بروف جبرا … كن كالنخيل‏

Posted: الخميس,15 يوليو, 2010 by khalidmadani in اخرى

      يحتار الواحد منا احيانا من بعض الناس … صرنا نهوى تحطيم كل من نبغ وتفرد وصنع له اسما بين الناس ... تحس بهم يتلذذون بطعم لحم الآخرين … ترى هل هو نوع من الانتقام لنفوسهم من ضحالتها وعمق النابغين أم انها تشوهات في الشخصية ؟؟

    سمعت تصريحا وتلميحا عن ادعاء د. سي جي مان بأن البروف جبرا قد نشر مقالا له بعد ان عدل فيه ونسبه لنفسه وهو ما يعرف بالسرقة الادبية … لم اهتم بالموضوع حتي لفت انتباهي مقال للبروف جبرا في الرأي العام وضح فيه بعض التفاصيل الخفية … سعدت بمقال البروف واعتبرت ان الموضوع انتهي بذلك خاصة وان البروف اوضح ان فكرة المقال عبارة عن طرفة كانت شائعة في وقتها .

      مرة اخري لم اهتم للموضوع حتي علمت ان المقال المعني يدور حوله جدل كثيف في سودانيز اون لاين … استعذت بالله ودخلت علي الموقع المعني ولكم هالني ما قرأت … لكأن هؤلاء الناس كانوا في انتظار جنازة ليشبعوا فيها لطم … منتهي الاسفاف وسوء المخبر والعبارات … تأكدت حينها ان ظني السيئ في ذلك الموقع لم يخب … وحمدت الله وشكرته عليكم … فأنتم طينة أخري .

    جبرا الذي نعرفه اكبر من ذلك بكثير وقد خبرناه وعرفنا طينته ولا يحتاج ذلك العبقري الفذ الي تزكية مني … وأعلم ان ذلك الادعاء لم يحرك فيكم شعرة لذلك لم تهتموا به … ولكن لكم آلمني تهكمات فارغي العقول والقلوب علي قامة مثل البروف … فالذي كتب عمران الغمران والنار ولعت والباشا كاتب اعذار ليس بحاجة للسطو على مقال ببساطة حنة عواطف … ولكنه السخف والصعود على اكتاف الاخرين .

عزيزنا جبرا … نحن وانت نعلم من انت … فلا تشغلك تلك الصغائر .

 

Advertisements
تعليقات
  1. ودالخلا كتب:

    سلام ياقبيلة،،
    الأخ الكريم خالد وغابة النخيل جبرا،،
    لا يحتاج الأخ جبرا للتعريف او التلميع ولكن الأخرين هم من يسعون نحو الصعود للهاوية عبر اثارة الغبار وقرع الطبول ليلتفت الناس أليهم ، لقد قرأت ما دار بذلك الموقع بعد تنبيه من الأخ أبكرون، وعلمت أن مافيه لا يعدو زوبعة في فنجان من تلك الردود السمجة والضحلة التي يتداولها الناس هناك، فعرفت ان الموضوع لا يستحق خصوصا” بعد رد الأستاذ جبرا الوافي والكافي…
    اخونا جبرا كن كغابة من النخيل كما قال لك خالد ودمدني ُتلقي بالحجر فتُلقي طيب الثمر..

  2. علي سنكل كتب:

    الأخ خالد لك تحياتي
    وأشكرك على طرح الموضوع للنقاش ولو إنو في البدايه كان لي رأي آخر ، إنو حنة عواطف شنو المحتاج جبرا لسرقته.وحقو ما في يرد عليهو ويا ريت لو كان هذا السجيمان ( ولم أسمع به من قبل ) إتصلبت ليهو في واحده من قنابل جبرا الأدبيه مثال التي ذكرتها واللا خطوبة سمير واللا المقال الذي زار فيه الوفد الحكومي للتعرف على الجبايات في الخارج واللا دعواتو لزيارة بلاد الأمازون الصديقه.
    كنت أعتقد أن لا نعطي الموضوع بالاً فهذا النوع من البشر مصاب بمرض الشهرة ولذلك يختار إفتعال الأزمات مع المشاهير والمحترفين.
    خليهو يشيل مع حنة سعاد جلطة نفيسة هواده ويسيب جبرا في حالو. فالقارئ فطن ويستطيع من الأسلوب تحديد الكاتب.أنا في كثير من الأحوال تردني مقالات جبرا من بعض الزملاء والأصدقاء إما بدون إسم الكاتب أو منسوبة لغير جبرا، وأقوم بالتصحيح ويتقبل الناس تصحيحي لعلمهم بوجود العديد من السجمانين على أرضنا الحبيبة.

