إحتمال فيها منطق

Posted: الأربعاء,1 سبتمبر, 2010 by الفاتح جبرا in اخرى

بعض المواقف تبدو غير منطقية بالمرة بل تنافى المنطق تماماُ لكن عند إخضاعها للدراسة المتأنية يمكن أن نجد لها تبريراً (منطقياً) ولعل هذه القصة الحقيقية التى حدثت لأحد عملاء شركة السيارات العالمية المعروفة (جنرال موتورز) توضح ذاك حيث تلقى قسم (خدمة العملاء) بالشركة رسالة من أحد العملاء تقول :

(هذه هي المرة الثانية التى أكتب فيها إليكم ، وأنا لا ألومكم لعدم الرد ولكن الواقع هو ان لدينا تقليدا في أسرتنا وهو تناول الأيس كريم للتحلية بعد العشاء كل ليلة. لكن نوع الآيس كريم يختلف كل ليلة حيث يحدث تصويت بين أفراد الأسرة يومياً على نوع الأيس كريم الذى سنتناوله هذه الليلة وهنا مكمن المشكلة …

فقد قمت مؤخرا بشراء سيارة (بونتياك) جديدة من شركتكم ومنذ ذلك الحين أصبحت رحلاتي اليومية إلى السوبر ماركت لشراء الآيس كريم تمثل مشكلة ، فقد لاحظت أننى عندما أشترى أيس كريم (فانيليا) وأعود للسيارة فإن المحرك لا يعمل معى والسيارة لا تدور .. أما إذا أشتريت أى نوع أيس كريم آخر تدور السيارة بصورة عا دية جداً وصدقونى فأنا جاد فيما اقول )

إنتهت رسالة العميل وعندما قرأ رئيس قسم السيارات (البونتياك) بالشركة هذه الرسالة أرسل أحد مهندسى الصيانة لمنزل صاحب لسيارة حيث قام الأخير لإثبات صدق روايته (بيان بالعمل) بأصطحاب المهندس بالسيارة لمحل الإيسكريم وقام بشراء ايس كريم (فانيليا) وعندما عادا للسيارة لم يدور محركها .تعجب مهندس الصيانة وقرر تكرار هذه التجربة ثلاث ليال وفى كل ليلة كان يختار نوع أيس كريم مختلف وبالفعل كانت السيارة تدور بصور ة عادية بعد شراء أى نوع من الآيس كريم إلا نوع (الفانيليا) .تعجب مهندس الصيانة من ذلك ورفض تصديق مايراه لأنه منافى للمنطق بأى حال من الأحوال .. وبدأ فى تكرار الرحلة للسوبر ماركت يومياً مع تسجيل ملاحظات دقيقة للمسافة التى يقطعها يومياً والزمن الذى يقطعه والشوارع التى يمر منها وكمية الوقود بالسيارة والسرعة التى تسير بها وكل معلومة تتعلق بالرحلة إلى السوبر ماركت .

وبعد تحليل البيانات التى جمعها وجد أن شراء أيس كريم (الفانيليا) يستغرق وقتأ اقل من شراء أى نوع آخر من الآيس كريم وذلك لآن قسم بيع أيس كريم (الفانيليا) فى السوبر ماركت يقع فى مقدمة السوبر ماركت كما توجد كميات كبيرة منه لآن (الفانيليا) هى النوع الشعبى والمفضل للزبائن .. أما باقى أنواع الآيس كريم الأخرى فتقع فى الجهة الخلفية من السوبر ماركت وبالتالى تستغرق وقتاً أطول فى شرائها ..وأخيراً توصل مهندس الصيانة من حل المشكلة وهى أن السيارة لا تدور مرة أخرى بعد إيقاف محركها لفترة قصيرة وهو مايحدث عند شراء أيس كريم (الفانيليا) إذ أن المحرك يحتاج لوقت حتى يبرد لكى يستطيع أن يدور مرة أخرى ، لكنه يعمل فوراً عند شراء أيس كريم بأى نكهة أخرى نسبة للوقت الإضافى الذى تستغرقه عملية الشراء مما يعطى فرصة لتبريد المحرك . (يعنى المسألة ما ليها أى علاقة بنوع ونكهة الآيسكريم) إنما الموضوع متعلق بالمدة التى يستريح فيهاالمحرك !!

