الواضح الصريح فى حساب جرسة التراويح..

Posted: الأحد,15 أغسطس, 2010 by ياسين شمباتى in إجتماعية

1/إذا أصبحت تسول لك نفسك الإنبطاح و الخرتتة بعد الإفطار و أنت منتفخ الكرش ثم استجداء النوم حتى يرفع عنك القلم (نقطتان)

2/إذا أصبحت الجرجرة و المحركة قبل الإقامة ديدنك و أصبحت تنتهج مع الإمام استراتيجية (قدم الكيشة و الحقو) (أربع نقاط)

3/يمكنك حساب مدى تراجع لياقتك يومياً بحساب تراجع مكانك بين الصفوف … فاعط نفسك نقطة لكل صف تراجعته

إذا أصبجت تتلفت يمنة و يسرة بعد العشاء و قبل التراويح لترى كم بقي من المصلين في المسجد فهذه إشارة بائنة لبحثك عن عزاء لنفسك في جرسة الآخرين … (ثلاث نقاط)
5-
أضف أربع نقاط لرصيدك إذا أصبحت كثير الوقوف بجانب أعمامك المصلين على كراسي بغرض الإتكال و التثبيت …
6-
إذا أصبح سجودك طويلاً و جلوسك أطول و به من الترطيب ما به فابشر بخمس نقاط …
7-
إذا كثر وقوفك مستنداً على إحدى الرجلين و ثانياً ركبتك كالحصان الشبعان ..(نقطتان)
8-
بإمكانك حساب مدى ثباتك و صنددتك بملاحظة مكان يديك من كرشك ..ففي البدء تكون كفاك أعلى الكرش ثم تتدحرجان ببطء إلى أسفله فإذا بلغتا مستقرهما قبل انتهاء الفاتحة فتمتع بثلاث نقاط حلالاً عليك …
9-
احسب لنفسك نقطتين إذا فعلت أياً من هذه الأفعال بعد كل تسليم : (طقطقة الرقبة – حك باطن القدم اليمنى أو طقطقة أصابعها – التأكد من لمس الركبتين أثناء الوقوف لبدء الركعتين التاليتين – حك الظهر من الأسفل ) ..و ثلاث نقاط لطقطقة الظهر ….
10-
إذا كنت من آكلي سلطة الروب (حمانا الله) و علمت الملائكة و المصلون بقربك هذه المعلومة فهذه ست نقاط كاملة ثكلتك أمك …
11-
في الركعة الثانية من كل زوج أضف ثلاث نقاط مع كل فعل من الأفعال التالية : ( الطوطيح و اللولحة مثل بندول الساعة – التثاؤب – محاولة الوقوف برهة على أمشاط القدم – النظر للأسفل لمعرفة مكان قدميك اللتان تحركتا بفعل الزحزحة و التململ خارج الصف )
12-
إذا كثر جلوسك مستنداً على الحائط و كثر تحايلك بتقديم الإمام حتى يركع الركعة الأولى فسيصيبك وابل من ست نقاط فإن لم يصبك وابل فطل …
13-
أضف نقطتين للآتي : (إذا علا صوتك بالتكبير حين الجلوس للتشهد – إذا كثر زوغانك عند القيام بالتفكير في البيت و العمل و سيد الدكان و خططك المستقبلية – إذا وجدت حذاءك بسهولة عند خروجك )
14-
أنت خارج التصنيف إذا أصبحت تتخير المساجد و تستعين بالخفيف الحريف و مستعملي المنشطات..

  • المقال للزميل الحبيب /د.متوكل عبدالله…

ونلتقى…….

