عشانكم نتقشف ونسف الترااااب كمان……!

Posted: الإثنين,18 أكتوبر, 2010 by ابكرون in إجتماعية

القارئ لتصريح السيد الوزير المسئول عن معيشة الشعب الفضل وعن أكله وشرابه قد يدعو البعض لان (يفغر فاه بلهاً)….تريثوا ولا تستغرشوا (استغراب + اندهاش) فسيادته يتحدث عن الفترة التي ستلي الاستفتاء وطلبه الصريح من امة محمد السودانية التقشف والعودة للكسرة…..لا يدعو للاستغراب والاندهاش فسيادته وقومه يظنون ان الشعب السوداني (الحترب) الذي تبقي يتناولون شاي الصباح بالحليب والجاتوه (من سيدي بيه شنو من باريس مباشرة) ويفطروا الساعة  9  بالمارتديلا والجبن البوك والشيدر وشوية بسطرمة بالبيض وكباية عصير توت (ما عنخ آمون) …والغداء في مواعيد زمان الساعة 2 بطاجن اللحمة الضان (شنو يعني الكيلو 25 جنيه) وبعض الأسماك والطيور المشوية وشوية 3 أنواع من السلاطة وقليل من التحلية المشكلة طبقااات ….ويقوموا كده يتعشوا بالمشاااوي وسلطة الفواكه المن 6 أنواع ما فيها البرتقال والموز….! ويحمدوا الله علي نعمه ويكيلوا الثناء علي الحكومة التي وفرت لهم (رغد) العيش زى ما وعدوا به في البيان الأول قبل 21 سنه…

اسه يا ناس بعد النعيم ده كله  يا من( تبقيتم) البلد في ضايقه (ورفلتم في النعيم ) سنين عددا بالله خلاص اربطوا الأحزمة عل البطون (اقصد علي عامود السلسلة الفقرية الذي تبقي) وعودوا للكسرة وملاح (أم تقشوا) والمفاريك ولا مانع من طماطم (شنو يعني الكيلو بتاعها يصل 15 جنيه ؟) بالكسرة والموية والدكوه …بعدين تعالوا هنا مافي داعي تقضوا إجازاتكم في شواطئ هونولولو والبحر الأسود وماليزيا ….. الشكينيبة وأم جضوما غلاد مالا ؟ تقشفوا واستحملوا كمااان تاني 20 سنه ….كل زوله  ترجع          ( للدوكي الليلتا) خلاااص نسيتن العواسي وتعلمتن علي الطحين البقسماط والفينو  شي سيقا وشي ويتا وايشي تيقا………!

بعدين أفرحكم وأبشركم  ما تهموا تصريح الوزير ده ما قاصدكم بيه (لأنه عارفكم ما بتقدروا علي الكسرة ولا قفة الملاح بتاعها) قاااصد بيه ناسه وجماعته لان الكسرة بالملاح عندهم تقشف حتى أولادهم دون ال25 سنه ما بعرفوها ولمن يشوفوها في الشارع عند ستات الكسرة( بفتكروها نوع من الورق الردئ الصنع) وخلوها سنين عددا  حتي في حالات الوحم (نهي كرتا)…حسبنا الله ونعم الوكيل ……….

Advertisements
تعليقات
  1. aflaiga كتب:

    ابكرون : ليس لدى تعليق سوى الوصله ادناه التى تصف اخر خطاب للنميرى :
    ومقدم التقرير لخص القصه فى فى الجزء الاخير من التقرير :
    اى شعب يعيش بين الامل والرجاء ونميرى قتلهما وها هو الوزير البرلوم يقتلهما ايضا ونرجو الا يكون مصيره كمصير نميرى مع انى اشك فى ذلك .

  2. قرن شطة كتب:

    الاخ / ابكرون – سلام
    والله انواع “العضة” الذكرت اعلاها انا قايلها بتكون فى “الجنة” وفى الجنة عذابى!!! انت يازول الكلام جبتوا من وين؟ اللهم ثبتنا على كرعينا وكل يوم فتح عينينا …واقول حاجة لو فى زول فطر واتغدا واتعشا بالطريقة سالفة الذكر هنا فى بلاد المليون ميل بموت او يغشى عليه لانو الدم ضعيف ومابستحمل حاجات ذى دى ! بعدين الكسرة ذاتها إتضح انها بقت اغلى من الرغيف! يعنى تكاليف وكده…غايتو الله فى …..تحياتى

