انتو أبو ذر دا قال شنو

Posted: الجمعة,16 يوليو, 2010 by عزت in اخرى

و كتب شنو في الصحيفة عشان محكمة الخرطوم تصدر عليه حكما بخمسة سنوات ادانة و لي مساعديه محمد و الطاهر بسنتين لكل و تغلق الصحيفة نهائيا و تصادر ممتلكاتها… فالصحيفة هي (رأي الشعب) و المتهمين هم صحفيين… فهل يا ترى يرقى الجرم لهذا الحكم المتشدد، و ما هي الحاجة الحارة شديد الحرقت وجعلت الجهة الشاكية لتمضي في شكوتها و تصر عليها من موقعها كوصي علينا نحن المغلوب على أمرنا… فالشاهد ان الجهة الشاكية فيما يبدو هي مخابرات و الا أمن و الا نيابة جرائم حرب لا أدري و التي ينفترض أن تكون اهتماتها أكبر من ترصد صحفيين سلاحهم الكلمات و التي في غالب الأمر تكون صادقة و لا يقصد منها سوى الاصلاح و حمل الهم الوطني مع الجميع و تخلى ناس (خليل) و ما شايعهم من مجرمي حرب يقربوا يتعشوا في الموردة و تترك المضاربين في الدولار ينقصوا علينا عيشتنا و يمنعونا و ينشفونا من (التكتح) من ما تبقى من مبالغ كان قد استولى عليها المضاربين في قوت الناس و غول الأسعار الذي جمح و قالوا دايرين يكبحوهو….. بعد شنو

(فالكديسة) كان الواجب أن يطاح برأسها في أول يوم مش لمن يتمكن التجار و المضاربين من أعناقنا و كان الواجب الكشف عن العين الحمراء من بدري لآكلي مقدرات الشعب و كان الواجب أيضا تطوير الجنوب و استمالة أهلة من بدري حتى لا نلعب في الوقت الضائع….

فما تبقى هو أقل من ستة أشهر بسبعة أيام و مازلنا في غينا القديم اختلاق معارك في غير معترك، و اكتساب أعداء في بعض الأحزاب نحن في أشد الحوجة لمعاضدتهم و دعمهم لنا في هذا الظرف المحرج الذي ينتظرنا فما قفل الصحف يجدي فتيلا و قبلها قفلت صحيفة الانغفالة و شتت طاقمها بدلا من تقويم خطهم الاعلامي و أحسب أن هذا كان أيضا ممكن الحدوث بعد اطلاق سراح (شيخهم) و استمالته أيضا ليستمال بعد ذلك مناصريه من الاسلامين الذي كانوا قد اختاروا المنشية دون باقي التوجهات…

فهل نرعوي…!!

Advertisements
تعليقات
  1. ابكرون كتب:

    ده كل الكتبه ابوذر انضرب وعذب و5 سنوات سجن :
    http://www.alrakobasite.com//articles-action-show-id-420.htm

  2. حاج أحمد السلاوى كتب:

    قرأت مقال الصحفى أبو ذر فى صحيفة الراكوبة الإلكترونية.. وأعتقد أنه مفال خطير جداً ولا ادرى إن كانت لديه من الوثائق والمستندات ما يؤكد إستنتاجاته.. فإن كان لديه من الأدلة شىء فالحكم عليه غير عادل وتبقا المسألة تصفية حسابات وهذا هو الأرجح .. ,اما إن لم يكن لديه من الأدلة فيستحق الجزاء ..حتى لا يخرج علينا كل يوم كاتب ينشر ما بدا له ويثير الفتنة بين الناس .
    البينة على من إدعى واليمين على من أنكر .. ويا دار ما دخلك شر !!!

  3. علي سنكل كتب:

    د. عزت سلام . . .
    نشكرك يا مرطب على طرح هذا الموضوع الهام للنقاش.
    الفجور في الخصومه سمه قديمه و صفة ملازمه للكيزان ، وهذا المقال الخطير ( بغض النظر عن الحكم الصادر ضد الصحفي والصحيفه ) جزء من الصراع بين الوطني والشعبي.
    في صراعهم الدنيوي هذا لا يراعون مصالح البلاد والعباد ، صراع على الدنيا وليس من اجل الدين فهم أبعد الناس عن الدين.
    الصراع بينهم على السلطة والجاه والدنيا مثنى و ثلاث ورباع سيؤدي في النهاية لضرر بليغ على البلاد والعباد.
    وستنتهي فيما بينهم إلى زوالهم إلى مزبلة التاريخ ، ولكن بعد تفتيت وحدة البلاد وتقسيم الأمازون إلى دويلات متحاربة متناحرة.
    اللهم إنا لا نسألك رد القضاء ولكنا نسألك اللطف فيه.

