أســرار شــغل (منطق بنك)

Posted: الأحد,1 أغسطس, 2010 by elturkey in إداريه

الأســبوع الفات ضيعت عشرة فى المية من ساعات عملى الأسبوعية فى مسالة مامحددة وبرضو طلعت مافاهم المغزى !!!! تصورو بنك ليه شنة ورنة وموظفين (بذكرونى بطلبة جامعة الراياض) يكون عندك فيه حساب بالنقد الأجنبى ويحولو ليك فيه برضو بالنقد الأجنبى ولما تجى تسحب ياخدو منك عمولة (جنيهين) عن كل مية دولار … الغريب ان الموظفين بمافيهم رؤساء الأقسام ماعارفين سر الجنيهات المستقطعة  ولا القرار طالع من وين بالضبط (يكونو ماعايزين يقولو ؟)عشان كده حولونا للمدير وياريت ما مشينا ليهو …. سعادته بقول انهم طلبو عملة صعبة من الرئاسة ولما ما مدتهم بيها قرروا يمشو شغل العملاء فرسلو كم واحد كدة للدول الخليجية وجابو ليهم الدولارات وطبعا ديل عندهم مصاريف سفر واكل واقامة والذى منه ففكرو يحلو الموضوع كيف قالو خلاص اى عميل يسحب مية دولار ندفعه جنيهين ودا شئ مؤقت لحدة ما القروش الجابوها تخلص بس وبوقيفو الشغلانة … طيب وقروشنا الجات من بره ذنبها شنو تطبقو عليها قراركم دا ؟؟؟؟ المهم ماقدر يقنعنا  وبعد كم تلفون وتفتيح فايلات ودراسة حسابنا  قال لينا خلاص بستثنيكم منها  ….. ياخوانا البنوك ليها حق بالشكل دا ولا صلاحية كل مدير لوحده ؟؟؟؟ هل البنك المركزى عارف ؟؟؟؟ وهل وهل ؟؟؟؟؟

Advertisements
تعليقات
  1. ودالخلا كتب:

    سلام ياقبيلة،،
    التركي ، بالله الناس دي عديل قالوا ليك الكلام ده برا خجل أو مدسة، يعني أنت تفتح حساب وتخت قروشك حلالك بلالك بأختيارك عندهم، وهمن يشغلوها لمن تقول بس ويجنوا منها الأرباح الطائلة ولمن تجي تسحبها أو تسحب جزء منها يمطوحوك ويدوخك السبع دوخات، ويدفعوك عمولة كمان ، بأي وجه حق يأخدوا عمولة منك وأنت مالك ومال الموظف السافر برة يجيب عملة ولا يجيب خبرهم، والحاجة التانية والأهم من ده كلوا القروش دي ما مفروض تكون قاعدة عندهم كأمانات متي ما أحتاجها صاحبها أستلمها ولأنهم أصلا” بيأخدوا منك عمولة حساب معروفة ومحددة.. دي حالة أصلها ما حصلت قبال ده وما سمعنا بيها في الأولين ولا في الآخرين، وصحيح اليعيش يا ما يشوف، وهسي ما وريتنا أدوك قروشك ولا بح!!

  2. ودالخلا كتب:

    بعد دين يا صديقي كونوا البنك المركزي يكون ماعارف تكون مصيبة، والمصيبة الأعظم يكون عارف وعامل نايم..
    لا حول ولا قوة ألا بالله العلي العظيم، ده يقولوا عليهو شنو دا ؟؟؟

  3. حاج أحمد السلاوى كتب:

    السادة التركى ..وود الخلا .. ويقية الصفوة الكرام ..
    دا يقولوا عليهو حاجة وااااحدة بس ..دا أسمو أكل أموال الناس بالباطل ..ماعندها أى مسمى غير كدا ..والحاجات هى المغتسة حجره ..وطبعن حكومتنا السنية رائدة التوجه الحضارى الزائف عارفة كل دا بيحصل لاكين مين يقدر يقول البغلة فى الإبريق …
    نفس الموال دا كان بيحصل عندنا كل شهر خلال السنوات الماضية ..بل اسوأ من الحصل معاك يا التركى .. كانوا بياخدوا منهم عمولة مع إنو نازل فى الحساب وليس حوالة .. وبعد كدا ما كانوا بيعطوا نفس العملة المحولة بل يصرفوا لينا بالعملة المحلية …
    أين علماؤنا الأفاضل الكرام .؟. لماذا لا يتحدثون عن مثل هذه التصرفات التى قد تؤدى إلى التهلكة ..
    أما إنت يا أخى التركى .. اقول ليك القول المعهود عند أهلنا فى السودان .. الجاتك فى دولاراتك سامحتك …

  4. حاج أحمد السلاوى كتب:

    الحاجات دى هى المغتسه حجر البلد ..
    تصحيح ..

