يا أحمر يا أزرق

Posted: الإثنين,2 أغسطس, 2010 by عزت in اخرى

لعل عناصر المؤتمر الوطني كانوا أكثر الناس تبسماً في وجوه المعارضين و عبروا عنه بالغمز و اللمز في أكثر من مناسبة خاصة عندما يضموا الى جناحهم بعضا من كوادرهم فغالبا ما يحتفوا بالقادمين الجدد و يخاطبهم امين سر الحزب و يغدق عليهم ما بعرفوا شنو… فالشاهد أن الهجرة الى المال كثرت مؤخرا و كان أولى تلك الهجرات هي (رمضان) كما عبر عنها شيخهم (لقد اختاروا المال و لكن قلوبهم معنا) عندما حصل الانشقاق الشهير في 4 رمضان قبل سنوات خلت و صارت الكيمان (منشية) و (قصر) فالذي يريد السلطة و الجاه فقد آثر القصر و خلوا المنشية تمور بالموالين للشيخ مثير الجدل…

و تكبدوا في ولائهم ما تكبدوا من اعتقالات و مضايقات عجلت برحيل بعضا منهم أيضا الى صفوف الوطني… و ما زال الى يومنا هذا الهدايا و الوعود للمنضمين الجدد و العين الحمرا و الضنك لمن بقى… زد على ذلك أن الهجرة الى الوطني لم تقتصر على المعارضين فحسب بل شملت أعيان و تجار و أقباط كمان و كان الاحتفال يتم بهم ليس على مستوى الأمين العام بل على مستوى كبير حسب ما يمثله من ينضم من جاه و حسب و (فلة)… فصار الوطني يعج بالرأسماليين….ما عارف دايرين شنو زيادة… ربما بعض الحماية و الاغداق من حين لآخر… لكين للفكر و الدفاع عنه ما ظنيت…

سبب الرمية الطويلة دي ما سببته القبيلة الرياضية للشعب السوداني فالشاهد أيضا أن السودان مقسم ليس جنوب و شمال فحسب بل الى (هلال) و (مريخ) حسب اقطاب و مناصري كل فئة و دائما ما تكون المنافسة بين القبيلتين و ربما يستعمل بعضا من المتشنجين في اي من القبيلتين الاسلحة البيضاء التي تخرج من أفواه المتشنجين عنمدما يحاولون مقارعة الحجة بالحجة وتحاول احداهم النيل من الأخرى فيتطاير الرزاز مع الكلام و يذهب الزبد جفاء و ربما تمتد “المكاواه” باستخدام الألوان كان حمراء و كان لبنية في قمع الفئة الأخرى و تستعر تلك المنافسة في موسم اللقاء بين بعضيهم و حتى بين نظائرهم من الفرق الاقليمية فعادي جدا أن تتحزب الحمراء ضد اللبنية أو العكس و تكون مع الغريب…

أخاف ما أخاف أن نشهد تحولات من شاكلة الهجرة الى الوطني من تلك القبيلة أو تلك ولكن هل سيدفعوا لنا ان تحولنا فالشاهد أن القبيلة الحمراء هذه الايام في أضعف حالاتها و عيني عليهم باردة ناس الزرقاء (بالخمسة) و خميسة…..

About these ads
تعليقات
  1. aflaiga قال:

    عزت : ما دام فكرت مجرد التفكير ده براهو بيخلى ناس ود الزبير يرسلو وفد لتفاوض مع المؤلفه قلوبهم من الاحمر الوهاج لضمهم لمسيرة الازرق انت بس ابدا فى الاجراءات وشوف الازرق حيعمل معاك شنو ؟؟؟ ما بعيد يدخلو عصمت الكليه الحربيه ويرقوه و مع دفعتو يعنى هو اقل من ود الامام الصادق ؟؟ ههههههه
    انا برضو لاحظت انو الازرق الايامات دى اسهمو مرتفعه لكن شينه منك تشبهو بالبتاع داك لانو الدنيا ما مضمونه …

  2. ودالخلا قال:

    سلام ياقبيلة،،
    دوك عزت ليس لنا في عير الكورة ولا نفيرها، ولكن الشيئ بالشيئ يذكر، فقد ذكرني حديثك عن القصر والمنشية حين المفاصلة الشهيرة ، عندما أحتد النقاش وسُئلت أن كنت (قصري) نسبة للقصر أو (منشي) نسبة للمنشية، وحرت جوابا” لأنني وببراءة شديدة لم أفهم مغزي السؤال في حينها، وجاءت الأجابة الشافية التي أنقذتني من حرج السؤال ومباغتته بأن الأثنين ناقصين (غير مكتملي النمو)!!!!

  3. طارق أب أحمد قال:

    موضوع قريب من الألوان (الشعارات)
    فوجئت بشعار منظمه خيريه سعوديه ترعى مرضى الكلى شعارها كليتين متجاورتين واحده حمراء و التانيه سوداء …. الشعار سرق بواسطة المؤتمر الوطنى أيام الحمله الأنتخابيه للتعبير عن تلاحم قلبين واحد أحمر (أسمر ) و التانى أسود (أزرق)
    مشاكل أستعمل نفس الشعار لفتره فى البروفايل هنا
    للرجوع لصوره الشعار أبحث عن كلانا فى قوقل image

  4. مشاكل قال:

    سلامز

    بعد أحداث المفاصلة اجتمع ما يمكن تسميتها الجمعية العمومية لطلاب الحركة الإسلامية في منطقة العيلفون .. و أي زول شاف كومو .. اللافات انو معظم القيادات اتجهت لمعسكر علي عثمان .. و القاعدة كانت متمسكة بي شيخ حسن الترابي
    حصل موقف ظريف بين اتنين من الاصحاب .ز واحد قيادي معروف و التاني زول الله ساي فقال ليه
    مالك يا ( فلان ) .. شايفك ابيت الشيخ
    رد عليه القيادي : و الله الحق معروف بي وين .. لكن ما بنقدر على شلهتة المواصلات من تاني

    بعدين لا حال الهلال يسر حبيب و لا عدو .. الحال من بعضو .. و الناس ما تنسى انو البطولة بالبيلعب فيها الهلال دي كانو بسموها بطولة ( الوصفاء ) و ( الدلاقين ) .. اسي مالها بقت سمحة ؟؟؟؟

  5. zaroug قال:

    عـــــــــــــــــزت : أعزك الله بخيرى الدنيا والآخرة
    جاء فى السنة أن من كانت هجرته الى الله فهجرته الى الله
    ومن كانت هجرته لتجارة يصبها أو أمراة ينكحها فهجرته الى ما هاجر اليه
    فيا اخى الحلال بين والحرام بين

    فالهجرة الى المنشية طريقها وعرة ومليئة بالأشواك لأن قول المصطفى (ص) عن القابض على دينه فى هذا العصر كالقابض على الجمر .

    أما طريق الدنيا والتملق للسلطان لا تكلفك سوى بعض البهرجة وحفظ بعض عبارات التملق والتشدق بغير الحق فتصبح الطريق امامك سالكة ومفروشة بالورود
    فخيرا عملت المفاصلة فهى حقا فاصل بين وواضح بين الصدق والاخلاص ، وبين النفاق والكيل بمليون مكيال …. فالحمد لله الآن حصحص الحق …. وفى غضون ايام قلائل ياتيك نبأ استفتاء الجنوب بالخبر اليقين ويزيل عن كاهلك الحيرة والدهشة وستعرف كيف كان شيخ الاسلام (الترابى ) يعمل لغد مشرق لكل السودانين …. وليس أصحاب القصر … الذى لا أظنه سيكون اكثر شهرة من ايوان كسرى الذى انهد مع أول طرقة معول من يدى سيد البرية .

  6. عزت قال:

    فعلا يا أفليقا أعتذر للتشبيه بالبتاع و فعلا ما دوامة لكين ناس الأزرق الوهاج و الأحمر الملعلط كانوا و سيظلوا مدة من الزمن و باقي البتاع دا قرب و صفارتو قربت تضرب و ما أول السنة ببعيد…

    و مرحب بيك يا زروق و أعزنا كلنا بخيري الدارين

    و فعلا سوف يحصص الحق دائما لكين يا ريت لصالح الشعب السوداني كلو و ليس لفئة القصر و الا المنشية لما صاحبهم من قصور في التفكير و تغير في الولاء و الأولويات و تعزيز للجهويات و تعمد الأقصاء…و زي ما قال ود الخلا (غير مكتملي النمو) …… هههها ههها لمتين يا مولاي

    و يبقى السودان حرا مستقلا موحدا…!!!

    كسرة:
    بالله يا مشاكل و نجن قايلين الأزرق الوهاج كاتل الجداد و خامي بيضو…!!

  7. elturkey قال:

    د.عزت ياخ عملية انى خيرتك فاختار ذكرتنى بالايام العصيبة فى تركيا لما الناس اتقسمت يسارى ويمينى واحد صاحبنا ختو ليهو المسدس فى راسه وسألوهو يمينى ولا يسارى ؟ تصور بس ربك رب الخير البوليس داهم الجامعة والناس فرت … الود لمن أتخرج راسه ماراكب عدله لأنه قال التفت عشان أعرف السائل بنتمى لياتو تنظيم لقيتو مكمم ومامعروف لو قلت يسارى يطلع يمينى والعكس … الله لاورانا ايام زى دى سواء فى الكورة ولا بعد الاستفتاء

  8. أحمد الفاضل قال:

    خبر عاجل!!
    انسحب جمال الوالي من القلعة الحمراء وأظنه سينضم الى الزعيم الأزرق كما قضل القصر على الشيخ من قبل

  9. sobajo قال:

    استغرب عندما اسمع جعجعة رياضية داخلياً
    ولا ارى طحناً خارجياً !! وازداد استغراباً
    عندما اعلم بأنه توجد اكثر من عشرين صحيفة
    مختصة بكرة القدم في السودان بينما توجد في
    البرازيل ( صاحبة التأريخ الحقيقي لكرة القدم )
    صحيفة رياضية واحدة !!!!

  10. عزت قال:

    ما تستغرش (استغراب و اندهاش) يا سوباجو أبدا في سودان مهيرة كل شئ جائز مش عندنا وزارة رياضة و ما عندنا كورة…!!

    فعلا يا أحمد الفاضل القلعة الحمراء هذه الأيام حالتا تحنن…
    و الفيفا جايطة و شداد مبتسم و معتصم مستغرش أبدا و الوزير قال ما كلموهو…

    أنا ما عارف شداد داير بيها شنو… و الا آآآآآآآآه

  11. ابراهيم جمعة عبدالرحمن قال:

    عزت
    لماذا لا تقام مبارة بين الهلال والمريخ لدعم الوحدة وتكون المبارة في جوبا والدخول مجاني والسفر مجاني ونشوف هل الرياضة يمكن ان توحد السودان ما دام السياسة فشلت علي الاقل الرياضة فيها اخلاق ما زي السياسة

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s