    ما كنت أريد لجبرا أن ينفعل ويعتزل الكتابة على سودانيز أون لاين كما تبين من نقاش الموضوع على ذلك الموقع والذي للأسف أصبح يضم العديد من المعلقين المعتادين على أساليب بعيده عن الأدب وأقرب إلى قلته.

    بروف جبرا أرجو أن تستجيب لطلب القراء والمعجبين في سودانيز أون لاين ، وسيبك بلا سجمانين بلا رمدانين.

    كسره:
    حقو تعزموهو لحفل التكريم ليعرف قدر نفسه، وقدر جبرا عند معجبي فن السخريه.

  3. ودالزبير كتب:

    هو ذاك يا سنكل سنوجه الدعوه لهم للحضور والدعوه ستكون في سودانيز أونلاينز وببوست خاص بها

    فلا تقلق يا بروف فكل شئ تحت السيطره

  4. ياسين شمباتى كتب:

    خالد مدنى..سلام..
    اوافقك على الراى وان البروف يجب الا يستجيب لتلك المعمعة والصغائر التى جبل عليها البعض,,ولقد حزنت بشدة لقرار انسحابه_بغض النظر عن النتيجة او المآل_لكن ا نتترك مكانا لشخص لا يستحق لهو راى غير سديد..

    بروف جبرا..
    كن كشجرة الصندل..او كشجرة النخيل..ترمى حجرا تقلى ثمرا..ثمرا حجرا ثمرا..

  5. زووووووول كتب:

    سى جى مان دا بكتب فى التيار يا مدنى ولا اسم على اسم ؟؟
    كدى نجيكم برواقه للمودوع دا

  6. حاج أحمد السلاوى كتب:

    أخونا والدالمدنى ..وبقية صفوة الأخيار ..
    فوجئت كغيرى من الإخوة المدونيين بتلك الزوبعة فى سودانيز أون لاين ..والسؤل الذى يحتاج إلى إجابة فعلن .. هو أن مقال حنة عواطف قرأناه فى القمردينة قبل حوالى ثلاث سنوات ( عمرنا فى معية البروف جبرا ) وعلقنا عليه جميعاً لدرجة أننا صرننا ننادى أى زوجة بلقب عواطف والزوج بلقب سعيد .. فأين كان المدعو ( إسم على مسمى ) سجيمان طوال هذه الفترةولماذا لم يحتج فى حينها ؟ وبصراحة لم نسمع بهذا الكاتب إلا خلال األأيام القليلة الماضية بالرغم من أن الساحة تضج بالكتاب من كل نوع ولم اقرا له حتى اللحظة أى مقال مما يدل على أنه كاتب مغمور ويريد الطفو على السطح على اكتاف الآخرين امثال البروف..ويا ليته إدعى ملكية عمران الغمران أو خطوبة البونى وكونداليسا رايس أو تستظلون وغيرها من المقالات التى لا نزال نحس كأنها جديدة كلما مررنا عليهامن حين لآخر ..
    أتفق معكم فى الرأى أنه لا يجب الإلتفات لمثل هؤلاء الأقزام وليأخذ هذا السجيمان حنة عواطف إن كان ذلك يشفى غليله ويرفع من مكانته .
    والأخ جبرا لا يحتاج منا إلى دفاع ..فمقالاته وحدها تدافع عنه وترد عنه كيد الحاسدين والراصدين من مرتادى سودانيز أون لاين .

  7. بشار أحمد بشار (ابن برد) كتب:

    ياجماعة ورونا اللنك وين عشان نعفص الفاطس المستفطس ده

  8. خالد مدني كتب:

    الزووووووول سلام … ياهو ذاتو البكتب في التيار … جوار الصفر البارد دااااك كما علمت من ود الزبير .
    استاذنا بشار احول طلبك لود الزبير عشان يمدك باللنك … لكن لو تسمع نصيحتي ما تمشي هناك واهو كده كده عندك زبدة الموضوع … لو مشيت هناك بترجع كاره ذاتك .
    كسره : كاره ذاتو دي طبعا اساسية عندهم .

  9. خالد مدني كتب:

    عمنا سنكل … انا برضو ما كنت عايز الناس تنشغل بالموضوع … والبوست ده لا اقصد منه مهاجمة سجيمان وكذلك ليس للدفاع عن جبرا فهو ليس بمتهم عندي … ولكن تعففا عن ورود مواقع اخري احببت ان نعبر للبروف هنا عن حبنا له وايماننا بشرفه واخلاقه وموهبته .

