زوغة أبوالجعافر

Posted: الإثنين,6 سبتمبر, 2010 by الفاتح جبرا in اخرى

قرأت ما كتبه صديقى (أبوالجعافر) فى زاويته الحاده في هذه الصحيفة يوم الثلاثاء الماضى بعنوان (الفاتح الما فالح) http://www.rayaam.info/Raay_view.aspx?pid=6&id=57371 ويعود أصل صداقتى لهذا (الجعفر) أبو لسان طويل إلى سنوات مضت حينما كنت أكتب بالزميلة السودانى فقد دخلت يوماً إلى مبنى الصحيفة فأخبرنى عدد من الإخوة بأن الأستاذ جعفر عباس قد سأل عن شخصى الضعيف وترك رقم هاتفه راجياً أن أتصل به قبل سفره وعودته إلى مقر عمله إذ هو فى إجازة قصيرة .

 سعدت حينها كثيراً فالأستاذ أبوالجعافر قد سبقنا إلى الكتابة الساخرة عقود طويلة فقد أخبرنى الوالد بأنه ما كان يقرأ لأحد قبل أن يضعف بصره فى نهاية (الخمسينات) سوى لذلك البربرى الذى يدعى (جعفر عباس) ، ومنذ أن أخبرنى الوالد عليه رحمة الله بذلك حتى بدأت أتابع ذلك القلم الماهر واللسان (الفلقة) . أذكر اننى قمت بالإتصال عليه ودردشنا طويلا وكأننا نعرف بعض من زمان ، ودعوته إلى منزلى فلبى النداء متجشماً مشاق السفر من الخرطوم (عموم) حيث كان يسكن قبل أن ينتقل إلى (ضاحية كافورى) ويصبح من أصحاب (الجاكوزى) ثم بعد ذلك توطدت العلاقة بيننا فصرنا نهاتف بعضنا البعض متفقدين الأحوال ونلتقى كلما عاد فى إحدى إجازاته محملاً بهداياه من (القفشات) الجميلة !

أبوالجعافر لمن يراه للمرة الأولى (وعينى بارده) يحسب انه فى (بداية الستينات) وقد ساعدت فى إعتقادى على ذلك عدة عوامل منها أنه أغترب ورطب منذ تخرجه من الجامعة بقليل وعاش فى رغد أغترابى من العيش ، أكل نضيف، شراب نضيف، فواكه أيه ؟ وتحلية أيه؟ وبيوت مكندشة .. وعربات مكندشة.. ومكاتب مكندشة ومرتب بالدولار !! لذلك فقد إنعكست هذه العيشة المرفهه على تقاطيع وجهه الذى لا يعرف التجاعيد إلا ما كان نتيجة لإفساد الدهر وفشل العطار ، ولحظ أبوالجعافر وسؤ حظنا الهباب فإن صلعته (على غير صلعة العبدلله) من النوع الدائرى الذى يتوسط فروة الرأس فلا يكاد من يقابله (من الأمام) يستدرك هذا الأمر (مع الشعر الأمامى المسبسب) ولعل ما لفت نظرى لهذا الأمر هو أن أبا الجعافر حين تلتقيه يصر ويلح (إلحاحاً) على وداعك أى ذهابك أولاً قبل أن ينصرف الشئ الذى لا يمنحك فرصة رؤيته مدبراً !

يصر أخونا أبوالجعافر على أن العبدلله (مش وش نعمة) لأنه قد عرض علي في مقال كتبه بزاويته التقدم للزواج بمليونيرة سعودية كانت قد قامت بنشر إعلان تطلب فيه الزواج من رجل سكند هاند وقمت حينها بالرد عليه فى مقال رافضاً ذلك العرض المغرى وموضحاً أسباب رفضى رغما عن حالة (الفلس المزمن) التى نعيشها والمرتب القاعد يخلص من يوم خمسة فى الشهر . وبالطبع عزيزى القارئ لابد أن السؤال الذى يطرح نفسه هنا هو (لماذا لم يتقدم أبو الجعافر ذاااات نفسو) ! وللإجابه هذا السؤال أعيدك واحيلك – عزيزى القارئ – إلى إعجاب الوالد (رحمة الله عليه ) بكتابات صديقى أبوالجعافر (وأنا ما بفسر وإنتا ما بتقصر) !

