أربحا و عقاب شهر

Posted: الأربعاء,28 يوليو, 2010 by عزت in اخرى

أي أربعاء وهو من الأيام التي نتطير منها نحن معشر السودانيين فالواحد مرات لمن يحب يداعيك يقول ليك (يدخل/ تدخل عليك بي أربحا وعقاب شهر) يعني بي كدا يكون انتهى منك فالشاهد أن الأربعاء براها ما هينة اذ تحتاج الى الكثير من التدبير حتى في أول الشهر لمقابلة الخميس و الجمعة و الخدار و الفسيخ خلي تكون كمان في آخر الشهر للموظفون في الأرض… فأكيد حتكون مفلس و بالمناسبة الفلس يزيد الضنك و التعاسة و يضيق الخلق، أعرف اصدقاء لي لا يخرجون من منازلهم يوم ما الواحد يكون مفلس خلي يسلم عليك و الا يضحك… علة ناس التجارة ما هاميهم كثير فالواحد بالكتير يجر الدرج و يتبدبر أمره بس أوع من الفاضي…

طبعا يا أحباب فالتطير من الأيام هي من صميم عادات الجاهلية الموروثة ورسولنا الكريم صلى الله عليه وسلم نهى عن التطير والتنجيم فحينما توفى ابنه ابراهيم حدث خسوف للقمر فقال الناس ان هذه علامة من علامات الحزن على ابن رسول الله .. فقال الحبيب ان الشمس والقمر آيتان من آيات الله لاتخسفان لموت أحد ولا لحياته، اذن الأيام كلها أيام الله والحمد لله فقد انتهت هذه العادة السيئة الا الاربعاء دي نتهي منها كيف…!!

فالشاهد انني اليوم الأربعاء 28 يوليو (تبنت) الشنطة و الجزلان بعدما أوفيت بمصاريف الأولاد اليومية و غسلت السيارة بي رشة من الخرطوش ومرقت مطمئنا و لما كانت (الواطة) بدري و لم تحن الثامنة بعد قررت أن أذهب الى بحري (اذ قالوا ناس بحري بتحبو) و الواحد يشأر على البيت و يشوف الشدر مسقى و الا غفل عنه الغفير ففي مدخل كبري المك نمر…(جيييييييييييييت) صفر لي عسكري المرور فعزمت أن آكلو ليك حنك لأنو لو شاف الرخصة المنتهية الصلاحية و موقعي في تلك اللحظة في نص الشارع متجاوزا الاشارة لبقي علي موقف صاحبنا الذي باغته العسكري و مخالفاته العديدة فصاح فيه (و الله الليلة عشرة جنية ما حتخارجك مني) مع تقدير فارق العملة حيث كانت تلك الحادثة في أوائل التسعينات عندما قالوا ناس الانقاذ (كان ما جينا كان الدولار حصل عشرين جنيه)… فضربت الجرسة معربا عن خروجي على عجل و نسيت الرخصة (لاحظ هذا التكتيك لأنو لو العسكري مسك رخصتك في يدو انت حتدفع يعني حتدفع..) اذ سوف يمسكها و يشير اليك أن تتبعه… فما كان منه الا و عنفني و قال لي انت ما عارف قطع الاشارة فيهو سجن… سجن ياخ معقول يوم الأربحا ما ممكن..!! المهم أخلى سبيلي بدون ما أدفع فالدنيا صباح و يكون ضامن الاستفتاحية من غيري….

لكن بتاع الرجعة طلع أذكى منو اذ قال لي لمن ما لقى عندي مخالفة بشأن الترخيص.. عندما قلت له ياخ أنا مرخص قبل شهر… ففاجأني و قال لي مبروك… ادخل جوه عربتك… فاستفتح مني  و قلت له معها (فطور هنيئا) و مشيت ضاحك من عندو…

خلي بالك نحن لسة بالصباح و في مواعيد الفطور جوني زملاء قالو لي ياخ نمرق نفطر برة المكتب… فركبت معهم و حق الله بق الله في الطريق و أنا ضاحك برضو و نازل من الباب الوراء اليمين فقفل فيني صاحبنا القدام الباب في صباعيني… فكانت الجرسة و الاعتذارات و غايتو أكلتها و أكلت بعد ذلك الفول و أنا نازل من نفس الباب في الرجعة يضربني طرف الباب و أنا خارج في الجبهة و يحدث شرخا بطول 2 سم و الدم نزل بس البنات طلعوا حنينات و جابو لي مراية فعرفت هذا اليوم أن شنطهم فيها بجانب المكياج اسعافات أولية و ريحة و الذي منو…

أها يا أخوانا الساعة ما زالت اتناشر و نص ربنا يستر باقي الأربحاء دي….

قال الشيخ العبيد ود بدر :
السبت : وسموا فيهو بهايم السعاية.
الأحد : ضعوا فيهو ساس البناية.
الاثنين والخميس: فيهم سفري وغناي (من المحرر: و لي بعض الناس حاجات تانية حامياني… الصوم ما يمشي فكركم لبعيد)
الثلاثاء : حجمة وشفاي.
الأربعاء : أبدوا بيها لوح القراية.
الجمعة : أفضل الأيام آية أية

بس ما قال عقاب شهر،  دمتم سالمين

Advertisements
تعليقات
  1. ودالخلا كتب:

    سلام ياقبيلة،،
    دوك عزت سلام وسلامتك ياسديقي، الحكاية وما فيها كدي أتذكر صباح اليوم تكون حلقت دقنك قبال ما تشوف حاجة تسُرك وتحجب عنك الأعاصير، وبراك جنيت علي نفسك الوداك تعاين لوشيك في المراية من الصباح شنو؟؟
    بعدين في الأذكار الصباحية وطبعا” هي أهم من شراب الشاي او القهوة يادكتور وأظنك اليوم نسيتها ولا أنا غلتان؟؟