  10. قرن شطة كتب:

    اخونا خالد مدنى
    اصلو الامور دى موجودة وخاصة بين الناس الفارغين وناقصى التعليم او فاقديه بالاحرى ، وغالبا مايكونوا يعانوا من مشاكل نفسية أو حاجة ذى كده …الاخ الفاتح جبرا رجل مبدع وموهوب ولايحتاج الى تزكية او حتى دفاع…

  11. الزهراء كتب:

    السمار الكرام
    لكم التحيه والاحترام
    حقيقه هذا التطاول مرفوض تماما من ذلك السي جي مان -واكيد نحن واثقين من البروف وعارفين اسلوبه في الكتابه وهو مامحتاج ولا ناقص ابداع عشان يدعي ملكية مقال- لكني ارى هذه الايام ان كل من هب ودب أدعى التظارف وعمل فيها كاتب ساخر-لكن للأسف ولا واحد فيهم بيساوي عشر أبداع البروف جبرا

    وكان ما أخاف الكضب انا شفت السي جي مان ده منزل الموضوع بتاع حنة عواطف في الفيس بوك وعندو صفحه خاصه بيه واصدقاء ومعجبين
    لكن بمجرد نزول موضوع حنة عواطف فأذا بالمعلقين يجزمون له بان المقال منقول من ساخر سبيل وده بيورينا مدى معرفة القارئ السوداني بمن هو افضل- ألا تلك القله من اصحاب العقول الفارغه الموجوده على سودانيز أون لاين

    وزي ما تكرمتو فان الرد لازم يكون في حفل التكريم
    ودمتم ودام وصالكم ومودتكم

  12. ابكرون كتب:

    سلاااام للجميع
    ذلك هو المطلوب ودمتم مدافعين عن العمدة وعن حوش العمدة ، السوء في سودانيز اونلاين الشللية وواضح اصطفاف نوعية سياسيةمعينة مع كاتب المقال (المنحاز للطرف الآخر) وكذلك في موقع آحر اسمه (وهم )السودانيين….! لنفس الكاتب … الا ان الحمد لله لجبرا من ابناءه وابناء القمردينة مقاتلين هناك في (اونلايص والوهم ) ما قصروا……
    بشار : اللنك سبق ان نزلته في آراء ومقترحات (اعلاه) يوم 6 يوليوالجاري…راجع …تجده

  13. حكاية كتب:

    مساء الخير
    طبعا يادوب الموضوع نزل عندكم واطرقتو ليه كنت بتمنى من بدرى تنزلوه
    طبعا الواحد قرا التعليقات والتلميحات المابتعجب فى حق جبرا
    لكن قلت نرجع لاصل هذا السيجمان الذى يدعى انه ابو السخريه
    مالقيت عنده اى نوع من السخريه البقول عليها انما يطلق لروحه العنان ويتكلم بجراه فى حقه وحق غيره ليس الا
    وفى اعتقادى ذا جاته شهرة يحمد ربه عليها ومافى داعى للتطاول على الغير —–
    لكن جبرا حتى لمن كان بكتب فى جريده الخرطوم وغير معروف بسبب قله توزيعها داخل السودان ولمن بقى يكتب فى الراى العام والحياه اشتهر بكتاباته الجميله الساخره البتنم عن فكر ومخ جبار وجبرا زى عزيز نيسين وجهان لعملة واحده لكن سيجمان اذا معروف فهو لمجتمع سودانيز اون لاين ولرويحته فقط
    ولقيت احدهم يدعى ان جبرا بعمل شهره لروحه بالمواقع واذا فتشتوا حتلقوا الناس هى القامت بامر المواقع
    فى يوما ما مواضيع جبرا تصل تعليقاتها لاكثر من 200 تعليق فهل من منافس حتى البعلقوا فى سودانيز اون لاين بقولو كلمتبن وكل زول برد بكلمه ورد غطاها
    حتى لو فرضنا جبرا اخد الموضوع من السجمان معقول باقى المواضيه دى ه كولها ما محسوبة ليه ده كلام
    يا جبرا معليش حسدوك المابشبهوك واكيد فى مجال زى ده حتلقى ناس حاسدين ومدمرين وشنو يعنى حنة عواطف ولا محاسن حقوا زاته السيد سيجمان ما يتكلم ويفتح نيران على روحه هو ماقدرها وكان ما يكون دكتور ولا غيره لكن ما يهبش الاستاذا الفاتح جبرا ولا بكلمه
    يا جبرا انا من انصارك ومريديك زى الشيوخ
    بالتوفيق يا جبرا واجبر خاطرنا بموضوع ساخر كده نتفش بيه

