هاك الحاجة دى ……

Posted: الأربعاء,29 سبتمبر, 2010 by ياسين شمباتى in سياسية

علمت من وسائل الاعلام ان الدولة بصدد الدعوة الى صلاة جامعة تقام بميدان الخليفة بامدرمان وسمتها (صلاة الحاجة)…والغرض منها تعزيز ودعم الوحدة والسلام!!

كلنا يعرف صلاة الحاجة واسبابها وشروطها,,وما احوجنا اليها فى كل يوم بل كل لحظة من هذه الايام العصيبات,,لكن كلمتى (التعزيز والدعم) توحيان لى بان الامر مقطوع ومبتوت فيه بالوحدة والسلام,,اما كان الاجدى والاصوب ان يقال (تحقيق) ؟؟

وخلينا من دا كلو,,هى حكومتنا الرشيدة دى من متيييييين بتعرف ربنا ولا بتعرف الاسلام؟؟؟معليش قلبت دارجى لكن عشان آخد مساحتى فى الردحى!! هى لو بتعرف صلاة ولو بتعرف اسلام ما كانت زورت وبهتت واتلاعبت فى الانتخابات..ولو بتعرف ربنا ما اكلت مال اليتامى ومال المعاشيين والمعلمين..ولو بتعرف صلاة ما كانت قتلت اهل كجبار ولا مذبوحى بورتسودان ولا اتهمت بالتهريب والتفجير يفع قصّر..ولو بتعرف ملة ما كانت بكل بساطة قالت (مافى جهاد) واعلنت ان الماتوا ديل راحوا شمار فى مرقة..ولو كانت راغبة فينا الّا او ذمة ما كانت اتهاونت فى امننا وخلت خليل يخش امدرمان..ولو بتعرف حاجة ما كان كيلو الطماطم وصل 20 الف جنيه!! قال حاجة قال..

بعدين ما كان اولى انهم يدعوا لى صلاة الخوف مما قد يحدث؟؟او يدعوا لى صلاة الاستخارة,,لانو امكن الانفصال هو الخير وكل الخير..

بعدين هم بى جهة يدعوا لصلاة حاجة رغبة فى الوحدة,,ومن جهة يصرح د.كمال عبيد وزير الاعلام القيادى فى المؤتمر الوطنى بانو فى حال حدوث انفصال فان كل فرد جنوبى ما عندو سبب يقعدو فى الشمال,وانو ح يسحب منو الجنسية وما عندو ليهو حبة التسالى!! عليكم الله ديل ناس كايسين وحدة؟؟بعدين انت لسه ما خلصت ترسيم الحدود وامور الجنسية والمواطنة,,كيف تصرح بكلام عجيب زى دا؟؟

وفى سؤال محيرنى جد,زماااااااااااان كان كبيرهم (الترابى) بقوم بمهام الصلوات والعبادات دى ,,اها اسه منو الحيتصدر ويقود السفينة؟؟ تانى فى سؤال انثروبولوجى,,ليه اى واحد اسمو كمال فى الجماعة ديل مخلقن ومبشتن وكلامو مر؟ فى تلاااااااااااااااااااااتة,,جائزة قيمة فى انتظار من يتعرف عليهم..

آلآن وقد ضللتم واضللتم قبلا؟؟ آلآن تتذكرون ان لكم ربا وان لكم دينا وان هناك من هو اقوى واشد؟؟ لا ادرى لم تذكرت صدام حسين حين وضع (الله اكبر) فى علم بلاده ابان العدوان التحالفى مطلع التسعينات من القرن الماضى!!

صلاة الحاجة..وما حاجتكم يا آكلى مال الشعب؟؟امزيدا من الحرام ام قليلا من دم شعب لا ينام الليل داعيا عليكم؟؟صلاة الحاجة..انى لادعو جماهير الشعب ان تتوجه بنية خالصة الى الله ان يخلصنا من شرارنا وان يولى زمامنا خيارنا وان لا يؤاخذنا بما يفعل السفهاء منا…وان يرينا فيهم اياما سوداء كايام عاد وثمود وفرعون وان ياخذهم اخذ عزيز مقتدر فانهم لا يعجزونه..

