إشمعنى الشيشة؟

Posted: السبت,28 أغسطس, 2010 by الفاتح جبرا in ساخر سبيل

على الرغم من أننى من قدامى المدخنين الذين لم يستطيعوا الإقلاع عن هذه العادة المهلكة السخيفة حتى بعد إجراء دعامتين فى القلب لتوسيع بعض الشرايين إلا أننى سوف أسعد تماماً لو أن (سلطات ولايتنا) إستشعاراً منها تجاه دورها ومسئوليتها فى الحفاظ على صحة المواطن أن قامت بمنع وحظر إستيراد السجائر والتبغ بأنواعه و(قفل) مصانعها التى تعمل بالبلاد وتحويلها إلى أى مصانع مفيده يستفيد من منتجاتها المواطن البسيط.

كما أننى أكون أكثر سعادة لو أن (سلطات الولاية) قد أراحت مدمنى (التمباك) بحظر الإتجار والتعامل فيه أسوة بالتبغ وذلك لتسببه فى كثير من الأمراض الخطيرة التى أهمها سرطان اللثة .

• لكن والى ولايتنا ومعاونيه (مشغولين حبتين) بقضايا أخطر تهم المواطنين وتمس صميم حياتهم المعيشية مثل مراقبة أسعار السلع الضرورية وجعلها فى متناول يد المواطن البسيط كاللحم الذى لم يتجاوز سعر كيلو الضان منه 24 ألف (أيه يعنى) والطماطم الذى ثبت سعر الكيلو منه فى حوالى 15 الف ( بس) والويكة (الواااحده دى) التى لم يتجاوز سعر الربع منها (حتى كتابة هذه السطور) أكثر من 40 جنيه وكذلك بقية السلع كالزيت والبصل والدقيق إلخ والتى هى فى متناول كل مواطن .. • ووالى ولايتنا ومعاونوه مهمومون بنظافة المدينة وجعلها تخلو تماماً من أكياس الأوساخ والنفايات الموضوعه أمام المنازل والمحلات والتى تشكل بيئة مثلى لتوالد البعوض والذباب وبقية الحشرات علاوة على الروائح المنتنة التى تنبعث منها .

• كما أن والى ولايتنا ومعاونوه مهمومون بالتحضير لفصل الخريف القادم حتى لا يأتى فجاتن (الخريف ده خلاص موضوعو إنتهى) وذلك عن طريق إنشاء المصارف الخرسانية المستديمة وردم الحفر والمستنقعات .

• كما أنهم مهمومون بتنقية مياه الشرب التى أضحت ذات لون وطعم ورائحة وكمان (حاجات قاعدة تمشى فيها) ! • كما أنهم مهمومون بصيانة المدارس وإستعدال جدران (الفصول المايلة) وتوفير المعلم (المتدرب) والكتاب وتصليح الاثاث (المكسر) والمكتبات والمعامل (المنعدمة) وكافة التجهيزات الضرورية لخلق بيئة دراسية سليمة ومعافاة .

• كما أنهم مشغولون بتوفير مستشفيات (خالية من الكدايس) ومعامل مليئة بالأجهزة المتطورة وصيدليات يتوفر فيها الدواء لكافة شرائح المواطنين وجعل كل المنظومة الصحية على مستو من النظافة والتجهيزات التى تمكن المواطن من تلقى علاج يفضى به إلى الشفاء وليس إلى (الشقاء) بعد أن يبيع جميع مدخراته (ويقعد على الحديده) من أجل السفر للعلاج بالخارج. والدليل على إنشغال ولاة أمورنا بالأمور والمشكلات الجسام التى تهم مواطنيهم هو أنهم لم يشغلوا أنفسهم بحظر إستيراد وتصنيع (السجائر) و (التبغ) وورق (البرنسيس) والإتجار فى (التمباك) .. ولكنهم لسبب يعلمه الله (تفرغوا) ليصدروا قرارا بمنع تناول الشيشة فى الأماكن العامة !

بالطبع حفاظاً على (الأماكن العامة) وليس حفاظاً على صحة المواطن الذى تستورد له الدولة السجائر بمختلف أنواعه والتبغ ويباع أمام أعينها التمباك من نوعية (لو ما فاطر ما تخاطر) . مناسبة هذا المقال أن بريدى الأليكترونى قد حمل لى رسالة تحتوى على عدد من الصور التى توضح عددا من رجال الشرطة بملابسهم الرسمية وهم يقومون بتحطيم وتكسير المئات من (أدوات الشيشة) التى تمت مصادرتها من بعض المحال والأفراد إثر القرار الذى صدر مؤخراً بحظر تناولها ، وبعيداً عن مشغوليات (مسئولينا) وأهتمامهم بحالنا الذى صار يغنى عن سؤالنا دعونا نسال عن الحكمة من منع (الشيشة) وإباحة (السجائر) والتبغ والتمباك ؟