  14. حكاية كتب:

    كخبير ساخر يمول فقراء السخرية..(ده كلام السيجمان )هههههههههههههههههههه
    كسرة أخيرة :
    فك الصيوان يا سيد البوست .. على كده الفراش إترفع … شكر الله سعيكم !!دى السخريه بتاعتك يا جبرا ولا بلاش اديله بالبوكسى فى مناخيره
    يا جبرا خليك معانا هنا بيتك مش بيت الايجار حقهم
    هنا ناسك ومحبيك ومريديك

  15. التلب كتب:

    سلام للكل
    زي ما الأخوة و الاخوات قالوا عمنا جبرا ما محتاج تزكية أو دفاع. الواحد بس عاوز يعبر عن تقديره لأستاذنا جبرا.

  16. زيزو كتب:

    الأعزاء الكرام لكم التحية والتقدير

    هذه الهجمة (الغير محكمة التدبير)على أستاذنا الفاتح جبرا أعتقد أن المقصود منها محاولة لاسكات الأصوات الحرة الجريئة المعبرة عن تطلعات الشعب السودانى الحر بكل توجهاته من جانب ومحاولة تلميع سجيمان وغيره على حساب كتابات جبرا ومحبيه بمحاولة اثارة البلبلة بينهم وبين كاتبهم من جانب آخر
    والمؤامرة واضحة ومكشوفة من بدايتها لكل من له عقل يستخدمه

    والى الأمام أستاذنا جبرا وكل أبناء بلادى الشرفاء ولا أسكت الله لكم صوتا

    ياسر شبيكة

  17. DAKEEN كتب:

    العود المافيه شق ما بقول طق .
    واحمد الله ان الاستاذ جبرا انسحب من تلك المهزلة، التي قصد منها الكاتب كسب شخصي وجمع التعليقات حتى ترتفع اسهمه لدى ادارة الموقع.فمعروف ان الموقع ربحي من الدرجة الاولى ويفتقد الى صدق القلم.فبعض الاقلام المشقوقة فضلت الطقطقة بهناك.

  18. الصادق ود البركة كتب:

    السلام عليكم ورحمة الله وبركاته
    الكرام الأعزاء (زي ما الأخوة و الاخوات قالوا عمنا جبرا ما محتاج تزكية أو دفاع. الواحد بس عاوز يعبر عن تقديره لأستاذنا جبرا) منقوووول من التلب وأنا ذاتي معاهو ومع الجميع
    أول مرة قريت موضوع للبروف من حوالي 5 سنوات في جريدة الرأي العام الكان يكتب فيها كل جمعة سيناريوهات وكان موضوعها عن النملة التي راحت تشتكي عن تساوي قروش نفاياتها مع الفيل اها الزول السجمان كان وين الزمن داك ودمتم

  19. ودالزبير كتب:

    مرحب بأخونا ياسر شبيكه بيننا وارجو أن تدوم التعليق والمرور والبيت بيتك… حبابك ألف يا مان

  20. نيام كتب:

    الدانقوست الظارفين المستظرفين الاظارف الظرفاء…يا اخوانا اي حاجة في الدنيا دي عندها معامل يسمي n وهو معيار للفصل بين الاشياء و في حالتنا هذه فهو معيار ضبط الضحكة ..هل هي ذكية هل هي غبية و اذا كانت ذكية فالي اي حد تثير الضحك هل هو الضحك المسيطر عليه ام هو الضحكة العفوية التي لا تقوي علي كبح جماحها …اذا قرأت موضوع و ظللت تضحك عفويا و لم تستطع كبح جماح ضحكتك اذن الكاتب من العيار الثقيل وفي بلاد الامازون يوجد كاتب واحد مستضحك مضحك بعيار n لا تستطيع معه كبح جماح ضحكتك حتي اذا كنت وسط مجموعة من الوعاظ…هذا الكاتب الرقم لا يحتاج منا الي دفوع فكتاباته غير هذه الحنة المزعومة تثير من الاضاحيك ما ينفس عن النفس و يروح عن القلب…
    والغريب في الامر ان هذا النكرة اختار من بين الاطباق اصغرها و اقلها اثارة للعاب و الشهية و ليته استفتاني لا فتيته..
    لك يا عزيزي جدا بروف جبرا اهدي ابتسامة سخرية تقدمها لهذا السجيمان…وانا اشعر بانها اكبر منه…

