والسعادة بقت (لحم…!)..وهم والحلوه من غير طعم…

Posted: الخميس,22 يوليو, 2010 by ابكرون in إجتماعية

 

نحن شعب غير سعيد كما تقول التقارير وكما يقول واقع الحال المرير…. والسعادة المقصودة هي سعادة الدنيا وهي سعادة ظاهرية اول علاماتها الرضا والقبول بالواقع  والإنشراح وهي تظهر واضحة وبينة في القسمات وفي الافعال وردودها وفي طريقة الحياة وفي تقبل الواقع والرضا به حتي ولو كان لمما وشحتفة وشظفا ….ليس من الضروري ان تكون غنيا ( بيت وزوج ووظيفة  ومال ) او موفور العيال والصحة لان تكون سعيدا ، فكم من معدم لا يملك شيئا وقنوعا بحاله لكنه سعيد وسعيد جدا….وكم من غني لديه كل مباذخ ومباهج  الحياة ولا يبدو سعيدا وبعيد كل البعد عن السعادة …طبعا لا اقصد تلك السعادة المرتبطة بالدين والعقيدة  في الدنيا والآخرة (فهو في عيشة راضية )  فتلك شئ آخر لا يُلقاها الا كل ذو حظ عظيم ،  بل الحديث هنا  عن سعادة الشعوب عموما  بالدنيا مع إختلاف الديانات والملل وان اختلف تعريف السعادة بين هذه الشعوب  .

اذن لماذا نحن( كسمة عامة)  شعب تعيس ، متجهم ، (تعووووب) ، متعكنن ،غير راضي ،، ؟ لحظات السعادة في حياتنا قليلة جدا وسريعة نكاد لا نشعر بها حتي لو عشناها لحظات ، هل نحن شعب خلق للشظف والعبوس  والتجهم….نعشق الأحزان  والتعاسة وصار هذا واقعنا ؟  هل السبب فينا ام في ولاة  امورنا وحكوماتنا المتعاقبة التي لم تسعدنا بل اجتهدت في إشقاءنا ؟ هل مر علي هذه الارض (السودان) امم من قبلنا كانوا سعداء ؟

ما حداني لهذا  كله تقرير( قلوبال) عن اكثر الشعوب سعادة (وبالتالي تعاسة لو طالعت الجدول من الاخر للاول) ….نحن( كالعادة ) في مؤخرة العالم العربي سعادة (الأوائل تعاسة) …..ورقم 130 من 155 عالميا سعادة…..

طالعوا التقرير…ولا تغرنكم صورة (الجاز ) ضاحكا …! فلا اظن انها حالة من السعادة….!

http://www.alrakoba.net/news-action-show-id-3434.htm

Advertisements
تعليقات
  1. عزت كتب:

    سلام يا ابكرون

    عارف أنا جيت داخل قبل شوية من مشوار الخدار…. و طبعن زمان لمن تقول ماشي الخدار معناتا حتجي شايل لحمة و خضار و معيناتهم من زيت و بهارات و الذي منه…

    تخيل جيت شايل لحمة من غير خدار…. لأنو ببساطة لقيت الطماطم الكنا بنشتريها بالصفيحة مفعصة و سغارة تخجل تشتريها و لمن واحد حاول يفك الأزمة بتاعت الطماطم من أثيوبيا حجزوا ناس المواصفات طماطموا… قالوا كبارة و سمحة ما مطابقة للمواصفات… و هسة ما عارف سيد الطماطم قاعد يطقع في ياتو صينية لأن طماطموا باظت..!!

    و لمن حاولنا نستعيض عنها بالعجور هو ذاتو اختفى فوجدته في مكان قصي بعد تفتيش و الواحدة بجنيهين…

    و الغريبة الأسبوع الماضي كان الطعام المفضل للكل هو الدجاج لغلاء اللحوم فقام (الوالي) الهمام قال انو الدجاج دا حيعمل ليهو منافذ للبيع و الكيلو بتسعة و نص فقط لا غير …. تخيل اشتريت دجاجة من محل ليس له علاقة بانتاج و تسويق الدجاج و جابوها ملفوفة بكيس أسود امعانا في دمغها بالسوق الأسود و لم استطع فتحها أمام الدكان خوفا من العين… مش يا عنية لكن عين الحكومة التي ترصد و أدخلت اليوم الدجاج الى السوق الأسود….

    جيت داخل لقيت الأنبوبة خلصت…
    و بتي قزار عربيتها براهو طرشق
    و شنو تاني يا ربي…. أيوه من دون الأيام قامت البت غسلت أمبارح الهدوم كلها فهسة أنا حايم بتي شيرت و بنطلون ما عارف حأمشي بيهو الجامع كيف…

    هذا كله و ما زالت الساعة عشرة و نص… ربنا يستر لمن تجي عشرة و نص بالليل حيحصل شنو…!!

    تقول لي سعادة، زد على ذلك ما ضحكنا حتى بدت نواجذنا من 83 …
    أنتو عارفين الجماعة ديل بيكونوا نسوا الصفر العلى اليمين الفي المية و تلتين دي…………………. قال سعادة قال..!!

  2. ابكرون كتب:

    عزت : دي حالتا بلد بها كم نيل وكم نهر غيرو واراضي زراعية طماااااطم بالله مش عيب….اذا في قطر الكيلو ب 2 ريال (اقل من جنيه ونصف) ومستورد من جنوب افريقيا وتركيا…..قال وزير زراعة وقال متعافي….!…ياخ دي اصلها جداده ولا افيون……دولة 21 سنه ما وفرت ابسط الاشياء دي حتوفر سكن وتعليم وووووو متين…..بكل اسف السعادة في سودانا مرتبطة بالمعيشة…..والناس غيرنا حلت المسألة دي منذ 1900 م
    ضحكتني لكن ياخ امش صلي ببنطلونك في مسجد ش 15 هههههههههه

  3. ياسين شمباتى كتب:

    الحبيب ابكرون..سلام..
    سعادة ايه الانت جاى تقول عليها ؟؟دى خلاص بقت حالة غير طبيعية لا تدوم اكثر من ثوانى وبالكتيييير ساعتين,,,وتزول قبل زوال المؤثر ذاتو !!!
    وعجبنى جدا المثل الكاتبو بى خط صغير دا (وهم والحلوة من غير طعم)..

