حالتو بى وازع

Posted: السبت,23 أكتوبر, 2010 by الفاتح جبرا in ساخر سبيل

العبد لله يقترح أن تتم كتابة التحذير التالي في مكان بارز على رأس الصفحة الأولى من كل صحيفة، والتحذير يقول: (هذه الصحيفة تحتوي على تصريحات مسؤولين لذلك ننصح مرضى القلب بتفادي قراءتها).. فلقد لاحظت أن حالتي الصحية بدأت مؤخراً في التدهور بعد أن كانت عال العال منذ أن قمت بعمل دعامات في (الشريان التاجي) قبل عامين ونيف.

وكمثال لهذه التصريحات والتي كتبنا عنها مؤخراً ذلك التصريح للسيد وزير المالية الذى دعا فيه الشعب السوداني الفضل إلى التقشف (أى والله ) والعودة إلى (الكسرة والعواسة) معتقداً سعادته أن الشعب الفضل قد ترك الكسرة إلى (الكافيار) ! ألا تتفق معي أيها القارئ الكريم، أن مثل هكذا تصريح عاوز ليهو زول نصيح وشديد لا تستجيب خلايا مخه أو عضلات قلبه أو جدران شرايينه لأي نوع من أنواع (الاستفزاز المفاجئ) حتى لا (يروح فيها)؟!

وعشان الزول يروح فيها (صحي صحى) ويلحق أمات طه فليستصحب مع دعوة الأخ وزير المالية المطالبة بالتقشف التقرير السنوى للعام 2010 الذى قدمه السيد المراجع العام مؤخراً والذى كشف فيه عن تزايد حالات الاعتداء على المال العام لـ 16.6 مليون جنيه للعام (2009_2010) مقارنة بـ 5.1 مليون في العام (2008_2009) بنسبة (9,0%) من إجمالي إيرادات الدولة الفعلية البالغة 19.2 مليار جنيه (يعنى لو إيرادات البلاد دى كومناها 100 كوم متساوية فـ 9 كيمان قاموا بيها الجماعة) ، ولم ينس السيد المراجع العام كعادته أن يكشف لنا في تقريره حول الأداء المالي للدولة للعام (2009) عن رفض وحدتين تقديم حساباتها للديوان (رجااااله كده والما عاجبو يضرب راسو فى الحيط) ، كما لم ينس أيضاً أن يكشف لنا عن 48 وحدة لم تقدم حساباتها (مش على كيفا؟) بجانب (66) تحت المراجعة (وح تظل طبعن) ! والسيد وزير المالية ينادي ويطلب من الشعب الفضل التقشف يكشف التقرير الذى قدمه المراجع العام عن الأداء المالى للحكومة عن مديونية مرحلة لم يتم تحصيلها للإدارة العامة للجمارك وضعت باسم رجل أعمال (يا ربى يكون منو؟) ولم يتخذ الإجراء اللازم بشأنها (فاضين من ستات الشاى) ، فيما بلغت مديونيات الوحدات الحكومية (10،2) مليون جنيه، وقال التقرير إن معالجتها تتم خارج السجلات المحاسبية (كيف مش عارف؟) . والسيد وزير المالية يدعو الشعب الفضل للتقشف أفصح التقرير عن استمرار المخالفات لهيئة المخزون الاستراتيجي التى بلغ العجز فيها (1،7) مليون جنيه بجانب مديونيات متعثرة السداد !!

وقد أشار التقرير للجهود التى صاحبت محاولات الدولة الجادة لإعادة (أموال الشعب الفضل) فقد ذكر أنه قد تم البت في تهمة واحدة من (65) تهمة ( ما قصرتو والله .. أيه الهمة دى) ،ويستطرد التقرير قأئلا أن تسع منها بالمحاكم و(7) أمام النيابات و(22) لا زالت أمام رؤساء الوحدات !! ويختتم السيد المراجع العام تقريره وهو يقر بوجود تجاوزات بمشروع العربات الحكومية وإدارة الأموال خارج الموازنة بجانب المخالفات في الجمع بين وظيفتين والجمع بين السكن المجان وبدل السكن ! وحتى أضعك فى الصورة عزيزى القارئ و(أضع السيد وزير المالية) الذى يطالب بالتقشف دعنى أعود بك لتقرير المراجع العام للعام الماضى إذ يقول في تقريره: إن هنالك 70 وحدة لا تزال تحت المراجعة، و34 وحدة لم تقدّم حساباتها للمراجعة من بينها 4 وحدات رفضت الاستجابة (يعني ما عاوزة تتراجع وكده!). والحال هو هذا الحال الذى يسير من سئ إلى اسوا إعتقد بأنه يجب علينا أولاً أن نتقشف فى الفساد … يعنى يكون فساد (ود ناس) ومافى داعي (للبع) التقيل ده ..