  3. aflaiga كتب:

    ابكرون : والله كنت عاوز اكتفى بالوصله بس لكن — اااه من لكن :
    يقول مقدم التقرير ان السياسة هى فن تهدئة المخاوف وزرع الامل وبرغم انها اضعف انواع السياسة التى هى ( الامن من خوف والاطعام من جوع والعدل فى الحكم ) الا ان قومنا هنا يعتقدون وبعض الاعتقاد اثم ان طريقة ادارتهم لامر شعبنا لهى تكليف ربانى لهم اجر الاجتهاد وثواب الطحة فى كل ممارساتهم بما ان راى غيرهم خطا يحتمل الصواب ورايهم صواب لا يحتمل الخطا !!!!
    الخطاب حقيقة مؤسف جدا لرجل تسلم اعباء الوزارة لفترة بسيطه مما يعنى انه :
    اما انه استلمها خربانه ام بنايا هش !!!!
    او انه فشل فى ادارتها فشلا ذريعا !!!!
    وفى الحالتين هو ضائع فما كان له ان يستلم جنازة بحر ان كانت كذلك وما كان له ان يتوانى عن اجراء اصلاحات تمنع من هذا التصريح .
    عزيزى ابكرون انت عارف الكسره بالف جنيه قديم قدر كيف ؟؟ يعنى ممكن اشتريها لسمسمه لو غمت عليها نفسها ( بالمناسبه صديقى س صحتو المره نص الليل وكانت بتتوحم قالت ليهو عاوزه كبدة جمل اسى دى !! قال ليها مافى مشكلة اجيب ليك معاها قزازة ومزه ؟؟؟ ههههههه ) .
    اقول للوزير بكل صراحه :
    نحن مستعدون لربط البطون التى لم يتبقى فى حنانها مكان للربط واصبحت كجسد خالد بن الوليد رضى الله عنه ليس فيها موضع الا فيه جرح من سياسة اقتصادية – نحن مستعدون لاى تقشف فى حال رايناك تركب المواصلات ويركب ابناءك البصات وتقف معنا فى هجير الشمس تنتظر رغيفات تسد بها رمقك .. اما دون ذلك فاربط انت جشع قومك او فك الدفه وادها غيرك ….

  4. عزت كتب:

    سلام يا أ حباب

    طبعا مع تفشي الوسائط الالكترونية من موبايلات و مسجات و كدا صارت زوجتي ترسل رسالة لاحضار سلطة و الا حبوب مغص و الا حاجات من دي…
    عارف اليوم الترسل (كسرة) و الا Kisra أقوم طوالي (أتبن) يعني أتحسس جيبي لأنو بصراحة كسرة الألف ما بتأكل (سروية) زي ما قال أفلي….!! يقوم سيادتو يدخلنا في (ماري انطوانيتات) و كدا… كان أحسن يقول أكلو باسطة من الفيلم الهندي بتاعهم دا

    ياخ مفروض الجماعة ديل يقولوا الروب و يحلو عن سمانا

  5. ابكرون كتب:

    شكرا افليقا وقرن شطة وعزت علي المرور
    افليقا ما اشبه الليلة بالبارحة الوزير بقول نتقشف يطبقها اول علي نفسه وحزبه واعضاء مجلس وزراءه وبقية الجيش من التنفيذيين والمنتفعين ……بعدين هو الشعب ده يقطع من نفسو عشان شنو وليه لقي شنو ؟ ياخ عالم دمها باااارد بشكل ….! كلام نميري جبته في محلو تشكر يا باشا
    قرن ما ذكر اعلاه ده قليل حدا من كثير لمعيشة قوم بيننا ناهيك عن افراحهم ومناسباتهم ….قال نتقشف وكسره زي ما قال عزت هي الكسرة الناس ما قادره عليها ….واجمل لفظ كلمة(العوده للكسرة) …ههههههههههههههه ناس في كوكب والدهماء المساكين في كوكب آخر…….