قصة المواقف غير المنطقية هذه ذكرتنى بتلك الطرفة الشائعة والمتداولة التى تقول بأن إحدى النساء قد طلبت من أحد النجارين بالحى أن يصتع لها دولاب للملابس وبعد أن تم صنعه وأحضرته للمنزل لاحظت شيئاً غريبا وهو أن أحدى ضلفتى الدولاب (الما فيها رفوف) تفتح (براااها كده) كلما توقف (البص) فى المحطة التى أمام منزلهم ، بعد أن تكرر ذلك لمرات عديده ذهبت السيدة للنجار وأخبرته بالمشكلة فأخذ النجار عدته وذهب معها للمنزل وبالفعل ما أن توقف البص حتى فتحت ضلفة الدولاب ، فكر النجار ملياً ثم خاطب السيده :

– عندك بطارية أشوف بيها

– تشوف بيها شنو؟

– ما أنا لازم أدخل جوه الدولاب عشان لمن البص يجى أشوف الضلفة دى بتفتح كيف؟ و(القفل) علاقتو بالبص شنو؟

وبالفعل أحضرت له البطارية ودخل صاحبنا وقفل عليه الدولاب منتظراً مجئ البص ولما طال مجئ البص والدنيا (سخنت عليهو جوه) فقد تحلل صاحبنا من بعض ملابسه ولم يتبق منها إلا القليل ولسوء حظه فبدلاً من مجئ البص فقد حضر زوج السيده فجأة للمنزل لأنه نسى شيئاً بالدولاب الذى ما أن قام بفتحه حتى تفاجأ بالنجار (الذى تفاجأ به أيضاً) .. وما كان من النجار إلا أن ناوله الشاكوش قائلاً :

– بس شيل الشاكوش ده وكسر بيهو راسى لأنى لو قلت ليك أنا منتظر البص ما ح تصدقنى !!

كسرة :

عزيزى القارئ : إذا دق (جرس الباب) كلما قمت بفتح (الثلاجة) دى حاجه ما منطقية .. لكن بس ما تستعجل .. فكر شوية برضو إحتمال القصة يكون فيها منطق !!

Advertisements
تعليقات
  1. التلب كتب:

    سلام للكل
    يديك العافية يا أستاذ. ياخي النجار المسكين ده ضحكني لحد ما الجماعة المعاي ديل قالوا الزول ده جن ولا الصيام قام بيهو !!
    تسلم يا بروف و نردد معك احتمال فيها منطق

  2. yasmenaaaaa كتب:

    أكيد لكل شئ في سبب منطقي..بس ظريف اللي عم يصير مع سيارتك..سبقت سيارتك نكت الحماصنة.

  3. الجعلى كتب:

    جارى بالحى كذلك تعجب كثيرا حيث لاحظ أنه عندما يأتى متعبا الى المنزل (وينام مبكرا) فأن البصل واللحمة وأشياء أخرى تختفى من منزله فى الصباح الباكر حيث تخاطبه زوجته (لحمة مافى وخضار مافى وزيت مافى و…مافى).
    أما عندما يأتى للمنزل وحيلو شايلو (ويقوم بواجبه تماما) ففى الصباح تخاطبه زوجته (اللحمة راااقدة وجركانة الزيت مليااانة والخضار مالى التلاجة). عندها فقط أدركت كما أدرك هو لماذا تختفى الأشياء عندما يأتى متعبا ..

  4. ابكرون كتب:

    حاج ماجد سوار صرح بتحمل مؤتمره والحركة ‏للمسئولية التاريخية في حالة انفصال الجنوب فما ‏المنطق في تحميله لبقية القوي السياسية لنفس ‏المسئولية كما صرح‎…..!!!!!‎….هاك المنطق ده

  5. ياسين شمباتى كتب:

    البروف والاحباب..سلامات..
    يعنى اسه يا بروف عايز تمنطق لينا البيعملوا الجماعة ديل فينا !؟ منطق برضك..
    لكن النجار باااااااالغ,,اكيد يكون عرض خدماتو على الزوج عشان يتخارج..كااااااااااااااااك..

    الحبيب التلب..سلام..
    كيف الامور ماشة؟؟والتعويذة ظابطة ولا لا ؟؟وصيتك وصلت تب بس انت ساعدها بى جكة..تحياتى..

  6. الصادق ود البركة كتب:

    السلام عليكم ورحمة الله وبركاته
    تحية ود و حب للجميع تنم عن شوق شديد لأني شهر من يوم دخلت البلد ماقعدت قدام النت (تقول لي عودة للبلد دائمة ياسلولو)
    الله يديك العافية يا بروف ويدي العافية القارئين لك وتحية كبيرة للفكي أبكرون.
    الجعلي ما بالغت عديييييا كده ونوصي جاركم بالفياقراوكده

  7. عزت كتب:

    حمد الله بالسلامة… كنت بي هنا يا الصادق… بالله شوفت نحن بي جاي نحنن كيف… يعني حقو بعد دا تدونا نوط جدارة كونو قاعدين بي جاي… أهو بنكتب و بنتداخل رغم أنف المحلية (الطلعت عينا)…

    كسرة:
    قالوا واحد عندو دفار مجننو كل يومين تلاتة دايرلو اسبير ياكل ما جمعه في تلك الأيام…
    يوم واحد داير يديهوا حق المشوار….
    قال ليهو (جيب القروش دي بي جاي الدفار ما يشوفن)…!!
    أهو منطق برضو..!!