Advertisements
تعليقات
  1. ياسين شمباتى كتب:

    احسب درجاتك واعرف نفسك…

  2. عمار جدة كتب:

    والله يا شمباتي الله يجازي محنك انت و زميلك العزيز ياخي ماخليتو لي جنبة ارقد عليها التقول زولك ده كان بيصلي جنبي ودون ملاحظاتو دي مني لانها دقيقة للغاية …وكان كدة انا بيكون دقيت في المية درجة لكن بس مشكلة سلطة الروب ماعرفتها وشايفها جابت ليها ثكلان امهات حمانا الله

  3. الجعلى كتب:

    الغالى شمباتى :أولا رمضان كريم ..بعدين فى حاجة بتديك 50 درجة عدييل , لمن تقول والله التراويح دى لا فرض لا سنة ..وأحسن تصليها فى البيت , وطبعا ما حتصليها ..

  4. ابكرون كتب:

    ههههههههه
    لكن يا شمبته د متوكل بااااالغ وفعلا ان لم يكن فينا معظمها ففينا منها
    بعدين ما تنسي كب الزوغة بدون عذر من الركعة الرابعةبعد العشاء دي فيها كم ؟
    بعدين في من يعمل (اسويتش اوف) لفيوز دماغو الرئيسي وتلقاهو واقف زي الحُمر العايزه تفر من قسورة .
    وما تنسي النوع البتلفت زي سواق التاكسي يمنة ويسري بعد كل السلام عليكم ناظرا بين الصفوف وكانه يبحث عن ليلاه
    عمار : سلطة الروب قاتلها الله بالذات لمن تكون بالثوم وتبدأ في تفاعلاتها الكيمائية خلال التراويح منتجة (غاز اول اكسيد الثوميك) الذي تخرج دفعات منه مفاجئة بصوت (بااااااع) وأخر خفية (بالسيسي) مسيطر عليها …غايتو من ي يصلي في دائرة نصف قطرها مترين حول المصدر تكون مضروبة ومصابة في مقتل وما علي المسكين قربك الا الانتقال بعد السلام عليكم الي موقع آخر لاكمال صلاته………!

  5. عزت كتب:

    سلام يا أحباب
    و كل رمضان و انتم بخير
    عارفين الأيام دي باقي الوكت بتقدم شوية شوية لمن بقينا نصلي الا ربع و أمام الجامع الجنبنا فسحة مربعة كبيرة تفتح عليها البيوت أمبارح طبعا ما قدرت أتم برنامج (أغاني و أغاني) لأنو الوكت كبس و ترباس قاعد يغني يا ريت يا ريت… و أنا في الطريق لمن وصلت الفسحة قابلتني الجحافل من كل صوب الظاهر بعد انتهاء “يا ريت” و هي جاية على المسجد….

    البيكمل يا شمباتي البرنامج بياخد كم باقي ليك؟

  6. ياسين شمباتى كتب:

    عمار…سلام..
    هو طبعا قاس على نفسو اول شئ حتى قبل على الباقين!! اما قصة سلطة الروب فلاحتوائها على الثوم وما يتبعه من غازات سااااااامة !! اها دى ما بتجيب ثكلان امهات وابهات ذاتو؟؟

    الجعلى..سلام..
    الله اكرم وربنا يتقبل منا ومنك حسن العمل..والله دى فاتت عليهو !! لكن انت كدة بتكون برة التصنيف عديييل كدة,,وامنك برة الجك كمان !!

  7. ياسين شمباتى كتب:

    ابكرون..سلام..
    كب الزوغة دا قلنا ليكم بطلعك برة التقييم والتصنيف ,,وعند المتشددة برة الملة عديييل كدة!ّ! لكن ما بالغت فى وصف الثوميك وتوابعو,,شكلك مكتول بيهو قريب..هههههههههه..

    عزت..سلام…
    هههههههه,,والله دى العوجة الكنا بنعانى منها زماااان قبل نسافر,,ياربى تغفر لينا وتسامحنا..
    غايتو البكمل البرنامج حقو يدوهو 10 جلدات فى اسفل الظهر !!