    عزت….سلام..
    والله وجعت قلبى ودمعتى قربت تفر,,دا شنو دا البؤس دا !؟؟ الله المستعان..

  4. ودالزبير كتب:

    شباب

    جمعه مباركه للجميع

    عزت المرطب ( زد على ذلك ما ضحكنا حتى بدت نواجذنا من 83 …)

    مووووووووووووووووووووووووووووووووووووووبالغه ههههههههههههههههههههههههههههه

  5. ابكرون كتب:

    شمبته يا مفص : (مفص) دي اسال منها بشارسخصيا و بس بالايميل…ههههه:
    دي أغنية زيدان : (والسعادة بقت وهم والحلوه من غير طعم)
    وبرضو تصدق (أكونك)… وفي روايةعمر بن الشاعر اخونك

  6. البشاوى كتب:

    الفكفك ابكرون — هى اللى انت كاتب عنها دى لينا زمن ماسمعنا بى زول جاب سيرتا – مالك داير تهيج علينا الحكومة – اصلها الكتبت عنها دى بقت حصرية على الناس المرضى عنهم سامحهم الله – اما نحن فيكفينا الفول –

  7. خالد مدني كتب:

    ابكرون صباح الخير … والله العظيم احترنا عديل كده وما عارفين نعمل شنو … يعني شوف زي صباح اليوم ده جو جميل لمن بيغادي … جو فول .. ومطر ورزاز منعش حاجه متخلصش … لكن لانو الخريف جا فجأتن وخلع الولاية فالجمال ده كلو من الركبة ولي فوق لانو وانت رافع نخرتك تشم في النسايم والدعاش بتكون فجقت ليك كمية من الطين … واكيد حتكون استغنيت من فردة جزمة .
    كسره : صباح خريفي جميل بس قادي عربي .

  8. DAKEEN كتب:

    130 مشترك والعرب حا يسيروا الطيش ،،،، قال منغوليا ولاوس …
    زيدان زمان قال ليكم – السعادة بقت عشم
    وواحد : قال وين ياقلبي تلقى السعادة وين ..
    يكفي انه حدائق حبيبي مفلس مليانة بالعشاق وبنظروا بمنظار وردي
    يدكتور: قلت لي السعادة في السوق …. طيب الببيعو السعادة زاتهم ما حاسين بيها ،،، نعمل على نكون الاول عالميا في التعاسة ونكون كسبنا لقب متعس …
    ولكن : هل الكل يرضى عما لديه ،،،،،
    اما اخونا الفاتح خشموا زي شباك السودان في المنافسات الدولية بنقول ليه :
    اذا رايت انياب الليث بارزة —– فلاتظن ان الجاز يبتسم

  9. ابوالمنذر كتب:

    ابكرون والاخوان
    سلام للجميع
    نحن فى بورتسودان نسينا طعم المويه لانو بنشترى الجوزب3 جنيه ثلاث الف بالقديم من سيد الكارو بعد تحنسو وتديهو مويه بارده لانو بيقوليك واديها لزبون امعانا فى المساويه للحصول على اعلى سعر الغريبه بيصل سريع من مكان الخزان للاحياء لانو ما شاء الله الشوارع اخر زينه وسفلته وطوب انترلوك وترتوارات بالجنبه ملونه وبقايا صور الانتخابات(اكيد بابتسامه صافيه) على اعمدة الكهرباء بمنتصف الظلط وعلى الجنبات .
    وانا بقول كماقال اشعب لا نحكم على شى غائب يمكن السعاده ماتعجبنا كدى النلم فيها بعدين نقول راينا!!!!!

  10. ابوالمنذر كتب:

    تصويب : المساومه

  11. ابكرون كتب:

    ود الزبير وبشبش وخالد ودكين وابو المنذر …تحياتي لكم:
    انتو مش ملاحظين انو سعادتنا بقت في الشي البنلقاه …الكهربا قطعت بنرجاها يوم كامل ونسعد بجيتا والموية كذلك …والطماطم …بنسعد لابجديات الحياة….بينما غيرنا سعادتهم في سياحة جميلة لتايلاند او هاواي او كوبوكوبانا …او في رحلة بيخت لجزر شنو ما عارف ….اما المسائل الحياتية دي مسألتا محلولة وما في المقرر اساسا
    دكين : صاحبك الضاحك امس صرح انه عنده ثورة في مجال الصناعة وخاصة السكر ولن يشهد السودان تاني استيراد شوال سكر واحد ….كلام بنسمع فيه من تبيناوقمناربينا ….ههههههههههههههه
    ابو المنذر : هل تذكر مشروع طوكر (كرمبت) لحل مشكلة مياه بورتسودان وبعدها مشروع السرف باربعات وبعدها خور السلوم وبعدها ابوحمد وعطبرة ….وبكره تحلية مياه البحر الاحمر وبعد بكره مياه من المريخ يقوموا ناس صلاح ادريس يزعلوا نخليها من القمر ….بس انتو اصبروا ياخ هانت حتسعدوا بالمياه عام 2050 ان شاء الله…..

  12. aflaiga كتب:

    ابكرون : فى علم الشعبيات والازقه يقال للحاله اللتى تتحدث عنها انها ( مجارطه ) وهى مشتقه من الجراط وهو شظف العيش وكدره وضيقه والبحث عن الابتسام فى زمن اللئام ..
    طبعا ود الخلا حيجى ناطى يقول لى اسباب سعة الرزق 1 و 2 و 3 زهى مرتبطه بطاعة المخلوق للخالق وصلة الرحم وترك المعاصى وقبل ما ينط ود الخلا المشتاقين لمناكفته لينا زمن لمن بقينا نخرم ليهو ( حياه الله اينما كان ) اقول ان هناك اسباب اخرى لشظف العيش والا فشعبنا كله عاصى وقاطع رحم !!!!
    اذكر فى الماموريه الاخيره لاحدى اطرفا بلادى واخوكم زول بتاع خلا ومتمرس فى الظروف غير الطبيعيه احتار من معى فى الماموريه من الاجانب والسودانيين كيف سنبيت فى هذا المكان الذى ليس به فندق ولا يد فندق ذاتو فاصطحبت السواق وذهبت لايجار سبعه سراير قصير التيله من النوع الكرعينك بتكون بايته بره وانت بايت جوه لمن تخاف عليها من الفتنه !!!! واتيتهم بها فاستغرب البعض من وجود سراير للايجار واندهش البعض الاخر لمعرفتى بهذا النوع من الخدمات الفندقية الجراطية .. وسهرنا ذلك اليوم احكى لهم عن الشراب من بماراة السبايل جوه الحله عند انعدام حق المواصلات – وعن الحمام فى السوق بنص صابونه – وووو الكثير من ابداعات شعبنا الذى يطوع المعاناه .ز
    اذكر ان الاديب صنع الله ابراهيم قد ساله البعض عن كلمة المعاناه تولد الابداع فقال لو اجزتها لاتهمت بمساعدة الظلم على العسف بالعباد ..
    ابكرون لحمة شنو تعرف ورا السلخانه الكرسه كامله بى خمسه الف بتقعدك زى اسبوع بس تلقى ليها مره مجازفه تلبس كمامه وتشتغلا ليك ..
    صديقى س كل مره يمشى يجيب الكرشه للمره من بت بتبيع ورا السلخانه تقوم المره تقول ليهو عفنه نضفا وجيبا يقوم ينضفا ويجيبا تقوم تقول ليهو ما بعرف اسويها سمح فى يوم اكتشف انو نفس البت البتبيع ورا السلخانه بتعمل الكرشه جاهزه وتسلمك ليها فى عمود ساخن بارد قام قال والله فكره ( طبعا بتكونو اتخيلتو انو بقى يشترى الكرشه جاهزه ويوديها للمره ؟؟ ) ابدا قام عرس البت الورا السلخانه وخلى المره ريحتا كرشه كرشه !!!!!!!!!!!!
    وجاييك للموضوع الشيق ده ..

  13. ودالزبير كتب:

    حتسعدوا بالمياه عام 2050 ان شاء الله…..
    أبكرون شايفك ما كتبت التاريخ صح قلت أعدل ليك
    2500 م وإنت الصادق هههههههههههههههههه

  14. aflaiga كتب:

    تعرف يا ابكرون بالمناسبه دى عندى ود اختى لقبو ابكرون امبارح ضحكت اتذكرناك وسبب ضحكنا لمن امو قالت الاستاذه بتشتكى منو فى الروضه لانهم من يوم بدو العام الدراسى ما قادرين ينظمو طابور الصباح لانو ابكرونا بيفرتك الطابور كل يوم يا بالضحك يا بالدق يعنى يوم يضحك الشفع لمن يلخبتو الطابور ويم يطقطقم لمن يفرتق الطابور قلنا الود ده طالع لخال خالو ولا شنو ؟؟؟
    تعرف يا ابكرون التصانيف العالمية دى انا شاكى فيها بالجد وما عارف الاليه ( حلوه دى ) والمعايير البيقيمو بيها شنو ؟؟ لاننا فى مجال السعاده دى بالذات شعب سعيد ومحبوب جدا ويكفى انو الله يحبنا وما اظن انو فى حب يا اخوانا اكتر من كده لمن يقوم بتلينا بلوه زى دى عليك الله مش مفروض يكون فى معيار للابتلاء وحب الله ؟؟ تخيل لو بقى فى حنكون نحنا الشعب الاول ومش كده وبس اعتقد اننا سنكون مقياسا كريختر فى الابتلاء وسيقال البلد الفلانى محبوب من الله بدرجة 7 بمقياس ابتلاء السودان !!!
    عزت : انا عارف انو من 89 دى معقوله لكن 83 دى مرتبطه بى شنو ؟؟؟ يكون ده عيد ميلاد نانسى ؟؟؟ هههههههه
    شمباتى : شنو يعنى الواحد يطلع من السودان وبروضو مصر يداقرنا فى معاناتنا الحلوه دى ؟؟ اسى عليك الله دى بتجى ما نشاركك فى المجاوره وتشاركنا فى المناوره ؟؟

  15. aflaiga كتب:

    ود الزبير : شايفك بقيت تشمت فى ناس بورتسودان ؟؟
    ابو المنذر : عليك الله رسل لينا فى الميل صور قديمه للود شكسبير ده وهو بيستحمى حى ووب ؟؟ بتعرفو الحمام حى ووب ؟ وبالله ذكرو لينا ايام زمان عشان ما يعمل لينا فيها بتاع دشوش ومواسير ؟!! تحياتى يا منذر وليك شوقه ..

  16. moshahidah كتب:

    سلام يا ناس ..
    ابكرون طبعا احنا لو قالنا سعداء نكون مفتريين و السعادةحتتشكل و تدينا كف لتشويه سمعتها ..ما علينا انا لفت نظري في التقرير حاجه تانية ..الناس دي مبسوطة من الاستقرار المالي و السياسي غالبا الموضوع ما قناعه و رضى عشان كدا بتلقي الدنمارك و الدول الاسنكدنافية تتصدر القائمة مع ان الروحنيات هناك طبعا منتهية و كمية الا دينين والملحدين كبيرة . هم باختصار ناس غندهم فلوس وما عندهم حريه و ما عندهم شغله بباقي الدنيا البنكدهم شنو بالذات انو حتي احساس الذنب والضمير بكون مات لانو معمي علي قلوبهم ..والله اعلم .

    يلا تجي تلقي الامارات في مركز متقدم جدا جدا لانو بلد اختياري حتي الاجانب العايشين فيه بمزاجهم وبحدود التقاليد و حاسين انو في انجاز في تطور في تسامح و انو الاخر متقبلهم وهم متقبلينو ..

    الدول الفيها حروب و كوارث زينا في الاخير ..

    لكن مثلا تلاقي اليابان بعيد ورا كم و 80 رغم انو الناس دي وصلت مرحله مبالغ فيها من جميع الجهات و عندهم حرية واي شئ ؟؟؟ صراحه ما فاهمه مالهم .نفس الوضع ماليزيا كم و 90 ؟؟

    امريكا رغم الازمة الاقتصادية فوق لسه ..امكن عشان اوباما و الاحساس الدائم انو الحلم الامريكي ممكن .