  4. ودالزبير كتب:

    سنكل

    لصراع بينهم على السلطة والجاه والدنيا مثنى و ثلاث ورباع سيؤدي في النهاية لضرر بليغ على البلاد والعباد.

    دي النجيضه يا عمك

    لكن بالنسبه للقرار بتاع سجن آباذر فراي إنه جاء مخفف ففي المقال تحريض وأضح لدول كبرى لتآليبها على السودان بلإشاره إلى مفاعلات نوويه وحرس ثوري إيراني … المهم لاخي فيهم جميعاً وصدقني راح يفرج عنهم خلال أيام أو أسابيع أو شهور على الأكثر

  5. مشاكل كتب:

    سلامز

    فكرت بأن أكتب شعراً

    لا يهدر وقت الرقباء

    لا يتعب قلب الخلفاء

    لا تخشى من أن تنشره

    كل وكالات الأنباء

    ويكون بلا أدنى خوف

    في حوزة كل القراء

    هيأت لذلك أقلامي

    ووضعت الأوراق أمامي

    وحشدت جميع الآراء

    ثم.. بكل رباطة جأش

    أودعت الصفحة إمضائي

    وتركت الصفحة بيضاء

    راجعت النص بإمعان

    فبدت لي عدة أخطاء

    قمت بحك بياض الصفحة

    واستغنيت عن الإمضاء

    أما قبل … فليس لي علاقة بحزب المؤتمر الشعبي أو أي حزب سوداني آخر … و لكن ما يحدث لهذا الحزب من مضايقات من قبل أجهزة الدولة الرسمية بل حتى القضاء السوداني يجعل الشخص الطبيعي يصاب بحالة من الإحباط و اليأس من مستقبل هذه البلاد … فصحيفة (رأي الشعب ) و هو صحيف محسوبة على حزب المؤتمر الشعبي كتبت خبرا عن علاقات مشبوهة بين النظام السوداني و الحرس الثوري الإيراني و جزاءا فعلتها هذه سجن شيخ حسن الترابي لمدة شهر و نصف من غير تهمة و أغلقت الصحيفة و شرد الصحفيون .. و جاءت الطامة الكبرى من نظامنا القاضي فتم الحكم على نائب رئيس التحرير بالسجن لمدة خمس سنوات و على صحفيين لمدة سنتين .. و الأدهى و الأمر أن صدر حكم بإغلاق الصحيفة و مصادرة ممتلكاتها .. و مصدر الإستغراب في هذا الموضوع أن الصحيفة بشخصيتها الإعتبارية لم تكن ضمن في قائمة المتهمين من قبل النيابة أو المشتكي و هو جهاز الامن .. فكيف للقضاء بحكم على شخصية من تكن ضمن قائمة المتهمين ؟؟؟؟؟؟؟؟
    الإجابة
    Sudan Standard

    و لنا حق التساؤل … أين كان هذا القضاء عندما لحق الضرر بنبينا محمد ( ص ) من قبل أحد صحفيي النظام؟؟؟
    أين هذا القضاء و في الاسبوع الماضي يكتب أحد الصحفيين ( نكتة ) عن نبي الله يونس ؟؟؟
    أين هذا القضاء و صحف الحكومة تطالعنا ليل نهار بأخبار أقل ما توصف بأنها مقززة مستهلكة عن رفاهية محتملة للشعب السوداني و إكتفاء ذاتي في القريب العاجل ؟؟؟

    لست من معارضي النظام أو مع مريديه … و لكني أبكي على جثمان الحرية

    كن ما شئت
    رئيسا
    ملكا
    خانا
    شيخا
    دهقانا
    كن أيا كان
    من جنس الإنس أو الجان
    لا أسأل عن شكل السلطة
    أسأل عن عدل السلطان
    هات العدل
    و كن طرزان

  6. عزت كتب:

    الأعزاء سلام

    شكرا يا ابكرون على الرابط… و حقيقة فعلا لأول مرة أقرأ ما كتب

    هو فيهو شويت تجني و عدم وجود أدلة و براهين كم قال السلاوي … لكن يا حبيب جنس الأدلة بيلقاها وين….. لكن بكل المقاييس لا يرقى لهذا الحكم المتشدد و الذي لن يخرس به نظامهم الألسن و لكن سوف يكسبوا بدل ذلك أعداء… انشاء الله يا ود الزبير يصدر الرئيس عفوا عنهم و يحقق العدل….

