فى كلام تااانى

Posted: السبت,4 سبتمبر, 2010 by الفاتح جبرا in اخرى

توقفت طويلاً عزيزى القارئ قبل أن أهدأ شوية و(أروق) لأبدا فى كتابة هذا المقال (عبر الساخر) … اليوم هو الأربعاء الأول من شهر سبتمبر .. الساعة الآن التاسعة والنصف مساء .. قبل قليل (فى حوالى الساعة التاسعة) كنت ماراً بشارع (الحرية) بالخرطوم حيث طلب منى أطفالى التوقف عند مشاهدتهم لمحل لبيع الأيسكريم بالفعل توقفت أمام المحل الذى يفتح على الشارع العام لكننى وحرصا منى على ألا أقف فى (الظلط) فقد قمت بإيقاف العربة فى طرف الشارع الجانبى حتى يكون الأطفال تحت ناظرى .

نزل الأطفال لشراء الآيسكريم وبقيت أنا وزوجتى فى إنتظارهما وفى هذه اللحظة حاولت إحدى العربات أن تمر غير أن عربة فى الإتجاه المعاكس لم تسمح لها (لوجود عربتى) فقمت على الفور بالتوغل قليلا داخل الشارع مفسحا الطريق غير اننى فوجئت بعد ان توقفت تماماً بالعربة التى خلفى تقف حذائى مباشرة وهى عربة بيضاء (نقل) عليها السائق وشخص آخر يجلس بالمقعد الأمامى حيث تبينت بعد مسافة من الوقت أنهما يرتديان زى الشرطة فصرخ فى الذى من ناحيتى قائلاً :

– أنزل يا زول وجيب رخصتك؟

وفى هذه الأثناء قفذ السائق (قفزة مظلية ) من المركبة (العالية) ووقف على بعد أمتار أمام عربتى فى مواجهتى (على طريقة أنزل وخت إيديك فى راسك) .. وهو يشير لى فى عصبية ويأمرنى فى حدة :

– أنزل يا زول بسرعة وجيب رخصتك

لوهلة ظننت أننى أشاهد أحد أفلام (الآكشن) ، أخذت رخصتى من درج العربة ونزلت متجهاً (للزول النزل ليا) غير انه خاطبنى وهو يشير لى للشخص الذى لا يزال فى العربة – سلمها لى جنابو هناك ! وأمشى ورانا القسم بالطبع عزيزى القارئ لا يمكن لأى عاقل بالغ رشيد إلا أن يسأل روحو فى هذه اللحظة عن (الجريمة) النكراء التى إقترفها ، لوهلة إعتقدت بأن (الناس ديل) مشبهين عليا وأن هنالك مجرم هارب (يشبهنى) أو أن لوحة عربته قريبة من لوحة عربتى فكان أن توجهت بالسؤال (لجنابو) :

– لو سمحت ممكن بس اعرف أنا عملتا شنو؟

– (فى إزدراء) : يعنى ما عارف؟

– والله ما عارف!

– لمن تمشى معانا القسم ح تعرف

– جميل .. أنا ح أمشى معاكم القسم بس ممكن تورونى الحاصل شنو؟

– الحاصل إنك واقف ما تمام !

– الحقيقة الأولاد نزلو يشترو إيسكريم من المحل ده وأنا ما عاوز أقيف بعيد عشان يكونو قدام عينى وبعدين أنا ما قافل الشارع والشارع فااااضى وممكن براحة إنتو تمروا

– (سؤال مفاجئ) : إنتا جنسك شنو؟

على الرغم من أننى لم أعرف المغزى من هذا السؤال إلا أننى أجبته فى إستغراب :

– سودانى !!

هنا ناولنى (رخصة قيادتى) فى ذات الوقت الذى إعتلى فيه (السائق) مقعده وأنا لا زلت فى تلك الحالة من الإندهاش الذى جعلنى أخاطبه قائلاً : – أنا ما شايف يا إبنى الحاجه العملتوها دى بتتناسب والشئ الحصل ، الزول المعاك ده (أقصد السائق) يتلب من العربية (زى الكومانوز) ويتعارض ليا بعيد قدام عربيتى (زى العامل ساتر) ويكورك فينى (أنزل … أنزل) وأنت بى جاى برضك (أنزل يا زول وأمشى ورانا القسم) .. وكمان المسألة جابت ليها (جنسك شنو) !! – (جنابو والسائق فى نبرة واحدة) : والله إنتا لو ما زول كبير كان ممكن يكون فى كلام تانى !!!

ثم إنطلقت العربة رقم (39082 – شرطة) وتركتنى و(أبنائى) فى ذهول وتوتر نحاول أن نجد تفسيراً لما حدث !

