هزة ارضية فى الخرطوم

Posted: الجمعة,9 يوليو, 2010 by استرايكر in اخرى

قبل قليل وانا اتناول الافطار ( متاخر شوية كان) اذا بارتجاج خفيف استمر لعدة ثوان – لكنه كان كافيا لتتحرك بعض الصور  المعلقة فى الحائط وبعض الكبابى التى بها مياه فى الطربيزة – فى البدء اغتقدت انها طائرة قريبة تقلع او تهبط لكن صوت الارتجاج كان مختلف – خرجت للشارع فوجدت الحى كله فى الخارج – عندها تبينت انها هزة ارضية.

Advertisements
تعليقات
  1. يا ناس الخرطوم الباقين الموضوع ده برضو معاكم حصل ولا شنو ؟؟

  2. خالد المنصوري كتب:

    والله نحنا في الثورات ما حسينا بالكلام دا يكون بس حاجة انفجرت قريب منكم

  3. عيسي كتب:

    نعم أنا ساكن في الخرطوم بحري بالطابق الخامس و كانت الهزة أوضح و أنا جالس علي الكرسي فوجدت الكرسي يتحرك فشككت وقلت ربما يكون احساس داخلي بالدوران و لكن في نفس الوقت كان كانت الهزة عند الجيران ,,,,

  4. محمدالطيب المامون الطيب كتب:

    السلام عليكم ورحمةالله وبركاته
    ياجماعة عليكم الله احكو لينا بالتفاصيل عن الهزة الحصلت دي أي زول عندو معلومة رجاءا أن يأتينا بها
    وشكرا

  5. طارق أب أحمد كتب:

    سترايكر و الأحباب
    جمعه مباركه

    يخيل لى أن الهزه فى منطقة جنوب الخرطوم فقط
    تلقيت مهاتفه من صديق يسكن الصحافه بهذا الخصوص و عند سؤالى للأبناء فى البيت فى بحرى أكدوا لى عدم أحساسهم بأى أهتزاز عدى واحده شعرت بإهتزاز خفيف جدا ولم تبالى به

    أها يا ناس الخرتوم بكان الطياره بتقوم و الرئيس بنوم فتشوا على الشى الجايب ليكم الكج

  6. محمدالطيب المامون الطيب كتب:

    نسأل الله السلام لبلادنا من كل سوء وجميع المسلمين نسأل الله لهم السلامة في كل مكان وزمان

  7. محمدالطيب المامون الطيب كتب:

    السلام عليك يا استاذ طارق وجمعة مباركة الحكاية دي ماليها أي دخل بي أي زول دا أمر من الله سبحانه وتعالى ليس لرئيس أو سواه أي دخل في هذا

  8. wee كتب:

    في الطائف الهزة موجودة

  9. ابو كريم كتب:

    فى حوالى الساعة 2:45 مساء اليوم حدثت هزوة خفيفة لمدة 5 ثوانى بالتقريب

  10. شكرا للجميع – ويبدو ان الهزة قد عمت معظم الخرطوم – وانا كانت اخف فى مناطق اخرى – ويبدو ايضا وحسب ما ذكر من قبل الاخوة انها لم تستمر مسافة طويلة.
    استمرت ثوان وكانت محسوسة للبعض بهزة بسيطة فقط – لكن احد اقربائى فى الصحافة ذكر لى بانها كانت قوية لدرجة حدوث تشقق فى احد حوائط الغرف بالمنزل.

  11. فعلاً كانت هنالك هزة خفيفة بحيث اصابت زوجتي بالغثيان وهنالك مروحة حائط كادت ان تقع وهذا وقع بعد صلاة الجمعة 9/7/2010

  12. mosab كتب:

    نعم عندنا برضو حصلت وانا اسكن بالشجرة وحصلت بعد صلاة الجمعة

  13. فعلا والله حسينا باالهزة وبعض من اصدقائي حسو بيها في أحياء تانية، عاد الله يستر علينا ويحفظنا جميعا

  14. A. A.A.A.H كتب:

    Yes there was an earthquake in Bahri .. As i think its 1- 3 Richter degree.. But we have to take care of the rebound quake …

  15. طارق أب أحمد كتب:

    ابو كريم
    حمدا لله على السلامه و لو الهزه بتظهرك كنت هزيت ليك الدنيا بي أيدى شان تظهر وياريت ما تنقطع تانى

    محمد الطيب
    و نعم بالله بس نسوى شنو ما بس بنضرب الغم بالفرح

    مصطفى عوض
    حدد موفعك الجغرافى
    أما غثيان المدام دا سبببو تانى و مبروك مقدما

  16. ابو كريم كتب:

    نظهر اشاء الله بس بدون هزاات ارضية

  17. هيثم عبد اللطيف كتب:

    انا ساكن اركويت وقد احسست بالهزة الخفيفة التي لا تكاد ان تزكر ربنا قدر ولطف واللهم الطف بعبادك

  18. ابو كريم كتب:

    يالمنااسبة تاانى السااعة 4:22 م اتكررت بى صورة اخفه حواالى ثانيتين

  19. حاج أحمد السلاوى كتب:

    دا كووووولو عرفناهو ..ما فى زول من المسئولين أدلى بأى تصريح .. لحد الان ..ولا ما فى زول جيب خبر ..يكونوا مشغولين شوية يوم الجمعة ..
    ربنا يحفظ البلاد والعباد..وما ننسى إنو الأشياء دى تاتى كعقاب ربانى دون شك..وليست إعتباطاً.

  20. يسن كتب:

    السلام عليكم
    انا في سوبا غرب والهزة موجودة وظهرت بعد صلاة الجمعة خفيفة لكن كافية عشان تظهر

  21. حاج أحمد السلاوى كتب:

    إنتو ما ملاحظين يا جماعة الخير إنو الهزة الأرضية دى أظهرت العديد من الإخوة المدونييين الجدد( وكلهم من الجنس الذكورى .. ) لاكين ما شايف زول رحب بيهم أو اداهم ريق حلو ..يمكن الهزة تكون شغلت الناس شوية عن الترحيب بالقادمين الجدد.
    على أى حال نيابة عن مدونى الدتخل نرحب بكل أخ جديد مشارك فى مدونة سوداننا ونتمنى ليهم إقامة طيبة دون أى هزات إرتدادية ..

  22. ابكرون كتب:

    سلاام
    استرايكر ربنا يجفظ الجميع
    الشي الانا بستغرب ليه في نحو10 اسماء جديده علي المدونه جو مع الهزة الارضية دي ولا ما ملاحظين ؟؟؟؟؟؟عموما مرحب بيهم

  23. ابكرون كتب:

    هههههههههههههه
    سلولو تعليقنا نزل مع بعض وما شفته حقك الا بعد ما عملته سند مش شي غريب

  24. شوفو بقي .انا بقي كنت قاعد علي الكمبيوتر و عينك ما تشوف الا النور شعرت انا وتربيزة الكمبيوتر بنتطوطح زي بص الجريف وصوت المكيف فظييع .يعني الشغلانه قربت .يلا حسنو اعمالكم ومافي داعي لضياع الوقت

  25. ابو كريم كتب:

    فى احتماال الموضوع ده ربما نااتج من ظهور اخدود فى منطقة افريقيا حسب ماا صرح بعض العلماااء

  26. ابو كريم كتب:

    ياا خوانا نحن نااس بنظهر وكت الحاارة

  27. ابكرون كتب:

    ود الزبير :
    ده يكون صاحبك الشين داك بتاع امس البعمل وجع صره…..هههه
    يكون طلع من بيتهم الواطه شعرة جلدا كلبت (غزت)

  28. خالد المنصوري كتب:

    دا لقوة المدونة ** انا بعد الموضوع بثواني فقط عملت سيرش في القوقل (هزة ارضية الخرطوم) كان اول خيار المدونة بتاعتكم ****

  29. محمدالطيب المامون الطيب كتب:

    السلام عليكم للمرةالثانية
    يااخواناليس هناك مايدعو للقلق فكل من عند الله سبحانه وتعالي فلايمكنناالجزم بأن هذا عقاب من الله تعالى فقد يكن في هذا خير لنا ومن الخير الواضح أولا طلتنا نحن على بعض وتواصلنا هذا فهذا في اعتقادي كله خير والله المستعان

  30. طارق أب أحمد كتب:

    السسلاوى و أبكرون و المنصورى

    السبب أكيد راجع لييقظة و فطنة الآدمن سترايكر الذى أنزل موضوغع الهزه بعد ثوانى من الحدث عليه وجد الموضوع كل من قام بالبحث عن هزه أرضيه فى الجوجل
    فى أتصال تلفونى معه وجدته مرابط على الكمبيوتر للسماح بالمداخلات بالمرور

  31. طارق أب أحمد كتب:

    نرحب بالأصدقاء الذين أنضموا إلينا اليوم و آمل الأ يكون المرور عبر الجوجل نهاية المطاف بل بدايته

    أبكرون ليه الناس بتقول ما يكون مرور الكرام

    أخص بالتحيه صديقى و البشاوى أبو كريم الذى وعد بالمواصله من خلال مهاتقه معه قبل قليل

  32. ياسين شمباتى كتب:

    استرايكر والاحباب..سلام..
    نسال الله اللطف والعافية..