    و تحية كبيرة ليكم يا من قلبكم على السودان و خوفكم من الفجور في الخصومة و زي ما قال سنكل المتضررين مباشرة من هذي فعائل هم نحن المواطنين…

    شكرا مشاكل فقد أبنت و أوضحت (جاخ) أي جزاك الله خيرا

  7. مشاكل كتب:

    **** Sudan Standard ****

  8. DAKEEN كتب:

    سلام يا دكتور
    في رأيي ان المعلومات الواردة في المقال تحتاج لشئ من التدقيق ،، فليس للسودان القدرة على القنبلة الذرية وهو لا يملك مقومات الادارة والسرية لهذا المشروع ،،، اما زيادة الحطب في البليلة بالحوثيين والايرانيين ،فهي زيادة حطب فالبشير غير مستعد لخلاف مع السعودية وهو على دراية بثقلها السياسي على المستوي العربي والغربي وان على عثمان بدهائه قادر على عمل الفسيخ شربات ولكن ما دور الشعبيين في ما دار حول المبعوث الى امريكا …فالكوم الكبير كوم البشير فهو المسيطر على الجيش وبعد تقديمه كبش فداء في القضاء على حركة العدل والمساواة ووتاليب الجنائية عليه من جديد اصبح امام الامر الواقع وقال (البتبلبل بعوم وهو شيال التقيلة) وبعد غياب قوش عن الجهاز اصبحنا لانعرف ميول الرئيس الجديد فان كان من تعيين البشير ام على فهذا يحدد هوية الصراع فجهاز الامن له دور كبير في تحديد هوية المسيطر على السلطة.
    – المقصود من المقال في المقام الاول خدمة جهة معينة بتشكيك النظام في قياداته ونشر الفتنه بينهم.
    – زيادة الضغوط عليه بتاليب الثقل السياسي العربي من خلال السعودية واليمن والغربي من خلال ايران.
    – ربما قصد الكاتب الحقيقة وهذا احتمال ضعيف لعدم وجود وثائق.
    اما دستور السودان فهذا ،، متروك للشعب السوداني الفضل والمؤامرة إذا سارت كما جاء في المقال فهذه الفتنة الكبرى والضبح بكتر ونحمد الله انه ما في شيعة وسنة ولكن عندنا كومي وكومك وهذه اخطر الفتن، فليس الثلثين المسيطرين على مقاعد البرلمان هم كل الشعب الشمالي .

  9. حاج أحمد السلاوى كتب:

    ولدنا مشاكل ..
    سلامز ثنى ومثلث ومربع ..
    عهدناك منذ بدء الخليقة مناصراً لهذا النظام الحالى الذى لم نعد نعرف له قرار .. هل هو حزب سياسى أم لا يزال إنقلاب عسكرى بثوب ديمقراطى أم ماذا ؟ وكنت مناصراً له وتتصدى لكل معارض .. فما بالك اليوم وقد غيرت جلبابك ..ماذا حدث فى سوق البصل .. ؟ أليس هو نفس النظام الذى كان يمارس البطش منذ قدومه وحتى اليوم ؟ولا نريد أجترار أفعاله التى هى معروفة للقاصى والدانى ..
    وكما ذكرت فى مداخلتى الأولى اعلاه نحن ضد الصحفيين الذين يعملون لجهات وأصحاب أجندة معروفة للجميع .. ومن لديه معلومة عليه إبراز إثباتها حتى لا يقع ضمن طائلة القانون الذى لا يحمى المغفلين ..فالحلال بين والحرام بين وبينهما أمور مشتبهات ..
    ولا نريد التطرق مرة أخرى إلى شيخكم الذى علمكم السحر وانقلبتم عليه شر إنقلاب وصار يهذى كالمجنون يمنة ويسرة وذلك ليعلم لأأن الله يمهل ولا يهمل..وعلى الباغى تدور الدوائر .. والساقية لسه مدورة ..
    وخلونا النشوف آخرتا شنو !!

  10. خالد مدني كتب:

    اخونا مشاكل … ولماذا لم يصبك الاحباط عندما كان هذا المؤتمر الشعبي وزبانيته يدوسون علي رقاب الشعب وباقي الاحزاب وكلهم لا خير فيهم … دافع يا مشاكل عن فكرة بوضوح عشان نقدر نرد عليك .
    كسرة :
    يا مشاكل بتشبه لي كاريك ملك التكتيك .

  11. ودالزبير كتب:

    مشاكلز

    سلام

    قلت ليك قبل كده الناس ديل بيحرجوا الزول مع نسابته سااااكت ما صدقتني

  12. مشاكل كتب:

    سلامز
    عهدتي يا حاج السلاوي مناصرا للحق .. و ليس لنظام الإنقاذ .. فولاءنا دائما للحق .. و لا ننسى انصر أخاك ظالما أو مظلوما . فإذا كان الحق معهم ساندناهم كما فعلنا في الإنتخابات الماضية و إذا جانبوا الحق صوبناهم و نصحناهم

    خالد مدني .. إذا عاد المؤتمر الشعبي لما – تقولون – بالتأكيد سيقف كثير من مناصري الحرية و مؤيدي الديمقراطية ضده .. و أنا منهم