  5. عزت كتب:

    هو غير البنك المركزي و ناس حمدي الغتس البلد دي منو و آخرتا يا السلاوي تدفع القروش للتحويل بغرض السفر و يدوك ايصال … و يقولوا ليك قابلنا و انت خارج من البلد في المطار شان نديك نص قروشك و الباقي تمشي تستلموا محل ما ماشي…

    منتهى افتراض سوء النية في المواطن السوداني فهو متهم بأنو داير يبيع العملة في سوق الله أكبر و ما شغل التحويل و البسابورت و التذكرة دا الا حركة وراها بركة…

    يا تري ناس الأحسبون بيقيفوا في الصفوف زينا و الا دولاراتهم بتجيهم في البيت..!!

  6. aflaiga كتب:

    التركى : بالله قلبوكم فى قروشكم ههههههههه تعرف الناس ديل لو عندهم ذوق كان يخلوها بالنيه يعنى بعد التركى يصرف قروشو هو وذوقو ممكن يخت للموظف السافر حاجه تحت الكاونتر نظام حق السفر وكده بس كمان ما يقوم ينقط للموظفات من باب التركى مبسوط منى عشان انا تعبت فى سفرى ههههههههههههههههههههههههههههههههه .
    وتبقى القصه مفتوحه ويبقى الحنك الجديد ( لو سمحتى جاتنى دولارات من بره البت التعبت سافرت ياتا فى السمحات ديل ؟؟؟ ) هههههه تحياتى يا بتاع الدولارات انتا …

  7. طارق أب أحمد كتب:

    التركى و زواره الكرام
    سلام
    أشياء كثيره مفروضه علينا أصبحنا نتعامل معها ولا نسأل عن حقنا المسلوب لأننا لن نجد الأجابه

    التأمينات الأجتماعيه تخصم من جملة (Gross Salary ) مرتب المستخدم الكلى 7% و 14% من المخدم ليصبخ المجموع 21% مضروبه فى 12 شهر و فى عشرين سنه تقريبا و تظل طول هذه الفتره تستغل هذه الأموال فى ضروب الأستثمار المختلفه و فى نهاية المده عندما تذهب لصرف حقوقك يخصم منك 25 % مصروفات أداريه بدلا من منحك نسبتك فى المشاركه فى أستثمارتهم يخصم منك ربع مبلغ مدخراتك التى أستقطعت منك و من المخدم رغم أنف أنفك

  8. aflaiga كتب:

    عزت : تعرف موضوع تستلم الايصالات فى الصرافه وتستلم القروش فى المطار دى ذكرتنى مشهد :
    صديقنا س صاحب مطعم بجوار مطعم صديقنا ص وصديقنا س بيزبط شطه كاربه جدا لكن اكلو تعبان وصديقنا ص بيزبط اكل جامد لكن شطتو تعبانه وصديقنا ع معتاد يجى مطعم س يشيل الشطه فى صحن ويمشى ياكل عند صديقنا ص والقصه دى مزعله صديقنا س جدا جدا وفى احد الايام :
    س : انت ي ص كدى اسالك سؤال ممكن ؟؟
    ع : جدا اتفضل .
    س : انت اسى ممكن الواحد يتوضا فى الجامع ويمشى يصلى فى البيت ؟؟؟
    ع : طبعا ما ممكن ابدا .. ليه يعنى السؤال الغريب ده ؟؟
    س : طيب بالله عليك الله اوعك تانى تجى تشيل منى شطه فاهم ……..

  9. ياسين شمباتى كتب:

    الحبيب التركى..سلام..
    بنك !!؟؟ دى فوضى بس..ونفس الحساب الانت بتورد فيهو بالاجنبى لما تسحب يقولوا ليك مافى اجنبى!! نديك محلى بس!! وطبعا براك عارف لفرق السعر..احييييييييييييييييييييييييييي انا منهم..