    طارق..
    خلاص البلد ابتك,,قوم امرق منها..

  33. طارق أب أحمد كتب:

    شنباتى
    من قبيل خايف أقولا و أتهم بالنرجسيه و الياسمينيه ذاتا

    الأرض أهتزت من فرط روعتها لفراقى

    اها بكره كان لقيت ليك سيول فى جده ما تستغرش

  34. ابراهيم الفال كتب:

    الهزة كانت واضحة فى اركويت وفى البلابل بالتحدبد

  35. ياسين شمباتى كتب:

    طارق…
    هههههههههه..انا قلت اقول كدة اكون فجرت مفاجاة ولا حاجة..لكن فراق هناك فرحة ناس هنا..ويلا خش..

  36. اسحاق كتب:

    في الاماب برضو حسينا بالهزه وربنا قدر ولطف
    دي من اعمالنا من استكبارنا ده الصايبنا
    حسنو الاعمال ازفت الازفة ليس لها من دون الله كاشفة
    الزلزلة غضب من الله ولاشك مين ممكن بقنعني انها رحمة من الله ولكننا غافلون عن الايات والعبر
    فاعتبروووووا يااولي الابصار الزلزلة تنبيه من الله اني منكم غاضب
    اللهم نسالك العفوو العافية ودوامهما في الدنيا والاخرة

  37. ودالزبير كتب:

    شباب
    جمعه مبركه

    إتخيلوا أنا في أركويت وقت الهزه دي وما شعرت بحاجه أظن ضغط الشغل بقي الزول مهتز طبيعي هههههههه

    الشباب يا ابكرون بكونوا جاؤا مع قوقل بحثاً عن الهزه

  38. ريختر كتب:

    أول حاجه أزيكم يا حلوين …
    أنا زي وزي أي واحد من الناس كنت غاطس بين صفحات الأنترنت ومرقتني ليكم الهزة الأرضية الأخيرة دي وجابتني للمدونه بتاعتكم دي..
    وأعتقد بان هذه الهزه أقل بقليل من 3 درجات علي مفياسي “ريختر”…هههههههه
    والله يستر ..لأنو زمان كان عندنا موقف زي ده مع هزه مماثلة في التسعينيات وكنا في المدرسه اليوم داك وفي البداية سمعنا صوت الخشب بتاع السقف بطقطق وتاني البياض تحت الكمر بداء يقع .. بعد شوية أشوف ليك أستاذنا الكان معانا في الفصل قام جاري أول زول كان أستاذ لغة أنجليزية أسمه حماد .. بعد داك أجمدت شوية في كانه لما أستوعبته الحاصل شنو.. لكن في الللحظه ديك ما كان في طريقه ذاته عشان أخارج نفسي ..عاينته للباب لقيتو مدفوس بزملائي من الطلبه وكذلك الشبابيك .. غايتو جازفته ورجعته خطوتين لي ورا .. وأقرب شباك من فوق لي أخواني .. وياروح ما بعدك روح .. هههههههههه.. لقيتني ليك بره في الحوش وكنت واصل للجانب التاني من المدرسه عبر الشباك قبل الأستاذ الجبان المرق وخلانه بالباب وبقييت قدامو ولقيتو واقف وبيسأل كمان بالأنجليزي what happend ..أستاذنا قايل نفسو لسه في الحصه مع انو هو اول الهاربين منها ..
    غايتو كان يوم مثير في حياتي ..

  39. سماح كتب:

    اناافتكرتها كهرباء فى البداية وقفلت المكيف وكده !!
    بعدين رفعت المرتبة قلت احتمال السرير حيقع ولا كده حتى لمن سمعت الخبر جمعت لكن ده موضوع حيكونوا ماسكنوا الناس سنتيييين

  40. ريختر كتب:

    بخلاف هزة اليوم حدثت عدة هزات أرضية في السودان كان أكبرها وأقربها زماناً في العام 1990م على نطاق افريقيا بالقرب من مدينة جوبا بلغت قوتها أكثر من «7» درجات على مقياس ريختر، وفي العام 1993م كانت أقل قوة ولكن شعر بها سكان العاصمة القومية حيث استيقظ الكثير من السكان منتصف الليل أردفتها توابع نهار اليوم نفسه..
    وفيما يختص بالحدث الذى وقع في مدينة شندى أواخر الشهر الماضي، أكدت الهيئة العامة للأبحاث الجيولوجية ان محطاتها لم تسجل أي هزة أرضية في ذلك اليوم ولا اليوم الذى قبله وتشير أجهزة رصد الأبحاث الجيولوجية ان محطاتها تسجل العشرات من الهزات المحلية داخل السودان تتراوح قوتها بين «108» الى «4.0» على مقياس ريختر ويرجح المختصون ان الهزات الأرضية تحدث نتيجة حركات القشرة الأرضية وأيضاً تحدث نتيجة التجارب العسكرية والتصنيع الحربي..
    المئات من الهزات الاقليمية والبعيدة خارج السودان تزيد قوتها عن «5.0» بمقياس ريختر وتتركز الهزات الأرضية في السودان أكثر في الجنوب والشرق «الجزء الجنوبي من البحر الأحمر» كما ترصد في أواسط السودان هزات خفيفة في الغالب..
    ويقول عبدالهادي ابراهيم رئيس وحدة الأجهزة بهيئة الأبحاث الجيولوجية لم يكن السودان وقتها يمتلك أية اجهزة أو مراصد لرصد الهزات الأرضية حيث تسجل المراصد المجاورة للسودان الهزات الكبيرة نسبياً وفي العام 2000م بدأت الهيئة العامة للأبحاث الجيولوجية بشراء أول دفعة من الأجهزة لتكون نواة لتكوين الشبكة القومية لرصد الزلازل بالسودان فتم تركيب المحطة المركزية بمبانى الهيئة بالخرطوم والمحطات الطرفية الثلاث بكل من المرخيات والسليت وجبل أولياء..
    وأضاف ان هذه المحطات تعمل على مدار الساعة ويتم تغذيتها بالكهرباء عن طريق نظام الطاقة الشمسية وترسل بياناتها الى المحطة المركزية بواسطة الارسال اللا سلكي. ويقول انه من الممكن أن تكون الهزة من الصغر بحيث لا تصل موجاتها الى مراكز الرصد أو تصل مشوهة لذا….

  41. ريختر كتب:

    تعرضت بعض أنحاء الخرطوم اليوم لهزة ارضية خفيفة بلغت 3 درجات علي مقياس ريختير في الساعة الثانية وثمانية وأربعين دقيقة ولمدة ثانيتين

    وقال د. يوسف السماني المدير العام للهيئة العامة للأبحاث الجيولوجية (لسونا ) أن الهزة التي رصدتها أجهزة الهيئة تشير إلي أنها من نوع الأهتزاز الموضعي ( محلي ) وهي ناتجة عن تأثير خارجي

    واضاف أن هذه الهزة ليس لها أي تأثير ولم يكن لها أي تتابع باعتبار أنها خفيفة مبينا أن الهزات التي يحدث بعدها تتابع عادة ما تصل إلي 6-7 درجات علي مقياس ريختر وبالتالي فإنه من غير المتوقع أن تحدث أي هزات ارتدادية كما أنها لم تسجل أي خطورة تذكر

    وأوضح د. السماني أن الهيئة تعمل حاليا علي الإتصال بأقرب المراكز خاصة في حلوان وبعض المراكز الإقليمية لتبادل المعلومات والتنسيق في مثل هذه الأحداث ومعرفة المركز الرئيسي للهزة.

