لا أرمادا..الإنتصار التاريخى

Posted: الثلاثاء,13 يوليو, 2010 by قرن شطة in اخرى

يبدو ان إسبانيا وبعد مرور زمن طويل من الهزيمة التى الحقها بها الانجليز والهولندين فى بحر الشمال قد إستعادت مجدها الغابر والتليد ولو فى بعد ومجال آخر...كرة القدم..وقصة الاسطول البحرى الإسبانى (لا ارمادا) الذى لايهزم قصة غرور ملوك سلفوا وتعقيدات ماضى إستعمارى..فقد كانت إسبانيا وانجلترا من اعظم الدول الإستعمارية آنئذاك. إسبانيا مُستعمرة لمعظم بلدان امريكا الجنوبية وتاخذ منهم الذهب والفضة المتواجدان فى تلك الانحاء بوفرة – اسم الارجنتين يعنى باللغة الإسبانية لون الفضة – وبالطبع كان لانجلترا طموحات فى تلك الثروات، ثم أن إختلاف المذاهب الدينية بين البلدين قد أجج المشاعر ، والبابا كان له دور فعال فى هذا ، فالرجل أوحى للملك الإسبانى فيليبى الثانى بارسال حملة لتاديب ملكة إنجلترا اليزابيث الاولى المتهمة بالهرطقة ، واخيراً إستياء إسبانيا من ثورة الهولندين – والذين كانت تحكمهم أسبانيا كمستعمر – المدعومة من الإنجليز…

تم تجهيز (لا أرمادا) عام 1586 بعدد 127 سفينة ومجهزة بمدافع ثقيلة ، وتولى القيادة دوق مدينا سيدونا والذى يقال ان شكوكاً كانت تحوم حول مقدراته القيادية…

وقد إنتصر الانجليز على الإسبان بارسالهم لملاقاة السفن الاسبانية سفن حرب تسمى (الحراقة) تُحمل بالبارود وتضرم فيها النيران ، وقد فرت السفن الاسبانية الى عرض البحر تحاشياً للنيران بعد ان غرق بعضها. وقد هبت رياح عاتية حطمت عدد كبير من سفن (لا ارمادا) قرب السواحل الايرلندية ولم يصل إسبانيا من ذلك الاسطول المهيب سوى 67 سفينة.

هذه الهزيمة النكراء هزت وجدان الشعب الإسبانى وعرضتهم للسخرية والتندر من الانجليز والهولندين زمناً طويلاً..وقد رأينا كيف إستعاد الإسبان يوم أمس – وبطريقة آخرى وملائمة للعصر – مجد بلادهم محققين إنتصاراً مدوياً على نفس الهولندين الذين ساعدوا إنجلترا على هزيمة (لا ارمادا) والتى كان يقال عنها انها لاتقهر..

التهنئة لاسبانيا على النصر فقد إستحقته واعلم ان سيكون له وقع بلسم شافى وممتع على الشعب الاسبانى والذى يعانى حالياً مايعانى من جراء الازمة المالية…نهنئهم على فوزهم المستحق والذى له مغزى تاريخى ومعنى يعرفه كل إسبانى..

وبعد كل هذا نتساءل ببراءة شديدة ، اين نحن من كل هذه الملاحم والبطولات؟ ولو أن السؤال قد يبدو غبياً  فكلنا يعرف الإجابة أو الإجابات..ورحم الله قوماً عرفوا قدر نفسهم فجلسوا دونه…

Advertisements
تعليقات
  1. ابوالجوخ كتب:

    شكراً يا قرن شطه على هذه المعتومات التاريخية القيمة… و منكم نتثقف و نتعلم شكراً مجدداً

  2. ابوالجوخ كتب:

    شكراً يا قرن شطه على هذه المعلومات التاريخية القيمة… و منكم نتثقف و نتعلم شكراً مجدداً

  3. حاج أحمد السلاوى كتب:

    الإخوة الكرام قرن شطة وابو الجوخ ..شكراً للمعلومات التاريخية الما كنا عارفنها من زمان..وإسبانيا ذات تاريخ معروف للجميع .. بس عاوز من يقوم بنشره للأجيال الجديدة ..فهلا فعلت أخى قرن شطة بحكم معايشتك لهؤلاء القوم فى بلادهم ردحاً من الزمن؟
    أولن سعدنا جدن بفوز الإسبان على الهولنديين وكان فوز مستحق تماماً والهدف كان هدف جميل لا يستطيع أى حارس أن يصده .. وتشجيعنا للإسبان كان من باب الصلات القديمة التى ربطتنا بهم .. يعنى فيها نوع من العنصرية الغير بغيضة ونكاية فى الهولنديين الذين لا يحترمون الأديان ( طبعن مش كلهم )جميعها..
    أخونا ابو الجوخ .. نحنا هنا فى المنتدى دا بنرحب بالناس الجدد ايما ترحيب ونتمنى ليهم إقامة طيبة مع اخوانهم من الشباب والكواشف ( المصطلح حتعرف معناه لقدام شوية ) بس عندنا سؤال بيسل الروح دايماً بنوجهه لإخواننا المدونيين الجدد .. بنسالهم عن موقعهم الجغرافى عشان نمدد حبال التواصل معاهم .. دا طبعن لو ما كان عندك اى مانع أن تدلى باية اقوال ..( فى ناس حسه قاعدين يضحكوا .. وبعد شوية حيعلقوا ..)على دخولى المباغت شمال دا..
    معليش أنا خرمت من الموضوع الأساسى .. بس الكلام جاب الكلام ..

  4. محنك كتب:

    مبروك لاسبانيا ولاخوال البنية يا قرن وللمدام

    اسبانيا لعبت بذكاء ولكن تامل فريق برشلونة فى المباراه النهائية شارك بسبعة لاعبين فى منتخب اسبانيا غير ال 25 لاعب الشاركو فى المونديال بدءا من ميسى وهنرى وغيرهم

    يعنى نعجن السودان كلو نطلع بنص فريق برشلونة نشيل الكاس صعبه دى

    طبعا صعبة جدا نحن فين وهم فين يا دكتور مافى اى مقارنة حتى مع جامعى الكرات فى اسبانيا ولاعبينا

    واين الميادين والاستادات

    معليش باركنا ونكدنا على الجماعة

  5. الاخ حاج أحمد السلاوى .
    أخوكم ابوالجوخ سودانى مقيم بالامارات العربية المتحدة . ابوظبى

  6. التركــــى كتب:

    الأخ قرن شطة والزملاء السمار سلام الله عليكم
    فوز اسبانيا بالكأس أهدانى فرحة كنت قد انتظرتها عام 1982 فى مدريد ولم تأت … شكرا لكل من ساهم وحقق الهدف المنشود …. ابوالجوخ ألف مرحب بيك بيناتنا …. مع التحايا والتقدير

  7. بكرى ود السودان - موسكو كتب:

    موضوع شيق ومنطقى اخى قرن شطة – الاحداث التى اوردتها ملفته — نعم الاسبان فازوا على الهولنديين واخذوا الكاس — ولكن اين فازوا عليهم ؟؟ — هذا مهم — فازوا عليهم اذا جاز التعبير فى احد معاقلهم التاريخية فى بلد البوير العزيزة على الهولنديين!! — فى جنوب افريقيا!! — فىحتة زمان كانت صراع بين الانكليز والمستوطنين الهولنديين — يعنى تداعيات مستمرة — هذه المرة كما ذكرت اخى قرن شطة من خلال كرة القدم !!– الاسبان هسه يمكن يقولوا لكل الاوربيين نحن اول من جبنا لاوربا كاس العالم من خارج القارة الاوربية — اسف للكلام الكتير سلام

  8. حاج أحمد السلاوى كتب:

    أبو الجوخ ..
    أنا محتار أخاطبك بأى لقب لأنى لحد حسه ما عارف القروب بتاعك شنو ..نحنا هنا عندنا من قروب A إلى قروب D أى من الكواشف وإنت نازل لحد درجة الشباب اللى هم ديل ناس ابكرونا وبشار والفقير إليه تعالى عمك السلاوى ومن بعدنا اب احمد وود الخلا وودالزبير ( شكسبير )وهكذا إلى آخر القائمة … عشان كدا أنا اترك ليك رقم هاتفى النقال ( الموبايل ) عشان تدينى رنة وخلى الباقى علينا لإكمال الإنترفيو ..00966508376601 ( جدة /السعودية ).
    أما اخونا بكرى ود السودان الفى موسكو دا قصتو صعبة شوية وما عارفين فرق الزمن بينا وبينهم كم ..

