تناقض..تباغض…

Posted: الأربعاء,6 أكتوبر, 2010 by ياسين شمباتى in سياسية

فى حياتنا الكثير الكثير من المتناقضات التى تؤدى بالتالى لبغض بعض الاشياء او الاناسى,,لذا ساورد بعضا منها تاركا لمخيلتكم العنان فى استنباط وتحليل الكثير مما يحدث فى حياتنا..

*صرّح محافظ بنك السودان د.صابر محمدالحسن بان الانخفاض السريع لسعر الدولار فى مقابل الجنيه دلالة على عدم موضوعية ارتفاعه الحاد قبلا !! عليكم الله الزول دا ما بلعب لعب!! هو الدولار دا بيرتفع برااااهو ولا فى زول بقوم من نومو يقول (كدى النقوم على الدولار دا النرفعو) ولا كيف؟؟ عليك الله خليك على قدر المسئولية والمنصب لا سيما وانت رجل متخصص ودارس للشان الاقتصادى..بعدين كفاكم رفع لقوى الشعب والعملات وارفعوا المعاناة شوية عن كاهلنا..اها جنس التناقض دا هو الببغضنا فى الاقتصاد والسوق..

* وزارة الصحة الاتحادية تسيّر قافلة من 30 طبيب الى تشاد !! ما  ح اعلق,,لكن عليك الله يا كمال عبدالقادر استحى وخلى عندك دم..اها جنس التناقض دا البخلينا نبغضك ونبغض معاك الوزير وحتى الاطباء المشوا ديل ذاتهم..

* صرّح رئيس الجمهورية المشير البشير بانه فى حال الانفصال فان الجنوبيين لن يفقدوا ايا من حقوقهم فى حال بقائهم بالشمال..كويس جدا..لكن رئيس البرلمان احمد ابراهيم الطاهر صرّح بانو فى حال الانفصال فان الجنوبيين سيبقدون الكثير من حقوقهم بالشمال !! الله!! البلد دى الحاكمها منو!؟؟ البلد دى ما فيها بوليس ولا شنو!!؟؟

ياخ اتفقوا لا سيما وانتو الاتنين من حزب وااااااااحد ودافننو سوا..كع..اها جنس التناقض دا هو المبغضنا فى المؤتمر الوطنى وافرادو..

*قبل ايام رايت الصحفى حسين خوجلى  على شاشة التلفاز وكان لونه اسمر غامق او اسود فاتح!! ياربى خلى الوضوء ولا شنو!!؟؟ كع..

اها جنس التناقض فى الالوان والمواقف دا هو ذااااااتو الخلانا نبغض التحول الحزبى والانتماء المصلحى..

تخريمة: كتب الاستاذ القامة الفاتح جبرا يوما ما (لا تندهش,,فكل ما قد يصيبك بالدهشة كمواطن قد حدث..اها المندهش ليها شنو بعد دا !!؟)..واردفت وانا اغمغم..قد صدقت اذ ذكرت مر الحقائق..

ونلتقى…

Advertisements
تعليقات
  1. زووووووول كتب:

    شمباتى سلااام
    وزارة الصحة الاتحادية تسيّر قافلة من 30 طبيب الى تشاد !! ما ح اعلق..
    فى دى صدقتا تب يا شمباتى واحسن ما تعلق … بالله عليك هو نحن اكتفينا عشان نصدر لتشاد …….. لكن يا عمك اصلا دولتنا دى بتصدر النفط والذهب والاطباء ما اهو انتو صادر ومعاك دكاتره كتاااااااار كمان .. انت مستغرب فى شنو يعنى المشكله فى تشاد ولا فى التصدير كععععععععععععععع

  2. ياسين شمباتى كتب:

    الحبيب زووووووووووول..سلام..
    والله المشكلة فى التصدير..بعدين سمعت انو اى طبيب عمومى ادوهو 5 مليون مقدما !! وطبعا ديل ناسهم تب..ياخ ودوا قافلة لى الجاموسى ولا ودربيعة..قال تشاد قال…

  3. شمباتي سلام وشوق ومحبه
    ياخوي قضيه تشاد دي سياسيه ميه في الميه والجماعه لما مدو خط الضغط العالي الهسع من الابيض وقدام مش عشان كهربة ناس كردفان وللا دارفور عشان تصدر لتشاد ودا بيع سياسي بالواضح كدا يا خليل شوف ليك دوله جوار تانيه ارتكز منها
    اما يا خوي حكايه الدولار دي فحدث ولا حرج اها مش كان في تناقض قبل ايام -رفع اسعار الدقيق وبعض السلع لكبح جماح الدولار- اها صاحبنا نزل حينزلو وللا حيكونو قاعدين فوق كدي

  4. ياسين شمباتى كتب:

    الحبيب عبدوز..سلام…
    تشاد دى جننتهم جن وبعد بترجع تقوم عليهم تاااااااانى..
    اما عن الدقيق فزولك بتاع التموين قال انو زيادة سعر الدقيق ما حتأثر فى سعر الخبز! بالله؟؟
    لك الله ياوطنى الجريح..