    السعودية كم و 50 و لسه اعتقد حيطلعوا اكتر لانو عندهم الروحانيات و حكومتهم مريحاهم حتى حته الحريات الكانت مضايقاهم ماشه للحل و الملك عبد الله زول متنور و بعمل في تغييرات ثوريه..حتى المغتربين هناك لو بطلوا استهبال مبسوطين ..ما تصدقوهم . دي بلد داعي ليها ابراهيم عليه السلام .

    وفي الختام ..كله كوم و الاسرائيلين الفرحانين ديل كوم رقم 8 ..احييينا ننكد عليهم كيف السجم المعكرين امه كامله ديل ..

    معليش طولت و اخدت راحتى في تدوينتك يا ابكرون ..معليش

    http://moshahidah.wordpress.com

  17. حاج أحمد السلاوى كتب:

    الكاشف أخونا الفكف أبكرونا ..
    السعدة دى ما خشم بيوت زى ما بيقولوا والناس ممكن تختلف عليها فى مقياسها إختلاف شديد..وكل زول بهموا .. إلا جحا وعمو ..
    الناس القاعدين داخل أمازونيا كثير منهم بيعتقد إنو الناس الطاشين برة أمازونيا سعداء وعايشين آخر نغنغة ..لاكين أنا عاوزهم يعرفوا إنو الزول ( ابو واو واحدة ) ما ممكن يلقا كل شى فى الدنيا دى .. وأظنك فاهمنى كويس ..والمسألة نسبية آخر المطاف ..
    بنعرف ناس كُتااااااار بيسافروا إجازات ممتعة لمحلات بعيدة ويتفسحوا وينبسطو ( ربنا يزيدهم من نعيمه ويبسطهم إن شاء الله .. اللهم لا حسد )لاكين فى ناس زى حالاتنا كدة لازم تقضى الإجازة فى السودان ونقضى الإجازة كووووولها جرى وطيران عشان تقدر تخلس الحاجات المعلقة من السنة القبالها ..أما أكان قاعد تبنى وتأسس فى مأوى ليك ولعيالك ..أنسى حكاية الإجازة خالس ..وتأكد تمام إنك لامن ترجع لمقر عملك أنك عاوز إجازة عشات ترتاح بس من الحصل ليك فى الإجازة الرسمية..
    ويا قلبى وين تلقا السعادة ؟ .
    وبعد دا كووولو نرجع ونقول الحمد لله رب العالمين على الشى اللى ربنا قسمو لينا فى الدنيا دى وأحسن الزول ما يعاين لفوق عشان رقبتك ما توجعك .. عاين للأقل منك عشان تشوف النعمة الإنت فيها وتشكر ربك عليها ..وهكذا حال الدنيا كل واحد ينظر ليها بمنظار مختلف من التانى ..
    وبكرة يمكن نلقا السعادة ..
    فى حد عندو سعادة زايدة يسلفنا لحد ما نلقا السعادة حقتنا ..

  18. aflaiga كتب:

    الاكارم المغتربين سلامات : والله نحنا لا حاسدينكم لا شيء ولو حاسدينكم بنكون حاسدينكم فى انكم ما مستمتعين معانا بالمعاناه دى لانو اى يوم يعدى عليك بره البلد بتكون فقدت فيهو طعك الشوشوه فى نار البلد دى وهو شوشوه لذيذه زى شوشوة اللحمه البتطلع نجيضه فى النهايه يعنى ممكن تعتبرو السودان ده تريننق للعيشه بره يعنى اسى الواحد لو مرق بره انا شخصيا اعتقد انو حيكون عندو وقاية كبيره من التعب والرقاد الكعب وحيكون اتجاز حتة المعاناه وفاضى جدا للانتاج عشان كده الواحد بينضح الدول الخليجي انها تستورد مغتربين من الشعب الفضل عشان يستغنو عن دلع ناس السلاوى بره واهو نبقى ليهم زى الباكستانيين يعنى سودانى جاى مسخن ولا باكستانى جاى تيوبلس !!! ولا شنو يا حاج السلاوى ؟؟ وممكن برضو تلقى بره دعايات للعمل على شاكلة :
    اخى الخليجى هل تعلم انو هناك سودانيين رخاااس ضايقين مرها وجاهزين لا دلع لا حركات لا مستوى معيشى وظف سودانى جديد واخذ هدية اتنين معاهو …. اها حتخشو وين ؟؟؟ خلونا هنا وانا اقترح تدفعو لينا ضريبه حراسة عقاب …

  19. ابوالمنذر كتب:

    ابكرون
    ياخى انت ما متابع حالص عملو لينا 15 محطة تحلية من البحرالاحمر بتكلفة……. ( باء وله ميم الله اعلم) ليون دولار وقالو خلاص وقلنا حانصدر ليكم فى الخليج وفكرنا بجديه فى المشروع تتخيل صدرنا اطفالنا لولايات السودان والبلد فضت هذا الصيف ولما سالنا قالو قطع الغيار والحصار الامريكى ورجعنا لسلاح الدعاء اللهم دمر الامريكان واليهودوفك اسر الحيكومه يافتاح ياعليم .. اصلو النيل مافى طريقة خايفين من لعنة الفراعنه وما حدش عايز يتبرع بحسناء لارضاء اله الخير…
    قلنا نكوس الطراوه والرويان ونمشى بلاد بره برضو الناقل الوطنى اسروه مالو قلبى الاسروهو هواهم واصظفاهم بى قساهم مرمطوهو …
    افليقا
    لو رجعنا الارشيف بتشوف صاحبك من الساعه 3 للساعه 7 فى البحر ليطفى حمو البحر وليس النيل وضهرية عربيتومليانه جركانات .. لكن برضو قلبو معانا وراجنو ذى جمال الوالى كل يوم بدخل 50 تانكر ماء بورتسودان وتوزع مجانا فى الاحياء الطرفيه يعنى جزام مريخى للمدينه ويا سيدى البيه مدد..
    دوك عزت
    يعنى كيف طماطم الحبشه يفوتنا ويجيكم ما نحن الوكيل الحصرى لتصدير الحبش ذاتم ليكم وما شفناهم شايلين طماطم

  20. aflaiga كتب:

    المنذر : انتو فتشتو الجو من الحبش كويس يكونو شايلينو فى الضهريه ؟؟

  21. حقاً … يا ابكرون السعادة بقت لحم (وليست وهم ) لأننا حتى الوهم قد شبعنا فيه ولم نشبع من اللحم ونحن ارض المليار راس من المواشى بكل انواعها ، ولا اعتقد ان هذا الحال محض صدفة او قضاء الله وقدره ان نظل عابسين مدى الحياة ، لايوجد فى هذا الكون ثابت لا يغير ، وقيل دوام الحال من المحال اذا اين الداء لنجد له الدواء ؟!
    بلا أدنى شـــــــــــــــــــــــــــــــــــــــك الحكومات لها نصيب الأسد فيما آل إليه حالنا ولكن ……
    يجب ألا نعفى انفسنا جميعا من المسئولية لاننا صبرنا بل خضعنا وركنا الى هكذا حكومات وهى تجلد على ظهورنا عشرات السنين ونحن ننحنى ونسمع ونطيع (دون ادنى ) شىء من التفكير والانتصار للحق

    فالكل مسؤول وفق المسموح به له من رعاية ومسئولية ( النفس ـ البيت ـ الاسرة ــ الشارع ـ المدرسة …… وهــــــــــلمجـــــــــــــــــــــــــــــرا ….. حليل زمن الصادق المهدى …. كان يمكنه ان ينجر لنا عبارة تصف هذا الواقع المعاش

    اللهـــــــــــــــــــــــــــــــــم إنا لا نسألك رد القضـــــــــــاء بل نسألك اللطف فيه !!

  22. ابكرون كتب:

    افليقا ، سلولو ، مشاهدة كيفكم
    والله يا افليقا لو ما قلته في النهاية صاحبك عرس ست الكمونية كان امكن ركبته طياره وجيت عقدته ليه عليها….يا دي مره سجم ساكت كان يفتح مسلخ كيري في البيت ويستنسخ كرشات بس ش/ع (شديدة العفانة كيتن فيها….
    ما تخاف سديقي ود الخلا كتلته ليه الدش بالتركيز علي سعادة الدنيا فقط الما عندها علاقة بالدين( راجع المودووووع) … برضو خايف من نيرانو السديقة…..
    ود الزبير زعلت ابو المنذر(ياخ انا بورتسودان دي ما برضي فيها عندي ليها (عشق ماله آخر)..
    ابو المنذر : الشئ من ما يبقي كتار تعرفو لعبه وراها غش تتذكر ماكينات الكهرباء الجابوها في اول العهد وكان عددها 30 في شكل كونتينرات كل واحده بتنتج واحد ميقاوات كانت مضحكة اسه وينهم ؟؟؟؟؟الشئ البعرفو محطة التحلية بتكون واحدة وبتنتج اولا كهرباء قدر سد مروي مرتين وبتسقي ملايين من البشر….غايتو بس الله يعين
    مشاهدة:احنا لاقنك وين اخدي راحتك البيت بيتك….
    لاحظي يا مشاهدة انو كوستاريكا السادسة وبنما رقم 12 اذن المقاييس ما غني لكن شعوب مرتاحة نفسيا يمكن لجمال بلادها ويمكن لسهولة الحياة ويمكن للاستقرار السياسي…!
    سلولو : متوقعك تفتي لينا الجاز ده البكلكل فيهو منو ؟ مبسوط كده مالو…..بعدين يا سلولو انت الايام دي سعيد شديد ما تخليني افتو….بعدين يا شيخنا الناس المغتربين الغير سودانيين بسعدوا بالاجازة نحن نشيل ليها هم ……

  23. ابكرون كتب:

    ود الساته : هي قربت تبقي ود السعادة لكن ابت التاء الا ان تقهر الدال في محل كربنة تقديرها تعاسة….صدقته والله العيب فينا جميعا وحكوماتنا بتشبهنا…واقعنا المعاش 21 سنة نحن مشغولين بمشاكل الإنقاذ…الجنوب ،الجهاد ، الدفاع الشعبي ، الخدمة الألزامية ، اتفاقية نيفاشا ، ابوجا ، السلام ، الانتخابات ، المحكمة ، الاستفتاء……..ولسه الفلم الهندي مستمر

  24. حاج أحمد السلاوى كتب:

    أبكرونا .. ابو الجاز قاعد يضحك على الشعب السودانى الفضل لسه عايش ..ربنا ينتقم منه إن شاء الله شر إنتقام هو وزبانيته ..
    إنت شايف إنو سعادة اليومين ديل سعادة ؟ دى فرفرة مذبوح يا صديقى اللدود ..اليوم بيحاول يقنع نفسه إنو يبقا سعيد .زوشةف صاحبك ابو الفاليق بيقول فى شنو ..قال دلع ناس السلاوى قال ..والما عارف يقول عدس ..صاحبك افليقا قاعد جنب عواطفه ومبسوط ىخر قيراط ويوصفنا بالدلع .. طيب إنتظرنى يا افليقا لامن اقابلك بالدرب والإجازة قربت ..وياريت تجى تشوف نحنا بنسوى فى شنو لمدة اسبوع وااااحد بس ..
    وزى ما قلت الواحد يشيل هم الإجازة من الشى الراجيهو.. نحنا نلقاها من ديل ..ولا من .. ديل ..
    وقول لى قول .. بس وين نلقا السعدة ؟

  25. حاج أحمد السلاوى كتب:

    قول ليا قول .. بس وين نلقا السعادة ؟

  26. نيام كتب:

    ابكرون:
    خليني اجيب م الاخر..اولا بالتبادي الزول البضحك دا بضحك فوق فهم …يابوي دا ضامن جازو كان البطرول طلع و لا نزل…هذا اولا ..
    ثانيا عليك الله لمان شفتو بضحك ما استغرشت لزول شعبو باكي و هو ضاحك و ما عليهو…والله في البلد دي تضحك يقولو مجنون…ياخي الناس ما بتتلم الا في بيوت الفراش و بعدين ينبسطوا لمان زول يموت الواحد يلاقيك مبسوط يقول ليك اسمع مشيت لناس فلان ..
    -ليه في شنو
    -كيف ياخي فلان ما مات
    -تقوم تقول ليهو الله يرحمو و الله بختو دا خلاس ارتاح…
    تصور يحسدوك في موتك…مافي اتعس من كده طبعا…
    اما عن السؤال اذا ماكان هنالك من جدودنا ناس مرحين فرحين والله ما ضنيتو … لكين كانوا اكثر منا مرحا علي الاقل مافي شكوي…
    اخيرا ارجو الا اكون اوف بوينت لانو انا ما عرفت سعادة يعني شنو!!!!