    الخرطوم في 9/7/ 2010 (سونا)

  42. انا دخلت فى بيتكم العامر بواسطة عمنا غوغل — بفتش عن الهزة الارضية وانا قاعد فى بلد بعيد — حتى اطمئن على جميع اهل بلدنا السودان الحبيب — انشاء الله سلامات — وتحية لموقعكم الجميل المفيد العرفنا وقت الشدة والحاجة — فشكرا لكم وتحية من البعد

  43. حاج أحمد السلاوى كتب:

    استرايكر .. شكسبير … سلام وحمدن لله على السلامة ..

    غايتو أنا شايف الهزة دى عاوزة ليها رحلة كاربة تجمع أخواننا الجدد ديل ..تتعرفوا عليهم وترحبوا بيهم أكتر..
    رايكم شنو ؟

  44. اسحاق كتب:

    والله فكرة ياالسلاوي وانا اول من يثني

  45. ودالطاهر كتب:

    شنو ياجماعه هزه ارضيه طوالي كدي معاها رحله مابالغتا فيها

  46. ياسين شمباتى كتب:

    مصطفى شوارع…الحق يا ابكرون..

  47. اخوانى الاعزاء فى موقع – ساخر سبيل —
    اسمحوا لى ان اضيف انه بعد ان قادنى العم العزيز غوغل العبقرى الى موقعكم نسيت مسالة الهزة الارضية — لاننى بدات اقرا فى مواضيعكم التانية الشيقة بينها على سبيل المثال لا الحصر موضوع — القرد فى الثقافات والتراث المصرى الخ — شيى جميل تحيات لكم كلكم-

  48. Issam كتب:

    الهزة دي عبرة لعل الناس يعتبروا

  49. صابوني كتب:

    ياناس الخرطوم مابراكم احنا برضو في الجزيرة وفي مصنع الجنيد بالتحديد شعرنا بالهزة دي لكن كانت خفيفة اقل من خمسة ثواني تقريبا

  50. ساندريلا كتب:

    مساء الخير ع الجميع أنا أول مرة أحضر هزة كنت رآقدة وحسيت بالسرير بيتحرك والله خفت شديييييد ربنا يحفظ كل أهل السودان ويبعد عننا المصائب يآرب

  51. ياسين شمباتى كتب:

    الاخوة المتداخلين..سلام..
    انابة عن الاخوة الاعضاء ومدير الموقع ارحب بحضوركم..وياريت يستمر التواصل..وتحية خاصة لى بكرى ودالسودان..وخليك قريب.

  52. بشار أحمد بشار (ابن برد) كتب:

    السلام على الجميع. طبعا ناس مركز إدارة الكوارث والأزمات ما صرحوا بأي تصريح لأنو اليوم الجمعة والمركز قافل وبيكونوا (ضابحين) ده لو كان في مركز والحمد لله الما طلع واحد أهبل وعوقة وقال ليكم نحن كنا متابعين الهزة دي.
    ” الزلازل من آيات الله العظام في هذا الكون ، يبتلي بها عباده تذكيرا أو تخويفا أو عقوبة ، وعلى الإنسان أن يتذكر حين وقوع هذه الآيات ضعفه وعجزه وذله وافتقاره بين يدي الله تعالى ، فيلجأ إلى الله عز وجل بالدعاء والتضرع والاستكانة لعل الله يكشف هذا البلاء العظيم عن عموم الناس .
    يقول الله عز وجل : ( وَلَقَدْ أَرْسَلْنَا إِلَى أُمَمٍ مِنْ قَبْلِكَ فَأَخَذْنَاهُمْ بِالْبَأْسَاءِ وَالضَّرَّاءِ لَعَلَّهُمْ يَتَضَرَّعُونَ . فَلَوْلَا إِذْ جَاءَهُمْ بَأْسُنَا تَضَرَّعُوا وَلَكِنْ قَسَتْ قُلُوبُهُمْ وَزَيَّنَ لَهُمُ الشَّيْطَانُ مَا كَانُوا يَعْمَلُونَ . فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّى إِذَا فَرِحُوا بِمَا أُوتُوا أَخَذْنَاهُمْ بَغْتَةً فَإِذَا هُمْ مُبْلِسُونَ ) الأنعام/42-44 .
    ولذلك استحب الفقهاء رحمهم الله الإكثار من الاستغفار والدعاء والتضرع والتصدق عند وقوع الزلازل ، كما هو المستحب عند حصول الكسوف والخسوف :
    قال العلامة زكريا الأنصاري رحمه الله :
    ” ويستحب لكل أحد أن يتضرع بالدعاء ونحوه عند الزلازل ونحوها من الصواعق والريح الشديدة ، وأن يصلي في بيته منفردا لئلا يكون غافلا ; لأنه صلى الله عليه وسلم كان إذا عصفت الريح قال : ( اللهم إني أسألك خيرها وخير ما فيها وخير ما أرسلت به ، وأعوذ بك من شرها وشر ما فيها وشر ما أرسلت به ) رواه مسلم ” انتهى منقوووووول .

  53. عباس ركس كتب:

    مساكم سعيد , حمدا لله انها كانت بسيطة وخفيفة – باقي اهلنا ديل ما ناقصين كوارث .
    يا رب هزة في اللي بالي بالك يا شمباتي !!!
    الهزة مرقت لينا ناس جدد يا ريت يواصلوا معانا بدون هزات !!

  54. مشاكل كتب:

    سلامز
    مساء سعيد للكل
    نرحب بجميع الأحباب الجدد في المدونة الرائعة ساخر سبيل … حللتم أهلا و نزلتم سهلا

    و كل هزة و الناس لازه

    لكن الغريب نحن في بحري .. لا سمعنا لا جابو لينا

    يا استرايكر … انتو بتعملو في شنو … شوفو ناس بحري الرايقين ديل … اعملو حسابكم المرة الجاية مع معروف يحصل شنو

  55. أخواني الاعزاء الحمد لله على سلامة الاهل والاصدقاء وعموم اهل الخرطوم ونسال الله ان يبعد عنا الزلازل والمحن وشر الفتن ما ظهر منها ومابطن .
    سبحان الله استطاع الانسان حساب كل شي الايام والمواعيد والدوران وسرعة الارض والكسوف والخسوف الا انه حتى يقف عاجزا عن معرفة متى يحدث الزلزال او الهعزة الارضية ولا متى يثور البركان الخامد مع انها من من الظواهر التي يرى الانسان عواقبها ،، دخل الانسان الى اعمق واعمق في جزئيات وجينات الانسان ولكنه لم يستطيع سبر اغوار الارض
    فسبحان الله وهنا اذكركم اهلي بالخرطوم عند حدوث مثل هذه الاشياء الاكثار من التسبيح والصلاة على النبي

  56. ودالخلا كتب:

    سلام يا قبيلة،،
    هل نستطيع أن ننفذ من قضاء الله وقدره؟؟؟
    والي أين المفر يا أصدقاء من غضبه سبحانه وتعالي ؟؟ فهل لن يكون ذلك الا الي عفوه ومغفرته ورحمته تعالي ،،،
    يقول الحق جلا وعلا في سورة الذاريات (ففروا الى الله اني لكم منه نذير مبين) آية (50)،،،،
    ويقول أصدق القائلين في محكم التنزيل (إِذَا زُلْزِلَتِ الأَرْضُ زِلْزَالَهَا (1) وَأَخْرَجَتِ الأَرْضُ أَثْقَالَهَا (2) وَقَالَ الإِنسَانُ مَا لَهَا (3) يَوْمَئِذٍ تُحَدِّثُ أَخْبَارَهَا (4) بِأَنَّ رَبَّكَ أَوْحَى لَهَا (5) يَوْمَئِذٍ يَصْدُرُ النَّاسُ أَشْتَاتًا لِّيُرَوْا أَعْمَالَهُمْ (6) فَمَن يَعْمَلْ مِثْقَالَ ذَرَّةٍ خَيْرًا يَرَهُ (7) وَمَن يَعْمَلْ مِثْقَالَ ذَرَّةٍ شَرًّا يَرَهُ (8)) سورة الزلزلة…
    مشاكل ياسديقي العزيز بحري ليست بمأمن من العذاب طالما جثم علي صدور الناس الظلم وأكل أموال اليتامي وأكل أموال الناس بالباطل، وأبتداع البدع وأستحسانها بما لم يفعله رسولنا الكريم ولا صحابته الغُر الميامين ولا التابعين، وكأني بالناس قد أتت لتزيد في الدين وتأتي بما لم يأتي به الأوائل، وما ذلك المشهد الذي دُعي اليه الناس للأحتفال بليلة الأسراء بتلك الطريقة التي لم تعهد من قبل ببعيدة عنك وعن فطنتك يا صديقي العزيز..
    وتوبوا وثوبوا الي الله لعلكم ترحمون….
    اللهم أغفر لي ولقومي فأنهم لا يعلمون

