ص د م

Posted: الإثنين,27 سبتمبر, 2010 by الفاتح جبرا in اخرى

لو سألتنى  عن من هو أكثر مواطن متعذب فى هذا الزمان الأغبر لقلت لك دون تردد إنه (المغترب) وبالطبع لو أننى قلت لك هذا الكلام (زمااان) لربما نعتنى  حينها (بالخبل) أو الجنون فزمان كان للإغتراب ألق ورونق وللمغترب (شنة ورنة)  وكمان (لمعة) ، كان من العادى جداً أن يقضى المغترب إجازته فى إحدى البلدان السياحية ثم يعرج (على البلد) ، شئ لبنان وشئ المغرب ومرات أديس ومرات القاهرة ، وعندما يعود المغترب فى إجازته كان كل الحى يقف منتظراً (فتح الشنط) والهدايا .. تياب .. قمصان .. بلوزات .. فتايل ريحة .. أحذية .. قطع جلاليب .. عمم توتال .. بناطلين جينز .. ومرات (مسجلات) .

أما مغترب اليوم فتكاتفت عليه المحن والمصائب إبتداءاً من المرتبات (الضعيفة) وتخفيضها المستمر مروراً  باسعار السلع الضرورية المرتفعة فى موطن إغترابه إنتهاءاً برسوم (السفارات) الباهظة لإستخراج أو تجديد أو تعديل وثائق وجوازات السفر أو توثيق الشهادات إضافة لبعض الرسوم الأخرى التى تفرضها بعض هذه السفارات والتى لا تندرج تحت أى مسمى كرسوم (تصليح قاعة الزوار) ،ورسوم (صيانة أيه كده ما عارف) .

وإذا ما عاد (المغترب) فى إجازته السنوية (عينك ما تشوف إلا النور) حيث تبدأ مرحلة أخرى من مراحل (الحلب) إبتداءا من (رسوم القدوم) وإنتهاءاً برسوم (المغادرة) وما بينهما من مساهمات إلزامية (أنا ما عارف مساهمة وإلزامية دى تجى كيف)  وضرائب وزكاة (على شنو !) وكنانة والرهد والقناة الفضائية ولستة طويلة من (الدمغات) وصناديق الدعم !! بعدها يصبح (المغترب) عاوز ليهو زول يدعمو لى ذاااتو!!

مناسبة هذا المقال رسالة جأتنى من أحد القراء على بريدى الأليكترونى  لشاعر لا أدرى ما هو إسمه (وأحييه من هنا وأستـاذنه فى نشرها) ، أخونا الشاعر المغترب قام بتلخيص (القصة كووولها) فى هذه القصيدة الساخرة :

يا غربة .. يا غشاشة .. يا بكاية .. يا مستهبلة

تغرينا بي درهم قروش وراه قنطار بهدله

جيناك سنة ..