  2. زووووووول كتب:

    عوااااارض يا عزت ربك يستر . انا غايتو راى تنوم من هسع لباكر الصباح ان شاء الله بى فاليوم على الاقل تنتهى من اليوم دا

  3. أحمد الفاضل كتب:

    والله الأربحا دا أحلى يوم في السعوديه وكان بقى فلس يادوب ما ضبطت النومه لا مره تنق ليك يوم الخميس في مرقه لا ترجى منك شي كتير وانت ضارب ليها وش فلس

    دا طبعا كلام قبل العرس

  4. حاج أحمد السلاوى كتب:

    دوك عزت وبقية صفوة الأخيار ..
    كنت أرجع بذاكرتك ليوم أمس وشوف عملت فيهو شنو ..؟..
    لاكين بينى وبينك مذكرات جميلة خالس وسرد أجمل ..لولا العوارض الحصلت ليك دى كنت تكون تحفة ..بس يا دوك الجاتك فى صوابعك وجبهتك ( أقصد جبهة وشك .. ماتمشى بعيد ) سامحتك والجايات أكتر من الرايحات ..والعساكر بتوع المرور ديل دايمن بيكونوا لابدين للناس أخر الشهر ويوم الأربعاء لأنهم بيكونوا زااااتهم مفلسين وعينهم طالعة .
    وناس بحرى ديل أكيد بتحبو .. مش عشان |انا منهم لاكين لأنهم فعلن بيتحبو .. ويلا حبونا ..نحن من بحرى .
    أخونا أحمد الفاضل .. مرحب بيك وحبابك عشرة بلا كشرة ..شكلك كدا معانا فى الطيران خارج أمازونيا العظمى ..ومن الناس المؤجزين يوم الخميس كمان .. يا بختك ..بس لازم تورينا موقعك الجغرافى رغم أنف كل حاسد ومحسود ..

  5. أحمد الفاضل كتب:

    تسلم أخونا السلاوي
    أنا فعلا من مرطبي الخميس وقليل ما هم ولله الحمد على فضله لكن بنغص علينا مرات اتصالات عمل بتخرب خميسنا وسديسنا زاته وخاصة لو بقت أخر الليل

    احنا في الشرقيه جمب الكويت والنفطيه

    وقعت ليك حتتنا

  6. DAKEEN كتب:

    وردنا اتصال عاجل من الادارة المركزية بامازونا باضافة بند اضافي للنثرية الشهرية
    – بدل عدة
    – بدل حاجات رمضان
    – بدل مفارش
    ملحوظة : ماذكر عاليه ليس له اي علاقة بمصروفات العيد .

    وكل عام وانت بخير وتصوموا وتفطروا علي خير.

  7. aflaiga كتب:

    عزت : كل اربعاء وانت بخير — تتخيل فى ناس ايامن كلها اربعاء ؟؟؟
    اسى بالله العشره الاديتا لبتاع الحركه دى ومعاها وصف للمحل فضل بس تقول الرقم المتسلسل للقروش ورتبة واسم الزول وتليس ليهو قضية – عشان كده البواليس ابدا ما بزبلو ناس الكتابه والثقافه لانو بيفضحو الزول على الهواء مباشرة – ههههههههه
    تعرف الليله الاربعاء ده طبعا انا عزابى لى كم يوم ( ظروف عمليه ما تمشو بيعد ) ومعاى زملانى فى الاقمار بنراجع فى ملفات الشغل صحينا الصباح لقينا المويه والكهرباء والمعجون والصابون والغاز قاطعات فما كان من صديقى س الا ان نام تانى وقال دى البداية من بدرى !!!!!!!!11

  8. abushagrod2 كتب:

    عزت : وتعرف أيضا بالأربعاء ( أم قيني )ولا أعرف لاقة قيني وأمه بالموضوع وعندنا في كردفان الناس ما كان عندهم أي مشاكل في المصاريف حيث تتوفر الغلة ولكن الموظفون يعانون فقط فيها من غياب الصنف ) بجميع أنواعه سواءكان ذرة ولا تمر لأن تواجده حسب بروتوكولات بني شيطون هي الكاش ولكن الحمدلله الآن أصبحت هنالك أولويات أخري يعني الآن الناس تاكل العيش وأول كانو ( يشربونه)
    الواحد يحصد زراعته ويلمها إجو الناس يباركوليهو ويقولولو ( تشربو بعرق العافيه )ويقوليهم آمين جمعا
    وعندي سعال صغيروني
    إنت قاعدين تدخلوا بي وين أنا عندي مويضيع صغير في الرابط دا ماعرفت أنزلوا معاكم دا أكان قوانين المدونة تسمح يعني
    http://abushagrod2.wordpress.com/2010/07/25/17/?preview=true&preview_id=17&preview_nonce=ef7b32f6e9

  9. عزت كتب:

    سلام يا أحباب
    و نعل الاربحا دي ما مؤثرة مع بعضيكم باقي الليلي ثمان و عشرين و كان بنك السودان ما لحق نزل المرتبات بكرة كتار حينوموا زي ناس احمد الفاضل..

    مرة قاعد بالقرب من أهل زوجتي الحلفاويين في عقد اتنين منهم كانوا بيتونسوا بصوت عالي بالرطانة و قاموا ضحكوا شديد و ضحك من كان بالقرب مني قائلا طبعن ما فهمت… قلت ليهو اكيد

    قال لي عمك دا كان بيحكي انو امبارح صلى العشا و الشفع و الوتر و نام و صحى الصباح مع الأدان الأول و قرأ قرآن و انتظر التاني و صلى و هو خارج من المسجد اتعتر و وقع
    فاحتج بعد دا كلو يقع ليه

    ههها هههها

    عارف يا ود الخلا أنا عملت ديل كلهم بس ما احتجيت زي عمك….

