القلم طاوعنى تانى قل ارجع للكتابه .

Posted: الإثنين,18 أكتوبر, 2010 by aflaiga in اخرى

الاحباب الاعزاء طبعا ملاحظين ( وطبعا ليه عادى ممكن ما تلاحظو ) انو اخوكم افليقا ليهو فتره بطل كتابه وشغال تعليقات بس ( طبعا فى ناس حيقولو عليك الله الذكرك شنو كنا مرتاحين !! )
وطبقا للعهد الذى قطعته على نفسى لابرينكم حتى تقولو كفى ( مافى زول يقول لى ما سمعنا بالعهد ده ) ابى القلم والكيبورد الا ان يعود للكتابه من جديد وسابدا اول هذه المواضيع ( يعنى هو فى تانى ؟ ) بمشاهدات عامه خلال الفتره السابقه :
وحده بالدكوه :
صديقى س احد ابناء الجنوب الحلوين ممن نشانا سويا مع بعضنا البعض قبل ان يكون السؤال الاول ( جنسك شنو ؟ ) مقررا فى منهجنا الاجتماعى السودانى – التقيته قبل فتره وداعبنى بالقول : اسى يا افليقا يعنى عاوزين تنفصلو وتصيعونا ؟؟ فسالته : اسى العاوز ينفصل منو يا س ؟؟ فاجابنى بابلغ اجابة سمعتها وهى : والله لا نحنا لا انتو عاوزين ننفصل بس ربنا يهدى البقى السبب ويجازى الكان السبب !!!!
البدفع الباقى منو :
صديقى سمسم التقيته قبل فتره واول ما قابلنى اتى بورقه وقلم وقال لى يا افليقا بالله كدى احسب لى دى : ايجار خمسمية – دكان ميتين – لبن ميه – لحمه تك – علاج تك – ترفيه تك – مواجبات تك – سلطه وفول يوميا 150 – مدارس ورياض وتراحيل سبعمية وخمسين – كدى لحدى هنا كم ؟؟؟ افليقا : كده يا سمسم حسابك مليون وستميه – لكن ما قلت لى ليه يعنى الحسبه دى ؟؟؟ سمسم : شوف يا افليقا يا اما اسرتى دى عائلا ما انا يا فى زول تانى قاعد يساهم معاى فى القصه دى لانو انا راتبى سبعمية وخمسين طيب القاعد يدفع الباقى منو ؟؟؟ افليقا : ربنا طبعا يا سمسم قول بسم الله ده ابليس ساى – طيب يعنى بالحساب ده ربنا يكون عاوز منى كم ؟؟؟ ودى حاديها ليهو متين يعنى انا مديهو صلاتو ولا صيامو ولا زكاتو لامن كمان اتدين لى قروش ؟؟ احمدك يا الله كاش ونعم …
طولنا ما تلاقينا :
حبيبنا البشاوى فى احدى قفلاتو المشهوره قال لى تعرف يا افليقا لمن نتلاقى كلنا كده فى مناسبه او رحله الواحد بيجى شايل مؤونة شهر كامل من السلام والمحبه والالفه – وعليك امان الله شفت المره دى طولنا ما اتلاقينا كيف عشان كده الواحد قافله معاهو .
عزيزى المدون شارك فى فك قفلة حبيبنا البشاوى وخلونا نتلاقى قريب وتكسبو فيهو فينا ثواب …

Advertisements
تعليقات
  1. مُخير كتب:

    أهل الدار والزوار
    حبيب الكُل أبو حمودي وعبودي وسروية
    سلام ومحبة وإحترام
    أتمنى أن أكون أول مُعلق كي أنصفك فأنت لك مكانة خاصة لدى الجميع وما سأدونه ربما يخطر على بال معظم قُدماء المدونة وكتابها الراتبين، تعرف يا فردة لكتاباتك نكهة خاصة فهي مشبعة بعفوية الشارع وبساطة ناس الحلة (بكسر الحاء) وتتضمن في نفس الوقت عمق في التحليل وموضوعية في الطرح وبالتالي لمن تنقطع أو تكتفي بالتعليق تستشعر الجماهير ذلك. فمرحباً بالعودة ولك كل الود والتقدير

  2. عزت كتب:

    مرحبا بالعائد للكتابة….
    أكتبوا تصّحوا

    أنا حأفك ليك القفلة….
    حأجدع ليك الخمسين…!!