  8. زووووووول كتب:

    اول مره يا شمباتى اعرف انو رفع الصوت بالتكبير عند التشهد الاخير كب جرسلين وبخصم نقاط .. كان كدى جامعنا كلو كبكابات

  9. ابوشقرود كتب:

    شمباتي والأخوة الأفاضل رمضان كريم وتصومو وتفطروا علي خير
    شمباتي شغلتنا وأمبارح مرقنا من التراويح كيت وعدادك العملتوا لينا دا طلعنا برة خالص وخاصة وجنبي واحد سعودي لابس ساعة رولكس ابو عشرة آلاف (يمكن دولار يمكن يورو يمكن ريال ) وقاعد طول الصلاة يعاين في الساعة كل تلاتين ثانية التقول حينزلو ليهو الراتب فيها هسع دا يحسبوا ليه كم درجة ولامن حسبتها كدا معناتها زولنا دا لابس ليه عربيتين لانسر زي حقتي دي و في أيد واحدة فد تخيل تكون لابس واحدة( سيارة ) في كل يد وتعاين ليها كل تلاتين ثانية دي تديها كم درجة
    وبعدين أنا وأعوذ بالله من كلمة أنا بديت أول تراويح في الصف الأول في مسجدنا أبو سطاشر صف وأمبارح كنت في السادس بحسب حساباتك على آخر رمضان أكون بصلي في النخل جنب محل صاحبك شغال
    وحديث الرسول صلى الله عليه وسلم عن الشجرتين ( الثوم والبصل ) وأن من أراد أكلهما فليشبعهما طبخا وإلا فليتجنب ( مسجدنا هذا ) وعشان الطبخ ما بنفع في سلطة الروب وفي ناس زي ما قلت بتموت فيها فبسأل هل يجوز الواحد يشيل معاه أكياس زي بتاعة الطيارة والحل شنو للبتجي مفاجئة مع صوت زي الذكروا أخونا أبكرونا

  10. مُخير كتب:

    والله يا شمبتة إنت وصاحبك عكشتوا الهمبتة
    الحلوين ليكم وحشة ورمضانكم أم جنقر وعصيدة دامرقة بملاح روب أبيض ولا مرز في برش مع الغبش
    البداية دائماً في السلك لأنو الروحانيات بتكون ألف والكهرباء بلف، بس بعد خمسة أيام بدون ململة ولا حكحكة قررت أن أكتفي بالركعات الثماني حسب السائد ونختم بالوتر والسلام لأنو بصراحة العشرين دايرة لياقة بدنية عالية وروحية أعلى ودعواتكم نرتفع لمستوى الشهر في الأسبوع المقبل

  11. ياسين شمباتى كتب:

    زوووووول..سلام..
    جامعكم الهنااك ولا الهنا ؟؟ غايتو ناس هناك مااا اظنهم بتاعين جرسلين,,عينى باردة عليهم..

    ابوشقرود..سلام..
    وانت من اهل الخير يا حبيب…بعدين انت الموديك تتابع فيهو شنووووووو!!؟؟ دا مقياس جديد ما اضفناهو,,لكن اصلا اصحابك السعودسسن ديل ياها حالتهم,,ساعة وطقطيق اصابعين ومعاينة للداخل والمارق!!!
    اما عن سلطة الروب والكيس فالبامبرز افضل وبودرة جونسون وعطور عبدالصمد القرشى لابد منها والله اعلم..

  12. ياسين شمباتى كتب:

    مخير..سلام..
    كل عام وانت الحب وكما تشتهى من الخير والطاعات..والله كلامك بتاع ام جنقر دا كلام زول جيعان ساااااااى..اما عن الهمم فهى قد فترت ووهنت عما كانت عليه سلفا..نسال الله الثبات والتوبة قبل الممات..تحياتى.