  10. ابكرون كتب:

    كج يا دوك
    قبلك وحدك
    محمد معانا ما تغشانا
    يا عين يا عنية يا كافره يا نصرانية
    هرشق
    اسه يا ود الخلا عملية تزييت الدوك للشرتاي حكمها شنو ؟
    تس ولا رش ولا (لا هذا لا ذاك) مع تحيات منى محمود

  11. عزت كتب:

    مرحب بيك يا ابو شقرود 2 كاتب معلق و مدون كمان بس لازم عمك السلاوي يعمل ليك الانترفيو….
    جاهز..!!

  12. ود الفضل كتب:

    يا خـــــــــــــــــــــــــــــــــــــــــوى انت ما سمعت بالاربعاء ( أم قينى ) اللهى واقعة آخر الشهر … حرام جاتك سليمة ، والجاتك فى مالك سامحتك ………… لكن ما عارف الجاتك فى راسك دى سببها شنو
    أكييييييييييييييد كنت مطير عيونك !!!
    خلى بالك المرة الجاية احسبها كويس وشوف أم قيــــــــــــــــــــــــــــــــــــــــــنى

  13. ياسين شمباتى كتب:

    عزت الحبيب …سلامات…
    الله سترك ما وقعت فيك حيطة ولا طائرة نفاثة!! الحمدلله بس..
    بمناسبة تقسيم ايام الاسبوع قالوا فى نائب ما كان بحضر اجتماعات المجلس,,النواب قابلوهو بعد فترة طويلة فى مناسبة وسالوهو: انت وين ياخينا؟؟ قال ليهم : مشغول شغلة شديدة خلاس..
    السبت: سبت اليهود
    الاحد: عيد النصارى
    الاتنين: مولد النبى
    التلاتا: نص الاسبوع
    الربوع: يوم السبوع
    الخميس: صفقة ورقيص
    الجمعة: عيد المسلمين

    اجيكم متين يعنى!؟؟

  14. عزت كتب:

    سلام يا أحباب
    كويس مرا باقي الأربحا بي خيرو و انشاء الله ما تشوفوا شر كان في الاربحا و الا أي في يوم تاني… و أمشو جنب الحيط…!!

    سلام يا شمباتي و يا ود الفضل

    أمانة ما النائب مشغول شديد….
    عارف ده زي واحد خميسو دايما مليان صفقة و رقيص… أمو قالت ليهو عرس يا ولدي…
    حاضر يا أمي بس ألقى لي خميس فاضي…

    و الله لا مطير عيوني و لا حاجة بس سؤ تقدير أصلها العربية واطية شوية و لمن شبيت من الكرسي يبدو جريت الباب علي و أنا خارج فكانت الجرحة… لكين مين يصدق…

    مرتي برضو قالت لي كنت بتعاين وين…!!!

  15. حاج أحمد السلاوى كتب:

    عزت ..
    أم المؤمنين هى العارفة كل حاجة .. وسؤالها فى محله ..

  16. أحمد الفاضل كتب:

    عارف يا دوك

    عندما تتحدث عن الأربعاء بتلك اللغة المتحاكلة أجدك تستفز بداخلي عشقي لذلك اليوم
    حقيقة منذ الصغر أعشق الأربحا قولة حبوبه وابتدئ الأسبوع انتظارا وشوقا له
    فتعودنا أن تكون إجازة المدارس خميس وجمعه وبالتالي الأربعاء يوم السهر والمرقه واللعب مع أولاد الحله
    وحاليا ما زال الأربعاء يحتل نفس المرتبه لأن ظروف العمل تشابه الدراسة
    عموما

    انت متحامل شويه
    وشكلك بس زول بتاع خميس ساااااااااااي

  17. ودالخلا كتب:

    سلام ياقبيلة،،
    نجيكم الليلة من ناحية أخري للأربعاء وهي من ناحية دينية تراثية، فيقال أنها اليوم الذي غرق فيه فرعون موسي في البحر ونجاة موسي عليه السلام، ولا أعلم مدي صحة هذه القصة ولكننا ونحن صغار لمن كنا بنمشي الروضة او الخلوة في تسميتها القديمة كنا بنحتفل يوم الأربعاء بشد البليلة وهي بليلة العيش وليس بليلة رمضان يا جماعة وبمناسبة رمضان يا أخوة يا كرام عملتو لينا شنو في منظمة زاد المسير وهل يمكننا تقديم أي نوع من المساعدات لمن يحتاج وما أكثرهم واكثر الخير الذين يأتيما من ناحيتهم لو شمرنا عن ساعد الجد وتصدقنا بالموجود، فقليل مستمر خيرمن كثير متقطع..
    أين أنت يالتركي؟؟

  18. عباس ركس كتب:

    سلامات :
    البليلة البشدوها يوم الاربحا دي ما عشان تكون كرامة وتكف بلاء ذلك اليوم , يا يليلة عيش يا بليلة مسبعة وتشد في الفناء عشان بوخها يضرب الجو وتعمل ديليتنق لكل البلاوي …
    ابو عصمت : اكيد بتكون في متاوقة كدة ع الطاير . . تكون لمحت ليك حاجة , باقي يا خوي انت شوييييف !!

  19. حاج أحمد السلاوى كتب:

    أخونا أحمد الفاضل ..
    حبابك عشرة بلا كشرة ..وما أظنك بعيد منا شديد ..
    أعمل لينا رنة سلك على الرقم دا وخلى الباقى علينا ..إتفقنا ؟
    0508376601 .