 وبذكائه المعهود ولأنه يعلم أن هذا السؤال سوف يفرض نفسه فقد قال بأن تلك السيدة قد إشترطت أن يكون الزوج (فاتح البشرة) وأنه – أى ابوالجعافر- أسمر اللون وأن العبد لله هو (الفاتح – الفاتح البشرة) ! مع أنو الكلام ده ما حاصل فلون أبوالجعافر بعد (خمسين سنة) من الكندشة المستمرة لا يمكن أن يكون أبداً بسمرة لوننا مع الشمس (الفى نص السماء) دى والسخانه والكهرباء البتقطع يوم والتانى والموية البقت (أكل وشراب) !

 أنا شخصياً أعتقد بان أبو الجعافر تهرب من الزواج بتلك (المليونيرة السعودية) لعدة أسباب غير السبب السابق ذكره (ما تقولو ليا وينو !) وأول هذه الأسباب هو أن أبا الجعافر عضو مؤسس فى تنظيم (ر ب م ن) وه تنظيم (الرجال البخافو من نسوانهم ) وما عاوز يدخل روحو فى أى معرك غير متكافئة ولولا توافر (الشغالات) من كل جنس فى بلاد البترول التى ينعم فيها أبو الجعافر بالإقامة لكان أشطر من يقوم بكتابة المقال الساخر و (يغسل العدة) ! يعنى يا جماعة بالعربى كده أبو الجعافر (زاغ من القصة دى) عشان عاوز يموت ميتة طبيعية !

كسرة : يا أبوالجعافر يا خوى مجنون من يتزوج فى هذا الزمن الصعب .. وأكثر منه جنوناً من يتزوج ثانية .. أما ناس ثلاث ورباع فديل (عاقلين .. عاقلين) .. يعنى ح يودو القروش الكتييييييييييره دى وين؟

Advertisements
تعليقات
  1. أحمد الفاضل كتب:

    والله يا بروف أنا قرأت المقالين
    ووجدت أن الأمر لا يتعدى الحساده
    حساده منك ليو على الترطيبه
    وحساده منه ليك على اللون الفاتح والضحكه

    ولو انتو متشاكلين في العروس السعوديه
    انا جااااااااااهز
    مقيم في السعوديه ومؤمن بالمسيار وعزابي كمان
    أها مؤهلاتي ولا مؤهلاتكم الإتنين؟

  2. نيام كتب:

    البروف الظافر صاحب ابو الجعافر..
    وتحلية أيه؟ وبيوت مكندشة .. وعربات مكندشة.. ومكاتب مكندشة ومرتب مكندش!!!!والله فاضل تقول و صلعة مكندشة لانو نوع الصلع بتاع ابو الجعافر دا ما بكون الا من اثر الكندشة الخلفية ..وهذا ما يسمي بالمعط الخلفي للتكييف الصيفي..وبعدين ابو الجعافر دا طوالي مستقبل يعني ما بودع زول اصلو…طيب في المطار بعمل شنو بركب الطيارة خلف…

  3. ألفاتح جبرا كتب:

    يا أحمد الفاضل إنتا تعال م الآخر وقول عاوز تترشح وكده !

  4. ألفاتح جبرا كتب:

    يا نيام والله دى ما حساده لكن أبوالجعافر عاوز يزوغ من المودوع ويلبسو فينى .. !! عاوز يودينا فى ستين الف داهية !!

  5. طارق أب أحمد كتب:

    قرأت ما كتبه صديقى (أبوالجعافر) فى زاويته الحاده في هذه الصحيفة يوم الثلاثاء الماضى بعنوان (الفاتح الما فالح) ويعود أصل صداقتى لهذا (الجعفر) أبو لسان طويل
    غايتو يا بروف بوظت أعصابابنا مشيت بعيد و قلت أبو لسان لحق سجيمان

  6. ودالخلا كتب:

    سلام ياقبيلة،،
    صديقنا وأستاذنا بروف جبرا،،
    مالك عاصر شدييد علي أستاذنا أبو الجعافر فهو لا يزال (شباب)، فقد ذكرت أن والدك عليه الرحمة كان يقرأ لصاحبك أبو الجعافر في نهاية الخمسينات، فلست أدري هل تعني خمسينات القرن الماضي أم عمر والدك، فالأستاذ أبو الجعافر كان من أساتذتي الأجلاء في منتصف سبعينيات القرن الماضي عندما كنا طلابا” بمدرسة بالمرحلة الثانوية، والحق يقال فقد كان أستاذا” لطيفا” ودودا” ساخرا” أحبه طلبته وصادقوه كما لوكان دفعتهم، وحبب لطلابه حصة اللغة الإنجليزية فقد كنا ننتظرها بكامل العدة والعتاد (دك مافي!!) وقد كان أقرب مايكون في العمر لنا في تلك المرحلة (يعني يا بروف قصة الستينات دي كتيرة شوية) لذا كان البساط أحمدي بيننا وبينه وأظن أن تلك المعاملة قد سببت له حرجا” بالغا” مع زملائه بقية المعلمين ،،
    وأذكر من طرائفه في الفصل وقد كان مرشدا” لفصلنا والفصل نفسه كان (طائرا”)، عندما يزاحمه طلابه في الخروج عند نهاية حصة اللغة الإنجليزية في باب الخروج وكأنه واحدا” منا دون أن نشعر بأننا نزاحم أستاذنا، يقف ممتعضا” ويصرخ فينا قائلا” بالله أنتو طلبة تطلعوا قبل أستاذكم ما يطلع من الحصة!!
    فيتوقف الطلبة ليفسحوا له بالخروج، ويهمس أحد طلابه بصوت خفيض وبلغة إنجليزية سليمة هامسة: Ladies first فيتوقف جمعهم ويخرج هو من الباب وقد سمع الجملة ويلتفت ألينا قائلا” بصوت جهوري : Dogs Follow
    كان معلما” ومربيا” وصديقا” وأخا” عزيزا” رسخت صورته في أذهان طلابه حتي اليوم، فكلما نلتقي نجتر الذكريات كانت ذكراه من أعطر وأطيب الذكريات، أمدّ الله في أيامه، ووفقه لفعل الخير..

  7. طارق أب أحمد كتب:

    ؟في المقال المذكور استنكر جبرا قرار والي الخرطوم منع الشيشة، ولو كان يملك عقلية استثمارية لرحب بالقرار،.. كيف؟ الشيشة ممنوعة وهناك نفر من الناس ابتلاهم الله بحب شفط التبغ عبر أنبوب طويل يمر ببحيرة راكدة.. معنى هذا ان قرار تجريم التشييش سيخلق سوقا سوداء لها.. يعني بالإمكان إنشاء مفاعلات سرية للشيشة في مختلف الأحياء وتوصيلها للزبائن عبر أنابيب المياه طالما ان تلك الأنابيب لم تعد تستخدم للغايات التي تم تمديدها لأجلها، وحتى لو اكتشفت السلطات سرقة خطوط المياه لتصريف دخان الشيشة فمن السهل جدا إقناع القضاء بأن مضار الشيشة حتما أقل من مضار المياه التي تم تدخل البيوت.. وهناك إمكانية تحويل تبغ الشيشة الى كتل وكراضم وبيعه كبخور.. وبالمناسبة فان مضار البخور على الجهاز التنفسي، لا تقل عن مضار الشيشة، وإذا كان الأمر يتعلق بصحة الإنسان، فلابد من منع فوري لحمامات الدخان بالطلح والشاف ففي الجلسة الواحدة يستنشق الجالس على حفرة الدخان كميات من ثاني وأول أوكسيد الكربون أكثر مما استنشقه الفاتح جبرا من استخدام البرنجي خلال 40 سنة، فهل سيصدر قرار بمنع كل ما هو ضار بالصحة: حفرة الدخان؟ المرارة؟ أم فتفت؟ هنا أم درمان؟ تعداد السكان؟ ظللنا نتباهى بأننا بلد المليون ميل مربع وأن تعدادنا بلغ 40 مليوناً وطخينا أنفسنا عينا حارة فبعد 4 أشهر سنصير بلد الـ(700) ألف ميل مربع وينخفض عديدنا الى 30 مليوناً!