  13. حاج أحمد السلاوى كتب:

    ولدنا مشاكلز ..سلامز..
    ومتى كان أهل نظام الإنقاذ على حق ..؟
    هل كان إعدام ثمانية وعشرين ضابطاً دون محاكمة ليلة الثامن والعشرين من رمضان هو الحق الذى ناصرتهم فيه ؟
    هل كان إعدام مجدى والقبطىى وثالثهم بتهمة حيازة العملة الأجنبية ثم إباحتها لكل من هب ودب بعد ذلك هو الحق الذى ناصرتهم فيه ؟
    هل قتل قتل الطلبة فى معسكرات الخدمة الإلزامية هو الحق ؟
    هل الزج بطلبة الخدمة الإلزامية فى حرب الجنوب هو الحق ؟
    وهذا قليل من كثير حيث لم تسعفنى الذاكرة بما قامت به الإنقاذ ..ونظامها الذى ساندته ووقفت بجانبه طوال السنين الماضية حتى ظهر لكم الحق الآبلج الان وبداتم فى إنتقاد تصرفات نظام الإنقاذ ..
    ومتى كان المؤتمر الشعبى وزعيمه مناصراً للحق فكلاهما وجهان لعملة واحدة وعندما اختلفوا ظهر حب السلطة حين كانت شعاراتهم سابقا ًهى لله هى لله هى لله لا للسلطة لا للجاه..الم ينقض شيخهم الذى علمهم السحر كل شعاراته الجوفاء الخالية من كل مضمون وسرتم وراءه حتى اوردكم موارد التهلكة..أين عرس الشهيد وأين عقود القران على الحور العين..وهل يتم عقد قران الحور العين على فطايس كما قال شيخكم واصفاً شهداء حرب الجنوب ..بعد إنحسار المد السلطوى عنهبعد الرابع من رمضان ..مالكم كيف تحكمون .؟
    هل تظنون أن ذاكرة التاريخ قد اصابها الوهن ولم تعد تسجل الأحداث ؟.. صدقنى سوف ياتى اليوم إن كان فى حياتنا الدنيا أو يوم الحساب الأكبر وينال كلاً جزاء ما فترفت يداه ..من ظلم وقتل وسحل ,اكل اموال الناس بالباطل وأكل قوت الغلابة والتعابة ..
    وأطلب منك أن تقوم بطبع مقولة أخوك الكبير شكسبير( الناس ديل بيحرجوا الزول مع نسابته سااااكت ما صدقتني )على ورق مقوى وتقوم بتعليقها فى غرفة نومك حيث يمكنك الإطلاع عليها صباح مساء .
    وقالوا فى المثل يا مشاكلز الما عندو كبير يمشى يفتش ويشترى ليهو كبير ..
    وخلونا النشوف آخرتا شنو !!!

  14. بشار أحمد بشار (ابن برد) كتب:

    الأخوان في كل مكان : مسحقوون ، معارضون ، مغازلون ،موالون ، مشايعون ، متفرجون ،منتفعون ، ماجايبون خبرون تحياتي للجميع وبعد:
    عن النعمان بن بشير رضي الله عنه قال سمعت رسول الله صلى الله عليه وسلم يقول (إن الحلال بين والحرام بين وبينهما أمور مشتبهات لا يعلمهن كثير من الناس فمن اتقى الشبهات استبرأ لدينه وعرضه ومن وقع في الشبهات وقع في الحرام كالراعي يرعى حول الحمى يوشك أن يرتع فيه ألا وإن لكل ملك حمى ألا وإن حمى الله محارمه ألا وإن في الجسد مضغه إذا صلحت صلح الجسد كله وإذا فسدت فسد الجسد كله ألا وهي القلب) متفق عليه.
    يعني الواحد يفهم من الرابط ده أنو لو كان أي واحد من ناس الإنقاذ بكيل بمكيالين فعلي عثمان بكيل بخمسة مكاييل.

  15. حكاية كتب:

    يا السلاوى عفيت منك ده الكلام
    اصلوا الجماعه ديل كانوا لابسين نضارات سودا ويا دوب فتحوا من عماهم بعد ما كانوا زى المنشار طالعين وكالين نازلين وكالين لكن سنون المنشار اتكسرت يسوى شنو اخير ينقلبوا

    ياربى ترحمنا
    غايتو يا مشاكل حقو تكتب خطاب انك اعتزلت السياسه والاحزاب وانك مواطن غير مرخص لحد عشان نجعلك نموذج للمواطن الحق الصالح المغلوب على امره والاعتراف بالحق فضيله
    اول كنت شجره وهسع بقيت شنو
    بالرغم من الديمقراطيه وحريه التعبير باقى لي لسع دكتوتاريين فى صدور الاحكام
    لو من الجهه المسئوله بعمل محاكمه عادله وابرز البراهين وتكون محاكمه على العلن وكا زول ياخد حقه