    و الخمسين للمدونين لقاء بسيط ما بيكلف لا زمن لا قروش….

    خاصة الأيام دي فقد اعتدل جو المساء… تعالوا نشرب شاي و الا ناكل بووووش في شارع النيل و نتجاذب أطراف الحديث لمن نقطعوا….

    أهو تنال ثواب……………………………….. افليقا مفوض لتحديد التاريخ و الليلة قبال بكرة….
    تحياتي

  3. مشاكل كتب:

    سلامز
    أحباب في الله .. ربنا يديم الود و المحبة

    عدد آخر من حلقات .. جلسة ما منظور مثيلها

  4. ابكرون كتب:

    يا فلقة والله اشتقنالك واشتقنا لسروية وصاحبك سين
    ياااخ لا تنجع بعيد من دروب الكتابة

  5. aflaiga كتب:

    اها ايه رايكم عبدوش معاى الليله وبالمناسبه دى ايه رايكم الليله البوش عند قدوره الزمان سبعه مساء – المكان شارع النيل قبالة شارع وزارة الصحه .

  6. قرن شطة كتب:

    السيد / الاخ والصديق أفليقا ..سلام شديد فى شديد
    طبعا ياراجل ماتخلى الكتابة وهى اصلاً زى المرض المزمن أو الإدمان المستحب ، يعنى مافى طريقة ، وبعدين منو القال ليك انت بتبرى الخلق وكده؟ كتاباتك ليها نكهة زى ماقال اخونا مخير…بعدين ياافليقا صاحبى نحنا قصة القفلة دى واصلين فيها مراحل..وبقينا زى اعز اتنين حبابيب ، ومع ذلك نرجع ونستغفر الله ونبدأ من الصفر عشان الريده لازم تستمر ، ولا موكده..اما صاحبك البشاوى فقد طالت “قفلته” واخشى انو يكون قافل على “كرت ميت” وعليه سوف يظل شايل اوراقو لحدى النهاية وربنا يديهو آجر المناولة ، لانو نزول ليهو مافى!!! نحنا غايتو نزلنا وغالبا ما نبقبض بالباقى! ….لاتنجع ولاتنقطع ايها المبدع الظريف…دمت وابرينا وهو نحنا لاقين ….

  7. aflaiga كتب:

    المارين جميع حبابكم :
    والله غير كلامكم ده شيئ بيشجع على البرى مع سبق الاصرار والترصد مافى – زى الناس البيصومو اتنين وخميس وبيجيبو لينا رمضان قبال زمنو !!! غايتو انا بلغت اللهم فاشهد الناس ديل راضين ورايقين وما متضايقين اها فى كلام تانى ؟ ههههههه
    قرن شطه : البشاوى ده الله يعينو ساكت انا خايفو بعد ده كلو يكون لاعب ضمنه والناس كتشينه !!!
    الامير مخير : دوما تسبغ علينا ما لا نستحق فنجتهد لبلوغ ما لا نحلم فنتارجح بين ثرى حقيقة كرمكم لنا وثريا بلوغ ما تعشمتموه فينا ..
    ابكرون : بالله عليك الله فى زول بيقول لى شعبو ارجو الراجيكم ؟؟؟ دى وصية مودع ولا شنو ؟؟
    شباب عبدوش فى البلد والبوش فى النيل والسنقه فى الرنقه رايكم شنو فى العملية فى النملية ؟؟

  8. خالد مدني كتب:

    الحبيب افليقا والناس الحلوين … من بنات الجنوب شغالة مع اختي امس بتتكلم معاي جادة اني اكون كفيلها في النظام الجديد … قالت وبكل حرقة انها ما بتعرف زول في الدنيا غير اولادها – حاف – واختي وزوج اختي : تمشي الجنوب تسوي شنو ؟؟؟

  9. عزت كتب:

    و طيب دا ما تطور غير مسبوق يا خالد مدني أن يطور نظام الكفيل و نلبس (عمم) ما عقالات و نكفل رعايا جنوبستان خاصة و انتو كمان عندكم خبرة في المجال….

