب:

    الوالد السلاوى..سلام..
    صدقت اذ ذكرت انهم ذهبوا ادراج الرياح,لكنهم ليسوا من جادت بهم السماء,,بل هم من رمت بهم السماء شعب السودان لينظر الله هل يصبروا ام يجزعوا ؟؟؟
    وهم كالنار تأكل بعضها ان لم تجد ما تأكله,,بالله عليكم اين المدعو الطيب ابراهيم محمدخير؟؟ لقد سمعنا الكثير عنه لكنا نرتجى ارادة الله فى كل من عذّب ومن كذّب باسم الدين.. اما كبيرهم فلا اجد له مثلا فى كتاب الله الذى الرجل الذى آتاه الله برهانا وعلما لكنه ابى الا اتباع هواه,, فصار لاهثا فى كل الاحوال !! ولسه ياما نشوف فيهم يوم باذن الله…

  5. أيها الشعب السوداني البطل
    نحن لا نخشي اوكامبو ولا الانفصال ولا الحصار
    ولا دكتور شمباتي ذاتو
    زواركـ يا شمباتي ما خلونا لينا حاجه في اي حاجه
    بس ما زال الثقل يؤثر مركزيا علي ظهر محمد أحمد عبدالدافع طواااالي
    الله في

  6. ياسين شمباتى كتب:

    عبدوز الحبيب..سلام..
    وطبعا كلمة البطل دى اتحولت لى (الفضل) لكن يوسف عبدالفتاح حولها لى (العسل)!!! ودا عطفا على المدينة الرياضية وكدة..
    اما ظهر محمداحمد فلقد اصبح كمرآتنا المحدبة آنفة الذكر..ولك الله يا وطنى الجريح…

  7. ابكرون كتب:

    شمباتي :
    تعرف انت براااك بتجيب المرض لي روحك الريموت ده و800 قناه ليه سوووهم ….؟انا شخصيا عندي لسته من هؤلاء لو بحكوا عن (قطر الندي في بل الصدي) بحول. بستخدم الريموت من ما اشوف الخلقة…. خاصة الشخصية دي لو برتل بفتش قناة ترتيل غيره ، يا اخوي الصحة غالية فما تمرض نفسك سااااااكت .

  8. ابكرون كتب:

    علي ذمة سودانيز اون لاين (عذرا شمبته)
    ———————————

    الطيب مصطفي ملحق أعلامي بدمشق والصادق الرزيقي في بيروت بنفس المنصب !

    أفادنا مصدر مطلع أن الطيب مصطفي خال الرئيس صدر قراربتوجيه رئاسي لوزارة الاعلام بالتنسيق مع الخارجية بأن يكون الملحق الاعلامي بسفارة السودان دمشق والاستاذ الصادق الرزيقي رئيس تحرير صحيفة الانتباهة كذلك ملحقا أعلاميا في سفارة السودان ببيروت
    ولقد تم التشاور وأتخذ القرار وبلغ كلاهما منذ الساعة العشرة صباح اليوم

    الكل هنا في الخرطوم مندهش ولا يعرف هي مكافاءة أم عزلة عن الساحة السياسية الداخلية عقبال أسحق أحمد فضل الله

  9. محنك كتب:

    انت ما عارف الانتباهه وقفوها

  10. ابكرون كتب:

    عارف يا محنك فالسؤال هل هي ترضية؟؟؟؟

  11. محنك كتب:

    ما برفعولها الضو ، اكيد ترضية ما تجى نزعل منهم يا ابكرون ؟

  12. ياسين شمباتى كتب:

    ابكرون…سلام…
    والله قلنا نشوف محنهم,,ولازم نفضحهم ونكشف كذبهم وزيفهم للما كانوا حاضرين على الاقل…بعدين انا كنت مستغرش شديد للجرأة بتاعتو,,صحيح الاختشوا ماتوا !!!
    اما عن الطيب مصطفى وانتباهته الغافلة فان هى الا حركة افعوانية فى شكل جزرة من اجل اظهار الحرص على الوحدة,,ولكن ولات حين مناص وقد سبق السيف العذل..وهى مكافاة ولا شك,,غايتو الناس ترتاح شوية من السخف والقرف الاعلامى بتاعهم الاتنين..