لو القصة قصة (صحة) وإنها من الأشياء (المهلكة) .. وأن (المؤمن القوي خير وأحب الى الله من المؤمن الضعيف) كما جاء فى الحديث الشريف … فأوقفوا وأحظروا إستيراد وبيع (بقية المهلكات) – يعنى إشمعنى الشيشة بس- وإذا القصة حاجه تانية (وأكيد) فأعلموا أن هذه القرار بشكله (المنفرد هذا) قرار خاطئ وغير مقنع و(ناقص) ويعطى مساحة (للتأويل) و(القال والقيل) ، شخصياً لا أندهش من مثل هذه القرارات الناقصة (الما بتخش فى الراس ) فقد عودنا مسئولونا إنهم (دائمن) يجيبوا (الخطأ) وبعدين يركبوا عليهو (القرار) … أو كما قال أحدهم !!

كسرة : كان يمكن تصدير الأعداد الهائلة من الشيشة (الكسروها دى) وبيعها أومقايضتها بمواد لتنقية الشرب لتنقية (الطين) القاعدين نشرب فيهو ده !

Advertisements
تعليقات
  1. ابكرون كتب:

    جبرا سلااام
    لا بس الشيشه كان عجبك دي لان موادها ومعداتها بتدخل من المحروسة جارتنا ومن سوريا وبتجي من الصين تجاره عادية وكذلك المعسلات لكن استيراد السجاير ده حقهم والدوله بتاخد ضرايب لو وقفت النقاطه دي ومال ناس عبد المنتقم يعيشوا كيف اما ورق لف البتاع فمسمحوح لان البتاع مسموح ويشجع عليه بدليل مافي حمله ضده زي الشيشة…بعدين كلمة شيشة الناس حرفوها عشان كده وعشان الزوق العام كسر (شيشة) عزت بلا مؤاخذة…..!

  2. قرن شطة كتب:

    سلام جبرة
    انا رأى انو الدولة والمسئولين ينصرفوا الى الاشياء المهمة ويحلوا عن سما المواطن الزهجان أصلاً ..وبعدين هم خلاص يعنى مقلقين على صحتنا!!

  3. عابر سبيل كتب:

    انا سمعتا…… الناس ديك……. ببيعوها ما بعدوموها…….. يعني برضو نقاطه!!!!!!
    الغريبه: ببيعوها للزول ذاااااااتووو!!!!!!!!!!!!!!!!!!!

  4. حاج أحمد السلاوى كتب:

    البروف ..الفاتح ..
    الجماعة ديل بيتبعوا سياسة النفس الطويل فى إتخاذ القرارات المصيرية زى قرار الشيشة دا …وبما أنو الشيشة تحتاج إلى نفس طويل برضو عشان تسحب منها نفس ( مش كدا يا ناس الشيشة ؟ أنا والله عمرى ما جربتها لأنى كنت عارف إنو ناس التوجه الحضارى حيمنعوها )فهم حبو بتعاملوا معاها بنفس النفس .. أقصد نفس الطريقة ..بعدين الشيشة دى بتستهلك فحم كتير وعاوزين يوفروا الفحم للمواطن الغلبان التعبان للإستعمال فى حالة عدم أنعدام الغاز ..
    الناس ديل عندهم نظرة بعييييدة .. بس إنتو ما قادرين تفهموهم ..ديل قالوا جايين عشان ينقذونا من آثار التدخين الضارةويا دوبك بعد عشرين سنة حتى بدأوا يشتغلوا ..فى الأول كانوا بيخططوا كيف تتم عملية الإنقاذ..
    أدوهم فرصة يا جماعة ..يمكن لسه ينقذونا أكتر من كدا .
    وخلونا النشوف آخرتا شنو !!!

  5. عزت كتب:

    يا حاج سياستهم أم نفس طويل دي كتمت نفسناو طبعن لمن النفس يكتم لازم تنفيس شان يعود النفس لمجاريه…

    خلي بالك بي طريقتهم دي الظاهر حنخليها ليهم و نقوم (نسافر جوبا) و بدل النفس يبقي ترم ترم كمان…!!

    طفت في اليومين الفاتو ديل و ذهبت لي محلنا القديم لقيتم قافلين الباب القدامي و مدورين الشيشة بي جوه…

    الحمد لله ربنا صرفنا منها قبل سنتين و لكين ما زال الواحد خرمان…

    و هسة الأيام دي طالما (الشيشة) قاعدة و الحكاية بقت ممنوعة و أكيد الممنوع مرغوب نقوم نرجع و أهو ناس السلاوي لمان يجو يهربوا لينا شويت معسل و كدا….!!