    قالوا واحد اكتوى من ناس العقالات في بلدهم مجننو وين الكفيل و ين الهوية و ياكلوا مستحقاتو

    بعد ما فنشوهو لقى ليهو واحد لابس عقال و ماشي في شارع النيل قام خلعوا ليك بصوت عالى

    وييييييييييييييييييييييين هويتك..؟؟

  10. عزت كتب:

    أفليقا السنقة في الرنقة تمام التمام و سجلني معاك في البوش … يوم الأربعاء معقول افتكر… و عذر ذاتو ناكل بوش لأنو مافي لحمة….

    أنا جادي و معاي البساط و كمان باسطة و كان دايرين صحانة (فاضية تملوها بطريقتكم) برضو ممكن …. يالا همتكم معانا….

  11. خالد مدني كتب:

    اعزائي … اختلف مع الحركة علي طول الخط – اقل بشوية من اختلافي مع الانقاذ – واكره حقيقة سلفا وباقان وعرمان وكاربينو واتيم قرنق واخرون .. احترم لوكا وابل الير ولام اكول وآخرين … لكن ده ما موضوعي .
    سعى اخوتنا اهل الجنوب سعيا حثيثا نحو الانفصال وصورت لهم الامارة بالسؤ انهم مستعمرون وان التاسع من يناير هو يوم الاستقلال فاتهبت مشاعرهم وصمت اذانهم فهم لا يسمعون … وفي اعتقادي انهم في دربهم سائرون رغم انف الافاليق … وده برضو ما موضوعي .
    خلف الاثنين الاسود جرحا داميا في الذاكرة الشمالية الحديثة التي لم تعرف مثل هذا العنف والهمجية ولم تر الموت عيانا بيانا كما رأوه ذلك اليوم … وتلته ايام من رد الفعل والعنف المضاد فتراكمت الجراح علي الجراح … وده برضو ما موضوعي .
    انما احكي عن شعب جنوبي السحنة سوداني الهوي عشق السودان بكل بساطة دون ان يدور في عقله سؤال عن الانتماء او الهوية … عشق وردي وود اللمين وصديق احمد ومحمود عبد العزيز … وشجع الهلال والمريخ حتي ادمي اكفه … اسلم وحسن اسلامه دون ان يجبره احد على ذلك … لم ير الجنوب ولا يعرف عنه اكثر مما نعرف انا وانت … فأين يذهبون ؟؟؟
    سمعنا من ثقات ان بعض من عاد الي الجنوب في الفترة الماضية استجابة للدعوات التي اغرتهم بالرجوع الي الجذور حيث الامن والامان والقوت والعمل قد واجهوا محكات هي اشبه ما تكون بمحاكم التفتيش الشهيرة في اندلس اسبانيا … وقد عانو حد الموت جراء تلك المحاكم التي نصبها لهم اخوانهم من اهل الجنوب … ولك الويل كل الويل ان كان شماليا هواكا .
    شئنا ام ابينا فان دماء شماليو الهوى هؤلاء في رقابنا … سقيناهم ثقافتنا السودانية فتشبعوا بها بنية طيبة … فقد كانت اغلي من لؤلؤة بضة هي اغنية جمعه مجاك المفضلة … فكيف لا اكون مسئولا عنه ان غناها وسط مجتمع الجنوب الحانق .
    لا زال الضمير العربي يرزح تحت وطأة احساسه بأنه قد خذل الشعب الاندلسي مسلمه علي مسيحيه حين غض الطرف عما عرف بمحاكم التفتيش … فأعدوا العدة ووطنوا انفسكم لمحاكم تفتيش جديدة .