  8. abushagrod2 كتب:

    سلام يا هلي
    الجعلي يظهر أنو حكومتنا دي مزعلنها شديد خلاس لمن الويكة بقت مافي خليك من المحلوات الذكرتها
    وعشان كده كل ما تجو ماشين علي الحكومة دي تجو شايلين حيلكم وشايلين حاجات تانية والله في الصباح تلقوا كل شئ موجود
    وخليكم من ناس برة ديل والله ديل الدجاج المجمد اللي نحنا بنسميه بالميت دا ما خلا ليهم حيل يبيضوا بيهو الوش مع الحكومة أم ضرع دي
    ولا باس من الإستعانة ب ( صيدلية ) محلية حتى لا تتهموا بالعمالة والإرتزاق لدولة أجنبية
    والواحد يصرف ما في الجيب ويرضي الحكومة دي والصباح يلقى كل شئ متوفر حتى الداندرمة وحلاوة ( ثلج)
    وما بوصيكم عليها (وما بوصيكم علي الفات الحدود واسو)

    يا بروف ياجميل دايما تمسك في لب الحقيقة
    ظاهرة الميتافيزك أو ما وراء الطبيعة دي ظاهرة قديمة ودايما ما تكون مرتبطة بي الدين فخال سيدنا سليمان قال ( أنا أتيك به قبل أن يرتد إليك طرفك) ولكن الشرط كان في الأول ( قال الذي عنده علم من الكتاب )
    جوستاف لوبون أول من وضع الأسس في بداية القرن العشرين لما يسمى ب ( علم نفس الجماهير أو ما يسمى بالظاهرة الجوستاف لوبونية وكتابه علم نفس الجماهير يمنطق الحكاية دي ويمنطق ظاهرة ظهور حكومة زي حكومتنا) تؤمن بالمعجزات والأشياء الخارقة زي القرود البتفجر الألغام وزي السيارة البابها بفتح براه للبعض )
    ويقول بما معناه أن إنخراط الفرد في جماعة تذوب شخصيته وتتكون جماهير تتصرف على نحو مغاير تماما عن شخصياتها الأصلية وهو ما يفسر كيف أن كل هذا الكم المنضوي تحت راية الجماعة من الدكاترة والبروفيسرات لو لاقيتو براهو تلقاه يسلق الجماعة بألسنة حداد ولكن لمن يكون معهم يتصرف ببدائية غريبة وعموما الموضوع ممكن تجوجلوه
    بس دا يختلف من الحكاية التي تحكى عن الشيخ فرح ود تكتوك لمن لقا الناس بذروا في النوبة لغاية ما يقعوا دايخيين على ما أذكر وقال ليهم بتعملوا في شنو قالوا ليه بنوحد في الله قام جاب قشة وختاها في خشم البير وطلع فيها برجلينو وبقي يذكر الله -الله -الله – لمن فتر نزل وقال ليهم تعالوا وحدوا الله هنا
    ودي من ( علم الكتاب ) أو الكرامات المنصوص عليها في ديننا
    كموقف خال سيدنا سليمان مع عرش بلقيس
    والحديث ( رب أشعث أغبر ذي طمرين لو أقسم على الله لأبره )
    والقران ( يا أيها الإنسان إنك كادح إلى ربك كدحا فملاقيه )
    والحديث القدسي ( ما يزال إبن آدم يتقرب إلي بالنوافل حتي أصبح يده التي يبطش بها وعينه التي يبصر بها )
    ودكتور عمر خالد عندو موضوع البحث عن السعادة وجزئية ( إحسان الظن بالله ) وقدر حسن ظنك بالله يحدد درجة إيمانك ) وبالتالي درجة تحقق المطالب
    واليومين دي في السوق كتاب ماسك الجو لواحد إسمه دكتور إيريك وإسمه ( السر ) ويقول أنه يملك السر الحقيقي لسعادة الناس ولغناهم وجايب أمثلة من حياة الناس الفوق ولكن دكتور إريك دا كان جا السودان كان شرط كتابو دا وقعد يدرس في النبت الشيطاني الطلع عندنا ( أحتمال يلقى ليهم منطق )

  9. البشاوى كتب:

    قال منطق قال —- والله النجار دة لو كسرو ليهو راسو – الراجل ماحيقتنع – ولو ساب النجار نحنا البيقنعنا شنو؟

  10. ودالخلا كتب:

    يابروف لقد درسنا في الرياضيات الأولية بالمدارس الأولية أن واحد لن تساوي أثنين مهما حدث في الدنيا، ولكن علم المنطق يا بروف بيثبت لينا بالمعادلات الرياضية بأن الواحد يمكن أن يساوي أثنين ( 1= 2 )، أو أكثر وما تقول حاجة لأنها دي ما بيناتنا!!!
    فالمنطق حسب المعادلات التالية : ( س2- س2) = ( س2- س2)
    بتحليل طرفي المعادلة جبريا” نجد أنه :
    س X( س- س ) = ( س – س ) X ( س + س)………………(1)
    بقسمة طرفي المعادلة علي القاسم المشترك للطرفين (س – س) ينتج لنا المعادلة التالية:
    س = (س+ س) …………. (2)
    بتعويض قيمة س بالواحد الصحيح نجد انه :
    1 = 2
    رأيك شنو مش أحتمال برضو يكون فيها منطق؟؟؟

  11. ودالخلا كتب:

    ما تقول لي دي حسابات الجماعة ديك!! ههههههههههههههه
    وفي مسمي آخر حساب النواتة ( شطة بي تعريفة + بي تعريفة شطة يكون الحساب للشطة قرشا” كاملا” مع أن كمية الشطة كانت تعريفة واحدة فقط، وده زمن التعريفة كانت لها قيمة …

  12. ألفاتح جبرا كتب:

    يا باشمهندس ما تخمنا ساااى ..
    س X( س- س ) = ( س – س ) X ( س + س)……………… ده كلام صاح
    بتعويض قيمة س بالواحد الصحيح نجد انه :

    س X( س- س ) = ( س – س ) X ( س + س)……………… ده كلام 100%

    ولكن بالتعويض عن قيمة س =1 نجد أن طرف المعادلة الأيمن يساوى صفر كما أن طرف المعادلة الأيسر يساوى صفر

    واحد بيساوى إتنين ده حساب الجماعة وكده يا باشمهندس لزوم زيادة الرصيد !

  13. ودالخلا كتب:

    سلام ياقبيلة،،
    ياحبيبنا ياجبرا ما هو ده المنطق ذاتو البيخلي الواحد يطلع من طورو زي ما قال سديقي أسد الخلا الورور، وياهو ذاتو منطق حسابات البترول البتساوي الواحد بالاتنين، وأنت الوداك تعوض عدديا” شنو؟؟ ما نحن قاع نعوض ليك منطقيا” فالحكاية يا صديقي ما حكاية الحساب ولد، الحكاية هنا يا صديقي هو الحساب منطق، وليس بالمنطق وحده تحيا الشعوب!!!!!!!

  14. ألفاتح جبرا كتب:

    حبيبنا ودالخلا

    a mistake in a proof leads to an invalid proof

    زى حكايت ما بنى على باطل فهو باطل .. وياما حاجات بنيت على باطل وبقت ما ……… باطل !!

  15. ودالخلا كتب:

    كلامك ده صحيح 100%، معاك فيّ، لكن ما بيمشي مع المنطق ولا أقول ليك يا بروف اظنو حسابي ده ما وقع ليك ،كدي خليني أعيدو ليك تاني ؟؟
    طيب نحن معاك لحدت الخطوة القلت لينا فيها 100%
    بس أنتو قاعدين تعوضوا طوالي علشان كده حساباتكم بتطلع صفر، ولكن المفروض تعمل زي الجماعة يعني تقسم أولا” علي الشريك المشترك معاك في، وبعد داك تقوم تعوض في ناتج القسمة تلقي انو حقك قاعد مضاعف يعني ماراح شمار في مرقة أو زي ما قلت صفر!!
    صفر ده شنو يا زول كدي راجع المنطق ده تاني وورينا!!!

  16. ياسين شمباتى كتب:

    باااااااطل..حكم الانقاذ على الشعب السودانى باااااااطل..

  17. طارق أب أحمد كتب:

    أقول ليكم 1= 2 بالمنطق

    زمان ايام السكر بالتموين ناس الأمن حاولوا يكيدوا لأحد الولاه الجنوبيين لأنه كان يبيع كوتة سكر الولايه بتاعتو فى كوستى
    و طبعن الجرايد دورت عن الوالى الفاسد و الشنو ما بعرف
    لكن عند التحقيق معه أجاب انتو مندوكورو دا ما عندو راس ولا شنو
    الجنوبيين ما بشربو شاى بي لبن لكن بشربو مريسه اها انا ببيع سكر و بشترى بى تمنو عيش (ذره)
    مش برضو منطق

  18. تحياتى ياجبرا/ كتاباتك كلها حقائق وبتمس الإنسان السودانى فى الصميم مستمتعين جدا ً معاك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s