  16. ابكرون كتب:

    اجمل مافي كلامكم ده :
    سلولو : (هل تظنون أن ذاكرة التاريخ قد اصابها الوهن ولم تعد تسجل الأحداث ؟)
    حكاية : (لكن سنون المنشار اتكسرت يسوى شنو اخير ينقلبوا )
    بشار : (فمن اتقى الشبهات استبرأ لدينه وعرضه ومن وقع في الشبهات وقع في الحرام )
    =========================
    ومخطط اللعبة الكبرى (مسيو قراشن) اليوم يجوب البلاد من الخرطوم لجوبا ..وبدأت تظهر معالم كل شئ…لجبل الجليد الكان مخفي تحت الماء…….والارض تؤكل من اطرافها(حلايب شمالا والفشقة شرقا ومثلث اليمي مع كينيا وغدا جنوب السودان وبعده دارفور) …وتاني مافي راجل حيفتح نشيد : جدودنا زمان وصونا علي البلد الخ…..
    ———————–
    نحمد الله كثيرا اننا منذ بيانهم الاول لم نتلوث يوما ولا بمثقال ذرة من التعاطف او الثناء ولم نتلون وارجو من الله ان نموت علي ذلك

  17. عبدوش كتب:

    مساء الخير يا مواطنين…
    والله مافي كلام بيتقال بعد كلام العمد والمشائخ والجنرالات ،لكن في حكمة صغيرونة كده بتقول(اذا اختلف اللصان ظهر المسروق)فاللصان معروف منو والمسروق هوالوطن ونحن السروقنا وجرحوا سمعتنا
    والله يكون في عون البلد…

  18. بشار أحمد بشار (ابن برد) كتب:

    يا عبدوش : خدعوك وجرحوا سمعتك نور وجنتيك طفتن مذارف دمعتك وده حال كل سوداني قليبو انجرح .

  19. ابكرون كتب:

    http://www.alrakobasite.com/news-action-show-id-3168.htm
    —————-
    مهداة لسديقي اللدود (كما يقول) ود الخلا فاني اري في افكار د. ادريس تلاقح مع (فجات) سديقي العزيز ….ابحثوا عن ال(15) سؤلا التي قبلها في ال 11 مقال التي نشرها…..
    ما اقوي الحق عندما يقال

  20. مشاكل كتب:

    سلامز
    حبيب الكل و عمنا حاج السلاوي ..
    ومتى كان أهل نظام الإنقاذ على حق ..؟
    نعم كانوا على حق .. و لكن الثروة و السلطة حادت بهم عن طريق الله و رسوله و أفكار الشيخ المؤسس حسن البنا .. و كما قلت آلاف المرات .. لا لسياسات القمع ضد أي من كان فالرأي يجابه بالرأي .. و الكتابة بالكتابة .. و الباديء يتحمل
    ما أود ان أقوله لنظام المؤتمر الوطني هو أن مثل هذه التصرفات تجعل المرارات تزداد في نفوس المنتظرين للوحدة الجاذبة بين مختلف التيارات الإسلامية

    الأخت حكاية .. نكون مع الشجرة لمن تكون الاخيار الأمثل .. و نكون مع الشاكوش لمن يكون الخيار الأفضل

  21. عبدوش كتب:

    عمنا بشار الخشب …
    والله الكلام الفي المقال ده كان صاح النشوف لينا وطن قبل الاستفتا ده !!،
    الكلام ده السودانيين قروه واللا الحاصل شنو والا اضان الحامل طرشة والا الجاتك في وطنك سامحتك والا الشنو ما عارف داك.. ونحن لمتين حنقعد نتفرج في البلد دي ؟ودي بلد منو ذاتها !!؟والله مافي حل غير (النجوع ) بس ننجع بجلدنا ونجي للبلد دي من فوق زي ماالناس بتعمل
    والله يكضب الشينة

  22. عباس ركس كتب:

    سلام :
    سلولو بلاي ما تذكرت ( والدليل آلولو ) !!!!

  23. مشاكل كتب:

    سلامز

    أجمل تعليق و أظرف تعليق على الموضوع قاله صديقي هو : ديل أسلاميين في بعضهم يعني زي الراجل ومرتو بكره ممكن يرجعوا لبعض

  24. بدرى كتب:

    اصدقائى الجدد تحياتى مواضيعكم شيقة وعجبتنى جدا ومعاكم الزول بحس انو بدا يعرف الحاصل حولو ايه امنياتى تواصلكم معى والترحيب بى…….