  13. نيام كتب:

    الاحبة شمبكتوف و متوكلفتش و آل دانقوينا نهاركم رويان و رمضانكم فرحان بيكم و بونستكم قلت لي مقياس تراويحوست حقكم دا مافيهو كرايتيريو لنوع القراة و طول السورة و ان كانت من امهات الكتاب …لما فينا واحد التراويح حرم بقراها بال عمران خلي ليك الجماعة يسوو في الوح وح …بعدين ما شايف مقياسكم جايب سيرة للابري الخمير و لا اللقمة الفطير و لا ذكري لام عدوس طيبة النفوس و كمان فقيهنا قال وقفة الحصان الشبعان دي عايزة ليها وقفة لانو بعض الخيل ان شبعت عملت حاجة كده احسب انها ولا سيبك اللهم اني صائم…

  14. ود الطاهر كتب:

    السلام عليكم ورمضان كريم (

  15. عزت كتب:

    ود الطاهر سلام
    شنو ياخ فاتح قوس و نسيت بعد داك تكملو…
    بمناسبة النسيان و السهو… طبعا النسيان و السهو يتناسب طرديا مع
    1. التقدم في العمر
    2. مع ازدياد الهموم و المشاكل
    3. التطويل من جانب الامام في القراءة
    4.كما صوت و ترتيل الامام
    5. البرودة الشديدة أو الحر الشديد داخل المصلى
    دا اذا كنت في الجامع فما رأيكم دام فضلكم مع الفيلم الذي يدور في راسك و انت في الجامع
    فضلا على أن الموضوع يمتد الى المنزل كما قال لي واحد صديقي انه يجعل واحدا من أولاده بالقرب منه في الصلاة حتى ينبهه ان سهى بالزيادة أو النقصان…!!
    أنا غايتو لسة ما قعدت لي ولد…. لكن ممكن بعد دا نعتمد لينا تكنولوجي تاني شايف قالوا في حاجة زي العداد الواحد بيختها جنبو يدوس فيها بعد كل ركعة….!!

  16. عباس ركس كتب:

    سلامات : رمضان كــــــــــريم على الجميع .
    عزت : والبذكرو العداد منو ؟
    بمناسبة سلطة الروب والزوغة – واحد اخونا زايغ من التراويح , لما الجماعة قرصو عليهو قال ليهم والله انا سلطة الروب دي والتوم هي المطيراني كمان آخر مرة جابت ليها ( كوروم كوروم ) !!!!!!

  17. ياسين شمباتى كتب:

    نياموفيتش..سلام كهى…
    والله لخبطتنا مع الاوفيتش وزراديتش الجبتها لينا دى..بعدين حتة السور دى مذكورة فى الاخير وهى مخرجة من التصنيف اخراجا اكبر لا رجعة فيه..وحتة الخيل دى فعلا خليها لى بعد الفطور او الفطر !! تحياتى يا غالى..

    ود الطاهر..سلام..
    كل عام وانت بخير..مالك مستعجل كدى !؟؟

  18. ياسين شمباتى كتب:

    عزت..سلام..
    دى شنو الدواسة دى !!؟؟ دى تنفع فى الطواف والسعى بس…والنسيان دا بقى عااااادى يا حبيب..

    ركس..سلام..
    ههههههههه,,يكروهو من ضنبو الزول دا,,بعدين يا جماعة انتو ما ملاحظين انكم كلكم ركزتوا مع سلطة الروب والتفاعلات البتحدثها !!؟؟ تكونوا متضررين ولا منتجين ؟؟

  19. ودالفتيحاب كتب:

    السلام بالكوم لكل القوم
    ياسين كترت في سطلة الروب وبقيت ذى باص أبورجيلة زمان ، أمرق تعال مارق خلي الناس تصلي صلاتها ، والعيد قرب والناس ديل بعد ده عدادم برمي برة لانو حسابات العيد براها بتمرق الزول من الملّه ولا رايك شنو ، عليك الله جيب لينا معاك شوية أشواق في قفة نكمل بيها باقي رمضان ده ، ,وأحيييييييي من التقلية والعصيدة ومرقة العصر والرقاد في البرش …….

  20. سوباجو كتب:

    الحبيب شمباتي وشلة الانس
    سؤالي الفي السلك: لو قام كدا الموبايل دقا وكانت النغمة :
    راجل المرا حلو حلا !!
    يا ربي دي بتتحسب بالنقاط ولا كرت احمر ؟؟
    اجيبونا جزاكم الله خيراً .