  10. ودالفتيحاب كتب:

    يالتركي سلالالالام
    والجاتك في دولاراتك سامحتك ، التحيه للوطن الجميل والله نشوف النشرة الاقتصادية نقول بكرة نرجع ، نسمع ناس التركي نقعد نحسب ، وبعدين ياخوانا ده حدو وين……

  11. elturkey كتب:

    أحبائى الغالين شكرا ليكم جميعا على المرور الراقى
    ود الخلا : تصور انهم ماداسنو كمان بقولو ليك فى عينك ونسوا حكاية ردو الأمانات الى أهلها … لو ماوصلنا حل كنا وصلنا للبنك المركزى بس كنت خايف تظهر فضيحة أكبر كمان ياصديقى العزيز
    عمنا السلاوى : علماؤناالأفاضل ياحليلهم بقت فتاويهم سياسية اكتر من انها دينية … بس تعرف الناس ديل حواه يخت قروشك عملة صعبة يقلبوها ليك عملة محلية فى طرفة عين وكمان معاها عمولة ومال هو العبقرية دى بتجى ساى كدة
    د.عزت : ونفس حمدى دا يطلع فى التلفزيون ويدين النظام الأقتصادى مدعيا أنو مانظام اصلاحى ولا حد يقول ليهو وانت وقت كنت جزء منه عملت شنو وليه ماعملته فعال وقانونى ؟؟
    أفليقا : شوق شديد ياقلب, لا ياخ طيب ماأحسن المرة الجاية تمشى مع البتجيب الدولارات عشان تشوف بتشتريها من وين مش يمكن تكون مضروبة (الدولارات يعنى) قلبى على دولارتى وقلب البنك على موظفاته ههههههههههههه لكن هى ماشطة بتاعة صحبك ع
    الغالى اب أحمد : الف حمدا لله على السلامة, حكاية التأمينات دى قبل حوالى سنتين عندى معاهم موقف بخصوص الاستقطاع والاسترجاع وللآن لا انا اقتنعت بنظامهم ولا هم عارفين نفسهم بسو فى شنو تتصور … الناس دى أى قرش يستثمروه ليك عندهم فيه نسبة وانت ماعندك من الربح ولا التكتح
    شمباتى : ياخ انا بس عايز أعرف دولاراتهم الجابوها دى كم ؟ والبتابعها منو عشان نعرف انها خلصت والعمولة وقفت … تصور لو عندنا فى النشرة الاقتصادية يوميا كمية الدولارات الداخلة والخارجة وتضرب كل مية دولار فى جنيهين ؟؟ ماخلاص ياقلب رمضان دا عايزنك معانا ابقى مارق (على قولك)

  12. aflaiga كتب:

    التركى : نمشى وين انت ما سمعت غنية يا ود الناس البعز اهلى انا بمشى معاك الخرطوم بحرى نميرى الله يرحمه عشانا عمل الشريعه ؟؟؟ بعدين المضروب مضروب وبيظهر فى البلد دى مش الا يجسوهو بره ؟؟ بره دى بيمشو يلتقو فيها المضروب لكن بينى وبينك بصفتك زول بانركى بتعرفو المضروب كيف بدون ما ترفعو الورقه تعاينو ليها فى الشمس وتتاكدو من العلامه المائية ؟؟؟؟؟؟؟؟؟؟؟؟

  13. elturkey كتب:

    جارى العزيز الف مرحبتين حبابك واليوم سعيد الليلة الجابك …. ياخ خليك انت البره انا مرات بسمع الأخبار بسأل نفسى ياربى ديل بتكلمو عن البلد الانا هسع عايش فيها دى ولا فى أمازونيا تانية .
    أفليقا : ياسايق يارايق والنظرة ماشة وراك وقف وقف وسوقنى معاااااك … يقال انو نميرى بعدما قرر يعمل بالشريعة وفى زيارة للقذافى كانو راجعين من مدنى مع المغربية كدة وكل كم متر كدة يلقى جماعة بصـلو المغرب فالقذافى قال ليهو ياجعفر ياخ ديل ناس بحاتجو لتوفير لقمة العيش اكتر مما تحكمهم بالشريعة.
    ياأفلى الكشف فى البلد دى أخطاؤه اخطر من أخطاء (بعض) الدكاترة خاصة والكشف أنواع

  14. zaroug كتب:

    الإخوة ود الخلا واخرين :
    انتو يا ناس ربنا اداكم دولارات وبخصموا منها يمكن تكون مصيبتكم اخف وطأة
    لـــــــــــــكـــــــــــــــن … نحنا ناس قريعتى راحتك القاعدين نبحت ليها من اول الدغش الى آخر الليل وبناخدها بالملاليم المحلية برضوا منشفين ريقها وريقنا كلها خصومات شىء ضرائب وشىء ما معروف حتى الزكاة تم تحويرها وتغيير معناها هو يا اخوانا زول لا يملك قوت يومه لنفسه وعياله بيدفعوه زكاة ولا بيدفعوا ليــــــــــــــــــــــــــــــــــــــــــــــــه … ؟!!!