  25. حاج أحمد السلاوى كتب:

    ولدنا مشاكلز ..وبقية صفوة الأخيار ..
    وبما أنك من مواليد نظام الإنقاذ فهنالك الكثير من المعلومات الغائبة عنك ومن الصعب أن تعرفها عن طربق قراءة التاريخ فقط لأن المعيشة تغنى عن كثير من كلام الكتب ..
    نظام الإنقاذ كان من ضمن المنظومة السياسية التى جاءت بعد الإنتفاضة ضد المرحوم جعفر نميرى ..نعم كانت هناك فوضى لا يمكن إنكارها من جميع الأحزاب بما فيهم الجبهة الإسلامية التى قامت بليل أسود بهيم واستولت على السلطة بحجة الفساد والإنهيار الإقتصادى الذى كانت هى ( أى الجبهة الأسلامية ) لها الضلع الأكبر فيه … ولعل ذلك الفساد قد صاراً جزءاً لا يتجزأ من حياتنا اليوم وكما قال شيخكم الذى علمكم السحر ذات يوم أن نسبة الفساد هى 9% فقط ونسى الصفر.
    الذى اود أن اقوله هو أنك لا تستطيع ان تجبر الناس كلها على رأيك أنت .. من أنت يا اخى حتى تجبرنى على سياستك الخرقاء ولعلك تذكر مدى العداء الخارجى الذى جلبه علينا الرائد يونس ..فى حديثه اليومى الصباحى من اإذاعة الدولة الرسمية آنذاك ..لا أظنك تذكر ذلك !!
    فلم تكن الإنقاذ على حق فى يوم من الأيام مطلقاً ولن تكون ! ولازال قادتها يتخبطون فى كل واد.
    لقد نجحوا فى إيقاظ التعرات القبلية القبيحة وإذلال المواطن السودانى تحت شعار دولة التوجه الحضارى الزائف .. ففقدنا توجهنا القديم ولم نحصل على التوجه الجديد الذى راح فى شربة موية ..ولم يعد أحد يتحدث عنه اليوم .

  26. حاج أحمد السلاوى كتب:

    أقصد المعايشة تغنى عن كثير من كلام الكتب..
    المعذرة .

  27. نيام كتب:

    غريشن بريشن كريشن قرشت
    انتهت اللعبة تعبت و فرشت
    ستارة و فصول
    محب او عزول
    حديث الصحافة
    مليان بالحقائق وبعض السخافة
    بس الاشارة
    للميت حداد !!
    وللنار الرماد !!
    وربك بسامح جميع العباد
    الا العقوق
    وكمان الحقوق
    صحيح شعب صابر
    مرات يعمل اطرش تضج المنابر
    ويعلو الهتاف
    يظن المكابر
    انو الشعب خاف
    صحي الشعب خاف؟؟
    اوقف مكانك دا الشعب بيليا
    بيفهم سياسة وموسيقي و موبليا
    و معلم و ساخر
    ما تجيش يوم تقلي تعالا ورايا
    حاكشف لك ستارة ملانة مرايا
    وتشوف المسارح و شوية الفصول
    حاصبر عليك و كمان ع الفول
    يقصر زمانكم و يمكن يطول
    بس اصبر كمان
    يطول الزمان و يقصر زمان
    غريشن بريشن كريشن قرشت
    انتهت اللعبة تعبت و فرشت

  28. ودالخلا كتب:

    سلام ياقبيلة،،
    سديقي العزيز أسدالخلا الوروار أشكرك كثيرا” وكثيرا” جدا” علي هذا الراابط الجميل، فقد أهديتني نفحة جميلة وصادقة عن أناس بحثنا عنهم كثيرا” حتي حفيت أقدامنا وتمزقت قلوبنا في هجير رمضاء السياسة الحارقة والرعناء في بلادي، وهذا الرجل ربما كان من أولئك الصادقين الذين ندر وجودهم في هذا الزمان الغابر يا سديقي، فهو منارة تنير الطريق وقدوة حسنة لطلاب الجامعة نصف الحاضر وكل المستقبل ليحذو حذوه….وأتمني ان يستمر هذا البروفسور في موقعه وليته يرتقي مراق أعلا في سلم السياسة لأمكانية التغيير في واقع الحياة المظلم في بلادي،،، ولا ينكر الفساد والأنزلاق نحو الهاوية ألا مكابر أو غافل عما يُدبر تجاه الوطن… فكم مواطن صالح مثل هذا الرجل نتوقع وجوده بين أظهر الناس حاليا”….
    أتمني أن يجتهد جمعنا هذا للتغيير وأن نترك العويل والبكاء علي الماضي ومافعله الآخرون، ولنبحث عن المخارج الآمنة لتلك الأمة التائهة في بحر الزمان والتي في لهفة بتسأل عن من يرعاها بالحب والآمان ياسديقي اللدود يانور الأمل…

  29. عزت كتب:

    تسلم يا أبكرون دائما ما تضعنا في الصورة… جنس كلام البروف دا يطرب و كويس قالوا أتبع قوله بالعمل على الأقل فيما يلي الدبابين و العقبة على باقي الكلام…. و أريتو يتهنى بكرسيه في جامعة الخرطوم عله يرجع اليها ألقها القديم….