أو قول سنين بنكمله

نبني البيوت في العاصمة وبي كوم أثاث بنجمله

وكرولا حاره نرسله أصلو التنقل مشكله

ونكمل الدين بي مهل والسمحة جاهزة نحصله

غير القروش اللي للأهل عبر الشهور حا نرسلا

والباقي يدخل في البنوك ونشوف دباره نشغله

ناس فكرت تجني العلم تبدأ الدراسة تواصلا

أحلام كتيره وشيقه وآمال كبيرة نأملا

لكن حساباتنا الغلط في كل عام بنرحله

مرت سنين من العمر بنعزها وبنفضله

والحسبة وصلت طاشرات يمكن نعيش وندبلا

وتعال نحاسبك يا وهم من غير رقم أو أمثله

كان للقروش نجري ونحوش لكن تقول بنشاكلا

ما راضية تقعد في الجيوب وتقول حرامي بينشلا

لكن بترقد في الضهور بديون تقيله متلتلا

ممحوقة ما بتقضي الغرض وأقل حاجة تكملا

كملانه سفرة وحق وزن ومجاملات مستفحله

ضرائب أبعاج المشي وإلزامي حمدي نحولا

وأحلامنا صبحت زي سراب نمشي ونجري ما نحصلا

يا ريت يكون هم القروش يا غربة فيك هو المعضله

لكن تعال شوف الهموم الما إفتكرنا نقابلا

ذلة ومهانة واحتقار خلو النفوس متململة

سجنا كبير فيهو الكفيل سجان قيوده مكبله

أشغالو شاقة ومؤلمه ودايما تكون مستعجله

ما عاد يكفيها النهار تحتاج ليالي مليله

أمراض كتيره بدت معاك عايزه الفحوص مستعجله

ناس الضغط والسكري ومرض القلب مع الكلى

ومصران وقرحة وإكتئاب ونفوسنا ما متحمله

وبنينا فيك كيمان لحم تحت الهدوم متندله

وأكيد يكون أكل المعلب والمجمد عاملا

عدم الرياضة والكونديشن لابد يكون ليهم صــــــلا

وكمان تعال لمعادلة ما قدرنا أصلا نعدلا

سجن العيال جوه الشقق وفراق الأهل والعائله

جيب العيال بي جيبنا مال وجيوبنا غيرو مميله

وصغارنا صبحت بالزهج متوحشة ومتجفله

لا قادرة تلعب في خلا ولا ضل شديره يضللا

لا قادرة تدرس بي نفس من الدروس المترهله

تلقي الولد غالبو الكلام والبت كبيرة ومريله

كل الضغوط سوا ما قدرنا حتى نقللا

في كل طرف تلقي القرف تلقي الخيوط مداخله

يا غربة أديناك كتير أدينا خاطرك يسهلا

خلينا نرجع بالفضل نلحق حياتنا نعدلا

آمالنا فيك بدري إتنست إلاّ الرجول متوحله

وبقينا زي أهل القبور لا البره عارف يدخلا

لا الجوه يرجع لي ورا يحكي الحقيقة يوصلا

لكن خلاص هان الخلاص عندك نزل مهما علا

وإن شاء الله نحيا نودعك وتكوني ذكرى نغازلا

يا غربة .. يا بكاية .. يا غشاشة .. يا مستهبله

كسرة :

أخواننا المغتربين أيام الإغتراب كان إغتراب والله تب ما قصرو … عشان كده حقو هسه نقيف معاهم ومن هنا أقترح إنشاء (ص د م) …. صندوق دعم المغتربين

Advertisements
تعليقات
  1. Mosab mohammed Elfadil كتب:

    سلامات يا مان موضوعك في محلو وبجد الإغتراب بقالنا معضله والناس مادايرة تتعظ…. بقولوا الشقي يشوف في نفسو والسعيد في غيرو لكن بقي اي مغترب في الزمن دة شقي ومع الاحترام

  2. قرن شطة كتب:

    العزيز /جبرة – صباح الخير
    طبعا( الغربات ) ذاتها انواع واشكال…الراجل الشاعر ده بيتكلم عن الغربة (العادية) كانت ، وديل قصتهم اتعقدت خالص…شوفت كيف ، المنظر يذكرنى بكاركتير للرسام عزالدين ايام ازمة المواصلات ديك لوبتذكرها ، وفيهو واحد نازل من بص مزحوم خالص وهو نازل فى الزحمة القميص اتملص والفنيلة كمان…الراجل وصل الواطا وبيقول لناس الباص : يا أخوانا المواصلات خليناها بس ادونا هدومنا! الغربة بقت كده..بس دايرين هدوهم…وطبعا فى غربة ماليزيا (المجيهة) ربنا يوعدنا واياكم..دمت يامبدع

  3. عزت كتب:

    جبرا و قرن و مصعب سلام

    فعلا الله يوعدنا بي جنس (الغربات) المجيهة و يعتقنا من الغربة الداخلية الأحنا فيها دلوكت…

    لكين يا بروف ماشي كويس فبعد صندوق دعم الحكومة جاء صندوق المغتربين يعني الاسبوع الجاي انشاء الله يجي صندوق دعم المدونين…. (ص د م) برضو

    و الله برضو بيحتاجوا… زمان ما قصروا… زمان كنا نحجزهم حجز من التعليق لمن يغرقوا المدونة… هسة بالله ما عارفين نجيبهم كيف…

    أظهروا و بانو… عليكم الأمان… أضف تعليق اليوم و خد واحد مجانا من المؤلف….
    أكتب مقالا اليوم و نديك باسوورد للمدام و الا الخطيبة مجانا ….
    ارسل رسالة الكترونية الآن و نرجعا ليك و معاها تعليق ظريف…

    بعدين لو في واحد عاوز دعم فني اليكلمنا… علة لو دايرين دعم تاني الا بعد ما يجيزوا اللائحة بتاعت الصندوق….