  5. حاج أحمد السلاوى كتب:

    شمباتى .. هو التناقض دا بدا من الليلة ولا امبارح .؟
    التناقض بدا من زمااااااااااااااااااان ..بس الظاهر عشان إنت صدروك للقفيف والفوارة ما عرفته ..
    وخلونا النشوف آخرتا شنو ..!!!

  6. عباس ركس كتب:

    سلامات يا حبايب ( الله يرحم زهاء الطاهر ) ,
    شفت يا شمباتي الخبرات لما تتكلم – من زماااااااااااااان – , في اوائل الثمانيات درسونا مدرسين مصريين بينما المدرسين السودانيين يدرسوا في اليمن والسعودية واعارة كمان !!!!!!!!
    * قبل كدة الحكومة تبرعت بعربات اسعاف للسلطة الفلسطينية وناسنا يدفنوهم بي عقاب روحهم !!!!
    *احسن الظن يا شمباتي , ما دام قالو زيادة سعر الدقيق ما ح تأثر في سعر الخبز يبقى خلاص , يمكن الحكومة ح تدفع الفرق !!!!!!!!!!
    * صحح معلوماتك : الصحيح قولك ( رفع المعاناة على – وليس عن – كاهل المواطنين ) !!!!!!

  7. يا اخوانا ده ذاتو ما الجنن عبد القادر !!!!!

  8. ياسين شمباتى كتب:

    سلولو الحبيب…سلام..
    والله التصدير بتاعنا دا جا بى فايدة كبيرة,,حافظنا على الباقى من عقلنا..

    ركس الحبيب..سلام..
    والله صدقت اذ هى على وليس عن!!! وكمان تتذكر دغم اتحاد الطلاب لغزة!!؟؟ عليك الله دى بلد يترفع فيها علم مستقل حر؟؟؟ حسبى الله عليهم….

    الاخ عبدالحفيظ…سلام..
    مرحب بيك والدار دارك..وعبدالقادر دا ذااتو ما عرفنا الجننو شنو بس!!!

  9. قرن شطة كتب:

    الاخ شمباتى – سلام
    وزارة الصحة تسير قافلة الى تشاد بعددمن الاطباء ، وتفصل – مع ذلك – عدد منهم وتترك الآلف منهم يذهبون مهاجرين الى السعودية! بعد ان إنقطعت آمالهم فى اى إصلاح لاحوالهم واحوال المستشفيات..ربنا بس يسهل الامور..زى ماقل واحد : تناقضات ياست البنات

  10. ياسين شمباتى كتب:

    الحبيب قرنوف..سلام..
    هههههههه,,والله زولك بتاع ست البنات دا جاب التايهة..ياخ ديل ناس ما عندهم اخلاق ولا حياء,,واذا انعدم الحياء انقطع الرجاء..فى هذا الاسبوع فقط وصل الى المملكة ما يربو عن ال500 طبيب سودانى!! والساقية لسه مدورة..

  11. السلام عليكم ورحمة الله وبركاته
    تحية من شمال الوادى
    إلى الأخوة الأحبة فى جنوب الوادى
    بارك الله فيكم وأعزك
    أخوكم فى الله
    محمد الجرايحى / مصر

  12. عزت كتب:

    العزيز شمباتي و سماره سلام

    عارف يا شمباتي مرة تقابل وزيرين من الانقاذ في خارج البلاد في منشط و على هامش المنشط تقابل مرتبي اللقاء و بدردشوا مع الوزيرين…
    فعرفوا انو وزير العلوم و التكنولوجيا (جنرال عسكري متقاعد)
    و وزير الداخلية (بروفسير أستاذ جامعي)….
    فقالوا ليهم: انتو دحين مافي حاجة مقلوبة هنا…. بالانجليزي طبعن..!!

    زد على ذلك انا لحد هسة ما عرفت العلاقة ما بين الزراعة و الطب شنو…. اذ دائما ما يولون طبيبا وزيرا على الزراعة..؟؟
    و الا الهندسة و الأمن…!! مدير الأمن الحالي و السابق مهندسين…!!
    و الا الزراعة و الداخلية..!! وزير الداخلية الآن هو زراعي..!!
    و القائمة تطول نترك الميكرفون لي زول تاني يمرق لينا شويت متناقضات..!!

  13. ياسين شمباتى كتب:

    الاخ الجرايحى..
    وعليكم السلام ورحمة الله وبركاته.دايما ذاكرنا..ربنا بحفظ وحدة الاسلام والسودان..لك شكرى.

    عزت الحبيب..سلام..
    التناقض صار سمة ملازمة للبلد وحكوماتها,,لكن العجيب انو الاطباء كتار جدا لكنهم ما بتولوا وزارة الصحة الا لاشهر معدودة!! والله حكاية يا بلد..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s