كسرة بايخة: فى احتفال نظمه المنتدى الثقافى السودانى بالاحساء بالمملكة العربية السعودية تحت شعار (من اجل وحدة طوعية وجاذبة) وخاتين صور (البشير-قرنق-على عثمان),,انا اتحيرت  خاتين صورة قرنق ليه؟؟مالهم مابين سلفاكير دا !؟

المهم غنت فتاتين مطرطشتين (عينيك يا البشير ما بتعرف النوم)!! قلت ياربى هو اوكامبو دا_اوبسورى_ قصدى البشير دا الحاميهو النوم شنو!!؟؟؟

ونلتقى…..

Advertisements
تعليقات
  1. moshahidah كتب:

    مشكور جدا على الردحى كونى ما بقدر اردح من باب الانوثة وكدا …
    اخ بس ..مفروض يكون في كتاب اسمه النكات في عصر الانقاذ ..
    حيتكون طبعا من ملاييين النكات ..و ملايين الهستره البهستروها فينا دى ..
    لكن عارف حاجه كل ما استفحلوا كل ما اتفاءلت ..لانو هى لازم تستحكم حلقاتها عشان تنفرج ولازم تضيق شدييييييييييييد عشان تخرب و بعدا تنصلح ..

    يا تري ديل هم مترفيها الي فسقوا فيها !
    و متين فرعونا دا ببلعوا البحر !

  2. وداعة كتب:

    الأخ ياسين شمباتي:
    السلام عليكم..
    ,,ومن جهة يصرح د.كمال عبيد وزير الاعلام القيادى فى المؤتمر الوطنى بانو فى حال حدوث انفصال فان كل فرد جنوبى ما عندو سبب يقعدو فى الشمال,وانو ح يسحب منو الجنسية وما عندو ليهو حبة التسالى!! عليكم الله ديل ناس كايسين وحدة؟؟بعدين انت لسه ما خلصت ترسيم الحدود وامور الجنسية والمواطنة,,كيف تصرح بكلام عجيب زى دا؟؟

    كمال عبيد قصدو يقول ياجماعه اختارو الوحدة أحسن ليكم عشان هناك مافي زي دا..
    هو استعمل اسلوب الترهيب..
    يعني برضو طريقه..

  3. سماسم كتب:

    يدك على الجايزة يا شمباتي:
    ود عبيد ود عبد القادر ود شداد .. أه رايك شنو

  4. قرن شطة كتب:

    الاخ شمباتى
    والله داير اعلق واكتب حاجة بس ماعارف اقول شنو؟ على راى الجابرى …وداير إبتسم ومانى قادر..داير اصبر امامك وداير …..حكاية عجيبة!!!

  5. طارق أب أحمد كتب:

    بما إنو نونو عامله لينا بلوك أسمحوا لى أعللق نيابة عنها

    الشنباتى
    أم قيردون -الحاجه -كل سنه قاجه

  6. طارق أب أحمد كتب:

    دكتور
    الردحى دا أسلوب مناسب للتفاهم مع الرداحات ديل
    كلام كمال وهو الناطق الرسمى للحكومه يعكس مدى الفوضى فى فهم المسئوليات مع عدم وجود برنامج عمل للحكومه مع خلل تنظيمى فى الحزب الحاكم خلى كل واحد شايت فى إتجاه

    الحكومه التى صرفت المليارات على خال الرئيس لتسويق فكرة الإنفصال حال وقوعه لا يمكن أن تصدق نواياها بصلاة حاجه

    ديل ببيعوا لينا الوهم وبس

  7. ياسين شمباتى كتب:

    الاخت مشاهدة..سلام..
    شكرا ليك كتير للمرور والاثراء الحوارى..لكن باقى لى كان ضاقت بتضيق تانى!! دى حلقة مفرغة نسال الله ان يصلح حالنا ومآلنا..وهم حقيقة من فسقوا,,واسال الله ان يخلص البلاد والعباد من شرورهم..

    الاخ وداعة..سلام..
    ومرحب بيك مدونا واخا فى منظومة مدونى الوطن..ياربى يكون قاصد كدة!!؟؟ خلاس انحنا محقوقين ليهو..