  57. لله يسترعلى اهلنا فى الصحافه الاخبار الجايه من السودان كلها مزعجه للاسف الفساد كتر فى البلد ربنا يهدى الجميع

  58. سارا كتب:

    السلام عليكم انا غايتو جابني العم قوقل في المدونه كنتا بفتش في خبر الهزه
    نحنا بحري شعرنا بيها الكراسي تحركت وفي الاول ما عرفنا الحاصل لكن جاتنا التلفونات تاكد الخبر وانتظرنا الاخبار ولا حياه لمن تنادى جابتا الجزيره فى الشريط الاخبارى متاخر

  59. ابكرون كتب:

    سلاااام
    الشئ الذي يحير انه في كم هزة ارضيه في التسعينات وقبلها وفي 2001 اقلو حقو الدوله تستشعر انه لازم يكون في مرصد زلازل ليه نلجا لحلوان وليه قراءاتناتجي من دول اخري ؟؟؟؟؟؟؟ شئ يحير ان لا نهتم بانشاء مرصد حديث…… الخوف تكون تجربه نوويه لاحدي الدول في بلادنا وصحارينا الهاملة دي ودي برضو بوضحها المرصد الزلزالي…….فهل من اهتمام بهذا الشئ المهم جدا…؟

    • ريختر كتب:

      والله يا أبكرون .. ما تستبعد القصه دي داخله فيها برضو نشاطات أنسانية .. يعني مثلا زي التفجيرات بمختلف أنواعها .. وطبعا من شوية كنت بسمع في دكتور معاوية شداد الفيزيائي المعروف ولمح في كلامو للحته دي .. قال مثلا تكون تفجيرات .. غايتو نحن بعدين شوية من التصنيع الحربي بتاع جنوب الخرطوم لكن والله العظيم لما يقومو للتجريب بتلع الأسلحة الجديده والله دووول دي تحسه جوه قلبك ..وتشوفا بي أضانك .. والغريبه جمب التصنيع الحربي أكبر مستودع للبترول في الخرطوم ..أتخيلو لو الطوبه جات في المعطوبه … والله دي أنشطار ذري عديييييييييييييييييييييييييييييييييييل كده …ههههههههه … ريختر الجابو ليكم الزلزال ..

  60. ودالخلا كتب:

    القبيلة وضيوفها الكرام الذين أتي بهم الزلزال..
    صديقي أسدالخلا الوروار
    قد أسمعت أذ ناديت لو ناديت حيّا ولكن لاحياة لمن تنادي!!!
    وجود المراصد والمعامل ومراكز البحث بالقطع مهمة أهمية بالغة وتفيد كثيرا” في عمليلت التحليل، وسمعنا أنه قد تم رصد مبالغ لأنشاء مراكز وأستجلاب أجهزة للرصد والمسوحات الجيولوجية والمناخية لمتابعة توقعات الظواهر الكونية المختلفة، ولكن بما أاننا أمة متخلفة ولا تننظر ألا تحت أقدامها فقط وتضع الخطط والأستراتيجيات أسعافيا” فقط أي بعد حدوث الكوارث علي الرغم من وجود جهات رسمية تنفق عليها الدولة من حُر مالنا لدرء الكوارث ، ولكن ما ذا نفعل مع النظرة الشخصية والأنانية المفرطة في أتخاذ القرار وتوجيهه بما يخدم أهداف ومصلحة الشخص الذي يُصدره أولا”، وطالما أن الحال هكذا ونتوقع حدوث زلازل وكوارث بيئية أخري كالأعاصير المهلكة والفيضانات المدمرة بسبب ما أقترفته أيدينا من المصائب والذنوب، والي أن نتوب ونثوب لرشدنا وبما أن الدولة لن تنفق علي أستجلاب المزيد من الأجهزة فعليه يمكن لكل مواطن أن يقوم بتربية عدد من الفئران والأرانب والأغنام بمنزله ، وأن لا يقوم بتدمير بيوت النمل بالمنزل لتعمل كأجهزة للأنذار المبكر لتنذرنا من وقوع مثل هذه الظواهر الطبيعية وخصوصا” الزلازل والرياح والفيضانات، فقد ثبت علميا” أن هذه الحيوانات والمخلوقات لها خاصية مدهشة في التنبؤ بوقوع مثل هذه الظواهر قبل وقت كاف يسمح لها بالهجرة وحمل صغارها والتوجه بها في الأتجاه الذي يخالف أتجاه قدوم الظاهرة أو مركز الزلزال..
    فسبحان الله العظيم رب العرش العظيم..
    ربنا أننا ظلمنا أنفسنا فأن لم تغفر لنا وترحمنا لنكونن من الخاسرين

  61. ريختر كتب:

    “القلم طاوعني تاني”

    القلم طاوعني تاني وقلت أرجع للكتابة.. أصلي مشتاق لي عيونك بلدي يا وطن الطلابة…

    انت ولدك كان بعانخي العلم الناس الحرابة.. انت تاريخنا المدون بدري من زمن الصحابة…

    أسألوا الخرطوم بتحكي لما قوردون احتمابا.. لما مهدي الله جاهو خلفو ناس شايلين حُرابة…

    كانوا لابسين المرقع وبالحراب سوها غابة.. شدة الموت ما بريدو التقول بينم قرابة…!!

  62. ريختر كتب:

    طيب نتغزل شوية في الزلازل دي:

    “يا راحل بدون انذار”

    *****
    يا راحل بدون انذار سليتني وأبيتني ولا مالك ولا دي الأقدار…

    *****
    مشينا وليهو ما غشينا وعارفين حبو ما لينا..

    ده سادة وقلبو مابينا نسانا ونحنا ما نسينا…

    *****
    مساهر الليل وما نايم خيالك ديمة لي حايم..

    وبي نار الغرام هايم ياريت السادة لي دايم…

    *****
    لطيف لكن نفور جافي وظلوم لي حبي ما وافي..

    أحبك من ضمير صافي عليك تعذيبي ما خافي…

    *****
    ده هاجر ومن هواي نافر وسادة وفي الجمال نادر..

    هويتك وتبقى لي جاير حليل يوم كنت لي زاير…

    *****
    جميل يا فرحة أحلامي وديع يا بهجة أيامي..

    جفيتنا وكترت آلامي وناسي للهوى السامي…

    *****
    صفارك زاد لهيب ناري ودلالك حير أفكاري..

    أحبك وانت ما داري يا ريت لو تفهم الجاري…

    • والله يا ريخترشكلك كدا شاعر قدييييييم والحب دا كم درجه بمقياس ريختر؟

      • ريختر كتب:

        هههههههههه .. ولا ما شاعر ولا حاجه … لكن بيني وبينك دي حاجة كانت مركونه في جزء من أجزاء الذاكره بالدماغ … هزة أمبارح دي قامت لكلكته يمين شمال .. وقامت وقعت في مدي الذاكره الحيه وطلعت للعيان … ههههههههههه … كلام بتاع زول عيان موش كده ..

  63. حاج أحمد السلاوى كتب:

    ريختر دا لو ما قال نحنا ساكنين جنوب الخرتوم كنا قلنا الزول دا ألمانى ..

    • ريختر كتب:

      هههههههههههههههههه… شنو يا حاج السلاوي والله مافي فرق بينا وبين ألمانيا …بس في الحاله دي ممكن تقول ألمانيا دوله قايمه علي تقنيه عاليه في علم الزلازل … ونحنا دوله نايمه .. في كل شئ عن الزلازل …

  64. ودالجزيرة كتب:

    موجوده فى مدنى

  65. ياسين شمباتى كتب:

    ركس الحبيب..سلام..
    آمييييييييين,,ديل غايتو لا بتهزوا لا بتلزوا..حسبى الله عليهم..