عزيزى السيد مدير عام الشرطة :

حتى ترون بأنفسكم أن ما حدث من (ترويع) و (إذلال) و(إرهاب) لا يتناسب مع المخالفة ( إن وجدت) وأن الموضوع ما بيستاهل الكلام العملوهو (أولادنا ديل) فإننى على أتم إستعداد لتمثيل (الجريمة) ! فى موقعها !!

كسرة :

ده كلو طبعن كوم وحكايت (إنتا جنسك شنو) دى كوم تانى !! أكون (صينى) ومش واخد بالى؟

Advertisements
تعليقات
  1. ودالخلا كتب:

    سلام ياقبيلة،،
    صديقي البروف جبرا، فعلا” هذاالمشهد السينمائي لا يمكن قبوله أو تبريره بأي صورة من الصور، وخصوصا” في وجود الأطفال الذين بالتأكيد ستنطبع هذه الصورة في مخيلتهمابد الدهر ولن تنمحي أبدا”، وتكون الشرطة قد كسبت أعداء مستقبل كان من الممكن ان يكونوا في صفها او من منسوبيها..
    كذلك فأن المخالفة ولو وجدت فعلا” ومهما كان حجمها فهذا لا يبرر هذا اتعامل مع المواطن بهذه الحدة، والشرطة المتحضرة في العالم المتمدن تطلب منك رخصتك أو تنبهك لمخالفتك للوائح بأدب وأحترام جم كأنها هي التي خالفت وأنت من ستحاكمها،بكل الأدب والأحترام والحياء يخبرونك بخطأك، ولكننا يا صديقي لا زلنا نرزح تحت نيران الجهل والتخلف، مع أن تنظيم الشرطة بدأ في تعيين خريجي جامعات ومعاهد عليا في التخصصات الأنسانية حتي يتم التعامل مع الناس بالأسلوب الحضاري الذي يتفق مع المشروع الحضاري!!
    صديقي العزيز بروف جبرا انا متأكد تماما” لو وصلت هذه التصرفات المسيئة لهذا الجهاز الحساس لقيادته فلن تتواني في وضع الأمور في نصابها، فهذا نوع من النفوذ وأستغلال السلطة الذي جلب علي البلاد الكثير من المصائب والمحن، فلا تهاون في مثل هكذا تصرفات، فقط كيف يصل هذا للقيادة..
    ثم هذا السؤال الغريب عن جنسية مواطن يحمل رخصة قيادة سودانية مستخرجة حسب اللوائح والنظم التي تمنح المواطن مثل هذه الرخصة، والا تكون أنت قد قدمت لهم رخصتك العالمية!!
    تصرف غير مقبول ولا يقبله عقل ولا دين… 

  2. ودالزبير كتب:

    أستاذ جبرا

    من خلال التعايش مع كل فئات الجهات الأمنيه لإإتضح لي بما لا يدع مجالاً للشك إن العين الحمراء هي الوسيله الوحيده للتعامل معهم فصدقني عندما يكون موقفك سليم فأفضل شئ إن تصل معهم لأقصى مدى وستجد إنهم نمور من ورق

    أتمنى لو الناطق الرسمي بإسم الشرطه أو أي مسئول يهتم بنمره العربه التي سجلتها ويشوف الكان سايقها منو الوقت داك وده أمر يسير في وجود دفاتر الأحوال

  3. طارق أب أحمد كتب:

    البروف و زواره صباح الخير
    نفس الكلام سمعته بالأمس من نسيبى و انه اقتيد الى القسم الأوسط الجنوبى سابقا بدعوى القياده بإهمال رغم أنه أوقف بعد الستوب مباشرتن وحيث لا يمكن القياده بأهمال و تم أخراجه بواسطة نقيب هناك و سمع من العساكر جملة ياخى ساره الضاره دا كرهنا
    طبعا ساره الضاره اشهر ضابطة حركه تخصصت فى إذلال الرجال فصلت بعد أن اكتشفت الجهات المسئوله أنها تتطبع مخالفات المرور لمنفعتها الخاصه

    كسره

    طالعتنا صحف يوم الخميس بخبر تنقلات لواءات الشرطه
    مين شيت أحدى الصحف الأوسع إنتشارا كان عابدين الطاهر مديرا للمرور …. تساءلت هل هذا يعنى أن عابدين الطاهر هو أهم لواء أم ان المرور هو أهم إداره

  4. طارق أب أحمد كتب:

    واضح أنو الجماعه ديل حاولو يضعوا البروف تحت ضغط عالى من الترهيب بالحركات المسرحيه العملوها و الدافع لذلك واحد شكلو (ود عرب ) مختلى بى واحده شكلها (خواجايه) فى شارع منزو و ما معاهم (محرم) صيد سمين أو ثمين ايهما ابلغ
    الموضوع طرشق لامن عرفوا انوا بيناتكم شفع و هنا كان رد الفعل البليد (جنسك شنو) و الأنسحاب مع حقظ ماء الوجه بإنهم سامحوك

    اللى بأكد إفتراضى دا أنو المرور ما بستعمل دفارات ودى مستعمله لدى سيء الذكر النظام العام

  5. عزت كتب:

    غايتو يا طارق يمكن يكون مكسب الراجل مشهود له بالحيادية و الاحتراف حيث كان مديرا للمباحث المركزية…
    و بعدين هو نسيب “السلاوي” … يقدر يكلموا لينا و يدينا (أبونيه) و يوقف لينا زي ناس سارة الضارة ومن لف لفهم…!!