  21. ياسين شمباتى كتب:

    ود الفتيحاب..سلام..
    والله برااااهم كتروا منها,,والمرقة خلاص بقت على باكر باذن الله…اما عن الاشواق فياربى القفة بتشيلها !!؟؟؟ وازيدك من الشعر بيت,,رقدة العشاء وسماع الراديو واذاعة البيت السودانى بعد منتصف الليل..ايييييييييييييييك..

    سوباجو…سلام..
    كرت احمر وايقاف لمدة 5 اعوام ! راجل المرة وحلو حلا ؟؟؟ دى كتيرة شديد…

  22. أحمد الفاضل كتب:

    والله يا شمباتي واااااقع ومجرب

    لكن حقيقة الأمر كله مرده الى شيئين
    تخفيف الإفطار
    وعدم السهر
    أكثر ما يتعب في رمضان ويسبب الخمول والكسل وعدم النشاط في الطاعات هو الإفطار المتخم المثقل بما لذ وطاب خاصة في تلك اللحظات وبعد فراغ المعده لمدة طويله وارتياحها تندرش درش الجن وتتحول طاقة الجسد كلها والدم المستفاد منه الى دعم الجهاز الهضمي في محنته

    كذلك السهر وعدم انتظام النوم والتحرش بالساعة البيووجية المسئوله عن ضبط مواعيد المدير_العقل_وتنظيمى حياته واللخبطه البتحصل في النوم في رمضان بتخت الساعه المذكوره في حرج الله عالم بيو

    تحياتي لك ولصديقك وللإخوة

  23. اها والناس البفطر بي بلحة ومعاها بقة مويه
    ويختف صحن الليلة
    ويخمش الشيشه ويا السطوح جاك بالا
    تشوفو من تحت
    تحلف تقول مصفاة تكساس

  24. زووووووول كتب:

    شمباتى يا …
    سلااام عليكم ورحمة الله
    جامعنا الهنا بصراااحه يا اخ ديل وكت يقعدوا للتشهد الاخير يذكروك صفارة الحكم فى نهاية الماتش . وكمان معاها ضربه من ابو كديس على الفخذ تلقى الواحد رافع ايدو وقابض اصابعينو عدا السبابه وطاااخ مع الله اكبر (اكبر دى يقولوها كدى اككككبااااااااار) .

  25. البشاوى كتب:

    شمباتى ومتوكل الله يجازيكم – كشحتو لينا الجرسلين فى نص الظلط — والله جامعنا من طقطقة الاصابع تحلف تقول الناس ديل بينقو فى بامية —

  26. ياسين شمباتى كتب:

    احمد الفاضل..سلام..
    مرحب بيك يا حبيب,,كلامك دا ذكرنى نوتة كتبتها قبل رمضانين عن الاكل وتنظيمو ورمضان والعادات الغذائية,,فعلا انحنا مهملين خالص فى النظام والتنظبيم..وخليك قريب…

    مهند عبدالله..سلام..
    ومرحب بيك كتير فى المدونة..لكن زولك دا كومو برااااااااهو,,ورمضان عندو عجيب وغريب!!
    وخليك قريب وابقى واصل..

  27. ياسين شمباتى كتب:

    زوووووول..سلام..
    ههههههههه,,دى ما الجرسة ذااااااتها,والعجب لة معاها تنهيدة,,يكون بالغ..

    البشاوى..سلام..
    النصيحة دى ما حااااااارة,,وكمان فى ناس تخرت فى العرق وتجرى على الموية,,والعجب لو فى صبارات عصير فى الجوامع المقتدرة,,كبسيبة جد..