  20. aflaiga كتب:

    يا ركس : البلايل البتتكلم عنها دى ما ادونا ليها فى المقرر انت مرقت متين ياخوى ؟؟ انا بعرف ناس سودانيين بره نسو الفول ذاتو !!! خلى البليله انت شايل معاك سودان مصغر هناك ولا شنو ؟؟ ده شنو الزول الولوف الاصيل ده .
    السلاوى : فى تطور كبير بقيت تسال الزول عن موقعو بالتلفون ولا شنو ؟؟ اها اخير قدام الناس عيانا بيانا هههههههههههههه

  21. عباس ركس كتب:

    سلام يا افلي يا حبيب :
    تذكر قبل كدة اتكلمنا في انو نحن الأوان دا دايمن سابقنا ونحن بنجيء بعده , وانو امورنا طوالي معكوسة ( دا من شنو يا ربي ؟ ) – ونحن صغار كنا ننقنق من الكسرة – التي كانت سيدة الصينية – الليلة انا بمشي 30 كيلو عشان اجيب الكسرة . وبمشي نفس المسافة عشان ام فتفت بتاعة كيمو ( كيمو دا خلي ساي , ايدو طاااااااااااعمة خلاس ! ) .
    قلت البلايل دي ما سمعت بيها , طيب لو جبنا ليك سيرة العطينة والعكارة الا تستعين بي ناس بشار وابكرون – عزت دا خليهو دا زول مشاوي ساكت !! – عيني باردة يا مرطب .

  22. أحمد الفاضل كتب:

    يا ناس الدار نبشركم الإنترفيو كات مباااااااااالغه دا كلو عشان امبارح أربحا

  23. ياسين شمباتى كتب:

    احمد الفاضل..سلام..
    ومرحب بيك وسط اهلك وناسك,,منك خوف يا ناس ود نوباوى وامدرمان !!

    افليقا..سلام..
    الحاج بقت منو جفلة!! باكر عندنا لمة فى بيتو على شرف وداع طارق,,وفيها ما لذ وطاب من الاكل و(الشراب)….

  24. aflaiga كتب:

    شمباتى : والله عمرة طارق دى سمعنا بيها منك بس .. بعدين طارق ده فى الخرطوم ما قع يقصر مع اعضاء الداخل وقدرتو بتاعة السليم مشدوده ديما للغاشى والماشى والعجب الكولا والشمسيات بتاعة الرحلات يعنى طارق طالبكم اطعام ستين مدون هههههههه فعشان كده ما تقصرو معاهو بس برضو زى ما حتصور المشروبات الروحى يا سيدا صورو لينا طارق فى الحرم وحوالينا وعلينا عشان ما نقول طارق ده مشى لى الكريستاله بتاعة شمباتى بس ههههههه . وبالله عليك صورو لينا صوره شمسية حديثه للحاج السلاوى بعد الزيارة التفتيشية الاخيره وركز على تعابير الوش هههه
    احمد الفاضل : يا زول انت لا عرستا لا اشتغلت لسع وبتعمل فى الانترفيو يادوب اها عشان كده نحنا بى جاى قبلناك عضو وبدون انترفيو كمان حبابك وبالتوفيق فى اى انترفيو ..

  25. خالد مدني كتب:

    السمار سلام … تعرف يا شمباتي ( شرابكم ) ده ذكرني واحد صاحب صاحبي في لحظة صفاء كده وانا بكركر في بابور قال لي : والله انا المخدرات دي كلها انا كنت باتعاطاها … شيشة وشاي وقهوة وسجاير لكن الحمد لله اسه خليتها كلها .

  26. aflaiga كتب:

    ود ومدنى : اسى ده مش اعتراف باصطحاب بابور فى مهمه رسميه وتوااالى بابور ماشى تواالى وانت مكركرو ليه هو ممتنع من المشى ولا حنكك تعبان ؟؟ لو قعدتو بالهداوه بيمشى معاك – قلت لى زولك كده خلى كل المخدرات ؟؟ ونعم التوبه والله بشروطا الثلاث ههههههههههه

  27. حاج أحمد السلاوى كتب:

    أفليقا وبقية صفوة الأخيار ..
    طبعن لازم نواكب التطور العالمى فى كل شى والإنترفيو وصل مراحل بعيدة .. سؤال سغيروووونى كدا .. الصورة الحديثةدى داير بيها شنو ؟
    وأبشركم ولدنا الفاضل طلع من الأسرة المالكة .. يعنى من إندينا عشان كدا الإنترفيو بقا ما ليهو داعى ..
    شمباتى إنت الفولة ما بتتبلا فى خشمك .. دا شنو دا .. دا مترو بكم ؟
    ودالمدنى … ونحنا برضو عشان رمضان الكريم بطلنا كل المخدرات من شاى .. وشاى … وشاى..
    يا جماعة الخير .. كوووولكم معزومين على شرف أب احمد ورفاقه يكرة الجمعة بعد الصلاة ..

  28. حاج أحمد السلاوى كتب:

    ولدنا الدكتور أحمد الفاضل ( اسنان )..

  29. أحمد الفاضل كتب:

    تحياتنا عمنا السلاوي
    ولي الشرف العظيم بمعرفتك وبالدم الذي يجمعنا

  30. ياسين شمباتى كتب:

    افليقا..
    ما شاءالله طارق عمّر ودبّل وزار وجاييكم مليان ايمانيات وروحانيات,,جاااهز لى رمضان موية ونور..اما عن التصوير فانحنا اهلو وبنظبطو ليكم تب..عقبال جيتكم..

    خالد مدنى..
    اوعى تكون فهمت (شرابنا) دا غلط!!؟ دا شربوت عااادى يعنى..اما المخدرات بتاعت زولك فحمانا الله منها وعافانا..لكن زولك دا برئ خلاس..