    محنك…سلام..
    تزعل من شنو وتزعل من منو!!؟؟

  13. محنك كتب:

    مش كل من يزعل برضوه هسى لو انا وابكرون زعلنا باقيلك هينه كدى ؟

  14. حاج أحمد السلاوى كتب:

    سزداننا يا بلد الترضيات والمجاملات ..
    كل من حمل السلاح ختوهو مساعد الرئيس ..
    كل من دعا للإنفصال سوهو ملحق إعلامى ..
    أنا غايتو عندى زعلة الأسبوع الجايى ( اسبابها عارفه ابكرونا )..ما فى زول يرضينى..إن شاء الله مسيار .
    وخلونا النشوف آخرتا شنو !!!

  15. عزت كتب:

    شنباتي و زواره سلام

    ما مضمونين أخوي محنك يقومي يرضوكم برجوع قسري للخرطوم… و أكيد حنكون مبسوطين من ترضية هكذا….

    عارف يا شمباتي نحن كان معانا دنماركيين في فترته القاحلة بالاذاعة و ظبتوا لينا برنامج حبيبك لكلية البيئة في جامعة أمدرمان الأهلية عندما كنت أعمل معهم محاضرا صارت هناك توأمة بين جامعتنا و جامعة دنماركية و يتيح البرنامج تبادلا للخبرات و التأهيل ما بين الدولتين و حددو المشرفين و من هنا و هناك و جابو جنريتر حبيبك دعما للكلية و سيارة دفع رباعي و شوية فكة معتبرة للبرنامج كفتح خشم … و قالوا التقيل ورا
    أها نحن خرمنا اضنيننا و فصلنا البدل و قلعت الدبلة… و منتظرين دورنا في الزيارة للدنمارك…
    يقوم (المطرطش يونس) يطلق عليهم دويلة الدنمارك… التي ما خرجت من السودان و قفلت سفارتها الا للضوائق المالية التي تمر بها….

    و من ديك و عيك…… لا طلنا جبنة الدنمارك و لا حلاوتها…!!

    و ما حكاية (فهد المروض) ببعيدة و ما ترتب عليها و لا (الفرعون) و القائمة تطول و أشدها ايلاما بالنسبة لنا وصف ضباط 28 رمضان بما لا يليق…..

    يمهل و لا يهمل

  16. علي سنكل كتب:

    الحبيب شمباتي سلام . . .
    ذي ما قال أبكرونا ما تجيب لنفسك المرض ،ولو إنو أنا ذاتي مريت بالتجربه المرضيه دي ، لكن بالصدفه.
    كنت بين نايم و صاحي التلفزيون شغال و فجأه أسمعو قال إنو ما أساء لأي دوله وإنو بدخل أي دوله بدون مشكله ، النوم طار من عيني وقفزت على حيلي لقيت المذيع منطط عينو ومستغرش مع إبتسامه خبيثه.
    أنا ما استغربت ، لأنو لحس الكلام ما جديد عليهم من كبيرهم الذي علمهم السحر.
    وبعدين ما تسمع كلامو بتاع ما في زول كان براجع “الحديث السياسي ” دي ما بتمشى علينا. لأنو دا كان تنفيذ أجنده إيرانيه وما أظن إيران تخلي أجندتها لهذا الرائد الملهم الذي تنزلت عليه بركات السماء كما تنزلت على صديقه الاقتصادي الفذ صلاح دولار.

    دا كلو هين الكلام نشاط الشيعه في السودان عن طريق الملحقيه الثقافيه الإيرانيه. دي القنبله الموقوته التي ستحول السودان لعراق آخر في القريب العاجل.

