أصوات عامية

Posted: السبت,21 أغسطس, 2010 by الفاتح جبرا in اخرى

صديقى  (م) من الأشخاص الذين يمتازون بخاصية سرد الحكايات بصورة تجعلك منشداً إليه منذ أن يبدأ لك الحكاية وحتى يفرغ منها ، علاوة على أسلوبه المشوق فى السرد فهو يستعين فى سرده بإستخدام بعض العبارات التصويرية السمعية التى توضح (صوت الفعل) حال وقوعه وهى كلمات عامية كنا نستخدمها فى حياتنا اليومية بعض الأحيان إلا أن الكثير منها قد قل إستخدامه اليوم وهذا بالطبع شأن معظم اللغات واللهجات التى تندثر بعض مفرداتها وتحل مكانها أخرى، هذه بعض المفردات التى قمت برصدها والتى يستخدمها صديقى (م) ونادرا ما تخلو منها أى من حكاياته الممتعة التى يسردها لنا بين الحين والآخر…

تترب: قام وقف على حيلو

بردلب: وقع فى الواطة

تاااخ: اللستك القدام ضرب

تاااخ: تاااخ  الحجر ضربو ليك فى راسو

تااخ فكيت ليك فيهو طلقة

تف تف: الدم نزل من الجرح

ترااح: ضربو ليك كف

تررراح: قام وقع فى الواطة

تح تح: قلبى دقا ليك من الخوف

ترررن: الجرس ضرب

تسسس: اللستك نفس

تلبت: الحرامى نطا الحيطة

تيفك: ناشو ليك بالنبلة

جخخ: ضبح ليك الخروف

جمبلغ: وقع فى المويةدج : وقعت فى الواطه

دززز: دورنا العربية مشينا ليهو

دلل: (تقال لمن تسمع زول قال ليهو كضبة)

دوو : مدفع رمضان ضرب

رب: زولك برك فى الواطة

روو: ضرب ليك الباب وراهو

زييط:  جابو ليك فيهم القون الأول

سييييك : الباب إتفتح

سيييك: قام ربط ليك فرامل

شحح: قلبى قال ليك من الخوفة

شررر: الموية جات نازلة

شوو :  المطرة قامت صبت

صننن : الجماعة قامو سكتوا ليك

طااخ :  طاخ وقع فيهو ضرب

طبج :  مشينا فى مويت المطرة

طق : قام العود إتكسر

ظووط : دخلو ليك فيهم قوون تانى

ظييط : العربية وقفت

عووك :  قام طرش الأكل الأكلو

فت :  الحرامى  جا مارق من البيت

فنن : قمتا فنيت ليك فيهو الحجر

فوو : البص جا ماشى فينا

كوو : العربية صدمت القداما

قرطع قرطع : شرب ليك كوز الموية كلو

قر قر قر : قام قعد يضحك

كررر : قام جراهو ليك بالواطة

كشلو : الكباية وقعت إتكسرت منو

كع : ضربو ليك بالعصاية فى راسو

كع كع كع : ضرب ليك قزازة البارد

كف :  الحرامى ختف ليك منو القروش

كليلن كليلن : جرس الحصة ضرب

كو كو : دق ليك الباب

كووف :  ختف ليك منو الموبايل

كرررب : كسر ليك الطبلة

لب : الأستاذ لبعو ليك فى ضهرو

هوووب : وقف حيلو وقام ليك من الواطه

وررر :  العربية قامت دورت

وس وس وس :  قعد يوسوس ليهو فى أضانو

كسرة :

أول ما زول يختلس ليهو قروش (فررر) يفك البيرق !

Advertisements
تعليقات
  1. عزت كتب:

    قال ليهو
    ما الفرق بين واحد يقع من الدور الأول و واحد تاني واقع من الدور التاسع؟

    قال ليهو:
    في الأول الوقعة حتكون: ررررررررررررب………………….. أأأأأأأأأي

    أما الجاي واقع من التاسع: فحتسمع: أأأأأأأأأأأأأأأأأأأأأى وااااااااااااااااااااي …. ررررررررررررررب

  2. ابكرون كتب:

    نفس التعليق بالفيس بووووك الغريبه اتمسح لكن لقيتو في الشخصية مش غريبه…!!!!
    —————————————
    هههههه حلوه
    زززززت :قام وقف
    عوووووك :عيييييك : كووووورك
    دوووول : طرشقت
    فسسسسسسسسس : نفست
    …للللللط : معروفه مافي داعي ليها في رمضاااان
    اخيييييي : قرف او الشئ الذي لا يعجب
    فووووو : جنس كرو/ للنتانة
    فسسسسسس : نفست

  3. ابوالمنذر كتب:

    بوووا …. البوتجاز مولع والهواء فواء نافخ الا جابو المويه شو شو شو كبوها حتين النار انطفت براحه لقط كريعاتو وكربشت كربشت طلع السرير رقد كرج كسر السرير

  4. قرن شطة كتب:

    قال لى صديقى صابونى / مشينا لى ناس فلان وعيييييييييك بيتهم بعيد خلاس ، كف كف كف دقينا الباب ، سييك الباب إتفتح ، دخالنا الصالون وظيط رحنا قاعدين ، جابوا لينا ليمون شربناهو كع كع وتف تف تف ، قلت ليهو تف لى شنو ؟ قال جابو لينا اللليمون بى حبو …. وهكذا اخوانا الإسبان يستعينوا بالكلمات ذات الايقاعات والتى تصاحب الكلام يبدو انه لمزيد من التاثير على المستمع او لخلق صورة مقاربة للحدث…تحياتى يابروف جبرة وكل عام وانتم بخير…

    • ألفاتح جبرا كتب:

      الأحباء الأعزاء .. معليش على الدخول المتأخر عشان كان عندنا وفاة قريبتن لينا … ويا دووووبك تووووش دخلتا .. ورررط قعدتا فى الكرسى عشان أشوف الحاصل شنو …

  5. السلام عليكم المدونجية جميعاً و بالاخص البروف المحترم المبدع الفاتح جبرا والدكتور المبدع قرن شطة الذي لا أدري لماذا سمي نفسه بهذا الاسم الصعب وهو كاتب يقطر أ و ( يشر ) ابداعاً ، حسب مقال البروف اللطيف . أود أن أضيف الى ما ذكره البروف :-

    نم _ وقال ليك نم أو تم الناس دي قطعت الحركة، وهي بكسر النون أو التاء.
    هغ – وأول ما شفت ليك الكعبة قلت ليك هغ بالبكاء ، وهي أيضاً بكسر الهاء .

  6. ودالخلا كتب:

    سلام ياقبيلة،،
    البروف جبرا أنشاء الله البركة فيكم، وغفر الله لميّتكم..
    أصواتنا العامية دي طبعا” متفردة عندنا دون العالمين، والكورة أجوان ولا مش كدا؟؟
    شنو يا صديقي أسد الخلا البتتكلم عنه هذا هو مشروب أسمه (القام زت)،واللهم أني صائم..
    مسعولين من الخير أين نجم الضلمة البعييييييييد ضواي سهيلا، أين أنت يا سديقي؟؟؟؟ حجبوك من عيني ليييه يا تري؟؟!!

  7. ودالزبير كتب:

    قام فردلب من الواطه

  8. طارق أب أحمد كتب:

    رررطط (واحده سمينه ركبت أتوز)

  9. ودالزبير كتب:

    ييييع كنايه عن القرف

  10. ودالزبير كتب:

    كشلو كشلو جات ماشه علينا

  11. طارق أب أحمد كتب:

    تنكش تنكش تنكش
    واحده سمحه ماشيه تتراقص فى الشارع قبل رمضان

  12. بت امدر كتب:

    من ما شفتو قلبي قال فح

  13. عباس ركس كتب:

    ها – انكار بشدة او استنكار
    * سألني الذي عن شمالي ( وقد انزنق بدبل 7 شيريا ) : بلاي ما قافل ؟؟؟
    فرددت : ها

    * جييييتك – جريتو ال50
    الزول لي هسة زعلان !!!!

  14. التركــــى كتب:

    سعادة البروف البركة فيكم وربنا يرحمها ويغفر ليها ..
    أخخخخخخخخخخخخخخخخ : ماكنت عارف ياريتنى كنت عارف

  15. ياسين شمباتى كتب:

    شررر: الموية جات نازلة…دى الا من السقف!! لكن من الماسورة بقت صعبة شوية..
    البروف والاحباب..سلامات..
    فوو فوو مشى خلاهو..
    جب (بتعطيش الجيم) جرب: كناية عن بعض انواع الرقيص…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s