  31. abushagrod2 كتب:

    مرحب بيك يا ابو شقرود 2 كاتب معلق و مدون كمان بس لازم عمك السلاوي يعمل ليك الانترفيو….
    جاهز..!!
    ( عمي) السلاوي أنا جاهز للأنترفيووجاي ( مدبل ) خصوصا وأنو بكرة يوم السبت الكان في زمنا فيه الأنترفيو بتاع ( طابور الصباح )
    وربنا يجيب العواقب سليمة ويا ساتر تستر
    (عليكم الله بالله واحد يرسل لينا بخرة إنشالله رسالة في الجوال )
    في واحد أخونا بعد خمسة وعشرين سنةلا من التخرج حلم أنو في إمتحان التخرج من الجامعة كان عندو مادتين وجايب ( دي ) في مشروع التخرج يعني تربيتة عديل قامت جاتو حالة نفسية لحدي هسع ما فكت كنو
    أجارنا الله وإياكم

  32. حاج أحمد السلاوى كتب:

    أبو شقرود 2 .. جاهز للإنترفيو ..؟

  33. عزت كتب:

    جمعتكم مباركة

    و بركة يا الأحباب زيادة الاسطول و تامين و لامين انشاء الله و جمعنا و أياكم في أرض الحرمين شان نلاقيكم ونتونس معاكم و بالمرة نشوف المشروبات دي…

    كسرة:
    زمان أيام النميري رحمه الله بعد 83 و واحد بيرفع ليهو تقرير عن اراقة (دم المسح) في النيل و كسير (السواسو) بالبلدوزر… فلمن انتهى
    قال النميري: الحمد لله بس باقي المكيفات
    تاني يوم أتيام و أتيام طافت و قطعت و شالت مفاتيح (الكولرز) الفي شارع الجمهورية كلها…!!

  34. abushagrod2 كتب:

    جاهزين يا عمك بس شوف المداخلة في مدونة البعاعيت بتاعتكالفي الحوش اللتاني بعدين انحن جاهزين
    جمعة مباركة

  35. طارق أب أحمد كتب:

    هديه من ودالفتيحاب بمناسبه المودووووع

  36. ودالخلا كتب:

    سلام ياقبيلة،،
    طارق أب أحمد حمدا لله علي سلامة الوصول، ونحن أفتكرناك هاجرت وهجرت، ولكننا كنا نظن ظنا” وأن بعض الظن أثم فسامحنا غفر الله لنا ولك..
    لم نفهم شئ من هدية ود الفتيحاب، وما تقول ماعليك أذا لم تفهم البقر، فنحن نريد أن نفهم ماهو المقصود وهذا ليس أمر ولكن رجاء وتمني ياصديقي، لأن سد مروي واحد من كوارث الأنقاذ الكثيرة، فمعذرة فمحمود يريد أن يعرف ليس ألا!!
    ونظرة مني ونظرة منك، واحدة مني والتانية منو.،،،،،

  37. ودالفتيحاب كتب:

    ود الخلا جمعتك مباركة ، أب أحمد مازال بيننا في جدة بالمملكة العربيه السعودية وحكاية الاتاشمنت دي لما ياصلكم بي هناك قول ليه انت شربت شنو مع ناس الشمباتي وعمو السلاوى وشخصي وسوف تضحك تماما . معزرة إذا أسرنا شي مختلف وبرضو ما بنختلف ….

  38. ياسين شمباتى كتب:

    ود الفتيحاب..
    شربتوا براااااااااكم,,انا كنت بصلى !!

  39. عمار جدة كتب:

    اخونا عزت ..والله الصرف الانا شايفو في السودان ده يخليك تلاوز من ايام الاسبوع كلها خليك من الاربعاء براها ..انا حسي جيت اجازة لي 3 اسابيع والمفروض اقعد لحدي العيد لكن بالشي الشايفو ده شكلي الشهر ده ما بتمو .
    عمنا السلاوي متاسفين علي انو سافرنا من غير ما نخطركم بس الوالد جاتو وعكة صحية و خلتني استعجل السفر لكن حسي الحمدلله كلو تمام بس فاتتني عزومة الغدا الفي بيتكم لكن اكون طالبك عزومة .
    يالشمباتي والله مشتاقين واكيد زعلان مني عشان شريتك في موضوع حفلة الخميس داااك لكن زي ما حكيت لي عمنا السلاوي كان في ظروف وكدة . لكن جاييكم قريب انشاللة.

  40. عزت كتب:

    كدي دقيقة يا ود الخلا

    اب أحمد مرسل حاجة عندها علاقة كما قال المودووووع
    و انت مافهمت منها حاجة….!!
    و الجماعة ديل قالوا…
    شربت شنو مع ناس الشمباتي وعمو السلاوى وشخصي
    شربتوا براااااااااكم,,انا كنت بصلى !!
    شريتك في موضوع حفلة الخميس

    يا ود الخلا الجماعة ديل ما ظنيتم مغتربين في السعودية….

    كسرة:
    السلطة كيف يا حاج

  41. عباس ركس كتب:

    سلامات :
    يا اخوانا كدا ما بقينا سبت وعقاب شهر !!!!!
    اقترح نقفل البوست دا ( طبعا بعد اذنك يا مرطب ) وطوالي توووووووش نخش في بوست جديد نسميه
    ( قعدة سلولو ) ( قعدة جدة ) , المهم المودووووع فيه قعدة . رأيكم شنو ؟

  42. حاج أحمد السلاوى كتب:

    دوك عزت ..عمار جدة …والباشمهندس ركس وبقية الصفوة .. الما خمج …
    أولن يا عمار نقول ليك ألف سلامة للوالد وإن شاء الله ما يشوف شر وتكون إطمأنيت عليهو … أنا وشمباتى إتصلنا عليك كتير وأخيراً إتصلت على الدكتور عبدالناصر ( السعودى الألماتى ) وعرفت منه إنك سافرت السودان بس ما قال إنها سفرة مفاجئة .على اى حال فاتتك جلسة جميلة وظريفة .
    د. عزت …السلطة كانت جميلة ومدنكلة ..شكراً ليك ولإتصالك يا أبا عصمت .زفقدناكم فى الجلسة الجميلة دى .. شمباتى طبعن كان نجم اللقاء بحركاته وقفشاته..بالإشتراك مع ودالفتيحاب ( صاحب الخلطة الذهبية )..
    وكان هناك إتصالمن أخونا ابو السناكل ..وآخر من الأستاذ ودالبركة ..والدكتور محمد صالح من بريطانيا العظمى..
    وراجعين لكم عشان نكمل الوصف إن شاء الله .