  21. عبدوش كتب:

    خلاص يا حبايبنا الزول ده السجمان ده كتر المحلبية شديد والله انا لو في محله تاني كان شافت دعاية بتاعت حنة ما بجي بجنبها ..
    بس لو كان جا بالباب عديل وطلب يد بتنا (حنة عواطف)لكان البرف اعطاه ايها لكن تقول شنو !!!
    وقالو الزول في الرقاد شقو البريحو بخبرو والزول البليد بيدو بيحفر قبرو.. عاد بنسوي عوسنا والسجمان يلزم صبرو..
    كسرة:
    والله السجيمان لقاها عديل كده نسقف واللا رأيكم شنو؟؟؟

  22. علي سنكل كتب:

    الفاتح جبرا في خيمة الشروق :

    تستضيف خيمة قناة «الشروق» الفضائية مساء اليوم بأرض المعارض ببرى الكاتب الصحافي الأستاذ الفاتح جبرا ضيفاً على الحلقة التي سيتم تسجيلها اليوم وتبث في أيام الشهر الفضيل.. جبرا سيكون الى جانبه الفنان الكبير مجذوب أونسة.. الخيمة تنتجها رشا ابراهيم وتقديم معتصم محمد الحسن وسلمى سيد وهشام الريح في الاخراج وقد وجهت أسرة الخيمة الدعوة للزملاء الصحافيين وقراء جبرا للحضور والمشاركة فيها..

    منقول عن الرأي العام
    كسره:
    نانسي عجاج مااااالها؟ لومها لي يا جبرا. واللا حتكون اللهم إنك صايم؟

  23. بدرى كتب:

    ياجماعة الحكاية باينة من البداية شن جاب السيجيمان للبروف بالتاكيد الزول ده عايز دروس خصوصية…فى النقد الموضوعى وفن السخرية …ومايهمك يابروف

  24. ألفاتح جبرا كتب:

    الأحباء الأعزاء :
    أشكركم جميعاً وأشكر الحبيب ودالمدنى على هذا البوست .. لمن زول يسرقوهو بيمشى القانون وقد رفض سجيمان دعوتنا له الذهاب إلى القضاء ..أصبح بإمكان كل من يمتلك كيبورد بى خمسة جنيه فى سودانيز أونلاين أن بسئ إلى من يشاء لذلك فقد فضلت الخروج من الموقع بصورة نهائية ..شكرن ليكم كووولكم ومعليش الظاهر الزول ده رفع ليكم الضغط بتاعكم … تااااانى سلامى الشديد وعظيم مودتى

  25. التركــــى كتب:

    ود مدنى تسلم ياغالى ….. ياخوانا نحن كوننا نقيف نتصدى للراجل دا ذاتو معناهو رفعنا من مكانته درجتين … ادوهو حنة عواطف ولو عايز زفتها كمان ألف مبروكة عليه النشوف بعدها شن يسوى ؟؟؟ أنا لما عدت للوطن بطريقة نهائية مريت على كل الجرايد والمجلات وبما أنى كنت شديد الشقف بروايات عزيز نيسين أعجبتنى مقالات البونى ولقيت نفسى فى كتابات البروف ومن ديك وعيييييييك اها السيجيمان دا انا قريت ليهو اكتر من مقال فى التيار بس صدقونى بقرا وبعد خمس دقايق بنسى موضوعه ذاتو كان شنو ؟ وتقولى كتب حنة عواطف وجرتق كونداليزا

  26. زيزو كتب:

    شكرا ود الزبير على الترحيب والدار منورة وعمرانة بهذا الجمع الكريم

    صديقى الفاتح جبرا أنت تعلم جيدا تركيبة عضوية سودانيزأونلاين المتباينة لذلك توقع من بعضهم أكثر مما حدث وتجدنى كذلك مقلا فى متابعاتى ومشاركاتى هناك – وحتى فى موضوع “حنة عواطف” حاولنا تقول رأينا فيهو لكن وبكل صراحة نفس أسباب انسحابك من هناك هى التى جعلتنا نفضل الانسحاب أيضا وعدم الخوض فى ذلك الموضوع هناك بعد المكالمة الهاتفية الأخيرة بيننا

    تحياتى وسلامى

  27. خالد مدني سلااااااام
    يا جماعة والله حكايه الزول يغيب ليهو عشره خمستاشر يوم يجي يلقي الدنيا مقلوبه فوق تحت الحاصل شنو يا ناس والله ياهو الفضل؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s