الأتنين و التلاتا.. عرض ثاني

Posted: الأحد,25 يوليو, 2010 by عزت in اخرى

استمتعنا بقفشات الأحباب بالأمس في نادي الضباط في وجود (سعاتو) الل ليلة ما عارفينو ياتو فيهم فالشاهد أن الموضوع تشابه علينا خاصتا عندما أطلعنا (ود الخلا) على محل القهوة الفي النجيلة و الذي رد عليه (جبرا) بانو (ياخ أنا سعاتو لي كم سنة محل القهوة دا أنا ما عارفوا)… و الا و د الزبير الجا داخل و برضو قالو ليهو سعاتو…. ما فرقت غايتو استمتعنا في وجود (سعاتو) و (مخير و بقية الأخيار من مدونينا الأماجد و طبعن دا فيما دار من حديث… تعدد الزوجات) فكان هذا الموضوع من أرشيفي… أرجو انو ما يكون معاد زي أفلام الاثنين و التلاتاء…

زمان أيام سينما غرب و زمن ما كانت الجرائد بتكتب أين تذهب هذا المساء لفت نظري فيلم اسمه “ذو اللحية الزرقاء” عرض أول من الأربعاء للأحد و للذين لم يعاصروا تلك الحقبة فدائما تكون أفلام االأربعا للأحد “كرت” و تكون معادة هي الأفلام أو هي أفلام عربية أو هندية في يومي الأثنين و الثلاثاء … فحدثت أصدقائي و ذهبنا و كلي شوق أن أري تلك اللحية و هل هي فعلا زرقاء فقد عرفنا ناس عندهم دقون محننة خاتف لونين و واحدات سوداء كالليل و واحدات بيضاء و واحدات كبار و وحدات “دعوني أعيش” لكن كحليه دي يعمينا…
المهم شدينا الرحال صوب وطنية غرب و تبينت أخيرا ماذا تعني تلك اللحية الزرقاء و لماذا ارتبطت الدقون بالعرس فاسم الفيلم Blue Beard و التي ترجمها ناس خورى و عبيد حرفيا و خربوا المعنى، فالقصة تحكي عن رجل مزواج جسده (ريتشارد بيرتون) و كان كلما يتزوج واحدة يفتك بالقبلها أنقر كيف… كان يقتلها و يدسها في ثلاجة زي بتاعة الموز…

فبالليل داك جريت شفت الدكشنري فأنظر ما وجدت فهي تعني “الرجل المزواج الذي يقتل نسائه” فهل يا ترى كان الخواجات عارفين ابين دقون ديل “كده”…. (مع الاعتذار لود الخلا و أصدقائنا من أبين دقون) فهم يحبون الطيبات من النساء (طبعن يا أحباب الطيبات من النساء هم السمحات) و قيل أن “فقهاء السلطان” زادوا في تفسيرها و قالوا هي أيضا من يموت زوجها شهيدا في متحرك أو جهاد أيام جاهلية الانقاذ الأولى… و لكنهم بريئين من القتل العمد فمعظمهم ما قاعدين “يكتلوا” زوجاتهم عديل كدا و لكنهم اعتمدوا القتل النفسي و صاروا يدبلوا و يتلتوا ما كان ذلك ممكنا ولا يحرك ذلك فيهم ساكننا.

فالناظر لبعض ذوي الدقون الدائرية المنمقة و التي تتبع لتيار ما يعرف بالانقاذيين في دولتنا يكاد يرى تطبيقا مباشرا لما ظلوا يدفعون به عند معايرتهم بأنهم يلبسون النظيف من الملابس و يحبون الطيبات من النساء دليلهم في ذلك “ان الله يحب ان يرى أثر نعمته عليهم”  فهم دائما ما يلبسون جلاليب و عمم ناصعة البياض لا أدري أين و بم تغسل، كما صار بعضهم مضاربين ليس لنصرة الاسلام فحسب انما في البورصات العالمية و بناء القصور الشامخة في مدن و احياء جديدة أطلق عليها من أسماء الجنة….

طبعن أنا لا حاسد و لا بغران، الحمد لله ترك والدي رحمه الله ما سد لنا رمقنا و زدت عليه بما سلحوني به من علم و دراية حققت لي بعض المكاسب و أعرف أنني رجلا “وحدوي” بالرغم من مصاهرتي للحلفاويين….

فأهلي من شندي و من ملاحظتي لأهلي فهم لا يميلون الي التعدد في الزواج اطلاقا مع انهم مزارعين و ماكلين و شاربين كويس الا انهم و حسب قراءتي للموضوع يحبون المال حبا جما و لا يطيقون بعثرته فيما لا طائل له فكفى بام الأولاد شريكة دائمة و لتبقى الأرض و التملك أولوية أولى، لكن التعدد كما نعرف في غرب السودان عادي و كلما زاد الرجل في نسوانه كلما زرع أفضل فللمرأة دور مهم في الانتاج… و لكن أحيانا تتمرد على ذلك في ظل الرجل الذي يدبل كل مرة و يضيفها للعمل بالزراعة و يقعد يعاين ليهم من بعيد….