  17. ودالزبير كتب:

    أبكرون
    أسحق أحمد فضل الله

    لا يأخي ده كاتبي المفضل

    المهم نرجع لموضوع اللواء يونس

    هل صحيح القصه الشائعه إن السعوديه كانت قد إعتقلت الرجل عندما دخلها معتمراً وتم تعرضه هناك للإغتصاب وهتك العوره … هي إشاعه لو صحت فعلى هذه البلد السلام … يمكن أن يكون أعداء الرجل روجوا لها ويمكن أن تكون قد حدثت له مضايقات .. لكن إغتصاب .. ألا ترون غن هذه إشاعه أكبر من اللازم ومن الصعوبه بمكان لرجال عساكر أن يقبلوا بهكذا إهانه خصوصاً إن الثوره يهمها رجالها أكثر من علاقتها مع الدول ولا شنو يا شباب

  18. حبيبنا شمباتي والصحبة الكريمة سلام
    بالصدفة فتحت القناة اياها ووجدت نذير الشؤم ومضيفه الخبيث. لم اصدق ما رأيته!!! معقول تاني يونس ؟!!! لم اصدق قلت اشوف قناة تانية مشيت لشمس السودان التي لا تغيب قناة الشروق (طبعا السودان ما كان عندو شمس قبل الشروق) لكن ما لقيت السودان لقيت مذيعين ومذيعات ذي القمر ما شاء الله معقول دا السودان ؟ طيب الناس الشينين والمقطعين ديل جو من وين؟ لكن يا خسارة المذيعة السمحة قالت نلقاكم الساعة ايه ما عارف بتوقيت مكة. مكة مرة واحدة ! طيب ليه ما امدرمان؟
    المهم غيرت القناة مشيت لقناة زول وطبعا زول دي اكيد حقتنا لانو مافي زول في الدنيا دي غيرنا. لقيت ولد ابيض وشعرو سبيبي ومعاه بت حليوة ما عارف من وين قالوا ايه قالوا بناقشوا في مشاكل الشباب السوداني. معقول آخر الزمن يجي الشوام والمغاربة يناقشوا مشاكل السودانيين!!!!!!!!!!!
    يا دكتور الحقنا قبل ما يطق لينا عرق. شوف لينا اي حاجة اي دوا يشيل من ذاكرتنا انو نحنا سودانيين.

  19. نيام كتب:

    ودالباشا:
    اصلو الحكاية يا باشا ابتدت يووم ما استوردوا بتوع حلويات قلنا معليش ما ضروري اصلو نحنا زهجنا من الباسطة و البقاشة فخليهم يغيروا لينا شوية فقاموا استوردوا مزارعية جناين قلنا و مالو ما احنا محتاجين خضار غير الخدرة و ملاح الورق بعدين قاموا استوردوا سواقين باصات قلنا احسن اصلو سواقننا بعملو حوادث كتير و الشعب الفضل عزيز علينا احسن نحافظ عليهو عشان نعذبو… فقاموا جابو مذيعين و مذيعات بغلغلو الغين غلغلة و يقلقلونا قلقلة اما الجيم و القاف فعلي قفا ما يشيل و بعدين حلوين و بقولو بأأأه و كمان بقولو شو ما بدك طال عمرك…عايز شنو احسن من كده يا باشا..فاضل يجيبو شعب ظريف خفيف ما ببزق التمباك في الشوارع و بعدين بدل ما يسلّم “اوه كيف تمام ” يسلّم “تسلم تسلم طال عمرك”…وبعد داك نلعب في كاس العالم مع اسبانيا و نغلب المانيا بس و خلاس…

  20. aflaiga كتب:

    الحبيب شمباتى : اسفين على التاخير بنحضر لمامورية اصلو شهر سبعه جا وهو موعد اللفه بتاعة الاقاليم التى سنبداها باقليم حبيب فيهو ناس حلوين عزاز علينا شالو نوم عينينا …
    تعرف يا شمباتى اى زول بستلم اى حاجه جديد بيحب يورى الناس انو عندو جنون وفنون اها الانقاذ قضت جوء كبير من عمرها بتورى فى الناس جنونا والحمد لله الفتره الجايه عاوزه تورينا فنونا !!! فناس يونس ديل كانو من اليات جنونا واسى ناس السموؤال خلف الله ديل ناس فنونا !!!
    مع انو فى بعض ناس فنونا عملو نيو لوك وعاوزين يبقو ناس جنونا والعكس الا ان ذاكرة الشعب الحديديه اثبتت انها لا تنسى !!!
    اسى عليك الله لو كان فى مداخلات بالتلفون فى الحلقه ديك وقام بس نصكم ضرب وقال الكتبو هنا تانى الظاهر ساتى ( ولا هو الطاهر ساتى ) كان بيجى ماشى بى شارع النيل تانى ؟؟؟؟!!!
    فقط افهموا الا حقيقة او نفاق لا وثيقة لا اتفاق تخفى على الاطفال عورة من دفنتم من رجال …

  21. aflaiga كتب:

    ابكرون ثرو الوحدويه : اها كيف ليكم الناس ديل لو عاوزين وحده يفقلو شارع النيل ذاتو مش الانتباهه ولو عاوزين انفصال على بالطلاق خمسه دقائق يخلو سلفا يقول يا فكيك !!! هيععععععععع .
    عزت : سبحان الله مع ان افظ من تحدث عن شهداء رمضان لم يستطع سوى الانحناء لقاماتهم السامقه ووصفهم بالمعارضين الانقلابيين فقط يا زول الناس ديك ما كان فيهم كلمه سوى انهم فقط حاولو يقلبوها وهى سخنه . رحمهم الله . اسى لاقاك زول بيقلب حاجه وهى سخنه ما بتحرقو ؟؟؟ وتيب !!

  22. ابكرون كتب:

    ود الزبير : يااااخ (اسحاقك ده) والله وشو المجلد ده بعمل لي وجع صره اعوذ بالله من خلقته وكتاباتو زي الطراش …
    افليقا:الانفصال قادم قادم مش لو قفلوا شارع النيل لو حولو مجراه مش لان الجنوب عايز كده، لانهم السبب في هذا التمزق ولسه……..!

  23. ياسين شمباتى كتب:

    محنك…سلام..
    والله زعلكم صعب والرضوة بتبقالنا حااااااااارى !!!

    ابوى السلاوى..سلام..
    زعلة برضك!!؟؟ على مين الكلام دا يا مرسى..دى فرحة وزغططة ما بعدها,,وكان على الرضوة الكرنتينة فى !!

    د.عزت..سلام..
    قلت زولك طفش البلى ؟؟ طبعا انكر برضو فشلو الذريع فى صحيفة القوات المسلحة وانو ابعد الى شرق السودان…وانا بس نفسى اعرف الجماعة دييل فى الوقت داك كان بفكروا بعقلية منو او شنو!!؟؟ لانو حركاتو دى زى قعدات الجبنة بس..
    كسرة: قلت لى قلعت الدبلة انتظارا لتطبيق التجربة الدانماركية؟؟ عفيت منك آ الكلس..

  24. ياسين شمباتى كتب:

    الحبيب سنكل..سلام..
    عليك الله شفت المقدم بتاع البرنامج بحلق فيهو كيفن لما انكر حكاية المضايقات دى؟؟ بعدين الدهشة والتعجب كانوا باينااااااات لمن انا خجلت ليهو..
    اما عن اجندة ايران الخفية والبائنة منها فلقد تحدث العقلاء عنها كثيرا,,لكن الحكومة رااااااضية شن دخل القواضى؟؟
    وفعلا لحس الكلام ولحس الكوع مباريهم ومحمدهم..وما الحلايف والايمانات المغلظة والطلاقات ببعيد عن اسماعنا..