  8. ياسين شمباتى كتب:

    الاخت سماسم..سلام..
    والله جيتى التلتين باقى تلت!! وصديقى على الفيسبوك اضاف(كمال على :وزير الرى -كمال حامد: المذيع)..الكمالات ديل كتار خلاس!!

    د.قرن شطة..سلام..
    يكفينا مرورك واندهاشك من الاوضاع!! لكن ياربى البقدر على الابتسامة فى ظل الظروف دى منو!!؟؟ ربنا يستر حالنا ويحسن ختامنا..

  9. ياسين شمباتى كتب:

    الحبيب طارق..سلام..
    هههههههههه,,عليك الله نونو دى تطير منكم وين؟؟
    اما بخصوص الانفصال ودعم الطرح من زمان فعليك نوووووووووووووور,,لكن البصدق منو؟؟ وستبدى لنا الايام ما كنا نجهل اكثر واكثر..
    كسرة: الحق الفيسبوك عاملين عزومة على العجورة اياها..وخليك قريب يا حبيب..

  10. Mosab mohammed Elfadil كتب:

    سلامات ي شباب مساء الخير
    ياسين وبقيت العقد الفريد مع الأحترام للوطنية الاصلا” بقت معدومة الواحد بقي غريب داخل وطنو لاللانفصال نعم للوحدة اللي قاعدة تنادي بها حكومة هذا الوطن نع من احل الوحدة والدولارات في الجنوب تصرف بلا مراجع وهنا كمية من المشردين والشماشة مالاقين حق وجبة نعم للوحدة وتشيد السدود في الجنوب ع حساب الشمال والمعلمين لم يصرف لهم مرتباتهم وجميع عمال وموظفين الصحة بولاية سنار يوقف صرف الحوفز منهم وماخفي اعظم دي وحدة ولاتشرد…
    تعريجة:
    أتزكرو احداث ا لاثنين الدامية عندما توفي جون قرن وبرضو دايرين وحدة مش
    من هنأ نعم للانفصال

  11. aflaiga كتب:

    د . ردحاتى اوب سورى شمباتى – انا بقيت اشك انك قريت طب ؟؟ غايتو جنس ردحيك ده بيقرو ليهو علم اجتماع جامعة خرطوم بليل فرع الديوم ؟!!!!
    بعدين مالك زعلان هو عليك الله الخليفه سيد الجامع ده بدون صلاه سلمم البلد موحده وسالمه يجو يصلو فى جامعو عشان يوحدوها !!
    مشتاقييييييييين ومالاقين وين انتا يا زول ؟؟
    تعرف يا شمباتى كلما علت اصوات الانفصال تيقنت من الوحده انت مش سمعت بالغفير بتاع الفندق القال كل يوم بيسمع كواريك يما كتلنى يما متت ومافى يوم شاف ليهو جنازه مارقه من الفندق …( عفوا للتشبيه ) ..

  12. زووووووول كتب:

    اخونا شمباتى ال ردحانى سلااام
    طيب يا شمباتى : شكلك جاتك الحاله ديك
    صلاة الحاجه فى ميدان الخليفه دى معناتا الجماعه ديل راح يرجعوا للحاله القديمه ايام صلاة الشكر وايام امريكا لمى جدادك وايام من ليس معنا ابا عن جد فهو ضدنا وايام بيوت البتاعات والصالح العام والحاجات الجميله ديييك هههههههه
    كسره بااااايته ودقيقا مؤرت (من الاريته) :ــــ
    وعشان تتعالج من الحاله دى عليك بالاتى :
    1/ كراع ضبا مسافر
    2/ سن سحليه عزباء
    3/ سمن ساق البعوضه
    4/ كبدة فار يتيم
    تدقهن وتخلطن وتشربن على الريق وبعد دااك انت فى طريق والانقاذ فى طريقوكان طبتا لومنى .