فاستفز ذلك المنظر أحداهن و حرشت الباقيات و اشتكو الراجل..

انت ما قاعد تزرع معاهن مالك يا زول… قال القاضي..؟

فرد الرجل “يا مولانا ما أنا يا ازرع في الحقل و الا في البيت.. (في اشارة الى حياته الزوجية معهن)

فخيرهم القاضي….فقالوا بصوت واحد (زراعتنا بنقدر عليها…!!)

فالشاهد أن أهل زوجتي الحلفاويين أيضا يميلون الي التعدد أيضا ربما يعزي لسفرهم المتواصل قديما ما بين السودان و مصر و حلفا و بالعكس ما عزز لهذا النهج و لكن لما استقروا تركوا التعدد جانبا، لكن ما كرس لهذا الموضوع طبعن ناس الحكومة فبعد يومين ثلاثة من التعيين تضم واحدة الى أم الأولاد و عادة ما يشار اليها  “بمرة طيبة” اي جميلة في عمر الزهور تلبس أغلى الثياب و تسافر مع المسئول في كل ترحاله من الشرق الي الغرب و هي خير ممثل لأنها تعرف الإنجليزي و الاتيكيت وتعرف كيف ترعى المنظمات النسوية و المنظمات الطوعية و غيرها و ربما تشارك في الاجتماعات و تصرح للصحف و تجلس في معية البرنامج التلفزيوني الوجه الآخر للمسئول و”تتفاصح” و في الغالب تترك الزوجة الأولى لترعى الأولاد و تقوم علي احتياجاتهم و لكن لم يتركوها لوحدها بالطبع ففي الغالب يساعدها آخرون: سائق للخضار و آخر للأطفال و سيارة تتعلم فيها أن تكون عظيمة مثل “راجلها” و خدم و حشم مما يجعلها تتغاضى عما حاق بها من ظلم من المرة الطيبة…!!

Advertisements
تعليقات
  1. ودالخلا كتب:

    سلام يا قبيلة،،
    هسي يا دوك عزت يجوك بي وين، غايتو ما عرفنا موضوعك عن الأمسية السعيدة بين خضرة النادي والأحبة ونقصان الوجه (الآخر) يا ابكرون، ولا عن أبان دقون وعمايلهم الزرقاء، ولا عن التعدد وما ادراك ما التعدد، فرسينا علي بر ياااخ وخلينا النشوت معاك في أتجاه الريح!!

  2. أحمد الفاضل كتب:

    أستاذنا الفاتح
    ليس العيب في التعدد في حد ذاته ولا في اللحية في حد ذاتها
    فنبينا الكريم وصحابته كانوا في غالبهم متعددي الزوجات ذوي لحى كثة!!

    ولكن العيب فيمن تلبسوا بتلك الصفات واكتسبوا بها دنيا ومصالح واضفوا على هيئاتهم الخاصة ورغباتهم الشخصية صفات دينية مزعومة
    فرمزية الدين والخلق لا تنسب الى الأشخاص ولكن تقاس الأشخاص حسب تطبيقها للمبادئ أو استغلالها للدين كما يفعل من تعلمهم

  3. ابكرون كتب:

    يا ود الخلا لا تشوت لاشي ….البوست ده كلو الغام الدوك مكسر تلج شديد للحكومة المحلية الظاهر عليهو قبض عليه (متليفا) هههههه ….ايشي حلفا دغيم …وايشئ هو (وحدوي )وما تقولوا قدامو مثني ولا ثلاث ولا حتي دفع رباعي…….غايتو عاااالم رجاااافات بشكل …لكن نفسو في المطايب ( اقصد المشاوي – تبأن – ) ههههههههههههههه

  4. حاج أحمد السلاوى كتب:

    دوك عزت .. الفكى ابكرونا .. ازعيم ودالخلا ..
    وبرضو تقولوا على شقى ومجنون وكسار تلج ..
    أها شوفوا جنس كسير التلج دا دا كيفن ..وراكب موجة الوحدة الجاذبة جوة البيت وبرة البيت..وشنو ما بعرف دااااك !!
    غايتو نحنا من أنصار التعدد متى ما كان ممكناً ..ويحقق الشروط الشرعية المطلوبة ..والمطايب مافى زول بياباها .ولا شنو يا سديقى العزيز ودالخلا ..
    وغايتو فى عالم جبانات بشكل .. او كما قال … المشخصاتى عادل إمام..
    وهنا تحضرنى طرفة خارج النص والمقرر( البوست كله خارج المقرر كما قال ودالخلا الما عرف يشوت فى ياتو إتجاه ) بمناسبة ذكر عادل إمام راويها هو الشيخ عبدالحميد كشك عيه رحمة الله عندما قال ..كنا نأمل أن ياتينا إمام عادل .. فإذا به يأتينا عادل إمام .
    وسلو لى على سعته يا دوك عزت المرة الجاية ..إنتفقنا ؟
    يخس عليكم ليه ما مشيتو وزرتو مدونة بنتكم مشاهدة ..الرسول اكان ما مشيتو !!!