  9. قرن شطة كتب:

    الاخ / ابوالجوخ – مرحباً بك معنا كاتباً ومعلقاً ودمت اخى..
    حاج السلاوى -التحايا انت والاولاد..ياسيد انا سكيت كل الجامعات السودانية عشان نأسس شعبة لغة إسبانية مدعومة من السفارة هنا ، ولاحياة لمن تنادى ،بل أن بعضهم ظن أنى جاسوس خواجات وكده!! تصدق…البعض الآخر خاف على منصبه وخاصة عمداء كليات اللغات واغلبهم غير مؤهلين على الإطلاق ووصلوا بطرق معروفة…ولازلنا نحاول…
    الاخ محنك/ مساك خير..انا ح احكلى ليك حكاية غريبة عن فريقنا القومى العسكر فى إسبانيا مرة من المرات..وهم جونى عشان امشى معاهم وما إتفقنا بس انا قلت ليهم نصيحة منى ماتلعبوا مع إى فريق إسبانى حتى لو كان تيم دافورى فى الحلة ،لانو ح ينزلوا معنويات اللعيبة وماسمعوا كلامى ولعبوا مع فريق يكون درجة رابعة وسمعت انو غلبهم ثمانية صفر (والهعدة على الرواى) تصدق!!!

  10. قرن شطة كتب:

    الاخ التركى / طبعا انا فرحان للإسبان لملاباسات غير كروية فانا سكنت فى مدريد وقرب إستاد سانتياغو برنابيو(إستاد ريال مدريد) قرابة العشرة سنوات ولم ادخل إى كورة! بس الناس ديل عندى شوية قرابة معاهم…دمت أخى ومرحب بيك..
    الاخ بكرى ود السودان – تحياتى ، وانت ذكرت معلومة مهمة وهى المكان وتداعياته التاريخية…مرحب بيك ونتمنى تدوام على الكتابة والتعليق….

  11. ابكرون كتب:

    سا…النور
    شطه والسمار
    فعلا كاس الغالم شالوا برشلونه (7 لاعبين) ضد اياكس (6 لاعبين)….والاسبان يستاهلوا كاس اوربا والعالم …..لكن لاول مره فريق يشيل الكاس ب 7 اهداف خمسه منهم من لاعب واحد ومهزومين في مباراة الافتتاح من سويسرا …..شئ غريب مش ؟؟؟؟
    نحن يا محنك في ظل شداد ومازدا واحمد بابكر (علماء بني كورون) ديل ما حتقوم لينا اي قائمة الا ينقرضوا ديل ويحلوا عن سماواتنا ويخلوا عندهم دم عالم ما بتختشي (فريق قومي يهزم بالسته في عقر داره وبرضوا عندهم نفس يعسكروا بره السودان) هم والوالي وصلاح ادريس….وال99 شخص البكونوا الحكومة …..ياخ نحن 21 سنه ما قادرين نبني لينا استاد (فرد استاد واحد اصبحت خارطته شئ من الماضي السحيق) في وسط الخرطوم قروشو الانضربت تعمل 5 استادات كنا استضفنا كاس عالم…
    ياخ دولة قطر وانت بها… دولة كلهامن (سوبا لودمدني) مساحتها ثلث ولاية الخرطوم(طولا 180 كلم في 40 كلم عرض) وعدد سكانها بالاجانب مليون وسبعمائة الف بها 8 استادات تبهر غير اسباير زوون التي تحير واكاديمية التفوق الرياضي وتسعي لبناء 4 استادات خيالية بجانب الموجود لاستضافة كاس العالم 2022 غير مضامير سباقات الخيل والهجن والسيارات والسباقات البحرية والالعاب الاولمبية والجولف ووووو…..ناس بتخطط بعقل وشفافية ..
    ياااخ نحن لا ساس لا راس لا كاس ولا فاس ولا مكناس
    واي كلام اتقال في قصيده (نحن) تقولي شنو …وتقولي منو …….. اكذوبة وكلام فارغ وما مصدقنها الا نحن

  12. ابكرون كتب:

    صباحات
    امس بستمع لي رئيس الجمهورية في افتتاح ملعب في شرق النيل…ملعب عادي مفروض يفتتحه نائب المعتمد…لانه شي بسيط وعادي …ده ما المهم …المهم السيد الرئيس قال في خطابه بهذ الحدث …ان كاس العالم القادم يعني 2016 المباراة النهائية حتكون (بين غانا والسودان….!!!!!! )ولمن الرئيس يقول كلام مفروض يكون زي القرار الجمهوري يعني ما اي كلام….ما عارف هل حنستورد لاعبين واداريين ومدربين ولا بي ناسنا ديل ذاتم بقيادة حاج ماجد سوار وزير الرياضة…افتونا ايها الرياضيون…..!!!!!