    يا ناس يا هووووووووووووووووووووووووووووووووووووووووووووووووي

  4. علي سنكل كتب:

    أستاذنا المبدع البروف جبرا ، قرن شطه ، ابو عصمت ، مصعب سلامات . .
    و الله يا بروف دا أول صندوق يكون عادل وفي محلو، والموضوع رهييييب ونشكرك على لمس قضايا العاملين بالخارج الما دايرا ليها مفتي.
    أنا دخلوني في لجنة الصندوق ووضع لوائح وقوانين توزيع الدعم . . وأول هام من مهام هذا الصندوق تكون تمويل عودة المتمترسين من المغتربين لضيق ذات اليد وعدم القدره على العودة لأسباب مالية.
    وبعدين الصندوق دا يشوف لينا رسوم بناء السفاره مشى وين وكنانه والرهد مشى وين ودمغات ودمعات وفضائيات كولو دا مشى وين.

    ونطالب بإلغاء صندوق دعم الحكومه حتى ترجع لينا قروشنا واللا تورينا سوت بيها شنو؟

    و يا عزت عدم التدوين سببو الشغل القالو الشاعر دا وبستمر مرات لي بالليل.

  5. مُخير كتب:

    الحبيب أبوناجي
    الحبان الجوة والبرة
    سلام
    مشكور يا جبرا أن تتسع دائرة عطفك بعد جداد الحلة لتشمل الطيور الهايمة، والله يجيب العواقب سليمة

  6. مُخير كتب:

    إتخيلت طارق أب أحمد ولا ود الخلا ولا البشاوي يقول يا ربي سليمة دي المحطة بتاعت قطر الغرب ولا بائعة اللبن، ويرد عليه عزت ولا نيام ولا أبكرون قائلاً هو في قطر ولا بقرة ولا لبن ظاتو، ههههههههه

  7. DAKEEN كتب:

    قال الشاعر عيون في الغربة بكاية وانتوا كمان عملتوها لينا بيت بكاء عديل كدا ،،
    طيب رجعنا وخلينا البكي ،، نجي نبكي جمب البنك المركزي ولا كيييف .
    يعني زمان الراتب من 5000 الاف ولي فوق واسع كان قالوا بنديك خروج بتقول لا نزلوا الراتب ولا تنزلوني انا . ننزل وين ،،، البيت لسه ساس ،،، والاولاد في الاساس ،، والكتب والكراس ،، والمواصلات دفاس ، واللحمة راس ، والخبز رصاص ،، والجسم بدون احساس مكنة شغل وخلاص

  8. ألفاتح جبرا كتب:

    الأحباء الأعزاء .. سلااام
    والله نحنا هسه جوه أخير مننا المغتربين .. الحكاية جاطت .. الواحد بقى ما عارف الاسوأ منو؟ غايتو خليناها لى الله ………

    الحكومة طبعن !!!!

  9. طارق أب أحمد كتب:

    بروف
    كان لقيت ليك مغترب (طهر) أمو و (حجج) الأولاد يبقى دا الجاب حدوت الغربه إلا ما حتلقى

    أغرب جبايه فى التاريخ الأمازونى بعد رسوم شهادات الميلاد و الوفاه رسم دخول بلدك للمغترب
    يعنى لو واحد مغترب راجع البلاد أباطو و ميضنة الجامع الجديد ما يدخل لو ما عندو الكمين دولار دى

    عزت
    ما دسانا إلا هديتك – الجنقو مسامير الأرض- لو أمكن تعمل لينا عرض و تلخيص (سغيرونى كده) للكتاب ليتم مناقشته فى المنبر ,,,,,, ياخى ألف شكر على الكتاب الجميل دا

  10. aflaiga كتب:

    البروف سلامات ومطولين منك ورا المعايش والسفر .
    طارق قلت لى يكون طهر منو وحجج منو ؟؟؟ دى بالغت فوكها عدييييييييل كده
    لو بتضمنو انو قروش صندوق دعم المغتربين تمشى للمغتربين على بركة الله سوو الصندوق انا خايف يبقى اسمو بعد فتره مغتربى دعم الصندوق ونكون عميناها بدل نكحلا

  11. ياسين شمباتى كتب:

    البروف والاحباب..سلامات..
    يارييييييييت,,والله البقت علينا لا حكت لا بقت..وبعد دا انا ما غايظنى شء الا الزكاة البيقلعوها دى,,بس نفسى اعرف مرجعيتهم الفقهية فيها شنو!! حسبى الله عليهم..

    دكين..سلام..
    يا ممكون وصابر..الله معانا..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s