  8. طارق أب أحمد كتب:

    عفوا ((التعليق أعلاه مقتبس من مقال أبو الجعافر ))

  9. ألفاتح جبرا كتب:

    وتيب … أهو أبوالجعافر درس ودالخلا الدرسنى !!ههههههه

  10. ابكرون كتب:

    ابواحمد : اظن ابو الجعافر قاصد الجالسة مش الجالس علي الحفرة لان جيل الجالسين انقرض زمااان كان آخرهم ناس آدم (امباسادور)..
    انتو جبرا ده دفعة مشاكل …!!!!!

  11. ألفاتح جبرا كتب:

    يا أبكرون الجالسون والجالسات ما بتفرق بقت …
    كسرة :

    أنا الدفعة 35 !! أها ضربا تطلع كم ؟

  12. ياسين شمباتى كتب:

    البروف والاحباب..سلام..
    لكن ختيتها ليهو واااضحة يا بروف!! فى داعى لى مطلع الخمسينات دى اسه؟؟
    على قول حبيبنا احمد الفاضل,,انحنا ما قاعديييين ومعتيين,كشكرة ما يعطى!!؟

  13. ألفاتح جبرا كتب:

    يا دكتور ياسبن سلام .. أبوالجعافر طالما درس أخونا ود الخلا يبقى قطع شك حضر الإنجليز …

  14. ودالخلا كتب:

    سلام ياقبيلة،،
    صديقي البروف جبرا وسماره الأكارم،،
    أنت يا جبرا يا خوي قايلني خريج غردون التذكارية ولا شنو؟؟
    نحن ما حسبناها معاك سو سوا في بيت دوك عزت وطلعنا أن وصديقي أب أحمد دفعة الحيطة بالحيطة، وأنت كنت قدامنا يجي بأربع أو خمس دفعات، لكن زمان الدنيا بخير كانت (الأعادة) مسموحة ، وأنت ذاتك دخلوك المدرسة في عشرة سنين بالتحانيس لأنو الناظر كان رافض، هسي جيت بقيت دفعة ود المهدي ود العمارات الدرس الحساب في الروضة مش في الكُتاب!!!

  15. ابكرون كتب:

    هههههههههههه
    ومال نيام وسنكل وبشار وسلولو من التركية السابقة هههههه؟؟
    انتو يا جماعة الكبر ده ما بتدوروه ليه…ما مصير الاولين والآخرين ووقار ومرحلة وهناي….(أمس تيتي….بكره بعانخي)

  16. نيام كتب:

    ابكرون:
    قاليك يا ابكرون القرد صاحب الفار فترة بعدين الفار اتكيف من صاحبو الجديد دا شديد قام قال ليهو ابو القرود انت ما عندك اصحاب تاني قال ليهو كيف عندي الاسد و الفيل و النمر و المرفعين و التقل و حتي الغزالة مرات مرات بتجينا قال ليهو ياخ اعزمهم يوم عندي …قام القرد عزم الجماعة عند الفار …اب سيسي شاف ليك قصتو بايظة مع الجماعة ديل قام سأل القرد :
    – انت صاحبك الفيل دا عمرو كم
    – انت اسالو براك
    – يا فيلو انت عمرك كم؟
    – ستة شهور و ثلاثة يوم
    – انت عمرك كم ؟
    – انا عمري سنة لكن كنت راقد استبالية

  17. ودالخلا كتب:

    سديقي أبكرون،،
    الكُبُر هيبة وجلال ياصحبي، لكنه طبع الأنسان الذي دايما” ما يحن للماضي البعيد، وبرضي زيك كنت ….
    كسرة/
    واحد نونو شاف ليك عمك ما قادر يمشي، قام قاليهو أنتو يا عمو المكتفك كدة شنو؟؟!!
    عمك زعل وحرقوا الكلام زي جماعتك ديل، وقالوا المكتفني ياولدي قاعد يفتل ليك..