  43. ودالفتيحاب كتب:

    دعزت والعقد الفريد
    لكم كلكم السلام والتحية ، الصورة كانت من أحد كورسات أخونا أب أحمد وكان لكشر تمام بعد الجردل المدنكل . لقد كانت لي إتصالتكم في تلك الاثناء لعظيم الشرف لنا وقد سعدنا بها كثيرا وكم تمنينا أن تكونو معنا . بيرة الله والرسول وشراب حجاج بارد وحلو أها رايكم شنو ، وأسالوا العنبه الر…..

  44. أحمد الفاضل كتب:

    لكم سعدت وانتشيت وأنا أتعرف عن قرب الى إخوان كرام وتتشنف أذناي بسماع أصواتهم
    شكرا لكم
    عمنا حاج أحمد
    شمباتي
    أب أحمد

    وأسأل الله أن نجتمع في ظل الود دوما

  45. ودالخلا كتب:

    سلام ياقبيلة،،
    دوك عزت الظاهر كلامك صاح الناس ديل ما مغتربين في السعودية انا بديت أشك وخصوصا” بعد الشرابيت واللخابيت البيقو يسوا لينا فيها دي،
    دوك شمباتي ضحكتني بالحيل لمن كبيت الزوغة وقلت لي قاعد تصلي والجماعة شربوا براهم، ما بصدقك عشان بالك معاهم، وذكرتني قصة القكي الحكاها الطيب محمد الطيب عليه الرحمة في كتابه الشهير (الأنداية)، لمن ست الشراب جابت لهو البرمة لقتو بيصلي ، وهو ساجد مدّ كراعو طويلة وأشر ليها بي كراعو يعني ختيها هنا!!
    ود الفتيحاب هسع عليك الله أقرأ كلامك لعزت وبقية العقد الفريد بعد الحكاية فكت وأربط كلماتك وحروفك ومعانيها مع بعض وشوف بتفوح منها ريحة شنو!!!
    قال شراب بارد قال..
    أخونا عمار حمدا لله علي سلامة والدك وأنشاء الله تعود بالسلامة..
    سديقي كبير الكواشف سلولو داير أسألك عن صاحبك دكتور عبد الناصر بتاع السعودي الألماني هل له علاقة ببحري الثانوية- المنصورة..
    ونتمني ليكم اللقاء دوما في ود وصفاء كما قال أحمد الفاضل في قعدة جدة بتاعت سلولو ديك!!
    تحياتي

  46. ياسين شمباتى كتب:

    الاحباب..سلام..
    بهتونا ونبشونا !! احمدالله الكنت فوق التبروقة…

    ود الخلا..سلام..
    والله الفكى دا بالغ لكن,,ضحكت وانا فى قمة حزنى..لكن الصاااااقط ما بتفوت ولا بتعوض..

    عمار..سلام..
    الف لا باس على الوالد وربنا يحقق ليهو كامل الشفاء..

  47. طارق أب أحمد كتب:

    شمباتى
    أبقارقيق جاييك بالصور

    </a

  48. ابوشقرود كتب:

    سلام يا دفعة
    والله نمشي ونمجي لافين بحتة الصورة دي
    وحسب الخبرة البسيطة بتاعتنا لو الشربوت قعد ثلاتة يوم ببقي ( زبيرتو ) عديل كده
    لكن من الصورة بتاعة شمباتي وهو ماسك قارورة الموية أم أربعة ريال دي الشي دا إكون ليه خمسة يوم
    وللو قسنا على الضحكة والإنتكاية الشي دا بالميت إكون فات السبوع
    عم السلاوي لسه منتظرين المتحان دا ومذاكرين شديد

  49. حاج أحمد السلاوى كتب:

    ابو شقرود ..
    صدقنى دا لا شربوت ولا شربوت .. شوية عصائر لخبتناها مع بعض ..بقا شكلها كدا ..
    الإمتحان يا خوى فى غاية البساطة ..وما داير ليهو درس عصر ..
    مطلوب معرفة موقعك الجغرافى السلبق والحالى ..
    مطلوب معرفة قروبك ..يعنى من الشباب ولا من الكواشف ( أغششك .. الكواشف دى جمع كاشف ..وهم الناس المخضرمون فى الأرض .. زى عمك ابكرونا ..وإنت طالع ..نحنا لسه ما وصلنا المرحلة دى ..)..
    وخليك قريب .. وما تقطع الجوابات !!

  50. طارق أب أحمد كتب:

    أبو شقرود

    عمك ما يعمل ليك حميل
    أنا برضو قالو لو دى شوية عصاير ملخبته و لأنى مسكين و على نياتى شربته حبه و شوف النتيجه وشى بقا أحمر ومعفص زى الطماطمايه بتاعت الصلصه

    كدى أنت حدد موقعك الجغرافى وحنوصى مندوبنا طرفكم يجهز ليك نوع على مقاسك زى عمر ساعه واحده بس
    فت لى 3 يوم يبقى زبيرتو يعنى لو شدو قبل العيد بى إسبوع يبقى جونى المشاى

  51. ودالخلا كتب:

    جوني المشاي يا وايت ليبل أنت!!
    أهو زي ماقلنا ليكم الوحدة بقت جاذبة، والشعير بقي علي قفا من يشيل، من شامبيون البطل لحدت هاتريك الديك العوعاي، وخمو وصروا، لو بقي في أنفصال نبقي نتلاقي في الرملة الدقاقة، الشريعة زاتها بقت في مهب الريح السياسية (Really is a very bad & dirty game ) وخموا وصروا علي قول ود الزبير!!

