حكم وأمثال وتعليق

Posted: الإثنين,23 أغسطس, 2010 by الفاتح جبرا in ساخر سبيل

• لا يَفُلُّ الحديد إلا الحديد … المغالطنى يمشى شارع الخرطوم – مدنى

• المرء بأصغريه : قلبه ولسانه … أهم شئ ما قالوهو … و(جيبه) !!

•إذا حضر الماء بطل التيمم .. ده إذا (الموية) جات !

• تجرى جرى الوحوش غير رزقك ما تحوش … الأيام دى رزقك ذاااتو فيهو كلام

• الدراهم مراهم … مراهم بس؟ دى مراهم .. ومضادات حيوية .. ودربات .. والأكسجين زاااتو

• كل ما تشتهي والبس ما يشتهي الناس … كدى أدونا (المراهم) وبعدين ناكل ما يشتهى الناس زااتم

• إذا تخاصم اللصان ظهر المسروق … فى الزمن ده 60 لص يتخاصمو المسروق ما يظهر

• حبل الكذب قصير … ده كان زمااان هسه بقى طويل جنس طول

• حرامي بلا بَيِّنةٍ شريف … إذن ما أكثر الشرفاء فى بلادى

• إذا عُرِفَ السبب بطل العجب … ناس الموية قالو ليكم المواد المنقية للمياة (قطعت) منهم عشان كده الموية عكرانة

• اطلبوا العلم ولو في الصين … ليه الصين البعيده دى؟ ده كان قبل ثورة التعليم العالى هسه تجيب 50% تقرأ طب … هندسة .. ذرة .. الكلية البتعجبك

• إذا تم العقل نقص الكلام … وأقول المذيعين والمذيعات ديل نضامين كده ليه ؟

• لكل جَوَادٍ كَبْوَةٌ … ولكل مسئول أكثر من ذلك … وبعد داك (ترقية) كمان

• لا يضيع حق وراءه مطالب … هذا يعتمد على سرعة التقاضى وهل القاضى نقلوهو وإلا قاعد ؟ والإستئناف ح يرجع من المحكمة الفوق بعد كم؟

• في التأني السلامة وفي العجلة الندامة … شعار القائمين على أمر طريق الإنقاذ الغربى

• إذا كان الكلام من فضة فالسكوت من ذهب … شعار (نوام الشعب) فى البرلمانات منذ الإستقلال

• عصفور في اليد خير من عشرة على الشجرة … أعتقد أن المسألة تعتمد على نوع الشجرة

• لا يلدغ المؤمن من جحر مرتين … إن لم يكن داخل الجحر شرطى مرور الصديق وقت الضيق … الأيام دى الصديق زاااتو متضايق

• ليس في مقدور المرء أن يخدم سيدين … بالعربى كده ما ممكن الزول يكون مع السيدين ويكون (أنصارى) و (ختمى) فى أن واحد (لكن فى ناس بيعملوها)

• من كثر كلامه قل فعله … المثل ده بالذات (قطعوهو) فى المسئولين

• لا تضع كل البيض في سلة واحدة … هو البيض وينو؟ الطبق بقى بالشئ الفلانى من كان بيته من زجاج لا يرشق الناس بالحجارة … لو القزاز (مظلل) ممكن

• ما خاب من استشار … مثل ما (شغال معانا) بدليل إنوعندنا 77 مستشار

• الوقاية خير من العلاج … طيب لمن الإتنين يكونوا مافيشين؟

• لا تبدل القادة في منتصف المعركة … يعنى أبدلهم بعد المعركة ما تخلص؟

• كل لتعيش ولا تعش لتأكل … جيبوا الأكل فى الأول وبعدين نتفاهم • الصانع الرديء يلقي اللوم على أدواته … وناس الموية يلقون اللوم على (الطمى)

• لمن تشكو إذا كان خصمك القاضي!؟ … الأمم المتحدة طبعن ! من تأنى نال ما تمنى … ما طواااالى

كسرة : المصائب لا تأتى فرادى … واحد عمل حادث ورخصتو منتهية والعربية ما مرخصة وقزازو مظلل ومبسوط (حبتين) شايل ليهو (منشورات) فى الضهرية والدنيا (رمضان) !

Advertisements
تعليقات
  1. عباس ركس كتب:

    * ان سرقت اسرق جمل . . . . وان عشقت اعشق قمر
    ديل مش سرقوا كل الجمال كمان ما خلو حديقة الحيوانات ظاااااااتا في عضمها
    وأكان للقمر – ديل بقو اقمار مع ناس مثنى وثلاث ورباع دا غير ما ملكت ايمانهم

  2. علي سنكل كتب:

    رمضان كريم وكل سنه وإنت طيب يا بروف . .
    لينا زمن نفتش ليك ولمان نلقاك ما نلقى محل نعلق فيهو.
    لكن شايف المياه رجعت لمجاريها ودا الكلام الصاح . . . مقالاتك يا جبرا مكانها هنا قبل الراكوبه وقبل الرأي العام والفيس بوك . . وغيرها.