  6. ابوآية كتب:

    غايتو يا الوزير دقس يا دقس وفي الحقيقه اصلو داقس احتمال عايز يدقسنا

  7. مشاكل كتب:

    سلامز و سلامز مربع لكل الشعب الأمازوني البطل … ولا سلامز لحكومة الشعب الامازوني الفضل

    أما قبل .. سمع الجميع تصريح ( الخادم ) وزير المالية و الذي يطالب فيه الشعب الأمازوني بالتقشف بعد إجراء الإستفتاء

    أما بعد .. سمعنا و عصينا

    أما قبل .. سمع الجميع تصريح ( الخادم ) مستشار الرئيس يطالب الشعب الأمازوني و الشباب بالتجهيز للقتال

    أما بعد .. إذهب أنت و أبنائك فقاتلوا إن هاهنا قاعدون

    قال تقشف قال .. الزول دا قايل الناس واقعة من لوري شطه ولا جايه من مصر ساكه كيس .. داير يفقع مرارة الناس مالو ما كفاية على الشعب انو حكايتو بقت : مسجنون مجنون مهموم بالهم مسكون منحوس معفوص جواو محبوس و يكوس و يكوس و يكوس

    و بعد دا ما كفاية .. زيدو الطين بله يا شباب الحلة

    الشعب يتقشف .. و البلد فيها عدد غير محصور من المساعدين و المستشارين للرئيس و كم و سبعين و فوق ال800 نائب برلماني و حكومات الولايات المترهلة بي وزراء و مساعدين و مستشارين

    كل واحد من الفوق ديل عندو مرتب يكفي خمس و عشرين أسرة .. ثلاث عربات على الحكومة شاملة بنزين و صيانة و تأمين .. تذاكر سفر مجانية .. بدلات و حوافز .. الكهرباء و الموية و الموبايلات مجانية .. أكل الشهر مجاني من مواد تموينية و خلافه

    ياخي خاف الله الخلقك .. خليك من البشير الجابك وزير

    هي خيانة الامانة دي كيفن يعني ؟؟؟

    الشعب يتقشف .. و السيد الوزير في مكتبو ضارب الراحة و جضومو بتلمع من أثر الكنداشة طويلة المدى

    الشعب يتقشف .. و أحد الولاة كان اول بند صرف صرفه هو شراء عربة فارهة من ميزانية حكومة الولاية بملبغ يزيد عن 200 مليون أمازوني

    الشعب يتقشف .. و ابن أحد الوزراء يقبض من قبل جمارك أحدى المدن و معه مبلغ 5 مليون دولار كااااش

    الشعب يتقشف .. و حكومة أمازونيا تهدي المنتخب المصري سيارة لكل لاعب في المنتخب لفوزهم ببطولة أفريقيا للأمم

    الشعب يتقشف .. و حكومة أمازونيا تفتح خط مساعدات لمنكوبي السيول و الأمطار في باكستان

    الشعب يتقشف .. و أبناء المسؤلين يلعبون الجولف في ملعب الجولف بالضاحية الجنوبية لعاصمة امازونيا

    الشعب يتقشف .. و جامعات ماليزيا و بريطانيا تزدحم بأنباء المسؤلين الأمازونيين

    الشعب يتقشف .. و ابن أحد المسؤلين يٌعَين في أحدى المصالح الحكومية الكبيرة ك ( دفعة ) لوحده من غير انتظار لفتح باب التقديمات

    أما صاحبنا بتاع الجهاد داك … ما محتاج الزول يتعب كيبوردو

    لمن نشوفك انت و اولادك ( رامين قدام ) نجي و نقول ليكم : إذهب أنت و أبنائك فقاتلوا إن هاهنا قاعدون

    بعدين لو الأسر الامازونية أكلت كسرة جيبوها ح ( تتقد ) اكتر من ماهي مقدودة .. لأنو بكل بساطة الكسرة أغلى من الرغيف و بتأَكِل عدد أقل من الناس

    الوزير دا شكلو طول من الكسرة و القراصة.. حتى قام ليه ( جناحين ) من الفراخ الكتير

    ممكن نخلي مصيرو نفس مصير ماري انطوانيت ؟؟

  8. عزت كتب:

    مشاكل شوف دي كمان

    الشعب يتقشف و الوزير يضحك

    الوزير

  9. مُخير كتب:

    الحلوين سلام
    العزيز أبكرون السؤال ثم ماذا بعد ؟؟؟؟؟
    حضرت بالصدفة اللقاء الذي أجراه أحد مذيعي قناة النيل الأزرق لا أعرف أسمه لكنه يقلد أحمد منصور بتاع قناة الجزيرة الذي يقدم برنامجي “بلاحدود” و”شاهد على العصر” لكن بطريقة لا تخلو من فجاجة وأحياناً سذاجة، عمومن الشاهد في الموضوع أنه كان يسأل د. لام أكول عن لقائه مع رئيس حكومة الجنوب، والرجل معروف بأنه داهية وسياسي متمرس فلم يخرج منه بحق أو باطل، وعرض عليه العديد من الرؤى المطروحة في الصحف السودانية والتي أكتفى بوصفها بتخرصات تنم عن جهل أو سوء نية وأن اللقاء الذي مجعه مع سلفاكير وبونا ملوال كان في سياق الحوار الجنوبي الجنوبي. خلاصة القول أن الجماعة طمبجوها وما هاين عليهم يعترفوا بإخفاقهم، وقادة المعارضة ما فتأوا يستجدوا عقد مؤتمر جامع، والجنوبيون أشطر من أن يعطوا خط حياة إن صحت ترجمة “لايف لاين” للمؤتمر الوطني الذي تكشفت حقيقته أخيراً للسودان الأعظم ممن توسموا في قادته الخير، ولعل فيما تفضل به العزيز “مشاكل” أصدق برهان، فأكثرنا يذكر ما كان يكتبه خلال الإنتخابات الأخيرة التي كان من الممكن أن تُصحح أوضاع البلاد لولا خيابة وغباء المعارضة التي إنسحبت وتركت البلاد رهينة لتخبطات الحزب الحاكم، والله وحده العالم ماذا سيكون مصير البلاد في يناير، ولا نملك إلا أن نرفع أكف الضراعة إلى خالقنا أرحم الراحمين أن يهدي الحكام في إتخاذ القرار الصائب بالتنحي وأن يلطف بأهلنا المفهورين ويأخذ بأيديهم إلى بر النجاة ويجنب بلادنا شرور الحرب والتشرذم والإنقسام هو ولي كل شيء وقادر عليه.

  10. الفعج كتب:

    يا اخوانا دا ابو الجاز ولا انا غلطانكان ابو الجاز عندنا قريباً لينا قال يوم الخميس الفات كان في اجتماع تنويري حضروا اكتر مت الفين زول في نهايت الاجتماع وزعوا ليهم صناديق العشاء اها لمن حكى لي المكونات في عرسي ما عملتها برضو نتقشف

  11. ابكرون كتب:

    الاخ مخير
    الاجابة في بوست امس بتاع (هاك الحاجة دي) كاتبو واحد في الراكوبه تحت واجعني في البحر السكااااات…. قلته لي (يتنحوا) هههههههههههههههه
    ملخص مشاكل شامل كل البلاوي والتناقضات العجيبة …. فعلا التقشف ليس في الاكل بس التقشف سلوك شامل اشياء كتيره ابسطها المعيشة( الاكل)……وين تعليم الاولاد وين السيارات ال3 في المنزل وكل شبل بسيارته وين الاجازات علي حساب محمد احمد في اقصي بقاع الارض وين العلاج المجاني للمسئول واسرته خارج السودان البذخ الاجتماعي المقرف وين ووووووين……
    الاختشوا ماتوا

  12. aflaiga كتب:

    مشاكل : الزول لمن يقوم ليهو جناحين كان من الفراخ ولا غيرو بعد داك مش بيطير – انشاء الله …

  13. نيام كتب:

    ابكرون:
    يقال ان ماري انطوانيت والتي وصفها المؤرخ بانها كانت تملك 300 زوج من الاحذية only عندما وقفت علي البلكونة لتتفرج علي المتظاهرين صاحت من الفزع لماذا يصيح هؤلاء..فاجابوها بانهم جوعي فاجابت في غباء معتوه why not cake فيبدو ان وزيرنا الهمام (هواي نوت كسرة) و هو لعدم حنكته و ضعف خبرته فات عليه ان الكسرة اليوم مع ابسط متطلباتها يعني نقول ملاح ام تكشو او بني ضوره ملخوخة في موية تساوي الشئ الفلاني …ياخ قول كسرة بدون لخوخة بس بموية الحنفية و حبة ملح بفوق الحيطة …تعالو نشوفها كيلتها ب 20 جنيه حب و دقيقها الفين و اقودها لمان الكيلة تكمل قول عشرة قول العجين الخمير شحدناه من ناس بت تبلي مع انو حتشيل حالنا و تكلم الفريق كووولو انها خمرت لينا عجينا…تعال يلا نشوف العواسة صاجها بي كم يا العشا و يعوسوها وين في الكرنك و لا في الزقاق ما الوليدات قاعدين يذاكروا في الراكوبة …اما المروحة الواحدة في المضيفة خالينها للضيفان اها حبة الكهرباء نديها الوليدات يذاكرو بيها و لا نمسكها للضيوف …وبعدين قبل ما انسا هسع جسمنا دا اخد علي بروميد البوتاسيوم اها دا يكبو في الكسرة دي كيف؟؟؟؟ في العجين و لا في الخمارة…