  6. ابكرون كتب:

    جبرا والاصدقاء
    اولا لا يحق لشرطي المرور او ضابط المرور او اي نوع من انواع الشرطة المائة او اي كائن كان ان ياخذ منك رخصة القيادة لاي سبب كان في الشارع العام ….وبكل اسف الناس ما بتعرف حقوقها…..من حقهم فقط ان تبرز الرخصة داخل قسم المرور فقط يطلع عليها المناوب ويعيدها لك في الحال……وجاييك

  7. البشاوى كتب:

    البروف وسمارو — حماك وحمانا الله من التمثيليات البايخة دى – ديل مابشر بس ربى يهون —
    بعدين ياعزت اهم حاجة مع الابونى بتاع المرور دة فى اشارة جنب بيتنا والله بتبدأ من 200 بس دى بالذات اطالب السلاوى ان يتدخل عند نسيبه ويعطلا لينا – وان كنت ارى ضرورة حضور السلاوى هذه الايام حتى يعمل حركات حركات – وواسطتو تبقى شادة حيلا حبة

  8. ألفاتح جبرا كتب:

    الأحباء الأكارم
    شكراً لحضوركم ومواجبتكم لنا فى هذا المصاب الأليم .. والالم هو أن يقوم من يفترض به حمياتك بمحاولة لإفتراسك ..سوف أقوم غداً بمقابلة السيد مدير عام الشرطة عشان نشوف القصة شنو؟

  9. خالد مدني كتب:

    البروف جبرا … يمكن لخير الناس الباقين ويمكن دي دعوة مظلوم في حر الخرطوم رمت الناس ديل في سكتك عشان تريح الخلوق منهم … وصلها مدير عام الشرطة ومدير ديوان الزكاة ظاتووو .

  10. نيام كتب:

    بروف جبرا:
    كل عام و انت بخير …تعرف الجماعة ديل كانو عايزين اسكريم العيد بس انت ما فهمتهم …بجد كده انا فكرت اقراء قانون بعد هالعمر و حاسجل قريب و ابتدي الف باء قانون اصلو البلد لمان يكون ما فيها قانون احسن انا اكون حافظ قانوني براي و ما عندنا قروش لللبط…بس عشان ما يكون في اي كلام تاني…

  11. ياسين شمباتى كتب:

    الحبيب جبرا والاحباب السمار…سلامات..
    والله ياهو !! الناس ديل بجهزوا فى نفسهم لما سيحدث بعد الانفصال,,لانو فى جنوبيين وفى شماليين وفى ناس ممكن ياخدوا الجنسية_يعنى شمالى ياخد جنسية جنوبية_ اها المتجنس ليس كالاصيل بالميلاد !! الموضوع دا واضح يا جماعة بس برااااكم دايرين كلام تانى….

  12. التركــــى كتب:

    الحمد لله جات سليمة يابروف بس فى انتظار نتيجة الزيارة الاحتجاجية وأتمنى أن يخيب ظنى هذه المرة وتتخذ خطوة ايجابية تجاه (السبهليلة) وسوء استعمال السلطة والا فالعقاب معروف سلفا .. نهيب ونستنكر تصرف منسوبنا ومرافقة السائق رامبو وعليه قررنا : أولا معاقبة الضابط بترديد السؤال (حزبك شنو ؟) بدلا عن جنسك شنو حتى لايكرر نفس الخطأويسأل السؤال الخاطئ للمواطن العفيف فى المكان الصحيح ثانيا نقل السائق رامبو الى هيئة تطوير السلوك الحضارى مترقيا ثالثا تكوين لجنة متخصصة وفتح باب التحقيق حول ملابسات الموضوع وستطول يدنا كل من تسول له نفسه التلاعب بأمن وكرامة مواطنينا الشرفاء ولا نامت أعين الخونة المارقين …. وكل رمضان والعالم والأمة الاسلامية بألف خير

  13. DAKEEN كتب:

    ممكن السؤال انت جنسك شنوا دي يعني قبيلتك شنو من قبيلة ولا ممكن ما شافوا الشنب الكبير دا
    عموما عيدكم مبارك والله يكفينا شر السؤءال دا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s