  18. نيام كتب:

    العاقل من اتعظ بغيره…اماني مو فتال…ويفتل للكل و في الحال…

  19. ابكرون كتب:

    هههههههههههههههههههههه
    استمتاع ما بعدو استمتاع
    منكم لله يا نيام ويا دابي رنده
    ——————————————-
    البوست ده حقو تحولوه الحله الخلفيه زي الدور الداير في ود الزبير بيغادي
    ود الخلا كل الايميلات المرسله لك بترجع اظن المشار اليه اعلاه ما بصلك

  20. ودالخلا كتب:

    سلام ياقبيلة،،
    صديقي أبكرون، تقبل الله منا ومنكم صالح الأعمال وجعلنا وأياكم أجمعين من عتقاءه في هذا الشهر الكريم الذي يابي ألا أن يتم رحيله ويتركنا نتخبط من تاني في دياجير الظلام، بعد أن كنا نسمو في سموات الأنوار والعفة والمحة الصادقة، فعلا” تُصفد مردة الشياطين ف رمضان، وأظنهم الآن يتأهبون للأنطلاق، حفظنا الله وأياكم منهم… آميييين
    فعلا” تم قفل حسابي بواسطة الجماعة الياهووووووم زات نفسهم ، تصور قال لي شنو، أنا بتاع أسبام، تصور بقيت ارهابي لأني رسلت ليكم رسالة عجبتني شديييد لمجموعة كانت كبيرة فعلا”، وما صدقوا الجماعة قاموا قفلوا ليك حسابي، ولمن طالبتهم بفتحه طالبوني ليك بعدد من الأسئلة أياها البيعملها الواحد عند فتح الحساب فقلت لهم من اين لي بهذه الأجابات وقد مضي عليها أمدا” بعيدا،،،،
    يمكنك مراسلتي علي البريد الأليكتروني sayonara_166@yahoo.com، ولو قدرت رسلت لي رسالة تشتمل علي عناوين المجموعة تكون ما قصرت تب
    وبحاول القي لي رسالة قديمة من اي واحد تحمل لي عناوينكم وألقي فيها ريحتكم أقدر أخش بيها عليكم وياريت لو عملتها لي علي العنوان القلت ليك عليه دا!!
    تشكرات كثيرات يا سديقي، وكل سنة وانت والجميع بخير وصحة وعافية

  21. طارق أب أحمد كتب:

    صديقى الخلوى
    رسلت ليك كل العناوين فورورد لى ما تنفخ فى شى ما بتعرفوا
    أحتمال تكون قربه مقدوده

    بدون اى Hint

  22. ابكرون كتب:

    الارهابي ود الخلا
    سلاااام اظن اب احمد حلّ المشكلة بس سيونارا و166 بينهما فلجة…..؟

  23. ودالخلا كتب:

    سلام ياقبيلة،،
    مشكورين ومأجورين (من الأجر والثواب يا أخوانا)، علشان ما ينط لينا واحد ويقول ليكم اهو شوفوا زولكم أيدكم في خشموا وهو بيعضي فيها،،،
    تمام بعلم الوصول..
    بس الفلجة دي يا أبكرون فيها داون أستروك، وبعد دين تلاقيك يا صديقي عرفتها (سايونارا) دي!!!

  24. ابكرون كتب:

    طبعا عرفتها ويا حليلنا سايونارا ما بتغباني
    نحن جيلها وجيل سبناوتسري منزل……
    اسه السغااااار يقولوا ليك (يطرشنا يا يابا)

  25. طارق أب أحمد كتب:

    فى 2 سايونارا
    الأقدم بتاع مارلون براندو حب واحده يابانيه أيام الحرب العالميه على اليابان
    و السايونارا التانيه هندى بتاع واحده هنديه سمحه الحاميه خطفوها و قتلوها و فى نهاية الفلم طبعن طلعت المقتوله أختها التوأم كان شغال فى حلفايا سينما ايام أستاذ العربى كا يسميها السوءنما

    أها يا صديفى الخلوى لفيتنى كيف

  26. ودالخلا كتب:

    لقيتم كدا، Thumb Up ، وما طالبني حليفة، متوقعكم تسدوها وتتسيّدوها وزيادة، وياكم جيلي أنا جيل العطاء المستجيش ضراوة ومصادمة، المشرئب الي السماء لينتضي عقد النجوم لشعبنا، هسي يا أبكرون السغاااار يقول ليك مشرئب يعني شنو؟؟؟!!!!
    ذكرتني تسري منزل وتلك الأغنية الجميلة لتلك الجميلة عشة(آشا باريخ) OmereSonaRe
    وآسي الفؤاد يا قاسي…
    وأذكر هواي يا ناسي…
    حياتي حب ومآسي….
    وقاسيت كتير وبقاسي..