    و بوركت يا نيام دائما في قلب الحدث و فعلا يا نيام شعبا بيفهم في السياسة و الغنا و الموبليا ما يتخاف عليه … علة طولو الجماعة ديل ما يقوم ينسى السياسة و يتبقى له الباقي…

  30. بكرى ود السودان - كتب:

    شكرا لهذا الموقع الجميل المفهوم — لانه ينورنا باشياء فى السودان لم يكن لنا علم بها — اشياء من خلال المواضيع المطروحة ومن خلال المداخلات التعليقات على حد سواء — سيرو الى امام وتحياتنا

  31. الأخ /مشاكل … سلامز
    اشكرك على الابيات الشعرية الرصينة المعبرة التى تحكى حالنا فى سودان العزة والكرامة المزعوم سودان المشروع الحضارى الذى تبخر مع مهندسه الشيخ الجليل واصبحنا منذ امد بعيد نتبخر بدخان محرقته ( وقالها مهندسهم ود عثمان فى الاهرام المصرية … نريدها دولة علمانية نفصل فيها الدين عن الدولة ) فاى وضوح اكثر من هذا ؟ !
    أما اباذر واخوته فمن ابسط قواعد المهنة ان يكون الصحافى مدركاً لمخاطر ما سينشره فلا اظن ان رأى الشعب بهذه الدرجة من الغباء بان تنشر موضوع حساس من هذا القبيل ولم يكن لديها من الأدلة والبراهين ما يعضد ما نشرته ( فابا ذر يعيش وحده ، ويمشى وحده ، ويموت وحده ) لانه نذر نفسه للحق .
    ثم لماذا هذا الغموض فى جلسات المحاكمة أليس الأمر فى مصلحة الشعب فلماذا يغيب صاحب المصلحة الأصيل ، وتنعق البوم ؟!!
    للــــــــــــــــــــــــه درك يا وطن

  32. ابكرون كتب:

    ليتنا نتعامل في سياستنا التأديبية مع الفساد كما نتعامل مع الخصوم …..مطنشين 20 سنة علي فساد شارع الانقاذ الغربي الي ان تنسى القضية وغيرها …وطناااش علي فساد سوق المواسير والادوية الفاسدة وصيانة الشوارع والنهب والتقصير الاداري والانفلات الامني وتمرد العدل والمساواة واختراقها لتخوم العاصمة ….. لكن سريعين جدا علي ردع الصحافة والصحفييين …..عجبا

  33. ودالخلا كتب:

    ياصديقي ان نسيتو حاشا حاشا مانسينا، وطالما وجدت مثل هذا البروف، وطالما توجد مثل هذه البارقات من الأمل بين هاتيك الغيوم والأعاصير فالعشم كبير في أنبلاج صبح العدالة والمساواة وشروق شمس الصباح الدافئة علي الطرقات، وآمنة تلك الفتاة الآمنة ستمضي للحياة بين السابلة لا تخشي الا الله والذئب علي غنمها ياسديقي..
    اتمني أن يترشح مثل هذا الرجل لقيادة الأمة واتمني من كل كل قلبي أن يستمر في موقعه علي الأقل ، فحدسي يحدثني بأنه جنا فراق!!!
    فهل نحن سعداء لهذه الدرجة حتي يقود بلادي مثل هذا الرجل، ام كُتب علينا الشقاء والتعاسة ان يقودنا عُميان البصر وفاقدي البصيرة!!
    لو تكرمت يا سديقي بتكملة الجميل وأيراد الرابط لبقية الأسئلة ال11 فلم أستطيع الوصول اليها سبيلا..

  34. ابكرون كتب:

    بروف ادريس 13

    http://www.altayarnews.net/shownewstxt.aspx?cno=13942
    وبحاول القي البقية

  35. عزت كتب:

    صباحاتكم خير يا أحباب

    و مرحب بيكم يا البدري و مفجتوع (اسمك صعب بلحيل) و ود البدري سمين…. أهلكم و أحبابكم يتمنون لكم أطيب الاقامة و مراحب يا بكري يا ود السودان و ياهو أولاد السودان ديل العليهم العشم…. كان جوة البلد و الا خارجه فالهم واحد……. و خليكم قريبين

  36. عزت كتب:

    (فحدسي يحدثني بأنه جنا فراق)

    حلووووة يا ود الخلا
    انشاء الله ما يصدق حدسك هذه المرة و يتشبث البروف بالكرسي فالجامعة و الوطن في أمس الحوجة اليه..!!