  13. زووووووول كتب:

    افليقا سلااام
    شنو يا عمك انت متفائل زياده من اللزوم
    شوف يا افليقا طالما سلفاكير بيتحدث عن الاستقلال لاحظ الاستقلال وليس الانفصال فهذا يؤكد ما ستؤول اليه نتيجة الاستفتاء علما ان الانتخابات فى بلادنا وفى غيرها حتى امريكا لا تعبر بالضروره عن راى الشعب المسكين بقدر ما تعبر عن رغبة الاطراف الممسكه بزمام الامور وما تنس انو الشعب صوت بنسبة 99% للررؤساء البشير ونميرى فى اسوأ فترات حكمهم وما تنس انو عقار وصل لمنصب والى النيل الازرق رجااااااااااااااااله وحمرة عين

  14. aflaiga كتب:

    زووول : راجع الرابط ويا ريت لو ستريكر نزلو لينا كامل

  15. ياسين شمباتى كتب:

    الاخ مصعب..سلام..
    واكرر ترحيبى بك وبارائك التى نرجو ان تتواصل وتتواصل حتى يقضى الله امرا كان مفعولا..
    الانفصال يا عزيزى امر واقع لكنه غير مستحب,,فمن يقبل ان يبتر عضو منه من غير ما مرض!!؟؟ اما عن احداث الاثنين فلنتذكر ايضا شهداء رمضان وجبار ومذبحة بورتسودان وشهداء الحركات الطلابية..

    افليقا..سلام..
    الشوق اكتر لكن انت البقيت غير متاح !!
    تشبيهك فى محلو,,ووالله الانفصال دا غير يجيب امريكا الخايفين منها دى ويقوم حرب مستعرة الاوار خصوصا انو كل طرف يضمر للتانى ما لم يضمره المشركون للمؤمنين فى فجر الاسلام!! يا جماعة الكيزان خلاص رقدوها سلطة,,ودى دقنى كان البلد دى قامت ليها قايمة تانى..

  16. aflaiga كتب:

    شباب : الفيديو اعلاه يوضح رؤية الحركه للوحده والدين والدوله بحضور قوات التجمع فى ذلك الزمان .

  17. ياسين شمباتى كتب:

    زووووووول…سلام..
    والله الحالة ديك اصلها ما فارقتنى !! لكن كنت بتغاباها ساكت,,بعدين الوصفة دى انا جربتها مية مرة,,دايما القى نفسى جارى فى طريق التحدى!!!! واما ما بعد الاستفتاء فسوف يضروننا بيد من حديد واشياء اخرى يترفع عنها المقام !!

    افليقا…سلام..
    طبع المقطع دا الجماعة اليومين ديل بقوا اهلو,,شوفتو كمان على قناة زول !!

  18. ابوالمنذر كتب:

    الدكتور شمباتى..
    انت صحى باقان شالوه وجابو بدلو عرمان !!!؟؟؟ ومشار مجتهد لانجاح الدوره المدرسيه بمدينة واو
    وناس اطور ولام اكول لابتين فوق راى !!! ولاية الاستوائيه تعلن انضمامها للشمال واخرى تعلن انضمامها لكينيا ..
    مسرحيات ومسرح وسارحين نحن وما سيظهر غير متوقع نهائى والحيكومه سايقانه بعيد عن فهمو الان بالتصريحات المتواليه والمتضاربه وصلاة مسجد الخليفه وموتمر التعايش بين الاسلام والمسيحيه وامريكا قالو هرشت سلفا كير .. نخنق الخرطوم بمنو والوليدات بتاعين حركه مرطبين ومنهم نافرين السلاطين تيب شعب بتاع جنوب ماسكو منو … وحده كيف بعد ما سياسة ناس باقان كرهة الشماليين فى الجنوبيين وانفصال كيف وكل ولايه مستعده للانفصال عن الدوله المنفصله او كما قال اسحق…
    يحلها الشربكه

  19. ياسين شمباتى كتب:

    ابو المنذر..سلام..
    والله حقيقة يحلها الشربكها !! لكن هو ذاااتو ما قادر يعرف طرف الخيط وين..
    لكن خبر تبديل عرمان وياقان دى جديد علينا..اكيد؟؟

  20. ابكرون كتب:

    hاخوي شمباتي
    باختصار
    لا يعين الله ولا يستجيب لدعاء ظالم او فاسد مش لو صلي في ميدان الخليفة حتي لو اعتكف طول عمره داخل الكعبة ….! فنم اخي قرير العين بس اتفرج في المنتفعين والمطبلين وما اجملها من فرجة…..!