  5. ودالخلا كتب:

    تعرف يا أبكرون صاحبك ده بيمر بمرحلة التفكير في التدبير أقصد التدبيل ولكنه بيناور وبيستكشف في ميدان المعركة وكيف سيكون الحال لو تم تطبيقه للخطة 1/2 وشغال كلينكيت لحدت ما تتكشف الأمور، ولسان حاله بيقول أشوف في شخصك أحلامي!!

  6. عزت كتب:

    غايتو المشاوي ما مابنها عل القاوت قايم علينا…

    انت عارف فكرة البوست دا قديمة ما تورتا الا ونسة امبارح و التعدد و الوحدوية التي يتمسك بها البعض زي حالاتنا و معاي كم زوول كدا هم عارفين نفسهم في ظل الاندياح الذي يقوده الجبهجية و المثنى و ثلاث التي يطبقونها… و نحن قاعدين نعاين ساكت…

    انت عارف البوست دا فيهو كم حتة تشوت عليها يا ود الخلا و طالما في شوت حتما حيكون في اهداف…بس ما ظنيتك حتشوت مؤيدا للسنة و في بالك كلام أخوات نسيبة….
    “انتو السنة مافيها حاجات كتيرة ما بقت الا على الطبيق…!!”

    كسرة:
    هسة يا حاج البلد كلها شايتة نحو خيار الوحدة الجاذبة…!! و بعدين نوع الكلام دا

    (غايتو نحنا من أنصار التعدد متى ما كان ممكناً ..ويحقق الشروط الشرعية المطلوبة ..والمطايب مافى زول بياباها .ولا شنو يا سديقى العزيز ودالخلا ..)

    بعدين بتابو و أواخر رمضان قربت

  7. حاج أحمد السلاوى كتب:

    الأخ أحمد الفاضل .. سلام ..
    نيابة عن الناس المشغولين بالتعدد والوحدة الجاذبة والشوت فى كل الإتجاهات نرحب بيك ايما ترحيب ونتى أن يطيب ليك المقام وتلقا مرادك ..
    الأسئلة التعسفية خنخليها لقدام شوية عشان فى ناس بقوا يتحسسوا منها ونخليك تاخد نفسك شوية وتشوف الأمور ماشة على وين .. إتفقنا ؟

  8. aflaiga كتب:

    الاكارم الحلوين :
    بالنسبه للقعده الحلوه ( عفوا الجلسه الخيره ) كده تمام يا ود الخلا لانو قعده دى فيها اشارات جاهليه بحته موش ؟؟؟ استمتعنا ايما استمتاع بمعية الامير الشفيف العفيف مخير ربنا يرجعو بالسلامه وسمعنا النصيحه الغاليه بتاعة عدم الشوبار فى ظل تعدد الاسفار وعدم التبنى فى ظل قصور التمنى وعزاؤنا ان الاعمال بالنيات برغم ضيق الاجازات .
    اما بالنسبه للمودووء التانى ده بتاع شنو هو يا بشاوى ؟؟ ايوا التدبييييييييييل اصلو الواحد مواضيع زى دى لانها مافى راسو ما بيتذكرا كويس !!! كسير تقيل موش ؟؟
    صديقى س من التمبكجيه المحترفين :
    س : يا مرا شفتى حقة التمباك مشت وين انا ختيتا هنا ما لقيتا ؟؟؟
    المرا : انت عليك الله التمباك الشين ده ما تخليهو العاجبك فيهو شنو ؟؟
    س : شوفى يا مرا التمباك ده من ضمن 3 حاجات شينه انا متمسك بيها لحدى ما اغيرا وتاكدى انو اليوم الاغيرو حاغير كل الاتنين الباقيات فهمتى ؟؟؟
    المرا : هووى اتذكرتا تمباكك انت ما خليتو فوق الدولاب كدى نجرى نجيبو ليك قبل تخرم لى حاجه تانى غير التمباك الله يخليك انت وهو لينا !!!!!هههههههههه

  9. aflaiga كتب:

    الحلوين فى منحى جدى للموضوع :
    قد يكون مقبولا ان يقوم احدهم من المتزوجين بستر احداهن من البنوت .
    وقد يكون مقنعا ان يقوم احد المتزوجين بكفالة اسرة ايتام عبر الزواج بامهن .
    وقد يكون مقبولا الزواج لاصلاح ما انكسر .
    وقد يكون مقبولا الزواج الثانى لمن توفيت زوجته او فارقها لسبب مقبول
    اما ان يقوم عمك فلان الخمسينى بضم احدى العشرينيات للحرملك بتاعو فدى ما مقبوله ..
    صديقى ص فكر فى نفس العملية وهو خمسينى مقتدر مالا وحاجات تانيه كما يدعى ففكر فى عشرينية من بنات الجامعات تعثر زواجها بصديقها بعد اتهيار احلام الطفوله تحت ضربات المعايش فنصحه عمنا ك بانو لو عندو قدره وعاوز يساعدا ما يساعد زولا البتحبو عشان يتم ليهو عرسو !!! فاجاب صديقى ص بخبث ياخى هو الله ما سهل ليهو نحنا الله مسهل لينا نابى تسهيل الله ؟؟؟ فى زول بيابى تسهيل الله يا جماعه ؟؟؟؟

  10. ابكرون كتب:

    ( اما ان يقوم عمك فلان الخمسينى بضم احدى العشرينيات للحرملك بتاعو فدى ما مقبوله ..)تقول افليقا ده قاصدك…! هههههههههههه
    الكلام ده ليك يا المنطط عينيك….قسما تقول شي افتو كلوهنا وفي الراكوبة وسودانيز اون بايظ والسيدة الاولي

  11. ابوالمنذر كتب:

    السلام عليكم
    ياعزت الظاهر كانت جلسه ما منظور مثيلها, شايف اثارت مكامن وشجون ومرقت الجوه المنظور والمشتهى وتوارد خواطر كتيره جادت بافكار متنوعه صعبت اتجاه الشوت لللاعبين المخضرمين وحكاية التبديل دى اصلو الزراعه والبضاعه والجرى وراء السعاده خلانا منكفين على زراعة بره وزراعة جوه نكتفى بحواشه واحده

  12. مشاكل كتب:

    سلامز

    أنا عندي مشكلة نفسية من موضوع مثنى و ثلاث و رباع دا – إحتمال لأنو الوالد ربنا يديهو الصحة و العافية شايفو وقف في ثلاث و ممكن جدا يعشق أربعة مع كتله الملف – و عندي ليها تفسير أنا متمسك بيه و متأكد منو بشدة و هو أنو الراجل لمن يصل لسن الخمسين بتجيهو حالة من المراهقة بيسموها مراهقة الخميسن .. تلقاه بيعاين للداخلة و المارقة و عينو زايغة .. و بيساعدو على كدا بداية مرحلة الأمراض الجسدية و زيارات المستشفيات و المعامل .. فبكون عايز يثبت لي نفسو إنو لسه شباب و ما شاء الله عليه البنات بيجروا وراه .. و هو ناسي انو البنات جاريات ورا جيبو و عربيتو عمارتو – في الغالب يعني – فأحسن ليكم يا شبيبة إحترموا سنكم القانونية و ماف داعي تدخلو في متاهات و دهاليز المحاكم و النيابات .. النسوان ديل خطرات
    واحد اتزوج التانية و بعد الزواج صرح بالآتي : كنت فاكر نفسي ح اكون أسد بين لبوتين .. لقيت نفسي عضمة بين كلبين .

  13. ياسين شمباتى كتب:

    الحبيب عزت..سلامات..
    والله فرزعتنا وحيرت كيبوردنا !! لكن موضوع التدبيل دا بعجبنى تب..

    ابكرون…سلام..
    اسه مالك على الراجل دا !؟؟ غايتو جنس حقارة منك…

  14. عزت كتب:

    الأكارم سلام
    و صباحاتكم خير و ندية

    أفليقا غايتو النصيحة بتاعت عدم الشوبار فى ظل تعدد الاسفار (و التي أحسب انها القرمبوزات التي جاءت متنوعة و خطيرة… و اعتقد انها نصيحة مهمة لئلا ينجرف الخمسينيين وراء الموديلات الجديدة و يتوهوا)

    بس عدم التبني فى ظل قصور التمنى دي ما أدوها لينا

    أما ان الاعمال بالنيات دي واضحة… لكن برضو تقرأ مع وما نيل المطالب بالتمني.
    و السواي ما حداث….!! ههها هههها

    فالموضوع ذو شجون و يكفي انه يثير ذعر (العواطفات) و نحن غير ذعرهم دايرين شنو….
    فسهر الجداد و لا نوموا دي مهمة جدا….

    قد تعود عليك ببعض المنفعة كزيادة الاهتمام و كدا… لكين احذروا الحكاية دي ما طوالي فالحديث في جنس المواضيع مع بعض العواطفات قد يؤدي بك الى التهلكة…!!