    ريختر..سلام..
    عاد لقيت الناس مجمعين وانطلقت ! مرحب بيك والدار دارك وخليك قريب..

  66. alfoons كتب:

    الحمدلله انو ربنا قدر ولطف

  67. نعم حصلت هزة ارضية بعد صلاة الجمعة وربنا لطف واتكررت مره اخرى بعد المغرب وادت لانقطاع التيار الكهربائى فى منطقة عد حسين ونقول الحمد لله بس كان المفرض ان الاجهزه الرسمية تكون متابعه الموضوع ده وتوعى المواطن بس ده ما حصل ونرجو من المختصين توعيه المواطنين بهذه الطوارى وكيفية التصرف حال حدوثها لاقدر الله بصوره اعنف

  68. معقول بس كتب:

    ماشاء الله الناس دى مرقت من وين مرقتكم الهزه شكله
    والله قبل يومين اعاين كده لبيت قلت هسع كان جا زلزال البحصل شنو للبيت وطريقه بناء المبانى خاصه مايعرف بالفلات اسلاب الطوابق كلها تتردم فوق بعض لانه بعض المهندزين بقللوا الابيام الطرفيه وبالتالى يقل التدعيم مازى البيوت القديمه الفيها الابيام
    لكن نصيحه اذا جات هزه تانى اجرى طوالى تحت الباب عشان فيه بيم ولا شوف ليك بيم اقعد تحته ولا عليك بنحت التربيزه
    لكن ياجماعه سبحان الله لا عندنا جبال لا ساكنين جنب بحر
    ويمكن الصرف الصحى خاصتنا مسرب مياه لطبقات التربه وبالتالى عمل فرقات فى الارض الداخليه جعلها تتحرك
    لكن عمايل الناس فى البلد الحزينه الفيها الطغاه وظالمى الناس واكلى حقهم ومالى جيوبهم ربما سبب
    بكره يقولوا هزة خير وبركه وده دليل على الارض الرخوه للزراعه هههه قديمه
    الارض لمن ما تستحمل العليها من غضب بتهتز ساكت من جوه
    الغش والخداع والنفاق والربا والزنا واكل مال اليتيم الخ كله الارض مابترضى بيه
    عارفين بقولو الانسان لمن يموت الارض بضمه علياه زى الام لابنها تضمه ضمه شديده لانه الانسان خلق من التراب اللى هو الارض –لذلك الهزه دليل على نكران شى ومامحتاجين يوروا حكومتنا براها بتعرف
    قللنا عدد المستشارين من 18 الى 14 معقول بس لزومه شنو وقتين ما قدر الشغله خليها بقى
    كسرة :
    حقو نشوف تجربه اليابان فى الحج لا قصدى تجربتهم فى الزلازل والهزات الارضيه ونعمل وفد من 500 شخص يتعرفوا على التجربه قال ماليزيا قال
    ربنا يستر علينا وعلى اهالينا وعيالنا وجيرانا وكمان عواطف والكواشف مانسيت لى زول

  69. حاج أحمد السلاوى كتب:

    إنت زااااتك يا مستر معقول بس مرقتك الهزة زااااته وزمان جيتنا مرة وااااحدة وطفشت من منتداناووالدليل إنك عارف إصطلاحات عواطف والكواشف وشنو ما بعرف داااااك .
    إظهر وبان وعليك الأمان وما بتجيك التكتح ..ونسال الله العلى القدير أن يجعل الزلازل والهزات الأرضية (الهزات دى غير هز الوسط بتاع الجماعة إياهم ) محصورة بس فى بيوت وفلل وعمائر وأملاك من لا يخافون الله وآكلى اموال الناس بالباطل والمتسربلين بإسم الدين وهم أبعد الناس عنه ونساله تعالى أن يبعدها ( الهزات الأٍضية والإرتدادية ) عن كل المدونيين الغلابة والتعابة وأمثالهم من الشعب المسكين الفضل ..وزى ما قالوا شيوخنا أعلاه علينا العودة والتوبةإلى الله وطاعة رسوله الكريم ..وما بتجينا الحبة إ، شاء الله .. لاكين نسوى شنو مع التانيين الجايبين لينا المصائب .. وقول يا باسط ..
    وخلونا النشوف آخرتا شنو !!

  70. ابكرون كتب:

    الصباحااات نديه:
    ريختر : ياااخ انت تسيب الهزة وتخلي القياسات النديه وتعملا لينا شعر …يعني نطمئن الاحوال هادئة نطلع من تحت السرير…….
    ود الخلا : عارف هندسهامس جابو الخبر متاخر في النشرة ومستضيفين واحده اثبتت ان الشغل في هذا المجال عشوائي لا اجهزة وحلوااان مرصد بعيد لا يستشعر المسافات دي ….والمذيع سالها عن ان الهزة ممكن تكون لاسباب خارجية فما هذه الاسباب الخارجية؟؟؟؟؟قالت اي كلام…مفروض الدولة تستنفر الدفاع المدني ويشرحوا للناس خاصة ناس الخرطوم( سكن العمارات) تعمل شنو…مش ينتظروا لمن تقع الطامةالكبري…..
    بعدين زي ما ذكرت البعيد شنو انو يكون تجربة نووية في صحارينا البعيده من وراء ظهر السودان النايم في العسل ؟ ومفروض لو في شك يتبعها قياسات للاشعاع النووي……غايتو الحافظ الله…….
    ابوكريم : يا حليلك ياخ ما تسلم علي عمك جابك عمك قوقل؟ طمنا علي ناس البيان ودردق لو اهتزت……
    ساندريلا : كيف اول مره تحضري هزة الزلزلة دي ليها سنين عددا شغاله فينا لحدي ما رواكيبنا كوعت…وبس راجين الصيحة الكبرى….!

    • ريختر كتب:

      صباح الأنوار يا أبكرون و صباح سعيد لكل الناس حتى آخر درجه علي مقياس ريختر ” بس في مقياس المودة والسلام ” موش ” المقياس بتاع الزلازل ” ..هههههههههههههههه

  71. عزت كتب:

    ساندريلا : كيف اول مره تحضري هزة الزلزلة دي ليها سنين عددا شغاله فينا لحدي ما رواكيبنا كوعت…وبس راجين الصيحة الكبرى….!

    مش ممكن يا أبكرون تكون سغيرة لأنو آخر هزة كانت في 94 ….

    وقتها ماجت الأرض و ربت و قومتنا من سرايرنا جري اذ حدثت في الليل خالس و أتبعتها هزة تانية في ظهر اليوم التالي و كانت هزة تمام….

    عموما شعرت بالهزة في ظهر أمس و لكن لكي أجزم كتبت تعليق في موضوع (الرجل الذي نجع) و ختمتها ب

    أبشروا بقينا متطورين و بقت تجينا هزات….!!

    مرحبتين حباب بمن انضم الينا و خليكم قريبين زي ما قال شمباتي

  72. ودالزبير كتب:

    صباح الهزات

    غايتو لو في حسنه للهزه دي فهو جمع هؤلاء النفر الكريم الذين أتمنوا أن يجدوا هنا ما يدفعهم للبقاء والمساهمه في رفد الموقع بالجديد والمفيد …

    بالنسبه للدوله هسه عليكم الله موضوع الفلاشا مش عرفناه بعد الإنتفاضه … وموضع موت الإمام عبدالرحمن المهدي نفس الشئ … هسه كمان أصبروا ليكم عشرين تلاتين سنه وبتعرفوا الزبير محمد صالح مات كيف وإبراهيم شمس الدين مات كيف وطياره قرنق وقعت كيف وووووووو مالكم مستعجلين أها الهزه دي زاتها بعد خمسين سنه راح نعرف خبرها .. خمسين سنه كتيره يعني .. عالم مستعجله بشكل

    • ريختر كتب:

      هههههههههههههههههه… قويه منك يا ود الزبير .. وكلامك صاح والله في محله … نصبر شوية وزي ما قالو ناس الطرب في الحفلات إياها : وسنة سنتين خمسين شوية … وأنا يا بلال عليا …واصبر كمان شويا .. عشان سرهم يبين ليا …

  73. حاج أحمد السلاوى كتب:

    نحنا غايتو منتظرين بكرة نسمع أغانى الهزات ( هزات أرضية وهز الوسط )..مش كله هز فى هز .. وتلاقى الجماعة إياهم رافعين العصايات مع كل هزة ..وتهليل وتكبير .. وما عارفين إنهم هم زااااتهم اسباب الهزات زااااته بعمائلهم الفاتت الحد وما ليها عد..
    غايتو حيكون فى جنس هز … وربنا يكفينا شر الهزات الإرتدادية..
    وقولوا آمييييييييييييييييييييييييييييييييين .