  21. ياسين شمباتى كتب:

    الحبيب ابكرون..سلام..
    صدقت والله,,لكن جنى وجن التمسح بالدين..وورونى المطبلين النقعد فراجة..

    احبابى بالمنتدى..حكم العسكر ما بتشكر..وباسمك الاخضر يا اكتوبر الارض تغنى..جعلها الله ذكرى خير وبركة..

  22. ابكرون كتب:

    باسمك الأخضر يا أكتوبر نغني
    الحقول اشتعلت قمحاً ووعداً وتمني
    والكنوز انفتحت في باطن الأرض تنادي
    باسمك الشعب انتصر
    حائط السجن انكسر
    والقيود إنسرلت جدلة عرسٍ في الأيادي
    كان أكتوبر في أمتنا منذ الأزل
    كان خلف الصبر والأحزان يحيا
    صامداً منتظراً حتى إذا الصبح أطل
    أشعل التاريخ ناراً واشتعل
    كان أكتوبر في وقفتنا الأولى مع الملك النمر
    كان أسياف العشر
    ومع الماظ البطل
    وبجنب القرشي حين دعاه القرشي
    حتى انتصر
    وتسلحنا باكتوبر لن نرجع شبراً
    سندق الصخر حتى يخرج الصخر لنا ماء وخضرة
    وندق الأرض حتى تنبت الأرض لنا مجداً ووفره
    ————————-
    ما اجملها من ذكري وفرحة بانتصار شعب

  23. عزت كتب:

    سلام يا ياسين و سماره

    شكرا يا أبكرون بتذكيرنا بشهر أكتوبر الذي كان في ستينيات العصر الماضي و اكتوبر اليوم و الذي نشحد ربنا و نتمنى أن يحمل و لو جزءا يسيرا في طياته من عبق الماضي….

    كتب أحد الشباب:
    (للاسف ثورة اكتوبر صارت ذكرى منسية عند الشباب، لانه لم يكن هناك تواصل اجيال في وجدان الشعب السوداني لنقل تفاصيل الثورة الكاملة والعمل الذي تم فيها. وهذا ان دل على شئ انما يدل على عدم النقل الموضوعي للتاريخ والكتابة التوثيقية من قبل الجيل الذي عاصر ثورة اكتوبر، اللهم الا في أشعار محمد المكي في رائعته اكتوبر.
    إننا نحن جيل اليوم لم نشعر بأي تغيير على أرض الواقع أحدثته ثورة اكتوبر، ولكن هذا لا يقلل من شأن الثورة في حد ذاتها، فلو كانت هذه الثورة في اي مكان في العالم لظلت شعوبها تعيش فوائدها ومكتسباتها، لأنها ستكون ثورة في شتى المجالات. ولكن نحن اختزلناها في السياسة فقط، بالتالي بقيت ذكرى يتداولها بعض معاصريها.
    ولا بد لأكتوبر ان تكون ثورة للتطور وثورة على كل المفاهيم المتحجرة، وثورة في الفكر والصناعة والاقتصاد وكل مجالات الحياة)

    صدقت يا ابني…..

    أكتوبر الممهور بالدم
    صباح الخير
    اهلاً مساء النور
    زمنًا تجي وبتمر
    عبر النشيد المـُر
    تحت الغنا المحظور
    تنده تنادي الشعب
    الصامد المقهور
    هُب من ظلامك هُب
    الشمس جوه الجب
    والحكمة خلف السور
    ضمِّد جراح الحب
    والخاطر المكسور
    كنا بنسّنك سن
    في خندق الاصرار
    في خندق الاصرار
    يامـا
    ادخرنّا غناك
    ومسكنا فيهو النار
    بذلك التيار
    اكتوبر الممهور بالدم
    صباح الخير
    اهلاً مساء النور

  24. ودالخلا كتب:

    سلام ياقبيلة،،
    يقولون أن الثورات يخطط لها الأذكياء وينفذها الشجعان ويثبت أركانها الأغبياء ويسرقها الطفيليون المتسلقون الجبناء!!!!
    يقول الفنان المبدع عليه الرحمة عثمان في رائعته عن أكتوبر للشاعر حسين باذرعة أمد الله في أيامه بالخير:
    قلبي مع هذا الذي قدح الشرارة ثم لا قي مصرعه،،،،،،
    وتغني قبلها للأستقلال:
    ورسمت شذاها وطيب ثراها
    وذوب هواها جرى في دمى
    يعزز في السير من مقدم
    فارضي هنا بناء جدودي وأبى
    وتاريخ شعبي كريم أبى
    فيا اخوتى لنمضى
    إلى النور في ثورتي
    فهل سنمضي الي النور في ثورة ام سنظل ندور ههنا كثور الرحي ندور حوله لا نستطيع منه فكاكا!!!!
    وكيف تنظرون لسارقي الثروات ومقدرات الشعوب من الطائفية البغيضة واليسار المتفلت واليمين المتزمت، فنحن قادة الوسطية وعنوانها للعالم فهل سنكون كذلك أم سنعود كما قلنا كثور الرحي يدور حوله وهو يحمل الأحقاد الدفينة، فسيد القوم لا يحمل الحقدا,,,,,

  25. ياسين شمباتى كتب:

    ابكرون وعزت..سلام..
    الا ليت شعرى هل نصبحن يوما على مثلها ؟؟

    ود الخلا…سلام…
    غايتو جنس غايتو!! ما بسالك يا هناى..

  26. ودالخلا كتب:

    سلام ياقيبلة،،
    دوك شمباتي سلامات كتيرات وما سلام واحد بس يا بخيل،،،
    وشنو ده الغايتو جنس غايتو؟؟ وماعارفين بدايتو ولا نهايتو ده؟؟!!
    نسوي ليكم شنو نحن يا دكتور، قبول الآخر وأحترامه وأعتباره مقبول لبعضهم محرم علي الاخرين، ماأنتو حبايبنا وقرايبنا ليه بتخاصمونا، وخصامكم ما ديرينو يزيد ، ما انت عارف أنكم في الأول جرحتونا، وخصامكم لينا فات حدو، ونحن دايرنكم يالحلوين تلومونا وتعاتبونا وفي الآخر تسامحونا،،،،،
    ده شنو ده؟؟؟

  27. ياسين شمباتى كتب:

    ود الخلا..وعليكم السلام ورحمة الله..
    تااااااااانى عايتو جنس غايتو..انحنا جرحناك!؟؟؟ ابدا ما حصل,,ولو حصل ليك العتبى حتى تبرأ وترضى..والسماح حاصل,,بس انت ركز معانا شوية..

  28. ابكرون كتب:

    واجعني في البحر السكااااااااات
    واجعني يا استيلا ومطلع ……..
    الا ان الحزينة يا استيلا ليها يوم تفرح وتزغرد أيووووووووووووي
    ————————————————
    http://www.alrakoba.net/articles-action-show-id-2635.htm

  29. نيام كتب:

    د.شمباتي:
    واجعني في البحر السكات
    وواجعني في الوجع الوجع
    واجعني يوم ريدنا اللي فات
    ويوم يغيب قبل الهجع
    واجعني منك التفات
    لحظة نحاولك تستمع
    واجعني انك مستبد
    واوجع علي صبري النجع
    خليتني نائم في الثبات
    ومنك منام الليل فزع
    يا سلفا ياخ

  30. aflaiga كتب:

    كتب الكاتب اسحق احمد فضل الله اليوم عن احد اسرار الوحده وهو لا يدرى ولو درى لما كتب ما يناقض خط صحيفته الانفصالى :

    وقنافذ القطب الشمالي تتميز بكراهية لبعضها يجعل كل منها يعيش منفرداً .. لكن البرد.. يجعل كل اثنين من القنافذ يتقاربان طلباً للدفء

    – فان هما اقتربا كثيراً انغرس شوك كل منهما في جسد الآخر..

    – وان هما تباعدا قتلهما البرد
    —-
    وده يا التلب السر التالت برغم كل مؤشرات الانفصال .
    وبكره السر الرابع

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s