  15. ودالخلا كتب:

    سلام ياقبيلة،،
    أخونا القادم الجديد أحمد الغايب في الراكايب وصفوة العقد الفريد،،
    التعدد يا أصدقاء مشروط بشروط محددة يجب توفرها أولا” لتكون النية صادقة ومتوجه الي الله بصدق واخلاص، ونبينا الكريم عليه أفضل الصلاة وأتم التسليم لم يُعدد الا بعد وفاة السيدة خديجة عليها رضوان الله، وتعدده كان لحكمة وأسباب وهو النبي الرؤوف الرحيم، أما تعدد الناس العاديين فهو يتم علي أسباب معينة وتم ذكرها في القرآن في أول سور النساء بعد آيات رعاية اليتامي وعدم أكل أموالهم وضمها لأموال الراعي لهم الا بالحق وتقول الآيات البينات في هذا الخصوص (وَإِنْ خِفْتُمْ أَلاَّ تُقْسِطُواْ فِي الْيَتَامَى فَانكِحُواْ مَا طَابَ لَكُم مِّنَ النِّسَاء مَثْنَى وَثُلاثَ وَرُبَاعَ فَإِنْ خِفْتُمْ أَلاَّ تَعْدِلُواْ فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلاَّ تَعُولُواْ (3)) وهذا التشريع واضح ويختص بالأرامل من النساء حتي يتمكن كافل اليتامي من رعاية اليتامي بالحق وعلي الوجه الصحيح من غير شكوك ولا مظنة ومعلوم أن الحديث جاء فيه أن كافل اليتيم رفيق النبي صلي الله عليه وسلم في الجنة، وحتي يتمكن الكافل من القيام بهذا الواجب النبيل شُرع له الزواج من هؤلاء النسوة، وتشير الآية للخوف من عدم العدل بين النساء، وفي هذه الحالة فواحدة، وكذلك ورد في الآية 129 من نفس السورة (وَلَن تَسْتَطِيعُواْ أَن تَعْدِلُواْ بَيْنَ النِّسَاء وَلَوْ حَرَصْتُمْ فَلاَ تَمِيلُواْ كُلَّ الْمَيْلِ فَتَذَرُوهَا كَالْمُعَلَّقَةِ وَإِن تُصْلِحُواْ وَتَتَّقُواْ فَإِنَّ اللَّهَ كَانَ غَفُورًا رَّحِيمًا (129)) وذُكر قبلها يتامي النساء والزواج بهن، ويمكنكم الرجوع للمصحف وللتفاسير لمن أراد الأستزادة…
    عليه نجد أن الصحابة الكرام تزوجوا بأكثر من واحدة بعد وفاة الزوجة الأولي أو لكفالة يتامي كما شرع لنا رب العباد سبحانه وتعالي…
    بعد ده يا سديقي العزيز دوك عزت أنت وصاحبك بتاع جدة داك الا تعملوا واحدة من الأتنين ديل علشان تبدلوا، أوب سوووري علشان تدبلوا يا سادة، والأولي الفي بالي قصة حرامي البنك الذي بعد أن سرق البنك سأل أحد الحاضرين للسرقة أذا كان قد رأه فأجابه بالأيجاب فقتله ثم سأل الذي يليه نفس السؤال وكانت تقف بجانبه زوجته، فأجابه بأنه لم يراه ، ولكن زوجته قد رأته ههههههه، والثانية تموها براكم.

  16. عزت كتب:

    و الله كلنا بيعجبنا الكلام دا يا ياسين…. لكين انت ماك متذكر انو موضوع العرس العرس يجي في الأول بعدين التدبيل….

    أحمد الفاضل مرحب بيك و الظاهر كلام التدبيل بلحيل بيعجبك زي ياسين بس ما تكون لسة ما دخلت دنيا… و فعلا التدبيل مهم في ظل مجتمع الكفالة و العدل… حيث بدأ عندنا في قديم الزمان و هو ينظر الى كفالة الايتام و كدا و ليس كما درج بعض الناس الآن… الواحد ما يشوف ليهو سكرتيرة حسناء الا و يضمها الى اسطوله…

    بعدين حقوا ناس الدفع الرباعي اذا كان غرضهم شريف فليكفلوا الشباب و بدل ما الواحد يعرس تاني لي نفسو… حقو يعرس لي واحد شاب…

    و الا لو داير يعرس تاني من غير داعي… ما يدوها ليهو لو ما شال واحدة تاني من البيت و عرسا لي واحد شاب…!!