    الخلَّ دارو قلَّ مقدارو . .
    يعني مرات تمشي تقرأ لجبرا في مكان تاني ، تحس بشئ ناقص. عشان كدا جبرا يكتب لينا هنا في دارنا عشان ما يقل مقدارنا ، الأصلو قلَّ كتير . . كتير في العشرين سنه الأخيره دي.

  3. طارق أب أحمد كتب:

    أمسلومبايتى و لا كيكاية الناس
    المعنى الحرفى فأرتى ولا جقر الناس
    المعنى المجازى لالوب بلدنا ولا تمر الناس

    أصدق مقوله لأنو الناس ديل حيوصلونا مرحلة ناكل قعونج ذاتو

  4. طارق أب أحمد كتب:

    سيد جنقور فى الفاشر و لا إندا راي
    صاحب الملابس الرثه لا يعتد برأيه فى مجلس الأسياد
    أو كل يا كمى قبل فمى

    يعنى
    سيد الكامرى فى كافورى و لا بشلت فى الدافورى ال

  5. طارق أب أحمد كتب:

    الفى قلبو حرفص براهو برقص

    الفى بطنو أورغن براهو بشبشب

    عشان كده عندنا ميه أذاعه و تلفزيون

  6. نيام كتب:

    بروف جبرا
    عادت الابتسامة الحلوة و الضحكة المفاجئة لصاحبها و عيني علي الدانقا باردة في رمضان
    الله يديك الصحة و العافية
    …………………………………………………..
    يبخروا فيها وهي ….. (يقال لمن تعمل مستشاريتو علي تحسين الصورة و كل يوم يمرق نعالو )
    الصندل في بلدو عود (المستشار الذي لا يستشار)
    الجايات اكتر من الرايحات (فشل الوحدة الجاذبة)
    الاعور في بلد العمي شوف (كلهم)
    الجمل ما بشوف عوجة رقبتو (الجماعة اياهم)

  7. ألفاتح جبرا كتب:

    الأحلاء الأعزاء : والله فعلن يا عزيزنا سنكلونى الخلا دارو قل مقدارو … تحيات وسلام كتير للجميع

    كسرة :

    ماشى محصل إفطار المدونة السنوى فى بيت حبيبنا د.عزت .. إن شاء الله السنة الجاية تامين لامين وكل الناس تكون حاضرة

  8. DAKEEN كتب:

    القحة ولا صمة الخشم ،،، القحة زمان شخشخة الجيب ،، لكن اسع كان قحينا ، جيبنا يقح وبرضوا القحة ما وقفت،، ممكن عدنا حساسية ضد القحة،
    ودبيب في خشموا جرادة ولا بعضي ، والمغالطني يطلع الشجرة ويشوف الدبايب ساكتة كيفن .

  9. التركــــى كتب:

    العندو غراب يجزه : بس قبلما يرك على الشجرة
    يسن عايزا ليها جكة : بتاع الزامية سمع بفتوى تحويل الشهداء الى فطايس
    المى حار ولا لعب قعونج : مفتئ سالوهو عن صحة الزكاة التى تجمع قبل اكمال النصاب وحلول العام

  10. ياسين شمباتى كتب:

    الحبيب جبرا..سلامات..
    فى داعى تعصر على الجامعة ديل فى رمضان دا !!؟ والله ديل لخبطوا ليك كل المفاهيم والسائد من حكم ومفاهيم..وعينى حاااارة عليهم…
    (إذا تخاصم اللصان ظهر المسروق … فى الزمن ده 60 لص يتخاصمو المسروق ما يظهر) وهاك هاك سوق المواسير دا ……
    والفى يدو القلم ما بكتب نفسو شقى,,بكتب شيكات بدون رصيد بس.
    وصاحب بالين كضاااب..الا ما يكون مسئول..
    وتحياتى…

  11. مُخير كتب:

    حبيب الملايين أبو ناجي
    الحلوين أهل الدار والزوار
    رمضانكم كريم وجمعتكم مباركة

    إن شاء الله دائماً مجتمعين في ساعة خير وبركة،،،

    جري وطيران ما بيتلقوا للنعام: صحيح ما بيتلقوا للنعام بس إتلقوا للإنقاذ الجارية بالكورة والطايرة بالسلطة 21 سنة وحالفة برأس أبوها ما تختها في الواطة، إلا لعيسى، ياربي عيسى ياتو ؟ حياتو ههههههي يكا (على قول فرقة تيراب)

    شوف عين ما كتل غزال: المعنى عيون حساد المعارضة الفاسقين الما بيصلوا على النبي ما حتكتل غزال الإنقاذ ههههههههههههه

  12. abushagrod كتب:

    شدرة كن هوززاي يا هبوباي يا عبلاي
    يعني مافي دخان بدون نار زي شرود الجماعة من بوست البعير وبعادل المثل المصري ( الجري نص الجدعنة) علا الجري هنا بقي رجالة عديل
    ّّّّ

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s