  74. مشاكل كتب:

    سلامز

    الأخ/الأخت معقولة بس

    انا برضو اقول ليك معقولة بس …. فلات سلاب و بي أبيام ؟؟؟؟

  75. DAKEEN كتب:

    الحمد لله على سلامة الجميع من سكان العاصمة والمناطق المهزوزة ،، وحمانا الله شر الهزات والهمزات ، وهز الوسط .
    وكما تطرق الاخوة الى لتجهيزات الفنية والتقنية ،،، واستعداد امازونيا لرصد مثل هكذا احداث ، نامل التطرق الى اجراءات السلامة والاخلاء في مثل هذه الحالات وكيفية التعامل معها وهل توجد منطقة اخلاء رسمية لمثل تلك الظروف ،، ام ان الاراضي كلها بيعت في المزادات الاستثمارية والعاصمة بقى ما فيها نفس وامتلأت بالعمارات والمخططات والشوارع امثلات بالسيارات ….
    ومرحب بيكم في ارض المليون ميل مربع فان اهتزت الخرطوم تداعت لها كل الولايات . ولّا نعمل بنظام العسكرية ،،، الخير بخس والشر بعم..
    وانشاء يا اهلنا ما تشوفوا شر . والخير بقى خاس في مناطق واشخاص . وخاسس وخاسف في معظم المناطق والاشخاس .

  76. ابو كريم كتب:

    ياا اخوانا سلام عليكم كيف قيلتو مع قصص الزلازل دى والله طبعا ده موضوع بعد كاس العالم غاايتو الا الهلال والمريخ يظهرو حتى ننسى الكلام ده …..لكن برضو الناس تحمد الله على الحصل وقدر اخف من قدر ……… وبعدين انتو ملاحظين بقت تظهر علينا كواارث البلدان المتحضرة ناس زلزال وعواصف جليدية واعااصير خلى بالك السودان بقى مريييش هسى فرقنا من اليابان شنو الزلزال يااهو زاااتو الهنا والهناااك……….. هههههههه
    هووى مااتاخدو الموضوع جااادى
    تحياااتى

  77. سهيل كتب:

    اولا الحمدلله على سلامتكم جميعآ و سلامة بلادي الحبيبه ..

    ثانيآ : اود الترحيب بكل اخواننا و اخواتنا الجدد .. الدار داركم و إنشاءالله عامرين و مواصلين .. شرفتونا كتير و نتمنى لكم إقامه طيبه بيننا .

    تالتن : زمااااان زمن برنامج الحديث السياسي بتاع الرائد يونس لمن كانت الإنقاذ جديده و جات هزه ارضيه في القاهره .. صاحبنا الرائد يونس شمت في مصر و المصريين و ما خلا ليهم جنبه يرقدوا عليها .. و بعدها بعدة ايام ضربت اللخرطوم هزه مماثله فقال ( إهتزت الخرطوم طربآ) ..

    رابعآ : والله عندي إحساس قوي إنو إيران بعد فتره حتعلن عن إمتلاك القنبله النوويه التي تمت تجربتها امس في السودان جنوب الخرطوم و بعلم السلطات او بدونها .. ولا ارجح الأخيره .. وزي ماقال ابكرون لازم نعمل مسح للآثار الذريه و النوويه ..
    خامسآ : البعيد شنو ناسنا الشفوت ديل يكونوا من زمان لابدين ببرنامج نووي و كلها كم شهر و نعلن السودان دوله نوويه … ( كترتها .. مش ؟؟؟!!!!)

  78. ابو كريم كتب:

    ياا سهيل استهدى بالله الكلام ده كيف قنبلة عدييييل جنوب الخرطوم يااراجل كدى قول بسم الله

  79. سهيل كتب:

    ابو كريم : نحن في السودان مش نهوى اوطاننا بس .. نحن بنمسكه من الآخر ( مش من الكبري) .. يعني اليابان روحها طلعت عشان تتطور و تزدهر حتى بعد داك جاتها الزلازل .. اما نحن جاتنا الزلازل طوالي بدون تطور .. يا عمك زمن مافي ..

  80. ودالخلا كتب:

    يا سهيل بتتذكر قصة باص الجبل في القمردينة القديمة، هسي كان قالوا ليك دي تجربة قنبلة نووية بتصدقوهم، غايتو أمريكا بتصدق كان في كان مافي..
    الحكاية وما فيها هي فعلا” قنبلة نووية لكنها في النوادي بتاعت شارع المطار وأظنك أنت فاهمني كوووووويس يا حبة!!

  81. pharma2003 كتب:

    حمدالله على سلامة اهلنا في كل ربوع السودان وفي الحقيقه مهما كانت الهزه خفيفه اوتقيله نقول قدر الله ولطف بس الموضوع محتاج شوية جديه ودراسه واجتهاد كمان من شيوخ البلد دي ما انتخابات ولا انفصال ولا حركه جديده …..دي تنبيه من رب العالمين والحمدالله انها كانت يوم الجمعه من خير الايام ….و انا شخصيا اختبرته مثل هذه الهزه مرتين في حياتي حيث كنت ادرس في احدى الدول الاسيويه طبعا الله لا وراكم … لذلك اقول الرجا ء الاكثار من الدعا ء والتضرع لله على وعسى يرحمنا ويفرج هم اخوانا في البلد( اللهم لا تؤخذنا بما فعل السفهاء منا).

    ملاحظه انا بحثته في غوغل وفعلا طلع لي اول مدونه … وشكر للاخ بشار احمد بشار ( ود برد) و د الخلا فقد دفعتني مدوناتهم للكتابه وهذه اول مشاركه لي .

  82. سهيل كتب:

    شنو يا ود الخلا .. مشغل لي اسطوانة ( ارى تحت الرماد وميض نار * واخشي ان يكون لها ضرام ) .. يا عمك مااااااا عذبتنا

    شارع المطار مييييين يا فرده .. هي القيامه دي حتقوم من وين و تخلي وين .. تمشي مصر شارع الهرم تحلف تقول حتقوم هسي و من هنا .. تسافر بيروت شارع الحمرا .. تقول بس ياها دي هسي حتقوم .. نحن يا عمك ( بمطارنا و شارع مطارنا ) لسه في عداد المحافظين الملتزمين شبه الإرهابيين عدييييل كده .. يا حبه نحن ما بننافس .. نحن غلابه حتى في إلمواضيع دي تعبانين و بنقلد بس .. صيني يعني

  83. ابو كريم كتب:

    والله بينى وبينك والشئ الحاااصل بره البلد نحن والحمد لله لسه بخيير وده نتااج طبيعى للتقدم البحصل بس حقو الناس تفكر بى عقل شويه ومااا تنجرف وراء الحاجاات الفاارغة وتحااول تااخد الفااايده

  84. الاخ ياسين شمباتى — شكرا جزيلا لك وللخوة الاعضاء ومدير الموقع على الترحيب بنا — وانشاء الله يوميا نزوركم — جاء فى التعليقات ان هناك ناس خرجت للشارع فور الهزة – هل ظهرت اى صورة فوتوغرافية التقطها احد ما بشان ذلك — مع تحياتى الى الجميع —

  85. عمر حسن أحمد البشير كتب:

    الحمد لله الهزه كانت خفيفة ولم يكن لها تأثير ولكن نحن السودانيين نهول الامور بشده وهي حسب افادة الجيولوجيين تنفس طبيعي للارض .

  86. ياسين شمباتى كتب:

    بكرى ود السودان..سلام..
    ناس خرجوا بعد الهزة !؟؟ والناس دى ما بتعرف تمرق فى المفيد القوى الشديد!!؟؟؟ ربنا يعينا على ما بلانا..وخليك قريب يا حبيب..