  14. aflaiga كتب:

    نيام : مارى انطوانيت حكمت شعبا يعرف معنى الديمقراطية والثوره منذ خشونة اظافر جلاديه الاوائل بينما نسينا نحن معنى الاسمو شنو دااااااا !! ديمقراطيااااا والتانيه اسما شنووووو ؟ ايوااا ثورااااا – فاصبح بامكان الحاكم فى السودان ان يعلن لشعبه فى الصباح انه استغنى عن خدماتهم وممكن يشوفو ليهم بلد تانى مؤقتا لحدى ما يفكر ليهم فى طريقه جديده للحكم – تعرف وقتها الشعب حيقول شنو ؟؟؟ لكن يا ريس اسى نحنا بالليل ده نمشى وين برانا كده خليها تصبح وقول بسم الله يمكن يكون ده ابليس ساى ااى عليك الله يا ريس اخزى الشيطان – يقوم الريس يستدرك ويقول لينا : مرجوعين فى مسماكم لكن تانى اوعو تكرروها ويقوم من الزعل يحرمنا من حق المبيت !!! ونحنا شعب ما شاء الله جننا مبيت لو غاب عننا طاغيه يوم واحد تلقانا بنتوحوح !!!

  15. aflaiga كتب:

    نيمو كير : بالنسبه للحسبه بتاعة البروميد يعنى فرقت ما يكبوه لينا فى اى حته بيصل بيصل ونحنا شعب ما شاء الله لقيييييييييييييييييييييط بيلقطا طايره . عليك الله دى حالة دى قال كسره قال !! والله امبارح مشيت افتش كسره قلت نجرب كلام الوزير يمكن يكون فى فوائد ما منظوره واهل الدين ديل اعلم منا بفائدة العباد والبلاد – عليك امان الله الجنيهين بتاعات العيش اللات الغدا كملتهن ساى لا حاق ضواقه ولا حاق شبع لمن حمودى قال لى بابا اوع تانى تتصرف تصرف زى ده والله نحجر عليك ونمسك المصاريف لماما ده اسمو تبديد اموال الشعوب جريا وراء توجيه لعوب !!! شفت المحن دى يا نيمو ياخوى خلو حمودى يهبل بينا . الغريبه عبودى متكيف من الكسره جدا جدا ليه ما عارف ؟؟ يكون الود بقى مؤتمر وطنى بى ورانا ؟؟

  16. ابكرون كتب:

    يا أفليقا لا بروميد لا سيانيد ما قلته ليكم الوزير ما قاصد الشعب الحترب قاصد ناسو ينزلوا لمستوي الكسرة…….سمعنا انه في تاجر سمين حيستورد ( صاجات) تعمل بالكهرباء للمدن واخري بالطاقة الشمسية للاقاليم لزوم عواسة الكسري فابشرن يا اخوات كُسيرة السعد جاكن…..
    نيام : ما تقلق الرغيف ده شرف باذخ…..ثم ان البروميد الفي جسمك ده ما بطلع الا تعمل بوصية السيد الوزير……

  17. حاج أحمد السلاوى كتب:

    العزيز ابكرونا .ز
    إنت متاكد إنو القال الكلام دا.. الإنقاذ وزير سودانى ..وفى حكومة الإنغاز .. عفواً اقصد الإنقاذ ؟يمكن تكونوا سمعتوها غلط ..

  18. ياسين شمباتى كتب:

    الحبيب ابكرون..سلام..
    احدى خالاتنا عندما اتت الى البندر وضاقت نعيمى فى مطلع الخمسينات رفضت العودة للبلد وقالت فى اغنية شهيرة ( قولوا لامى مانى جاية..كنا نشرب لبن السعاية..بقينا نشرب لبن الشراية..المى فى الماسورة جارية..طبيخنا فى الحلة ام غتاية)!!! لكن وزيرنا دا كان ما رجعها يكون ما راجل !! هيع..

    عليكم الله خلونى باقى اليومين ديل مكوفر ومعفرت..