  28. moshahidah كتب:

    احلى حاجة الطوطحه كالبندول …هههههه …بالغ معانا المعدل بقي ماينس
    ياخ الطوطحة دى ضروري عشان اتوازن كدا ..باقي الركعه ..
    غايتو الله يقبل انا قافله انو صلاه الجماعة بركة و الله بحاسبنا بقلب اتقي زول فينا

  29. عبد المنعم كتب:

    سلاااام للجميع

    والله غايتوا رضينا أم ابينا أم اي حاجة كلنا عندنا الحاجات دي ، يبدو لي الموضوع ده من طبيعة الفطور وانو بنملاها فل وربما اكل دسم … لانو شايف ليك بعض الجنسيات الثانية خفاف ماشاء الله ونحنا نتلولح ونطوطح
    كل سنة وانتو طيبين جميعا
    وتصوموا وتفطروا على خير

  30. ياسين شمباتى كتب:

    مشاهدة..سلام..
    كل عام وانتى بخير..وينك لابدة كدة؟؟لكن قفلتك على كرت محروق !!معقولة بس؟؟

    عبدالمنعم..سلام…
    كل عام وانت بخير..والله حكاية الدسم دى مشكلة كبيرة واكتر الشعوب العربية بتمارس العادة القبيحة دى..وخليك قريب..

  31. مانجلك كتب:

    ياسين ياخوي البلف قرب يتحلج حسةو بقت الحكاية بحسبوها بخروج المهزوم و ليس بالنقاط … الجامع الجمبنا من كترةالكراسي بقى زي فصل محو الأمية و كل يوم بينقص صف وللا صفين زي صينية الباسطة…
    طبعاً الناس بقت تخترع ليها زواغات خصوصاً انو عمك السر قدور بقى يتجرجر الأيام دي و يخش في زمن غيرو ، الما كان بحضر البرنامج كلو بقى يحضر …
    و في الجامع وكت الإمام يشد ليك الجماعة عشرة طويلة بقوا طوالي يتسدوها في الشفع البتكلموا في الصف الورا … الواحد ما يصدق الإمام سلم طوالي يجري على الشفع يكفت ليهو اتنين و يجضم تلاتة و يطردهم لحدي باب الجامع و يجي راجع طبعاً الغرض تفكيك عضلات و تقديم الإمام و يا حبذا لو ما كان فيه زول شايفك طوالي ممكن تزوغ بيتكم بي هناك !! و في أحسن الأحوال تاخد ليك تكية و قيلولة ورا الناس و تقوم تلحقهم في الشفع و الوتر

  32. ياسين شمباتى كتب:

    الحبيب مانجلك..سلام..
    اولا مرحب بيك وسط اهلك وناسك وفى نص بوستك السرقناهو منك عنوة واقتدارا..وياريت تواصل كلما سمحت ظروفك وتعطرنا ببعضا من كتاباتك الساخرة الخفيفة..
    لكن صينية الباسطة حامضة !!!! ربنا يستر علينا ويتقبل مننا صالح العمل ويعفو عن الزلل..وخليك قريب..

  33. مُخير كتب:

    الحبيب يا سين سلام
    جمعتك مباركة
    شيخ الكواشف السلاوي عفا وأصلح وأجره على الله، فنأمل أن تدينا عفوك ورضاك، فالشوق لروضة المصطفى وعدم الشبع من الطواف والسعي مع الطمع في الحصول على عفو الغفور الودود لشخص مثلي مُثقل بالذنوب والآثام، جعلتني أعود من يثرب إلى أم القرى مرة أخرى فالعفو والعافية والجايات أكثر من الرايحات

  34. ياسين شمباتى كتب:

    الحبيب مخير..وعليكم السلام ورحمة الله..
    وجمعتك احلى ومتقبلة باذن الله..
    اما عن العفو فلا والف لا !!! يعنى تلفون سااااااكت ما يعطى!؟؟
    وانا فى بلد الطواف والسعى كان بجى ارافقك,لكن دى كعوبية ساااااااااااكت…
    عموما دربك اخضر وربنا يعدلها عليك محل ما تقبل وما تنسانا من صالح الدعوات عند الروضة والحجرة الشريفة..تحياتى..

  35. ياسين شمباتى كتب:

    سلام يا احباب ,,, كل عام وانتم بخير وغير متجرسين !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s