ويحضرنى فى هذا المقام تصريح وزير العدل السابق الذى صرح فيه لأحد القنوات الفضائية قائلاً : (نحن في السودان نعول كثيراً على الوازع الديني)، موضحاً أن (الوازع الديني حمى الكثيرين من الوقوع في الفساد)، ومشيراً إلى أنه (يعد أكبر وسيلة لمكافحة الفساد).. انتهى تصريح السيد الوزير والذي معناتو إنو: لولا الوازع الديني لكان حجم الفساد أقل (يعنى ده حالتو بى وازع!!) …

كسرة :

سال المعلم التلميذ: ما هو أغنى بلد فى العالم

رد التلميذ: السودان يا أستاذ

الأستاذ متعجباً : كيف يعنى ؟ أغنى بلد السودان ؟

التلميذ : عشان قاعدين يسرقو فيهو الزمن ده كلو ولسه ما كمل !

Advertisements
تعليقات
  1. طارق أب أحمد كتب:

    يعنى بعد
    العواسه فى فن السياسه
    جونا بى
    شناة الطبع قى مسائل اللبع

    بروف و ضيوفه
    سلام

  2. قرن شطة كتب:

    الاخ / الفاتح جبرا
    صباح الخير
    يبدو انو فى ناس كتار – ولعجب الامر وشريعته – قد فرقوا بين الدين والدولة فيما ينفعهم ويخصهم…يجب ان يكون الوازع القانون الرادع والمطبق على كل البشر دون تفرقة ..إنما أهلك الذين من قبلكم انهم كانوا إذا سرق الشريف تركوه واذا سرق الضعيف اقاموا عليه الحد…نحنا قاعدين ودايرن نشوف آخرتا شنو ده كان مامتنا بالفجاءة وضغط الدم المرتفع !!

  3. حاج أحمد السلاوى كتب:

    طيب كويس يا الفاتح أخوى لو قدرنا وكتبنا العبارة دى فى الجرايد الومية نسوى شنو مع الإذاعة الرسمية والتليفزيون القومى ..؟؟أنا اقترح يختو رسالة دائمة على شاشة التليفزيون : هذه القناة أخيارها كوووولها كاذبة أوعك تصدق الكلام البيقولوهو دا كلو .. سماع نشرات الأخبار على مسئولية السامع.
    امس سمعتا واحد مقدم برنامج بيشيد بالإقتصاد السودانى وأنه إقتصاد معافى تماماً وفى تحسن مستمر ..

  4. aflaiga كتب:

    البروف : تقرير عادى جدا يعنى شنو ما قولهم صواب يحتمل الخطا واللغف الفى التقرير ده ربنا حيغفرو لانو الناس اللغفت دى اجتهدت وليها اجر الاجتهاد يعنى عاوزهم يقعدو ساكت لا يجتهدو لا يغلطوا ؟؟ بالغت لكين طيب المؤمن امره كله خير ليه ؟؟ ما عشان يجتهد ولا شنو ؟؟؟؟ !!!!!!!!!!
    اسى انتو لا بتجتهدوا لا بتخلو الناس تجتهد ؟؟؟
    غايتو يا بروف انا مستغرب فى حاجه واحده بس تعرف هى شنو ؟؟
    طيب ما دام فى فساد والدوله عارفه انو فساد مش ممكن يعلنو للناس انو ماف فساد ويقومو يحاربو الفساد بالدس وبعد داك يطلعو بيان انو والله كان فساد ونحنا حاربناهو ودى النتيجه ( انو برضو فى فساد ) ههههههههه ..
    متذكر يا بروف جدنا بوليس قدييييييييييم قال لينا فى احدى الحكايات تعرف يا ولدى اى بلاغ لا زم يكون فى متهم ومعروضات المتهم بيخش الحراسه والمعروضات بتمشى النيابه …
    اسى عليك امان الله فى تقرير لكن لا فى متهمين لا فى بلاغات ولافى معروضات !!!!!!!!!!!
    الظاهر المتهم بيمشى بيتم والمعروضات بتمشى بيت المتهم !! ههههه
    غايتو الناس ديل محتاجين لتعلم فن كوجين المكوجن وده ممكن يمشو لخالد مدنى يديهم فيهو حصة عصر ….