  17. aflaiga كتب:

    والله يا عزت دى نظرية اقتصادية اجتماعية جميلة جدا :
    عرس من عندنا التانيه وفك لينا بورة وحده من بناتنا هههههههههه
    تعرف يا عزت لو الناس طبقت القصه دى مع الناس البدبلو حنلقى اى زول دبل حل مشكلة ..
    اسى تجى الحكومه ناطه تعمل ليك رسوم تدبيل وضريبة اضافة للجواز وزكاة تستقطع من المدبل لدعم الزواج ………

  18. aflaiga كتب:

    شمباتى : انت مواضيع الناس الكبار دى مالك معاها اول شيء ساوى الكتوف بعد داك فتش التدبيل ..
    صديقى س قال لى والله يا افليقا الحمد لله الواحد عرس وطلق وعرس تانى يعنى بقى عندو كمية من الالقاب :
    متزوج
    مطلق
    بس فضل الواحد مرتو دى تموت عشان يضيف لى نفسو لقب ارمل هههههههههه

  19. عزت كتب:

    انت من زمن النسوان بيموتوا قبل الرجال … حيلك
    ممكن يضاف ليهو لقب مرحوم ممكن..!!

    زمان أخونا قبل ما نعرس كان بينق فينا
    ياخ عرسوا في شبابكم بدل بعدين ما تتعبوا الناس
    (أولاد المرحوم… أولاد المرحوم)

  20. aflaiga كتب:

    عزت : المشكلة مافى اولاد المرحوم المشكلة فى مرة المرحوم اها زى العجايز البعرسو العشرينيات ديل تتخيل فى كم واحد بيكونو راجين مرقة مرة المرحوم من الحبس ؟؟؟؟؟ ما تقول كمان بتكون مارقه وارثه واستهلاك نضيف استعمال دكتور هههههههه

  21. aflaiga كتب:

    تتخيل يا عزت كمية من الشباب الفى اللساتك ونواصى الشوارع بتكون ونستم عن :
    اتخيل فلانه ديك الشايب شتت وخلى ليها قنزب تقيل ؟؟
    فلانه شنو ياخى دى ما سكند هاند لكين ؟؟
    سكند شنو انت فاره دى استعمال نضيف يعنى زى العربيه بتاعة القبطى او الدكتور او الموظف البيت الشغل بس ……….
    اها الواحد بعد شيب يمشى يعيش ليهو قرمبوزه يستمتع بيها زى كرت كاس العام بتاع الجزيره ولمن يخلس الدورى يخليها للدورى الجديد الاكيد هو ما حيحضرو !!!!!!!!!!!!!
    اها نبقى فى جنس دا ؟؟؟

  22. أحمد الفاضل كتب:

    والله يا جماعه احنا لسه ما خشينا الدنيا البقولو عليها دي

    لكن من حسي كان لقيت نظام تعدد طوالي من أولا
    ما بقول لأ

  23. aflaiga كتب:

    احمد الفاضل : اولا مرحب بيك بيننا
    تانيا وده الاهم فى موضوعنا ده تاكد ان كل ما تصرح به قد يستخدم ضدك ومن حقك ان تسحب كلامك فورا وبسرعه وتاكد انو العواطفات ديل حايمات فى النت وعندهن مراكز بحوث بتقيم مواقف الاهداف المستقبلية ( الزيك كده ) ومن ثم بيقيمو نوعية التعامل معاها وبيمارسو عملم من خلال الاستطلاعات والمواقف فى النت وفى المجتمعات الاخرى وتاكد انو صارنها ليك والتحرى الخاص بتاعك فى اجهزة الامن العواطفية تم اضافة الاتى له :
    احمد الفاضل – مشبوه بنوايا عدائية ضد العواطفات – سبق ان صرح فى عام 2010 بانه لديه نوايا تدبيليه امبرياليه – يتم رصده ووضعه تحت المراقبه – لا ننصح باقامة علاقات معه الا على الماشى ههههههههههه
    حبابك بيننا ونتمنى ان يطيب لك المقام ………

  24. أحمد الفاضل كتب:

    العواطفات ديل زااااااااتم الخلونا نقول الرأي دا لكترة الشوكشيات

  25. aflaiga كتب:

    ود الفاضل : طيب خليك حكيم واقبض الاولى بعدين اقلب جلود ههههههه كده ما بيدوك ..

  26. طارق أب أحمد كتب:

    من جينا المدونه دى و كتاحة التعدد دى ما وقفت عامله كدا زى المشروع الحضارى بتاع الجماعه اللى ما تتسماش كلام فى الهوا ساى و لحدى الليلى ما شفنا واحد دبل (الزوووول وين بالمناسبه)

    عموما نفتح باب التسجيل لقروب جديد إسمو ( A+C)
    ما أظنها محتاجه شرح و نفتح الباب و إبن حلال يتقدم
    كسره
    نمور من ورق

  27. ودالزبير كتب:

    بسم الله الرحمن الرحيم

    حولينا ولا علينا .. الموقع بقي مسكون ولا شنو ؟؟

  28. عزت كتب:

    لكين يا اب أحمد نوع التسجيل في هذا القروب غالبا ما يتم سرا
    و مرات ما بيتعرف الا بعد (A) يتكل و تجي C سايقا العيال لي بيت البكا (و حي ووووب)

    ياخ حمدالله على السلامة يا أب أحمد و الا لسة برات البلد…؟

  29. ابكرون كتب:

    ابوحمد سلااامات دي كتابات زول بعيد ساكت وناقصو بلوبلو
    وزي ما قال ليكم ابو احمد (نمور ورق ساكت) ….وحرم فشنك … (وقن قطن) يدوش واختهم ليكم بالترتيب النموري الورقي :
    اولا : سلولو مما يزروه يقعد يسويها عواطفات وام المؤمنين
    تانيا : افليقايكفي ايام آفو في الصين زي كسارات الحجر بالصالحة…… ههههههه
    ثالثا عزت : تلجو دقاق تقول بخلطو
    رابعا سنكل : مع انو ما قال بغم لكن اخبارو إندي (منك لله يا بشار الفوله ما بتتبله في خشمك)
    الخامس ده كان قلتو بجيني بجاي وكان جيت الخرتووووم الا اعين بودي قارد

  30. عباس ركس كتب:

    سلام يا امم :
    يا اخوانا انا بسأل عن صحة الحديث البيقول ( اني نظرت اهل النار فرأيت معظمها من النساء . . . الى آخر الحديث ) .
    الكلام دا صحيح ولا منقول ولا من الاسرائيليات .
    بعدها لكل حادث حديث .
    ريحتك كتير يا شمباتي , موش كدا؟

  31. عباس ركس كتب:

    رمضان على الابواب يا اخوانا , كتروا من التلج !!!
    لكن افليقا والله عندو تلج بااااااارد !!

  32. طارق أب أحمد كتب:

    شكسبير
    حابس حابس دا إسمو الجن السايبركلكى

    عزت
    برات البلاد و يسلمولى هالديات

    أبكرون
    منو الماشى يعمل عمره (عين مفتوحه قدر الريـال القطرى) فى الرياض

  33. زووووووول كتب:

    فأهلي من شندي و من ملاحظتي لأهلي فهم لا يميلون الي التعدد في الزواج اطلاقا مع انهم مزارعين و ماكلين و شاربين كويس الا انهم و حسب قراءتي للموضوع يحبون المال حبا جما و لا يطيقون بعثرته فيما لا طائل له))
    الدكتور والاضياف سلاام
    دى ذكرتنى قصه يا عزت :
    واحد بلدياتنا اتزوج مره تانيه (طبعا طييييبه يا عزت )لمت فيهو واحده من حبوباتنا الكبار
    ـ قالو ليا اتزوجتا تانى يا سين
    ايوا اتزوجت يا حاجه صاد
    ــ اسى عليك الله قروش العرس ديل كان سويتن فى بقره ما كان احسن ليك .؟ والله يا ولدى هسى بقرتى دى تدخل لي فى الشهر خمسمية الف عليك الله نسوانك الاتنين ديل دحين مية الف بجيبوها ليك .
    كسره : عذرا للغياب القسرى .وجاييكم لتعليقات القراء شايف ود الخلا شابككم الا بعد الاولى تموت وحاجات بالشكل دا .طبعا ما قريت تعليقاتكم لكن الايه الكريمه لفتت نظرى لتعليق الاخ ود الخلا .

  34. زووووووول كتب:

    عزت
    كدى دقيقه خلينى مع ود الخلا دا
    ((ونبينا الكريم عليه أفضل الصلاة وأتم التسليم لم يُعدد الا بعد وفاة السيدة خديجة عليها رضوان الله، وتعدده كان لحكمة وأسباب وهو النبي الرؤوف الرحيم،))
    نعم لم يتزوج النبى صلى الله عليه وسلم على السيده خديجه لكنه تزوج على عائشه وتزوج على غيرها من الصالحات .اما الصحابه فطبقوا سنة نبيهم ولم يتقيدوا بوفاة الزوجة الاولى ولا اعلم غيربعض الصحابة منهم الامام على الذى لم يتزوج على السيده فاطمه لكنه بعد وفاتها توفى عن 4 زوجات و19 ماملكت يمينه .اما قولك ان الصحابة تزوجوا بعد وفاة زوجاتهم فهو تعميم لا يسنده دليل ولا يبدو منطقيا فقد عدد بعضهم من اجل التعدد يا ود الخلا
    كسره : الارامل بالكوم يا ود الخلا بس طبق كلامك القلتوا دا مع انو العرس ممكن يكون لاسباب تانيه غير رعاية اليتامى . عندنا ليك ارمله طيييبه لو بتقدر تكلم احبابك ومشتركى ام تى ان .
    اب احمد :
    ههههههههههههههه والله ضحكتنى . فعلا نمور من ورق . انا جاهز للتسجيل فى القروب الجديد .