  27. عباس ركس كتب:

    سلام :
    واحد اخونا المعاناة ظاتا عانت معاهو شديد , قال لي والله الواحد يوم الله يفتحها عليهو ويقدر … بيفرح جنس فرح !!! دا تصنيفو كيف يا مرطب ؟؟؟

  28. ودالخلا كتب:

    سلام ياقبيلة،،
    سديقيّ اللدودين أسد الخلا الوروار وصديقه أفليقا مرفعين الخلا الجوعار وبقية السمار الأكارم،،
    شغلتنا عنكم الدنيا وهمومها ونبهني صديقي أفليقا في (اللقاء الأول) مساء البارحة في أستضافة صديقنا وضيفنا العزيز الأمير مُخيّر لما يدور في هذا البوست عن السعادة وما أدراك ما السعادة!!
    يقول صديقي أبكرون (ما تخاف سديقي ود الخلا كتلته ليه الدش بالتركيز علي سعادة الدنيا فقط الما عندها علاقة بالدين)، ومنو القال ليك سعادة الدنيا ما عندها علاقة بالدين، وهي الدنيا زاتها طعمها شنو من غير دين، ونحن غير الدنيا عملنا لي شنو؟؟ هههههههههههههه.
    أنتو دايريني أخش في تفاصيل عدم سعادتنا وهي معروفة للقاصي والداني وما دايرة ليها درس عصر وشايفكم تجنبتم الحديث عن هذه الأسباب في حياء وكبيتو الزوغة، ودايرين ليكم شماعة تانية ولكنها هي الأسباب الحقيقة لما نبحث عنه، وأولها مسلكنا مع أنفسنا وسلوكنا فيما بيننا وبين الآخرين ثم بعد ذلك علاقتنا بالأله الواحد الأحد وللنظر لهذه الترتيبات هل نحن فعلا” نحيا حياة صادقة مع أنفسنا وأمينين مع الآخرين، فأولئك الذين ننظر أليهم وقد أمتلكوا ناصية السعادة كما نظن ونتوهم من المنظور الدنيوي هم في الواقع يسلكون سلوك الأنسان الطبيعي الذي يوافق الدين وهو (أن تزهد في ما أيد الناس فيحبك الناس) (طبعا” حا تقول لي كيف أزهد في ما أيدي الناس وهو ملكي؟؟ ولماذا هؤلاء الناس لم يزهدوا في ما عندي أولا” حتي أزهد في الذي عندهم؟؟ ) غلوتية طبعا” لكنها هي الحياة هكذا، وأخطاء الآخرين لا تبرر لنا السلوك مثلهم، ولا مش كدا؟؟؟
    علي العموم اولئك السعيدين دنيويا” (شبعانين ولابسين وعايشين حياتهم طولا” وعرضا” هم في واقع الأمر كالبهائم يستمتعون بالدنيا من غير التفكر في مغزاها، فهل هذه سعادة ياسديقي؟؟)
    ويا أبكرون أنا عارفكم داير الحديث فقط عن الدنيا وسعادتها ودي لودايرنها زي كدا فتعال شوف ا لكلام هذا وأعمل زيو :
    كنت تحلم بالسعادة وهي غير ما انت فاكر…
    هي في كلمة مودة هي في نسمة مشاعر..
    في القلوب الما بترد أي طارق أي زائر..
    شايل هم الدنيا زادة ماليا كل الكون بشائر..
    بالطبع هي رسالة سامية تدعو للخير والمحبة ولكن القلوب لم تدرك وتعي ذلك حتي الآن، فالسعي خلف حُطام الدنيا الفانية، والأنانية المفرطة وحب الذات هم سبب تعاستنا، فعندما كانت النفوس راضية وقانعة وصادقة وتؤثر الآخرين علي أنفسها كانت الحياة سعيدة ورضية وأشهد بأننا عشنا عمرا” في ذلك الزمن الجميل عندما كنا لا ننظر للآخرين الا بمنظار المودة والرضا والقسمة بما في أيدينا..
    وأهديكم هذه الكلمات لو طبقناها سنحقق السعادة وهي المسامحة من أجل الدين والوطن ولكل المعاني التي نتمناها فينا وان نكون كما كنا لا حقد ولا حسد ولا غلول..
    وأصلي بعدكم ما هويت ولا حتي قبلكم..

  29. ودالخلا كتب:

    طبعا” فاتني أن أذكر بأن (سعادتو) جبرا هو من قام بواجب الضيافة والأستضافة لصديقنا الأمير مخير بالنادي (لا العائلي ولا الوطني) أها فضل ياتو؟؟
    فله منا كل الشكر علي هذه الدعوة الكريمة.

  30. ابكرون كتب:

    نيام الهمام : والله بولغته حتي علي الموت الواحد بقي آية الله محسود هههههه….دي بقت عليه محسدة الخليفة الرياد يزيد بن معاوية :
    فَأْسْرَعَتْ وَأَتَتْ تَجرِي عَلَى عَجَـلٍ

    فَعِنْدَ رُؤْيَتِـهَا لَمْ أَسْتَطِـعْ جَلَـدِي

    وَجَرَّعَتْنِـي بِرِيـقٍ مِـنْ مَرَاشِفِـهَا

    فَعَادَتْ الرُّوحُ بَعْدَ المَوْتِ فِي جَسَدِي

    هُمْ يَحْسِدُونِي عَلَى مَوْتِي فَوَا أَسَفِـي

    حَتَّى عَلَى المَوتِ لاَ أَخْلُو مِنَ الحَسَـد
    ركس : شكرا يا ركس زي صاحبك ده كتاااارالمعناة ذاتا كرهتم لانهم ضايقوها في تولاتا

    ود الخلا : والله يا افليقا شكيتك لي الله انت معزوم عشاء ولا توصيل اخبار لود الخلا …يعني الواحد ما يفضفض بالدس ههههههه شفته ود الشيخ جاك في حتتك ذاتها الخايف منها وتاني ما عندك طريقة الدنيا مرتبطة بالآخرة….لكن الكلام الاخير ده عجب ناس كتااااار واكيد انا اولهم

    شايل هم الدنيا زادة ماليا كل الكون بشائر..