  12. aflaiga كتب:

    خالد مدنى : برغم انف رغم انف افليقا لا فضفوك وانت قايل كوراكنا فوق كم ؟؟
    الحركه الشعبية اخى خالد تعتبر الجنوبى الذى حارب الشمال فى العمليات والمسيحى والدينكاوى هو درجه اولى ومن ثم من بقى فى الجنوب وذاق ويلات الحرب ومسيحى هو الدرجه التانيه ومن ثم من بقى فى الشمال ولم يتاثر او يتخابر مع الشمال ومسيحى هو الدرجه الثالثه ومن بقى فى الشمال ومسيحى واضطر للتخابر او التعامل مع الشمال هو الدرجه الرابعه ومن ثم من بقى فى الشمال ومسلم ومن لم يتعامل او يتخابر مع الشمال هو الدرجه الخامسه ومن ثم من بقى فى الشمال ومسلم ويحمل الثقافة الشماليه هو الدرجه السادسه ………
    اما الدرجه الاولى الممتازه فهم جنوبيو المهجر الذين يريدون وطنا لا يعرفون عن شدنه وضنكه اكثر مما يسمعون من الروايات . وهم الساعين للانفصال لانهم لم يجربو الحرب ولا ويلاتها ولا الاضطرار للتعامل مع الشمالى او التخابر معه . كفانا الله شرهم فهم من يعجلون بالانفصال .
    الجنوبيون اخوتنا واحبائنا مسلمين ومسيحيين بكل درجاتهم التى لا تعنينا فى شيئ ولا يعنينا منها سوى انه سودانى يحبنا ونحبه . رغم انف الانفصاليين من الشمال والجنوب .
    انفصاليو الشمال ديل كمان درجات حنجيهم بالتفصيل يوما ما .
    اخر لحظه هى اللحظه الاخيره قبل الاستفتاء ونحن فى انتظارها ففيها يقال ما لايقال ويفعل ما لا يتوقعه الغافلون .

  13. aflaiga كتب:

    صديقى سمسم التقيته بعد ايام من اللقاء الذى طلع فيهو مديون لى الله لمن معسر عن السداد – افليقا : اها يا سمسم كيف الامور ماشه ؟؟
    سمسم : والله يا افليقا الواحد نضف حساباتو البيقدر عليها مع الله صلاة وصيام وذكاه وعبادات وحسن معامله قلنا نعمل البنقدر عليهو ونخلى الباقى على الله عشان ننقص ديوننا شوية !!!
    افليقا : برضو تخلى الباقى على الله ؟؟؟
    سمسم : يا افليقا انت مالك عاوز تضايقنا فى كرم ربنا انت مش قلت اكرم من الله مافى ؟؟ خلاص خلينا نتدلع على ربنا هو نحنا عندنا غيرو ؟؟جل وعلا سبحانه مالك الملك يرزق من يشاء وهو الغنى عنا ونحنا المحتاجون اليه . اللهم انا نعوذ بك من غلة الدين وقهر الرجال وذل المال يا الله استغفر الله الذى لا اله الا هو الحى القيوم واتوب اليه لا اله الا انت سبحانك انى كنت من الظالمين –
    افليقا : شايفك بقيت حافظ ايات فك الضيق –
    سمسم : مش اخير من احفظ امتحان التوفل ولا اللوترى !!
    —-

  14. عزت كتب:

    كتبت صحيفة (الانغفالة)

    ( تضاربت الأنباء حول احتلال قوات من الجيش الشعبي لمنطقة (سماحة) الحدودية التابعة لبحر العرب بولاية جنوب دارفور وذلك بقيادة أحد الضباط السابقين بالجيش الأمريكي والذي يعمل حالياً بشركة بلاك ووتر، وقالت مصادر (الإنتباهة) إن القوة المكونة من الجيش الشعبي ترافقها قوة أخرى من شرطة جنوب السودان تقودها ضابطة بالشرطة الأمريكية في نيويورك والتي دخلت السودان ضمن قوات (اليونميس) وتهدف من وجودها هناك إلى منع دخول السلاح القادم من دولة إفريقية لإمداد قوات تمرد الجنوب (جورج أطور وقلواك قاي).