  37. ياسين شمباتى كتب:

    الاخ بدرى.سلام..
    ومرحب بيك انابة عن الجميع وياريت يدوم التواصل…

    الاحباب اهل المدونة…سلام..
    هو ابوذر قال شنو!!؟ وفلان دااك قال شنو؟؟والقوات الاممية ودخلت,,والجنوب ح يمفصل,,والمحكمة قااااااااادة,,هو المافى شنو؟؟؟

  38. حاج أحمد السلاوى كتب:

    السؤال الأهم يا شمباتى ..إنت المرقك الليلة شنو من صباح الرحمن من بلدك .. بلد الوليد ..وفى ناس كانوا بيفتشوا عليك وسالونا عنك .. قلنا ليهم ما آن الأوان عشان يطلع من …….. مخبأه ( ما عاوزين نقول الأسم التانى ).. و شمباتى دا بيظهر دايمن يوم الأربعاء .. إن شاء الله تكون رسائلهم وصلتك .. كانوا عاوزين يعزوك فى فقيد الشباب زميلك د. يسن ابراهيم ..
    أظنك عرفتهم .. ساكنين الرياض ..ناس طيبسن خالس ..
    ما فيكم زول رحب بالوافد الجديد مفجتوع ( كدا صاح .. يا سيد الإسم ؟ )والظاهر عليهو مفجوع وموجوع شدييييييييييييييد من ناس التوجه الحضارى ..نرحب بيهو ونقول ليهو حبابك عشرة ..وحللت أهلن ونزلت سهلن ( حسه يقول الزول ما بيعرف يكتب عربى ..ولا شنو ).

  39. حاج أحمد السلاوى كتب:

    ابكرونا .. سلام

    غايتو امبارح إتونسنا جنس ونسة .. اريتا ونسة حبيبك البريدك ..
    تقول لى قال ليك !!

  40. ياسين شمباتى كتب:

    ابوى السلاوى(هنا بس)…سلام..
    انا ما شغال فى مركز تانى,,ولا نسيت؟؟ ولا ما مركز معاى!! اما عن ناس الرياض فرسالتهم وصلت تب!! وهى وصلت لدرجة انو يسالوك منى؟؟؟؟؟ حكمة والله!!

    ابكرون..سلام..
    شفت الزول دا والعمايل البعمل فيها !!؟؟ الحمدلله بس,,نقول شنو عاد..

    مفجوع..سلام..
    ومرحب بيك وياريت فجعتك تزول قريب….

  41. زووووووول كتب:

    د.عزت والضيفان سلااام
    اولا داحى الكومندان ابكرون على ما اتحفنا به وما ظل يقدمه للمجموعه سواء ايميليا او سودانناويا !
    لكن بصراحه ابوذر لم يوفق فيما كتب وكان طابع مقالهالتحريض من غير ما هدى ولا برهان .وهو طابع احاديث وكتابات المؤتمرالشعبى منذ المفاصله .
    لكن المحيرنى جماعة ابوذر ديل قالوا شنو يا ابكرون

  42. DAKEEN كتب:

    ابو ذرممكن قال :
    18 دولية اوربية تصادق بفتح قنصليات لها في جتوب السودان في حال الانفصال؟؟؟؟؟؟؟؟؟؟؟؟؟

  43. ابكرون كتب:

    مفجتووووع : ههههههههههه والله ده الذ اسم من شدة ما مفجوع لمن افجتع…ياخ وايم الله كلنا مستفجتعين لكن نقول شنو … طقينا…مرحبتين حبابك سلامات..
    شكرا يا عزت ويا زووووول
    شمباتي : ياخ عمك ده سعب جنس غايتو…بس ام المؤمنين تسافر بي هنا …يشتت بي هنا…..هو مالو ههههههههههه؟
    هو هو هو هو …..صحي ماشي عمره الرياض ؟

  44. aflaiga كتب:

    مرور للتحيه والشوق وجيينكم قريب بعد العوده من السفر

  45. التركــــى كتب:

    سلام يااحباب …. يادكتور الكلام خطير جدا وبستنكره حتى لو كان معاه ادلة وبراهين وخلينى امشى ابعد من كدة وأقول انها تشبث خيانة عظمى بس ماأظن بستحق الحكم دا فى بلد بتحكم على مغتصب قاصر بالسجن سنتين والجلد …. الله فى

  46. ياسين شمباتى كتب:

    ابكرون..سلام..
    والله انا ذااااتى محتار هو مالو!!!؟؟ قلت لى العمرة وين؟؟هى بفتح العين ام ضمها ؟؟؟ورورووووووووك..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s