  31. aflaiga كتب:

    ابكرون : والله قلت اخير قبل ما نبدا الاكل نكلمو عشان ما نقوم نسمع كلامو ونذهد فى الجكن بتاع جبرا ذاتو !!! لانو سديقى اللدود ده لو اتكلم بيقنعك تخلى القدامك حتى لو كان دجاج فى معية مخير !!!
    تعرف يا ود الخلا المره الجايه حاقول اسى ود الخلا ما حيجى ناطى عشان ما تجى ناطى لانك طلعت ما بتخيب الامال فى التوقعات ..
    نيام : شظف العيش وعدم السعاده ديل بالله فى مارنجان عووضه واطراف المناقل والثامنه ابتسامه كيف بالله ؟؟؟

  32. ابكرون كتب:

    افليقا : غايتو الفوله جننتها جن خليها تتبله ياخ اهو صديقك اللدود قال ليك :(وشايفكم تجنبتم الحديث عن هذه الأسباب في حياء وكبيتو الزوغة، ودايرين ليكم شماعة تانية )تكب الزوغة يا افليقا وتجري وراء الدجاج المشوي ههههه والقهوة الما خمج وبرضو المودووووع ذو علاقة بالسعاااادة ….(سعااااااادتو) ههههههههههههه

  33. aflaiga كتب:

    ابكرون : من اطرف قفشات لقاء الامس :
    1 – ود الخلا : يا جبرا الظاهر عليك فريق ونحنا ما عارفين تقول لى برضو غواصات ؟؟؟
    جبرا : اها فريق لى اربع سنه بس وبعرف حته واحده فى النادى فى ناس عارفين محل الشيشه ومحل القهوه السمحه والباسطه الحلوه يعنى فرقاء قداااااااااااااااااام …..هههههههه
    2 – طبعا الجماعه بتاعين السيرفيس بيقولو لى اى زول خاشى يا سعادتك وقومو اشبكو ليك جبرا يا سعادتك نجيب العشاء ؟؟ يا سعادتك فى ناس جايين تانى ؟؟؟ تعرف جبرا قرب يقول ليهم لا لسه العشاء بعد التمام ههههههههههههههههه .
    3 – ونحنا قاعدين جا واحد عمك معاشى كبير سالنى يا انتو ديل ناس 24 ؟؟؟ قلت ليهو لالا نحنا ناس 89 !! قام ضحك ومشى مع انو القاعدين كلهم دفعة 24 ( جبرا – عزت – ود الخلا – لطفى ) بس امرق ناس خالد مدنى طلبة الكلية الحربيه السعودية ود الزبير المستوعب باتفاقية الشرق وافليقا المستوعب مع قوات مناوى ههههههههه
    4 – عليك الله امبارح الواحد قدامو الدجاج والحاجات الحلوه وسعادتو جبرا يقوم يخش وع ود الخلا فى نقاش عن الدنيا الفانيه ؟؟؟ يا رااااجل ..

  34. ابكرون كتب:

    هههههههه
    كدي اسال سديقك اللدود بعرف الساونا وين في النادي لو عارف محلها تبقي مصيبه هههههه
    عارف امس يوم 24 في الشهر يوم لقاء ناس الدفعة 24

  35. ودالخلا كتب:

    والله فعلا” أمبارح كانت لحظات طيبات هفت فيها النفوس وصفت الأرواح وتمازجت فيها النيات وهي مثال صادق لما يبحث عنه صديقي أسد الخلا ولكنها الحياة لا تدوم أبدا”..
    أفليقا انت لمن قلت لعمك ديل دفعة 89 ما وريتو بالجديد ولا بالقديم هههههه أظنك فاهمني كوييييييس ولا شنو رأيك يا جبرا في ال up-dating دا ؟؟
    أنت يا أبكرون بتسأل عن محل الساونا الهسي ولا الزمااااان داك!!

  36. خالد مدني كتب:

    يا مخير الله يديك العافية … باريناك عشوات ساكت لمن سمنا … لكن العساكر ديل جبنتم ما طاعمة … وللا شنو يا عزت ؟؟؟ كان دايره ليها كرفته .

  37. nono كتب:

    فكر واشكر

    تذكر نعم الله عليك , فإذا هي تغمرك من فوقك ومن تحت قدميك (( وإن تعدوا نعمت الله لا تحصوها )) صحة في بدن، أمن في وطن، غذاء وكساء، وهواء وماء، لديك الدنيا وأنت ما تشعر، تملك الحياة وأنت لا تعلم (( وأسبغ عليكم نعمه ظاهرةً وباطنةً )) عندك عينان، ولسان وشفتان، ويدان ورجلان (( فبأي آلاء ربكما تكذبان )) تنام ملء عينيك وقد أطار الألم نوم الكثير، وأن تملاً معدتك من الطعام ، وأن تكرع من الماء البارد وهناك من عكر عليه الطعام، ونغص عليه الشراب بأمراض وأسقام . تفكر في سمعك وقد عوفيت من الصمم، وتأمل في نظرك وقد سلمت من العمى، وانظر إلى جلدك وقد نجوت من البرص والجذام، والمح عقلك وقد أنعم عليك بحضوره ولم تفجع بالجنون والذهول.

    تعيش مهموماً مغموماً حزيناً كئيباً وعنك الخبز والدفء، والماء البارد، والنوم الهانىء، والعافية الوارفة، تتفكر في المفقود ولا تشكر الموجود، تنزعج من خسارة مالية وعندك مفتاح السعادة، وقناطير مقنطرة من الخير والمواهب والنعم والأشياء، فكر واشكر (( وفي أنفسكم أفلا تبصرون )) فكر في نفسك، وأهلك، وبيتك، وعملك، وعافيتك، وأصدقائك، والدنيا من حولك (( يعرفون نعمت الله ثم ينكرونها )) .