    وفي السياق ذاته أكد ممثل الإدارة الأهلية بمحلية بحر العرب بولاية جنوب دارفور العمدة عامر محمد عامر لـ(الإنتباهة) أن الجيش الشعبي يوجد الآن بملتقى (سماحة) منذ فترة طويلة باعتبار أنها منطقة حدودية مختلف فيها ولم يتم ترسيمها بعد.)

    بقى فيها (قائدات) كمان بختكم..!!!

  15. نيام كتب:

    افليقا:
    يعني ما عارف الله كريم…كلنا في الهم شرق … انت قايل نحنا عايشين علي ميري الحيكومة حرم كان علي الميري كان زمان قطرنا صفر…بعدين ياخي ما تكون متحسس من حال اخوك البشاوي دا باع عيدانو زمان وبقا عودوا عود ….طبعا عارف انها ما عيدان واطاتو…

  16. aflaiga كتب:

    نيام : والله انا عارف الله كريم وكلنا عارفين لكن تقول شنو دلع على ربنا وكمان بنغمطو حقو فينا شفت البنى ادم ده كعب كيف وبعد ده الله كريم ياخ ده كرم تنوء الجبال بحمله . اسى لو ادوك كل الامكانات وقالو ليك حل مشكلة نفرين بتقدر ؟؟ يا زول ده شغل بتاع ربنا بس انت بتلعب ولا شنو ؟؟
    بالنسبه للحسبه بتاعة البيشاوى فالزول ده اعذروهو قايل الناس نسوهو انا وريتو الحل بس هو شافا شينه مع انو غير الشينه شيتا بحل مافى !!
    عليك امان الله البروف ده لو فتح محل برمجة جهاز الدهب يلقى اكتر من ناس الدهب ذاتو وانا جاهز اشتغل ليهو الهارد وير ( تركيب الطبق وتوجيهه ) وهو عليهو السوفت وير ( برمجة الاجهزة ) ونخلى ليك الهيومان وير ( ارشاد المنقبين عن كيفية الاستخدام ) ايه رايك فى الشغل ده ؟؟؟

  17. aflaiga كتب:

    عوده لموضوع الوحده والانفصال :
    السر الرابع للوحده :
    السر موجود فى الشمال الاقصى فى دوله مجاورة تسمى مصر لن اطيل فقط اقراوا هذين الخبرين :

    طالب وزير الدفاع بعد لقائه الرئيس المصرى بتاجيل الاستفتاء حتى يمكن حل كل القضايا العالقه .
    —–
    طالب السيد محمد عثمان الميرغنى بان تكون الوحده هى الاساس وانه فى اتفاقه مع قرنق اتفقا على الوحده فماذا تغير واستجد حتى يكون الانفصال هو الخيار المرجح ؟؟
    —-
    بعد بكره السر الخامس ……. متابع يا التلب ولا ما معانا ؟؟

  18. خالد مدني كتب:

    علي طريقة سهيل : يا افليقا ارحم نفسك .

  19. aflaiga كتب:

    خالد : ارحم نفسى بالوحده ولا اعمل نايم لحدى ما تنفصلو ؟؟؟
    انت ما كنت كويس مالك ؟؟

  20. DAKEEN كتب:

    سلامات يا شباب ومرحب بالبراية الميتة لانه القلم البتري فيه دا منتهي من زمان وانت لافي في الهواء .
    واحد من الاسرار : قال منو كدي قدم من مصر قدم طعن في اتفاقية السلام كوووووووووولها للمحكمة الدستورية وقبل الطعن .
    يعني كان انزنقنا في الانفصال في مراقة المحكمة ،،، ننقض الاتفاقية ونبدأ تاني من الاول هي لله هي لله ، لا للسلطة ولا للجاه.
    سلطة شنو ياخ : هو كيلو الطماطم بقى بي كم عشان تجيب ليها سلطة.
    اما السلطة زاتها بقت انواع : سلطة شامي : سلطة ر وسي : سلطة امريكي ،، وسلطة روب ودي نبقى عليها عشرة بدل من نقول الروب نقول سلطة الروووووووووووووووووب .