  27. ابكرون كتب:

    جبرا العذر فقد اثار بوستك الشجون
    ود الخلا اب احمد امسحوا الدميعات
    ويالها من ذكريات

    ———————————

  28. ابكرون كتب:

    بكي لناس الزمن الطيب
    ———-

  29. ودالخلا كتب:

    ابكرون ياصديقي،،
    غاية الأبداع وقمةالجمال ،والمتعة، شاعرية وموسيقي غنائية والأجمل من كل ذلك الذكريات الحالمة، وبالغت فوكها عديييييييييييييل كده،،

  30. ياسين شمباتى كتب:

    غايتو جنس محن !!!

  31. abushagrod2 كتب:

    الله يجازي محنكم
    الدميعات النزلت بين الستين والسبعين
    وحسب حسابات البروق جبرا وأخونا ود الخلا وأستاذهم أبو الجعافر
    وكونوا تيسري منزل وحانوار بدت تتعرض في السنامات سنة خمسة وستين وستة وستين من القرن الماضي فبعملية طرح بسيطة يكون أخونا ابكرون دا في متوسط أعمار ( أمة سيدنا محمد)
    وأصغر واحد بكتب في الصفحة دي يكون لبس ردا في المتوسطة قبل ما تبقى ثانوي عام

    وبصرحة
    بقينا نحسب في مصابعينا
    وكل عام وأنتم بخير

  32. abushagrod2 كتب:

    أخونا أبكرون نستميحك عذرا
    أغنية ميري موهابت دي فيها على ما أعتقد دويتو خطير جدا شامي كابور مع سابنا أرجو إن وجدته تنزلوا لينا يجزاك
    الله كل خير

  33. ياسين شمباتى كتب:

    غايتو جنس محن !!
    حتى انت يا شقرود!!

  34. ودالخلا كتب:

    سلام يا قبيلة،،
    abushagrod2 علي ما تعتقد ولا علي ما تتذكر، لأنو دي لي دي تفرق كتير يا صديقي، بعد صديقنا أبكرون بحساباتك دي ضيّعت عليه يجي كم سنة لا تقل عن العشرة سنوات، ودي فيها علي الأقل فجة تانية يمكن تغيير في تاريخ الأجيال الكثير،،
    تداخل الأجيال في المدونة دي يضفي عليها ألقا” ونكهة خاصة قلما تجدها في أماكن أخري، علشان كده تعال أنت ومعك آخرون وستجد نفسك في مكان كنت تبحث عنه أمدا” طويلا!
    أين صديقنا الحاج سلولو، يا ربي يكون معتكف ،ولا معتزل، ولا صاحي ولا نايم ولا زعلان….
    تحياتي لكم جميعا” وكل سنة والجميع بخير وعافية

  35. ودالخلا كتب:

    دوك شمباتي سلام انت لا بد وين ولا جيت البلد ،وأنت شوفت حاجة لسه يا ما تحت السواهي دواهي وهن داب محن بس يا شمباتي، ديل بيمشن ويردحن،ماتتمحن يا صديقي، فك المِحنة حقتك دي وقوم شوف لينا أبوك السلاوي وين؟؟
    تحياتي يا صديقي وكل سنة وأنت طيّب..

  36. ألفاتح جبرا كتب:

    حبيبنا ودالخلا
    من ناحية حسبناها فـ حسبناها لكن نحنا جانوار ده ما حضرناهو !!سمعنا بيهو سمع ساااااااى

  37. ياسين شمباتى كتب:

    ود الخلا..سلام..
    قاااااعد لكن لخمة شديدة مع المعتمرين وجرى فظيع..
    بالنسبة للوالد سلولو فهو بطرفكم منذ اول امس,,العيد دا لازم يكون جنب عواطفّّ ماك عارفو حنين وما بحمل الفراق؟؟وكل عام وانت بخير..

  38. ابكرون كتب:

    بالله الجباان بالسودان ….. لبيدي
    عارفو ما بقدر…عرس البنيه لاخمو معذور برضو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s