    سهيل..سلام..
    والله ما تستبعد ناسك ديل يسووها,,اصلهم جنهم حرب وسلاح وتسليح وعباطات..الحق عرس قبل يشعللوها…

  87. سهيل كتب:

    بكري ود السودان : والله إنت متفائل .. يطلعو بره وين ؟؟ هم متين خشو ؟؟

  88. نيام كتب:

    الأحبة الدانقوست شبابا و كواشفا …
    طبعا معروف جيولوجيا أن السودان يتبع لما يسمي pan African pan plain ويجاور هذه اللوحة من الناحية الشرقية the African rift valley ويتسبب انزلاق اللوحتين (African block and Asian block ) في مثل هذه الهزات و طبيعة هذه الهزات ضعيف في الغالب الاعم لان الاحتكاك بطئ عادة ويستمرمليمترات محدودة عبر عشرات السنين..وتتحكم طبيعة الاخدود الافريقي العظيم باتجاه شمال جنوب في طبيعة الحركة الرأسية بين اللوحتين ..حيث ان النتؤات محدودة باتجاه شمال الاخدود…وهذه المنطقة تعتبر من اضعف حزام الزلازل في العالم و لذلك نجد ان مراصد الزلازل لا يحفل بها كثيرا في هذه المنطقة و ان كان هذا يشكل عائقا في تطوير الدراسات السسموغرافية الهامة في الكشف عن المعادن و طبيعة الطبقات فيما يخص ال local geology ..
    نجد في البلدان التي اهتمت ب local geology والتي اهتمت بتطوير المراصد و الاستفادة من الهزات الزلزالية قد تمكنت من رسم الخريطة الجيولوجية لبلدانها بدقة متناهية مع توزيع تواجد الخامات المختلفة و تركيز اماكن المعادن الهامة ودراسة انواع الطبقات و توضيح الانكسارات و الالتوأت في تحديد المكامن reservoirs..
    فعلا نرجو من القائمين بالامر الاهتمام بشأن هذه المحطات و تكثيفها للتمكن من رسم هذه الخرط هذا بجانب تطمين الناس بصورة علمية و امدادهم بقوة الزلازل بدلا من تركهم هكذا يعيشون الخوف و اللجوء للاخر لاستجلاب المعلومة و نحن في عصر المعلومات…
    كسرة:
    فعلا تعتبر الخيول و الفئران و النمل و الزواحف اكثر حساسية للموجة الزلزالية قبل دقائف من وصولها للسطح و لكن هل توجد مثل هذه الدواب في مدن اليوم و هل نترك العلم لنعتمد علي حركة النمل في الفيضان و الزلازل و الكوارث الطبيعية…

  89. ياسين شمباتى كتب:

    الحبيب نيام..سلام..
    جزيت عنا خيرا,,والله الجيوانات القلتها دى موجووووووودة,,بس البحسسها شنو!!؟ دى خلاس جلدها تخن وقرضت على كدة..

  90. ودالخلا كتب:

    سلام ياقبيلة
    أخونا pharma2003 ثرو السُمار الكرام (بنو نهشل) مرحبا” بكم سمارا” ومدونون متعاونون معنا وبالمناسبة دي عندنا منظمة خيرية أسمها زاد المسير تجد اللنك أعلا شمال الصفحة في المواقع الصديقة، ونأمل أن تكون من الأصدقاء الأخيار لأنني لمست فيك خيرا” وشممت منك طيِبا فمرحبا” بك أنت والآخرون..
    يا سهيل من أين تأتي المصائب والمحن ؟؟ وماتلك المصائب ألا نتاج لما كسبت أيدي الناس، وما تقول لي ياسهيل نحن لسه في بر الآمان، أنتو خضتو جوة الجوة زاتو ولا فين في الدوامة وما جايبين خبر، وما تقول لي شارع المطار أطهر من شارع الحمرا !!!

  91. معقول بس كتب:

    الاخ مشكلجى
    قلنا ابيام طرفيه
    واذا غالطنى يبقى الزيك هم المضيعين البلد ولا تكون مهندس مدنى تشرح للكل المشاكل البتحصل من الفلات اسلاب فى حاله الهزات الارضيه ما هزات الجيوب
    ولا عماره الرباط كان تقيف صنديده ماتقع وللان نقول وقعت مالها وقلبنا فى يدنا
    بعدين معقول بس يا مشاكل ما مذاكر كويس ده انت السياسه والانتخابات ماخليت ليها شئ مذاكره قويه
    اها هسع انت بقيت فلات اسلاب ولا ابيام حدد موقفك
    معقوله بس

  92. معقول بس كتب:

    اخونا السلاوى
    اخوك الكاشف متابع كل شى بس الكسل تقول شنو
    مرات وقت تحر نخش معاكم ومرات نعاين بعيونا لمن تدمع نان نسوى شنو مكتوفى الايدى
    متابعكم وبقرا بعض المواضيع فى المنتدى لكن طبعا الاحداث السياسيه الواحد بكون فيها متواجد ومتابع
    ومرات عندكم مواضيع بديروها تلاته وكل زول يعلق للتانى دحين اخش معاكم اقول شنو
    بعدين احنا ناس ترسوا البحر صددوه بتاعين توتى
    بس معقول يجى زلزال الخرتوم
    غايتو فرح ود تكتوك قال يا حرقه يا غرقه الا هزات دى ماذكرها لينا
    حقو نرجع للمعجم الوسيط بتاع جبرا فى الهزات ونشوف نوع الهزه شنو

  93. محنك كتب:

    الله اعلم

    الشى دى خجه ساكت ما هزه يلا بلغوا اللجنه والمحكمة

  94. ياسر بله كتب:

    لازم نفسر الاحداث تفسير صحيح. والصحيح انو كل شي يحصل لا يحصل الا فقط بعلمه وبإذنه ………..جل جلاله وعم نواله.

  95. حاج أحمد السلاوى كتب:

    المشير عمر حسن أحمد البشير شخصياً معانا فى منتدانا دا ..ولا يكون إسم على إسم .. يعنى تشابه أسماء من قبيل الصدفة ؟
    معقول يكون فى صدفة زى فى الدنيا ؟
    عشان كدا بنطلب منه يورينا موقعه الجغرافى والقروب ..وإذا كان ما عندو قروب نخلق ليهو قروب..هى ساعة الحظ دى تتعوض ؟
    سؤال سغيرووووونى كدا .. أمال فين الفردة … السيد وزير الدفاع؟

  96. حكاية كتب:

    هههههههه
    يا حاج السلاوى دى شكلها الكاميرا الخفيه —- ده الريس مشغول على طول لكن ممكن واحد من 14 مستشار من عنده يرد عليك طبعا للمعلوميه خففوا المستشارين من 18 الى 14 عشان التكاليف وكده
    لكن نحسبها هزه للنفوس حتى تخرج المدسوس مايمكن يجينا بترول ولا دهب ولا صفيح
    وكل مواطن يلقى عنده بير بترول جوه بيتو —طيب الحيكومه حتعمل شنو يا ربى تصادر البيوت دى ولا تشتريها ولا ولا يكتلونا كلنا لاننا بقينا من طبقات الدهب الاسود واتخيل انه الوزراء فى بيوتهم مافى بترول معناها يجو يشحدونا ومانديهم نرسل ليهم الفتات
    بالله عان الحلم ده لمن الواحد صدق
    الفكى ابكرونا هههههههه وينك دايرين نعرف رايك فى الاهتزاز الحصل

  97. ودالزبير كتب:

    شباب

    أخونا نيام طبعاً هو مهندس جيولوجي يعني أكتر زول ممكن يفتئ في المساله دي … له ألف تحيه وتقدير

    ريختر

    ( الراجل بيقول كلام زي الفل ) هههههههههههههههه والله ضحكتني مداخلتك دي وأعجبتني أيما إعجاب وذكرتني أيام شبابي .. لك التحيه

  98. سهيل كتب:

    ينصر دينك ياود الخلا .. صاحي تمام و مجتهد في زاد المسير

    شمباتي : قلت لي الحيوانات جلدها تخن و قرضت على كده .. هههههه .. يا فرده كلابنا بقت تاكل خدار و عقابت الكسره و الكدايس ذااااتها بقت جنها نوم و الحيطه كان زادت من المترين ما بتطلعها .. الكلاب زمان في الحله كانت بتلد دسته في الولده الواحده .. هسي اظنهم عاملين تنظيم الأسره لو بالغت جروين .. النمل ذاااتو زمان لو قرصك حيلك يموت .. هسي النمله لو عضتك بتفقد سوائل و إحتمال تموت

  99. ياسين شمباتى كتب:

    (و الحيطه كان زادت من المترين ما بتطلعها)..
    دى بالغت فوكها يا سهيل…هههههههههه.لكن فى كدايس سوبر,ولا مركبين مكنة نمر انا ما عارف..