    ود الزبير..سلام..
    والله علمها عند ربنا,,لكن مالوووووو سكت من سيرة السعودية بعدداك !!؟ اما الحكومة فلا يهمها شئ ابدا,,وفى تقديرى انه اصبح من رجالات الصف الثانى فى اولى سنوات الانقاذ ان لم يكن فيه قبلا..

  25. ياسين شمباتى كتب:

    ود الباشا..سلام..
    والله دواك دا صعب بالحيل وما عندك غير لواكة الصبر !! (لوك القرضة وامسك فيه..مؤتمرك الوطنى ما تخليه)…اما عن نذير الشؤم فيخاجلنى احساس انه قادم مرة اخرى ,,فهو كالبوم لا يظهر او ينعق الا عند وفى زمن الخراب..
    لكن المذيع وخباثتو ممتازين,,خسوسا لما يعصر لى الجماعة اياهم…

    نيام..سلام..
    والله انت مبسوط خالس!! لكن خف على بسطتك دى شوية…والله لو ليهم مراد يبدلونا بى عدة !! حسبى الله عليهم..

    ابكرون…سلام..
    (والله وشو المجلد ده بعمل لي وجع صره اعوذ بالله من خلقته وكتاباتو زي الطراش)..بس خلاس..

  26. ياسين شمباتى كتب:

    الحبيب افليقا..سلام..
    ربنا يعينك ويوفقك فى كل خطوة..اما عن الجنون فالجنون لسه متواصل وشكلو حنشوف عروض ختامية..والانفصال قادم لا محالة..والجماع ةبعد ما كانوا بيتكلموا عن وحدة جاذبة بقوا يتكلموا عن انفصال سلمى وبعدداك قبلوا على الجوار السلمى!! دا انا بعتبرو استسلام عدييييل ورقاد رز..
    كسرة: دا ياتو اقليم الموتبك كدى دا ؟؟

    كسرة تانية: يا بحر قم..حرك تحرك..

  27. زووووووول كتب:

    شمباتى سلااام
    كان الحديث السياسى فى بداية الانقاذ من اشهر البرامج الاذاعيه . كان الناس يحرصون عليه ويتسمرون امام المذياع (ههههههه) .
    اقنعت الاله الاعلاميه السودانيه مواطنيها الاعزاء بالاستمتاع بشتائم محمود للحكام العرب . وكان محمود لا يرعى فيهم الا ولا ذمه .
    لكن الغريب حقا انه وشنان وقيقم انزووا من المسرح السياسى ومن المسرح السودانى زاتووو . فتم تطفيشه الى كسلا واصبح رئيسا لنادى الميرغنى . لم يوفق معه فهبط الميرغنى الى الدرجه الاولى بكسلا (ههههههههههه) .تمت ازاحته من رئاسة النادى ولا ادرى اين هو الان .
    كسره : بالنسبه للانتباهه نقول حسبنا الله ونعم الوكيل . وكفانا شر العقليه الانبطاحيه .ومبروك للحركه الشعبيه التى لا تزال تحتفظ بصحفها خرتوم مونتر وسيتزن واجراس الحريه . غايتو الله يسهل

  28. بنات كتب:

    الف شكر يا خوي علي هذا البرنامج كنت بدور عليه من فترة ويكون بنفس

  29. شاعرنا الكبير نيام
    يعني حتى باقي الشعب الفضل دا عاوزين يكملو!!!
    لكن لو جيت للحق دا ما شعب يستاهل الحياة دا شعب اصبح الجبن طابعه والخوف ديدنه وكأني بالشابي كان يقصده عندما قال :
    كل قلب حمل الخسف وما مل من ذل الحياة الارذل
    كل شعب قد طغت فيه الدما دون ان يثأر للحق الجلي
    خله للموت يطويه!… فما حظه غير الفناء الأنكل