  19. طارق أب أحمد كتب:

    ما لدين قد عملنا * نحن للدنيا فداء

    فاليدم للغش مجد او ترق منا الدماء
    او ترق منهم دماء

    16 مليار حجم الأختلاسات على المال العام لهذا العام و القائمه تشمل دستوريين
    و لا تستثنى احدا
    المراجع طلب تدخل رثيس الكمووهوريه لتمكينه من دخول بعض المحلات

    تقرير المراجع العام صحف اليوم

  20. ابكرون كتب:

    اب احمد 16 مليار ….! ههههههههههه دي قمة جبل الجليد الظاهرة فوق سطح الماء بارتفاع متر ما خفي من الجبل عظيم وآلاف المتار لتحت…..في حتات رئيس الكرة الارضية ذاتوا ما بقدر يراجعا ولا يعتبا….

  21. نيام كتب:

    تعرفو قصة الشركة او المؤسسة او الجهة ترفض مراجعة دي دخلتنا في ادبيات جديدة الولية اديناها مصاريف الشهر قالت كملت قبل الشهر ما ينتهي لمان طلبنا مراجعة قالت رافدة تيمنا بتقرير المراجع العام الذي اتضح ان عددا من الجهات رافد مراجعة…عليه نطلب من السيد المراجع العام توضيح الطرق التقنية التي نتبعها للعثور علي مواطن الخلل…بس ما تقولوا لي غلاء معيشة…دي بلدنا رايقة و السوق نايم و الحاجات رخيسة رخاسة…

  22. aflaiga كتب:

    نيام : سجمك عاوز تراجع الحسابات السيادية الرئاسية ؟؟؟ انت جنيت ولا شنو ؟؟
    تعرف يا نيمو كير الحسابات بتاعة عواطف دى ما بيراجعوها اول ما ينتهى الرصيد ولو يوم 2 فى الشهر طوالى تشوف الاحتياطى الوطنى تغذى بيهو الخزينه نو دى عملية بتاعة شراكة وتقدير للظروف يعنى انت مش رصيدك بتاع القوامه مرات بيقطع نص الشهر اها بيطالبوك بى مراجعة الرصيد ؟؟!!!! ما بيمشو ليك وكان ماالليله بكره ولا ده براهو وده براهو ؟؟؟

  23. aflaiga كتب:

    استمتعو بالوصله دى واكلو كسره بمزااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااج

  24. ابكرون كتب:

    افليقا /نيام
    يا حليل رجال زماااااااان….!
    الواحد لمن يتنحنح ساكت البيت كلو بعمل حذية ونمره كامله عد…الواحده ما بتعرف اسم راجلا الا لمن يموت (يا حليل ابو الوليدات)…ولمن ينادوه : يا هه…..يا انت….يا هناي

  25. aflaiga كتب:

    ابكرون بشار سنكل وكل ( رجال زمان ) :
    كدى الواحد فيكم يجرب ياخد ليهو وحده من ( نسوان هسى ) حيكون تعليقك مفاده :
    الواحده لمن تتنحنح ساكت البيت كلو بعمل حذية ونمره كامله عد…الواحد ما بعرف اسم مرتو الا لمن تموت . ده لو ماتت طبعا !! ههههههههه
    ده بالنسبه لى انا طبعا لكن نيام ده ما عارفو مالو يمكن يكون شهادتو تسنين !!!!ههههه
    غايتو افليقا برغم كل المحاولات السمسميه لانقاص الكفاءة القتاليه مخالفة تسلسل الاقدميه الا انه كل حين بياخد نفس طويل و و و و …………. يكتمو فى حنانو . لمن حنانو ذاتو جاهو ضيق نفس ههههههههههههه الله يجازى محنك يا ابكرون ..

  26. ابكرون كتب:

    ههههههههههه ضحكتني يا فلقه والله …لكن ليك حق انا من (جعير ) الصين آمنت…..خليك كاتم النفس في الحنان بس الكتمان بجيب الطبقه والطبقه بتجيب اللبعه….واللبعه بتودي حمد النيل واخوانه…البكري واحمد شرفي (تبره يا يابا وتستبره لسه جاهل وسغير)….
    انا المحيرني عزت ده من رجال زمان الياحليلم …عله بس برمي صااااجات تقيله ما بوحل البتة……

  27. طفشانة كتب:

    ابكرون كيفك

    ناس المدونة عرفو ولا لسة ولا افتنك

  28. حاج أحمد السلاوى كتب:

    طفشانة ..
    أنا غايتو عندى إحساس ..وإحساسى دايمن فى محلو ..
    الزول دا غادر الدوحة إلى جهة غير معلومة ..
    أنا بتصل على التليفون ..والتليفون مقفول ..
    يا ربى يكون مشى نيوزيلندا ..ولا فنزويلا ؟؟
    غايتو .. يا خبر اليوم بفلوس …وبكرة يبيعوهو بالكيلو .. ولا الكوم بقرش والدقة بلاش ..
    طفشانة .. العرف عرف ..والما عرف بكرة يعرف ..
    بس إنتى ما تفتنى ..أوعك ..
    والنشوف آخرتا شنو .. معاهو !!!!!!!!!!!!!!!!

  29. نيام كتب:

    افلي:
    “يعنى انت مش رصيدك بتاع القوامه مرات بيقطع نص الشهر اها بيطالبوك بى مراجعة الرصيد ؟؟!!!! ما بيمشو ليك وكان ماالليله بكره ولا ده براهو وده براهو ؟؟؟”…هههههههههههه والله يا فلقة انت بتقول في كلام عجيب عجابة ياخ رصيد القوامة دا انتهي زمان قبل ناس زين و تن تن و خليك سوداني هسع نحنا شغالين في رصيد القيامة…
    لكن خليني من دا انت اخوي البشاوي دا مالووووو!!!قلت لي الصرافة في شارع الناس القيافة…كدي باريهو بالطوالة..بس اعمل لفيت دا عيونو زي القعو مركبة شمال يمين امام خلف و كمان عندها وب كام…

  30. طفشانة كتب:

    طبعا انا عرفت يا حاج احمد بس كنت عاوزاهو اتكبكب واحلفنى اقول لى عليك الله ما تتكلمى لكن حا اسمع كلامك واسكت

  31. ابكرون كتب:

    سلولو في اخر تلفون في العيد مش قلته ليك عندي ماموريه رسميه مسقط
    لكن الزهايمر
    كان الله في عونك
    حاتصل بيك

  32. حاج أحمد السلاوى كتب:

    أبكرونا … يطرشنى ما سمعت منك كلام زى دا ..
    وبعدين مسقط وين موقعها الجغرافى فى الكرة الأرضية .. موش هى الجزيرة الواقعة ما بين أندونيسيا وكوبا ؟ ..أنا كنت فاكرة فى حتة تانية ..الحمد لله البقت هناك .. بس راجع متين ؟
    إنتى سامعة .. يا …. طفشفش ؟؟؟؟؟؟

  33. طفشانة كتب:

    سااااااااااااااااااااااااااااامعة وفايت اضانى
    ههههههههههههه

  34. نيام كتب:

    مشاكلز:
    “الشعب يتقشف و البلد فيها عدد غير محصور من المساعدين و المستشارين للرئيس وكم و سبعين وزير وفوق ال800 نائب برلماني وحكومات الولايات المترهلة بي وزراء و مساعدين و مستشارين”
    اتخيل يا مشاكلز بلد زي بريطانيا تبيع مكتباتها و غاباتها و تطفئ نور الشوارع ليلا و تخفض الميزانية العسكرية و تسحب جيشها من افغانستان و العراق …ونحنا يلهطوا و يقولوا لينا اربطو البطون…حضر حزامك الغريق قدامك…
    لكن يا مشاكلز انت زمان شاكلتنا لمان قلنا الاحسبون ناس ما كويس كان رايك شنو؟؟؟؟

  35. ابكرون كتب:

    اصبت بصدمة والله وانا اطالع هذه الفضيحة فقط طالع الرابط ادناه
    وزير المالية هذا الذي يطلب من شعبه التغشف هو نفس الشخص الذي وقع علي هذا العقد المعيب الخاص بمجرد وحتة مدير للاوراق المالية (بشتغل شنو ؟؟؟؟)
    قس علي ذلك كم تبلغ عقودات رواتب ومخصصات الوزراء والمستشارين واعضاء البرلمان والولاة والمحافظين والمعتمدين ومدراء شركات البترول والمصافي والسكر والموانئ ووووووووووووو؟

    http://www.alrakoba.net/news-action-show-id-21398.htm

  36. نيام كتب:

    المبلغ ده ادعموا بيهو السكر و سكروا سوق الخرطوم للاوراق المالية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s