  5. خالد مدني كتب:

    يا افليقا : جاء في الاثر انه من كلام النبوة الاولي : اذا لم تستحي فافعل ما تشاء .
    يا اخوانا – من الاخوان – سويتوها شينه لكن … هي انتو لو ما بتخافو ما بتختشو ؟؟؟ زول ضابط كبير جدا – قول كيلو ونص – في الجيش وللا الشرطة … مش في النهاية موظف حكومة وعندو راتب معروف ؟؟؟ يجي يبني ليهو عمارة كم وكمين دور … بس دي تجي كيف ؟؟؟ وقس علي ذلك ان كنت تقيس … حتتحير ولو كنت ابليس .

  6. ياسين شمباتى كتب:

    الاستاذ جبرا..سلام..
    والله انا خلاااااااس قنعت من المراجع ومراجعتو والتلفزيون واذاعتو والمسئولين وعواستهم!!
    وديل ماشين بقاعدة ( من امن العاقوبة اساء الادب)..وللاسف انهم امنوا عقوبة المولى عزوجل الذى اساله ان يرينا فيهم يوما اسودا..
    اما عن الدين ووازعو فاخير اسكت بس!!

  7. aflaiga كتب:

    خالد مدنى : حقيقة عدم الاستحاء مشكله كبيره ..
    لكن يا خالد زول فهمو انو هو يد اله فى الارض وانو كل ما يصدر عنه ليس لغوا بل وحى منزل لا يستحى …

  8. aflaiga كتب:

    الفساد يا شباب لديه مقومات مهمه لوجوده كدى نتعرض ليها ولتعريفه بتصرف منى :
    اولا : الفساد فى تعريفه :
    بانه إساءة استخدام السلطة العامة (الحكومية) لأهداف غير مشروعة وعادة ما تكون سرية لتحقيق مكاسب شخصية.
    ثانيا انواع الفساد : تتنوع أشكاله إلا أن اكثرها شيوعاً هي المحسوبية والرشوة والابتزاز وممارسة النفوذ والاحتيال ومحاباة الأقارب
    ثالثا : الظروف الملائمة للفساد
    البنى الحكومية المتناحرة ( اى وجود مراكز قوى متنافره داخل النظام ) !!!!
    تركيز السلطة بيد صناع القرار و هم عملياً غير مسؤولين من الشعب ( دى ما عاوزه شرح طبعا ) …
    غياب الديمقراطية أو عجزها ( دى طبعا ما موجوده لانو نحنا ديمقراطيتنا كده صلاة النبى فوقا !!!! )
    العجز المعلوماتي: ويشمل:
    انعدام الشفافية في الحكومية (حرية المعلومات) في صنع القرار ( دى طبعا مافى لانو المراجع العام الله يخليهو بيدينا خلاصة خلاصةالتقرير كل سنه وكانه شغال مراجع عشان يطلع التقرر بس !!!!
    احتقار او إهمال ممارسات حرية الكلام أو الصحافة ( دى طبعا ما متوفره لانو اى زول عاوز يكتب عن رحلة الفنانات للشريف مبسوط منى بيكتب او مباراة الهلال واهلى الفاشر بيكتب !!!!
    ضعف المساءلة وانعدام الإدارة المالية الملائمة
    الفرص و المحفزات وتشمل:
    عمليات إستثمار كبيرة للأموال العامة ( عيييييييييييييييييييك !!!
    انخفاض رواتب الموظفين الحكوميين ( مقارنة بارتفاع الاسعار والمتطلبات المعيشية )
    الظروف الاجتماعية وتشمل:
    النخب الأنانية المنغلقة و شبكات المعارف. ( دى ما بقدر افسر فيها انا عندى عيال !!
    كون السكان أميين أو غير مهتمين وعدم قابلية الرأي العام على إنتقاء الخيارات السياسية. ( دى رايكم فيها شنو يا شعب يا واعى يا معلم الشعوب يا مفجر اكتوبر ومايو ويونيو و رمضان ذاتو !!!
    العجز القانوني ويشمل:
    ضعف سلطة القانون ( او بالاصح ضعفه تجاه الفاسدين وقوته تجاه المتاثرين بالفساد !!!!
    ضعف المهن القانونية ( ما شاء الله قوية لكنها يصحوها تصحى وتنقلب على صفحه
    عدم كمال العملية الانتخابية ( يعنى عدم مطابقتها للمعايير ولا شنو ؟؟
    حملات إنتخابية مكلفة يتجاوز الإنفاق فيها المصادر الاعتيادية للتمويل السياسي. ( دى كيف ؟؟
    غياب الرقابة الكافية للحد من الرشوه ( اى شركة فيها مراجع داخلى لكنه اما مغلوب على امره او داخلى شديد ما عندو شغله بالشغل البره !!!!