    وقال أيضا:
    فالزم القبر، فهو بيت شبيه بك في صمت قلبه وخرابه
    واعبد “الامس” واذكر صورة الماضي فدنيا العجوز ذكرى شبابه

    شمباتي يا حبيب
    المذيع الخبيث فعلا عصر عليهو كتير لكن دا كلوا تبادل أدوار وكلهم أفاعي لا دين لا حياء لا أخلاق
    يلا نقرأ الفاتحة على باقي الشعب الفضل وندعو الله أن يرزقهم بالحور الجنان في دنياهم الأخرى لو ما مشوا النار

  30. الباكرابى كتب:

    اكتر حاجة حيرتنى انو مافى فرق بين الكلمة والبندقية

  31. عمار جدة كتب:

    من المصايب المتعاظمة علي هذا البلد المسمي السودان ان الله ابتلاه بساسة يمتازون بصفة الغباء السياسي اذا ما قارنتهم بكل ساسة البلاد المجاورة عربا و عجما وهذا الغباء دائما ما قاد ويقود بلادنا الي المصائب ويدفع الوطن و الشعب فاتورة هذا الغباء من سوء علاقات خارجية نحن في امس الحاجة اليها و نسي او تناسي هولاء الاغبياء بان العالم يري و يسمع وله زاكرة لا تخطئ فمن الصعب انكار و لعق ما لفظته الالسنة من بذاءات .وكما قال ( افليقا ) ذاكرة التاريخ لا تنسي وهنا تكون الفضائح و الاكاذيب التي يعلم حقيقتها القاصي و الداني ويستمر قادة الانقاذ في سقوطهم في مستنقعات الكذب و الانكار

  32. حاج أحمد السلاوى كتب:

    السادة صفوة الأخيار ..أهل القبيلة..
    مشكلتنا إنو معظم ساستنا يعاملون الشعب وكانه مجموعة من قطيع أغنام أو أبقار وكل واحد فيهم يفتكر إنو هو عبقرى زمانه والسياسى الوحيد الذى لا يُشق له غبار ولا يخطىء . أما جماعة الإنقاذ سابقاً( بإعتبار أننا الآن نعيش العهد الديمقراطى الثالث ) فقد أتوا وفاتوا كل الذين سبقوهم وعاثوا فساداً بإسم الدين ( والدين منهم براء).
    وهل يظن السيد الرائد يونس الذى كذب أهله( المقولة تقول الرائد الذى لا يكذب أهله)أن الناس سوف تنسى ما قاله وتلفظ به جهاراً نهاراً وبعلم رؤسائه ويأتى الآن ويحاول إقناعنا أنه لم يشتم ولم يسب أحد..إلا أن يكون قد قام بإتلاف كل التسجيلات الإذاعية قبل أن يظهر على شاشة التلفاز بالإتفاق مع مقدم البرنامج ..ألم أقل لكم أنهم يعاملوننا كالأنعام ؟
    ولا يسعنا إلا أن نقول له ولأمثاله من جهلاء الإنقاذ .. الإستحوا ماتوا … من زماااااااااااااااان.

  33. ياسين شمباتى كتب:

    زووووووول…سلام..
    عليك الله الكان بيسمعو منو؟؟؟ فى زول عاقل بسمع الشتائم والسب والاسفاف دا !؟؟؟ اما عن دوره الآن فهو رئيس قسم التوجيه المعنوى… وهو وامثالو من المطبلاتية بظهروا فلاى فترة وبعدداك يرموهم,زى حاجة كدة ما عايز اذكرها !!! بس الله ما يقطع ليهم عادة..
    والانتباعة وغيرها من صحف الاجرام كان من المفترض اغلاقها ومحاسبة منسوبيها قبل سنين,,وعقبال الدار وكل جرايد القطيعة والنميمة..

    بنات…سلام..
    البرنامج ياتو!!؟؟ مرحب بيك وما تقطع الطلة..