  15. ودالخلا كتب:

    أخونا zaroug مرحب بيك لحدي ما يلم فيك عمك داك يوريك النجوم في عز الضهر (غايتو يوم يا السلاوي يلم فيك واحد فس سؤالاتك ليهو دي يعضيك عضة لمن تآآآآآآآمن)، وكان جيت للحق في موضوع الزكاة مفروض يدوها ليهو لكن نحن ناسنا دسل بيشيلوها منو ويدوها لغيروا علشان هو محتاج أكتر منو، ما سمعت بالناس الجيعانين يعضوا وفي العضيمي اليابسة ضمة قعدتو سعرانين تكدوا!!!!
    موضوع الزكاة وأكل الأموال بالباطل بالرشا والمكوس والجبايات التي تؤخذ من أفواه اليتامي لتتحول لحوافز ومخصصات لأولئك الذين لا يخشون الله ولا يرغبونفي مؤمن الا ولا ذمة،،،،
    ربنا لا تؤاخذنا بما فعل السفهاء منا أن هي الا فتنتك تضل بها من تشاء وتهدي بها من تشاء أنت ولينا فأغفر لنا وأرحمنا وأنت أرحم الراحمين..
    اللهم أنا نبرأ اليك مما يصنعون،،

  16. elturkey كتب:

    الأخ زروق مرحب بيك بيناتنا ومنورين بيك
    مالمصيبة ياخويا انك تتعب وتكدح وتلم الدولارات وبعد خصم الانت قلت عليه دا يجى البنك تاانى يخصم منك …. اما موضوع الزكاة واوجه صرفها دا غميص شويتين .
    ودالخلا : ناس الزكاة ديل ياخ الواحد يملكوهو عربيته الراكبها ويقوم هو يأجرها للمكتب بتاعه واكتر منك كدة يكون سايقها او مستعمله هو بذات نفسه قال شنو قال العاملين عليها …. حوالينا ولا علينا يارب

  17. زووووول كتب:

    السلطه كلما تسلطت على السلطة بإفقادها الملح وقليل من(الدكوه) كانت اسلط علي السُلطة من سُلطتها فتسلط كل سلطان على غيرة فالكل يحسب انه سلطه وانا ليس لي سلطة في ذلك

  18. ودالخلا كتب:

    صديقي التركي ،،
    يقول الحق جلا وعلا في سورة النساء آية 10 (ان الذين ياكلون اموال اليتامى ظلما انما ياكلون في بطونهم نارا وسيصلون سعيرا)، تاني بعد ده في كلام؟؟

  19. sobajo كتب:

    كان الله في عونك ايها المواطن الكريم
    فقد اعتاد هؤلاء الشرذمة مص دماءك
    بدون رحمة او شفقة وان يطبقوا فيك
    ابشع النظريات دون ان يرمش لهم جفن
    اللهم اجعلها سما زعافا في بطونهم
    ولا تهنئهم بها . اللهم اليك نشكو ظلم
    اخوة لنا غاب عنهم الضمير فسامونا العذاب
    اللهم اليك المشتكى والمبتغى يا مجيب دعوة المظلوم .

  20. elturkey كتب:

    زو(7)ل : السلطة لازم يكون فيها شطة طبعا …. الغريب انو اى واحد يدوهو شوية سلطة يشعر كأنه ملك كل الصلاحيات يسير المؤسسة عى هواه وطبعا غالبا مايكون فى موقعه عشان كدة قرارته بتكون ارتجالية وكوم المستشارين ديل بس للمخصصات والترضية .
    ودالخلا : لاقول بعد الكتاب الحكيم … ربنا يورينا يوم فى كل المفترين الضالين .
    سوباجو : شكرا على مرورك وآمين من خشمك لرب السما …. بس لاناس دى لما تعرف انها أخطأت لا بتعتذر ولا بتعوض المتضررين مش عجيبة ؟

  21. nono كتب:

    ماكنت عاااارف ؟؟

    ياريتني كنت عااااارف؟؟

    لك التحيه الاخ التركي

  22. التركــــى كتب:

    نونو الغالية شكرا على المرور … وهو نحن الماعارفنو شوية يابت العم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s