  21. خالد مدني كتب:

    يا افليقا انا لسه كويس ووالله والله انا ضد الانفصال لمعايير عاطفية وانسانية بحته … لكن اهلك ديك ابونا تب … ولو كان بإيدنا حاجة قول لينا وما بنقصر … لكن بي عشمك في الوحدة ده بقول ليك تاني الرحمة حلوه .

  22. aflaiga كتب:

    التلب ثرو كل اهل الشمال : اها اسحق فضل الله بتاع الانتباهه ذااااااااااتو قال الليله :
    يا للاسف..!!
    – يا للفرح..!!
    – الحقائق البادرة الآن على الارض هي
    (لا استفتاء.. وان وقع الاستفتاء ظاهراً.. ولا انفصال.. وان وقع الانفصال ظاهراً)

    —-
    اها نديكم السر الخامس :
    ينظر اهل الشمال فيجدون ان الانفصال يعنى ويعنى ويعنى وينظر اهل الجنوب فيجدون ان الانفصال يعنى ويعنى وينظر اهل الجوار فيجدون ان الانفصال يعنى ويعنى ويعنى فيلهثون يبحثون عن رصيد الوحده ويجدونه صفرا كبيرا فيسرع كل منهم فى تغذية الرصيد – يا جماعه البلد دى الله عاوزا واحده لانو الله العالم اكثر منا جميعا يعلم معنى الوحده والانفصال ..
    ومن ينظرون الى الانفصال فيهرولون الى الوحده من بينهم مصر والتى تصرح بالفم المليان بانها تدعم وحدة السودان وحين تصرح مصر يسرع الميرغنى للتاكيد فهى مصر المؤمنه باهل الله وهو من اهل الله – ويسرع الصادق ليقول شيئا اقرب للوحده يستره مع الغرب ومع مصر ومع شعب الامه الذى ما عرف غير الوحده وهو من حماها – وينظر المصريون الى الانفصال فيجدون دولة اول ما ستطالب به هو نصيبها من مياه النيل واااه من مياه النيل – حتى اهل الانتباهه ينظرون فيجدون ان الانفصال ان هو وقع جر عليهم حروبا اخرى فى دارفور التى ستنفصل اذا ما انفصل الجنوب فيلتفت اهل المنبر فلا يجدون من اهل القبلة التى يدافعون عنها اقليما لم ينفصل او لا يسعى لتقرير المصير – وينظر اهل الجوار الافريقى فيجدون ان الانفصال لا يهديهم دوله هشة ينهشون فى لحمها انما يهديهم اقليما لا يستعطيعون فيه وقف اطلاق النار وربما خرج عليهم تنظيم القاعده فى ارض الدينكا فيستهدف الوجود الاجنبى وجيوش اخرى للرب رب المسلمين ورب المسيحيين الذى هو واحد ولو اختلفت التسميات !!
    عرفتو السر الخامس كده ووب وكده ووبين وهل من عاقل سيتبدل الووب بووبين ؟؟؟

  23. aflaiga كتب:

    سهيل ثرو الانفصالجية والقانطين من الوحده :
    السر السادس الله وين ؟؟؟
    الله الذى نعرف لن يترك اهل الشمال للوطنى وحده بعد الانفصال .
    ولن يترك اهل الجنوب للحركة وحدها بعد الانفصال .
    فاقل ما يفعل الله الذى هو خير الفاعلين ان يقول للوحده كونى فتكون ثم يستبدل الاقوام باقوام يرحمون ثم لا يكونو مثلنا .
    ويما ما سنحدث عن السر الثامن … وهو اين نحن ؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s