  52. ابوشقرود كتب:

    ود الخلا
    البارة هنتك ولا ساركا ( البقرة حقتك ولا سارقها )
    مالك واقف قرون قرون زي الشعار بتاعك دا
    اللما الشامبيون مع الديك العوعاي مع الشريعة ومع السياسة شنو
    خلينا في الشربوت والذي منه وأحييك بصفتي لاعب جديد لسه في كنبة الإحتياطي وأحييك بحرارة وأسأل عن أصل المثل السوداني أو القول السوداني االشائع ( خمو وصروا ) بالله واحد خبير يفسروا لينا
    وخلينا نرجع للإمتحان وارجو من الجميع أن يدعو لنا بالتوفيق والنجاح لأنو الكباية الماسكها حاج السلاوي دي يمكن تكون مؤثرة في قراراته ولي حسع يكون ما فكت منو
    أخونا سيف رسل لى نكتة في الفيس بوك وقال في ثلاثة مساطيل ركبو بص الدمازين الخرطوم وضربهم االكونديشن بتاع البص الجديد لمن وصلوا المحطة المركزية في السوق الشعبي كانوا لسه نايمين لكزم الكمساري وقال ليهم : أنحن وصلنا الخرطوم كان دايرين تواصلوا نوم وترجعوا للدمازين أقطعوا تذاكر تاني قام واحد فتح عينواحدة وطلع ليهو قروش فيها صورة النميري قام الكمساري قال ليه ياخ أنت لسه من سنة خمسة وتمانين زمن نميري أنحنا في ألفين وعشرة عمر البشير قام المسطول فتح العين التانية وقال ليهو ( كم لبثنا )
    عم السلاوي النكتة دي ما رشوة لكن عليك الله – عليك الله ما تسقطنا
    الموقع الجغرافي من نوفمبر 88 إلى يناير 1997 مكة المكرمة مهندس معماري زملاء عمل مهندس جمال محجوب ( مدني ) ومصطفى سعد ) العسيلات ) ومندس الرشيد الحسن ومهندس محمد ضو البيت وزملاء سكن الأخ الأمين عبد الرحمن والعمل كان في شركة مكة المشروع التجاري السكني الأول
    طبعا أحسب قبلها ستة سنوات العمل بالسودان من 83 ألى 88 واهم شئ في التاريخ الفوق دا أنو أنا جيت هنا قبل الجماعة بتاعين خور عمر يجو للسلطة بسبع ولا تمانية شهور كاملة والحمدلله
    من 97 وحتى الآن العمل والإقامة بالهيئة الملكية ينبع وكللكم معزومين عندينا مجموعة سوف تبيض وجوهكم وكلهم ممكن يكونوا أعضاء في المجموعة ومعظمهم من المخضرمين
    أما عن الأسم والكنية ( ابو شقرود) فهي قصة طويلة وبعد ما نباصي في الإمتحان إكون أنا كتبتها وجهزتها مع حكايات عمنا شانوق سيم سيم ( بالبنقالي ) مع هزة راس

  53. خالد مدني كتب:

    الحبيب ابو شقرود … المهندس محمد ضو البيت صديق عزيز وعلاقتنا بيهو اسرية وقوية جدا … وكل حج او عمره انحنا مخيمين عندو وهو وزوجتو ما قعيقصروا معانا تب … ومين عارف يمكن يكون اتلاقينا في الرمله الدقاقة … لكن طبعا انا عملتا العرجا لي مراحها .
    التقييم : كاشف قروب -B .

  54. عزت كتب:

    خلاس يا أبو شقرود طالما خالد مدني سوي التصنيف يبقى مريت تب… يبقى انترفيو حاج السلاوي حيكون زي مقابلة القائد…
    مرحب بيك و الله بغرتونا يا ناس السعودية كل يومين زايدين….
    يعني بقلب قوي نعمل العمرة بعد ما بقت الزوغة هينة…

    تحياتي

  55. ودالخلا كتب:

    سلام ياقبيلة،،
    مرحب بالقائد العائد أبو شقرود، يعني أنت أتخرجت من الجامعة مع أراقة دم المسيح وخرجت من السودان مع عودة الأبن الضال، شنو أقول ليك عاد ماهي الحكاية طشت مننا ونحن زاتنا بقينا ما عرفنا ليها خبر ، وبالله يا طير المشارق أنت والمعاك بالسعودية كلمونا لو لقيتو ليه أثر!!!!
    دوك عزت الرجّال ده واضح من التصنيف بتاعو أنو بيقع في خط الدفاع التاني يعني قروب ++B وبختكم يا ناس المدونة كسبتو ليكم لا عب خطييييير، وأن شاء الله حاج ماجد يعصلج وشداد ما يشمها تاني علشان نرتاح من المهازل الخارجية والألاعيب البهلوانية أو ما يسمي بالمحترقين (مقصودة وكدا)، وأما بالنيبة لموضوعك بتاع المثل السوداني خمو وصروا فهي ترجع لعهد الكنداكة ملكة وين هي يا ربي؟؟ ولا أحولك لصاحب الملكية ود الزبير ، آلو ود الزبير خليك معانا علي الخط، أين أنت يا رجل خد كلم!!

  56. حاج أحمد السلاوى كتب:

    خالد ود المدنى …
    وكتين بقيت بتعرف شقرود .. أديهو رقم هاتفنا عشان يهاتفنا ونعزمو يوم عصير ملخبت حق يوم واااااحد بس قبال ما يبقا سبيرتو ..وقول ليهو مريت الإمتحان بامتياز .. ومرتبة الشرف الأولى كمان .. عاوز أحسن من كدا شنو .. عصير ليهو تلاتة يوم ؟.
    منتظرنك يا ابو عصمت ..بفارغ الصبر .. بس من غير عصاير .. مش إنت جايى عمرة ؟.