  13. عباس ركس كتب:

    سلام :
    ابكرونا : كأس العالم القادم 2014 اما بتاع 2016 دا , فغالبا ح يكون في السودان وفيه فريقين هما السودان وغانا ( طبعا بعد ما يدفعوا ليهم ) ويلعبوا المباراة النهائية ويكون كلو في محلو !!!!!!!!!!!!

  14. حاج أحمد السلاوى كتب:

    أبكرونا ..
    فى غلطة فى الرقم والريس ما مذاكر كويس ..أولن كاس العالم الجايى حيكون 2014 مش 2016زى ما قال الباشمهندس ركس ..
    تانين هو .. أى الريس كان بيقصد عام 4014 ..يعنى شنو الفرق إتنين بس .. ما فرقت كتير ..وتفرق كتير لو طعم الحلو يبقا مُر .. ولا ما كدا ايها الكاشف اللئيم ؟.
    وإن شاء الله حنجيب كاس العالم بعجب سيدو وسانتوس وقلق وطمبج.. ومنو ما بعرف داااااااك .
    ياخ قوم لف كدا ولا كدا ..قال كاس عالم .. قال!!

  15. قرن شطة كتب:

    الاخ ابكرون / تحياتى قلت لى :تقول لى شنو وتقولى منو؟ عليك الله ده كلام! نحنا بصراحة (عيانين) شديدومرضنا اظنو قاتل والعياذ بالله….غايتو بس الله يدينا الصبر لحدى ما الايام تتم وتكمل ونتوكل…..

  16. البشاوى كتب:

    قرن شطة وسماره الكرام — لكم التحية وتهنثة حارة للابن سماعين فى اسبانيا بفوز الماتادور

  17. DAKEEN كتب:

    قرن والاحباب.
    شهرا ما عندنا فيه نفقة ما بنعد اياموا ،،، وبعدين الرئيس الجنوب افريقي ما قال حا يودينا لاهاي كان تاوقنا ….
    والنفقة ذاتا تجينا من وين ،،،، من والصراع المازال مستمر على رئاسة اتحاد الرواكيب ،،، اول امس الهلال قال هزم الزمبابوي والمريخ شنو كدا ما بعرفوا والمهدي قتل غردون والمك نمر حرق الحكمدار والبليلة فايرة والحمارة عايرة …
    والعجيب في الامر انه هداف المباراة من مواطني الفريق الخصم ،،، قال هاتريك في فريق بلاده … قال ليهم (ناكل مما نصنع ) وبيدي لا بيد عمر .
    سنة 2016 حا نشيل كاس العالم غصب عنكم ودا شي طبيعي حا يكون كاس العالم واحد من الاتي
    – ممكن في الفساد الاداري .
    – الديمقراطية المغلوطة (على وزن الاقراص المضغوطة في الايرادات الملهوطة)
    – التعينات السياسية في المناصب الوراثية والجهوية والقبلية
    – والباقي تموهو موية
    الا كان ناس سوداننا عملوا كاس عالم جديد ممكن ننافسفي النهائيات بس نطلع بي شرف.

  18. حاج أحمد السلاوى كتب:

    الكاشف البشاوى ..
    أولن حمدن لله على السلامة والظهور العلنى بعد غيبة طالت شدييييد وما فى زول من مدونى الداخل قال لينا الزول دا حاصل ليهو شنو ..
    وإن شاء الله ما آخر طلة .

  19. DAKEEN كتب:

    عاجل:
    توفي الأخطبوط بول بعد أن طلب منه أن يتنبأ بفوز السودان بكأس العالم.فأصيب
    بنوبة من الضحك غاب بعدها عن الوعي وتوفي في الحال.وقد أكد شهود عيان أن
    آخر ما تلفظ به قبل الموت.قوية قوية قوية.
    (منقوله)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s