  35. ودالخلا كتب:

    سلام يا قبيلة،،
    حبابك يالزووووووول، بقيتو زي الفيران ما بتمرق الا بعد يكبوا ليها الموية في الجحار، هسي أنت ليك كم يوم مافي وفاتتك كم كيتة وكم وكم شنو ما بعرف داااك بس أول ماجابوا ليك سيرة العرس والتعداد السكاني قمت صنقرت علي حيلك، أرقد رقادك وكمل نومك وخليك من دي السيرة لا أنت لا صاحبك عزت لا عمكم الفي جدة دااك بتقدروا عليها بس تنجضونا بالكلام ساكت وعشمتو الناس ما تلفوا كدا ولا كدا خلونا يااااخ.
    نحن دايرين بيان بالعمل، وأهو أب أحمد ماقصر معاكم تب جاكم من الآخر و فتح ليكم باب التسجيل وأعادة التسجيل قروب AXC فقط وأنت طبعا” من قروب B يعني الأقرب للعبة الحلوة المشهودة، ونحن لا جدعناكم ولا جبنا ليكم حجار ونحن يا سديقي العزيز ناس زين عالم جميل!!

  36. زووووووول كتب:

    ود الخلا
    ايواااا انتو ناس زين طيب ما تقول ليا كدى
    كسره :
    نحن مع التأصيل دايرين نأصل للتعدد وهو سنه من سنن الله فى الكون وسنه من سنن رسول الله فى الشريعه وقد قال كثير من العلماء ان الاصل فى الزواج هو التعدد لان الايه التى استشهدت بها فى تعليقك الاول شرطت الواحده بمخافة الظلم وعدم العدل والما خايف يمش ينضم لام تى ان طوالى وخليك سودانى يا ود الخلا ويا بتاع جده ويا ابكرون زاتو (طبعا عزت دا حلفاوى وكدا)

  37. aflaiga كتب:

    زووووول : لكن مع ام تى ان بتقدر ترفع راسك طوالى ولا حتبقى زى المشو سودانى ولقو اكتر مما يتوقعون ؟؟؟ انت اقعد حرش والبد لمن تقتل ليك زول يوم .

  38. ياسين شمباتى كتب:

    ركس..سلام..
    وينك يا حبيب؟؟والله بقيت زى هلال رمضان,,وشكلك السنة دى صايم صيام جد..وخليك قريب..

    افليقا..سلام..
    منو اللقا وا ابى ؟؟؟ خليها مستورة بس..

  39. مخير كتب:

    الرائعون
    أهل الدار والزوار
    سلام لسان حالنا كنت معاهم هسة ومشتاق ليهم لسة،
    وما زلت في السكة ولمن أرسى على البر حأعلق بالمهلة لكن عاوز أنتهز هذه الفرصة كي أتقدم بوافر الشكر لأقطاب الدانقا على الحفاوة وكرم الضيافة، والله بتبالغوا وبتخجلوناوما أشار إليه الدوك في مدخل البوست أعلاه كانت لمة نادي الضباط التي دعانا إليها كبيرنا وحادينا وساخر سبيلنابروف جبرا متعه الله بالصحة والعافية، لكن سبقتها أولى كانت في مطعم أم كلثوم بالرياض وما بين الأولى والثانية دلائل أن البينا أكبر من الدانقا والصداقة وشوق العُمر وأضرع إلى الله أن يعينني على الوفاء والأرتقاء إلى سقف روعتكم يا أكرم وأرجل خلايق الله

  40. مخير كتب:

    جمعتكم مباركة
    حأرجع وأستعين بأكثر من صديق للتشاور حول كيفية تناول ما يلي:
    1) ربطة “كرافتة عزت” التي تقدم ود الزبير بعرض مغري لإمتلاك حقوقها الفكرية مع صورة بيانية لها وهي أخطر من عقدة وندسور وربطة برنس البيرت بتاع موناكو هناك 12 طريقة شهيرة لربطة العنق لكن ربطة حبيبنا عزت براااها.
    2) “جبنة خالد مدني”، المقصود جبنة القهوة وليس أجبان الدويم أو ألبان هولندة ، والبُن في كوكوبنا نوعان “أرابيكا” و”روبوستا” الأول أشهر مصادره اليمن وأثيوبيا والثاني يوغندا والبرازيل وعشرات إن لم تكن مئات الطرق لتحضيره لكن جبنة خالد بررراااههها.
    3) “عمة نيام نيام ” بكسر العاء وليس العين منعاً للبس في حق شاعرنا الجميل، والعمم خشوم بيوت أشتهر بها كثير من الشعوب بمن فيهم نحن والأفغان، وتحتلف طرق لفها أو إرتداءها وأطوالها وألوانها ودلالاتها لكن عمة نيام برررررررااااااااههها.
    وجايييكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s