  57. ودالخلا كتب:

    حاج السلاوي انت الظاهر عليك حكايتك لسة رابطة من يوم داك ولي هسة ما فكت زي ما قال ليك أبو شقروود، ماهو واضح من هضربتك الكتيرة دي بهنا وبي هناك، وشايفك بتتحدي في خالد وبتقول ليهو وضاح زاتو كان لقي لهو شنو ما بعرف دااك ، يا رااجل الكلام ده هسي حلووو، وبكرة بتفك السكرة وبتجي الفكرة وبنبقي في حاو وتر ومنو القال كده وأنا ما لخبت لي عصير ولا شربت لي شربات..هنق…هنق!!
    يا جماعة جدة، نرسل ليكم أم فتفت كاربة بي شطة قباقنيت 220فولت، ولا عمكم ده تدهو فنجان قهوة ساااااااااادة ومرة، يا ودالفتيحاب الراجل ده في ظمتك، كمان يقوم يتفوه كدا ولا كدا وتبقي حكاية وراء حكاية!!
    تعرف كلام صاحبك أبكرون فيك صحيح 100% وأنت حكايتك بقت حكاية وبقيت سِنة خفيفة،،،
    ولا تؤاخذوا شنو كدا ما عارف بما يقولون..

  58. ابوشقرود كتب:

    الإخوان عزت وخالد وود الخلا والقائد حاج السلاوي وطارق أب أحمد والسلسلة الذهبية
    أشكركم جزيل الشكر على الإستقبال والحفاوة الزائدة ولو كنت عارف النتيجة حتكون مشرفة كدا كنت جبت الزغراتات بتاعات نيفاشا ديلك 0 ناس السودان ممكن يدلونا علي أخبارهم االجماعة جابوهم من وين وعدادم كم ) كلما البت السويدية السمحة ديك المندوبة بتاعت الإتحاد الأوربي تطلع المنصة وتهز شعرها زي الشبال عشان يمشي بي ورا ( الشعر ) ما يغطي عيونا يقومن الزغراتات ديل يزغردن والجماعة يوقعوا ونيفاشا دي تكون فاتت الألف ورقة كلهن وقعوهن ورقة ورقة وبعد كل توقيع يقوموا يسلموا علي السويدية وقامن ورطننا ( الزغراتات ) في ( حق تقرير المصير وشنو وشربكة ما إنضنيت نمرق منها بأخوي وأخوك لكن إلا بي ( أمسك لي وأقطع ليك )
    وربنا يجيب العواقب سليمة
    عشان كدا أحسن نبارك لي نفسي بعد حمدالله وشكره بإنضمامي لهذه الكوكبة المميزة ونرجو أن يوفقني الله ونكون عند حسن الظن ونبيض وشكم بدون الزغراتات والذي منه
    سعال صغيروني
    ياحاج ما فلت لينا الدرب بي وين

  59. حاج أحمد السلاوى كتب:

    ابو شقرود ..
    الدرب عدييييييييييييل ..ما فيهو لف ولا دوران ..أكيد حتوصل ..

  60. ودالخلا كتب:

    تديهو تلفونك ولا أديهو ليهو انا، شنو الزوغة دي ما عهدناك هكذا يا كبيرنا!!

  61. elturkey كتب:

    ود الخلا ياخ ماتحكها الخلطة الس(ح)رية قربت تخلص وعمك عايز يكسب زمن بس لكن أكيد ح يوريهو درب الوصول

  62. حاج أحمد السلاوى كتب:

    ودالخلا ..صديقى اللدود .ز
    آآآفو عليك .. أدينى تليفونه .. حسه …أنا فى إنتظارك ..ودى عاوزة سؤال ؟

  63. ياسين شمباتى كتب:

    سلام يا احباب..
    ومرحب بابى شقرود القادم بقوة..اطمئنك على الخلطة ولازم تصلنا فى الشهر الفضيل دا..وباذن الله لنا تلاقى لانو بنمر بيكم وانحنا ماشين على ينبع النخل…تحياتى..

  64. ابوشقرود كتب:

    ياسين شمباتي أهلا بيك في ينبع وأول ما توصل مبنى المعلومات السياحية في مدخل الهيئة إتصل علي التلفون 0546877159 ولنا عظيم الشرف ولو أنت بتعرف زول في النخل أو إنت ساكن في النخل يبقى أكيد في أشياء مشتركة كثيرة وزي ما قال عادل إمام : لو أن كل الفؤوس أصبحت فأسا واحدة ولو أن كل الأشجار أصبحت شجرة واحدة ولو أن كل الحطابين أصبحوا حطابا واحدا ولو أن كل البحيرات أصبحت بحيرة واحدة ولو أن الحطاب الواحد أخذ الفأس الواحدة وقطع بها الشجرة الواحدة فوقعت في البحيرة الواحدة …….أكيد حتحصل طرطشة كبيرة أوي !!!!!!!
    عم الحاج لو ما وريتونا الدرب أنا غايتو لقيت لي نفاج خاف يمرقني في البحيرة بتاعة عادل إمام دي وأكييد أكييييد حتصل طرطشة كبيييييييييييييرة أوي
    مع أجمل التحايا

  65. ياسين شمباتى كتب:

    الحبيب ابوشقرود..سلامات..
    النخل دى شغالفيها صاحبى,,لكن باذن الله بنمرك وانحنا دربنا بجيبك..سيبك من درب ابوى السلاوى البوديك للخلطة اياها !! والف مرحب يا صديق ومرحب بى طرطشتك كلها..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s