  6. طارق أب أحمد كتب:

    يا جماعة الخير
    الحكايه و ما فيها إنو وردت معلومات ظنها البعض فطيره إلا أن قوات أبو طيره أفادت أن المعلومه بالجد خطيره
    مفادها أنو حيطلع عفريت اسمو المتخوذق أبو ريشه من جوات قزازة شيشه بنية أنقاذ هذا الشعب الكيشه

    ويبدا يستعمل بقية أجزاء الشيشه كما يستعمل الخازوق فى خوزقة من هم على سدة هذه الحكومه البـيشه

    بدأن من اكبر راس و كل شيشه حسب درجة المسئول واحد ليهو شيشة جراك ام كمين لى و واحد مسكين نصيبو ابو تفاحتين بدون جمرا حى
    فطفق زئيسهم يرغى و يزبد لا لا الخازوق ليس لنا الخازوق لهذا الشعب الاصلن متخوزق و سدنته يهتفون من خلفه لا للشيش لا للشيش
    الشيشه عدو الاديان ,,,,,, الشيشه حرام
    من تشيش ليس منا
    شيش شيش يا وتيش
    شيش شيش بس بشيش
    قرار
    هذا و بموجب السطلات المخوله لى من قانون الغازات السامه أصدر فرمان بعدم جواز تعاطى الشيش بمختلف أنواعها و من تعاطى المكروه عمدن غير شك يتعاطى الحرام
    و هكذا دواليك

  7. البشاوى كتب:

    الشيشة راجعة ياجماعة بس بعد دفع رسوم التشييش الجديدة

  8. ياسين شمباتى كتب:

    الحبيب جبرا والسمار..سلامات..
    وسلامات يا شيشة..والله لما اصدروا القرار قلت يكون تهويش ولعب عيال زى كل قراراتهم,,ولكن تفاجأت لما شفت الصور على الفيسبوك وجدية رجال الشرطة والمسئولين الطير ديل!!!
    عليك الله دى امة دى؟؟ طيب حيعملوا شنو فى المحلات المرخصة اصلا للشيشة؟؟
    انا اعتقد اعتقاد جااازم انو فى مسئول عايز يعمل محلت مخصصة للشيشة وحتكون هى المصرح ليها فقط بالعمل,,عشان كدة قالوا يكاوشوا على الباقى..حسبى الله عليهم..
    بريتهم واستبريتهم…

  9. طارق أب أحمد كتب:

    خبر عاجل
    الشرطه تلقى القبض على مثيرى الشغب المتهمون بمعارضة النظام الديمه راقى

  10. عزت كتب:

    كيتا عليهم حقو الواحد يرجع يشيش تاني…
    خاستا الجو اليومين ديل ما شاء الله….

  11. moshahidah كتب:

    الاساتذة الفاضلين اعلاه ..

    بما اني بنوته ما بتشيش فما فرقت معاي لكن البغيظ انو الحكومة فاكرة روحها بتربي الشعب الما مهذب وبتبعد عنو الحاجات البتجيب الكلام وهو الكلام اصلا من نفوس مريضه ياخ كرهونا يعملوا عرض ازياء يطلعوهم ابشع ناس ..طيب طبعا ما بعجبني الولد العاميل ميكب و بعرض دا لكن اتكلم معاهو ما تحبسوا وتضربوا وبنات الناس ذنبهم شنو سمعتهم ..ما علينا دا موضوع تاني

    بختصار هم عايزين ينكدوا علينا ..يمغسونا يكرهونا العيشه ..يربونا لانو احنا شعب ما مربي ما متدين وما عارف اي حاجة ..مش هم الانقاذ ولا شنو rescue 911 جكومتك تشكمك و تحميك !!

    http://moshahidah.wordpress.com

  12. ألفاتح جبرا كتب:

    العاقد إيدينو بى ضهرو فى الصورة ده منو؟ مركز كده زى عاوز يعزل ليهو واااحده قيافه؟

  13. طارق أب أحمد كتب:

    ]ا بروف لو ما أخاف الكضب بحلف لأقول دا أنت ذاتك لكن بس أنت البوديك هناك شنو إلا يمكن يكونوا شركوا ليك شان تكتب ليهم ساخر يكون فيهو عبد المنتقم و يعمل ليهم أستثمار من الشيش و جبل الليات داك

  14. التركــــى كتب:

    سسسسسسسسسلام ياغالين
    ياخوانا الموضوع بسيط جدا انلزول الادوهو تصريح استيراد الشيشة ملا السوق وقروشه قربت تخلص يقومو يمنعوها هسع وبعد كم شهر كدة يقولو غلطانين ويفتحو ليهو باب الاستيراد تانى … ولايكون عايزين يصدروها لدولة الجنوب بعد الاستفتاء ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s