  100. عباس ركس كتب:

    سهيل ثرو شمباتي : انتو الصنف ابو اسد دا بتجيبوهو من وين ؟ حفرة وكدا ؟؟؟؟؟

  101. سهيل كتب:

    يا ركس .. اللستك نازل .. امشي البنشر .. ولا اظنو تيوب لس

  102. ابكرون كتب:

    يعني يا محنك نسميها (ذات الخجة) زي بتاعة اخوانا الهدندوة ديلك بتوع ( خمش) كو ( ريب)

    حكاية : فالوا انتو شغالين هزاز ساكت…..خلاص ختو في العادي واطلعوا من تحت السراير..ههههههههههه

  103. ابكرون كتب:

    يا شباب ويا شياب بالله (خلااااس المودووووع ) ده هزاااانه ووزااانه هز ووز برانا الزهايمر هازينا نزولوا لينا موضوع جديد

  104. حاج أحمد السلاوى كتب:

    والله يا ابكرونا .. إنت ما فى شى جايب ليك الهزات والزهايمر غير العين الخاتيها دى ..

  105. عباس ركس كتب:

    هي لكن يا سلولو هي عين نصاح !!!!

  106. ابكرون كتب:

    غايتو يا سلولو لوكملته ليك باقي الطلعه بكون جنيت علي عيالك….خليك مع العين الفرده دي يا فرده…..
    طلعه ما بتتقابل زي لهيب النااار
    تحرق البتهابل

  107. حاج أحمد السلاوى كتب:

    الكاشف ابكرونا ..
    ياخ كمل جميلك وما عليك بالباقى .. ما أصو الباقى باقى ..ودنيا العيون محن.
    سمعت وقريت .. يا ركس .. أبكرونا قال ليك طلعة ما بتتقابل زى لهيب النار ..
    لاكين العيون دى تسبه لى عيون زولاً عرفناهو قريب دا ..ما يكون ياهو زااااته يا أبكرونا وتودينا فى ستين ….
    غايتو ..لاكين .. جنس عيون !!

  108. pharma2003 كتب:

    تحيه لكل الموجودين ومساااكم خير …. اخي ود الخلا طبعا دخلته لنك منظمة زاد المسير وفتحته كل التعليقات و المدونات و وجدته اسماء الاعضاء شي جميل انو نتكاتف ونرجع زي اهلنا سودانين زمان معروف عنهم التكاتف الاجتماعي اينما وجدوا والاجمل انو كل انسان يجعل ليهو هدف سامي في مساعدت المحتاجين باي شكل من الاشكال……… بس بصراحه محتاجه شوية معلومات توضيحيه يعني اهداف او انجازات او الخطط المستقبليه اذا امكن بطريقه مبسطه اكتر وربنا يوفقنا واياكم للخير … اختكم فارما2003

  109. ودالخلا كتب:

    سلام ياقبيلة،،،
    أختنا الصغري pharma2003 مرحبا” بك مرة أخري وشكرا” لك علي أهتمامك بمتابعة المدونة وخصوصا” منظمة زاد المسير، وأرجو من بنت القبيلة (الزهراء) أمين شئون العضوية القيام باللازم بتوفير المعلومة المطلوبة ..
    أضم صوتي لأسد الخلا الوروار بتغيير الموضوع وكفاية زلازل وفتون وشوف لينا حاجة جديدة ونتمني أن تكون من القادمين لا القُدامي!!
    سهيل يانجما” بعيد ضوااااااااي نحن كدا أنتو كيف، مالقيتكم نمتو في الخط ولا حياة لمن تنادي ، وحسب معلوماتي المحدودة آخر تحويل من شخص وربما كان الوحيد حسب علمي هو من سديقي اللدود بتاع الفيحاء الظليلة، أما أخوتنا الباقية فهم يشدون من أزرنا بألسنتهم فقط لا عدمناهم أبدا”….
    السيد الرئيس الأخوة الأعضاء طال الزمان وعز المسير وأقترب رمضان فهل الي زاد للمسير؟؟؟؟؟
    التركي لو مريت علينا بخصوص الأشتراكات لتوصيلها تكون ما قصرت تب..

  110. ياسين شمباتى كتب:

    ركس…سلامات..
    يعنى الا يهزوك ويخجوك كدة؟؟ دا من عند الحاج الكبير…

    سلولو وابكرون…سلامات..
    اهاااااا قمتوا على المعافرة والحركات !؟؟؟ انا شااااايف وساااااااكت,,لكن كلو ليهو حد..

  111. علي كتب:

    ياخوانا ما ملاحظين انه الهزات دي كلها بعد سنة تسعين؟
    ياخوانا اتقوا الله حكاماً وشعباً فقد وصل الفساد مرحلة اغضبت الله سبحانه وتعالى والجايي اخطر ، ناس الشفافية العالمية قالوا لكم انتوا بعد الصومال زعلتوا وقلتوا لا اها جاتكم من السماء عندكم عليها اعتراض ؟ قولوا لا ثاني عشان تلقوا نفسكم في باطن الارض ونشوف لا دي بتقولوها لمنو ثاني

  112. ام منة كتب:

    سلام
    انا جابني الزلزال لكن متأخرة شوية, يوم الحمعة يعني بين2 و3كنت بصلي في الغرفة لوحدي حسيت بالحاجات جوا الدولاب إتحركت لكن ما فهمت الحاصل شنو لكن خفت لأني عندي فوبيا من الضب قلت يكون دخل جوا الدولاب كمان ها ها ها, بعد داك لقيت في الشريط الإعلاني للنيل الأزرق الناس بتتكلم عن هزة أرضية وكان شغال برنامج منى وعبداللطيف البوني.
    طبعاً دا توثيق شديييييد للهزة
    ربنا يحفظ بلدنا وسائر بلاد المسلمين

  113. ياسين شمباتى كتب:

    ام منة..سلام..
    مرحب بيك وباخونا على..قلت لى حاجات جوة الدولاب اتحركت؟؟ ما يكون دا صديقنا سمبل !!!

  114. حاج أحمد السلاوى كتب:

    الأخت أم آمنة ..
    أول حاجة مرحب بيك وحمدن لله على السلامة من الزلزال وإن شاء الله الحاجات الجوة الدولاب ما إتكسرت أو جاتها عوجة .. والجاتك فى دولابك سامحتك ..
    الشى التانى الزلزال دا أخرك شديد خلاس .. معقول يكون وصلك لينا بعد عشرة يوم من تاريخ وقوع الزلزال ؟ غايتو إلا تكونى كنتى راكب عجلة ..ولا يمكن الخوفة الدخلتك ما مرقت إلا أمس واتذكرتى الزلزال ..
    الشى التالت ماتزعلى من كلامى دا وأنا دخلت عليك توش برا إحم ولا دستور ..والزول البيوصل لحد عندنا هنا تانى ما بنخليهو بأخوى وأخوك والمنتدى دا لامى جنس ناس شى عواجيز ( أنا واحد منهم ) وشباب من الجنسين ..بس عندنا سؤال تعسفى سغرووووونى كدا بيسل الروح اناس ديل كوووولهم عاوزين يعرفوا موقعك الجغرافى بمعنى إنك موجودة داخل جمهورية امازونيا العظمى ولا طاشة زى حالاتنا كدة برة برة ..لأنو الناس ديل بيسووا رحلات ولقاءات وتكريمات وبتلاقوا فى الحزن والفرح زى عادة أهلنا السودانيين قبال قيام دولة التوجه الحضارى ..والإجابة إختيارية .. وليك حق الإمتناع عن الإجابة إلا فى وجود محامى .
    وربنا يغتيكم كوووولكم من الزلازل والمحن ما ظهر منها وما بطن .

  115. ام منة كتب:

    اهلاً بيكم يس الشمباتي مش عليك الله كان والله ادخل الدولاب وامشي عالم المظلات طوالي
    لقيتني كيف مزاكره مش
    ومرحب بي حاج أحمد أنا ساكنة الخرطوم الرياض. وزوجة عاملة.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s