    الباكرابى..سلام..
    وشرفت المنتدى…شفت المحن البقول فيها الراجل دا !!؟؟حسبى الله عليه..

  34. ياسين شمباتى كتب:

    ود الباشا..سلام..
    والله صدقت وصدق الشابى قبلك..الفاااااااااااااتحة..

    عمار جدة…سلام..
    وما زال الرجل يبكذب ويتحرى الكذب حتى يكتب عند الله كذابا..ولحس الكلام ما جديد عليهم زى ما قالوا الاخوة,,اسه يومتها زولك د.مصطفى عثما نما نكر شتيمتو للشعب السودانى حطب!!! مع انو مسجلة بصوتو لصالح صحيفة الشرق الاوسط!! غيتو عالم عجيبة بشكل..
    وخليك قريب يا حبيب…باذن الله نتقابل مساء السبت….

    الوالد السلاوى..سلام..
    بل هم اضل سبيلا…والله والله اليوم اليفوتوا فيهو من الحكم الا ينتحروا,,لانو المدكن كتييييير والبر لا ينسى والذنب لا يبلى والديان لا يموت,وكما ادانوا سيدانوا..

    كسرة: اها لسه ما زعلت عشان الرضوة؟؟

  35. سهيل كتب:

    شمباتي الحبوب .. نأسف للتأخير

    والله كلام ابكرون صاح .. مالك جالط نفسك و جالطنا معاك .. يافرده نحن شعب يحب الألم و إجترار القبيح من الماضي و نحب الساحه في مذبلة التاريخ .. هسي المذيع دا في داعي يتور نفسك و يفقع مرارتنا معاك و يمشي يجيب لينا الرائد يونس يعني خلااااااااص مافي غيرو ؟؟ اصلا يا سيدي لا صلاح دولار و لا الطيب سيخه ولا اكبر راس فيهم كان يعمل بمهنيه .. كان كل الشغل إرتجاليآ و هذه هي النتائج .. يعني هم يخموا و نحن نصر ( بضم الصاد) ..

    ولا في زول عندو راي غير دا .. ارشكم ؟

  36. ياسين شمباتى كتب:

    سهيل العريس..سلام..
    والله هو فعلا فقع,,لكن ما باليد حيلة,,وزى ما ذكرت وكررت انو عندى احساس قوى انو الرجل دا عائد تانى!! ووافقنى على كدة نادوس فى موقع آخر مدللا ومؤكدا عودته عند حدوث الانفصال…
    اما عن انهم يخموا ونحن نصر,,فيمكن ان تقرا بضم النون وفتح الصاد !! وفتح النون وكسر الصاد من صرير!!! المدلله على كل حال..
    اما عن الرش فالله يقدرك على فتيل الرش وبخة اللبن..ابشر بالخير يا حبيب…

  37. حاج أحمد السلاوى كتب:

    مون آمى ..
    ما فهمنا حاجة ..
    دا إضراب ..ولا إعتصام ..ولا شنو ؟

  38. DAKEEN كتب:

    ايها الشعب السوداني العسل ، النباح جاي يكمل الفضل ، وياكل من بيت النمل ،
    دحين بيت النمل فيه ديك ،،،
    قال كرتي معاي ، وانا السواي ، والبليلة فايرة والحمارة عايرة والحشاش يملا شبكته وشبكة الشعب العسل طاشة ليها زمن ،، وبدت تجمع عشان كدا لازم ندخل بقوة التشويش اللساني ،،، واللانساني ونخليها لافي العير ولا في النفير .
    يا شعب يا عسل عندك ديك ولا اجي اصحيك ….

  39. ياسين شمباتى كتب:

    مون..سلام..
    قلتى كدة اخير؟؟

    دكين…سلام..
    هو قالوا كدة!؟؟ الليلة شكلك سمك فاير وموتب تب..وينك وين طلاتك؟؟وخليك قريب يا حبيب..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s