  9. aflaiga كتب:

    شباب : بالمناسبه فى حته مفقوده فى الشغله دى كلها الا وهى :
    هل من مصلحة النظام ان يبدو كفاسد حتى ولو كان فاسدا ؟؟؟
    هل اصبح المفسدون اقوى من النظام ويعجز عن محاربتهم ؟؟؟
    هل تعجز الدوله عن وضع كوابح لعدم حدوث فساد ( اجراءات وقائية ) ؟؟
    ما هى الاسباب الحقيقية لوجود فساد هل هو المال السايب ام تطور النزعة الاجرامية لدى المفسد ؟
    ولكى نخرج من هذا البوست بفائدة ولمعرفتى بتخصصات الزملاء هنا ارجو ان يحدثنا كل من الاتيه اسماءهم فى الموضوعات التاليه يعنى نظام ورشة عمل مصغره :
    البشاوى : ورقة عمل عن اجراءاتنا الرقابية على الفساد هل هى كافية للحد من حدوث الفساد ؟؟؟
    قرن شطه : تكوين الشخصية الاجرامية وتطورها الاسباب والدوافع .
    ابكرون : دراسة مقارنه بين نزاهة الموظف الحكومى زمان والان ودوافع الفساد بين الحاضر والماضى .
    ود الخلا : رؤية اسلامية للفساد بين التربيه والسلوك الاسلامى القويم ..
    مخير : الفساد فى الدول المتقدمه رؤية مقارنه بين واقع السودان وواقع دول اسيا .
    جبرا : دور الاعلام فى رقابة الفساد وتكوين راى عام مضاد له والتربيه الاعلامية الوطنيه المضاده للفساد .
    خالد مدنى : دور الاجراءات المحاسبية ودورة المستند المالى فى الحد من الفساد ودور المراجع الداخلى كنقطة انذار مبكره عن الفساد .
    عباس ركس : التربية الحزبية واثرها فى نشوء كادر مفسد دراسة تتناول النظام الاساسى لبعض الاحزاب و امكانات نشوء كادر فاسد .
    طارق اب احمد : الفساد فى القطاع الخاص ( جلدا ما جلدك جر فيه الشوك ) كيف تتغلب الشركات الخاصه على الفساد ؟؟
    ويا ريت الورشه دى تتعمل فى احدى القاعات عشان الموقع يكون حقق احد اهدافه الهامه وهى التنوير وما يكون موقع طق حنك ساكت …

  10. أم ناني كتب:

    سلام للجميع

    هو التقرير ده زاتو مشكوك في امرو
    معقول الاعتداء على المال العام 16 مليار بس؟؟؟؟؟؟؟؟؟؟؟؟؟؟
    افتكر الرقم الحقيقي بيحصل ال 600مليار و لا يمكن اكتر لكن المراجع العام شافا شينة تتطلع في التقرير
    مع انها ما حتفرق معانا

  11. طارق أب أحمد كتب:

    ((طارق اب احمد : الفساد فى القطاع الخاص ( جلدا ما جلدك جر فيه الشوك ) كيف تتغلب الشركات الخاصه على الفساد ؟؟))

    دى أسمها دبور و زن على خراب عشو لكن برضو جاهزين
    يللا نكون لجنه تنبثق عنها لجان متفرعه تهتم بمسا ئل العضه عند إجتماع اللجنه الما منبثقه و كمان ممكن تخت الوازع على جنب عشان تقدر تفكر بشكل إيجابى يصب فى الإطار العام للتراكم المعلوماتى و محدش يسألنى ايى حاجه لأنى مش فاهم ولا حاجه

  12. aflaiga كتب:

    اب احمد : انتو كمان عندكم لجان انا قايل بلدياتنا النوبى ده ما عندو كلام زى ده فى مملكتو !!
    حين يحس الانسان ان هناك نوازن فى الحقوق والواجبات وان المؤسسه التى يخدمها تخدمه وتخدم الاخرين وانه يمارس عمله ليكسب عيشه ويقدم خدمة للمجتمع لا اعتقد انه سيكون معرضا للفساد اللهم الا اذا كانت هناك عوامل تربوية سابقه اثرت فى زغللة العيون او رجفان القلوب عند التعرض للفتن .

  13. نيام كتب:

    البروف:
    يعني بعد اللبع دا كوووولو داير ليك قلب يكون شغال بدون تعديل انا هسع شغل بخرطوش موية عادي عملنا ليهو تعديل و شغال في امان الله بس تعمل ليهو نظام شفاط تسحب كل المبلغ (اقصد الدم ) و ترجعو علي اقساط وكده تكون خزنتك مظبوطة وكت المرجعة…وممكن ترفد المراجعة اذا شعرت انك بالغت حبة او قسطك ما جاهز…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s