    كسره /منقول من كتاب اسباب السعاده

  38. مجتبي كتب:

    نشكرك كتير الاخت نونو علي النصيحه القيمة

    ربنا يكتر من امثالك

  39. ابكرون كتب:

    برضو يا ننونو ده كلام كتب جميل وحلوينطبق علي الدنيا كلها الا علي شعب المليون ميل مربع هذا الشعب المتقطب الجبين… الصاري…..المدبرس…المبوز…المغلوب عل أمره(نحن كده)
    (إن حظه) كدقيق فوق شوك نثروه
    ثم قالوا لحفاة يوم ريح اجمعوه
    صعب الامر عليهم……….. فتركوه

  40. ابكرون كتب:

    آآآآآآآآآه يا تعب
    ————————–

    منو البيتفقد أحوالك ويسأل
    البنيات البساسقن و عايشة رحل
    ذي الطيور من عش لعش
    موسم العطش ترحل دغش
    يبرن مواطن قوس قزح
    و الخضرة و ألوان الفرح
    آآآآه يا تعب ….

  41. حاج أحمد السلاوى كتب:

    أبكرونا ..
    روعة مما جميعه ..
    شكيتك على الله .. بتنكت جنس حاجات ..

  42. sobajo كتب:

    ثوب سوداني في غاية الحشمة والاناقة وقبل كل شئ كلمات دافئات تلامس
    شغاف الروح والوجدان . شكراً لك يا ابكرون فقد امطرتنا جمالاً وحباً .

  43. ابكرون كتب:

    شكرا يا سلولو ويا سوباجو :‏
    فعلا كورال جميل ‏
    تياب سودانية هاديه وجميله ومدياهن رقة…‏
    جمال طبيعي وحلا ما معقوله ‏
    كلمات معبره وجميلةولاحظوا لباقي الكلمات :‏
    ‏———————————-‏
    مشواير الدرب
    —————-
    ‎ منو البيتفقد أحوالك و يسأل‎
    البنيات البساسقن و عايشة‎ ‎رُحل‎
    ذي الطيور من عش لعش‎
    موسم العطش ترحل دغش‎
    يبرن مواطن قوس‎ ‎قزح‎
    والخضرة و ألوان الفرح‎
    آآآآآآآآه يا تعب …. آآآآآه يا مشواير‎ ‎الدرب‎
    آهات كتار ما يتنحسب‎
    في داخلن لهفة و حزن‎
    شوق للمدارس ذي بنيات‎ ‎المدن‎
    دفتر وقلم أعظم حلم‎
    ليه يا زمن ليه تحرمن نور العلم‎
    آآآآآه‎
    ما‎ ‎أحزنن لما يمرقن للحفاير ويوردن‎
    لمن يغنن للمسادير وينشدن‎
    آآآآآآه‎
    يا نسمة‎ ‎هبي يا نسمة هبي‎
    يا مطيرة علينا‎ ‎صبي‎
    أملي حفاير موية عبي‎
    طوالي كُبي ما‎ ‎تغبي‎
    ما تغبي يا مطر‎
    شان نستقر بعد الرحيل بعد السفر‏‎
    نعيش في حلة‎ ‎مؤسسة‎
    يا ربي نمشي المدرسة‎
    نكتب حروف نقرأ الكتب‎
    نعرف تمام كيفن نقاومك يا‎ ‎تعب

  44. ودالخلا كتب:

    سلام ياقبيلة،،
    شكيت محنك يا أبكرون ،وصحي بتنكت الحاجات دي من ويين، روعة ما بعدها، وأسطورة من الماضي كزهرة الليلاك، أعادت بنا السنوات لتلك الأيام البريئة أيام وسنوات أحلام الطفولة البريئة وميعة الصبا عندما كنا في المرحلة الوسطي ومن ثم أصبحت ثانوي عام لم يرسي علي بره حتي اليوم، وايام أحتفالات عيد العلم عندما كنا نتسور سور المدرسة الريفية لحضور الأحتفالات (ما تمشوا بعيد فقد كانت شقاوة طفولة)، وأصبحت الآن جامعة الزعيم الأزهري، وليتهم تركوها في حالها وأنشأوا جامعة للزعيم تليق بمقامه، فحسبي أن الزعيم لو كان موجودا” لما رضي بأنشاء جامعة علي أنقاض مدرسة فماذا فعلنا أذن.
    تحياتي لك أيها الصديق اللدود، وأنت تعيش مع هذا المقطع الرائع كلماتا” وأنشادا” وروعة في حشمة تذكرك بماضينا الرائع التليد:
    آآآآآآه‎
    يا نسمة‎ ‎هبي يا نسمة هبي‎
    يا مطيرة علينا‎ ‎صبي‎
    أملي حفاير موية عبي‎
    طوالي كُبي ما‎ ‎تغبي‎
    …………
    تحياتي

  45. ودالفتيحاب كتب:

    غايتو زيدونا من أأأأأأأأأأأأأأأأأأأأأأه يازمن

    روعه مابعدها روعه ، شوفوا الساحه إتملت شنو ، خليهم يراجعوا هذا الفن

  46. ابكرون كتب:

    فغلا يا من عاشوا الزمن الجميل… ذكرننا (نجفات الاحفاد) بالرقة والروعة والجمال البدون الوان ورتوش وميك اب يقرف ……. بساطه في كل شئ وكانت حواءناالبسيطة في ذلك الزمن الجميل حتى وهي تبحث عن العلم ، جزء عظيم ومتألق لا يتجزأ من كنز السعااااادة المفقودة……. كنا بنعرف :
    ( نعرف تمام كيفن نقاومك يا‎ ‎تعب …آآآآه يا كعب )

  47. حاج أحمد السلاوى كتب:

    أبكرونا ..سلام
    فتحت لينا جبهة جديدة .. مالك علينا ..يعنى نحنا ناقصين ؟
    بس عليك الله شوف الكليب التانى بتاع ناس الأحفاد.. و|ادينينى رايك …

  48. nono كتب:

    شفت التوب و ما لاقاني أجمل منو
    بس التوب … شوفو التوب
    وسيد التوب يكون كيفنّ!!!

    امضاءءءءءءءءءءء
    الموساد؟؟؟؟؟؟؟؟؟

  49. ابكرون كتب:

    حلوه يا نونو اغنية ابوعركي

    شفت التوب وما لاقاني اجمل منو..
    دا حالتو التوب سيد التوب يكون كيفنو؟؟؟
    ————————————-
    بطلي ارهاب الموساد ده

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s